السيره النبويه بالعامية 💙

بالنسبة لإقتصاد المدينة .. الإقتصاد كله بإيد اليهود و بعد زيادة عدد المسلمين في المدينة ..بدأت اليهود فى تزويد أسعار السلع و ضيقوا على المسلمين.. فالرسول عليه الصلاة و السلام حل المشكلة دي بإنه أنشأ سوق خاص بالمسلمين . وفى مشكلة تانية فى المياه.. المياه فى بئر روما .. و بئر روما ملك لواحد يهودي و المياه فى المدينة قليلة والراجل اليهودى ده كان بيزود أسعارها .. فيجى عثمان بن عفان رضى الله عنه و يروح لليهودى و يشترى منه البئر .. لكن اليهودي للأسف استغل ده و طلب سعر كبير..و رغم كده وافق عثمان و لما جه يدفع .. قام اليهودى قال: هبيعلك بس بشرط.. البئر يتقسم نصين انا ابيع منه يوم و انت تبيع منه يوم .. يعنى هيبيع لعثمان نص البير بس.. فعثمان وافق.. وراح لرسول الله صلى الله عليه و سلم و قال له :يارسول الله قد أهديت هذا البئر للمسلمين .. يعنى المسلمين هياخدوا المياه ببلاش .. من غير ما يدفعوا فلوس♡ .. فبدأ المسلمين يروحوا ياخدوا مياه فى يوم و اليوم التانى يقعدوا من غير مياه عشان ده يوم اليهودى وبيبيع بأسعار غالية.. فقام عثمان قايل لهم ياخدوا زى ما يحتاجوا و يخزنوا لليوم التانى فبكده مش هيشتروا حاجة من اليهودى ولا هيقعدوا فى اليوم بتاعه من غير مياه.. و المسلمين فعلا سمعوا كلام عثمان رضي الله عنه وعملوا كده.. فاليهودى يقف فى اليوم بتاعه بقى مش لاقى حد يشترى منه فبقى بيخسر .. فراح اليهودي لعثمان و قرر أنه يبيع البئر كله و رغم كده طلب من عثمان نفس التمن .. و برده عثمان وافق.. (كان ممكن لو حد تانى مكان سيدنا عثمان كان ميعبرش اليهودى لأن خلاص مشكلة المسلمين اتحلت او يستغل الموقف و ميوافقش يدفع لليهودى المبلغ الكبير ده.. لكن هذه أخلاق اصحاب رسول الله صل الله عليه و سلم .. دى الاخلاق المسلمين ) و أشترى سيدنا عثمان البئر و كمان خلى المسلمين يرتاحوا من تخزين المياه .. ودفع تمن البئر .. و كأنه دفعه مرتين .. فوقف النبى صل الله عليه و سلم يقول : ما ضر عثمان ما فعله بعد اليوم (يعنى مهما غلطت يا عثمان ..الجنه بقت ليك.. مضمونه بعد اللى انت عملته للمسلمين )... هنكمل سوا إن شاء الله 🤍

سيرة_الرسول الحلقة 72 يلا صلوا على النبى اللهم صل وسلم وبارك على سيدنا محمد وعلى آله وصحبه أجمعين🤍 و نكمل سوا جمال الصحابه فى المدينة.. كان فى صحابى اسمه《 ابو الدحداح》 كان غنى جدا و كان يملك بستان فيه ٦٠٠نخله .. فكان ابو الدحداح قاعد مع النبى عليه الصلاة و السلام بالمسجد فيدخل عليهم اتنين و بعد شوية يتخانقوا الاتنين دول سوا.. طب ليه؟ اصل واحد منهم عنده قطعة ارض و التانى عنده نخلة علي الأرض دى .. و صاحب الارض عايز يشتري النخلة من التانى عشان تتحل المشكلة .. لكن الراجل التانى رافض بشدة و بيعند اوى اوى.. فالنبى قاله: يا هذا هلا تركت نخلتك وبعتها له و لك أيضآ نخلة فى الجنة ؟ فقال الرجل لا ..مكنش يقصد يعصى أمر رسول الله .. ولكن الراجل غضبان غضب شديد فمش مركز فى اللي بيقوله .. بس أبو الدحداح سمع كلام النبى و بص فى وجهه و قال: يارسول الله من يشتري هذه النخلة تكن له نخلة فى الجنة؟ فقال النبى: اجل والله ..فقال ابو الدحداح لصاحب النخلة يا هذا هل تبع لى نخلتك ببستانى كله؟ فقال الرجل: ماذا تقول !! فقال أبو الدحداح أجل والله هو لك.. فقبل الرجل و اتحلت المشكلة..وقال النبى عليه الصلاة و السلام لأبو الدحداح : ماذا فعلت؟ .. فقال: يارسول الله أقرضت ربى بستانى لآخذ نخلة فى الجنة.. فأبتسم النبى وقال : وكم من نخيل فى الجنة لأبى الدحداح و كررها 3 مرات .. تخيلوا يا جماعة كام نخلة النبي شافها لأبى الدحداح فى الجنة !! (تخيل أنت لما تتصدق بجنيه واحد عشان تساعد حد غلبان..كم لك فى الجنه من نعيم !! ) و مشى ابو الدحداح عشان يسلم البستان للرجل وكانت زوجة أبو الدحداح فى البستان فقال لها: يا أم الدحداح اخرجي أنتي وولدك فإنى اقرضت بستانى هذا لربى .. وبكل فرحة تخرج ام الدحداح الزوجة الصالحة ويكون فى فم ابنها تمرة فتدخل اصابعها فى فمه و تخرجها وخرجت وهى بتقول : ربح البيع أبا الدحداح.. ربح البيع أبا الدحداح..🤍 الرسول صلى الله عليه و سلم قضى وقته يعلم الصحابة( من المهاجرين و الأنصار) احاديث عن الاخوة في الله ويقول : إن المتحابون فى الله يظلهم الله بظله يوم القيامة ...و ان الله تبارك و تعالى ينادي يوم القيامة و يقول اين المتحابون فى جلالي ..فيقومون و يقفون على منابر من نور يغبطهم عليها الملائكة و الانبياء و الصالحين .. طيب كنا قلنا امبارح ان فى مشاكل بين قبيلتي الأوس و الخزرج فى المدينة .. وكان بينهم معارك شديدة جدا. كان قبل الهجرة فى حرب اسمها البعاث و مات فيها مئات من اهل يثرب "المدينة".. لكن النبى عليه الصلاة و السلام قدر يوحد الاوس و الخزرج ؛ وبقى يجلس عمر القرشي مع بلال الحبشي مع صهيب الرومي مع سلمان الفارسي كل ده بسبب المؤاخاة اللي اتكلمنا عليها المرة اللى فاتت.. الرسول عليه الصلاة و السلام مجمعهم رغم اختلاف أصولهم.. بس مرة واحد يهودي اسمه شأس بن قيس راح لصاحبه و قاله فى ذهول : ما فعل محمد؟ كيف جعل الاوسي يجلس بجانب الخزرجى .. فصاحبه يقول له اذهب إلي الاوس و قل لهم اتذكرون حرب بعاث و كم قتلوا منكم .. و كيف قتل كذا و كذا ....ثم عد للخزرج و قال لهم اتذكرون يا معاشر الخزرج حرب بعاث و كم قتلوا منكم .. و فعلا راح عمل كده .. فبدأ الاوس و الخزرج في التشاجر.. و خرج من الاوس ناس بتقول: الحرب الحرب و من الخزرج كمان ناس تقول :الحرب الحرب و خرج ناس من الاوس يقولوا: موعدكم عند الظهيرة ..السيف السيف.... فيرد عليهم واحد خزرجي ويقول السيف السيف .. فبسرعة راح صحابي للرسول صل الله عليه و سلم و قاله يلحق الحرب اللى هتقوم .. فخرج النبى عليه الصلاة و السلام يجرى وقال: قال : ايها الناس مالكم ؟؟؟ اخرجكم الله من ظلمات الكفر للاسلام .. أستعودون إلى ما كنتم عليه في الجاهلية !! لا تفعلوا هذا دعوها فإنها منتنة ..(يااااه شايفين.. ربنا عز وجل قال : إنما المؤمنون إخوة .. شايفين لما المسلمين يتخانقوا سوا ده شئ مكروه إزاى .. دعوهاااااا فإنها منتنة) فيسكتوا كلهم و يكمل النبى كلامه و يقول : لا تعودوا إلى ما كنتم عليه.. لا تعودوا كفارآ يقتل بعضكم بعضا.. بعد ان اكرمكم الله بالإسلام و أنا بين اظهركم.. فيبكى الاوس و الخزرج و يحضنوا بعض و يرجعوا بيوتهم آمنين و يعض شأس بن قيس على يديه من الغيظ.. اليهود كانوا سبب فى مشاكل كبيرة و متاعب واجهت الدولة الإسلامية في المدينة ؛ و رغم كده الرسول عليه الصلاة و السلام كان حليم جدا معاهم إلا بعد غدرهم بالمسلمين وهنشوف بعد كده انهم هينطردوا من المدينة .. وكان القانون اللى يخص اليهود فى المدينة اللى وضعه الرسول قبل غدرهم بيقول : ان اليهود امة من دون الناس.. لهم ما لهم و عليهم ما عليهم و لا إكراه فى الدين .. طيب دى المشاكل السياسية.. @sanawichanal _قناة الثانويه @B00Ks_BbOT _ بوت ڪتب بوت تواصل @Dr_mahm0ud_bot

ويبدأ بالظهور نماذج عجيبة من الصحابة أمثال 👈 ام سليم مثلا.. أم سليم راحلها واحد عشان يخطبها ..اسمه ابو طلحة وهو صاحب أخلاق ومال وجمال وحسب ونسب ولكنه مشرك .. فقالت يا أبا طلحه انك رجل صاحب خلق وحسب ونسب ومال ومثلك لا يرفضه أحد ؛ غير انك رجل مشرك وإنى مسلمة فإن هدى الله قلبك الى الاسلام كان ذاك مهري ولا اريد منك شيء ، وهذا الارتباط بالدين لفت انتباه ابو طلحة؛ فيقرر انه يحاول يعرف عن دين الإسلام. فيذهب الى النبي .. فيشوف النبى طلحة و هو جاي عليه من بعيد .. فيقول النبى لأصحابه: أيها الناس يأتيكم أبو طلحة بين عينيه الاسلام.. سبحان الله النبى كان يحس باللي جوه اللى قدامه ..و فعلا ييجي ابو طلحة و يبص لوجه النبي فيقول اشهد ان لا اله الا الله و انك رسول الله.. و يتزوج أبو طلحة أم سليم ♡ نكمل بكره إن شاء الله 🤍

