قصائد حسينيه تراث وحديث

#نعـي مولاتي فاطمة صلوات الله عليها من غاب شخصک یا ولينه علگت روايه الشر علينه لفانه الصهاکي اوشیاطینه اویاهم حطبهم شایلینه نشدته اشعندك جاي لينه اوكل يوم گلبي املوعينه وحدنه ابعزانه دخلينه بس ما لمحني اوزرگ عینه عصرني اومني استافه دینه وآمر على اشيوخ المدينه تگود الفحل ليث العرينه گادوا اوراسه امچشفینه اوببنود سیفه امچتفينه ينخه اولا واحد يعينه وراه اطلعت ولها او حزينه لاوین اصيحن ماخذينه من شافني المشرچ ابدينه رد لي اوسطر عيني ابيمينه السيد المرحوم عبدالحسين الشرع

#تـراث ياحبيب الباري يامن ختم بيك المرسلين بيك وبسيف ابن عمك ثبت للإسلام دين ــــــــــــــــــــــــــــــــــــــ دوحة الدين اغرستها وافرعت منها الأحكام ابمهجتك ساقتها او شيدت من عدها القوام وابذلت جهدك او همتك واجمعت شمل الإسلام ملة اللي بيها اتعبت وآلفت بيها او حدت من يارسول الله غبت اتفرقت وحدة المله وشتت صاب المسلمين ــــــــــــــــــــــــــــــــــــــ تشتت من عگب عينك يبوالقاسم امتك ابعكس ما وصيت عملوا يالرسول ابعترتك هجموا او كسروا ضلع من الزچيه بضعتك وجّواعلى الباب الحطب تعلم ابياحق انعصب ويامتن بالوسط انضرب وثدي البسمار صابه اوسگط بالعصره الجنين ــــــــــــــــــــــــــــــــــــــ يارسول الله او حامل راية الدين الضرب بين ايديك ابصارمه المحني خراطيم العرب چان مچتوف ابو صيتك عگبك وحگه انغصب لوله الوصيه من يصل دارك وابوالحمله عدل ما سگط للزهره حمل وچان ما( بنبود) سيفه انگاد أمير المؤمنين ــــــــــــــــــــــــــــــــــــــ ودعت عدهم وديعه الحسن عگبك لوعوه وما رعوا ليك الوديعه إبسم دليله گطعوه وبالچفن سبعين زانه يارسول الله رموه وذبحوا حسين بكربلا ويسروا عگبه العايله وگيدوا عليله بسلسله واضمحل الدين لاچنه إحتيه بدم الحسين ــــــــــــــــــــــــــــــــــــــ من بنيت الدين ساسه او شلت صيوانه ابعمد ابعكس گوم أهل الضلاله المكر سنوه والحسد والفتن ثارت وصارت ورث والد للولد وظلت تشب وتنطفي ويظهر حقدها ويختفي رادتها للدين النفي وكل زمان اتشوف ثاير ثار من الناكثين ــــــــــــــــــــــــــــــــــــــ وكل زمان ايثور ثاير منها ويجمع جمع غايته يمحي الدين ويطفي أنواره التشع اشما يشاغب بالديانه الدين شانه يرتفع والثاير يرد منكسر وينهتك حجبه وينشهر يالعالم اعلم واختبر لوظهر صاحب الغيبه يمحي نسل القاسطين ــــــــــــــــــــــــــــــــــــــ لوظهر صاحب الغيبه وبالغري ينصب سرير والخضريلفيه وعيسى من السمه ينزل وزير والثلث مايه وثلاثه او عشر وتحف بالأمير ويطلب ابضلع ام الحسن ويأخذ ابثارات المضن ويطفي نيران الفتن إبنوره وبشفرة الصارم يمحي نسل المارقين الشاعر المرحوم الشيخ كاظم المنظور الكربلائي

#تـراث یا رسول الله امتّك بعمالها نالها امن اهل الظلم مانالها ما على وجه الارض صالح نره غير ابوصالح اوصفوه النيّره والبگت كلها ابكتابك كافره اوسنتّك كل اثر عدهم مالها غزو امن اركان الوسيعه الاربعه زحف لمتك والنصر يزحف معه شافها متخاذله اومتصكعه طمع بيها او چتّفتها احبالها ابحجّة الحراس من شرگ اوغرب غزوا هالامّه ابحيّلهم والشَغَب چم وچم ناطور ویبوگ العنب اوأذَل امّه الصدّگت فوّالها اوأهل الاوهام الذي اتحس بالولم تدري بي هذا العسل ممزوج سم يكتب اشما راد من بيده القلم والصدگ خذ فالها امن اطفالها لاچن اليوم القلم بيد الاصنام حطّموا اسلامنه بسم الاسلام عدهم اليوم الحلال اصبح حرام والحرام امحلّل ابأقوالها ليش عصر الجاهلي من ينذكر انذمّه لاچن بالمحاسن ينّكر اوما نگول اليوم اصبحنه ابعصر للمحاسن فاگدين اشكالها حيث عصر الجاهلي گبل الرسول ابغير دين اوشرع محفوظه الأصول والعرض مستور وبحلف الفضول للظلامات العصه بفعالها واحنه دين اوشرع عدنه اونتّبع سنّة الإلحاد وانعوف الشرع نعبد الماضرر بيه اولا نفع اولا یگرّب للنفوس آجالها یا رسول الله الميخفه اعليك حال اصبحت امتّك اشباه الرجال بالتمنّي اوبالاحلام اوبالخيال نكرت الرب اتعبد تمثالها الف وسفه اعله امتّك هذا المصير عگب ما چانت الهالعالم تدير اصبحت بالذل تخاف امن الصفير اوتخترع ياسيّدي امن اخيالها يا رسول الله الوعظ فات اوجِزَه اوعسكر الكافر نجح لمتك غزه دعوتك تنجح ابسيف او معجزه انچان الك بالدين حاجه اتنالها للوعظ يا سيّدي فات الأوان اغلب امتك اصبحت تعبد اوثان نعم انته الأخبرت تالي الزمان الوكت يبدي ابأمّتك غربالها أي وحگ تعبك اوفضلك يانصيح من تغربل امتك الاغلب يطيح بالألف واحد تجد مسلم صحيح والبگت غاوي البشر نشّالها غير واحد ما بهالعالم وجيه گلّه للرحمان خل يرفع اديه يطلب امن الله الفرج يلتفت ليه اودعوته آيات الفرج تبرالها چانت امتك چالضواري الماتهاب عسكر الكفّار والذل والصعاب اصبحت مثل الثعالب والذياب خير ما بيها ولا بشبالها اتريد منها الخير يالهادي الامين الهشمت بخيولها صدر الحسين اوحرگوا اخيامه اوسبوا عترة الدين او علّگوا راسه ابطرف ميّالها لون حاضر یا رسول الله العيال اتشوفها من چتفوها بالحبال اوتنظر الحال الفواطم والاطفال للصخر يشجي اويهد اجبالها اتلوذ وحده ابثانيه اووحده اتعدي اشحال زینب سمعت الحادي ايحدي احتارت ابرچب النسه واطفالها صوتها انبح ركبّتهن بالومي اوبگت تاليهن اودمعتها اتهمي صرخت اوصدّت النهر العلگمي یگصر الساني امن اوصّف حالها نادته والگلب من عدها استعار بالعتب وعيونها تذرف شرار منهو غيرك جابني الهاي الاخطار يالچفيل اميسرّه اويه انذالها غيرتك تسمح ببن داحي الباب اتكلّفتني اتصون خدري والحجاب اوتترك اختك باليسر ويّه الاجناب زينب المحّد نظر لخيالها اولن اجاهه الصوت من راعي العلم اشبيدي يختي اونابت ابعيني السهم والچفوف امگطعه اوراسي انهشم والعمد مخّي اومهجتي سالها الشاعر المرحوم الشيخ عبود غفلة

