مع الحسين (ع) / رباب رياض

استشهاد النبي محمد .... آه يا يوم النبي يوم البلاء يوم مات بسمه خير الأنبياء وناحوا ولطموا عليه أهل الكساء يشتكون بحرگه من غدر الصحاب .. بآخر الساعات مكروب وحزين گال عگبي ها يزهره تقتلين قتلچ بمسمار ويطيح الجنين بالظلم هذا يحل للألم باب .. وانت يا حيدر ي أمير المؤمنين بنص صلاتك تبقى مطبور الجبين بسيف مسموم إعله إيدين اللعين وتبقى متعلعل وتحمل هالعذاب .. وبقى ينحب طه ويزيد البكاء وإعله صدره يضم ضامي كربلاء يا حبيبي إنت تبقى بالعراء تبقى دامي وهذا يبني اكبر مصاب .. بحسره وبكسره اجي بيوم الطفوف اجمع اوصالك والمها من السيوف اجمع الخنصر وادور عالچفوف وابقى أعاين عينك إعليها التراب .. واللي مات وهو يبچيها الرسول طفله ورثت كل قهر إمها البتول زينب انتي هواي آلامچ تطول من متاعب لمصاب لمصاب خادمة الزهراء ع / رباب رياض https://t.me/alhuseen_313

استشهاد النبي محمد .... يتمني يتمني ، يا حيدر الوالد يتمني يتمني ، وفارگني أعز واحد .. رايح إُنس روحي ، وزيدهن جروحي وما فكر بحالي رايح وعايفني ، رايح إهو وإمي بكل روحه حسبالي حسبالي أنه امشي ، ویه الابو بنعشي ما فارگ الغالي عذبني عذبني ، وگلبي جمر خامد .. بيوم المشه عني ، هنانه بده وني ودمعاتي التلالي هنانه عرفت عمري ، ما بي فرح أدري والحزن يبرالي عگبه فلا أصبر ، بكل ليله أظل انطر ملاگه وي الوالي هيجني هيجني ، حزن النبي العابد .. لن حيدر يگلي ، يا فاطمه توكلي عالبارئ العالي ودمعاته تتجاره ، ويحچيلي تذكاره وي الوالد الغالي شما ينذكر موقف ، أبقى انه اتلهف إمنيتي يجي گبالي يشبكني يشبكني ، شبكة گلب فاگد .. أنه وعلي نثغب ، إعله النبي وننحب وبمناشغ أحوالي أنظر علي مهدوم ، وأنه الگلب ملچوم وما تبعد آجالي ونتصبر وي العين ، گبال الحسن وحسين ومتهدمه جبالي هدمني هدمني ، وحيلي بقه راكد خادمة الزهراء ع / رباب رياض https://t.me/alhuseen_313

وزن الفاىزي لطيور النوارس التي حضرت يوم الاربعين عند قبة الامام الحسين ع ـــــــــــــــــــــــــــــــــــ حتى النوارس بالحزن حضرت الاربعين تحومي على القبه سوانح جتي يحسين حتى الطيور البلسمه نصبت عزيه ويه العقيله والفواطم جن سويه وعله الكبر ناحن يبو اليمه برزيه لرد الرؤوس الطاهره محزن الكونين #نبضي_حسين ┄┉❈❥ًً❀💠❀❥❈┉┄ جتي الطيور اليوم عالكبه يحومن يمكن يدلن زينب وعالكبر يومن ساعه ينزلن بالحزن ساعه يگومن وشهل مصيبه ياعلي الشافتها كل عين ✍🏻ام محمد علي الشيباني ┄┉❈❥ًً❀💠❀❥❈┉┄ تعنت تواسي الطاهره وطارت عليهن طب كربله ضعن الفواطم واجت ليهن تدري ابنات حسين حيل امتعبيهن والسبي مو ايام چنه صارله سنين ✍🏻صغيرة الحجة ┄┉❈❥ًً❀💠❀❥❈┉┄ كل طير يتذكر مصيبه من المصايب يرفرف جناحه وينتحب والگلب ذايب لچفوف أبو فاضل يون والدمع ساچب شمعظمها بالطف طاحن لعباس چفین ✍🏻خادمة الزهراء ع / رباب رياض ┄┉❈❥ًً❀💠❀❥❈┉┄ مو عجب هاليوم الطيور اعتنت گبره ارض وسمه عله حسين تبچي وتجر حسره بيوم اربعينه اتنوح ويه امه الزهره حكها الملايك والخلك تجهش بالونين #نبضي_حسين ┄┉❈❥ًً❀💠❀❥❈┉┄ كل الخلايق تنتحب لجل المصيبه حگ ووجب يبچي الحبيب إعله حبيبه من دمعه لو حسره ونحب كلمن نصيبه إجعلنا يارب ممن اليبچيله كل حين خادمة الزهراء ع / رباب رياض تمت بحمد الله وتوفيق اهل البيت عليهم الصلاة والسلام باقلام الخادمات https://t.me/alhuseen_313