سيرة_الرسول الحلقة 71 يلا صلوا على النبى اللهم صل وسلم وبارك على سيدنا محمد وعلى آله وصحبه أجمعين🤍 بلغ الحب بين المهاجرين والأنصار حتى أن يقول احدنا لأخيه يا أنا .. النبى عليه الصلاة و السلام بات عند ابو ايوب الأنصارى فى الدور السفلي .. و ابو ايوب و زوجته فى الدور العلوي؛ وشفنا ابو ايوب و زوجته و هما ماشيين جنب الحيط علشان خايفين أن أقدامهم توافق رأس رسول الله .. مرة ام أيوب وقع من إيديها طبق فيه مياة و انكسر على الأرض فأتفزعت هي و أبو أيوب و بسرعة مسكوا الغطا اللى بيتغطوا بيه ونشفوا بيه المياه عشان خايفين السقف ينقط على رسول الله .. و أول ما طلع الفجر ، قام أبو أيوب راح للنبى و قاله يا رسول الله والله لا نطيق ان نكون على سقف تحته رسول الله أبدآ.. فالنبى فهم الأمر ووافق أنه يصعد فى الدور العلوي ونزل ابو أيوب و زوجته فى الدور السفلي وكل يوم كان بيصعد ابو أيوب بالطعام للنبي عليه الصلاة و السلام وينزل بيه عند انتهاء النبي منه .. و كان أبو أيوب و زوجته يتلمسون موضع أصابع رسول الله و ياكلوا مكانه عشان يتلمسوا بركته صَلِّ الله عليه وسلم وفى يوم نزل الطعام فأبو أيوب أتفزع .. طب ليه؟ اصل ابو ايوب لقى الأكل زى ماهوه فأتفزع و بسرعة راح للنبى عليه الصلاة و السلام وقال: أأغضبناك فى شيء يارسول الله ؟ فقال النبى : لا ولكن الطعام به ثوم وانا لا أأكل الثوم.. فقال أبو أيوب..أحرام هو يارسول الله ؟ فقال النبى: لا ولكنى أناجي من لا تناجي..(النبى يقصد جبريل عليه السلام .. و الملائكة تتأذى مما يتأذى ابن آدم) .. فقال ابو أيوب : والله لا اذوقه أبدا يا رسول الله .. و عاش ابو ايوب و زوجته طول عمرهم و ما أكلوش ثوم أبدآ.. و كان النبى عليه الصلاة و السلام مش بياكل الثوم و البصل و الكرات..طيب دلوقتى الناس فى المدينة محور حياتهم بقى رسول الله عليه الصلاة و السلام ؛ وكانوا يمتثلون إلى أوامره ويتوقفوا عند نواهيه .. فمكنش حد بيحب حد اد ما حب أصحاب محمد محمدآ ♡.. والنبى واجهه مشكلات فى المدينة مافيش قائد فى الدنيا يقدر على مواجهتها . مرة مؤرخ أجنبى أسمه برنارد شو قال: لو كان محمد حياً بيننا لأستطاع ان يحل مشاكل العالم و هو يحتسي فنجانآ من القهوة.. طيب ايه المشاكل اللى فى المدينة ؟؟ 1-وباء : حمى قاتلة تأتى لأهل المدينة ،فسميت يثرب من التثريب لكثرة الأوبئة فيها.. و الحمى أصابت أبا بكر وعائشه وبلال ،فكانت عائشه تبكى طوال الليل من الحمى . ومن كتر المرض كانوا الصحابة يأتوا الرسول ويقولوا له يارسول الله ادعوا لنا الله ليحبب لنا المدينة كحبنا لمكة او أشد .. (يا جماعة الغربه كانت صعبة جدا على الصحابة).. 2:- بطالة : اهل المدينة عددهم كبير و زاد عليهم المهاجرين من مكة و متنسوش ان المهاجرين بلا عمل و بلا مسكن و لا مال .و كمان المهاجرين كان عملهم فى مكة بالتجارة أما المدينة أهلها بيعملوا فى الزراعة. .٣-اليهود والمنافقين . ٤-حرب اهلية بين قبلتي الأوس والخزرج . فيرفع النبى يده بالدعاء ويقول (اللهم اخرج وباء المدينة وطيب هواءها) فسميت "طَيبة" فهى طِيبة من طيب هواءها من كل سوء ♡.. ولحل مشكلة البطالة آخى النبي بين المهاجرين والأنصار يعنى المهاجري يبقى أخ للأنصاري و يورث فيه ؛ أصل المهاجري عنده علم و قرآن و سنة.. والانصاري عنده الدنيا عنده مال و عمل ؛ فآخى بينهم الرسول عليه الصلاة و السلام و بقى المهاجري يعلم الانصاري القرآن و السنة و الأنصاري يساعد المهاجري فى المعيشة.. و يورث المهاجري الأنصاري و يبقى كأنه اخوه فعلا لحد ما الله عز وجل هينسخ الحكم ده بعد كده فى قوله تعالى فى سورة الأنفال: (وَأُولُوا الْأَرْحَامِ بَعْضُهُمْ أَوْلَى بِبَعْضٍ فِي كِتَابِ اللَّهِ إِنَّ اللَّهَ بِكُلِّ شَيْءٍ عَلِيمٌ).. دلوقتى فأصبح ابو بكر أخ لزهير بن خارجة ؛ و عمر بن الخطاب أخ لعتبان بن مالك ، و عثمان بن عفان أخ لأوس بن ثابت ، عبد الرحمن بن عوف أخ لسعد بن الربيع ، و طلحة بن عبيد الله أخ لسعد بن معاذ ويقول الصحابه :والله قد بلغ الحب بين المهاجرين والأنصار حتى ان احدنا يقول لأخيه يا أنا ♡ .. فقال تعالى : لِلْفُقَرَاءِ الْمُهَاجِرِينَ الَّذِينَ أُخْرِجُوا مِنْ دِيَارِهِمْ وَأَمْوَالِهِمْ يَبْتَغُونَ فَضْلًا مِن اللَّهِ وَرِضْوَانًا وَيَنْصُرُونَ اللَّهَ وَرَسُولَهُ ۚ أُولَٰئِكَ هُمُ الصَّادِقُونَ *وَالَّذِينَ تَبَوَّءُوا الدَّار وَالْإِيمَانَ مِنْ قَبْلِهِمْ يُحِبُّونَ مَنْ هَاجَرَ إِلَيْهِمْ وَلَا يَجِدُونَ فِي صُدُورِهِمْ حَاجَةً مِمَّا أُوتُوا وَيُؤْثِرُونَ عَلَىٰ أَنْفُسِهِمْ وَلَوْ كَانَ بِهِمْ خَصَاصَةٌ ۚ وَمَنْ يُوقَ شُحَّ نَفْسِهِ فَأُولَٰئِكَ هُمُ الْمُفْلِحُونَ. ويقف الرسول ويقول : "أيها الناس هؤلاء إخوانكم جاءوا إليكم وتركوا أموالهم وأبناءهم فلا تتركوهم " فيتحول الأنصار إلى كم من العطاء الغير مسبوق..

طب ليه؟ عشان ما يصادفش مرة و هما ماشيين ان فى لحظة يبقى النبى ماشي و يكون حد منهم فوق ماشى ..فتطابق أقدامهم مع رأس النبى عليه الصلاه و السلام.. يااااااه .. الله عليهم 🤍 هنكمل سوا إن شاء الله 🤍