رديت. وبدمع اعيوني ناديت. يهلي تلكوني الكم مشتاگه هواي. وجبت الأيتام اوياي @@@@@@ من بعد سفره طويله ردت اضعون السبايه اشافت اعيوني مأسي والحزن يركض ورايه ماشفت راحه بحياتي كلها هم من البدايه عمر وخلص هم واقهر ماشفت راحه من الدهر والخاطر البيه انكسر وانه الكم هسه جايه بياحال رديت ابضعني وصياط لساها ابمتني وجنت اشكفهن بكفاي وجبت الأيتام اوياي @@@@ يلتنشدون اعله زينب هاي زينبكم وحيده بس حرم وأطفال عندي والعليل امگيد ايده ورجعت الكم يخوتي رجعت الحيله ونيده شحجيلكم عن ياألم مر بيه وانه وي الحرم عن كربله عن الخيم. جانت السفره بعيده من يوم رحنه وعفناكم ياحيف. ماودعناكم للكوفه صار امشاي. وجبت الأيتام اوياي @@@@@@ شرد اسولف يامصيبه يهلي من يوم العفتكم ماشفت ضيم بحياتي مثل مامر ابختكم سبي وصياط وشتيمه وانه ساعتها ردتكم وبس أنخه بيكم انضرب. حرمه انه مابين الغرب ومشيت كل ذاك الدرب رافعه راسي ابختكم وطبيت. للشام بهيبه وذليت. أركان النيبه مفتخره وانتو احماي. وجبت الأيتام اوياي @@@@@ يخوتي والي هضمني اوخله بكليبي اصوابه زينب المتخدره انه كعدوني ابنص خرابه ويني اوين الخرايب. زينب الكلها مهابه انه الچنت ام العله. وبجال اخوتي مدلله وتالي بخرابه نازله آمنين اجتني هل طلابه الآلام عشناها بغربه وايام. المرت صعبه ماخلت فكر أوراي وجبت الأيتام اوياي @@@@@ وينكم يهلي النشامه صوت ماكو الديره وحشه لملمت كل حزني يمكم وبعباتي راح اطشه ليكم تعنيت وانه أمن الصبح ليهسه ممشه وين أليسمعني الهله. زايره وجيت الكربله جا وينها احيود الفله. ماترحب بيه حاشه حنيت اوألكم حنيه وياريت ذبحتكم بيه و لا شوف ابهاي وهاي وجبت الأيتام اوياي @@@@@ وين كل الذيج العشيره التارسه البر الضياغم حسين وينه الگمر وينه علي الأكبر وين جاسم صدگ بس أكبور ضلو وكل جسد بي حدره نايم معقوله كل هذا الجره. الهم صفت بس مكبره وعيوني الهم ناضره. وناصبه عليهم مئاتم ياحيف. ضاعت احلامي وللموت راحت گدامي وماشوفنهه بعنياي وجبت الأيتام اوياي @@@@@@@ الحمدالله كلمات عادل خضير الكربلائي ١١صفر ١٤٤٥

#تـراث عفه يم الحزن گلبچ يتحمل دواهي السود چدچ وامج وعودچ واليوم الحسن مفگود ــــــــــــــــــــــــــــــــــــــ اول هم فگد چدچ العلى فگده كثر همچ وثاني صواب يوم الباب ذاك الكسر ضلع امچ ودم عودچ البالمحراب اجره من الجفن دمچ وجاچ اصواب اخوج اليوم الحسن يخت الحسن مضلوم گضه لاچن گضه مسموم حگ من يصرخ الناعي ويصوت نشف بحر الجود ــــــــــــــــــــــــــــــــــــــ عفه گلبچ على بن امچ يزينب من وصلتيله وشفتي الطشت جدامه ومن السم ركد حيله ومن شافج نده يحسين ياخويه الطشت شيله شيل الطشت من يمي الطشت بي چبدتي ودمي لا ترتاع بت امي وهذا الطشت جدامي تشوفه بس دمه وچبود ــــــــــــــــــــــــــــــــــــــ وزينب للطشت صدت وشافت چبدت ابن امها ولنها مگطعه وچبود جدامه ويبس دمها صاحت عگب ذاك الضيم الي هاي الدهر ضمها يهل الرحم خلوني اون ولا تلوموني شفت الحسن بعيوني وشفت الطشت جدامه ويجلب چبدته بالعود ــــــــــــــــــــــــــــــــــــــ صاحت يالحسن نارك صدگ ماتنطفي نارك تخلي اختك يبعد اختك متحيره بخطارك باچر من تجي الوفاد وتشوبش على دارك من يطلع يحييها وعلى المعتاد يطيها ترضه اطلع واحاچيها واصيح بصوت يالوفاد راعي الدار ما موجود ــــــــــــــــــــــــــــــــــــــ راعي الدار ماموجود اكول ومن يصدجها يبن امي البحر جودك عين الضيف متجها ترضه من ارد اكله مات وخل يلطم على وجها وخل ينصب اباب الدار عزيه ويجمع الخطار ويصرخ والدموع اعبار مات الحسن يالوفاد مثل ماجيت رد اردود الشاعر المرحوم الحاج مُعين السباك