نعي الأربعين ** رديت بس ردتي بكسره بكل شوغه أصرخ آه يزهره طولي إننظر وشلون نظره القاصي والداني يخزره ** يحسين يا عباس يا عون گعدو لزينب لو تسمعون منظر صفيت لكل العيون ونغّاره ماعندي وينغرون ** وكل الأرامل والثكالى تلطم وتبچي الأشد حاله للبالسهم ذبحو جماله وتنحب رباب إعله الجراله ** بين الخجل والحزن خلصت هالأربعين الگشره مرت يشتموننا وبالگلب حزت بنتك رقيه لمن فزت خادمة الزهراء ع / رباب رياض https://t.me/alhuseen_313

فزاعي ، اربعين الإمام الحسين .... "رد الضعن يحسين بس مغربات" .. لوعات شابع يا ضعنكم لوعات يحسين خلصنه الدرب بالدمعات هيهات ترجعلي بعد لا هيهات نايم يخويه وأنه يم الشمات شوغات عگبك والله ضگت الشوغات أشرف نسه وصاحولنا المسبيات وساعات خلونا إعله باب الساعات ونسوانهم لبسن حِلي وفرحانات من المستحه ظلينا كلنا مدنگات من بخرايبهم عمت عيني نبات عمنه أبو فاضل للإسف گالن مات وين اللوه يا عمنه وين الريشات وينك يبو خزره التطيح القادات ماهنه گلهن بالترب متطشرات وچفوف إديه إعله النهر مگطوعات ما گام إلي واحد تره مو عادات ودلي تتلگون ضعن السادات فدوات نغدي لطولكم يا فدوات بس گعدوا ليه وسکتو حچي الشمات مابينه نحمل بعد ذيچ الشوغات گوم ونسولف على ايام الحلوات ماعاتب ولاجيب طاري الدمعات خادمة الزهراء ع / رباب رياض https://t.me/alhuseen_313

اربعين الإمام الحسين ..... مسبيه زينب ردت ومسبيه تعبانة من ضيم السبي ومحنيه .. مسبيه زينب للأسف يا عباس ونوماسك إعله الهزل ها يالنوماس ردت عليكم لاچن مدن.ه الرأس وجابت الروس وياها بس محنيه .. جابت الروس الي انسبت فوگ ارماح وخلصت درب السبي تگل للذباح بس نزله شويه احس ما مرتاح ويرفعه فوگ وهزه بغضاً بيه .. وتباوع اعله الروس كل درب الشام وتتخيل شجاري عليه من آلام ورأس الكفيل تباوعه كله سهام وينگط دمه ولا نشف منه شويه .. تتهطر شما باوعت للعباس تذكر كبل محلاهم ببين الناس وتگله خويه صد على اختك لو حاس اختك سبيه يا اخو العلويه .. علويه چان اسمي گبل ويه حسين هسه الزلم تنده عليه بأسمين "الخارجيه وزينب" وصلفه العين وسفه الشماته تصير حامي إعليه خادمة الزهراء ع / رباب رياض https://t.me/alhuseen_313

اربعين الإمام الحسين ..... عمه ذيچ گبورهم ذوله العمام يا آل هاشم موته لو ناسينه؟ رحت بثمانينكم طبيت شام وهسه اجيت ونقصن ثمانينه .. عمه ذيچ گبورها الوفايه وذاك گبره الذي شال الرايه نعاتب وبلكت عتبنه كفايه گوه اجينه وكوه ننگل بالجدام .. يا آل هاشم هل اجن نسوانكم موته گالو والعتب هم جاسكم بس صدگ ناسينه من فرگاكم؟ موش هينه إعلينه نحمل هالسهام .. رحت بثمانين طفله الكم يحيد وكلهم ينوحون والوالي بعيد والصدك يا خويه حتى أنه اريد اخو يراعني مَ أنه روحي حمام .. هسه اجيناكم لچن جية عليل خوية عذراً منك الاحچي ثجيل ماتت بنيتك يحماي الدخيل وخوله ماتت والجرح بالگلب دام .. صح اعاتبكم لچن گلبي خِلي عتبي من ضيم السبي هنا يا هلي خويه خلصت الدرب أندب علي ولا حضرلي واحد بذاك الزحام خادمة الزهراء ع / رباب رياض https://t.me/alhuseen_313

أربعين الأمام الحسين .... جبنه الروس وهل جينالك گوم تلگه حمول الخدر ما ذلينه ولا راح نذل وعد عيناكم يابو الأكبر .. ما ذلينه بگاع الغربه ولا راح نذل يم كل صعبه جيش الملعون احنه نرهبه وعد عيناكم يابو الأكبر .. إحنه الذريه المحموده وهيبة عباسك موجوده ونوگف الظالم بحدوده وعد عيناكم يابو الأكبر .. مقصد بالطف عدنا وغايه ومقصد هم من طاحت رايه حتى نطيح يزيد ورأيه وعد عيناكم يابو الأكبر .. بت حيدر وأنه احچي بزودي ويزيد وجيشه ومقصودي زائل هو وباقي وجودي وعد عيناكم يابو الأكبر .. يعوضنا الله بشيعه تحبنه وتحضر كل مجلس يذكرنه ونعوضهم إحنه الجنه وعد عيناكم يابو الأكبر خادمة الزهراء ع / رباب رياض https://t.me/alhuseen_313

