Alsayyad || الــصـيـاد

خلوني اقولكم تستغلوا الاجازة ازي لو لسة مخلص سنة أولى كلية . ابدء يا هندسة منك له لها اعرف الدنيا في مجالنا بتمشي ازي , ابدء اعرف يعني اي برمجة و أي المجالات المتاحة لينا نشتغل فيها ؟ ابدء اتعلم اساسيات .. ومتجريش ورا اللي يقولك هعلمك فرونت اند في اسبوع والكلام دا اتأسس الاول وبعدين التراك دا امره سهل بعدين , تعال اقولك أي هي الاساسيات المطلوب منك تتعلمها بشكل كويس , 1- لغة برمجة مش هتفرق أي هي اللغة اهم حاجة تذاكر لغة بشكل كويس بس ابعد عن بايثون في البداية , يستحسن جدا جدا جدا #C عشان لغة لطيفة , لغة البرمجة مجرد حاجة هتساعدك تتعلم المفاهيم البرمجية زي مثلا الـ string , int , float وهكذا . 2- هتتعلم OOP وبرضو عادي مش هتفرق لغة اي بس ابعد عن بايثون ويستحسن تكمل تعليمك بـ #C وبرضو مطلوب منك تتعلم بفهم وتعرف يعني اي مثلا Encapsulation, Inheritance, Polymorphism, Abstraction 3- طول ما انت بتتعلم تعمل مشاريع وتطبق بايدك , اعمل مشاريع كتير اوي وفالبداية هتلاقي نفسك مش عارف تعمل فـ ابحث على اليوتيوب وقلد اللي بيشرح عادي في البداية . 4- اتعلم Data structure & Algorithms , وخليك ماشي بالترتيب اللي بقولك عليه دا ومتشتتش نفسك , والتطبيق يكون ليه النصيب الاكبر في رحلة تعليمك يعني متبقاش عمال تذاكر نظري نظري نظري لا نقسمها مثلا 30% نظري , 70% عملي . 5- اتعلم اساسيات الـ Data Base ودي تتعلمها على ايد حد زي م. محمد الدسوقي راجل اللهم بارك . 6- اتعلم Operating systems وهنا مبقولكش روح اتعلم ويندوز ولينكس ووو لا بقولك اعرف ازي نظام التشغيل بشتغل . وطول ما انت بتتعلم الموقع دا هو صديقك اللي بتطبق عليه كل حاجة بتتعلمها www.w3schools.com ---------------------- • امشي على دول اتعلم وبعدين ابقى قرر هتتعلم تراك أي . • اتعلم Touch typing عشان تعرف تكتب على الكيبورد بشكل سريع . • اتعلم ازي تتعلم اصلا , شوف الحلقة اللي عملها بشمهندس احمد ابو زيد على اليوتيوب عن الموضوع دا . • مش كل حد يقولك كلمة تسمعها وتحبطك , لا اصل التراك دا ملوش شغل اصل التراك دا صعب اصل التراك دا الناس كلها بتتعلمه , حبيبي افتكر ان لو أن الناس كلما استصعبوا أمرا تركوه ماقام للناس دنيا ولا دين . • اتعلم ازي تبحث وازي تستخدم الـ AI وازي تكتب Prompt مظبوط للـ AI • يجي حد يقولك لاااااااااااااا ازي C++ احسن من C# , يحبيبي كلهم واحد واي لغة هتعلمك .- اختار الدايرة اللي حواليك واختار راحتك واللي يوجع دماغك يجيله قرار ازالة فوري . • لو مستني تتخرج ووقتها تبقى تتعلم احب اقولك لو مبدأتش دلوقتي مش هتبدء برضو لما تتخرج , استنى انت ازي عايز تستنى لما تتخرج هو بذمتك ظروفنا الاقتصادية تسمحلنا نقعد بعد التخرج من غير شغل ونرجع نتعلم من الاول ؟- هتتعب اوي لو بتدور على الدرجات في الكلية , يحبيبي التقدير دا ملوش بربع جنيه لازم مهاراتك هي اللي ليها لازمة انجح في الكلية بأي تقدير وخلاص . • اتعلم تبحث عن المعلومة متستناش حد يجي يعطيهالك بمعلقة . • نصحتك باللي كان نفسي حد يقوله ليا و أنا لسة ببدء , اه انا الفرق بيني , اشتغل على نفسك لأن محدش هيحبك وأنت كدا حتى أنت مش هتبقى راضي عن نفسك وبالتوفيق .