#تـراث شهادة الامام الحسن روحي فداه طـشـتـين ومصيبتهن ثجيله سهمين ورمن گلب العقيله مـكـسـورة دهرها وحتارت بأمرها طشتين ومصيبتهن ثجيله ــــــــــــــــــــــــــــــــــــــ مـثـل گلـب الـحـره زيـنـب صـابـن السهمين عيني ومـن جـمـر نـار الـمـصـيـبـة وبالنفس يصعد حنيني چنـي بـزيـنـب تـنـادي يـالـمـحـب ون بـونـيني .بـصـحـف الـنـوايـب گلبت . بمصاب زينب طالعت .سـهـمـيـن بـالـعين انصبت .واضرب اليسره بيميني زيـنـب بالدهر شاهدت طشتين وماعزة عليهن دمعة العين تـتـوچه بـصـبـرهـا واحـتـارت بـأمـرهـا طــشــتــيـن ومصيبتهن ثجيله ــــــــــــــــــــــــــــــــــــــ إنـصـبـت بـالـدلال حـربـه مـثل حربة گلب زينب نـار طـشـتـيـن بگلـبـهـا ومـن سنان الحزن عطب تـشگف سـهـام الـمـصـيـبـه ونـايبات الدهر تنصب .عـطـشـان أخـوهـا ويـنذبح .شما تهمل العين وتشح .بـالـدمـع مـتـبـلـسم جرح .ولا تبرد چبد يلهب زيـنب بالصبر ضمدت جرحين وبفيض الدمع خمدت نارين مـن دهـر الـكـسـرهـا وحـتـارت بـأمـرهـا طـشـتين ومصـيـبـتـهـن ثجيله ــــــــــــــــــــــــــــــــــــــ مـن مـضـت شـفـرات سـم الـحـسن وتگص بدليله طـاح بـحـجـور الـمـنـايـه مـنـصرع وانهدم حيله يـجـود ويـعـالـج بـروحـه مـسـهـر ومـاتنام عينه .الله الله شــجــرى .بــحــالـة ودايـع حـيـره .لـحـسـيـن وجّـه نـاظـره .والـدمـع فجر مسيله وتـسـلـم مـراسيم الإمامه من الحسن وانجمعت عمامه وتــوادع ذخــرهــا وحـتـارت بـأمـرهـا طــشــتــيـن ومـصـيـبـتـهـن ثـجـيـلـه ــــــــــــــــــــــــــــــــــــــ شـلـون حـالـه الـبـيـهـا زينب صارت بيوم الموادع لـلـحـسـن گصـدت تـودعـه وشـافته بحالهة منازع هالله هالله شـهـالـمـصـيـبـه مـصاب من مصاب أفجع .مـطـروح أخـوهـا شـافـتـه .والسم تملك چبدته .وبـالـطـشـت يـقدف مهجته .وشاهدت گلبه المگطع وطشت اللي خفوه عنها الميامين زينب شافته والچبد نصين صـوبـهـا بـنـظـرهـا وحـتـارت بـأمـرهـا طــشــتــيـن ومـصـيـبـتـهـن ثـجـيـلـه ــــــــــــــــــــــــــــــــــــــ إنـحـنـت يـمـه شـلـون حـنـيه ظلوع خوتهم حنتها خـويـه هـاي أمـك الـزهـره بـعـين فاجعتك شفتها تـواصـل جـروح الـلـبچبـدك وانـه بـدمعي خيطتها .هـاي أمـك الـزهـره الـتـحـن .يمك ولمصابك تون .وسـتـارثـت مـنـهـا الـحزن .وبالنايبات شاركتها إختك وأمك الزهره ترى وياك تتگلب على وسادة مناياك وكـسـرت لـك ظـهـرهـا وحـتـارت بـأمرها طــشــتــيـن ومـصـيـبـتـهـن ثـجـيـلـه ــــــــــــــــــــــــــــــــــــــ هـذا أول طـشـت سـحـبـت روح زيـنـب ساحباته وبـعـد ثـانـي طـشـت صـك عـيـونها بسهم الشماته بـالـطـشـت راس الـحـسـيـن وعـالـفواطم نايباته .والـخـيـزرانـه بـشـفـتـه .تـلعب وأدمت وجنته .وشـحـال گلـب الـشـافـته .والدهر هذي صفاته ويـزيـد عـلـى عـرش الجاهليه والسجاد بحضان المنيه وعـيـالـه بـخـطـرهـا وحـتـارت بـأمـرها طــشــتــيـن ومـصـيـبـتـهـن ثـجـيـلـه ــــــــــــــــــــــــــــــــــــــ آه يـا زيـنـب وگوس الـعـلگمـي سـهـمـه رمـاها وطـاحـن چفـوف الـكـفـالـه وطـاح عالشاطي لواها وسـهـم الـتـفـرس بـعـيـنـه صـكها بالعين وعماها .وهـذا الـعـلـى زيـنب سدر .من عگب محزوز النحر .مـا انـصـف ويـاهـا الـدهـر .هدم مبناها وسباها زيـنـب حـيـت آثار النبوه زينب مثلت روح الأخوه مــن وافـت يـسـرهـا وحـتـارت بـأمـرهـا طــشــتــيـن ومـصـيـبـتـهـن ثـجـيـلـه الشاعر المرحوم الحاج كاظم المنظور الكربلائي

