“Sadoqat” газетаси

Biz giyohvandlikka qarshimiz! Mustaqilligimizning 35 yilligi munosabati bilan Kasbi tumani 14-son Bolalar musiqa va san’at maktabi o‘qituvchi va o‘quvchilari tomonidan “Yoshlar giyohvandlikka qarshi” shiori ostida “Biz giyohvandlikka qarshimiz!” nomli musiqiy fleshmob tashkil etildi. Tadbirda yoshlar o‘rtasida giyohvandlik va narkotik vositalar bilan bog‘liq jinoyatlarning oldini olish, sog‘lom turmush tarzini targ‘ib qilish, yosh avlodni turli zararli illatlardan asrashga qaratilgan targ‘ibot-tashviqot ishlari musiqa va san’at orqali ifoda etildi. Musiqiy chiqishlarda yoshlarga sog‘lom hayot — yorqin kelajak sari mustahkam qadam ekani, giyohvandlik esa inson salomatligi va kelajagiga tahdid soluvchi illatligi ta’sirchan tarzda targ‘ib qilindi. Fleshmob ishtirokchilari o‘z chiqishlari orqali tengdoshlarini sog‘lom hayot tarzini tanlashga, bo‘sh vaqtlarini mazmunli o‘tkazishga hamda zararli illatlardan yiroq bo‘lishga chorladilar. 👉 @Kasbisadoqat

Elektron xizmatlardan samarali foydalanish — zamon talabi Bugungi kunda raqamli texnologiyalar hayotimizning barcha jabhalariga jadal kirib kelmoqda. Bu jarayonda aholining zamonaviy axborot-kommunikatsiya texnologiyalaridan samarali foydalanish ko‘nikmalarini shakllantirish, elektron axborot-resurslaridan keng foydalanish imkoniyatlarini yaratish muhim ahamiyat kasb etadi. Kasbi tuman axborot-kutubxona markazining AKT va raqamlashtirish xizmati tomonidan elektron o‘quv zaliga tashrif buyuruvchi foydalanuvchilar uchun shu yo‘nalishda muntazam targ‘ibot va tushuntirish ishlari olib borilmoqda. Tadbirlar davomida kitobxonlarga markazda yo‘lga qo‘yilgan zamonaviy kompyuter xizmatlari, elektron axborot-resurslari va ma’lumotlar bazalaridan foydalanish imkoniyatlari haqida batafsil ma’lumot berilmoqda. Xususan, elektron katalog orqali kerakli adabiyotlarni izlash, elektron kutubxona resurslaridan foydalanish, internet orqali ilmiy-ta’limiy manbalarga murojaat qilish hamda kompyuter xizmatlaridan unumli foydalanish bo‘yicha amaliy tavsiyalar berilmoqda. Markazning elektron o‘quv zali zamonaviy kompyuter texnikalari bilan jihozlangan bo‘lib, kitobxonlarga sifatli elektron xizmatlar ko‘rsatish uchun barcha zarur sharoitlar yaratilgan. Jumladan, Kasbi tumani hokimi To‘xtamurod Meyliyevb tashabbusi bilan 64 million so‘m mablag‘ evaziga xarid qilingan 8 ta zamonaviy kompyuter foydalanuvchilar ixtiyoriga topshirilgan. Bugungi kunda mazkur texnikalardan samarali foydalanilib, kitobxonlarning elektron axborot-resurslaridan foydalanish, mustaqil ta’lim olish va internet xizmatlaridan foydalanish imkoniyatlari yanada kengaymoqda. Targ‘ibot va o‘quv-amaliy mashg‘ulotlarda foydalanuvchilarga elektron o‘quv zalidan foydalanish qoidalari, kompyuter texnikalariga ehtiyotkorona munosabatda bo‘lish, axborot xavfsizligi talablariga rioya etish hamda elektron resurslardan unumli foydalanish tartibi tushuntirilmoqda. Kitobxonlarni qiziqtirgan savollarga mutaxassislar tomonidan batafsil javob berilib, zarur amaliy yordam ko‘rsatilmoqda. Ayniqsa, elektron xizmatlarning yo‘lga qo‘yilishi kitobxonlarning kerakli axborotni tez va qulay topishiga, zamonaviy bilim manbalaridan foydalanishiga keng imkon bermoqda. Bu esa kutubxonaning an’anaviy xizmatlari bilan bir qatorda raqamli imkoniyatlardan ham samarali foydalanish uchun muhim zamin yaratmoqda. Axborot madaniyatini yuksaltirish, kitobxonlarning raqamli savodxonligini oshirish va zamonaviy elektron xizmatlardan foydalanish imkoniyatlarini kengaytirish borasidagi ishlar bundan buyon ham izchil davom ettiriladi. Zamonaviy kutubxona — bu nafaqat kitob saqlanadigan, balki bilim, axborot va ilg‘or texnologiyalar uyg‘unlashgan maskandir. Elektron xizmatlarning rivojlanishi esa kitobxonlarning axborotga bo‘lgan ehtiyojini tezkor va sifatli qondirish, kitobxonlik hamda axborot madaniyatini yuksaltirishga xizmat qiladi. A. MUQIMOVA, tuman axborot-kutubxona markazi AKT va raqamlashtirish xizmati rahbari. 👉 @Kasbisadoqat