في ناس عايشة عمرها كله بتجري وراء بكرة .. وبكرة بيجري منها! كل يوم قلق جديد .. كل يوم سيناريو مخيف جديد .. كل يوم سؤال بيأكل القلب: "طب لو حصل كذا؟!" "طب لو الرزق اتأخر؟!" "طب لو ضاعت الفرصة؟!" "طب لو المستقبل طلع غير اللي أنا متخيل؟!" وكأنك إنت المسؤول عن الكون كله! يا مسكين .. إنت خايف على مستقبل .. صاحبه هو الله. ومرعوب من رزق .. خازنه هو الله. وقلقان من أيام جاية .. كاتبها هو الله. المشكلة مش إن عندك هموم ! المشكلة إنك أحيانًا تنسى من بيده الهموم كلها. اقرأها ببطء: ﴿أَلَيْسَ اللَّهُ بِكَافٍ عَبْدَهُ﴾. مش: أليس الله بمعين عبده، ولا: أليس الله بمساعد عبده. بل: ﴿بِكَافٍ﴾ يعني يكفيك خوفك .. ويكفيك همك .. ويكفيك قلقك .. ويكفيك ما عجز عنه الناس. فلماذا تحمل فوق قلبك ما تكفل الله به؟!! اجعل همك الحقيقي: هل الله راضٍ عني؟ أما رزقك ؟ فله رب. وأما مستقبلك ؟ فله مدبر. وأما قلبك ؟ فلا يصلحه إلا اليقين. ووالله .. لو امتلأ القلب بهذه الآية وحدها ؟ لنام كثير من الناس الليلة مطمئنين لأول مرة منذ شهور.

عشان الفاينال على الابواب احب افكرك , اه المراقب سواء دكتور , معيد , عامل مشافكش وأنت بتغش بس اللي خلقك وخلقهم شافك, الغش والخديعة حرام قولًا واحدًا , (مقبول) خير من (امتياز) جعلت الله فيه أهون الناظرين إليك، إنك تسيب السؤال فاضي أكرم لك من إن ربنا يطلع عليك وأنت بتغش، ويحضرني قول الشيخ محمد الغليظ: “غشيت، فرحت، اشرب بقى يوم القيامة”. وقوله تعالى: {يَوْمَ تَشْهَدُ عَلَيْهِمْ أَلْسِنَتُهُمْ وَأَيْدِيهِمْ وَأَرْجُلُهُم بِمَا كَانُوا يَعْمَلُونَ} [النور: 24]. ومما يزيد الغش والخديعة قبحاً أنها من صفات المنافقين المميزة لهم كما قال تعالى: {يخادعون الله والذين آمنوا وما يخدعون إلا أنفسهم وما يشعرون } ( سورة البقرة الآية: 9 ).

السلام عليكم، كل عام وأنتم بخير وبأفضل حال، عيد فطر مبارك. بفكرك تغتنم يوم عرفة لأن «مَا مِنْ يَوْمٍ أَكْثَرَ مِنْ أَنْ يُعْتِقَ اللهُ فِيهِ عَبْدًا مِنَ النَّارِ مِنْ يَوْمِ عَرَفَةَ، وَإِنَّهُ لَيَدْنُو، ثُمَّ يُبَاهِي بِهِمُ الْمَلَائِكَةَ، فَيَقُولُ: مَا أَرَادَ هَؤُلَاءِ؟» مش شرط تحفظ صيغة دعاء معينة وتقول مبعرفش أدعي… الموضوع أبسط من كده بكتير. في الدعاء فيه ثوابت مهم تمشي عليها، ويفضل تقولها قبل ما تبدأ دعاءك وبعد ما تخلصه: - الثناء على الله سبحانه وتعالى. - الصلاة على النبي ﷺ. وبعد كده ادعي ربنا بكل حاجة نفسك فيها، دنيا وآخرة… خزائن ربك ملأى، ورحمته وسعت كل شيء، فادعه وأنت موقن بالإجابة. والخاسر الحقيقي في يوم عرفة هو من يظن أن الله لن يغفر له، ومن يمر عليه هذا اليوم العظيم دون أن ينال نصيباً من الرحمة، أو العتق من النار، أو إجابة الدعوات. غفر الله لي ولكم، وتقبّل الله منا ومنكم صالح الأعمال، وجعلنا وإياكم من عتقائه من النار، وكتب لنا ولكم القبول في الدعاء والعمل، وبلّغنا وإياكم يوم عرفة ونحن في أحسن حال وأقرب ما نكون إليه سبحانه.