أربعين الإمام الحسين ..... خجلانه منك والله خجلانه بنيتك عزيزه وماجت ويانه . گالتلي عمه الوالد شلونه مشتاگه اشوفن لمعة عيونه حنيت ليه بلكت تصيحونه گلتلها عمه ما اجه ويانه . خجلانه منك والله خجلانه بنيتك عزيزه وماجت ويانه . گالتلي عمه شلون يرضاها بنيته وعزيزه وهيچ عافاها ضلت تنوح وعله مبچاها تجيبولي هسه الوالد هنانه . خجلانه منك والله خجلانه بنيتك عزيزه وماجت ويانه . ويزيد فز من نومه تاليها وراس الحبيب حسين ينطيها صاحت "حسين" وسكتت شبيها وسكينة ضلت بس تحاچيها ياخيتي ليش ندفنچ هنانه . خجلانه منك والله خجلانه بنيتك عزيزه وماجت ويانه . رد الضعن يحسين بس نصهن بنيتك رقيه بعد ناقصهن من رحنه كلنه وهي ويانه بالشام ماتت خويه عطشانه . خجلانه منك والله خجلانه بنيتك عزيزه وماجت ويانه خادمة الزهراء ع / رباب رياض https://t.me/alhuseen_313

اربعين الإمام الحسين ..... محنيه اخت عباس محنيه من الهضم من الضيم محنيه ياخويه اجيتك راكده ، وماشفت منك راشده ياخويه محنيه ، ياخویه محنيه .. وينك يبوفاضل صحت يابعد گلبي وهرشه اگعدلي ياخويه ردت مسامر أيام الغبشه اتذكر ايامك گبل صارت ايامك وحشه رحت ورجعت الكم يخي وكل الدرب بس ممشه تعبانه يا عباس تعبانه تعبانه من النوح تعبانه ياخويه زينب راگده ، وماشفت منك راشده .. اشتم بالتراب وصحت اگعد ينور عيوني اگعد يكافل هالضعن يالماتخيب ضنوني اکعد ولو ساعه ردت اگعد وگلي شلوني واسألني عن ضيم السبي وشسوه بيها متوني محنيه اجت الحره محنيه محنيه من ممشاها محنيه ياخویه يمك گاعده ، وماشفت منك راشده .. حركت التراب وگلت بلكت يگوم شويه عباس زينبكم اجت ومو خوش هاي الجيه زينب ي اخو زينب بقت يم الغرب مدميه حبال البديها جرحن جلد إيدها العلويه عطشانه يا عباس عطشانه عطشانه مو للماي عطشانه ياخوية فگدك زايده ، وماشفت منك راشده .. عطشانه للراحو انه واشرب نهر ما اروه العطشان لأخوانه وهله يظل الفراگ يعذبه وما يروه بس بالعطشه ولو شرب من الجربه جربة ابو فاضل فقط تروي الارواح العذبه روينه ياعباس روينه روينه من الضمه روينه شوفك يروي الفاگده ، وماشفت منك راشده خادمة الزهراء ع / رباب رياض https://t.me/alhuseen_313

اربعين الإمام الحسين .... يابو عبدالله الگلب ذايب يمتة لقائي بمرقدك كاتب؟ بالاربعينيه ، المتروسه حنيه حسين ، حسين .. يابو عبدالله الگلب والله يتگطع الشوگ ما يعرف صبر وروحي إتلوع يمتة أگر عيوني من مشاي أطلع وبلسان الناس ها يالزاير أسمع . يمته لقاء المحب وي حبيبه يمته لقاء العاشگ وغريبه حسين ، حسين .. شگد اظل اتوسل ودمعي أسيله وداعة العباس ما ظل عندي حيله شگد اريد أمشي وانوح وي العقيله شگد دموع بعيني لعيون العليله . حان المشي وحان الدمع عليه حان المشي وحان الصبر إليه حسين ، حسين .. الحسره تآكل گلبي من بعيني أشاهد الناس تمشي بكل كتر تگصد مراقد وانة بگليبي جرح ما شفته بارد الشيعة تگصد للحسين وأنه گاعد ! . والله الجرح بگليبي ما مثيله والله الجرح لجل إختك العقيله حسين ، حسين .. الله ما قاسملي هاي المره ازورن إكتبلي دمعه بمجلسك هم عاد اگولن ما رحت مشاي بس إعليه انوحن إكتبلي نار بگلبي ما تطفه واموتن .. إكتبلي حرگه هنا يراعي الغيره إكتبلي حرگه بمجلسك وبغيره حسين ، حسين خادمة الزهراء ع / رباب رياض https://t.me/alhuseen_313

