ត្បូងឃ្មុំស្រុកកំណើត

ថ្នាក់ដឹកនាំខេត្តត្បូងឃ្មុំ និងក្រសួងអប់រំ អញ្ជើញជាអធិបតីក្នុងពិធីបើកហិបកាត់ស្រោមវិញ្ញាសាប្រឡងបាក់ឌុប   ខេត្តត្បូងឃ្មុំ៖ នាព្រឹកថ្ងៃទី១០ ខែសីហា ឆ្នាំ២០២៦ នេះ លោកជំទាវ សឿ សុជាតា អនុរដ្ឋលេខាធិការ ក្រសួងអប់រំ យុវជន និងកីឡា និងជាប្រធានគណៈមេប្រយោគទូទាំងប្រទេសប្រចាំខេត្តត្បូងឃ្មុំ ព្រមទាំង ឯកឧត្តម ប៉ែន កុសល្យ អភិបាល នៃគណៈអភិបាលខេត្តត្បូងឃ្មុំ និង លោក ហួរ ដាឡា តំណាងអង្គភាពប្រឆាំងអំពើពុករលួយ (ACU) ប្រចាំមណ្ឌលខេត្តត្បូងឃ្មុំ បានអញ្ជើញជាអធិបតីភាពដ៏ខ្ពង់ខ្ពស់ក្នុងពិធីបើកហិបកាត់ស្រោមវិញ្ញាសាប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) សម័យប្រឡង ១០ សីហា ២០២៦។   ពិធីនេះបានប្រព្រឹត្តទៅនៅមណ្ឌលប្រឡងវិទ្យាល័យសម្តេចម៉ែ ស្ថិតក្នុងភូមិ ០៤+០៥ ឃុំជប់ ស្រុកត្បូងឃ្មុំ ខេត្តត្បូងឃ្មុំ ដោយមានការចូលរួមពីសំណាក់ ប្រតិភូអមដំណើរ មេបញ្ជាការកងកម្លាំងប្រដាប់អាវុធទាំងបីប្រភេទ ប្រធានពន្ធនាគារខេត្ត ប្រធាន-អនុប្រធានមន្ទីរ និងអង្គភាពជុំវិញខេត្ត លោក-លោកស្រី ប្រធាន/អនុប្រធានមណ្ឌល គណៈកម្មការអនុរក្ស ក្រុមការងារសហភាពសហព័ន្ធយុវជនកម្ពុជា (ស.ស.យ.ក.) ខេត្ត ព្រមទាំងសមត្ថកិច្ចពាក់ព័ន្ធយ៉ាងច្រើនកុះករ។   ដំណើរការនៃការបើកហិប និងកាត់ស្រោមវិញ្ញាសា ត្រូវបានប្រព្រឹត្តទៅតាមនីតិវិធីយ៉ាងម៉ត់ចត់ តម្លាភាព និងត្រឹមត្រូវតាមបទបញ្ជាផ្ទៃក្នុងនៃការប្រឡង ដើម្បីធានាបាននូវភាពយុត្តិធម៌ ស្របតាមគោលការណ៍ «អ្នកចេះ គឺជាប់» ព្រមទាំងរក្សាបាននូវសន្តិសុខ និងសណ្តាប់ធ្នាប់ល្អប្រសើរនៅក្នុង និងជុំវិញមណ្ឌលប្រឡង។