سيرة_الرسول الحلقة 70 يلا بينا صلوا على النبى اللهم صل وسلم وبارك على سيدنا محمد وعلى آله وصحبه أجمعين 🤍 رسول الله فى المدينه المرة اللى فاتت شفنا النبى و الصحابة بيبنوا مسجد قباء .. و فى النص و هما بيبنوا المسجد يكون فى واحد صحابي كل ما ياخد طوبة يحطها على كتفه وينقلها عشان البناء يقوم باصص على كتفه فيلاقى تراب فينضفه .. و ياخد طوبة غيرها و بعد ما يحطها يلاقى تراب.. يقوم منظف تانى و هكذا فى كل طوبة ، فسيدنا علي بن ابى طالب لاحظ ده.. و سيدنا علي رضى الله عنه كان دمه خفيف اوى .. فقال بيت شعر: "لا يستوي من يعمر المساجد يدأب فيه قائما قاعدا ومن يرى عن الغبار حائدا " .. فالصحابى مسمعش بيت الشعر بس (عمار بن ياسر) كان واقف فسمع بيت الشعر و ماكنش يعرف ان عليّ بن ابى طالب قاصد ببيت الشعر ده الصحابى .. فحفظ عمار بيت الشعر و فضل يكرر فيه طول ماهو بيشتغل فالصحابى سمع وقال: سمعت قولك يابن سمية ! والله لان لم تنتهي لأضربن بهذه العصا وجهك وأنفك .. فعمار واقف مخضوض و مش فاهم إيه الموضوع فسكت.. فالنبى سمع و غضب وأحمر وجهه الشريف صَلِّ الله عليه وسلم وقال : من هذا الذى يريد ان يضرب وجه عمار بن ياسر فإن عمار جلدة بين عيني وأنفي (ده عمار ده حته منى..عمار ده اللى امه ماتت قدامه و قال كلمه الكفر من كتر التعذيب و نزلت فيه آية عشان يطمن بإن اللى ينطق كلمه الكفر بلسانه و هوه مغصوب .. فهوه لسه على دين الإسلام ).. فبكى عمار لقول رسول الله و بكى علي وبكى الرجل وتعانقوا جميعا وانتهى بناء مسجد قباء .. طيب دلوقتى النبى عليه الصلاة و السلام محتاج بيت يعيش فيه .. فهيتبنى بيت للنبى .. مكان البيت ده هيعمل مشكلة .. لأن كل واحد هيبقى عايز النبى يعيش جنبه.. و هنا هييجي دور القصواء ( ده اسم ناقة النبى) اصل النبى رقيق القلب و المشاعر .. محب ودود.. فكان يحب يسمى حاجاته .. وكمان ناقة النبي دى مش ناقة عادية دى كانت بتفهم النبى.. طب تعرفوا ان بعد وفاة النبى كل واحد من الصحابة كان عايز ياخد الناقة و اتفقوا انهم يقسموا احتياجاتها عليهم واحد يأكلها و التانى يشربها.. لكن القصواء أمتنعت عن الطعام والشراب حزنآ على النبى و ماتت الناقة حبا لرسول الله .. طيب ايه دور القصواء النهاردة ؟ القصواء ربنا سخرها عشان يتحدد المكان اللى هيتبنى فيه بيت رسول الله.. وهيقول النبى: "أيها الناس دعوا القصواء فإنها مأمورة" مكان ما تتوقف هيتبنى بيت رسول الله ..فتقوم الناقة تمشي شوية وتبرك (تقعد ع الارض) و تمشى تانى و تبرك و تالت مره مشيت شوية و بعدين بركت و مقامتش.. ففهم النبى عليه الصلاة و السلام ان ده المكان اللى هيبنى بيته فيه.. عند بنى النجار .. عارفين مين بنى النجار؟ دول أخوال النبى عليه الصلاة و السلام (فاكرين لما والدته السيدة آمنة بنت وهب اخدته يزور اخواله و هوه صغير و ماتت فى طريق رجوعها لمكة) .. وكأن ربنا عز وجل أراد ان النبى ميحسش بالغربة و الوحشة و يعيش جنب قرايبه .. و علشان ماحدش يقول انه محمد اتغرب مع ناس غرب.. لأ.. ده قاعد وسط أهله و قرايبه.. و مره خرجت بنات صغيرين من بنى النجار ماسكين دفوف و بيقولوا شعر جميل ..فرحانين بالنبى " نحن بنات بنى النجار.. يا حبذا محمد من جار " ، فيمسح النبى على رؤسهن ويقول لهن : اتحبوننى؟ فيقولن : أجل يارسول الله ..فيقول لهن: إن ربى يعلم أن قلبي يحبكن.. طيب لحد ما بيت رسول الله يتبني .. النبى النهاردة هيبات فين؟ فيه صحابي اسمه《 ابو أيوب الأنصارى》 كانت أمنيته هي أنه يأخذ النبي عنده فى البيت .. فعمل حركة ذكية جدااا .. خد حاجات النبى وملابسه و حطها فى بيته بهدوء ورجع وسط الناس ،فلما النبى انتبه.. فرد أبو أيوب و قال: متاعك فى بيتي يا رسول الله فانزل عندى يا رسول الله.. فالناس كلها عايزة النبى يبات عندها و طبعا موقع النبى صعب لأن لو بات عند حد.. هيقوم التانى زعلان .. وحبيبى رسول الله مش عايز يزعل حد ..فقال كلمة ذكية : أيها الناس فإن الرجل مع متاعه.. فضحكوا.و راح النبى مع ابو أيوب وكان بيت ابو ايوب من دورين . . دور سفلي و دور علوي فقال : يارسول الله بيتي من طابقين فاصعد انت فى العلوي وأبيت انا وأم أيوب فى السفلي فلا نطيق ان نقف على سقف انت تحتها يارسول الله ؛ فرفض النبي وقال إن معك زوجتك ام أيوب و سيأتى إلي اصحابى (فبكده هيمروا على الدور الاول قبل ما يطلعوا للنبى . فأم أيوب مش هتبقى براحتها)... و أصر النبى علي ده ، و سكت ابو ايوب و سمع كلام النبي.... و قعد النبي صل الله عليه وسلم فى الدور السفلي. فلما جه الليل فأم أيوب بتتحرك فى بيتها فأبو أيوب قال لها: ام أيوب ويحك.. قفى.. أتمشين وتحتك رسول الله ! اتطيب نفسك! فقالت: لا والله..فقال لها إذن ارجعي فرجعت.. و كانوا بيمشوا على أطراف أصابعهم و جنب الحيطان.

سيرة_الرسول الحلقة 69 يلا صلوا على النبى اللهم صل وسلم وبارك على سيدنا محمد وعلى آله وصحبه أجمعين 🤍 هجره نبينا ﷺ من مكة للمدينه (ج11) و أشرقت المدينه بمجئ محمد رسول الله 🤍 الصحابة "المهاجرين من مكة للمدينة " ؛ ومن أهل المدينة" الأنصار" فى حزن شديد و بكاء .. قلقانين على رسول الله لأنه أتأخر اوى فى الطريق.. .. وفى اليوم ال14 الرسول عليه الصلاة و السلام بدأ يقرب للمدينة ووصل لمكان أسمه الثنية .. فكان فى واحد من اهل المدينة طالع على نخلة بيشوف القوافل بتاعت التجارة وصلت ولا لأ .. فيقدر ربنا انه يشوف رسول الله .. فالراجل ده بيحكى و بيقول: رأيت ثلاث يمشون فى السراب ويلبسون البياض فناديت يا معشر العرب جاء الذى تنتظرون ..جاء الذى تنتظرون.. وبيحكى و بيقول فارتجف بدنى "( اترعش اوى) وسقطت على الأرض.. و اول ما الناس عرفت خبر مجيئ رسول الله .. عليت اصوات التكبير .. الله اكبر ☝.. الله اكبر☝.. و الأرض بقت تترج من صوت الناس ..اللى بيضحك واللى بيبكى و الكل بيقول جاء رسول الله ..جاء رسول الله .. يا بختهم 🤍 اللهم صل على الحبيب.. واحد من أحبار اليهود (رجل دين يهودى) اسمه عبد الله بن سلام راح يشوف النبى ..فبمجرد انه شاف رسول الله و نظر فى وجهه ..قام قايل : أشهد ان لا اله الا الله وأنك رسول الله .. وقال ما هذا بوجه كذاب . وأشرقت المدينة بقدوم رسول الله ..و الناس فرحانين ان النبى واقف قدامهم و بدأوا ينشدوا الشعر .. أنس بن مالك بيقول( وده هيبقى خادم رسول الله صل الله عليه وسلم) :- دخل الرسول المدينة يوم الاثنين فأنار منها كل شيء ومات يوم الاثنين فأظلم منها كل شيء 😢 ♡ .. و يدخل النبى المدينة و يوصل لمكان اسمه《 قباء 》وكل الصحابة يتلموا حواليه وبدأ النبى بالكلام وكانت اول كلمات للنبى .. قال صل الله عليه و سلم : 《أيها الناس افشوا السلام ، واطعموا الطعام ، وصلوا بالليل والناس نيام ،تدخلوا الجنة بسلام》......." دول 3 جمل ،كلام سياسى اجتماعى ودينى ......".. ● عامل سياسى : افشوا السلام ؛ هتتوقف الحروب ..، ●واطعموا الطعام : وده عامل اجتماعى عشان ميكنش فى فقر فى المجتمع. ● وصلوا بالليل .. وده عامل دينى روحانى .. ■■ و ينهى كلامه النهاية بعامل تحفيزى و وعد من الله سبحانه وتعالى بالجنة .. فلا يوجد قائد فى العالم يأتى بكل هذه العناصر فى جملة الا محمد عليه الصلاة و السلام..اللهم صل و سلم و بارك على من أوتي جوامع الكلم ♡.. طيب ايه أول عمل هيقوم به النبي صَلِّ الله عليه وسلم؟ بناء مسجد .. طيب يا سيدنا النبى ..حضرتك بقالك 14 يوم لا نوم كويس ولا راحة و ارض صعبة و طريق متكسر وأكل قليل و تقرر تبنى مسجد؟ تعبت كتيييير اوى عشانا يا رسول الله .. ... اصل المسجد يا جماعة ده أساس المجتمع الإسلامى.. و ده هيبقى مسجد قباء اللى ربنا عز وجل قال عنه : " لَّمَسْجِدٌ أُسِّسَ عَلَى التَّقْوَىٰ مِنْ أَوَّلِ يَوْمٍ أَحَقُّ أَن تَقُومَ فِيه؛ِ فِيهِ رِجَالٌ يُحِبُّونَ أَن يَتَطَهَّرُوا وَاللَّهُ يُحِبُّ الْمُطَّهِّرِين " ... و قال صل الله عليه و سلم : من توضأ فى بيته وأتى قباء فصلى به ركعتان كانت له عمرة تامة تامة تامة.. ويبدأ الرسول فى بناء المسجد .. فيمسك النبى بأول طوبة والصحابة يبدأوا يقلدوه .. اصل النبى عايز يرسخ مبدأ انى القائد اه لكن إيدى بإيدكم فى بناء المجتمع و انى مش قائد متكبر ..لأ.. انا متواضع مثلى مثلكم وهذا نهج و طريق النبى حتى وفاته صَلِّ الله عليه وسلم .. فالصحابه يقولوله.ألا تستريح يا رسول الله؟ فيقول لهم دعونى أعمل ولكن اعملوا مثلي .. فيحمل ابو بكر طوبة ثم عمر بن الخطاب ثم عثمان فيقول النبى : هؤلاء أولات الأمر من بعدى و فعلا دول الخلفاء الراشدين بترتيبهم من بعد وفاته صل الله عليه و سلم .. و يجى عمار بن ياسر ( فكرينه..اللى اتعذب جامد ..و أمه سمية اللي عذبها ابو جهل و قتلها عشان اسلمت ) و يجى عمار عايز يفرح النبى عليه الصلاة و السلام.. فيشيل طوبتين فى مرة واحدة.. فيضحك النبى .. ( يااا شايفين جمال الفرج بعد الصبر و الثبات على طاعة الله و على دين الله .. قال تعالى : سَيَجْعَلُ اللَّهُ بَعْدَ عُسْرٍ يُسْرًا ♡ سبحان الله ) و الصحابة فرحانين فيبدأوا يقولوا شعر عشان يحمسوا نفسهم .. فيقولوا بيت شعر جميل أوى.. " لأن قعدنا والرسول يعمل ما ذاك منا إلا العمل المضلل ) ويرددوا البيت.. فيرد النبى عليه الصلاة والسلام ويقول " اللهم لا عيش إلا عيش الآخرة فأرحم الأنصار و المهاجرة".. (يقصد بالانصار اهل المدينة.. و بالمهاجرة يقصد الصحابة اللى هاجروا من مكة ) نكمل بكره إن شاء الله أذكروني بدعوة 🤍

