Mohammed DhyaAldain

غير اتمنى عندي جرأة المتزوجين بالأنستغرام من ينزلون فيديوات بالسيارة والبيت ويلبس دشداشة بيضة من تسوي هي كليجة ام الحلقوم

مشاعر الكراهية حملها بداخلك تجاه انسان مؤذية جداً وتستهلك الطاقة بشكل مرعب ، والأسوأ من هذه ماراح تحل شي بيها ، ولاتغير وضع رافضه انت ، والسكوت على هالمشاعر يخليها تكبر وتتحول الكائن حي من دم ولحم عايش بداخلك يستمتع بحقدك ويعلي صوته عليك ويتسلط على قراراتك . وتفريغك حرفياً من اَي تصرف عقلاني او منطق سليم . لازم تقتنع البشر يغلط عادي ويجذب ويخون ويخذل ويرجع بحجايته ومشاعره تتغير ، ومثل هالامور تصير بيك مو بس بالناس . وتعود نفسك شلون راح تتعامل ويه هذه النقص بدون ماتوكف او تخاف . وبمرور الوكت راح تعرف البشر مايستحقون الكراهية والانتقام وحرك الدم . يحتاجون بس للشفقة بهالسلوك راح تحجمهم بعينك الحد مايختفون من حياتك تماماً التجاهل في حد ذاته يحمل بذرة السعادة. "غازي القصيبي"

باليومين الراحن جنت كاعد ويه صديق، اكثر صورّة الينشرهن بهجة وفرح وونسة وسفر، من شفت الصور كلت هيج انسان بعد ماعنده شي ثاني يفكر بي، المفاجأة من يحجيلي كلي ذيج الايام جنت افكر بالانتحار، عنده مشاكل شخصية ماالها حل، وكل هالونسة العايشها محاولة يشوش على تفكيرة، قبل جنت مااصدك بهالقصص، واحد متوفرله كل شي بالحياة شلون مايعيش سعيد ومستقر ! وراها عرفت كل شي بالحياة نسبي من ضمنها السعادة، اكثر البشر يفكر بالناقصة هسه مو بالعنده، هذا مينفي اكو ناس اغبياء وعقلهم صغير ميعرفون قيمة العدهم، اذا فكرت راح تشوف اَي شي تملكه راح تخاف علّي بالبداية وره فتره تمل منه ويصير حاله اَي قميص مشتري وشامره بس الشي الناقصك راح تبقى طول عمرك تتخيله هو مصدر السعادة الهالسبب الله سبحانه وتعالى خلق بنفوسنا ( مفهوم الرضا )

شغلتين لاتسويهن بالعراق لاتشجع البرتغال ولاتشتري حذاء ابيض

رسمياً تم التنازل عن الجنسيه البرتغاليه 🇵🇹 وكذلك عن ستلايت البيت إلى الأبد

الزيدي دا يعيشنا شعور البدايات طلعو كلها حيتان بس احنه سمچ زوري

هسة لو معاند اهلك ومسافر ب2003 وخلصان من هذا الوضع جان هسة ابنك انطونيو يريدك تاخذه للمسبح وتخلص من قايش المبردة والحلفات

دائماً اكول ، الي تربينا علّي من اهلنا هاي مو بس تربية ، تُعتبر خارطة طريق يعني لو امك كلتلك ، لا تمد ايدك على حاجة مو الك ، ماتعتبر جملة ، تعتبر مبدأ . واذا ابوك كلك صير رجال وخلي كلمتك وحدة ، هاي سيرة لازم تمشي عليها طول عمرك . الناس تتخيل التربية تتلخص بس بالطفولة واحنه صغار التربية تصير مثل ظلك ، تمشي وياك وانت جبير ، وانت وحدك ، وانت بالغربة ،وانت بالقرار . من تكبر وتشوف نفسك كدام موقف ، راح تتذكر نظرة امك من جنت تغلط ، وصوت ابوك من يكلك ابقى محترم حتى لو الكدامك اقل منك ، فخلي سلوكك شهادة لأهلك خلي الناس تكول ، الله يرحمهم ربوه صح وامشي بتربيتهم ، لآخر العمر .