شور للسيدة رقيه ع ـــــــــــــــــــــــــ صاحبة جف الزغيره بس عطاياها جبيره يمها ابدن ماكو حيره... ـ،،،،،، .. يا رقيه الحاجه يمج بماتمج جينه نندبج ترسي جفيني بجفج سهلي عليه العسيره. صاحبة جف الزغيره بس عطاياها جبيره ┄┉❈❥ًً❀💠❀❥❈┉┄ دمعتج لسه سجيمه وماتمج يوجع نقيمه مصيبتج والله عظيمه وغربتج وانت اسيره... صاحبة جف الزغيره بس عطاياها جبيره ┄┉❈❥ًً❀💠❀❥❈┉┄ ما نسيناه لمصابج نخدمج جينه عله بابج للخرابه شنهووجابج حيرتج والله حيره صاحبة جف الزغيره بس عطاياها جبيره صاحبة جف الزغيره بس عطاياها جبيره ┄┉❈❥ًً❀💠❀❥❈┉┄ شفتي راس لبو اليمه بالطشت هظمتج هظمه والله مصابج شعظمه مصيبتج تكسر كسيره صاحبة جف الزغيره بس عطاياها جبيره ┄┉❈❥ًً❀💠❀❥❈┉┄ شكثر ناديتي يبابا ظلمه بذيج الخرابه گلبج حنين بعذابه شبه جدتج يالاميره صاحبة جف الزغيره بس عطاياها جبيره ┄┉❈❥ًً❀💠❀❥❈┉┄ فاطمه تبعت ابوها بعده مثلج لوعوها حنينه مثل امه لابوها وبالمحنه هايه سيره صاحبة جف الزغيره بس عطاياها جبيره ✍🏻#نبضي_حسين https://t.me/qasieeedHussain7470tashshreef

نعي إستشهاد الإمام الحسن ع ** لسان حال مولاتي الزهراء ع أنه الوالده والگلب مالوم وادور عزه ابني الحسن هاليوم اويلاه يبني المات مسموم وحيد يعالج وذب چبدته ادموم أنه الوالده وگلبي دليلي وصلت إولدي ومهدود حيلي يا حسن آه يا تعب ليلي ويلي على يومك يويلي يبني المصيبه يا كبرها المثلك مناير وشكبرها وحضره يفوز الي حضرها مو هيج يا عيني ونظرها لاچن أگول اتخف الهموم مو من گفاك الذبح محتوم ولا جسمك يسحگونه هالگوم وعگبك سبيه إختك يجيدوم خادمة الزهراء ع / رباب رياض https://t.me/alhuseen_313

فزاعي إستشهاد الإمام الحسن ع أنه الحسن يم الحسن لضلعچ صحت ضميني ** أنه وليدچ المسموم يا يمه من جعده شفت هضمه بعد هضمه سمتني اللعينه الفعل وشعظمه يا يمه چبدي حار ويچويني *** ضليت بونيني أون يا زهره حسين بصفي والدمعات متجمره بس همي الچبير لزينب الحره لتشوفني بهالحال وتبچيني *** ولحسين اندبت جيب الطشت ليه أحمل لوعة السم بعد مابيه بهالحاله بعد فاتت العلويه وصاحت عساني عميه يا ضي عيني *** واسهام إعله نعشي حرمه ما خلو ودفني بكتر جدي بيا سبب منعو كل هذا الحقد والأشد من سوو گبري ترابه هاكثر مآذيني *** بس يبقى الأشد والما مثل يومه حسين حسين هذا الفاضت دمومه وجثته ماهي عدله وغدت ملمومه ويلاه عالمذبوح والسابيني خادمة الزهراء ع / رباب رياض https://t.me/alhuseen_313

جديد للسيدة رقيه ع طور يم العباس دخيلج ملا حيدر السعد ــــــــــــــــــــــــــــــــــــــــــــــــــــــ خمدت الانفاس.. لرقيه لرقيه نخمدت الانفاس ................ يا عمه خيتي بيا وضع والمن نظرها تديره ما حملت فراك الابو وبعده تعيش بحيره شبكت على نحره وگضت مصيبتها عمه جبيره شبگة جفوف زغيره.. شبكة جفوف زغيره جابولها طشت الرعب بي راس ابويه الغالي حنت ونت بالالم بصوت الرفيع العالي نادت يبويه شخضبك وراسك شجابه گبالي ريت الاجل يدنالي.. ريت الاجل يدنالي كلها احساس.. رقيه.. رقيه كلها احساس ┄┉❈❥ًً❀💠❀❥❈┉┄ روحين متعلكه سوه والفركه طالت هايه متعلمه بوكت الصلاه تفرشله المصلايه رقيه ابد ما تقتنع بفراكه متأذايه بدموعها شكايه بدموعها شكايه تنشد عليه بكل وكت وتريد يحضر ليها فراكه عذاب امرمره واتدوره لغاليها بوسط الخرابه تنتحب وشنهو الذي مبجيها بالطيف مر عليها بالطيف مر عليها وفراكه جاس گلبها گلبها وفراكه جاس ┄┉❈❥ًً❀💠❀❥❈┉┄ من شافته تصرخ تون فزت تريد تشوفه بوسط الخرابه ضغبره والبجي ابد متعوفه وياها الفواطم ينحبن ليهن جرح شيروفه ليلة حزن معروفه ليلة حزن معروفه سواجي الدمع ما تنكطع والنوح منها يعله ما تكدر تهيد الحزن بيها رقيه شخله صوت الحبيبه بالقصر فزز عيون الذله ويزيد روع طفله ويزيد روع طفله دزلها الراس.. اتشوفه.. اتشوفه دزلها الراس ┄┉❈❥ًً❀💠❀❥❈┉┄ روع شبيهة فاطمه الماعنده دين وذمه فوك اليسر فوك الاذه هاضمها هاي الهضمه من زمان تنشد عالابو عله فراكه ما متعلمه وضلت عليه متألمه وضلت عليه متألمه تنطره بلا ياس رقيه رقيه تنطره بلا ياس ┄┉❈❥ًً❀💠❀❥❈┉┄ ما ايست اعدها امل بلشام بلكي يمرها بنص الخرابه انتضرته والحسره ليها تجرها بس الدمع يشرح وضع غير الابو ميسرها وغيابه مغيرها وغيابه مغيرها البالخيل انداس تريده تريده البلخيل انداس ┄┉❈❥ًً❀💠❀❥❈┉┄ بالشام ماتت بالغرب يا وسفه الزغيرونه شافت عذابات الزمن والطفل ميرحمونه كل طفل ينشد عالابو يجورون ويضربونه واحقادهم مدفونه واحقادهم مدفونه ورده رقيه وذبلت وحسين بس يرويها كل ضنها ما يكطع وصل حتما يمر عليها مجروحه من ضيم السبي وبجفوفه يداويها بس هو اليرضيها بس هو ليرضيها من دون الناس رقيه. رقيه من دون الناس ✍🏻#نبضي_حسين طور القصيدة👇🏻https://youtu.be/-VhiAKOwuxI?feature=shared