.كانوا في أول اليوم من المشركين وبقوا في آخره من الصحابة، شايفين فضل ربنا العظيم عليهم وعلى الدعوة، ده كان عشان النبى يدعوا حد للإسلام كانت قريش تقف له عشان بس يدعوا لواحد بس.. لكن دلوقتى اسلم عدد كبير على يد رسول الله و فى لحظه واحدة.. الحمدلله . طيب إيه أخبار الصحابة اللى اتحركوا قبل النبى للهجرة من مكة للمدينة؟ الصحابة تعبانين مش بيناموا و لا قادرين ياكلوا و لا يشربوا من شدة القلق على النبى لأن الطريق من مكة للمدينة ياخد أربع او خمس ايام بس لكن دلوقتى عدى 14 يوم..وكل يوم يقفوا يستنوا النبى على باب المدينة لحد اليوم العاشر لحد ما جه عليّ بن ابى طالب ..تخيلوا !! عليّ هاجر بعد النبى و هاجر ازاى عليّ ؟ هاجر ماشى على رجله . اصل كفار قريش اخدوا الناقة بتاعته و ومرضيش يرجع لمكة.. لانه خاف يتأخر عن رسول الله) ♡ كل اللى مسيطر عليه دلوقتى هو انه يشوف النبى بعينيه.. فيقول عليّ : واصلت الليل بالنهار فكنت اركض وأجرى واسقط وأنام وأقوم وأجرى واسقط حتى وصلت إلى المدينة فقلت أين رسول الله فقالوا: لا ندرى فبدأت الناس والنساء بيبكوا ويقولوا مات رسول الله .. قتل رسول الله .. هنكمل سوا إن شاء الله 🤍

سيرة_الرسول الحلقة 68 يلا صلوا على النبى اللهم صل وسلم وبارك على سيدنا محمد وعلى آله وصحبه أجمعين 🤍 هجره نبينا ﷺ من مكه للمدينه (ج10) دلوقتى النبى عليه الصلاة والسلام فى طريقه للمدينة؛ طريق طويل و صعب اوى وطبعا ده عشان يقدر يهاجر من غير ما قريش تمسكه و تمنعه من الهجرة .. (ابن اريقط ) مشي معاهم شوية وأدى خدمته و دلوقتى سابهم (وعلى فكره مش وارد فى السيرة اذا كان اسلم ولا لأ) .. و النبى و ابو بكر و عامر فى الطريق حسوا انهم جعانين و عطشانين اوى.. فمروا على خيمة فيها إمرأة اسمها " أم مَعْبد " و طلبوا منها تمر و لبن عشان يشتروه منها و لكن ملاقوش عندها اكل للأسف .. فالنبى بيبص كده فلاقى معزة صغيرة فقال : " ما هذه الشاة ؟ " قالت : شاة خلفها الجهد عن الغنم (دى ضعيفه) ، فقال : " هل بها من لبن ؟ " قالت : هي أجهد من ذلك ، قال : " أتأذنين إلي أن أحلبها ؟ " قالت : نعم ، ، إن رأيت بها حلبا فاحلبها ، فالنبى قال أحضروا الشاه .. فبدأ النبى يمسح بأيده الشريفة على ضرع الشاه و يدعى ، فالضرع بقى فيه لبن فقال احضروا إناء و فضل النبى يحلب المعزة دى لحد ما الطبق اتملا على آخره.. فشربوا كلهم و شبعوا و فضل كمان لبن لأم معبد و مشيوا.. و بعد شويه زوج أم معبد جه فلما شاف أبو معبد اللبن استغرب جدا جدا وقال : من أين لك هذا اللبن يا أم معبد والشاة عازب ، ولا حلوبة في البيت ؟ فقالت : مر بنا رجل مبارك ، من حاله كذا وكذا ، قال : صفيه لي يا أم معبد ..( ركزوا بقى معايا عشان ام معبد وصفت النبى بدقه رهيبة) ♡.. فقالت أم مَعْبد: " رأيت رجلاً ظاهر الوضاءة، أبلَجَ الوجهِ (وشه منور )،لم تَعِبه نُحلَة (جسمه مش رفيع الرفع الوحش) ولم تُزرِ به صُقلَة( و مش تخين)، وسيمٌ قسيم (جميل و وضيء)، في عينيه دَعَج(يعنى سواد)، وفي أشفاره وَطَف (رموشه جميلة طويلة)، وفي صوته صحَل (بحَّة و حُسن وجمال)، و في عنقه سَطع (طول)، وفي لحيته كثاثة(كثرة شعر)، أزَجُّ (حواجبه طويله و مقوسه )، إن صَمَتَ فعليه الوقار، و إن تَكلم سما و علاهُ البهاء، أجمل الناس و أبهاهم من بعيد، وأحلاهم و أحسنهم من قريب، حلوُ المنطق (فصيح و حروفه واضحة)، فصل لا تذْر ولا هذَر (كلامه فى النص لا بالقليل ولا بالكثير)، كأنَّ منطقه خرزات نظم يتحَدَّرن (كلامه مسترسل و تحب تسمعه)؛ رَبعة لا يأس من طول، ولا تقتَحِمُه عين من قِصر(لا طويل و لا قصير) غُصن بين غصنين( هوه و اصحابه فيهم حسن و جمال) ، فهو أنضَرُ الثلاثة منظراً، وأحسنهم قَدراً، له رُفَقاء يَحُفون به(له صحاب دايما حواليه.. يعنى ليه هيبة ) إن قال أنصَتوا لقوله، وإن أمَرَ تبادروا لأمره، محشود محفود ( لو بس قال كلمه أطاعوه فورآ)، لا عابس ولا مُفَنَّد (وشه مش مكشر ، وكلامه خالٍ من الخُرافة يعنى معقول فيه حكمة) الله 😍 يا جمال سيدنا النبى .. اللهم صل على أكمل و أجمل خلقك... اللهم نسألك رؤيه النبى فى المنام .. و بعد ما سمع أبو مَعْبد الوصف ده راح قايل : هو والله صاحب قريش الذي ذكر لنا من أمره ما ذكر بمكة ولقد هممت أن أصحبه ، ولأفعلن إن وجدت إلى ذلك سبيلا ( ده هوه ده اللى قريش بتتكلم عنه والله انا كنت ناوي اروح معاه و اتبعه ووالله نويت أتبعه ♡).. الرسول مر من مكان اسمه عسفان و اتسمى المكان بالأسم ده بسبب من تعسف و صعوبة المشى فيه و على فكرة المكان ده كان مخصص لمرضى الجزام لانهم لازم يقعدوا فى حتة بعيدة اوى عن الناس . فتخيلوا التعب و المشقة اللى النبى عليه الصلاة والسلام مر بيها و حر الشمس كمان ..النبى بدأ يقترب من المدينة و يحصل شئ عظيم . شوفوا معايا حكمة ربنا عز وجل الرحيم الكريم فيقدر ربنا ده فى توقيت مهم.. ايه اللى حصل؟ 《الزبير بن العوام 》 يكون راجع بقافلته من الشام الى مكة (جمال متحمله ببضاعة ) فيقابل النبى فى الطريق .قدرا ♡..طبعا مفيش صدف كل شئ مدبر بحكمة الله الحكيم .. فيبدأ النبى يحكى للزبير عن الهجرة من مكة للمدينة لأن الزبير مكنش يعرف شئ عن الهجرة .. ففرح الزبير جدا و يقدر ربنا ان نوع التجارة اللى راجع بيها الزبير تكون ملابس.. وكأن ربنا عز وجل لا يرضى لنبيه عليه الصلاة و السلام انه يدخل المدينة بلبس حالته بقت صعبة بسبب الرمال والسفر ومتنسوش ان الهجرة من مكة للمدينة كانت مدتها 14 يوم .. فأراد الله ان النبى يدخل على اهل المدينة (الأنصار) فى هيئة جميلة و مشرفة .. فيروح الزبير و يجيب ثلاث عبايات بيض جداد و ايه مستوردين من الشام .. ولبسوا الهدوم و كملوا فى طريقهم للمدينة.. وفى موقف حصل لازم تعرفوه و النبى مهاجر فى الطريق ..فوجئ برجل اسمه بُرَيْدَة بن الحصيب زعيم قبيلة اسمها "أسلم"، خرج و معاه سبعين من قومه عايز يمسك برسول الله صل الله عليه وسلم وأصحابه عشان ياخد المكافأة الكبيرة، ولكن النبى صل الله عليه وسلم وقف و عرض عليهم الإسلام في هدوء وسكينة، فوقعت كلمات الله رب العزة فى قلب بُرَيْدَة و قلب أصحابه وآمنوا كلهم في لحظة واحدة،

(النبى بيقوله هيجى اليوم اللى هتاخد فيه الاساور الذهب اللي كِسْرَى ملك الفرس بيلبسهم فى ايده ) فسراقة بقى مذهول مش مصدق ان ممكن ده يحصل فى يوم من الأيام فقال للنبى : امضي لي على ورقة ان لو انتصرتوا على الفرس هتدونى اساور كِسْرَى فعلا.. فأمر رسول الله صل الله عليه وسلم عامر بن فهيرة انه يكتب لسراقة ده فى ورقه كضمان.. ومشى سراقة وبدأ يضلل الناس عشان يبعدوا عن طريق النبى و يقول لهم: ابعدوا ..الطريق ده انا دورت فيه كويس اوى بلاش تمشوا فيه مش هتلاقوا محمد.. سبحان الله ربنا سخر سراقة لرسول الله .. قال تعالى: {وَمَا يَعْلَمُ جُنُودَ رَبِّكَ إِلَّا هُوَ} على فكرة هتمر الأيام و هنشوف بعد كده بعد فتح مكة و سراقة هيسلم و بعد وفاة رسول الله و بعد ما هتتفتح بلاد الفرس على ايد امير المؤمنين الخليفه عمر بن الخطاب.. هيكون فى غنائم المسلمين و فيها اساور كِسْرَى ملك الفرس .. فسراقة هيكون عجوز ؛ و هيدي لعمر الورقة اللى اتكتبت له ضمان من النبى انه له سُوَارَيْ كِسْرَى ف هيدى سيدنا عمر رضي الله عنه سُوَارَيْ كِسْرَى لسراقة تنفيذا لوعد رسول الله صل الله عليه وسلم .. قال تعالى:" وَ مَا يَنْطِقُ عَنِ الْهَوَى* إِنْ هُوَ إِلَّا وَحْيٌ يُوحَى* ٰو يبكى" سراقة و يبكى سيدنا عمر .صدقت يا رسول الله ♡ نكمل بكرة إن شاء الله أذكروني بدعوة 🤍 @

