MedGuide by Hussein 🩺

Pulmonary Embolism PE Part Two في الطوارئ العراقية 🔸Management approach to PE 🔴ما تنفهم بدون الاستماع للجزء الاول 🔴للرجوع لفهرس شروحات الاقامة الدورية (أضغط هنا) 👉 #EmergencyTalksSeries

Pulmonary Embolism PE Part One في الطوارئ العراقية 🔸Causes & Risk factors of PE 🔸Pathophysiology & Complications of PE 🔴للرجوع لفهرس شروحات الاقامة الدورية (أضغط هنا) 👉 #EmergencyTalksSeries

عليكم السلام اهلا لا ليش مستحيل، بالعكس ممكنة جداااا بالسادسة عدكم مساحة ان تركزون بكل مادة بوحد، و هالشي ينطيكم الفرصة ان تعوضون الي راح و تغطون على نقاط ضعفكم. جدول دراسي متابعة فديوات تعليمية اختيار ملازم مضبوطة حل 1000 mcq بكل مادة اخذ هيستوري و اكزام بدوام السشنات و راح تشوف فرق واضح بالمستوى و الدرجات

بالمرحلة السادسة كلش ضروري يكون عدكم جدول و تحضرون اسبوع لكدام علمود تعرفون هل الوقت يكفيكم او لا. العملي تدرسوه اثناء السشنات بوقت الدوام، و دراسة البيت يكون للنظري بالكامل. اخر اسبوعين يكونين فارغين لمراجعة المادة و التحضير للاوسكي. و الاسلوب الاساسي للمراجعة يكون عن طريق حل الاسئلة، و تحلون على الاقل الف mcq بكل مادة علمود تحصلون اعلى شمولية ممكنة بالمواد. دراسة بمعدل اربع ساعات بعد الدوام ست ساعات ايام العطل كافية جدا لاكمال هاي المهام يبقى شطارتك بس بتنظيم الوقت

عليكم السلام اهلا الباطنية : ملازم هيثم نبيل دافيدسون فديوات نينجا نيرد و اوزموزز الجراحة: ملازم هيثم نبيل الجداول و المخططات فقط من بيلي فديوات ازموزز , د وهدان و احمد المطري الاطفال: ملازم طب نينوى مصدر بيبي نيلسون فديوات ازموزز شرح محمود اسماعيل باليوتيوب النسائية: ملازم طب موصل مصدر تلخيصات دكتورة نادين فديوات دكتورة نادين الماينرات: على ملازم الكلية فديوات ازموزز او اي فديوات قصيرة باليويتوب و بجميع المواد تكدرون تستعينون بالذكاء الاصطناعي لتبسيط المفاهيم

الاشتراك بالكورسات صارت عدنا مثل فكرة "البطل الخارق" الي نتأمل من خلالها ان نطلع من مأساة الدراسي مالتنا, بس بالحقيقة هو مو الحل لان الحل دائما بداخلكم, و البطل الخارق الوحيد الي ممكن تلكيه هو النسخة الجديدة من نفسك. بالنسبة الي كانت دائما فكرة "التذكير" هي الي تنفعني اكثر شي, اذكر نفسي بعواقب افعالي و عواقب عدم دراستي و عواقب تهربي من المسؤوليات, فكانت دافع تجنبي الندم هو الي يقودني للدراسة اكثر من دافع المكافاة الي هي الحصول على الدرجات. مشكلتنا الحالية هي انه صارت عدنا وسائل كلش هوايه من خلالها ننسى المسؤوليات الي علينا, فمن نتصفح بالفون تمر ساااعات بدون ما نعرف و نكون ناسيين تماما انه ورانا دراسة و امتحانات, و من نعوف الدرس و ننام او نوصي اكل و نطلع خارج البيت او نتصافن مع احلام اليقظة مالتنا, كلها وسائل نلجئ الها حتى ننسى الواجبات الي علينا. فالحل يبدي من عندك, بحيث حتى اذا ما درست, على الاقل لا تتهرب, و لا تلجئ للنسيان او الانكار, كون صريح مع نفسك و اعترف باخطائك و عجزك يوم بيوم, الموضوع راح يسبببلك الم نفسي كبير بالبدايات بس هو الحل الوحيد علمود ما تبقى تتهرب و تكون واعي بايامك و بالوقت الي ديضيع منك

