رسائل مجهول

هانت ما اقصدش يعني ان فرجُه قريب ولا ان فيها حلول لا سمح الله… ولا بكرة ييجي يغيّر الترتيب ولا بعدُه يحصل اللي تتمنّاه.. القصد واضح وانت من جواك قاصد تغيّر فيه وتتحاشاه.. العشرة هانت ع اللي كان منك والصحبة هانت ع اللي كان وياك … والدنيا هانت عندك اكمنك خسران أمل كان بين ايديك ومعاك … هانت عليك نفسك هنا وهناك.. مع كل خبطة من الزمن بيهون معنى الحياة، والجدوى م المشوار.. يصغر في عينك ناتج الأرقام يكبر قصادك مُجمل الأصفار.. وتقِل ناسك، مهما كانوا كتار.. ويقِل منّك كائناً ما يكون… والكون دواير وانت داير فيه.. عشمان تكون مش زيّ من داروا.. محتار ورافض تعترف انك زي اللي جُم من قبلك احتاروا.. مساكين غلابة، قال بيختاروا… الكون ممشّي الكل في مساره والخدعة ظهرت كلها وبانِت.. وانت المقاوح رافض التسليم لسّاك مآمن انها هانت… نبيل عبدالحميد

‏بحاول أتخيل إيه هيكون شعوري ف الليله اللي هنام فيها وأنا مطمن ناحية كل حاجة عملالي قلق ف حياتي ، وخلاص كل حاجة بقت مستقرة ، وأنا بقيت عارف أنا عايز إيه ومتأكد منه ، ومبقاش فيه حاجة شايل همها خالص .. مش عارف بس حسه هيكون إحساس نازل من الجنة يعني يا ربّ إوعدنا

بتقيسها ازاي؟ وبتقدر تحكُم ع التجربة ونجاحها ازاي؟ وازاي في الآخر جاي بتقول ان الماضي كان كله خيابة وهري وجري على الفاضي؟ اومال ازاي.. كنت هتتعلم قيمة العمر غير بعد ما راح النُص في صحبة ناس مش ليك.. وازاي تفهم في البني أدمين غير لما نفوس الخلق السودة تعدّي عليك… وازاي كنت هتعرف تحسب من غير ما خسارتك للّي خسرته تعلّم فيك.. كدة أهلاً بيك كتر الكعبلة علّمك النط.. توهانك في بحور الدنيا وصّلك الشط.. والحمل المتشال على ضهرك خلّاك حريف في الشيل والحط.. واهو لولا دروس الأيام وجنازة كل الأحلام كان عمرك هيضيع في علام بتفُك الخط… كل اللي اتلط مع الدنيا دافع وإتعلم في الماضي.. يعني ماهوش خايب ولا عايب ولا كان الجري على الفاضي… نبيل عبد الحميد

بقى عندي تكييف في اوضتي للنوم و الشغل و انا عندي 25 سنة تقريبا قبلها قعدت ربع قرن باتعامل بطرق التبريد البلدي بتاعت بيوتنا بخلاف مروحة المصانع الحربية أو مروحة السقف الأوشا كان فيه ملقف المسقط المنور هوا شراعة البيت سيب شباك المطبخ عامل تيار مع شباك أوضة ابوك و البلكونة و السطوح بخلاف أوبشن أن بيتكم يكون بحري تبريد من نوع تاني أنا مفتقده مش موضوع هوا ساقع زي بتاع التكييف كان اسمه طراوة تبريد لروحك مش لجلدك و عضمك تبريد من نوع غريب اولا بيتبني عليه دايما نشاط ما زي ما خليكو ده الجو حلو مستعجلين ليه أو زي فلان نام الهوا سطله أو الهوا خده او تسمع الله على شوية الهوا الحلوين دول ما تقوم تعلق لنا على الشاي طراوة بتدفعك للتفاعل مع الحياة جايلك مشوار متعبية حياة نسمة الهوا دي على بال ما وصلت لك كانت عدت على غيط و بلكونة ناشرة غسيل و دخان طالع من فرن عيش بلدي و حد سارح في الشارع ببخور و عيل مستحمي و واقف في الشباك و حد فارش بنعناع الناس اللي بتتريق على ابهاتنا و اعمامنا اللي كانوا بيقعدوا في البيت و البلكونات بالفنلة الحمالات و فاكرينها عفانة دي ناس فاهمة مش عايزة مللي من الطراوة يفوتها يعني تكاد تكون الطبطبة الوحيدة في اليوم انا بافتقد الطراوة دي و بادور عليها رغم التكييف اللي في كل حتة باحط فيها رجليا بيت و شغل و عربية بس هو هوا ساقع كمبروسور و فريون لا بيهز ريحانة زارعها ولا حتة غسيل منشرها ولا بيخلي ورق الشجرة يوش و يطير العصافير ولا حتى بيقولك جيرانك طابخين ايه النهاردة لــ عمر طاهر