#تـراث يا شيال بحر الجود ريض والنعش رده حتى اتسايله الوفاد وين تروح من بعده ــــــــــــــــــــــــــــــــــــــ إلمن تقصد الوفاد عگب الجان مگصدها وياهو الينعم اعليها ولعند اديارها يردها محلت كل مرابعها وغور عذب موردها عگب الحسن بحر الجود  يا هو اللي عليها ايجود عز هاشم صبح مفكود الله يساعد عضيده وهاشم من عگب فگده ــــــــــــــــــــــــــــــــــــــ گوض بدر علياها وهاشم فگدت العينه وتم حسين من بعده يصفج وسف بيمينه يعاين جاسم بعينه وتهمل بالدمع عينه يصيح ودمعته تجري فگدانك كسر ظهري أويلي عليك ياذخري من عگب الهضم والضيم يعضيدي رحت برده ــــــــــــــــــــــــــــــــــــــ صبرت عله الهضم كله وهذا الصبر تاليه تضعن والجبد مسموم وافگادك يخل بيه يابدر السلف فرگاك هضمه ويصعب اعليه يعضيدي يبو محمد و هضمك ماسده اعله احد هاليوم العدو عيد وزين يالحسن شامه وهاشم صارت بشده ــــــــــــــــــــــــــــــــــــــ فگدك ياحليف الجود هاشم يصعب عليها ذلت من عگب عيناك و اظلمت نواديها أصبح عيد هذا اليوم بالشام ونواحيها ولمن سمعتك مفگود يابحر الكرم والجود هم بيك الزمان يعود ياماي الحياة الراح من عدنان وتبده ــــــــــــــــــــــــــــــــــــــ عاين سلوتك جاسم وشوفه الفگدك شحاله ظل ينحب عله امصابك وفگدك مرد دلاله چيه ترضه يظل جسام منه العين هماله ويبگه من زغر سنه  يتيم و يجذب الونه خاب من العرس ظنه عگبك ظل يدير العين و دمعه ايهل على خده ــــــــــــــــــــــــــــــــــــــ شالو نعش أبو محمد لعد جده يزورونه و هاشم دايرين عليه وغيض وهضم مشحونه ولن أم الجمل تصرخ البيتي لاتدخلونه ردو النعش ياعدنان وجادم عالعزم مروان بره يصيح گبر افلان هيهات الحسن يحسين گبره يصير عد جده ــــــــــــــــــــــــــــــــــــــ صاح حسين  يامروان إجينه ابنعش ماجدنا نجدد بالگبر عهده ونسدر بيه مگصدنه شنهو السبب تمنعنه يظالم من گبر جدنه ديون الكم تطلبونه بغضكم لاتظهرونه خل هاشم  يزورونه تطوف بنعش سيدها تجدد بالكبر عهده ــــــــــــــــــــــــــــــــــــــ (صاحت) هـالامر ميصير وومت بـيدها السفـيان گام اعلى النعش يعصف من عدها النبل والزان سل السيف ابو فاضل اوگام ايصيح يا عدنان يالبلحرب گول او فعل يعصف على اعضيدي النبل و آنه بلوجود او عدل ــــــــــــــــــــــــــــــــــــــ لحد يخوتى لحد نعش الحسن يرمونه يخوتي اوبلوجود انتم حَيين او تشوفونه ما واحد يسل سيفه وبو محمد یگف دونه لحد يفرسان الحرب ياضخر چشاف الكرب بینه اشتفت صخرا وحرب ــــــــــــــــــــــــــــــــــــــ لمن شاف ابو فاضل تعناله عضيده احسين الوصيه لا تضيعوها ينادي يخوتي الطيبين هذا اليوم مو يومك يبو فاضل ينور العين يومك يخويه ابكربلا توگع اچفوفك بالفله وجثتك تظل امفصله او تجري اعليك عبراتي او حيلي افراكك ايهده الشاعر المرحوم السيد عبدالحسين الشرع

#أبـوذيات ردت يومي گبل يومك ..ولا حان .. اسهام الضيم صابني ... ولا حن سبوني واجنبي الحادي ..ولاحن يخويه أهواي بجاها رقية بخرابة اشلون اسد عيني ..وانامن من هضمي اِنشدت بت من ..وانا من بناتك عالرمل باتن ... ونامن ويلجمها الرمل وتفز رقية... قاسم المالكي

#نعـي مولاتي رقية روحي فداها ظني الطشت بيه ماي بارد ثاريه راسك چان گاعد شفت برگبتك ثلمة ارماح كلساع تندار علة واحد ـ_ تعبان راسك والضمة اهواي وماضايگ من العاشر افياي بالگوة من شفتك عرفتك متغير من الضيم والماي ــ____ يابو التراچي امتوني زرگة اتلاگينة بس مو خوش ملگة ماعرف أعاتب واعتب عليك لاتنشم ولا بيك شبگة ـ_ كتلك بطيت وگتلي محتام يومية ادورج بين الأيتام خلف الضعن تمشين والشال راسي برمح يركض لكدام ـ_ علة اعيوني اشوفنج بعيدة وكلساع اصيحن يالشهيدة مبيوگ صوتي وسكتة الاصياح بيمن يأشر الماهي ايدة ـ_ انـدارلـج كـل مـا عـثـرتـي والـگـة الرمح ماكل رگبتي كل ساعة طايحلج ع الگاع وتتبلل اخدودي بدمعتي حسن الترابي

#تـراث طفله من يتامه الغاضريه بالشامات وافتها المنيه شبت راس الحسين .. والزينب سبتها ــــــــــــــــــــــــــــــــــــــ طالعت تاريخ عملة كربلا واندهش نوعي وسهم من گوس الـمصايب صابني وخيط ضلوعي ومن دما نحور الضحايه غدت تتواگد دموعي وشفت الضحايه موزعه والروس منها مگطعه وشفت الـحسين ومصرعه إندهش وضعي وزاد روعي وگلبي ظل يحوم على الأرامل ونار الخيم تتواگد مشاعل واحترگت صواوين .. والزينب سبتها ــــــــــــــــــــــــــــــــــــــ چني ويا الضعن ساري من تصدى السبي الكوفه مررونه على المعاره وشفت بيها شلون شوفه هذا مسحول المفاصل وذاك المگطعه چفوفه والـجثث عريه مخدره وحالة ودايع فاطمه نشفت من جسمي الدمه وگلبي عالسجاد خوفه مكسور الگلب والجسم ناحل من الجامعه وثگل السلاسل ومگيد المتنين .. والزينب سبتها ــــــــــــــــــــــــــــــــــــــ سايرت سبي الحريم وروحي مسبيه لسبيها حرم مسبيه وغريبه وبالسياط ملوعيها شدة الكوفه نستها الشام من بين عليها چاوين سبع الگنطره ويشوف بالشام إشجره وعيال عنده ميسره وبالخرابه منزليها ومن ضرب العصي صارت علامه بمتون الأرامل واليتامى وتشاجف بالإيدين .. والزينب سبتها ــــــــــــــــــــــــــــــــــــــ فزت من النوم طفله والگلب مجمور يلهب تشوط نوبه على اليتامه ونوبه تتعلگ بزينب تصيح ابويه حسين وينه گلبي لفراگه تعطب يا عمه شفته بنومتي وانمرد چبده الحالتي وانكسر گلبه الغربتي وبمصيبتنه تصوّب عمه وصدر ابويه مكسرينه وليش بدم وريده مغسلينه والتربان تچفين .. والزينب سبتها ــــــــــــــــــــــــــــــــــــــ هيجت نار الگلوب الچامنه بيها عللها وخلت عيون الفواطم دمعة الغربه تهلها ورجنت الشام اليساره وبالنحب لمصاب اهلها صاح ابن هند على الخدم شمروع گلوب الحرم صيوان عزتها إنهدم خل تنوح الدهر خلها نادوه اليتيمه تريد أبوها وبالنوج اليساره يساعدوها وفاضت دمعة العين .. والزينب سبتها ــــــــــــــــــــــــــــــــــــــ صاح يا غلمان هذا الراس ودوه للتريده وخل تجر لمصابه ونه وتنحب الحزة وريده وخل تشوف الخيزرانه اشسوت بثغره وتچيده الله الله اشعمل والراس لعياله انحمل وخيم على الطفله الأجل وراحت الطفله شهيده وغمضت عالطشت عين اليتيمه وصاحت يالعلي والله شمصيبه وارتجت الكونين .. والزينب سبتها ــــــــــــــــــــــــــــــــــــــ إنحنت مفجوعه زينب على الطفله وگلبتها مالگت روح بجسمها وعلى القبله مددتها والمصيبه على المغسل صاحت اللي غسلتها مسمومه طفلـتكم گضت نادوها من تيسرت بالخيزران تلوعت والسياط الـوسمتها ومصرع هاليتيمه على اليتامه مثل مصرع حسين وعمامه وأثر عالخواتين .. والزينب سبتها الشاعر المرحوم كاظم منظور الكربلائي