#محاضرة_الصلاة بسم الله الرحمن الرحيم السلام عليكم ورحمة الله وبركاته أخواتي محاضرتنا اليوم عن الصلاة، مو مجرد واجب يومي، بل عبادة تحدد قيمة كل أعمال الإنسان. خلونا نبدأ من نقطة مهمة: هل كل واحد يصلي… صلاته صحيحة فعلاً؟ بنفس طريقة أهل البيت ، بنفس ما كالولنا. نجي للرواية: عن حمّاد بن عيسى قال: قال لي أبو عبد الله عليه السلام: «يا حمّاد، تُحسن أن تُصلّي؟» يعني تعرف تصلي؟ قلت: سيدي، أنا أحفظ كتاب حريز في الصلاة. فقال عليه السلام: «لا عليك، قم فصلِّ» قال: فقمت بين يديه متوجهاً إلى القبلة، فصليت. فقال: «يا حمّاد، لا تُحسن أن تُصلّي، ما أقبح بالرجل منكم يأتي عليه ستون سنة أو سبعون سنة، فلا يقيم صلاة واحدة بحدودها تامة» 🔹 التوضيح المبسّط: حمّاد إنسان متعلم، حافظ كتاب كامل في الصلاة، ومع ذلك الإمام قال له: "ما تعرف تصلي صح". هذا يعني أن المعرفة وحدها ما تكفي، لازم تكون الصلاة مطبّقة بشكل دقيق. 🔹 التوضيح الأعمق: الإمام هنا يفرّق بين: معرفة الصلاة — وبين — إقامة الصلاة المعرفة علم، لكن الإقامة التزام عملي وخشوع وحدود. قال حمّاد: فدخلني الذل. يعني إستحيت من الإمام. فقلت: جعلت فداك، علّمني الصلاة. فقام الإمام الصادق عليه السلام مستقبل القبلة منتصباً، وأرسل يديه على فخذيه، وقد ضمّ أصابعه، وقرّب بين قدميه حتى كان بينهما مقدار ثلاث أصابع، واستقبل بأصابع رجليه القبلة. ثم قال بخشوع: «الله أكبر» 🔹 التوضيح المبسّط: يعني حتى الوقفة إلها طريقة: الوقوف مستقيم، القدمين مو متباعدات هواي، والأصابع باتجاه القبلة. ثم قرأ الحمد بترتيل. 🔹 التوضيح المبسّط: الترتيل يعني قراءة واضحة، مو سريعة، ولا غير مفهومة. الهدف من القراءة مو مجرد إنهاء السورة، بل فهم ما يُقال والشعور به. ثم ركع، وكان ظهره مستوياً حتى لو صُبّ عليه ماء لم يجرِ. 🔹 التوضيح المبسّط: يعني الظهر مستقيم تماماً، مو منحني ولا مائل. 🔹 التوضيح الأعمق: الركوع الحقيقي هو خضوع كامل، والجسد يعكس هذا الخضوع بالدقة والتوازن. ثم سجد سجوداً تاماً مع الطمأنينة. 🔹 التوضيح المبسّط: السجود مو بسرعة، لازم يكون بثبات وهدوء. يعني نستقر على التربة مو بس لمس ولفظ سريع ونرفع رأسنا. السجود هو أعلى درجات القرب من الله، فلا يصير يكون بشكل سريع أو بلا حضور. خواتي نرجع لعبارة الإمام: «ما أقبح بالرجل…» مو معقول إنسان يعيش عمره كله يصلي، لكن ما أدى صلاة صحيحة. القضية مو عدد الصلوات، بل جودة الصلاة أو دقتها. مو كم مرة صلّيت، بل كيف صلّيت. الصلاة الصحيحة تحتاج ثلاثة أمور: فهم — تطبيق — خشوع أي نقص في واحد منها، يخلي الصلاة ناقصة. في الختام نسأل الله أن يرزقنا صلاة نقيمها كما أرادها أهل البيت عليهم السلام، مو مجرد حركات، بل عبادة حقيقية فيها حضور قلب والتزام كامل. ببركة الصلاة على محمد وآل محمد.

