تَـوبَـة.

إشارة :

#_5_افكاري اني وكومة ناس مثلي اكو ماشين على مبدأ انو انتَ من تنصح نصيحة لازم اتطبقهة على نفسك قبل لا تحجيهة (بموضوع الدين) ف اني صار عمري هسة 19 سنة وكل عمري ماشية على مبدأ مستحيل انصح شخص نصيحة اذا مو اني امطبقتهة على نفسي ف مستحيل اجي اگول لشخص صلي واني ما اصلي او اگول فلان شي حرام واني اسوي هالشي جان هذا قاموسي بالحياة هيج ماشية على هالمبدأ ولحد قبل كم يوم شفت منشور لشيخ الشيخ يحجي على الناس الي مثل تفكيري بالنصيحة وهيج ف گال ماكو بشر معصوم كلنا نخطأ وعلى هذا التفكير معناهة محد ينصح بعد لان كلنا انسوي الخطأ وعلى هاي الحالة محد راح ينصح غير النبي محمد عليه افضل الصلاة والسلام ما هوة كل البشر يخطئون ومو معناهة اذا جيت اني نصحتك بشي واني ما اسوي معناهة اني منافقة او اني اشوف عيوب الناس وما اشوف عيوبي لا بالعكس معناهة اني احبك واخاف عليك من الخطأ والشي الي اني ما گدرت اسوي اريدك انت اتسوي وشكرا جزيلا. 💕

لا تخاف ، الله يرتبها .

الناس تتغير أو تنكشف؟ دائمأ نسمع "فلان تغير" أو "فلان مجان هيج" بس هو فعلاً تغير لو المواقف كشفتة؟ مو كل إنسان يتبدل وية الأيام، أكو ناس من البداية كانوا مخفين وجوههم الحقيقية، ولمن تجي المصلحة، أو الغيرة، أو أول خلاف، يطيح القناع وتبين أخلاقهم على حقيقتها. وقتها نحس إنهم تغيّروا، لكن بالحقيقة إحنا اللي كنا نشوفهم بعين الثقة، مو بعين الواقع. الإنسان الصادق يبقى صادق مهما تغيّرت الظروف، أما اللي أخلاقه مرتبطة بمصلحته، فكل موقف يكشف جانب جديد منه. ولهذا لا تحكم على الناس من كلامهم، يمكن إحنا ما انخدعنا بكلامهم، انخدعنا بالصورة اللي رسمناها إلهم بداخلنا. كنا نشوفهم مثل ما نتمنى،رغم ممكن انت تكون حاس بيهم انو هم راح يطعنوك بيوم م.، ممكن بعض الاشخاص اتحسهم اتبدلو بس بالحقيقة كان مخبي نفسه طول هالفترة. المواقف هي الامتحان الحقيقي للناس. مو الضحكة، ولا الكلام الحلو، ولا الوعود الكبيرة. لأن الكلام يگدر أي شخص يحچي بيه، لكن وقت الشدة، ووقت الغيرة، ووقت النجاح، ووقت الفشل... هناك تنكشف النفوس. أكو ناس يفرحون لإنجازك وكأنه إنجازهم، وأكو ناس يبتسمون بوجهك، وبمجرد ما تدير ظهرك يتمنون زلتك. وأكو ناس يبقون وياك طول ما أنت نافعهم، ولمن تنتهي المصلحة، ينسون كل العِشرة وكأنها ما كانت. ولهذا لا تستعجل بالحكم على أحد، لا بالحب ولا بالثقة. خلي الأيام تتكلم بدل الكلمات، وخلي المواقف تعرفك بمن يستحق مكان بقلبك. لأن الثقة غالية، وما تنعطى إلا للي يثبت إنه أهل إلها. وبالنهاية، مو كل شخص يطلع من حياتك يكون خسارة. مرات انكشاف الحقيقة نعمة، حتى لو وجعتك بالبداية. لأن الحقيقة المؤلمة أهون من كذبة مريحة تعيش بيها سنين، وأفضل ألف مرة تعرف معدن الناس اليوم، من باچر بعد ما تخسر بسببهم أكثر.