Маҳаллаларимиз обод, дилимиз шод бўлсин Ободлик – халқимизнинг азалий қадрияти, миллий турмуш тарзимизнинг ажралмас қисми. Обод хонадон, озода кўча ва файзли маҳалла инсон қалбига қувонч бағишлайди, юрт тараққиёти ва фаровон ҳаётнинг муҳим омили ҳисобланади. Ҳар биримиз яшаб турган хонадон ва кўчамизни озода сақласак, маҳалламиз ҳам тобора кўркамлашиб боради. Бунинг учун катта меҳнат ёки ортиқча вақт талаб этилмайди. Ҳар куни атиги бир-ярим, икки соат вақтимизни ҳовли ва хонадонимиз жойлашган ҳудуд атрофни тартибга келтиришга сарфласак, қўни-қўшниларни бу ишни одатга айлантиришга чорласак юртимиз янада обод ва файзли бўлади. Озода хонадонга кирган ҳар бир меҳмоннинг дили яйрайди, томорқадан унумли фойдаланиш эса рўзғорга барака ва тўкинлик олиб киради. Хонадоннинг файзу баракаси унинг остонасиданоқ сезилади. Маҳалланинг ободлиги эса биринчи қадамдаёқ кўзга ташланади. Шу боис ҳар бир фуқаро ўз уйи ва кўчасининг озодалиги учун масъул эканини унутмаслиги лозим. Афсуски, баъзан ўт-ўланларни чопиш ўрнига уларни ёқиб юбориш ҳолатлари ҳам кузатилмоқда. Бу эса бир неча йил давомида парвариш қилинган дарахт ва ниҳолларнинг нобуд бўлишига, атроф-муҳитга зарар етказилишига сабаб бўлмоқда. Бундай бепарволикка барҳам бериш барчамизнинг бурчимиздир. Ислом дини ҳам поклик ва ободончиликка алоҳида эътибор қаратади. Қуръони каримнинг баъзи оятлари инсон зиммасига ер юзини обод қилиш, табиатни асраш, Аллоҳнинг неъматларидан оқилона фойдаланиш ҳамда жамият равнақига ҳисса қўшишдек улуғ масъулият юкланганини англатади. Ободлик ва озодалик – ҳар бир инсоннинг маданияти, маънавияти ва ватанпарварлигининг ёрқин ифодаси. Келинг, азалий қадриятларимизга содиқ қолиб, хонадонларимизни, кўчаларимизни ва маҳаллаларимизни янада обод қилайлик. Маҳаллаларимиз обод бўлса, дилимиз шод, юртимиз янада фаровон бўлади. Дилмурод БОБОҚУЛОВ, туман бош имом-хатиби. 👉 @Kasbisadoqat