#محاضرة_ثورة_زيد_بن_علي بسم الله الرحمن الرحيم (مِّنَ ٱلۡمُؤۡمِنِينَ رِجَالٞ صَدَقُواْ مَا عَٰهَدُواْ ٱللَّهَ عَلَيۡهِۖ فَمِنۡهُم مَّن قَضَىٰ نَحۡبَهُۥ وَمِنۡهُم مَّن يَنتَظِرُۖ وَمَا بَدَّلُواْ تَبۡدِيلٗا). محاضرتنا اليوم مؤلمة ومليئة بالدروس، نتحدث فيها عن زيد بن علي بن الحسين عليهم السلام، الشهيد الذي قُطع رأسه وطيف به بين البلدان.. نبدأ بالسؤال المهم: ليش قام زيد عليه السلام بالثورة والإمام الصادق عليه السلام موجود؟ هذا السؤال يفتح لنا فهم عمق القضية. زيد هو ابن الإمام السجاد عليه السلام، وأمه حوراء من بلاد السند، وكانت من خيرة النساء عبادة وتقوى. وقد رأى الإمام السجاد في المنام رسول الله صلى الله عليه وآله يزوجه منها، وبُشّر بولادة زيد. عند ولادته سنة 67 هـ، تفاءل الإمام بالقرآن فقرأ آيات الجهاد، فبكى وقال: هذا المولود من الشهداء. نشأ زيد في بيت الإمامة، وتربى على يد الإمام السجاد ثم الإمام الباقر عليهما السلام، وتميز بملازمته للقرآن حتى لُقّب "بحليف القرآن". أما أسباب ثورته فكانت واضحة: طغيان بني أمية وفسادهم إساءتهم لأهل البيت وسبّهم على المنابر ظلمهم لشيعتهم المطالبة بدم الإمام الحسين عليه السلام إضافة إلى ما تعرض له زيد شخصياً من إهانة وتعذيب. توجه للكوفة، وبايعه قرابة 40 ألف، بس السلطة الأموية تحركت ضده، واخترقوا أصحابه بجاسوس كشف بعض الأنصار. في ليلة الثورة، فرح زيد بخروجه ضد الظلم، لكن أهل الكوفة غدروا به، واشترطوا موقفه من الأول والثاني، فلما لم يجب تركوه، ولم يبقَ معه إلا 300 رجل فقط. بدأت المعركة، وأظهر أصحابه شجاعة كبيرة، فقتلوا عدداً كبيراً من جيش الأمويين، وكان لزيد دور بارز، لكن كثرة الأعداء أدت إلى رميهم بالسهام، فأُصيب زيد بسهم في جبهته. حمله ابنه يحيى إلى بيت قريب، وبشّره بلقاء النبي وأهل البيت، فقال: صدقت. وعندما نُزع السهم، استشهد عليه السلام، وذلك في 2 صفر سنة 122 هـ. بعد شهادته، دفنه أصحابه سراً، لكن الأمويين اكتشفوا القبر، فنبشوه، وقطعوا رأسه، وصلبوا جسده في الكوفة مدة طويلة، ثم أحرقوه وذرّوا رماده في الفرات. أما رأسه الشريف فنُقل بين الشام والمدينة ثم مصر، حيث دُفن هناك وأصبح له مقام. بس يبقى السؤال: لماذا خرج زيد والإمام الصادق موجود؟ الجواب هو أن الإمام الصادق جان يعرف بالنتائج، وجان مكلف بحفظ خط الإمامة، أما زيد فقام بتكليفه الشرعي في مواجهة الظلم، ولم يمنعه الإمام، بل كان خروجه مشروعاً. وعندما وصل خبر شهادته، بكى الإمام الصادق وقال: رحم الله عمي، كان رجلاً لدنيانا وآخرتنا، ومضى شهيداً كشهداء رسول الله وعلي والحسن والحسين. في الختام نسأل الله أن يرزقنا الثبات والبصيرة، ببركة الصلاة على محمد وآل محمد.