#تـراث #نعـي مولاتي العقيلة 😭 حط الراس جدامه اونشد عن النسه اوعني زینب هاي واسكينه اورباب اتشوفهن ذنّي طاب العيش دگ العود ويالمغني ولك غني يهاشم روسكم هاذي اوسبي اعيال زدناكم زدناكم ابسبي اعيال وأخذنه العين والعينه او گلب راس أخوي احسين مستر والتفت لينه یگلها يا رباب الراس هذا المن تعرفينه تگله الراس لحمانه یگلها گوّض احماكم حماكم راح يتمزّه او علينه امشبهر الديوان أخذ يضرب ثنايه احسين بالعود اوضحك مروان گال آنه اشتفه گلبي ابهذا الراس والنسوان عَيدو يا بني أُميه اویا هاشم هظمناكم الشاعر المرحوم عبدالأمير الفتلاوي

#تـراث مجيء هند للخربة هند لبست حللها اولفت ليهم لمن بالخرابه اسمعت بيهم وراها الجاريه او طبت عليهم او زينب غدت من عندها اتكتم ــــــــــــــــــــــــــــــــــــــ زينب نادت ام چلثوم اختها عرفتي المجبله اعلينا انشدتها تگلها لا يزينب معرفتها گالت هاي عدنه گبل تخدم ــــــــــــــــــــــــــــــــــــــ على الكرسي اگعدت يم السبايه اونشدت زينب انتوا بيا اولايه ملوك انتوا بوطنكم يو رعايه او زلمكم ليش عافتكم ابها الهم ــــــــــــــــــــــــــــــــــــــ تگلها امن المدينه احنه لفينه تگلها المدن كثره يا مدينه صاحت يثرب البيها نبينه اوبيه اتشرفت عالبيت الاعظم ــــــــــــــــــــــــــــــــــــــ گامت هند اوعلى الگاع گعدت ابيثرب واهل يثرب حين سمعت تناشدها غدت والعين دمعت عگب ما صلت اعلى النبي الاكرم ــــــــــــــــــــــــــــــــــــــ عن بيت ارد انشدچ صاحت اهناك ليل انهار تخدم بيه الاملاك راعيه الذي بالحرب فتاك اوبي زينب واهلها بيه چلثم ــــــــــــــــــــــــــــــــــــــ تگلها ابيت من عده اشتريدين عليه صول يزيد او هدمه البين اوذاك اباب گصرج راس الحسين وانه زينب البيّه الضيم وسم ــــــــــــــــــــــــــــــــــــــ من سمعت هند لطمت على الراس اوصاحت وين الاكبر شارب الچاس اوعنكم وين ابوفاضل العباس والعريس وينه اوين مسلم ــــــــــــــــــــــــــــــــــــــ تگلها بكربلا تموا رميه ضحايه امطرحين اعلى الوطيه واجينه اعلى الهزل يسره اوسبيه او عدنه غير هالوجعان ماتم الشاعر المرحوم السيد عبد الحسين الشرع

#تـراث زينب يالتنشدوني عليها زينب بالخرابه منزليها ياهند اشتنشدين وانه الچنت زينب ــــــــــــــــــــــــــــــــــــــ بالله ياهند ارد انشدچ صدّي ليه وجاوبيني ليش غيرني زماني وليش كون تضيعيني راح يوم الچنت زينب بيه وإنتِ التخدميني وراح الدلال البيه عشت  وإنصبت بالطف إنصبت إشچنتي ياهند وشچنت واصبحت ماتعرفيني هم يخطر إبالچ ياهند چان زينب تنسبي وتوگف بديوان آنه واليسر وين وانه الچنت زينب ــــــــــــــــــــــــــــــــــــــ هند من عالكرسي طاحت وصرخت والگلب يلهب ليش متغيره رسومچ يالعلي والله يزينب وين البيوت المزهره راحت والخدر المرتب الله الله شجره بهلچ وحالچ غيره صاحت وديعة حيدره ماعلى المحتوم معتب دهري هدّم بيوتــي عليّه وتدرين شعفت بالغاضريه عفت اهلي مطاعين وانه الچنت زينب ــــــــــــــــــــــــــــــــــــــ شلون صدّت فزع صدّت هند تصرخ يالعقيلة ليش ماتنشف عيونچ وليش حسراتچ ثجيله وين ذاك الخدر راح وين ابو فاضل چفيلة صاحت بصوت الفاجعه عباس ظل عالمشرعه ومنه  الچفوف  مگطعه وهدّمت لحسين حيله يوم الچان ابوفاضل وجوده سالم والعلم ملتزم جوده من  چانت الچفين وانه الچنت زينب ــــــــــــــــــــــــــــــــــــــ ياهند گطّعت گلبي غربتي بشفرة الونه ضمدي اجروح البچبدي ولا تنشديني عن اهلنا ومادريتي شلون نزله بكربله يوم النزلنا صعدت صواويـن الإبه وخدور بيها مرتبه بسيوف أهلها محجبه والفلك گطبه بنزلنه ويدير الفلك گطب الفراسه والعباس فاروق الحراسه وبذيچ الصواوين وانه الچنت زينب ــــــــــــــــــــــــــــــــــــــ آخ يابيوت المزهره وآه يابدور المضيه گبل ماچانت ضحايه جسومهم فوگ الوطية مغسله بدم الشهاده مچفنه بثوب الحمية چانت حياتي مأمنه وحرّاس بيتي معينه وماچنت هيچ مدوهنه ودوهنتني الغاضريه ومن چانت صناديد الرساله تنهى وتامر بسيف العداله ومن حي چان الحسين وانه الچنت زينب ــــــــــــــــــــــــــــــــــــــ ياهند وانصاب گلبي بطبرة من طبرات الاكبر آه ياجمرة شبابه بالگلب لسـّاعه تسعر گبال عيني ومن اشوفه ضلع من جسمي يتكسر وهدمت حيلي كربله وگيدت عليل بسلسله وفجر  عيوني حرمله من وريد الطفل فجر وبحبال اليسر زرني زمانـي وسهم  العلگمي صكني وعماني وطفى شمعة العين وانه الچنت زينب ــــــــــــــــــــــــــــــــــــــ ياهند شحمل بعيني ويه سيل الدمع ساجم حمر ويـخضّب چفوفي مثل حنة عرس جاسم زفته وحسرة شبابه جمر بگلوب الفواطم ياهند يكفيچ اليسر وجرعت بالكوفه الصبر والشام أصعب كل أمر أچفي ظالم وأجي الظالم وظهري بالرماح مكسرينه ومتني بالسياط موسمسنه وهذا علي الدهر دين وانه الچنت زينب الشاعر المرحوم كاظم المنظور الكربلائي