صديقي يخابرني ب 5 الفجر ويكعدني يكلي حمله اعتقالات شكلولك عليه ضام الشدات بالسبلت ؟ لو عمتي عاليه نصيف

نشوء البنت وتكوين شخصيتها من الصغر يبدي بتقليد سلوك امها . وبثقة وقرب ابوها ، اول خمس سنين حسب رأي فرويد بحياة الطفل . غريزياً تتطبع شخصيتة من البيت العايش بي . ويبدي يتعامل ويه البشر حسب حاجتة مو تربيتة . لأن الحاجة الانسانية المقصود بيها الحب والحنان والامان من تتشبع ، السلوك من وحده يتوجه للأنسان . مرات تشوف هواي بنات امها دكتورة وابوها مهندس يومية تصادق وتطلع ويه واحد ، متاحة بصورة مخيفة رغم هي مامحتاجة فلوس وعايزة لكمة حتى نكدر نحط سبب الهالرغبة . ومن تجي تتعامل وياها كأنسان طيب راح ترفضك وتفضل عليك اليريد منها شي ويعذبها بحياته . لأن عرفت الطيبة من ابوها حالة مزيفة . هلو بنتي شلونج تريدين فلوس وسيارة وسفرة . صار اني عندي شغل هسه من هالامور تتكرر يومية بحياة انسانة محتاجة احتواء اسري ومتشوف احد قريب عليها ، طبيعي الالتجاء للغير يصير مشبوه في سبيل إشباع رغبتها .

عندي اصدقائي اثنينهم مخلين صورة امهم وابوهم المتوفين ، ومتأكد الف بالمئة يحبوهم حبا جما ، لان التأثير واضح على ملامحهم ... ربي يرحمهم ويغفر لهم.

أكو مرة تحط صورة زوجها بروفايل، مو لأن تحب تفتخر بي كدام الناس، بس لأن صورتها بدون ملامحه تبقى ناقصة. وأكو رجّال يكتب ابو حيدر على محله، مو حتى الناس تعرف اسمه، بس حتى يذكر روحه بالفرح اللي نزله من السما يوم إجه حيدر للدنيا. وأكو أم يوسف وأدهم تسمي حسابها بأسماء جهالها، وكأنهُ تريد تكول للدنيا كلها: هاي أسمائي الجديدة، آني انولدت وياهم من جديد. وجد ،يحط صورة حفيده خلفية لتلفونه، وكأنه يريد يحتفظ بلحظة ما تنباك من إيده، لحظة صغيرة، تشبه وردة برية نابتة بين ركام العمر. بهالزمن التجاري ، زمن المظاهر، يمكن الناس تشوف هاي التصرفات سذاجة، ويمكن تضحك عليها، بس اللي يعرف شلون الروح تحن، يدري هاي الصور مو بس مشاهد ، هاي محاولات يائسة حتى نثبت گلوبنا بهاي الدنيا اللي كلشي بيها يركض وينتهي. الحب الحقيقي ما يحتاج شرح، ولا زينة، الحب الحقيقي مثل نَفَس الصبح البارد، تحس بيه بس ما تكدر تلزمه. واللي بعده يحتفظ بصورة، أو ذكرى ،هو بالحقيقة يحفظ العالم من إنه يبرد أكثر. شكد حلوة گلوبهم ، من تمر بيها نسمات هيچ ناس، يحبّون بخوف، ويحلمون بعين مفتوحة، ويحطّون حبهم علامة يمشي بيها العمر كله

https://www.instagram.com/p/DY7uWNPl5a_/?igsh=a3FlMHZ4NGs4amt5

التعديل ضروري حتى تحصل نتيجة افضل 🩵

محتاجين بودكاست يسولف عالأنسان العادي ، الأنسان الي بدون نجاحات ولامواقف مستمرة ، وكل حلقة يستضيفون بيها شخص يسولفلنا على جمال وراحة انك تكون عادي ، بظل هذا الصراع البشري للتميز .