#محاضرة_قسوة_القلب_وعقوباتها بسم الله الرحمن الرحيم ﴿ثُمَّ قَسَتْ قُلُوبُكُم مِّن بَعْدِ ذَٰلِكَ فَهِيَ كَالْحِجَارَةِ أَوْ أَشَدُّ قَسْوَةً﴾ هذه الآية تبين حقيقة مخيفة أن القلب ممكن يوصل لمرحلة يصير أقسى من الحجر أخواتي الله عز وجل خلق الإنسان حتى يكون قلبه حي يحس ويتأثر ويخشع لكن شنو اللي يصير؟ بعض القلوب تموت وهي بعده بالجسد حي وتذكر النصوص أن مو كل العقوبات تكون في الآخرة أكو عقوبات دنيوية وأعظمها قسوة القلب خلينا ننتبه لهذي القضية الله عز وجل لما يُنسب له نقص الكون كله يتأثر ﴿تَكَادُ السَّمَاوَاتُ يَتَفَطَّرْنَ مِنْهُ وَتَنشَقُّ الْأَرْضُ وَتَخِرُّ الْجِبَالُ هَدًّا﴾ يعني مجرد كلمة أو عقيدة فاسدة تخلي السماوات تتفطر والجبال تتصدع ليش؟ حتى نعرف أن الأمور المعنوية أعظم من المادية الكلمة والفكرة والعقيدة تأثيرها أخطر من أي سلاح إذا الجبال وهي صخور تخضع لذكر الله ﴿لَوْ أَنزَلْنَا هَـٰذَا الْقُرْآنَ عَلَىٰ جَبَلٍ لَّرَأَيْتَهُ خَاشِعًا مُّتَصَدِّعًا مِّنْ خَشْيَةِ اللَّهِ﴾ فليش بعض القلوب ما تخشع؟ ليش الإنسان يقرأ القرآن وما يتأثر؟ ليش يسمع موعظة وما يتغير؟ ليش يحضر مجلس بس ما يبجي؟ هنا المشكلة القلب إذا قسى ما عاد يتفاعل لا يخشع ولا يلين القلب القاسي مو بس مشكلة هذا عقوبة الروايات تذكر أن من عقوبات الله للإنسان قسوة القلب. شلون تعرفين نفسج مبتليه بهذا؟ إذا تشوفين ما تتأثرين بالقرآن ما تحسين بخشوع ما يهمج حال الفقير ما تتحركين للخير هذا إنذار وأكو آثار واضحة لقسوة القلب أولاً ضيق في المعيشة ومو شرط الفقر يمكن يكون عندها كل شيء لكن ما عندها راحة ثانياً ضعف في العبادة مالها خلگ تصلي تتكاسل عن الصيام القرآن مهجور المجلس تحضره لتغيير الجو ثالثاً فقدان الإحساس ما تتفاعل ما ترحم ما تشعر وهنا السؤال الإنسان شنو يدور في حياته؟ الكل يبحث عن السعادة لكن السعادة وين؟ بالرحمة وبالعاطفة وبالإحساس والقلب القاسي ما يعرف السعادة حتى لو ملك الدنيا. تأملوا بهذا المعنى الإمام الصادق عليه السلام يبين أن المصيبة الحقيقية مو فقدان شخص إذا هذا الفقد قربك إلى الله أو أبعدك عن الذنب فهو رحمة أما إذا ما أثر بيج وما غيرج فالمصيبة الحقيقية هي قسوة القلب نشوف الموت يومياً ناس تُدفن وناس ترحل لكن بعض القلوب ما تتعظ وكأنها ما تشوف هذا مو طبيعي هذا أثر من آثار القسوة. هنا لازم نسأل نفسنا ليش القلب يقسى؟ من أهم الأسباب كثرة الكلام بلا فائدة الروايات تذكر أن كثرة الكلام بغير ذكر الله تقسي القلب الإنسان من الصبح لليل كلام سوالف ضحك لكن وين ذكر الله؟ وين الكلام اللي يحيي القلب؟ القلب مثل الأرض إذا ما يُسقى بالذكر ينشف ويقسى وفي الختام نسأل الله أن يلين قلوبنا ويجعلها خاشعة لذكره ويبعد عنا قسوة القلب ويرزقنا الاعتبار قبل فوات الأوان ببركة الصلاة على محمد وآل محمد.

#محاضرة_التواضع_ومحاسبة_النفس بسم الله الرحمن الرحيم ﴿وَقُلْ رَبِّ زِدْنِي عِلْمًا﴾ هذه الآية المباركة تفتح باب مهم لكل إنسانة أن الطريق إلى الله يبدأ من طلب العلم لكن مو أي علم. العلم اللي يقربك من الله ويصلح قلب المؤمن. إذا تريدين الله عز وجل يكلمج اقرئي القرآن القرآن مو كتاب عادي هذا كلام الله لما تقرينه الله جاي يخاطبج وجاي يكلمج بس أكو نوع ثاني من الكلام أخفى وأدق بعض الناس ما يلتفتون له اللي هي الإلهامات الأفكار الطيبة الدوافع للخير مرات تحسين فجأة سوي خير ساعدي فلانة استغفري صلي هذا مو صدفة هذا إلهام من الله.. أخواتي لو الإنسان ينتبه راح يشوف شكد هذه الإلهامات كثيرة بحياته بس المشكلة إحنا مرات نكون غافلين. إذا تريدين الله يلهمك أكثر تواضعي له اقتربي منه كل ما يكون الإنسان أتقى وأطهر قلبًا تصير معارفه أصفى وكلامه أصدق وحياته كلها تتغيّر. الله ما يختبرنا بس بالظاهر يختبرنا بالباطن أيضًا يمكن وحدة تبين للناس زينة بس داخلها مليان ذنوب وهذا خطر لأن الناس تشوف الظاهر بس الله يشوف القلب. وهنا نتعلم درس عظيم من نبي الله موسى عليه السلام موسى نبي عظيم من أولي العزم الله اصطفاه وكلمه لكن لما شاف شخص أعلم منه تواضع له وقال له أتبعك حتى تعلمني شوفي العظمة هنا نبي ويتواضع حتى يتعلم هذا درس إلنا وين ما تلكين علم تواضعي له وين ما تلكين معلمة احترميها لأن التواضع هو مفتاح العلم مو التكبر مو الإنسان يشوف نفسه فاهم كل شي تره هاي مصيبة بعض الناس تقرأ كم كتاب وتتصور صارت عالمة وتبدي تعترض وتنتقد هذا مو علم هذا غرور. وأكبر سبب للانحراف هو التكبر التكبر يخلي الإنسان ما يتعلم وما يعترف بخطأه وحتى إذا ما يعرف يستحي يكول ما أعرف مع أن الروايات تكول نصف العلم أن تقول "لا أعلم" الإنسان إذا ما رجع لأهل العلم الحقيقي راح يضل ويضل غيره ولهذا لازم نرجع للمصادر الصحيحة ولأهل الهداية مو كل واحد نحسبه عالم يكون عالم. نرجع لموضوعنا الأساسي محاسبة النفس الإنسان لازم يكون مراقب لنفسه محاسب لنفسه وإذا أخطأ يعاقب نفسه حتى تتربى لأن النفس إذا تُركت تتمرد لكن إذا انضبطت ترتقي وشوفي الفرق إنسانة متواضعة تتعلم وتسمع وتحاسب نفسها هاي ترتقي يوم بعد يوم وإنسانة متكبرة تشوف نفسها صح دائمًا وما تتعلم هاي تبتعد أكثر وأكثر وفي الختام نسأل الله أن يجعلنا من المتواضعات له ومن السامعات لكلامه ومن اللواتي يستجبن لإلهاماته ويرزقنا محاسبة النفس ويبعد عنا الغرور والتكبر ببركة الصلاة على محمد وآل محمد.