انتَ مو كـامل - كُل إنسان له نقـص - لذلك لا تتكبر لأنها من صفات "الحيوان" يظن الحِمار إنه افضل من الأسد والأسد افضل من الحمار وبالتالي كليهُما من الحيوانات . @AH_ili

مو كل شخص يضحك بوجهك يعني يحبك، ومو كل شخص گال لك كلام حلو يعني يحمل الك الخير. مو كل اهتمام هو محبة، ومو كل سؤال عنك هو خوف عليك. أكو ناس تعرف شلون تختار كلامها حتى تكسب قربك، بس أول موقف يبين حقيقتها. لا تنخدع بالمظاهر، لأن بعض الوجوه تخفي أشياء ما تبين إلا وية الوقت. مو كل من وگف يمك چان سند، ومو كل من سمعك چان يفهمك. أحيانًا أقرب الناس إلنا يكونون أكثر ناس نكتشف حقيقتهم متأخر. خلي أفعالهُم تحچي، لأن الكلام سهل، والوعود سهلة، والابتسامات أسهل… بس الصدق يبين بالمواقف، وقت الضيق، ووقت ما يكون ماكو شي يرجع للشخص فائدة من وجوده يمك. لا تنطي ثقتك بسرعة، ولا تحكم على الناس من أول كلمة، لأن بعض الأشخاص أجمل ما بيهم هو الكلام فقط.

جان اكو يوتيوبر عراقي جنت اتابعة بـ 2022 وقبلها جان محتوى انتقاد وردات فعل على تصاميم وغيرها وغيرها حالة حال باقي اليوتيوبرية فهذا اليوتيوبر جان دائمأ يردد مثل يگول "المايتعدل يتبدل" ما جنت افهم شنو معنى هالمثل عبالي كلام عابر بس هسة يلا فهمت وعرفت انو الشخص الي ما يتعدل ويتصرف على هوى بدون ما يحسب حساب الي وتصرفاتة اتسببلي مشاكل يتبدل بكل سهولة لان محد مجبور يبقى وية شخص ما يجيبلة غير بس المشاكل ليش يابة ابقى وية شخص يغلط بدون تفكير شخص شايل الاحساس ما مجبورة اتحمل هيج شخص توكسك فبكل بساطة الي ما يتعدل يتبدل🤷🏻‍♀️

مرات دگول هاي الحياة ما تشبهني ، هذا المكان مو مكاني ، البيئة اللي عايش بيها مو مناسبة الي ، وهذا مو حلمي وهذا مو مستواي و المفروض اني بهيج قسم بهيج تخصص ونگعد ننتظر اللحظة المناسبة الوقت المناسب والحياة تبدي ويانه بداية جديدة ونعيش شلون ما چان بس حتى يومنا يخلص وهذا اكبر غلط نسوي بحياتنا ، إن ما نستمتع بالنعم اللي عدنا ولا نعيش حياتنا بحب مجرد ما نكول شوكت يخلص هذا اليوم و انام ، طيب ليش وهاي كلها ايام من عمرنا والحياة عبارة عن توفيقات واقدار من رب العالمين كل شخص رزقه مختلف عن الثاني ، لذلك لازم شوية نتقبل حياتنا ونحب الحياة ونعيشها صدك ، واهم شي نعيش اليوم شنو يصير باجر عود الله كريم ، اهم شي تكون راضي بقدرك و شيجي من الله هلا بي ، هي حياتنا كلها بكيف الله شوكت ما يرتبها بكيفه ، اهم شي نعيش على مبدأ الحمدلله على كل حال ، ومو مجرد كلمة لا فعلاً الحمدلله يارب راضي ومقتنع بكرمك ورزقك وتوفيقاتك اليه ، و يارب يارب زيدني توفيقات وبركة ورزق اكثر واكثر .

حلوة اسمعوها🤍

مرات تصير مشكلة أو خلاف ويه شخص قريب عليك وتنصدم بالفعل اللي سواه ، ممكن هالشي يضوجك ، لكن الحقيقة إن رب العالمين كشف الك حقيقة هالإنسان والحمدلله من بعده عنك .