قناة استشهاد الامام الصادق (ع)

اليوم الصادق. تسعر ناره اتذكر عمته بحركت داره ويصيح اشلون النار امروعه ابنات الكرار تسعر ناره *** الصادق أمام الرافضه. ما تنكضي اهاته من شاف بيته محترك. اتذكر خيم عماته بيده يطفي النار اجه. وفوك الوجن دمعاته اتذكر بنات المصطفى. من صرخن ابنياته نفسه المحنه. ونفس الحيره بس فزعتله. اهله الغيره عكس الطف شوف اشصار امروعه ابنات الكرار تسعر ناره * رامي العمامه وينتحب. ودموعه ضل يجريها ويصيح زينب عمتي. حركو الخيمه اعليها بطفالها النار اسعرت. وما واحد ايطيفيها بذاك الوكت رادت علي. يحضرها ويحاميها بيوم العاشر. يا حيرتها زينب ضاعت. عكب اخوتها وحاطت بيها الأخطار. امروعه ابنات الكرار ** تذكر ذبح جده وبجه. المكطوع بالطف نحره سلبو حسين اعمامته. وبالخيل داسو صدره فوك الترب دمه يصب. والطبره فوك الطبره صاب المثلث جبدته. الحد ما طلع من ضهره امطشر صدره. وتجري دمومه وبالطف سلبو. حته اهدومه وهل حاله ازغار اكبار. امروعه ابنات الكرار ** الناس بالماي وعبيها. فزعت اطفي تره والإمام الصادق ايصد. والدمع عالخد جره اشلون صاح الها المخيم. ركضت اطفي مره بالطف الله ايعين زينب. فوك همها اميسره بحيره اتنادي. اشكد هظموني عباس اكعد. شوف امتوني ما ضلت عندي افكار امروعه ابنات الكرار ** جعفر الصادق يا خلك. غمض الليله عيونه والكاظم ايصيح بألم. اشتسوه الحيات بدونه حضرت احبابه وشيعته. راعي الوفه يشيعونه بعدك عله الدنيا العفه. يا سيدي اينادونه ما تتوصف. هاي الحاله ضلت تنحب. كل اعياله امصيبه وتحمل اسرار. امروعه ابنات الكرار * تمت تحسين الخفاجي

لاستشهاد الامام جعفر الصادق عليه السلام الروحه الرشيده   تبچي العقيده الدين   وحكمته   مفارگ عميده ★★★★★ رحل روح العقيده والمعارف حامي الدين معلوم  المواقف الچان على الخلگ والدين خايف مشه ايودعه الموالف والمخالف الثابت يقينه  اديار المدينه من بعده تنحب   ضلت حزينه ★★★★★ راح الصادق الصابر الطاهر عنه نقلت الناس المآثر مذهول الزمن مكسور حاير رحل نور العلم مهجة الباقر حكمه وتجارب   روح المناقب سيدها جعفر    وابن الاطايب ★★★★★ غزير المعرفه وبالعلم شامل ورع  زاهد ومعلوم الشمايل فل حيرة الحاير بالمسائل على دينه وعلومه مايجامل تبچي المعالم   امودعه عالم گبره تهدم     روح المكارم ★★★★★ والله يازمن بالجور حاكم گبره منهدم جيش الهواشم البقيع ولاكتر من عدها سالم بفتوى من نسل كافر وظالم وين المناير  فوگ المگابر رمز الكرامه  وروح المشاعر ★★★★★ ينحب منبره وموحش مكانه رحل نور المجد  تاج الديانه تقوى ومعرفه  وحكمه  وامانه تشهد بالفخر  ناسه وزمانه عزم واراده  زهد وعباده سيدنا جعفر  حكمه وقياده الشاعر حسن لعيبي الحريشاوي

لاستشهاد الامام جعفر الصادق عليه السلام بعلمك سيدي واثق أمامي جعفر الصادق ★★★★★ العلم يتصرف بأمرك بفخر كل عالم يذكرك اخذ من علمك وفكرك دومك بالعلم سابق ★★★★★ علمه وين اليناظر مذهول الفكر حاير رجع متندم وخاسر وي الفشل متوافق ★★★★★ سليل العلم والعصمه بدايه  اكتبت للحكمه ونهايه ارسمت للظلمه بفضل من ربك الخالق ★★★★★ عدوانك اليردونه بصبرك ماينالونه عزمك مايذلونه وخسر كلمن لفه ينافق ★★★★★ الهدم گبرك شوصفنه لئيم ويقصد الفتنه إله النيران واللعنه السابق يلعن اللاحق الشاعر حسن لعيبي الحريشاوي