سيرة_الرسول الحلقة 67 يلا صلوا على النبى اللهم صل وسلم وبارك على سيدنا محمد وعلى آله وصحبه أجمعين 🤍 هجره نبينا ﷺ من مكه للمدينه(9 ) ثَانِيَ اثْنَيْنِ إِذْ هُمَا فِي الْغَارِ كفار قريش قالبين الدنيا على النبى عليه الصلاة والسلام .. و بيدورا فى كل حتة و فعلا اكتشفوا الطريق اللى مشي فيه النبى عليه الصلاة و السلام وصاحبه ابو بكر رضى الله عنه.. و وصل الكفار للجبل اللى فيه الغار .. و طلعوا الجبل ووقفوا قدام الغار بالظبط.. و الغار صغير اوى.. ابو بكر جوه مش مصدق انهم قدام الغار.. فبدأ يتوتر و بقى مضطرب جدا.. اصل ابو بكر مش خايف على نفسه ..ابو بكر خايف على النبى و على الدعوة لدين الله فبمنتهى القلق بص للنبى و قال : يَا رَسُولَ اللَّهِ، لَوْ أَنَّ بَعْضَهُمْ طَأْطَأَ بَصْرَهُ رَآنَا. (لو حد منهم بس يوطى راسه كده و يبص تحت .. هيكشفنا ) ويرد النبى و هوه قاعد فى سكينة و يقول : "يَا أَبَا بَكْرٍ، مَا ظَنُّكَ بِاثْنَيِنْ اللَّهُ ثَالِثُهُمَا". وفعلا الحمدلله ربنا حفظ رسول الله و صاحبه عن الكفار.. يقول الله تعالى:( إِلَّا تَنصُرُوهُ فَقَدْ نَصَرَهُ اللَّهُ إِذْ أَخْرَجَهُ الَّذِينَ كَفَرُوا ثَانِيَ اثْنَيْنِ إِذْ هُمَا فِي الْغَارِ إِذْ يَقُولُ لِصَاحِبِهِ لَا تَحْزَنْ إِنَّ اللَّهَ مَعَنَا فَأَنزَلَ اللَّهُ سَكِينَتَهُ عَلَيْهِ وَأَيَّدَهُ بِجُنُودٍ لَّمْ تَرَوْهَا ) . وهنا اتذكر ابو بكر فى القرآن الكريم و اثبتت صحبته لرسول الله ♡ دلوقتى الرسول صلى الله عليه وسلم هيقعد مع ابو بكر فى الغار لمده ثلاث أيام..و دلوقتى فى ادوار مهمه اوى هيقوم بيها اكتر من شخص منهم . 《عبد الله بن ابو بكر 》 وده كان شغله المخابرات .كان بيروح كل يوم بليل للغار يبلغهم اخبار قريش ويرجع قبل الفجر . و《عامر بن فُهَيرة 》رضي الله عنه ده كان مولى ابو بكر الصديق رضي الله عنه.. عامر هيرعى الغنم فى الطريق اللى فيه آثار قدم النبى الشريفة و ابو بكر وعبد الله .. عشان يمحى آثار الاقدام وساعتها محدش من الكفار هيقدر يعرف طريقهم.. أما《 أسماء بنت أبي بكر 》 رضي الله عنها كانت بتاخد الاكل و الشرب و تروح يوميا الغار لرسول الله و ابوها.. وكان مناسب جدا انها تمسك المهمة دى عشان محدش هيشك فيها ..اصل صعب ان إمرأة تمشى المسافة دى فى الصحرا و خصوصا لو فى الشهور الأخيرة لحملها ، وكانت بتربط الأكل و الشرب بحزام حوالين بطنها وعشان كده سماها الرسول بذات النطاقين وكانت بتمشى المسافة دى وتطلع الجبل الصعب ده لمده 3 ايام متواصلة.. و فى واحد اسمه 《عبد الله بن أُرَيْقِط》 ده هيبقى مع النبى و ابو بكر فى تكملة المسيرة للمدينة و هيجيب ناقة تالتة، و كمان هيكون معاه عامر بن فُهَيرة و هيكملوا معاهم لحد المدينة بإذن الله.. خرج الرسول مع ابو بكر بالليل من الغار .. و اتجهوا ناحيه اليمن و بعدين غربا ناحية البحر الاحمر و بعدين شمالا فى طريق صعب اوى كله تعاريج و حفر و هنا كان ابو بكر بيعمل حاجه جمييييله اوى .. ابو بكر كان يمشى على يمين النبى و بعدين يلف و يمشى على شماله و يلف و يمشى قدامه و بعدين يلف يمشى ورا النبى ♡ فالنبى خد باله فسأل ابو بكر و قال : ما بك يا أبا بكر؟ فرد ابو بكر و قال : يَا رَسُولَ اللَّهِ أَذْكُرُ الطَّلَبَ (ان حد يجيلك من وراك) فَأَمْشِي خَلْفَكَ، ثُمَّ أَذْكُرُ الرَّصَدَ (ان حد يجيلك من امامك) فَأَمْشِي بَيْنَ يَدَيْك.ثم اذكر الميمنة و اذكر الميسرة.. شايفين ابو بكر بيحمى النبى ازاى !! كان ابو بكر بيقول للنبى : إِنْ قُتِلْتُ أَنَا فَإِنَّمَا أَنَا رَجُلٌ وَاحِدٌ، وَإِنْ قُتِلْتَ أَنْتَ هَلَكَتِ الْأُمَّةُ. طيب دلوقتى قريش هتتجنن ، و بتحاول تحفز الناس كلها بالمكافأت انهم يدورا على النبى و كانت المكافأة 100 ناقة يعنى ثروه كبيره جداا .. وكله كان مموت نفسه و بيجتهد عشان يلاقى النبى عشان ياخد المكافأة لكن كلهم فشلوا إلا واحد اسمه سُرَاقَةُ بن مالك .. سُرَاقَةُ سمع من واحد انه شاف النبى و ابو بكر فبسرعة خد فرسه و سلاحه لحد ما قرب من النبى و ابو بكر ، و سيدنا ابو بكر شاف سُرَاقَةُ بيقرب منهم اكتر بس الحمدلله حصلت معجزة.. إيه هي؟ رجل الفرس اللى راكبه سراقة عماله تغرس جوه الرمل .. مره و اتنين و تلاته فسُرَاقَةُ فهم ان فى شئ مانعه عن الرسول و ابو بكر فقام قايل: يا محمد أسألك الأمان .. و فعلا قرب من النبى و قال : ان قريش عاملة دية للي هيمسك بيكم و انا عايزها.. فقال رسول الله صلى الله عليه وسلم: يا سُرَاقَةُ "أَخْفِ عَنَّا" يعنى متقولش لحد انك شفتنا . و بعدين قال له كلام عجيب اوى قال صل الله عليه و سلم : "كَأَنِّي بِكَ يَا سُرَاقَةُ تَلْبَسُ سُوَارَيْ كِسْرَى "..

سيرة_الرسول الحلقة 66 يلا صلوا على النبى اللهم صل وسلم وبارك على سيدنا محمد وعلى آله وصحبه أجمعين 🤍 هجرة نبينا ﷺ من مكه للمدينه (ج8) شفنا المرة اللي فاتت ان كفار قريش بدأو يستعدوا و يفكروا إزاى يمنعوا رسول الله من الهجره و فى اجتماعهم شفناهم بيفكروا فى وسيله يمنعوا النبى بيها عن الهجره. وفى وسط اقتراحات محدش اقتنع بيها ،يطلع واحد بفكره مجرمه جدا قال : نقتل محمد و نأتي برجل من كل قبيلة و كل راجل منهم يمسك بسيف عظيم..و يهجموا على محمد وهو خارج و ينقضوا عليه و يذبحوه صل الله عليه و سلم و فعلا كفار قريش وافقوا على الفكره و عجبتهم جدا.. طيب ياترى ليه ؟ اصل لما اكتر من رجل يشترك فى قتل النبى و يكونوا رجال من قبائل مختلفه ده هيخلى دم النبى يتفرق بين القبائل ،فلما تيجى قبيله بنى هاشم "قبيله رسول الله " تنتقم و تقتص فساعتها هتنتقم من مين ولا مين!! .. كده هتضطر تحارب قبائل العرب كلها..و ده طبعا مستحيل.. فساعتها بنى هاشم هتضطر تقبل الديه فى مقتل رسول الله و بكده يبقى كفار قريش نجحوا..فحصل إجماع على الفكره دى و كلهم موافقين.طيب امتي قريش هتنفذ الخطة دي؟ النهاردة بليل .. النهاردة محمد هيتقتل مش بكرة مفيش وقت خلاص .. و ينزل جبريل على رسول الله ويقوله: يا رسول الله لا تنام الليلة علي فراشك ان الله قد أذن لك بالهجرة فاخرج يا رسول الله.. فأنهم يدبرون لقتلك الليلة يا رسول الله.. فبسرعة هيخرج النبى علي بيت ابو بكر الصديق فى وقت الظهيره و يكون متلثم صل الله عليه و سلم و اختار الوقت ده لان الشمس بتكون حاميه اوى فقريش بتبقى جوه بيوتها... فيعرف ابو بكر ان النبى جى عليهم من بعيد فيقول ابوبكر لعائشة (عائشة دى بنت سيدنا ابو بكر رضى الله عنهما ولسه مكانتش زوج لرسول الله) فيقول ابو بكر: يا عائشه ما جاء رسول الله الا بأمر عظيم(مدام جى فى الوقت ده يبقى فى حاجه مهمه اوى)..على فكره ابو بكر كان كل ما يسأل النبى متى الهجرة..فكان النبى يرد يقوله : يا ابا بكر لا تعجل لعل الله يجعل لك صاحبا ..و يوصل النبى لبيت ابو بكر و يقول: أذن الله لنا بالهجره يا ابا بكر..فيبكى ابو بكر و يقول الصحبه يا رسول الله؟.. فيرد صل الله عليه و سلم : الصحبه يا ابا بكر.. و تحكى عائشه و تقول: لم اكن اعلم ان البكاء قد يكون بسبب الفرح إلا بعد ان رايت ابى يبكى فرحآ بالصحبه مع رسول الله وقت الهجره :') طيب و يخرج النبى ويروح لعلى بن ابى طالب و يخليه ينام مكانه فى الفراش و دى هتبقى عمليه تمويه لكفار قريش... وكمان الرسول عليه الصلاه و السلام كلف على بن ابى طالب بمهمه تانيه انه يرد الامانات لكفار قريش اللى سايبين فلوسهم معاه..اصل كفار قريش مش بيلاقوا حد أمين زى محمد عليه الصلاه و السلام عشان يسيبوا فلوسهم عنده :) و رغم شدة عدائهم له صل الله عليه وسلم، إلا انه كان مشغول و حريص قبل الهجره برد الأمانات.. (ياجماعه الموقف خطير كل دقيقه ممكن يندفع فيها حياه النبى هدر .. ولكن الامانه :') ♡..صدق الله عزوجل..إنك على خلق عظيم يا رسول الله ) هنكمل سوا إن شاء الله 🤍