المنهاج هو موقع ديني عملته للنفسي قبل غيري منه يبقى صدقة جاية ومنه افضل فاتحه كـtab وأنا شغال وكل شوية ادخل عليه. الموقع فيه التالي: - مواقيت الصلاة لأي مكان في العالم - اسئلة محاسبة يومية للنفس - القراءن كامل صوت و صورة و تفسير وفيه auto scroll - مسبحة - إذاعة القرآن الكريم - أذكار الصباح والمساء - حصون المسلم - أحاديث نبوية صحيحة - بودكاست - محاضرات دينية - كتب دينية ومن اسمه المنهاج فـ هو منهاج كامل هتلاقي جواه كل اللي تحتاجه. دا اللينك https://al-manhaj.vercel.app/

سُورة هُود | محمّد بن خالد المبارك .

https://youtu.be/eU-m6QSeyfU?si=eQegv2hzxViEgrUu مهمة مهمة مهمة والله .

بيقولك ما هو المراقب مش شايفني ولا واخد باله مني فـ اغش براحتي .... لا تجعل الله أهون الناظرين إليك قال أبو الجاد: أوحى الله تعالى إلى نبي من الأنبياء، قل لقومك: ما بالكم تسترون الذنوب من خلقي وتظهرونها لي. إن كنتم ترون أني لا أراكم فأنتم مشركون بي، وإن كنتم ترون أني أراكم فلم تجعلوني أهون الناظرين إليكم.

تَذْكِير يُوم الجمُعه -تذكيّر  | الصَلاه على الرسُولﷺ . -تذكِير  | قِراءة سُورة الكهَف . -تذكيَر  |  توجَد ساعٌه اسِتجابه . -تذَكير  | الدُعاء لإخواننا المسلمين في غزة والسودان. سورة الكهف قال رسول الله صلى الله عليه وسلم: «من قرأ سورة الكهف في يوم الجمعة، أضاء له من النور ما بين الجمعتين» #مالا_يسع_المسلم_التغافل_عنه

الإمام الشافعي بيقول : مَا لا يُقْضَى بِالفِكْرِ يُقْضَى بِالذِّكْرِ فَاذْكُرُوا اللهَ كَثِيراً ما ذُكِر اللهُ على صَعبٍ إلا هَانَ ولا على عسيرٍ إلا تيسَّرَ ولا على مشقةٍ إلا خفَّتْ ولا على شِدَّةٍ إلا زالتْ ولا على كربةٍ إلا انفرجتْ ! لو دماغك مقفوله و مش عارف تذاكر ولا تفكر و لا تحلها.. يبقي عليك بذكر الله و هي هتفرج من وسع اللي ميجيبهوش العقل يجيبه اللي خلقه. اللهم أنت حولي، وأنت عضدي، وأنت نصيري، بك أحول، وبك أصول، وبك أجول، وبك أقاتل.