“QOG‘OZSIZ BIR KUN” TADBIRI O‘TKAZILDI Kasbi tumani Favqulodda vaziyatlar bo‘limida “Qog‘ozsiz bir kun” tadbiri tashkil etildi. Tadbir doirasida hujjatlarni elektron shaklda yuritish, qog‘oz sarfini qisqartirish hamda zamonaviy raqamli texnologiyalardan samarali foydalanish masalalariga alohida e’tibor qaratildi. Shuningdek, xodimlarga elektron hujjat aylanishi tizimining afzalliklari, ish jarayonlarini raqamlashtirish orqali vaqt va resurslarni tejash, hujjatlar bilan ishlash samaradorligini oshirish bo‘yicha tavsiyalar berildi. Mazkur tadbir davlat organlari faoliyatida ekologik mas’uliyatni kuchaytirish, qog‘oz iste’molini kamaytirish hamda raqamli boshqaruv tizimini yanada rivojlantirishga xizmat qiladi. 👉 @Kasbisadoqat

🤩🤩 РАСУЛУЛЛОҲ МАҚТАГАН МЕВА... ✅ Ўзбекистон мусулмонлари идораси Матбуот хизмати Яқинларга ҳам юборинг. 👉 @Kasbisadoqat

Тонгги тафаккур Яқинда япониялик руҳшунос, Хидеки Ваданинг "Саксонта тўсиқни кечиб ўтиш" номли китоби нашрдан чиқиб, катта шов-шувга сабаб бўлди.     Китоб дўконларида ушбу китобнинг пайдо бўлиши ва қисқа вақт ичида 500000 донадан ҳам ортиқ сотилиши, кўпчиликнинг олдиндан айтиши бўйича, сотувда энг муваффақиятли китоблардан бўлиб, яқин ойларда бу сон  миллионтага етиши кўзда тутилмоқда.     Доктор Вада 61 ёшда, У кексалар соғлиги соҳасида катта малакага эга бўлган кузатувчи мутахассис —эксперт бўлиб ишлайди. У ўзининг бой ҳаётий тажрибасини 44 та қоидага умумлаштириб, инсоннинг 60 ёшдан кейинги... анча эркин ва қимматли ҳаёт сирларини жамлади. Бу қоидалар оддий бир ҳолдек туюлса-да, лекин бунда чуқур ва юксак донишмандлик ўз аксини топган: * Ҳар куни сайр қилинг * Аччиғингиз чиққан пайтда чуқур нафас олинг. * Ҳаракат қилинг аммо, танангизни зўриқишига йўл қўйманг. * Сувни ёзда кондиционер ишлаб турган пайтда ичинг. * Овқат (луқма) ни яхши чайнанг... ақл оғиз билан уйғунликда ҳаракат қилади. * Хотира ёш ўтиши билан эмас, ҳаракатсизликдан йўқола бошлайди. * Дориларни суиистеъмол қилманг. * Зарурат туғилмаган ҳолда артериал қон босими ва қондаги қанд миқдорини пасайтиришга уринманг. * Ёлғизлик жон-жигарлардан четда қолиб кетиш эмас, тинчлик, хотиржамликдир. * Ялқовлик—бу хижолатли ҳолат эмас. * Яхши кўрган ишларингизни бажаринг, яхши