سيرة_الرسول الحلقة 65 يلا صلوا على النبى اللهم صل وسلم وبارك على سيدنا محمد وعلى آله وصحبه أجمعين🤍 هجره نبينا ﷺ من مكه للمدينه (ج7) ... هاجر سيدنا عمر بن الخطاب ؛ وكان فى اتنين من صحابه معاه ؛ واحد اسمه عياش بن أبى ربيعه ؛ والتانى هشام بن العاصى .. وفي نص الطريق اتبعتت لهشام بن العاصى مراسيل بتحرضه انه يرجع لمكة و ميهاجرش للمدينة.. وللأسف أستجاب و افتتن و رجع مكة .. أما عياش ابن ابى ربيعة ..ابو جهل قاله: أدرك أمك يا هشام.. لقد نذرت ان لن تستظل من الشمس حتي تعود اليها و إلا تموت.. فطبعا عياش اتخض.. فقام و راح لعمر بن الخطاب و قام قايله : امي يا عمر.. يجب ان ارجع .. فعمر قاله: متصدقش يا عياش.. دول بيكدبوا . فأبو جهل قال لعياش: امك قد نذرت ألا تمتشط (تسرح) شعرها و لا تستحم حتي تعود .. فقام عياش قايل لعمر.. فعمر قاله: يا عياش لئن اكل القمل رأسها فستمتشط.. و ان حرقتها الشمس فستستظل.. بس للأسف عياش صمم وقال : سأبر قسم امى و لى فى مكة مال فسأرجع لآخذه.. فقام سيدنا عمر قاله: سأعطيك نصف مالى و لكن لا تعود إلى مكة ..ستفتتن فى دينك يا عياش.. المهم عياش صمم يرجع عن الهجرة و يرجع لمكة تانى.. فقام عمر بن الخطاب قاله : يا عياش خذ هذه الناقة فهى مطيعة و سريعة جدا فإذا رايت غدراً من القوم فاركب عليها و الحق بنا و تلحقنا ان شاء الله (شفتوا قد ايه عمر بيهتم بصاحبه ).. فيركب عياش علي ناقة عمر.. فيروح ابو جهل في نص الطريق قايل لعياش انا ناقتى ضعيفه اوى ممكن تبدل معايا و تديني ناقة عمر.. فيادوب عياش بينزل فقام ابوجهل مكتف عياش و تطلع خدعه و مكيدة زي ما قال عمر بن الخطاب و يوصل عياش لمكه متكتف بالسلاسل الحديد.. فيبدأو يعذبوه فى مكة لحد ما يفتنوه عن دينه و يترك الاسلام.. ورغم كده إلا انهم كانوا بيأنبوا نفسهم.. فكانوا بيقولوا : ما الله بقابل ممن افتتن صرفا ولا عدلا ولا توبة ، قوم عرفوا الله ، ثم رجعوا إلى الكفر لبلاء أصابهم ! و تنزل الأية : "قُلْ يَا عِبَادِيَ الَّذِينَ أَسْرَفُوا عَلَىٰ أَنفُسِهِمْ لَا تَقْنَطُوا مِن رَّحْمَةِ اللَّهِ إِنَّ اللَّهَ يَغْفِرُ الذُّنُوبَ جَمِيعًا إِنَّهُ هُوَ الْغَفُورُ الرَّحِيم".. الأية دى نزلت فى الناس اللى ماهجروش و ماأطاعوش أوامر رسول الله صل الله عليه و سلم فى الهجرة من مكة للمدينة.. فعمر بن الخطاب فرح بالأية فجاب ورقة و كتب عليها الأية و طبقها و بعتها لمين؟ لهشام بن العاصى.. فيقول هشام: فوصلني الكتاب (الجواب) من عمر بن الخطاب فجعلت أقرأ الورقة و اديرها كى أفهمها ودعوت ربى ان يفتح عليا بفهمها حتي قراتها وفهمتها و ألقى الله فى صدرى ان هذه الأيه نزلت فينا فقلت و الله ما نزلت هذه الأيه إلا في أنا و أصحابي .. وركب هشام الناقه و هاجر للمدينه و بيقول هشام تاب الله عليٌ فى المدينة .. قريش توقعت ان اكيد النبي هيهاجر مدام الصحابة كلهم بيهاجروا .. فقريش أتجننت وعملت اجتماع في دار الندوة انهم لازم يمنعوا محمد من الهجره..فقام واحد يقول انا عندي فكرة.. نكتف محمد و نربطه .. فرفضوا و قالوا هيجى قرايبه يفكوه..فقام واحد تانى قال نقتل محمد.. فردوا عليه و قالوا : طب كنا قتلناه من زمان لكن هتيجي بني هاشم تنتقم مننا فيقوم تالت واحد قايل : نطرده ..فردوا عليه و قالوا: ما ده اللي محمد عاوزه.. يبقى كده مستفدناش حاجة ..فتنزل الأية :وَإِذْ يَمْكُرُ بِكَ الَّذِينَ كَفَرُوا لِيُثْبِتُوكَ أَوْ يَقْتُلُوكَ أَوْ يُخْرِجُوكَ وَيَمْكُرُونَ وَيَمْكُرُ اللَّهُ وَاللَّهُ خَيْرُ الْمَاكِرِين صدق الله العظيم نكمل بكره إن شاء الله أذكروني بدعوة 🤍

ـ┓━━━━🕌🕋🕌━━━┏- ✨ جمعه مباركه ﷺ  ✨ ـ┛━━━━🕌🕋🕌━━━┗- ‏﴿✨ان الله وملائكته يصلون على النبي يا أيها الـذيـن آمنوا صَـلُّـوا عليه وَسَلِّمُوا تسليمـا✨﴾

سيرة_الرسول الحلقة 64 يلا صلوا على النبى اللهم صل وسلم وبارك على سيدنا محمد وعلى آله وصحبه أجمعين 🤍 هجرة نبينا ﷺ من مكه للمدينه(ج6) زينت بنت محمد حامل فى السابع وفى طريقها للهجرة بعد ما والدها هاجر بفترة لانها كانت فى مكة مع زوجها. و حاول هبّار بن الاسود (قبل إسلامه) انه يمنعها فضرب الناقه اللى كانت ركباها.. و زينب وقعت وبتنزف لفترة طويلة و تقعد كذا شهر تنزف تنزف ..و مات الجنين و هتعيش زينب فترة و هنحكى عن اللى حصل معاها هي و زوجها ابو العاص بن الربيع و هتعيش زينب بتعانى من الاذى اللى اتعرضت له بسبب هبار واللي هيأدي لوفاتها لاحقا.. فالنبي من حزنه راح قايل : من رأي منكم هبّار بن الاسود فليحرقه بالنار لما فعله بزينب بنت محمد.. و لما النبى يهدى فيرجع تاني للصحابة و يقولهم : انى قلت لكم من رأى هبّار بن الاسود فليحرقه بالنار و لا يعذب بالنار إلا رب النار و لكن من رأي هبار بن الاسود فدمه هدر .. (طبعا لازم قصاص) و تلف الايام وهنشوف بعد كده لما النبى ينتصر و ييجي يوم فتح مكة و هبّار عايش جوه مكة ؛ و هبّار بن الاسود عارف ان لو الصحابة مسكوه هيقتلوه و كل صحابي نفسه هو اللي يمسك هبار عشان ينتقم لزينب بنت رسول الله .. فيتلثم هبّار بن الاسود عشان يخفى نفسه عن الناس و يمشى فى طرقات مكة بيدور في الوشوش لحد ما يوصل لمين؟ .. للنبي صل الله عليه و سلم. فيقف قصاد النبي ميكونش في ناس حواليهم.. فالنبى يقول: من؟ فيشيل هبّار اللثام من علي وشه ..فالنبي يقوله: انت هبّار!! فيقول هبّار : يا محمد هلا عفوت عني؟ فالنبي يقول ايه للي أذى ابنته وكان سبب في موت ما في بطنها ؟ يرد النبى و يقول عفونا عنك يا هبّار .. يغفر الله لك.. وأسلم هبار بعد ذلك وبقى صحابى . طيب يقول علي بن ابي طالب : ظل اصحاب رسول الله يخرجون مستخفين رجلا او رجلين في منتصف الليل يخافون من كل خوف و يخافون من كل نفر من انفار قريش الا رجلا واحدا .. سيدنا على بيقول : ما علمت احداً إلا و خرج مستخفياً إلا عمر بن الخطاب .. طب ازاى؟ عمر راح بالليل و أخد الحربة و القوص بتاعه و راح علي الحرم و قال : يا معشر قريش يا معشر قريش ..فكله اتجمع ..فراح عمر قايل : من اراد ان تثكله امه و يُيتم ولده و ترمل زوجته ( اللي عاوز امه يبقي ابنها ميت و مراته تبقي ارملة و عياله يبقوا يتامى) فإنى مهاجرآ الى المدينه عند الفجر.. فليتبعني و طلع عند الفجر و مفيش مخلوق قرب منه .. و طلع مع عمر 20 واحد للهجرة من فقراء المدينة. رضي الله تعالى عن عمر عن الفاروق... هنكمل سوا إن شاء الله 🤍

و زينب وقت ما هاجرت كانت حامل في الشهر السابع و خرجت و هي راكبة علي الناقة بتاعتها رضي الله تعالي عنها و ارضاها.. فترصدها قريش و تخرج وراها قريش فيجى واحد اسمه هبّار بن الاسود (قبل إسلامه) يحاول يمنعها من الهجره للمدينه فيبدأ يضرب الناقه بتاعتها بالسهام..فبدأت الناقة تتحرك و تجرى جامد فأتنطرت زينب ..فوقعت زينب.. فجالها نزيف حااد حاامل فى السابع .. وفضلت زينب تصرخ من الألم ..و قريش من المنظر ده بدأت قريش تخاف و تقلق انهم بكده اتورطوا فى مصيبه كبيره ..فمين يلحق زينب؟ هند بنت عُتبه "قبل إسلامها" دى زوجه ابو سفيان ..دى اللى ايام ما كانت كافره حلفت انها لازم تاكل كبد سيدنا حمزه رضى الله عنه لكن بعد كده هتسلم و هتبقى من اقوى النساء فى الدفاع عن الإسلام ..ولعل ربنا اكرمها بالاسلام بسبب الموقف اللى وقفت فيه جنب زينب بنت النبى عليه الصلاه و السلام . فتشوف هند المنظر الصعب ده فتجرى تساعد زينب.. هنكمل سوا إن شاء الله أذكروني بدعوة 🤍