#تـراث لعند الشام من لاحت علايم حنت زينب او باجي الفواطم شافن من بُعد لمة الوادم او عليها الحزن بغيومه تلملم ونت زينب و گامت تنادي علیک اقسم ابجدنه النبي الهادي عنه الروس طلعها يحادي او على اضعون الحرم خلها اتجدم يحادي هاليساره اعطف عليها او لا تمشي بطريج العام بيها ترانه الشام بس ما نصل ليها علينه الناس من كل كتر تلتم يحادي عاين الهاي الروايه لفت و تريد تتلگه السبايه علينه اهون وحگ الله المنايه او من عدها الشماته اصعب او اعظم يحادي عاين الحال اليساره بیش امن الخلگ هاي انتواره خاف اعلى الضعينه اتصير داره وارامل عالمهازل تصرخ او يتم طب للشام ظعن اليسر مصباح والمبشر لعند ايزيدها راح صعد فوگ الگصر مطرب او مرتاح او من شاف الضعن كام ايتبسم صارت عالضعينه الوادم أصفوف امحنيه أچفوفها وادگ بلدفوف او زین اعبادها بالحبل مچتوف تهل عينه أو يتمنه المحتم يشوف أهل الشماته اتشوف العيال وهيه اعلى الهزل مجتوفه بلحبال گصد يمه سهل و الدمع همال حب ایده او على السجاد سلم تفكر له السهل والحيل بايد يصح عندک یگله ثوب زايد الحديد الرگبتي يا سهل چايد جرحها او گام منها ينضح الدم من طوگ الحديد ايسيل دمي و عاين للحرم و يزود همي عسن يا ريت لا ولدتني أمي او يراني ايزيد بالذله الموسم عگب ما سكن هضل الناس والويد او گضت بيهم الوادم فرحة العيد خذوا كل اليساره المجلس ايزيد وهو اعلى التخت وبها النصر مغرم ابراسه التاج و بها النصر فرحان ويمه جاعد أعلى التخت مروان لمن عاين الذلة النسوان گام النغل بأسلافه ايترنم صاح الرأس وينه أو حين شافه هتف بالثار و تذکر اسلافه شال العود و يجلب شفافه أو يضرب گام من عنده المبسم الشاعر المرحوم السيد عبد الحسين الشرع

#أبوذيـات مشينه وبانت الرجفات بالسوگ وگادونه بزجر وسياط بالسوگ صاحوا يلا علويات بالسوگ شماته هواي حضروا واهليه المصايب بيه فن الضيم يربن ونه عيناي بويه عليك يربن علي بعدك بناتك وين يربن بخرابه اتنام تالي الهاشميه

وينه الينوح اعلــــه العليل ويومه هالليله روحه املوعـه و مسمومه *** وينه الينوح بحركته اعله ايمامه وينه اليدك ويلطــــم اعله الهامه خلصت حياته بالحــــزن وايامه وين الي روحه بهالمسه مهمومه *** وينه اليواســــــي فاطمــــــه والباقر ايدفنونه امامـــــــك بالتــرايب باجر اهواي المصيبه اهواي كسرة خاطر وظلن بناته املجــــــــــمه مهمومه *** وظلن بناته اميتمـــــــــات ويبجن ياحيف راعي البيت شال اينوحن بثياب ابوهــن والله صار ايطلعن ايشمن ويبجـن والله فوك اهدومه *** ايشمن بثوبـــــــه وطلعن جفيته ماهوه عطره الجان تارس بيته ذكرن ابوهـــــــن ونون الحنيته كل التحبه وشــــــيعته مهظومه *** كل اليحبه امصابه كاســر ظهره دمعه ايتجاره ومـــختنك بالعبره طالع يعزي ايواسي والله الزهره والناعي يقــره بنبـرته الملجومه *** والناعي يقره وباللطم شد حيله ماتم ابو الباقر ننصـــــبه الليله بجرح القصايد والشـعر نرثيله انواس اهاليتــــه البقت مالومه *** الشاعر ابو علي الركابي

