ئەیووبی

هەموومان دەزانین موددێکە موسڵمانانی سوودان لە برسێتی و ناڕەحەتی و مەینەتییەکی قورسدان. دەی گەر ئێمە تەنها قسەمان لەسەر غەززە هەبێت و، تەنها و تەنها شین بۆ ئەوێ بگێڕین، دیارە ڕاستگۆ نەبووین لە هەموو ئەو بانگەشانەی گێڕامانن، لە باسی (ئوممەتیبوون) و (هەستکردن بە ئازاری ئەندامەکانی تری جەستەی ئوممەت)! وەکچۆن کوردێکی موسڵمانی هاونیشتمانیم برامە، بە هەمان شێوەیش موسڵمانێکی سوودانی و غەززاویش برامانە؛ ناڕەحەت دەبین بە ئازارەکانیان، بە دڵخۆشییان شاد دەبین. #بێدەنگیت_نەنگییە_بەرانبەر_هەستی_ئیمانیت !!

🤔سودان کاتێک ئیمان دەبێتە تاكه‌ پەناگە

🤔سودان کاتێک ئیمان دەبێتە تاكه‌ پەناگە

هەر بەڕاست، ئێمە (ئوممەتی)ـین؟ با هەرگیز بیرمان نەچێتەوە؛ ئەگەر جەنگی غەززەیش بە کۆتا گەیشتبێ و ناسۆرییەکانی ئەوێ وردە وردە سووک ببێت بە پشتیوانیی خودا… بەڵام بەخەمەوەبوونی موسڵمانان و بەدەنگەوەهاتنیان قەت قەت کۆتایی نایەت! بێگومان هەڵوێستوەرگرتنی مرۆڤی موسڵمان وەک هەوری هاوینان و تراویلکەی بیابانان نییە؛ وەختێ لێی نزیک بیتەوە ئیشت پێی بێت، وەک گوێزی پووت کاکڵەکەی بەتاڵ بێت! ڕاستە نزیکەی دووساڵ بوو لای ئێمە باس باسی غەززە بوو، تا ڕاددەیەک (ئێمەی موسڵمانانی کورد) بە قسە و گوفتار ئەوەندەی لە توانای کرچوکاڵی ئێمەدا بووبێ هەڵوێستمان وەرگرت… وەلێ لێرە بەدواوە هەر موسڵمانێک لە سوودان، پارچەکانی تری کوردستان یان لە تورکمانستان و ئەفغانستان لە ناڕەحەتی و مەینەتیدا بن، ئێمە وەک غەززە خەممانن، چونکە پێوەری خەمخۆری لەلای ئێمە تەنها (موسڵمانێتی)ـییە و هیچی تر! گەر قەرار وابێت بمانەوێ پڕبەپێست (ئوممەتی) بین، دەبێ هەڵوێست و خەمخۆرییەکانمان کاریگەر نەبن بە (ترێند)ـەکانەوە، بەڵکو مرۆڤی موسڵمان دەبێ هۆشیاری و ئاگایی خۆی بیجووڵێنێت.

لێرە بەدواوە پڕۆژەی ئەیووبی کۆکردنەوەی هاوکاری بۆ موسڵمانانی غەززە ڕادەگرێت، هەر کەسێک ئارەزووی بەردەوامیدان بە بەخشینی هەیە لەپێناو دووبارە ژیاندنەوەی لێقەوماوانی غەززە، دەتوانن لەڕێگەی دەستە ئەمینەکانی تری ناو کوردستانەوە هاوکارییەکانتان بگەیەنن، وەک ڕێکخراوەکانی: (دەستی هاوکاری، بەختەوەری، بەخشین، ڕابیتە، زاد).

سوپاس بۆ خوای میهرەبان و دڵاوا، لێرەوە ڕایدەگەیەنین ئاماری کۆی یارمەتییەکانی کوردستانییان بۆ خەڵکی غەززە لە ڕێگەی پڕۆژەی ئەیووبییەوە، گەیشت بە «٢٨ ملیۆن و ٢٠٧ هەزار دینار». خوای پەروەردگار پاداشتی بەخێری هەر کوردێکی خاوەن هەڵويست و خەمخۆر بداتەوە، کە قەبووڵی نەبوو ناوی وەک کەسانێکی بێ ڕوحم و بێویژدان لە مێژوودا بنووسرێتەوە و، بەبێدەنگی بە دیار برسێتی و تینوێتیی لێقەوماوانەوە دابنیشێت. #ئەیووبی_بۆ_غەززە

"لەشین و شیوەنی یاران سەرم سوڕماوە ئەی یاران لەکوێییە شای وەفاداران؟ کەدنیا بۆتە بتخانە"

لە ساڵیادی شەهیدبوونی (یەحیا سینوار)دا، دەڵێین: ئەوەی ئێمە بە (تیۆری) ڕۆژانە بەگوێی یەکتریدا دەدەین و باسی لێوە دەکەین و شەڕی لەسەر دەکەین، ئەوان بێدەنگ بوون و بە (کردەیی) ئەنجامیان دا. لە سەردەمێکدا کە قسەی گەورە و قەبە کەڵاشە دەکات، تینووی ئەم ڕاستگۆییانەین، تینووی ئەم کردارە بێ گوفتار و بێ دەرکەوتنانەین... وَلِلْـحُرِّيَّةِ الحَمْراءِ بابٌ بِكُلِّ يَدٍ مُضَرَّجَةٍ يُدَقُّ