кўрмаган ишларингизни ортга суриб қўйинг. * Уйда ўзингизни ҳеч нарсадан  чекламанг. * Сизнинг кайфиятингизни кўтариб, хурсанд қиладиган егуликни истеъмол қилинг... вазнингизга озгина қўшилгани зиён етказмайди. * Сизга маъқул бўлмаган инсонлар билан вақтингизни беҳудага ўтказманг. * Телевизорга жуда ҳам кўп қараманг. * Дардлар билан тинимсиз курашиш ўрнига, улар билан яшашни ўрганинг. * Некбинлик(оптимистлик—ҳаётга ишонч билан қараш) —малҳам, дори. * Мевалар, қуёш нури, ҳаво... булар ҳаммаси бахт манбаи. * Юрагингизда борини изҳор қилинг. * Зарурат туғилганда фикрингизни ўзгартиринг, бу муаммо эмас. * Ўқишни тўхтатиш—қариликнинг бошланишидир. * Мамнун бўлиб юриш яхши... табассум эса ҳар вақт ютуқларни етаклаб келади. * —А! Қариликчи? Қарилик азоб, оғир юк эмас—бу инъом.    Доктор Вада ўзининг мутафаккирона сўзлари билан бизга шуни эслатадики, киши 60 ёшдан ошди дегани бу, унинг  йўли  охирлаб қолди дегани эмас  аксинча,  оддийлик ва вазминлик даврининг бошланиши...  қачонки, биз ҳаётга ёрқинроқ нигоҳ ташлаб ва сидқидилдан ўзимизга ёндоша бошлашимиздир.   Хулоса: Ўзингиз учун яшаб, ҳар куни озгина ҳаракат қилинг ва кўпроқ кулинг.    Сиз ўз танангиз ва ёшингизни севиб қабул қилинг шунда, Сиз бахтни ўйлаганингиздан ҳам яқинроқ эканлигини билиб қоласиз.   Бу маълумотларни яқин дўстларингиз билан ўртоқлашинг, зеро, донишмандлик ёш танламайди.    Ёшларга ҳасад қилманг: Ёшликни ҳаммамиз бошдан кечирганмиз, кексаларга ҳавас қилинг, улар ҳаётда ҳамма нарсани кўрганлар.    Эрта тонгда мени ортда қолдириб кетган кексаларга ҳавас қилинг! Олам бўйлаб югуриб-елиб юрадиган балиқчи, замбуруғ терувчи кексаларга ҳавас қилинг!    Ҳа! Ёшликларидагидек: Ўзларининг сочларига, пойабзалларининг тагчармларига, жиддий ва башанг кийиниб юришларига эътиборли бўлган кексаларга ҳавас қилинг!    Сиздаги йўқотилмаган ҳаёт қувончи шубҳасиз, болаларингиз ҳамда набираларингизда такрорланади.   Ҳаётнинг энг оғир сабоқ, синовларида ҳам, эзгу истаклар билан тўлиб-тошиб яшаш керак.   Ёшларга ҳасад қилманг! Истасангиз айни дамда улардек бўлиш қийин эмас аксинча, бир умрга ёш бўлиб юрган кексаларга ҳавас қилинг!     Бу ҳаммаси—биз кексалар ҳақимизда!!!   Рус тилидан, Ислом АРСЛОН          таржимаси. 👉 @Kasbisadoqat