بدمعه وحسره خلص عمره ينحب كل عمره وايامه دمعه اعله حسين ويتوضه بدمعات عيونه التجري من العين بدمعه وحسره خلص عمره ------------------------------------ سلام الله عله ابولباقر سلام العارف بقدره سلام الله علىجروحه وسلام الله عل صبره قصه مبتداها أحزان عرفناها على الفطره ‏مصيبة ما مثلها تصير كل العالم باسرة قصة أحزان بيها العرفان عن السجاد أن أروي لك قصه مماته بين الحسره ا وبين الونه خلص حياته بدمعه وحسره خلص عمره — —------------------—--------------- ‏قصة مبتداها ألطف من واقع مصيبتنه طف اوعاشر أبعاشور منها ابتدت قصتنه نبديها بعلي السجاد وهاي أول شعيرتنه أنشوف الشاهد من أحداث شنو صار على سادتنه تروي ألاحداث تتبعها أبحاث أولها ألطف راح أرويها عن السجاد وخل نتعرف عن ماضيها شبيها من امجاد بدمعه وحسره خلص عمره —------------------------------------ ‏علي السجاد أبو الباقر ابن حسين أبو اليمه شگديحمل من لوعات من طف كربله همه شاف الواقعة كلها وكلهم مذبحة يمه شاهد گطعة المنحر وشاف الراس الي مدمه بعينه يشاهد ذبح الوالد ويشوف الراس بسن رمحه وگبال عيونه هذا حسين اليزهر نوره متغير لونه بدمعه وحسره خلص عمره -------------------------—----—--•--- ‏عليل وبالمرض مصيوب ويتلوه من إلامه فوگ لمرض ويشاهدشلون حترگت خيامه وبعينه يشوف شلون نساءٓ اشردت گدامه بين التنسحگ بالخيل وبين التلم بيتامه نار ودخان ذبح الوليان وابعينه يشاهد هاالموقف بين العساكر كم طفل وطفلة التتعثر بين الحوافر بدمعه وحسره خلص عمره -----------------—-------------------- ‏قصة ومختصرها يطول بين لشام والكوفة ما تنحمل كلها الالام واقع قصه معروفة سبايه وتدخل الاوطان أيد ابايد مچتوفه وأولهم على السجاد كسير الخاطر نشوفه مگيد بحبال وشلون الحال وساعة يصد عينه العماته بخاطر مكسور ويتفگد ساعه ابنياته العلناگه ادور بدمعه وحسره خلص عمره —---------------- ------------------- ‏عاش بحزن أبو الباقر لمن وصلت اجاله كل يوم اليمر عاشورحسين ومذبحة إگباله لاماي التهنه بي لا زاد الي ينهاله ودعها حياته بسم من يزيد ورجاله ودعنه اليوم مات ومسموم ودعنه وراح بها الليلة وداع المالوم والعمر البي خلص كله ينادي المظلوم بدمعه وحسره. خلص عمره —------------------------------------- الحمدالله كلمات عادل خضير الكربلائي ٢٤ / محرم السبت ١٢. / ٨

علحسره والاه كل عمره گضاه ينحب على حسين والاجل وافاه وزين العباد الي خلص كل عمره بونين كل هاي السنين دمعاته لحسين @@@@@@ حسره حسره كل حياته وگضه كل عمره بنحيبه شحال اليفارگ خليله وايدفن ابيده حبيبه وينضر بعينه ابو اليمه وجثته الضلت سليبه الله اليعينك ياگلب شگد تحمل واهمك صعب واتشوف ابوك اعللترب جثته بلدم خظيبه وأبين الاخيام وعيونك تشوف وشحال الحسين مگطع بالسيوف وبين الخيام اومصرعه دم تهمل العين كل هاي السنين. دمعاته لحسين @@@@@@@ قصة السجاد قصه تخنگ إحساس المشاعر يامصيبه اتصح مثلها اوتكسر اگلوب الخواطر مصيبة السجاد كلفه اوهوه مابين العساكر بين المرض الجامعه ينضر حرم متروعه اوجثتة ابوه امگطعه اوصدره مطحون بحوافر وبنار الاخيام كل عمره مخنوك وينضر للأيتام صعدت على النوك وزينب يشاهدها انسبت اوطبت دواوين كل هاي السنين. دمعاته لحسين @@@@@@@@ خلص دور الغاضريه وطبت الكوفه عليهم كلفه ماصارت گبلها بالحبال أ مگيدهم وبين هاي الناس أسره وفرحة الناس بسبيهم وتالي بنات ام العُلى تمشي اسيره معلعله وبيد العليل السنسله ويفرح ابن زياد بيهم وبلكوفه العيون تتفرج الناس وبهاي الضعون ماهوه عباس والناس بين الشامت ومابين الونين كل هاي السنين دمعاته لحسين @@@@@@ محنة السجاد محنه المامثلها اتصبر محنه گضه كل عمره وحياته أبين دمعه أوبين وأنه شحجي عنه يامصيبه ويامصيبه الأحجي عنه شگد حامل الآلام واقهر من كربله ومحني الضهر ومافارگ عيونه السهر عايش وي المحنه حزنه وبحزنه كل يوم عايش ومقهور ماينسه عاشور كل عمره عاشور ياهو التهون امصيبته ياأهل مسلمين كل هاي السنين دمعاته لحسين @@@@@@ يامصيبه اتهون بيها على السجاد اومحنته كربله الكوفه عليها الشام آه الشام طبته تلگته الشام بطبلها عمت عيني وهوه سكته والناس فرحانه اوتدك چن عيد عدهم من صدك وگليبه بلهم محترك. بمجلس ايزيد اوكفته اواكف ابديوان ابن الدعيه وينشد على حسين وعباس أخيه وشلون حال الماأله ناصر والمعين كل هاي السنين دمعاته لحسين @@@@@@ وانختم بالتالي عمره والاجل حل ابمماته الخمسه والعشرين ابمحرم ودع وسلم حياته ساعد الله ابو الباقر ماملك نص أمنياته كل أمنياته اتهدمت وي ذبح الحسين إنتهت بس بالحزن تالي صفت وعاش عمره بذكرياته كل عمره مالوم وناصب بلحداد وانودع اليوم بي زين العباد وبموتته خلف إثر ابنفس المحبين كل هاي السنين دمعاته لحسين @@@@@ الحمدالله ١١ اب الجمعه ٢٣ محرم ١٤٤٥ ٣/٥٠ الفجر كلمات عادل خضير الكربلائي