لاستشهاد الامام جعفر الصادق عليه السلام (وزن تجليبه ) امامي جعفر الصادق امامي جعفر الصادق ★★★★★ سديد الراي دوم على الاذى صابر يدَلِّي التايه ابدنياه والحاير يمطر علم فكره عالم وذاكر قطب نور العلوم العارف الشاكر حكيم وبالعلم ناطق امامي جعفر الصادق ★★★★★ صافي الذات تمطر روحه حنيَّه حلو معشر  ومعشر صادق النيَّه من فكر النبي وروحه حسينيه بس هناك ضده احقاد بدريه عدها گلوب متوافق امامي جعفر الصادق ★★★★★ حكيم الراي طبعه وللخلگ ناصح ايدور اعذار للماله عذر واضح مثل جده يداري الناس ويسامح نسل طيبيين صالح من ظهر صالح دمعه بلعطف سابق امامي جعفر الصادق ★★★★★ دليل وعين للخوان بالشده للجافي بكلامه والنكر عهده غير الطيب والاحسان ماعنده عن أب  هلنهج ماخوذ عن جده وعن جبريل والخالق امامي جعفر الصادق ★★★★★ عظيم الراي قول ومعرفه وحكمه بكل موضوع يتصدر علم أسمه حَلَّال الشدائد لوتمر  أزمه هدايه سيرته ولجل الخلگ رحمه حكيم بمنهجه واثق امامي جعفر الصادق الشاعر حسن لعيبي الحريشاوي

لسان حال الامام الكاظم ينعى ابيه الامام جعفر الصادق عليهما السلام ينوح الكاظم ابوَنَّه خفيه ويتذكر الايام الزهيه يبويه يگول هدتني الرزيه ونوايا البين بعدك گصت بيه ضاگت دنيتي الوسعه عليه اجت تنشد عليك الجعفريه لگوها الدار من شخصك خليه شگلهم  يلرحت مابعد جيه ولفت ياسلوتي أعليك المنيه لحد الموت نيراني سريه وحزن چتال كل صبح ومسيه الشاعر حسن لعيبي الحريشاوي

بمناسبة استشهاد الامام جعفر الصادق عليه السلام ياسليل العلم مَحَّاي الجهل الناس ضربت للصدگ بسمك مثل ابد ماتحتاج منصب ياوجيه نَصبَّك ربك يبن خير العمل سيف علمك طَيَّح عروش الظلم ابسيف موكلمن طلع ينعد بطل اسمك الهز الطغاة بكل حزم والرعب حد العظم بيهم وصل بوجه كل طاغي صفه علمك رفض الماقبلته شلون عند الله انقبل هاي شمسك بدلوها بياشمس الگال غيرك افضل شلون استدل عن رداية حظهم الي اخروك اخروك اهل المصالح والفشل المعرفه يمك مداها ابلاحدود البحرقطرة بجرفك ويمكن اقل يلحديثك عن علي وعن الرسول النقل من جبريل عن الله نقل صعب عدهم وانته ماعندك صعب يشعر الي زاودك عنده الخلل شلون يتساوه الظلام وي الضوه شلون تنقاس الحفر وي الجبل علميت الوادم النهج الصحيح الناظروك تراجعوا واهل الجدل شرد اوصفك ياخلاصة كل نبي بدار جدك هبط جبريل ونزل ياكرم ياجود يافقه وبيان ياسلام وعاطفه ونور وامل دوروا فرصه غدر بالسم سگوك يبوالكاظم غدرتك أهل الحَيَّل الموت يامسموم منك يستحي شنهي انته الموت يلمنك خجل عَجَّلت علفوز مولاي ومشيت تدري درب الفوز يبدي من الاجل الشاعر حسن لعيبي الحريشاوي