Қалбимда уввлайди тилсиз ҳайқириқ, Тун мисоли сирли, тун мисоли жим. Ғамларим қўллари бўлган қабариқ, Бир умид излайди бўлмайди таслим. Ҳар қадам қўрқувдир, ҳар қадам умид, Ёмғирнинг ўрнига ёғар маломат. Сабр-соябоним, шукур бир калит, Мен бир йўловчиман, Ҳамроҳим-тоқат. Йўлларимда гул эмас, тиконлар ўсди, Чанқоғим қиндирди ғамлар шарбати. Бир тоғдан ошгандим мингтаси тўсди, "Манзилим гўзалдир" кўнглим ҳикмати. Ҳар қадам бир хато, ҳар хато - сабоқ, Ҳар сабоқ бир ҳикмат, ҳар ҳикмат - жумбоқ, Ҳар жумбоқ бир ечим, ҳар ечим-сўроқ, Ҳар сўроқ бир оғриқ, ҳар оғриқ-жавоб. Мен бир йўловчиман... Роҳат РЎЗИБОЕВА. 👉 @Kasbisadoqat

Қалбдан туғилган мисралар Роҳат Рўзибоеванинг адабиётга меҳри беқиёс. У шеъриятни қалб амри, руҳ эҳтиёжи деб билади. Унинг шеърларида самимий туйғулар, ҳаётий мушоҳадалар ҳамда инсон қалбининг энг нозик кечинмалари ўз ифодасини топган. Шу боис унинг қаламига мансуб мисралар ўқувчини ўйга толдиради, эзгуликка, инсон қадрини улуғлашга ва ҳаётнинг мазмунини чуқурроқ англашга ундайди. Ҳар бир ижодкор каби Роҳат ҳам изланишдан, мутолаадан ва ҳаёт сабоқларидан тўхтамаслиги муҳим. Зеро, кўп ўқиш, тинимсиз изланиш ва кенг мушоҳада шоир қаламини янада чархлайди, шеърларига теран маъно, юксак бадиийлик ва ўзига хос жозиба бағишлайди. Ишонамизки, Роҳат Рўзибоева ўзининг янги ва мазмунли ижод намуналари билан шеърият мухлислари қалбидан янада мустаҳкам ўрин эгаллайди. Унга ижод йўлида илҳом, бардавом изланишлар, юксак парвозлар ва улкан муваффақиятлар тилаймиз. 👉 @Kasbisadoqat

Житу-житси спорт турига қизиқишим ортиб бормоқда Спорт билан шуғулланиш инсонни жисмонан бақувват, маънан кучли ва иродали қилади. Мен ҳам айнан шу мақсадда жийу-житси спорт турини танладим. Машғулотларда мунтазам қатнашиб, ўз устимда тинмай ишлаяпман. Дастлаб тўгарак аъзолари ўртасида ўтказилган мусобақаларда иштирок этиб, илк ғалабаларимни қўлга киритдим. Кейин эса туман, вилоят ва республика миқёсидаги мусобақаларда муносиб иштирок этиб, совринли ўринларга сазовор бўлдим. Яқинда Қозоғистоннинг Олмаота шаҳрида бўлиб ўтган Осиё чемпионатида қатнашиб, бронза медалини қўлга киритганим мен учун унутилмас воқеа бўлди. Бу муваффақият мени янада кўпроқ меҳнат қилишга ва янги марраларни забт этишга руҳлантирмоқда. Келажакда халқаро майдонларда Ватанимиз шарафини ҳимоя қилиб, Ўзбекистон байроғини янада юксакларга кўтаришни орзу қиламан. Ишонаманки, қатъият, меҳнат ва ўзимга бўлган ишонч орқали бу орзуимга албатта эришаман. Муқаддас БАХТИЁРОВА, 12-умумий ўрта таълим мактабининг 7-синф ўқувчиси. 👉 @Kasbisadoqat

Шашка — севимли машғулотим Мен 12-умумий ўрта таълим мактабининг 10-синф ўқувчисиман. Бўш вақтларимда китоб ўқиш билан бирга тенгқурларим билан шашка ўйнайман. Шашка — ақлий спорт тури. Бу ўйин ниҳоятда қизиқарли бўлиб, унда мантиқий фикрлаш, стратегик режалаштириш, диққат, хотира ва сабр-тоқат муҳим ўрин тутади. Шашкага бўлган қизиқишим тобора ортиб бормоқда. Вилоят ёшлари ўртасида ўтказилган “Беш ташаббус олимпиадаси”нинг вилоят босқичида учинчи ўринни эгаллаганим бу спорт турига бўлган меҳримни янада оширди. Илгари шашкани оддий ўйин деб билардим.Устозларимнинг маслаҳатлари ва тўгарак машғулотлари орқали эса унинг инсоннинг фикрлаш қобилиятини ривожлантиришда муҳим аҳамиятга эга эканини англадим. Эндиликда ғалабага эришишнинг сири кўп машқ қилиш, чуқур фикр юритиш ва тезкор қарор қабул қилишда эканини яхши биламан. Чунки биттагина хато барча орзу-мақсадларингизни пучга чиқариши мумкин. Келгусида ҳам ютуқларга эришиб, устозларимнинг ишончини оқлашга ҳаракат қиламан. Файёза ЧОРИЕВА. 👉 @Kasbisadoqat