بمناسبة الامتحانات.... أنت كطالب مش محتاج حاليا غير شيئين مهمين جدا ( البركة والتوفيق ودول من أعظم جنود ربنا الخفيين. بركة يعني ممكن تخلص في نص ساعة اللي بيخلص في أسبوع، وتوفيق يعني اللي ذاكرته تروح تلاقيه، وأنت مش عايز أكثر من كده... ومش هتحصل عليهم إلا لو استعنت بالله، وتجردت من الاعتماد على نفسك ومذاكرتك للاعتماد على الله، واللجوء إليه، يعني اتعب واجتهد بس حط في بالك إنك بدون معية ربنا ليك لا شيء، فالموضوع مش مادي بحت. لح على الله في طلب البركة والتوفيق والسداد، وحس بضعفك وحاجتك له سبحانه، واعمل اللي عليك وربك لا يضيع عمل عامل. إحنا ولا حاجة بدونه. متنساش الدعاء اللي قولتلك عليه: اللهم أنت حولي، وأنت عضدي، وأنت نصيري، بك أحول، وبك أصول، وبك أجول، وبك أقاتل. ربي لا تكلني إلى نفسي، لا تكلني إلى ضعف وعورة وخطيئة وذنب، وإني لا أثق إلا برحمتك، وأنت أرحم الراحمين. ولا حول ولا قوة إلا بالله العلي العظيم.

السلام عليكم , هاا نحن هنا في ليالي الفاينال الباردة , اقرء الكلمتين دول وحطهم في دماغك وأوعى ثم أوعى تنساهم سواء ذاكرت أو لا فـ الفاينال كدا كدا كام يوم وهيعدوا فـ اعمل اللي عليك ولم الدنيا الفترة دي ومتقلقش لسة معاك وقت كافي الحمد لله . وأنت قاعد بتذاكر أو قاعد في اللجنة ومش عارف تحل عليك وعلى الدعاء دا : اللهم أنت حولي وأنت عضدي وأنت نصيري , بك أحول وبك أصول وبك أجول وبك أقاتل , ربي لا تكلني الى نفسي لا تلكني الى ضعف وعورة وخطيئة , اللهم يا جامع الناس ليوم لا ريب فيه اجمع بيني وبين ضالتي . أول ما تمسك الورقة تقرء آية الكرسي والاخلاص و المعوذتين . الغش والخديعة حرام قولًا واحدًا، شيل المادة ولا إنك ترتّب على الدفعة بطريقة حرام، (مقبول) خير من (امتياز) جعلت الله فيه أهون الناظرين إليك، إنك تسيب السؤال فاضي أكرم لك من إن ربنا يطلع عليك وأنت بتغش، ويحضرني قول الشيخ محمد الغليظ: “غشيت، فرحت، اشرب بقى يوم القيامة”. ومما يزيد الغش والخديعة قبحاً أنها من صفات المنافقين المميزة لهم كما قال تعالى: {يخادعون الله والذين آمنوا وما يخدعون إلا أنفسهم وما يشعرون } ( سورة البقرة الآية: 9 ).

الحمدُ للهِ ربِّ العالمين، سبحانك اللهم وبحمدك، تبارك اسمك وتعالى جدّك، ولا إله غيرك. اللهم صلِّ وسلم وبارك على سيدنا محمد، وعلى آله وصحبه أجمعين. اللهم يا رحمن يا رحيم، يا شافي يا لطيف، نسألك شفاءً تامًا عاجلًا لا يُغادر سقمًا لعبدك معاذ. اللهم أخرج المرض من جسده خروجًا كاملًا، وطهّر دمه، واشفِ خلاياه، وأعد له صحته وقوته وعافيته. اللهم إن معاذ شابٌ طيبٌ خلوق، يعرفك ويحبك، فلا تُرِه بأسًا، ولا تُوجِع قلب أهله عليه. اللهم اربط على قلبه، واملأه طمأنينةً ويقينًا، واجعل ما أصابه رفعةً له وتكفيرًا لذنوبه وقربًا منك. اللهم أقرّ أعيننا وأعين أهله بشفائه، واجعل هذا المرض آخر الأحزان، وبداية العافية والفرح. إنك على كل شيء قدير. وصلِّ اللهم وسلم على نبينا محمد، وعلى آله وصحبه أجمعين.