لاستشهاد الامام الصادق عليه السلام نعَزَّي امام العصر وبحسره بذكرى شهادة ثامن العتره ونعزي الاعلام  واركان الاسلام بذكرى شهادة ثامن العترة ★★★★★ نعَزَّي الامام بگلب مفجوع خيط الفرح عن گلبه مگطوع نار الالم شبت بلضلوع ون الثكالى بصوت مسموع وبگلب محزون  هَمَّالَه العيون بذكرى شهادة ثامن العترة ★★★★★ نعَزَّي الامام العاش مهموم مفارگ أبدور الكون وانجوم كل ذكره منها گلبه ملچوم كلمايشوف الگبر مهدوم يشتم التراب  والدمع سچاب بذكرى ولادة  ثامن العترة ★★★★★ من البقيع الكربله ايروح يم الغريب المات مذبوح ويرد لامام الصادق اينوح جروح گامت تلچم اجروح للچبده مسموم امودع النوم بذكرى شهادة ثامن العترة ★★★★★ طَفَّه العيون البچي الماچان ايطَفَّي جمره ابنار الاحزان بالسم گضت انفاس الايمان غاب البدر من نسل عدنان ياطَلعَة النور  لو يون معذور بذكرى شهادة ثامن العترة ★★★★★ اهل الفتن غدروا بالإسلام بصادق العتره ونور الافهام يغَيَّرُون رادوا معنى الاحكام وتخفي الصدگ مأجوره  الأقلام نور البدر غاب   والجرح ماطاب بذكرى شهادة ثامن العترة الشاعر حسن لعيبي الحريشاوي

استشهاد الإمام جعفر الصادق عليه السلام وذكرى حرق داره من قبل حكام عصره على طور (لوطير ونيت معذور لباسم الكربلائي) يخفون - يازيف  - مكشوف مولاي – هلحال   - معروف دخان  - والنار - بالبيت       مهموم -  مولاي - ضليت راووك - عاشور  - واطفوف مولاي -  هلحال  - معروف ★★★★★ عدوان  -هلبيت  - وجوه  - بالنار خلوك – مهظوم -  للدوم _ اشرار ووجوه - صبيان  - ياصوب - تندار رضعان - نسوان  - يبچون -   بالدار طفيت هلنار يانور     هديت كل حال مذعور واطفال يبقون بالخوف مولاي هلحال معروف ★★★★★ ياحيف - اذناب - وتصير - اسياد علخير -  والطيب - يخفون -  احقاد جَلَّاد  - ملعون  -مذموم  -من راد لطفوف  - بالبيت -  هليوم -  تنعاد لطفوف تنعاد هليوم   وحسين من ماي محروم وعباس لاعين واچفوف مولاي هلحال معروف ★★★★★ من جيت – بلخير- للناس- معلوم بدروس - للدين - يدرون - معصوم يردون - اوثان – واصنام  -  للدوم والدين – مكسور – مخذول - مهظوم تشريع انطيت واحكام      وبنيت تاريخ واسلام وانطوك طعنات وسيوف مولاي هلحال معروف ★★★★★ يانور – ياخير -  للناس -  موجود محفوف- باخطار- حراس - وجنود للناس - تعليم - واحكام -  مقصود يردون – تنهار- وبحيل  -  مهدود اشرار يردون  مولاي    هلناس لادين لا راي شافوك للدين موصوف مولاي هلحال معروف ★★★★★ ابشوال - وبأيد  - انذال -  مسموم اغتالوك-  مولاي- وبيوم -  معلوم تنفيذ – اقوال  - سلطان —- مأثوم رادووك – للموت  -  وابقيت-   للدوم وبقيت للدوم نبراس    وبنيت احكام للناس يانور باخطار محفوف مولاي هلحال معروف الشاعر حسن لعيبي الحريشاوي