#تـراث سجادك يداحي الباب گوم اوعاين الحاله من عگب اليسر سموه والسم مرد دلاله ــــــــــــــــــــــــــــــــــــــ ظل من عگب ابوه حسين ونه ايجر بثر ونه ابعينه الماي لو شافه يهل دمعه اويصد عنه يگول اشلون اضوگ الماي وحسين انحرم منه مارحموه عدوانه واهل بيته اورضعانه كلها انفنت عطشانه ظلو جثث بالحومه اوداستهم الخياله ــــــــــــــــــــــــــــــــــــــ كلما يذكر المظلوم تسحب دمعة اعيونه ليل انهار مايهجع اومن حزنه انخطف لونه گامت تعتني الشيعه اوعلى حزنه يلومونه يگلوله ارحم احوالك حزنك مرد دلالك ياهو اليظل لعيالك وانته السلف تاليه اوبدر الدين وهلاله ــــــــــــــــــــــــــــــــــــــ ابحسره ظعن عن دنياه امن امته جدك الهادي اوجدك حيدر الكرار راح ابسيف المرادي اومك گضت مظلومه اومن اضلوعها اتنادي اوعمك غيث وفاده السم مرد افاده الچتل الكم صبح عاده وبهاالشرف باري الكون خص المصطفه او آله ــــــــــــــــــــــــــــــــــــــ لمن سمع ناداهم اونار الحزن وگاده يگلهم مثل متگولون صار النه الچتل عاده لاچن ياهو من عدكم گبل سامع امن اجداده منه اتسلبت نسوان اوطافو بيهن البلدان اومن عدها احترگ صيوان اوشافن راس واليهن عدوه اعلى الرمح شاله ــــــــــــــــــــــــــــــــــــــ عيني ماتصد ليهن واشوفن زينب اگبالي الا اذكر هضيمتها واذكر لوعة اطفالي يهل الوادم تلوموني امن اتلف بالحزن حالي شفت الشام بعيوني والسلسله اعلى امتوني واهاليها يشتموني اورحنه ومجلس الطاغي اوخواتي وگفن گباله ــــــــــــــــــــــــــــــــــــــ يتمايل طرب شفته ومن الفرح يتثنه ويعاين لعد زينب اوزينب تجذب الونه يمه راس ابوي احسين وبناته يشوفنه ابعود ايجلب اشفافه اوباري الكون ماخافه يهتف فرح بسلافه والباري نكر وحيه وبالميعاد ما باله ــــــــــــــــــــــــــــــــــــــ يحيدر تم عليه هل حال يتكاثر عليه همه حسره ايجر بثر حسره ويون اعلى ابو اليمه حتى احرب عدوه اعليه ياحامي الحمه اوسم خلا يلوج او چبدته ممروده اوحصل عدوه ابچتلته مگصوده يتم الباقر ياعلي من عوده خلاه تجري دمعته اعله اخدوده ــــــــــــــــــــــــــــــــــــــ گام اوغسله الباقر واشاف الاثر بمتونه حن گلبه اوصفگ بيده اوسالت دمعة اعيونه يگله ياذنب عامل اوحالك مايرحمونه لسا يبويه امخزنات اجروحك فوگ النوايب والهظيمه اونوحك الله يساعد عالمصايب روحك ــــــــــــــــــــــــــــــــــــــ وشاله ونزله بگبره اودمع العين يتجاره اوتمت تنحب الفركاه عياله اوتصرخ ابداره مامست مسيته اعليه الا ابگبره يتواره وحسين ظل ابكربلا اثلث تيام تلعب عليه اخيول ذيج الظلام ماحصل واحد من جميع الاسلام يحفرله گبره ابيده او يسكن روعة اطفاله السيد المرحوم عبد الحسين الشرع

#تراث أدور عليك يبن امي ولا واحد يدليني عاد أنته بضعيف الصوت يامظلوم حاجيني ــــــــــــــــــــــــــــــــــــــ جيتك من كلب مكسور أنه أختك المهضومه جيت بروح لهفانه أدور عليك بالحومه جيتك خويه حاجيني عليك أمك المظلومه وين بيا كتر مطروح جسمك هم بعد بي روح يبن أمي صدك مذبوح وين الي ينظر لحالي ويم جسمك يوديني ــــــــــــــــــــــــــــــــــــــ صدك نايم على التربان خويه وعلوجه مكلوب صدك سحكت عليك الخيل بالميدان من كل صوب صدك خويه نزف دمك وگلبك بالسهم مصيوب ولـمـن ياصـبي العين طلعت السهم يحسين مـن كلبك طلع ثلثين وهذا السهم هو الحال ما بينك وما بيني ــــــــــــــــــــــــــــــــــــــ حر وعطش وبجسمك ألف وتسعمية صواب فوك جروحك ودمك گلبك بالسـهم ينصاب بعد شلون تتمكن تنهضلي وترد جواب وأدري ياضوه عيناي لو ما هل المصايب هاي متقصر يخويه وياي وحاشاك بمثل هاليوم محتاره تخليني ــــــــــــــــــــــــــــــــــــــ حالك هذا وأنته أنوب خويه أسمع بعد حالي بأيتام وحـرم كلبي تمحن وأنشده بالي وين أنطي الوجه وانه أخوتي مذبحه أكبالي وكلسا طفل من عندي يروح وينفطر جبدي وأنه بكربله وحدي صواويني خذتها النار والعيله وصواويني ــــــــــــــــــــــــــــــــــــــ هجمت فرد هجمه الخيل خويه وشبت النيران وهامت عيلتك كلها من النيران للميدان لجن ياضوه عيوني ضلت بالخيم رضعان وأنه تمحنت بيها شلون النار أطب ليها وأخلصها يواليها رضعانك بوسط النار وانه العده مسلبيني ــــــــــــــــــــــــــــــــــــــ خويه محيره ضليت وأتلفت يمين يسار أعوف الخيم رضعانك تتحرگ صغار كبار أطب للنار أخلصها أخاف أنه أحترگ بالنار والأيتام ملتمه هاي تصيح ياعمه وين حسين ابو اليمه وهاي تصيح يازينب حر العطش ماذيني ــــــــــــــــــــــــــــــــــــــ رضعن بوسط نيران وأيتام بحوافر خيل ماتت بالسحك وعيال مامت والدموع تسيل وأنه وحيده مظلومه بيه بعد ماضل حيل وعباس الاجيت وياه هسه من كمت أنخاه أضن كلي يزينب أه عليج شبيدي يعيوني يزينب وين جفيني ــــــــــــــــــــــــــــــــــــــ خذاك الدهر من عندي يخويه وأكَطعت بيه مصايب كربله يحسين مدري أمنين أجت ليه من الخدر والصيوان تــالــيه لــبـني أميه هيجي الدهر خلاني وضيم وهضم راواني صرت من عكب ولياني أرد السوط بيساري وأستر وجهي بيميني ــــــــــــــــــــــــــــــــــــــ ها شتكول يبن أمي ردلي بصوتك أجوابي تقبل بعد أشكيلك هضمي وجمرة امصابي أنته بالسهم مصيوب وانه فراكك أصوابي أنته بروحك بجسمك وانه مجرحه بهضمك يخويه خلي اجي يمك أداوي جسمك بروحي وانته بشوفتك داويني ــــــــــــــــــــــــــــــــــــــ يخويه ان جان ماعندك هـمــه تكوم لعيالك لاتهتم ياماي الـعين أنه خلافك بدالك أحمي عـيلتك أنه يخويه واحرس أطفالك لجن يحسين أخاف أعليك ضامي ومحد يرويك خلي أعتني وأگصد ليك أقدم ألك ماي العين وأشرب يابعد عيني الشيخ هادي القصاب