سيرة_الرسول الحلقة 63 يلا صلوا على النبى اللهم صل وسلم وبارك على سيدنا محمد وعلى آله وصحبه أجمعين 🤍 هجره نبينا ﷺمن مكه للمدينه(ج5) شفنا شهامه عُثْمَانَ بْنَ طَلْحَة "قبل إسلامه" مع ام سلَمَه و هو بيرفض انها تهاجر للمدينه لوحدها و فعلا خدها للمدينه و ام سلَمَه بتحكى و بتقول : والله انا متأكده ان ربى الشكور سيشكره على ما فعل.. طيب كافئ عثمان بإيه؟ بصوا عُثْمَانَ بْنَ طَلْحَة من قبيلة اسمها بني شيبة.. عارفين مين دول؟ دول اللي معاهم مفتاح الكعبة لحد النهاااارده.. عثمان بن طلحه هيقف يوم فتح مكة و كان برده لسه مأسلمش و رغم انتصار المسلمين إلا ان النبى كان وفى بوعده معاه وساب المفتاح معاهم ..وقال صل الله عليه و سلم :يا بني شيبة لن نأخذ منكم مفتاح الكعبة ..فهو لكم .. لا يأخذه منكم إلا ظالم.. ولحد النهارده المفتاح معاهم وهيفضل معاهم ليوم الدين.. وطبعا بعد كده اسلم عُثْمَانَ بْنَ طَلْحَة .. طيب هاجرت ام سلمه و وصلت بالسلامه.. هيخرج مين كمان؟ هيخرج صحابي اسمه صُهَيْبُ الرومي كان عمره حوالى 25 سنه شاب مرفهه و غنى جدااا و هوه كان اجنبى من الروم.. فأسلم (فاكرين التعذيب اللى اتعرضله وقت إسلامه؟ لما كان كفار قريس يشدوه من شعره و يغرقوه فى ميه سخنه و اول ما يحسوا انه خلاص هيموت فيطلعوه) المهم قرر صُهَيْبُ يهاجر اتباعآ لأمر النبى بالهجره من مكه للمدينه.. و صُهَيْبُ كان مهاجر ب 12 جمل عليهم أكل و شرب و فلوس وكمان لابس لبس شيك اوى و متعطر بعطر جميل.. فيطلع عليه كفار قريش فيقولوله: إلي اين يا صُهَيْبُ فيقول مهاجراً إلى الله و رسوله..فبدأت قريش تفكر تدايقه و تمنعه، فقالوله: أتخرج بكل هذا المال؟ لقد دخلت مكه صعلوكآ فأخرج يا صُهَيْبُ كما دخلت ..( فعلاً هو دخل مكه و كان فقير.. بس ده ميعيبوش لأنه اشتغل و كسب و قدر يعمل ثروه بمجهوده). فالمهم صمموا و قالوا: أخرج كما دخلت صعلوكآ يا صُهَيْبُ و إلا سنمنعك من الهجرة (هما طبعا قالوا اكيد مش هيوافق يسيب فلوسه ويهاجر.. هما هدفهم انهم يضغطوا عليه عشان ميهاجرش) فرد صُهَيْبُ عليهم و قال: يا معشر قريش أرأيتم إن دليتكم علي المكان الذي دفنت فيه باقى مالي أتتركونني ؟ فقالوا : أجل.. فقال : إما أن تأخذوا المال و تتركونى.. فإن أبيتم ذلك و قررتم ان تقتلوني فوالله لأخرج ما معى من سهام و أفرغها عليكم .. المهم طبعا قرروا يخدوا الفلوس و راحوا على الوصف اللى وصفه و خدوا الفلوس و بعدين بصوا على الجمال ال12 اللى معاه و قالوله : و ماذا عن تلك الجمال فلن نتركك تأخذها ابدا .. فقال صُهَيْبُ : خذو الجمال.. (شايفين التضحيات و بياخد قرارات سريعه ازاى!) المهم قام واحد من الكفار بص علي هدوم صهيب الشيك اوى و قال: و هذه الجبة لن نتركك تخرج بها ابدا.. فقام قلعها و ادهالهم.. فواحد تانى من الكفار قام بص على جزمه صُهَيْبُ و قال: و هذا النعل الثمين لن تخرج به من مكه.. فقام صهيب قالع الجزمه و بقى حافى :'( فى الصحرا دى و قال :خذه.. و بعدين قالوله بكل إستهزاء: الآن اذهب يا صُهَيْبُ و هاجر كما امرك محمد (يا جماعة حافي.. حافي و مش لابس غير جلابيه خفيفه يدوب ستراه) بس تضحيه صُهَيْبُ مش ببلاش ابدا والله ..تعرفوا ان لما وصل للنبى كل اللى عملته قريش مع صُهَيْبُ.. قام النبى قال إيه؟ قال النبى : ربح البيع ابا يحي..ربح البيع ابا يحي..(دى شهاده من رسول الله ان ربنا هيعوض صُهَيْبُ بكل اللى خسره اضعاف اضعاف ف الدنيا و الاخره كمان) وينزل في صُهَيْبُ الرومى الأيه دى: "وَمِنَ النَّاسِ مَن يَشْرِي نَفْسَهُ ابْتِغَاءَ مَرْضَاتِ اللَّهِ وَاللَّهُ رَءُوفٌ بِالْعِبَاد"... هاجر صُهَيْبُ و بعديه تخرج زِنِّيْرَةُ اللي كانت بتتعذب من سيدها لانها اسلمت و اشتراها منه ابو بكر الصديق و اعتقها و فقدت بصرها بعد كده و ربنا رجع بصرها تانى.. و تخرج كمان السيده سوْده (ودى اللي بعد كدا هتكون زوجه النبي صل الله عليه و سلم فيقابلهم كفار قريش في نص الطريق و طبعا عيب ان العربى يضرب ست لانها شئ ينقص من شهامته و رجولته فيبدأ الكفار يفكروا يعملوا اي طريقة يمنعوهم بيها ..فيبدأو يرموا السهام علي الناقة اللي ركباها زِنِّيْرَةُ و اللي ركباها سوْده فالناقة تخاف و تجري فتوقع من فوقيها زِنِّيْرَةُ و سوْده و تطلع الناقتين يجروا و يفضلوا لوحدهم في الطريق فتضحك عليهم قريش و يشتموهم.. فيكملوا طريقهم للمدينه مشى ..( رايحين مشى من مكة للمدينة في نص السكة ممكن يتعرضوا لأى شئ و كل حاجتهم كانت متشاله على الناقه) ..المهم فيتعرضوا للعطش فربنا الكريم يعملهم معجزه او كرامة من الكرامات فينفجر لهم من الأرض ينبوعاً من الماء فى نص الطريق ..و يجى ميعاد خروج زينب بنت محمد رسول الله صل الله عليه و سلم ((و زينب مهاجرتش مع الصحابه .. زينب هاجرت بعد غزوه بدر لان زوج زينب كان مشرك و كان حابسها و مانعها من الهجره لانه كان بيحبها جدا))..

و تقول : والله ما نظر الي نظرة واحدة فما رأيت اكرم من عُثْمَانَ بْنَ طَلْحَةَ و لما وصلنا الي المدينه قال : يا أم سلَمَه ها هنا زوجك ..ادخلى..و ترك الناقة و رجع، (شفتو عُثْمَانَ بْنَ طَلْحَةَ عنده شهامة .. دى رجولة ملهاش دعوة بالدين لانه كان كافر ساعتها.. بس علي فكرة ربنا هيكافئ عثمان مكافئه مش عادية... هنعرفها سوا ان شاء الله 🤍