لاستشهاد الامام الصادق عليه السلام نعَزَّي امام العصر وبحسره بذكرى شهادة ثامن العتره ونعزي الاعلام  واركان الاسلام بذكرى شهادة ثامن العترة ★★★★★ نعَزَّي الامام بگلب مفجوع خيط الفرح عن گلبه مگطوع نار الالم شبت بلضلوع ون الثكالى بصوت مسموع وبگلب محزون  هَمَّالَه العيون بذكرى شهادة ثامن العترة ★★★★★ نعَزَّي الامام العاش مهموم مفارگ أبدور الكون وانجوم كل ذكره منها گلبه ملچوم كلمايشوف الگبر مهدوم يشتم التراب  والدمع سچاب بذكرى ولادة  ثامن العترة ★★★★★ من البقيع الكربله ايروح يم الغريب المات مذبوح ويرد لامام الصادق اينوح جروح گامت تلچم اجروح للچبده مسموم امودع النوم بذكرى شهادة ثامن العترة ★★★★★ طَفَّه العيون البچي الماچان ايطَفَّي جمره ابنار الاحزان بالسم گضت انفاس الايمان غاب البدر من نسل عدنان ياطَلعَة النور  لو يون معذور بذكرى شهادة ثامن العترة ★★★★★ اهل الفتن غدروا بالإسلام بصادق العتره ونور الافهام يغَيَّرُون رادوا معنى الاحكام مأجوره چانت عدهم  اقلام نور البدر غاب   والجرح ماطاب بذكرى شهادة ثامن العترة الشاعر حسن لعيبي الحريشاوي

ابوذيات لاستشهاد الإمام جعفر الصادق عليه السلام على عروش الهدايه الك منصب بغيابك دمعنه سيل منصب كل شيعي بگلب مجروح منصب بفگدك يبو الكاظم هلمسيه وجهك ياهلال العلم منهل هدايه ومعرفه للناس منهل الكاظم بالتراب اعليك منهل هَلَّت دمعته وَنَارَه سريَّه الشاعر حسن لعيبي الحريشاوي

مذهبنه بسمك مولاي يالصادق وبيه نفخر ٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪ حكنه  نتفاخر والفخر تارسنه جعفري المذهب وعلي ريسنه بسمك يبو الكاظم بده مجلسنه وهاليلية  ننعاك ابنوح ودم الدمع لمن خر ٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪ ياجعفر الصادق حرت بيش ارثيك واثق   انه   ياسيدي  واشعر بيك لحسين ابجو احس متريد اعليك جنك كلتها بلا صوت خلو الدمع للمنحر ٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪   ياجعفر   الصادق    يمن   جبدك   ذاب كربله   شخلت   بيك   وي  جرح  الباب شتنسى الحسن؟ لو علي وجرح المحراب باليوم الف مره تموت وماطاب جرحك يكبر ٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪ سيدي يالصادق اريد اذكر هاي ابحرك دارك  شذكرت  يامولاي عمتك تذكر طالعة امتيهه الراي اتذكرت زينب مولاي امخيمها لمن وجّر ٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪ شالوه نعشك مابكيت انت اطريح ومو بالرمح شالوه راسك واذبيح ماسبو اختك لا ولا شفت اطيح كلهن جرن ذن بحسين وضل منذبح وسط البر ٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪ ماارد  اكولن  يومك  اعلينه يهون لاجن مصاب العاشر امحير الكون هم شفت ميت بالعراء مامدفون هم شفت ميت مولاي خيل التسحكه وتعبر ٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪ هم  شفت  ميت  مابجو اهله اعليه من   فوك   ناكه   زينب  تودع  بيه ياسيدي بعض الحجي صعبه احجيه وبيك انفجعنه وننعاك ياسيدي ياجعفر ٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪ الشاعر  عباس محمد الحميداوي ليلة ٢٥ /١٤٤٧ هجري الثلاثاء 14 \4 \2026 ليلة استشهاد الإمام الصادق عليه السلام #ميمر #قصائد1447

١٢٤٧- مصاب الامام الصادق ــــــ صلوات الله عليه ــــــ عله الصادق دمعته من يراها الونّه بوسط صدره من يراها النــــار بداره شبت من يراها اکید اتذكّــــــــره بنار الزچیه ✍ فراس المحمداوي