#محاضرة_محاسبة_النفس بسم الله الرحمن الرحيم ﴿وَقُلِ اعْمَلُوا فَسَيَرَى اللَّهُ عَمَلَكُمْ وَرَسُولُهُ وَالْمُؤْمِنُونَ﴾ هذه الآية المباركة تخلّي الإنسان ينتبه لحقيقة مهمّة... أن كل عمل محسوب وكل لحظة مرصودة وماكو شي يضيع. أكو ناس تعيش على الأماني تريد الجنّة بسهولة وتريد تنجو من النار بدون تعب بس الروايات تعبّر عن هذا الإنسان تعبير قوي أنّه "يتمنّى على الله الأماني" بدون عمل. هنا يجي السؤال المهم: إحنا شلون نحاسب نفسنا؟ الروايات تبيّن بصورة واضحة… أن الإنسان لازم كل يوم يرجع لنفسه مو يعيش يومه ويمشي بدون ما يدري شسوى. يعني إذا صار الليل… يرجع الإنسان لنفسه ويكول: هذا يوم مضى… وما راح يرجع أبدًا… وهو خطوة قربتني إلى قبري… والله راح يسألني عنه… هل أعمالي بهذا اليوم ترضي رب العالمين لو تغضبه؟ هل تقربني إلى الجنة لو تبعدني عنها؟ هل إمام زماني راضي عن أفعالي واقوالي بهذا اليوم هنا تبدأ المحاسبة الحقيقية يكعد الإنسان ويشوف نفسه: اليوم شسويت؟ شنو الحسنات؟ وشنو الأخطاء؟ منو فرّحت؟ ومنو ضايقت؟ ذكرت الله؟ لو غفلت؟ هل قضيت حاجة مؤمنة؟ لو جرحت إنسانة بكلمة؟ هل حفظت لساني؟ لو وقعت بالغيبة؟ الغيبة… خواتي… صارت اليوم منتشرة مو بس بالكلام حتى بالهاتف بالتعليقات بنقل الكلام وهي من أخطر الذنوب لأنها تكسر الإنسان وهو غايب. فإذا شافت نفسها سوت خير تحمد الله وتشكره… لأن هذا توفيق منه. وإذا شافت تقصير تستغفر بس مو استغفار لسان الاستغفار الحقيقي هو اللي وياه نية صادقة بعدم الرجوع. أما تقول "أستغفر الله" وهي ناوية ترجع لنفس الخطأ أو ما ندمانة بداخلها… هذا مو توبة حقيقية. الروايات تبيّن معنى دقيق أن كل ذنب يترك أثر بالقلب حتى لو تاب الإنسان يبقى له أثر خفيف. مثل الصبغ على القماش حتى لو ينغسل… يبقى لونه. فشلون ينمسح هذا الأثر؟ تنص الروايات على أمور عظيمة: 1. الإكثار من الصلاة على محمد وآل محمد… 2. تجديد الولاية لهم… 3. والابتعاد عن أعدائهم . لأن هذا يجدد العلاقة مع الله وينظّف القلب من آثار الذنوب. وأخواتي… علماء الأخلاق يذكرون خطوات حتى الإنسان يضبط نفسه: أولا يعاهد نفسه من الصبح: اليوم ما أعصي… اليوم ألتزم. ثانيا يراقب نفسه طول اليوم: هل التزم؟ لو أخالف؟ ثالثا يحاسب نفسه بالليل. رابعا إذا أخطأ… يعوّض: يصلي… يتصدق… يجبر النقص… حتى يربي نفسه وما يخليها تتمادى. ونرجع للآية: ﴿فَسَيَرَى اللَّهُ عَمَلَكُمْ﴾ يعني الإنسان مو وحده كل عمل ينشاف وهذا كافي يخلي الإنسان يستحي من ربه الإنسان اللي يحاسب نفسه يكون واعي منتبه أما اللي ما يحاسب نفسه يعيش غافل إلى أن يندم يوم ما ينفع الندم. وفي الختام نسأل الله أن يجعلنا من أهل اليقظة ومن الذين يحاسبون أنفسهم قبل أن يُحاسبوا ويرزقنا التوبة الصادقة ويبعدنا عن الغفلة ببركة الصلاة على محمد وآل محمد .