فعلا صحيح كلامج, ما كل البنات متوفر الهم فرصة عمل خارج البيت, و بظل الاحتياجات الهوايه خصوصا بهاي الفترة, فترة الشباب او حتى بناء الحياة, يكون الاستقلال المادي من اهم المتطلبات. الفكرة تبدي اول شي من الاستقلال العاطفي, انه تفصلين نفسكِ عن التحكم الكامل الي دتمنحيه للاهل, لانه من نوصل لهاي العمر لازم نبدي نبني بعض الحدود لنفسنا بحيث من خلالها نتخذ قرارات خاصة بينا بعيدا عن تحكم الاهل, فهاي النقطة ينراد تشتغلين عليها, بس بشكل تدريجي, يعني مثلا ابدي بحدود و قرارات بسيطة خلال ايامكم و شوي شوي اتدرجِ للقرارات الاكبر. فكرة الشغل و بناء مشروع مادي ايضا ينرادله صبر و وقت, و قبل ما تفكرين بالفلوس لازم تفكرين بالناس و كالآتي: "I need to find a job” → “I need to find something someone is willing to pay me for.” هاي التغيير بالتفكير هو الخطوة الاولى لبناء هاي المشروع. بعدها تفكرين بالخطوات و المهارات اللازمة الي توصلكِ لهاي الهدف, و لا تقولين ابدا انه ما عندي مهارات لان المهارات تُكتسب و تطور مع السعي و التدريب, و لا تقولين كذلك انه السوق مليان, لانه دائما راح تلكين مجال للابداع, فالهوية الشخصية الها تاثير كلش كبير, الناس ممكن يفضلون العمل معاكِ مو بس بسبب مهاراتكِ لان ممكن اكو ناس اخرين يقدمون نفس الخدمة, بس يفضلون العمل بسبب انه حبو التعامل معاكِ بسبب الهوية الي تقدميها و هالشي محد يكدر ينافسكِ بيها, لانه الهوية تكون مميزة باستمرار. تبقى عدكِ اصعب خطوة الي هي الخطوة الاولى و البداية, و الي تعتبر "most potent psychological barrier" و هاي تنكسر بمجرد ما تحصلين على اول أجر, حتى لو كان شي بسيط جدا مثل خمس الاف او عشرين الف, لانه وقتها راح تحسين انه لكيتِ هالشي الي ممكن الناس يدفعون فلوس علموده, يبقى التالي اشون تطورين من هاي الخدمة بحيث يدفعون بعد اكثر. و طبعا كل الامور ممكن تسويها سواء بشغل خارج البيت او داخل البيت.

يا عليكم السلام اهلا هههه شكراً على الكلام الطيب، يسعدني كلش استفادتكم مكملين بيها ان شاء الله🖤

الشرح القادم بالقناة هي لكيسات (Pulmonary Embolism PE) وحده من الاكثر الحالات الي تضيع تشخصيها عالمقيمين

هذا الشخص هو من اهم اسباب عشقي للدراسة و للطب🖤 عالم ثااااني و مستوى بعييييد كلش عن البقية بس الي متعود يدرس على نينجا, ممكن يفهم هذا الكلام👌🏽

يا عليكم السلام الكروب كان متوقف بالفترة الي فاتت للاسف مدا يصيرلي مجال اكون اكتف بيها بس راح اسويها مفتوحة لكّم، و تكدرون تدرسون بيها سويا و تنزلون انجازاتكم اليومية و تحصلون “study partners” مثل ما تريدون. راح احاول هم اتابع المحادثة بيها و افلتر الاعضاء و السوالف غير الدراسية🖤 https://t.me/+j2c4AnyS6-M0ODYy

عليكم السلام يا اهلا الدراسة البطيئة الها هواي اسباب بس من اهمها: ضعف اللغة الانكليزية ضعف الاساس و بالتالي بطئ في الفهم و الاستيعاب و المثالية المفرطة انه تريد تضبط كلشي من اول كعده. هاي اهم ثث محاور تحتاج تشتغل عليها

حاليا عندك تجربة وافية بكلية الطب، فتكدر تشخّص مشاكلك بدقة و تتعلم من اخطائك، هاي اهم نصيحة الك. صرت تعرف بالضبط، شنو الامور الي تلهيك عن الدرس و الامور الي تتحجج بيها و تتهرب من الدراسة، فاهم السايكولوجي الخاص بشخصيتك، و فاهم المزايا و النقاط الضعف الي عندك. القادم هو ان تبدي تخلي خطة عملية و واقعية للتعلم من هاي التجربة و لتحسين النقاط الضعف و وضع نظام تسيطر بيها على (compulsions) الي تعاني منها. و راح الدرجات و العلمية تتحسن بشكل تلقائي وراها.