٣٣٣- موشح في مصيبة الامام الصادق ــــــــــــ صلوات الله عليه ـــــــــــــ بخامس وعشرين من شوالها انفجعت الدنيا وتغيّر حالها ــــــــــــــــــــ سادس العتره الشريفه الطاهره الصادق العلمه نعش كل ذاكره شيعو جثمانه لحضان الثره وبني هاشم غاب سيد ارجالها ــــــــــــــــــــ وارث اعلوم النبي وحيدر علي وبالمعاجز مالي دنيانه ملي همومنه ابفگده بعد ماتنجلي وكل محب ارخه دمعته وسالها ــــــــــــــــــــ الغذّه افكار البشر بالمعرفه شلون ينسم وچبدته نازفه من قبلها حرگ داره ماكفه المن بني العباس تم اشعالها ــــــــــــــــــــ الليله ابو الكاظم يتيمه حوزته وعالنعش خلّو يويلي اعمامته اظلمت اجواء المدينه بغيبته والجنازه ينتحب شيّالها ــــــــــــــــــــ نعم شالو نعشه لگبور البقيع لچن مادامي ولا نحره گطيع ويلي عالظل منذبح بالطف صريع وعله جثته هناك تسفي ارمالها ــــــــــــــــــــ لا غريب ولا خضيب ولا سليب ولا اخت عنده تصيح امن يجيب ويلي عالشافت ابو اليمه تريب ومشت مسبيه ومحد يبرالها ــــــــــــــــــــ فراس المحمداوي ٢٥ شوال ١٤٤٧ هـ

ليش ولدج فاطمة المظلومة بالبقيع كَبورهم مهدومـه **** ليش هاي سنيــن هُمــه مهدمين وين عنهم يا بو صالح انته وين شوكت يا مولاي تخلص هالسنين يمتـــه فقـــارك نشــــوف علومـه ******* ليش مهدومــه ولا واحـــد يـزور ولليــروح هنـــاك ممنوع العبــور كلبك الطاهــر يمهدي شكَــد صبور ليــش منـــك شيعتـــك محرومــه ******* بـلا مُطالب سيدي الحـــكَ ما يـرد يالله يــــامولاي موكافـــي البُـــعد بالسكوت الظلـــم يحيـــى وينولـد وعالدمــــاء عقولـــهم مفطومـــة ********* ذوله عدهم عُقده من دين السماء هدمـــــو حتــى قبـــور الأنبيــــاء ماكو عدهم احلى من سفك الدماء هُمــــه حتى افكــــارهــم مسمومه ******** مَطلع ابياتي على الزهــرة الطهر لا ؟ظلـــع عدهـــا يمهدي منكسـر كَلــت خاف امَحچي اكثــر تنقهــر وهيـــه لســى منالظلع مالومــــه ******** والله الله يساعـــدك من هالوضــع يامن بكــــل المصـــــايب مِـــطلـع شلون كَلبــــك سيدي ما ينفجــع وانته كل جَــرة نفـس مهمومــــه ******* والله مو قصــدي اجرحــك بالعتب لچـن ما يخفيــك يالمهدي السـبب الخلو ابــاب امك الزهـــرة الحطب اليوم اجـــو يَـم زينـب المهظومــة ******** مـو حقـــد لا اكثــر واكثــر بعــــد هُمــه مـــا يردون كل شيعي ابــد لازم يذبحــــون حتــــى البالمـــهد مثـــل محســنكم يمهــدي ويومــه ******* هاي مـــو معناهــا نسكــت عالئآم عيــون حشد الله المقدس ما تنـــام تكَول عبــاس اوِكَف دون الخيـــام بالمراجـــــع رايتــــك ملزومـــــه ******* حيدر حسين الكرعاوي