تبدأُ أوّلُ ليالي شهرِ رجب معَ مغربِ اليوم السبت 20/12/2025 ، وهو أحدُ الأشهُرِ الحُرُم التي عظّمها الله، فجعل الذنبَ فيها أشدَّ حُرمة والعملَ الصالحَ أعظم ثوابًا. كان النبي ﷺ إذا دخل رجب يُروى عنه الدعاء: "اللَّهُمَّ بارِكْ لَنا في رَجَبٍ وشَعْبَانَ وبَلِّغْنا رَمَضَانَ"، وهو دعاءٌ حسن المعنى اشتهر على ألسنة العلماء والناس رجاءَ البركة وبلوغ رمضان. شهرُ رجب هو شهرُ البِذر، تتضاعفُ فيه الحسنات، والذنبُ فيه أعظم، فأكثروا من الأعمال الصالحة، واجتنبوا المعاصي ولا تظلِموا أنفسكم بكثرة الذنوب، فـرجبُ مفتاحُ أشهُرِ الخيرِ والبركة، ورحلةِ الاستعدادِ لشعبان ورمضان.

{ وَيَزِيدُ اللَّهُ الَّذِينَ اهْتَدَوْا هُدًى وَالْبَاقِيَاتُ الصَّالِحَاتُ خَيْرٌ عِنْدَ رَبِّكَ ثَوَابًا وَخَيْرٌ مَرَدًّا } سورة مريم

{ قَالَ اللَّهُ هَذَا يَوْمُ يَنْفَعُ الصَّادِقِينَ صِدْقُهُمْ لَهُمْ جَنَّاتٌ تَجْرِي مِنْ تَحْتِهَا الْأَنْهَارُ خَالِدِينَ فِيهَا أَبَدًا رَضِيَ اللَّهُ عَنْهُمْ وَرَضُوا عَنْهُ ذَلِكَ الْفَوْزُ الْعَظِيمُ } سورة المائـدة

{ وَلَقَدْ آتَيْنَا دَاوُودَ مِنَّا فَضْلًا يَاجِبَالُ أَوِّبِي مَعَهُ وَالطَّيْرَ وَأَلَنَّا لَهُ الْحَدِيدَ } سورة سبإ

شوفت فيديو ليه أنت ذكي بس مش ناجح؟ فهحاول اقولكم الملخص اللي كان موجود هو بيقول بتفتح 47 tab في المتصفح. عندك خطة خمسية بتتغير كل شهر. حاسس إنك "مشروع عبقري" بس مفيش نتايج على الأرض. الحقيقة اللي محدش بيقولها: ذكاءك ده ممكن يكون السجن بتاعك. الناس اللي أقل منك ذكاء فاتحين مشاريع وبيبيعوا. أنت لسه بتعمل "أبحاث" عن أحسن business model. هما بيغلطوا ويتعلموا، وأنت لسه بتكتب الإيميل "البرفكت" اللي عمرك ما بعته. المشكلة فين؟ أولاً الـ overthinking. دماغك بتشوف مهمة بسيطة زي "أبدأ بلوج"، فبدل ما تكتب تروح تدور على أحسن منصة وتقارن 15 أداة وتدرس SEO. بعد 6 شهور تبقى خبير في التدوين بس ماكتبتش حرف. ده مش شغل، ده هروب متخفي. ثانياً وهم الكمال. أنت مش بتدور على الجودة، أنت خايف. خايف تطلع حاجة فيها غلطة فالناس تكتشف إنك مش "العبقري" اللي هما فاكرينه. الحقيقة: done beats perfect. طول ما أنت بتلمع في الفكرة، غيرك بيكسب منها فلوس. ثالثاً معادلة النجاح مختلفة عن المدرسة. في المدرسة الشاطر هو اللي بيحل لوحده. في الحياة النجاح بيعتمد 77% على حاجات ملهاش علاقة بالـ IQ زي الذكاء العاطفي وإنك تعرف تتعامل مع الناس. رابعاً لعنة المعرفة. كل ما تعرف أكتر، كل ما تاخد قرارات أصعب. أنت شايف كل سيناريو للفشل فبتتشل. الجاهل بيتحرك لأنه مش شايف التعقيدات دي. الحل؟ المجهود بيتحسب مرتين في معادلة النجاح. اكسر الـ ego وسمح لنفسك تكون مبتدئ وتغلط. بطل تعقيد وابني نظام بسيط لدرجة إنه يبان تافه. وابدأ قبل ما تكون جاهز، لأن لو استنيت تجهز عمرك ما هتبدأ. كفاية تفكير. اتحرك. 🔗 لينك الفيديو : Click Here