عليكم السلام اهلا الهيستوري و الاكزام، اثنيناتهم مهارات عملية تطبيقية اكثر من كونها نظرية، تحتاج جرأة، مهارات تواصل، مهارات يدوية (hand skills) و اكيد طبعا مع خبرة نظرية، بس الخبرة النظرية و الدراسة النظرية الهيستري و الاكزام ما راح يكون الها قيمة بدون المهارات العملية و التطبيق. و لذلك التطبيق هو الاساس، بالمرحلة السادسة تحتاجون على الاقل تاخذون هيستوري اثنين الى ثلاثة مع اكزام بالاسبوع، و اثناء اخذكم للهيستوري تحجون بحزم و جرأة مع المرضى و ما تكونون مترددين حتى ما تبينون مبتدئين و تفقدون ثقة المرضى و اهاليهم بيكم. فهاي الشغلات ما تحصلوها بدون التطبيق و المواجهة مستمرة مع المرضى.

قبل التعيين اشتغلت على هاي القناة اكثر شي بالاضافة لتعلم بعض المهارات، الي بديت احصل منها عائد مادي حاليا. ما شرط تشتغل و تحصل فلوس مباشرة بعد التعيين، ممكن تكون متدرب و تشتغل على مهارات جديدة تستفاد منها بعد بسنة و سنتين، فلا تخلون الفلوس الهدف الاول، ركزو اول شي عالتدريب و المهارات. اما المستشفيات الاهلية، فانت قدّم بكل الاحوال، رتّب CV حلو و منظّم، و قدّم على كلٍ المستشفيات و المنظمات المتاحة حتى اذا ما كانت بنفس المحافظة، و عيد التقديم اكثر من مرة، اتدرب على تطوير الردود اثناء المقابلة العمل و ممكن جدا تجيك فرصة و تحصل مقعد. اكو حتى شركات تركية و اجنبية بالعراق، خاص بالبناء و المشاريع و المجمعات السكنية، هاي الشركات هم تطلب اطباء للحالات الطارئة الي تصير بالشغل، و يقدمون راتب كلش حلو، تحتاج بيها بس تطور لغة و تحجي تركي و انكليزي و هم ممكن تحصل معاهم فرصة. شخصيا حصلت فرصة بشركة تركية بس للاسف ما كدرت اقدّم الها بسبب شغلي بالاقامة الدورية و تضارب الاوقات. الواسطات صحيح ترفع من حظوظكم و فرصكم، بس عدم وجود الواسطات ما تخليها معدومة، المهارات و طريقة التقديم و الخبرة الها دور كلش كبير همين

اعرف السبب الي تخلي نفسيتك تعبانه اول شي، شخّص المشكلة بدقة، و ابدي بتطبيق خطوات حتى لو كانت بسيطة بس اهم شي تكون مستمرة هيج امور تحتاج اصرار و عزم من الطالب نفسه، و انه ما يكون بارد و غير مبالي، و يبدي يدرس حتى لو مثلا بس على الفديوات بالاول، شوي شوي يطور اكثر، يحول على ملخصات و من ثم ملازم و يتصاعد. ان بقت المشكلة مستمرة وياه، الخطوة التالية ممكن تكون الدراسة الجماعية، تعتبر من الحلول الجوهرية لهاي المشكلة و ان بقت مستمرة، تجي الخيارات العلاجية اخر شي.

لا ماكو فرق و التخصص يكون عالمعدل و الfactor

عليكم السلام اهلا ما محتاجين تتركون الدرس علمود التمارين، ممكن ربع ساعة باليوم و لمدة ثث ايام بالاسبوع تكون كلش كافية لان تقلل من مقاومة الانسولين تحتاجون نظام و تنظيم وقت لا اكثر. فاكيد انصح بالتمرين و الدرس سويا، خصوصا انه راح تحسن من نفسيتكم همين كلش هوايه

طبيعي كلش هالتردد بالبدايات خصوصا انه ما عدكم خبره بالادرايات و واقع العمل. بس صدكوني سواء بالحكومي او الاهلي، شغل مقيم الدوري جدا جدا سهل، ممكن حتى الطالب يسويه، مجرد بعض الاجراءات تتعودون عليها باول اسبوع و الباقي راح تمشي بكل سلاسة فابدا لا تخافون، و اذا حصلتو فرصة، لا تفرطون بيها نهائيا