سلامي لجعفر الصادق سلامي إمامي بلا كَبر لســـه إمامي وينك صاحب آلثار       عندك كل الأخبار ******** شكَد الله الجليـــل موصي بيهــا هــاي كَبــورهم عينـــه عليهـــا صـــار سنين تــدري مهدميهــا چا يمتــه يبــو صالـــح تجيهــا صابــر سيدي لــو ناسي ثـــآرك شكثر يبن الحسن طال أنتظــارك علينه شچم شمر جار     عندك كـــل الأخبـار ***** الحسن مظلــوم تـدري لهاالمسة  وعلى السجاد تحچي الغاضريــة مچتـوف بحبـــل مثــل السبيـــة زينـــب عمتـــه وأختـــه رقيـــة سيفك يمتـــه يالغاليـب تشيلــــة يمتـــه تفَــــرح عيــون العقيلـــة بكَلبها تســعر النــار       عندك كـــل الأخبـــار ***** الباقـــر ذاك مُظلــم تدري كَبــرهَ أكيـد تروح يَمــه وهَــم تحضره سيفــك سيــــدي محـــد يعــذرة جدك داست الخيـــل على صدرة ترَوَت من دِمه ظلوعة الحوافـــر غيرك سيـــدي ما عنـــده ناصــر لسه يريــد أنصــار       عندك كــل الأخبـــار ******* على الصــادق ننوح بكل الأعوام شما يكبــر صبرنه اطـــول الأيـام يبو صالــح أمشي عليـــك الأيتام الخذوها ميسرة يالمهدي للشــام لا تبعــد يمهـدي كـافــي فركَــــه على ساعة ونموت عليك حركَه غيابك مثله ما صــار      عندك كــل الأخبــار  ****** الصادق كــون كــل الدنيــا يمــه ليش كَبـورهم وَحشــة ومُظِلمـة الحشد لــو يمه من يكَــدر يهدمه أمس مو للمراقـــد أنطــــهَ دمـــه تعـــال اتجمعت كــــل السرايــــة لـــو باچــــر ترد هـــم السبايــــة ويظل حسين محتــار     عندك كــل الأخبـــار  ***** يمتــــه يبَيـــن هلالــــك علينـــه يالمحجوب يـــا جمعـــة تجينــه ميتيــن بغيـــابك تـــدري بينــــه بَچــي عبدالله ما تسمــع ونينــه السهم يبن الحسن لسـه بركَبته؟ نخاك هواي بالطف ما حضرتـه شكَد ذبحولك أزغـــار     عندك كــل الأخبـــار ****** يمهدي شمَــر علينه وانت غايـب شفنه أنـواع واشكــال المصــايب أبقيعَـك تلتقـــي يمتـــه الحبــــايب أخذ ويــاك من تمشــي المواكـــب رغم كــل ناصبي وسفيانــي حاقــد لازم تنبنــــي هــــــــاي المـــراقــد نمشــي ويــاك زوار       عندك كــل الأخبــــار  ****** حيدرحسين الكرعاوي

سبحان الله عـــــلاه ** الصادق ماكو فــــوكاه دنيه وأخـــره وياه ** أنه الجعــــفــــــــــــري ----------------------------------------------- 1= شكو بروحي يحـبه وأبقـــيعــاه تــرديــد المشاعـــر راسمله مــناره أبين العـــيون محبوب الضــــــماير شحلات الدمعه من توكع عالعزاز ترسملك مــــــــناضر توصلك للمديـــنه تـــشوف مأساة تــــــــــشبه يوم عاشر ---------------------------------------------------- تـلكه أرماد الخيام ** صابغ لون الأيــــــام ضل ياكلبي أنعـــــا ** أنه الجعــــــــــــــفري *********** 2= حـنين ومبــتسم للـما يحــــبــوه سامحهم خصومه لا سامحهم الله شلــــون عادوه مافهــموا علومه الصادق عن سمه الله قاب قوسين هالــوادم ضلومه لا زم عالــــــــــبرايه ينرفع تاج مو تــكثر همومه ---------------------------------------------------- صارت حضرته تراب ** ليش وشنهي الأسباب عـــمري بفضله غــطا ** أنه الجعـــــــــــــــفري 3= يعـكــوبــين أخلي بعـيني وبجــيه ولطمله أعله عيني وخلي سهام صدر حسين بعضاي ورخصله سنـــيني وجـــــع كلب العليله بكلبي أخليه ويسامــــــر حنيني ماجازي العلــومه ترست الكون والعلـــــــمني ديني --------------------------------------------------- قـطـره أبحر شتصــير ** الصادق أسس الخـــير عسل باللساني طـروا ** أنه الجعــــــــــــــــفري *********** 4= أمثـــل دور عابس وأشهر السيف بمعركة الخدامه يذريـــني العشك بســـيوف الأهات مـــاأسمع ملامه أشكــك جلد صدري بالعــــــــزيات ورسمهه العلامه حتا يصير وجهي أبيض بالحساب وأنـــسر بالقيامه -------------------------------------------------- الزهره تنادي ماجور ** يخادم أبني مشكور عالحك جدمـــي مــشا ** أنه الجعـــــــــــفري 5= حلم عـمري أشاهد أربـــع أكـــبور يزهن بالـــمدينه شرط حافـــي أزوره أركض هناك والزهره الحزينه أنويها صلاتــــي بصحنه تعجــــيل للمهـــدي يجـينه وأنام الليل نــــسمه بفــي ضوه الله أشـــــــتم بحنينه ------------------------------------------------ يكتب قـلمه جلــمات ** عــن فضل الزيارات عيوني تبوس عـــينا ** أنه الجعـــــــــــــفري *********** الخادم عبد الجليل المالكي