سيرة_الرسول الحلقة 62 يلا صلوا على النبى اللهم صل وسلم وبارك على سيدنا محمد وعلى آله وصحبه أجمعين 🤍 هجرة نبينا ﷺ من مكه للمدينه (ج4) امبارع تعاهد اهل يثرب مع رسول الله على نصرته و حمايته ..هم الأنصار والنبى عليه الصلاه و السلام قال لأهل مكه : أيها الناس لقد اذن الله لكم بالخروج لقد جعل الله لكم فرجاً و مخرجاَ أرضاً تأمنون بها و اصحاباً تأمنون في ارضهم .. و يفرح الصحابة ..و يبدأ الصحابه اللى من اهل مكه فى الهجره إلى يثرب"المدينه" والنبي عليه الصلاه و السلام وصاهم بالهجره واحد واحد او اتنين اتنين.الهجرة مش شيء بسيط دول مش طالعين رحله يومين و راجعين.. ده اللي هيهاجر هيتقتل و هيسيب اهله و اصحابه و تجارته.. وحياته..و مجتمعه. هيسيب الدنيا كلها عشان يروح لبلد جديدة و لا ضامن المكان اللي هينام فيه و لا الأكل اللي هياكله.. في الطريق ده ممكن يتقتل فى السكه كمان .. طب الصحابه مهاجرين و معرضين نفسهم لكل ده ليه؟ طاعة لله و رسوله ..الصحابه ضحوا اوي والله يا جماعة الصحابة ضحوا تضحيات كبيره..و الله ما في بشر علي وجه الكرة الارضية بعد النبى محمد ضحي كما ضحوا.. فالهجرة مش رحلة او نزهة الهجرة تضحية ..ده لو احنا حد قال لحد فينا يلا لازم تعزل .. هيقعد يعيط و يقول بيتى و مكتبى و ذكرياتى و سريرى اللى برتاح عليه.. فالهجرة كانت تضحية ليس بعدها تضحيه فتبدأ الهجرة و يبقى كله مسموح له بالهجرة إلا رسول الله و آل البيت ..و يبدأ المهاجرين فى الهجره للمدينه واحد اسمه ابو سلَمَه و مراته و ابنهم سلَمَه و تخرج ام سلَمَه مع جوزها و ابنهم ..و فجأه تحس بيهم قريش و تمسكهم .. اصل قريش عامله مراقبه شديده على مكه.. لا حد هيدخل و لا حد هيخرج و اللي هيخرج هنمنعه بكل الطرق إلا لو أسرته بتحميه زي ابو سلَمَه كده.. اصل قريش لما مسكت ابو سلَمَه و مراته و ابنهم الصغير فأهل مراته سألوه : إلى أين يا ابو سلَمَه ؟ فرد عليهم و قال: مهاجراً الي الله و رسوله فقالوا له: لماذا تأخذ ابنتنا؟ فيشدوها منه فتصرخ ام سلَمَه فأبنها يتعلق في هدومها و يجري مع امه و تغضب عيله ابو سلَمَه و يقولوا مش هنسيب حفيدنا عندكو و ياخدوا الولد من امه .. فيشدوا دراع سلَمَه الولد الصغير فدراعوا يتخلع و يبدأ يصرخ من الألم..اهل امه بيشدوه من ناحية و اهل ابوه بيشدوه من ناحيه.. و يضطر ابو سلَمَه يهاجر لوحده و يستودع مراته و ابنه في الله و يترك لهم الله عزو جل.. طيب ليه يا ابو سلَمَه تسيبهم ؟ لأن وقتها الهجره كانت فرض و الهجرة كانت صعبة ..و كان اللي ميهاجرش كان يبقى عاصي..فيخرج ابو سلَمَه و يستودعهم في الله و تتاخد ام سلَمَه و عاشت مع اهلها..و يتاخد سلَمَه الولد الصغير و يعيش مع اهل ابوه و يتعالج الولد.. و بتحكى ام سلَمَه و بتقول: ظللت ابكى والله سنه..( اي أم تتحرم من ابنها لمده سنه ده بلاء و ألم كبير) .. و كانت ام سلَمَه بتروح عند المكان اللى أتاخد منه أبنها و تقعد تعيط عليه و على ابو سلَمَه طول اليوم من الفجر للمغرب.. فضلت تبكى سنه لحد ما مرت السنه الصعبه دى فعدى عليها راجل من قرايبها و شافها وهيه بتبكى فراح لأهلها و قالهم: سيبوها تروح لزوجها و خليهم يرجعولها ابنها و قال : إلى متي تتركون هذه المسكينة لقد سئمنا من صوت بكائها (ملينا من عياطها) اتركوها ..فراحوا فعلا و قالوا لها : أخرجي الي زوجك ان اردت، فقد سئمنا من بكاءك.. و مشيوا وجابولها ابنها سلَمَه فبتقول: مبقتش مصدقه نفسى بسرعه خدت ابنى و جريت بيه، أصلها كانت خايفه يرجعوا فى كلامهم فجريت من غير اكل و لا فلوس، و لسه يدوب جايه تطلع من مكة ..فقابلها راجل اسمه عُثْمَانَ بْنَ طَلْحَةَ ده كان ساعتها لسه كافر بس شهم فقالها: إلي اين يا ام سلَمَه .. فترد وتقول : أفر و أهرب بديني منكم و ألحق بزوجي في المدينة، فيبصلها و يقولها هتسافري لوحدك علي الجمل بتاعك من مكة للمدينة!! (تخيلوا اللى هي قررت تعمله .. مسافرة كدا علي جمل من مكة للمدينة صعب اوووي يا جماعة .. ده متعب نفسيآ و إجتماعيا بالنسبه للعرب كمان.. يقول عُثْمَانَ بْنَ طَلْحَةَ : يا ام سلَمَه تسافرى وحدك .. من معك؟ قالت الله ليس معي سوي ربي و ابني هذا..فبتقول فأخد الحبل بتاع الناقه بتاعتها بإيده و فضل ماشى على رجله ومشى بيا من مكة الي المدينة كيلوات كتييييره.. فبتقول ام سلَمَه : فأخذ بخطام ناقتي و مشى بي من مكة إلي المدينة و والله ما رأيت رجل اشرف و لا أكرم من عُثْمَانَ بْنَ طَلْحَةَ فكان اذا تعب و اراد ان يستريح... اناخ لي الجمل ..و يصدر صوت (زى احم احم) و اناخ الجمل ثم يذهب و يربطه في عمود شجرة من الشجر و يختبأ خلف شجرة ليستريح..( وطبعا بيعمل كده عشان تبقي براحتها ومتبقاش مكشوفة قدامه)..و بتقول :فيتركني فإذا اراد ان يعود عاد بظهره (عشان ميشفهاش) و اصدر صوتاً و مسك بخطام الناقة و قال اركبوا: (يعني بيقول لأم سلَمَه اركبي) فتركب أم سلمه..

سيرة_الرسول الحلقة 61 يلا صلوا على النبى اللهم صل وسلم وبارك على سيدنا محمد وعلى آله وصحبه أجمعين 🤍 هجرة نبينا ﷺ من مكه للمدينه(ج3) #بيعه_العقبه_الأولى وشفنا امبارح أن الحجيج و فيهم اهل يثرب " المدينه" و صلوا لمكه و اعطي مُصْعَبُ تقريرا مفصلا عن كل الاحداث وطلب النبي من مُصْعَبُ و اللى معاه انهم يؤدوا مناسك الحج كلها ومقابله النبي لهم هتبقى في أخر يوم بعد تأدية مناسك الحج وهيتقابلوا عند منطقة اسمها العقبه .. و النبي بعت للناس ووصاهم : ان الناس تأتى واحد ورا واحد و محدش يصحى التانى من النوم..اللى صاحى يجى و اللى ماصحيش خلاص مايجيش لأن مش هينفع حد ينبهه و يصحيه.. وال75 مسلم فعلا بقوا ماشيين على اطراف صوابعهم عشان محدش يحس بيهم.. فأجتمع المسلمون فى مكان داخلي حواليه الصخور وده كان فى اخر يوم فى الحج عشان قريش متحسش بيهم ( وانت مكسل فى السرير عن صلاه الفجر.. افتكر ان اللى نام راحت عليه مقابله رسول الله.. اوعى تنام عن صلاه الفجر اوعى تتاخر عن مقابله ربنا و عن طريق النبى :') ♡ و أخيرآ دخل رسول الله عليهم و كأن الشمس طلعت و نزلت الدموع وعجزت الألسنه عن التعبير عن حب النبي صل الله عليه و سلم ( يابختهم) و دخل العباس (و ماكنش لسه أسلم و ده عم النبى عليه الصلاه و السلام ) و بدأ العباس الكلام و قال : يأهل يثرب انكم تعلمون قدر محمد فينا والله إنا قادرون علي حمايته ولكنه أبي (رفض) إلا الإنحياز إليكم فإن رأيتم أنكم خاذلوه فاتركوه من الآن نحن اولي به ولو رأيتم انكم ناصروه فخذوه (العباس عارف سر التحالف مع اهل يثرب و امر الهجره رغم انه كان كافر ساعتها و ده لأنه كان حابب ياخد دور ابو طالب اخوه بعد وفاته و يكمل مسيرته و يبقى سند للنبى و لعل كلامه ده و وقفته دى كانت سبب ان ربنا الشكور يشكره ويمن عليه بالإسلام بعد كده ) ..فرد البراء بن معرون و قال : تكلم يا رسول الله فداك ابي وامي قل ما شئت.. فقال النبي صل الله عليه وسلم: 1-تمنعوني كما تمنعون أهلكم واولادكم.. اي تحموني.. قالوا نعم يا رسول الله موافقين :')..2-الامر بالمعروف والنهي عن المنكر.. فقالوا أجل ..3- السمع والطاعة يعنى التنازل والتضحية قالوا نعم ...4- تنفقوا في السراء والضراء فقالوا أجل..5-لاتأخذكم في الله لومه لائم اي الخوف من الله (كل الطلبات دى مش لنفسك يا رسول الله كلها لتبيلغ الدعوه لعبادة الله الحق .. كل ده عشانى و عشانكم) فقال الهيثم : عندي استفسار يا رسول الله :إن بيننا وبين القوم حبال وإلا قاطعوها يا رسول الله رأيت إن أظهرك الله وفتحت مكة اتتركنا وتعود؟ (الهيثم بيقول للنبى احنا بينا و بين البلاد معاهدات و مواثيق و اكيد هتنقطع عشان احنا اخترنا اننا نبقى معاك..الهيثم مش خايف..الهيثم عايز يقول احنا هنرتبط بيك اوى اوى يا رسول الله ، فياترى لو انتصرت على كفار قريش. هترجع مكه و تسيبنا؟ :' فدمعت عين الرسول الشريفة وقال: لا والله بل الدم الدم والهدم الهدم والممات مماتكم والمحيا محياكم من احبكم احبني ومن أذاكم أذاني انتم مني وانا منكم (يعنى هعيش معاكم و هموت معاكم) .. فقال أسعدَ بن زُرَارَةَ : يأهل يثرب اننا لم نضرب اعناق الابل الا ونحن نعلم انه رسول من عند الله تعالى..أيها الناس فإن تأخذوه فلا تخذلوه واعلموا ان اخراجه مفارقه العرب وقتل خياركم فانظروا في امره لو كنتم خاذلوه فاتركوه الآن ..فقال رجل يا أسعدَ : والله لو امرتنا ان نميل بأسيافنا علي اهل مني( يعنى نحارب كل اللى فى مكه واللى جى من بره مكه كمان) نميل و نحارب ..فقال سعد بن مُعاذ : يا رسول الله صل حبال من شئت و أقطع حبال من شئت (المعاهدات اللى بنهم و بين البلاد ..يعنى اللى عايز توصله اوصله و اللى عايز تقطعه أقطعه) و سالم من شئت و عادي من شئت وقاتل من شئت و خذ ماشئت والله فيكون الذى اخذته منا احب إلينا مما تركته لنا .. بعد ما وافقوا على طلبات النبى قالوا : وماذا لنا يا رسول الله في المقابل ؟ فقال صل الله عليه وسلم: الجنة ..فقالوا ابسط يدك نبايعك يا رسول الله فتتسابق الناس علي كف رسول الله كأن اللى هيمسك ايده الأول هيدخل الجنه.. خلصت كده بيعه العقبه الكبرى و مشى الناس و مشى الرسول و كان ده وقت الفجر و فجأه سمع الناس صوت بيقول : ادركوا محمد( ألحقوا محمد) هيهاجر مع اهل يثرب ..فالنبى بص و قال ذلك صوت الشيطان ..فبسرعه كله اتحرك و دخل على الخيام .. ودخل كفار قريش خيام الحجيج وقالوا هل رأي احد محمد البارحة فكان المسلمين بيكتموا نفسهم عاملين نفسهم نايمين فأتكلم عبد الله بن سَلول و قال : ما قابل احد من هذا المجتمع محمد ..فمشيت قريش و عدت على خير (على فكره عبد الله بن سَلول ده مسلم منافق هنعرف ده بعده كده).. المهم جه واحد اسمه الطفيل ابن عمرو الدوسي وقال : أبشر يا رسول الله اسلمت دوس فرد النبي وقال إن الله اختار المدينة (يثرب) و هنهاجر هناك.. نكمل بكره ان شاء الله أذكروني بدعوة 🤍