لاستشهاد الامام جعفر الصادق عليه السلام (وزن عگيلي ) گلوب الشيعه شگد حزنانه لجل  أمصابك يا مولانا ★★★★★ ثامن نور الشيعه اتودعه بالحسره أتودعه  وبالدمعه نزلت حتى املاك السبعه تون ظلت وتنوح ويانا لجل مصابك يا مولانا ★★★★★ بعد غيابك يا ابو الغيره گلوب الشيعه تعيش بحيره من كل دار وصوب  وديره تنحب بگلوب الذبلانه لجل مصابك يا مولانا ★★★★★ ينوح الدين وتبچي احكامه من فارگ  ثامن  اعلامه والتاريخ ابلوعه  أيامه الدين انهدمت چنها أركانه لجل  مصابك يا مولانا ★★★★★ صبح الدنيا اظلم بغيابه احبابه تنوح واصحابه اه على الصادق ومصابه بجمرات المدمع خلانه لجل مصابك يامولانا ★★★★★ ينعاك المجلس والمنبر والطالب بدروسك يحضر يا تاريخ الما يتكرر مهضومه الدنيا وحيرانه لاجل مصابك يا مولانا الشاعر حسن لعيبي الحريشاوي

لاستشهاد الامام جعفر الصادق عليه السلام السَلامُ عَلَيكَ  يبن خير الطاهرين السَلامُ عَليكَ يا عميد الصادقين ★★★★★ الك يلصادق سلامي يا وجيهي ويا امامي بأسمك أتعَطَّر كلامي  وعالي بالدنيا مقامي السلام عليك يا منار المسلمين السلام عليك يا عميد الصادقين ★★★★★ عندك اسباب السعاده لونلت يوم الشهاده علمك وفكرك قياده   مثل احكام  العباده السلام عليك ايها الدر الثمين السلام عليك يا عميد الصادقين ★★★★★ روحي حَنَّت للزياره الگبرك الما بيه اشاره وماكو لوحه ولا عباره   ولا ضريح ولا مناره السلام عليك ايَّها النور المبين السلام عليك يا عميد الصادقين ★★★★★ عشت يا روح العداله   بحكم متهزك اهواله حكم مرواني الجهاله وحكم عباسي الضلاله السلام عليك يا لسان الناطقين السلام عليك يا عميد الصادقين ★★★★★ وَضحَّت كلمن اسلافه وشكل جهله وانحرافه الجاحد وباطله أوصافه وعنهم بعيد الخلافه السلام عليك يا زعيم الصالحين السلام عليك يا عميد الصادقين الشاعر حسن لعيبي الحريشاوي

لاستشهاد الإمام جعفر الصادق عليه السلام. (گعدية ) تشفي العليل وانته ملچوم. مظلوم يابوالرحمه مظلوم بوكت الصدگ حسره على الناس صادق بقول وفعل وإحساس مظلوم يابوالرحمه مظلوم ★★★★★★ قَدِّمَت لله حياتك. ماخفت من قدمتها ولاخفت من لوم لايم. والمناهج ثبتتها ماتجامل هذا طبعك. أشگد مواقف صادفتها من الجهاله والخطر أنقذت مولاي البشر چن موسى من شگ البحر. الناس بيدك عَبْرَتَّهَا حُكَّام عصرك گامت اتخاف آلاف عندك درست آلاف من مثلك ومن بيك ينقاس صادق بقول وفعل وإحساس مظلوم يابوالرحمه مظلوم ★★★★★ مرحله صعبه وخطيره صعبه ذيچ شلون فتره بلاهدايه الناس تمشي . وحاير الإنسان بامره جاهدت وبعزم ثابت. واسست بالعلم ثوره شمختلف صاحب مدرسه مانكر. ياهو الدَّرِسَه كل الفضل محد نسه. الك ياصادق العتره تصديت للشر مثل الحسين ليفوگ رافع هامة الدين معروف مثل البطل عباس صادق بقول وفعل وإحساس مظلوم يابوالرحمه مظلوم ★★★★★ ياامير العلم تدري. وتشهد بهذا المنابر دَوَّن التاريخ علمك. خطت مداد المحابر والنكَّر فضلك اتحَيَّر تظهر اگباله المصادر محبوب مهيوب الذكر فقه وتعاليم وفكر ونطيت للناس شكثر. يلخذت كل المشاعر يمعلم التوحيد معناه ومعنى الاسلام وكل مزاياه للدين تبقه دوم نبراس. صادق بقول وفعل وإحساس مظلوم يابوالرحمه مظلوم ★★★★★ تحت علمه نطوت كلها. وصار للكل مرجعيه تشهد بفضله المذاهب. حنبليه وشافعيه اسئلوني گال جعفر. مثل حماي الحميه ماتظل شده ومعضله جاوب على كل مسئله كل العلوم تعود اله. من منابع احمديه يفَصَّل بشرحه حكم الآيات وهذا الكتاب شبيه. غايات معلوم يامن ثبت الساس صادق بقول وفعل وإحساس مظلوم يابوالرحمه مظلوم الشاعر حسن لعيبي الحربشاوي

‏شهادة الامام الصادق عليه السلام ‏#ميمر ‏ نورك عبر        شمس وگمر     بكل معرفة عندك اثر ‏يا صادق آل المختار بيك الفخر يتباها ‏ ‏~~•••••~~~~ ‏ ‏اعلومك الك رب العرش     منزلها ‏وصدرك صبح يبن الطهر     منزلها ‏الرايه الك واحنا الجدم       منزلها ‏ ‏عن عتبتك       واحجايتك         واتضل ترفرف رايتك ‏الها نضحي الارواح راية فخر شفناها ‏ ‏~~•••••~~~~ ‏ ‏من جاهك ومن شيمتك     جاه الكون ‏الما أخذ من علمك علم      جاهل كان ‏والما يحبك بالحشر          جا  هلكان ‏ ‏يوم الحشر    يوم النشر     بيه اليحبكم ينتصر ‏بالمحشر الما تحتار بس الصرت مولاها ‏ ‏~~•••••~~~~ ‏ ‏جعفر الصادق نور حيدر      نوره ‏ماتوصل اليهواه ربك           نوره ‏شمس الحقيقة والهدايه      نوره ‏ ‏اوتاد الارض    حبهم فرض      والما يحبهم ينرفض ‏عترة محمد ربحان بالمحشر الوالاها ‏ ‏~~•••••~~~~ ‏ ‏صادق العترة وللخلگ      عالمها ‏واهل العلم والمعرفه       عالمها ‏دنياك يا وسفه جفت       عالمها ‏ ‏شالت حقد    ما منوجد      تالي وصل سم الچبد ‏وهذا الجرح ضل ملچوم حد ما يرف الواها ‏ ‏~~•••••~~~~ ‏ ‏انت الامام المفترض       والقربه ‏وكلمن تولاه ما خسر      والقر به ‏روحن تحن لزيارته         والقربه ‏ ‏گبره انهدم    ما بيه علم      وسفة وحرامات وألم ‏ما بيه ضوى الهذا اليوم وهوه الارض ضواها ‏ ‏~~•••••~~~~ ‏ ‏بسمه تسمينه ويرف.     لاوانه ‏ومحد گدر طول الدهر   لاوانه ‏لا حسره تنفع لا الم       لا ونه ‏ ‏وكت العزم     تطلع زلم      لا تنكسر لا تنهزم ‏شيعة علي غيره وزود يتورط العادها ‏ ‏~~•••••~~~~ ‏ ‏شيعتك والزود انعرف       منعدها ‏اكرام دوم ومنعرف من عدها ‏اليرجف گلبها اعلى الزلم    منعدها ‏ ‏ابوجه اليضد نوگف حشد نكسر خشم لمن نهد ‏والشاهد بهالايام اخشوم اشكثر دسناها ‏ ‏~~•••••~~~~ ‏ ‏✍️ الخادم فراس موحان الساعدي ‏