دەستەی بنیاتنانەوە لە نەتەوە یەکگرتووەکان: پێشبینی دەکرێت تێچووی بنیاتنانەوەی غەززە بگاتە ٧٠ ملیار دۆلار. من دەڵێم: سوپاس بۆ خوا، ئەو بڕە ناکاتە هیچ بۆ سەرکردەکانمان، لەکاتێکدا کە تڕەمپ هات بۆ لایان گیرفانیان پڕ کرد لە پارە و، دیاریی زەخم و گرانبەهایان پێ دا بەبڕی هەزاران ملیار دۆلار. دەی بەشکم بەرد بگرنە ناحەزانیان و، بەو ٧٠ ملیار دۆلارە ئەو ڕووە ڕەشداگەڕاوەی خۆیان پاک بکەنەوە، کە بە تریلیۆنان دۆلار پیسیان کردبوو! د. موحەمەد ئیلهامی

ئاڵای کوردستان لەناو ئاپۆڕای جەماوەری لە غەززە دەشەکێتەوە! ئێستا هەموو گەلانی موسڵمان باش دەزانن ئێمەی کورد ئەندامێکی چەندە گرانبەهاین لە جەستەی ئوممەت و، بەبێ بەشداریی کورد سەروەریی موسڵمانان زۆر زەحمەت دەبێت. بەتایبەتییش لەکاتی لێقەومان و ناسۆریی خەڵکی غەززە، کە ئەم هەڵمەتە خێرخوازییە بەرفراوان و بێوێنانە لە کوردستانەوە بۆ غەززە نێردران، ئەمە زیاتر دووپات کرایەوە "کورد" تا چ ئاستێک خۆی بە بەرپرسیار دەزانێ بەرانبەر "ئیسلامەتی"...!

لە هێرش و پەلامارەکانی دوژمن بۆسەر پەیامنێر و ڕۆژنامەنووسانی غەززە لەماوەی ئەم دوو ساڵەی جەنگدا، چاک بۆمان دەردەکەوێ (جەنگی ڕاگەیاندن) چەندە گرنگە! کپکردنی دەنگی گواستنەوەی ڕووی ڕاستیی ڕووداو و بابەتەکان ئامانجێکی جەوهەریی دوژمنانی ئیسلام و موسڵمانانە؛ نەک بەتەنها لە غەززە بەڵکو لە هەموو جێگە و شوێنێکدا، نە تەنها لەباسی سیاسەت و جەنگ، بەڵکو لە هەموو بوارێکدا... ئەمڕۆ بە شەهیدکردنی (ساڵح جەعفەراوی) ئاماری ڕۆژنامەنووسە شەهیدکراوەکانی غەززە بەدرێژایی ئەم دوو ساڵە گەیشت بە ٢٥٥ شەهید. جێگەت فیردەوس بێت کوڕە ڕووخۆش و لەدڵاشیرینەکە...

دەبێ ئەمڕۆ دڵی ئەوانە چەندە ئاسوودە و حەساوە بێت کە لەماوەی ئەم دوو ساڵەی شەڕ لەناوجەرگەی کوردستانەوە دەستی هاوکاری و یارمەتیدانیان گەیاندە غەززە...؟! ئەگەرچی بە بەخشینی کەمترین شتیش بووبێت. وێنەی هاوپێچ: دیمەنی دوێنێی دابەشکردنی ئاو لەدرێژەی هەڵمەتەکەی ئەیووبی.

‌الْحَمْدُلِلّٰه الْحَمْدُلِلّٰه الْحَمْدُلِلّٰه دوای دوو ساڵ و دوو ڕۆژ لە جەنگ و پەلاماری دڕندانە و، کۆڵێک مەینەتی و زەحمەتکێشان لەسەر گەلی ستەمدیدەی غەززە؛ ئێستا بەفەرمی ئاگربەست ڕاگەیەندرا. ئەم هەواڵە مژدەی خۆشییە بۆ خەڵکی غەززەی لێقەوماو و برسیکراو... خوای گەورە بەخێری بگێڕێ و لە مەسڵەحەتی موسڵمانان بەکۆتای بگەیەنێت.

ئەمڕۆ جەنگی غەززە پێی نایە دووەم ساڵیەوە. مرۆڤ کە بیر لەوە دەکاتەوە ئەم گەلە ستەمدیدەیە ماوەی دوو ساڵە هەزاران دیمەنی لەم جۆرەیان لە پەڕاوەکانی مێژوو تۆمار کردووە، هەموو گیانی شەرم دایدەگرێ و لە حەژمەتان زاتی ئەوە ناکات نوقەیەک دەرببڕێت؛ چونکە لەمێژوو ئاوا ناومان دەنووسرێتەوە: "تاقمێکی دوو ملیۆنی لە موسڵمانان کەوتبوونە بەر شاڵاوی قاتوقڕی و جینۆساید و پەلاماری دڕندانەی دوژمنان، کەچی موسڵمانانی دەوروبەریان هەوڵێکی وایان نەدا بۆ ڕزگارکردنیان کە شایستە بە باس بێت!"… #ئەیووبی_بۆ_غەززە

حاسڵی مەسەلەی (تۆفان) پاش دوو ساڵ بەم شێوەیە بوو: ١-تائیفەیەکی کەم لە ئیمانداران لەئەکنافی بیت المقدس، رباط و جیهادی فەڕزی خۆیان کرد. بەخوێن و  ماڵ و مناڵی خۆیان، هەروەک چۆن سەحابەی کیڕام ماڵ و خوێن و مناڵی خۆیان دانا (تەنها مونافیقانیش ڕەخنەیان لێ ئەگرتن کە بۆچی جەوی خۆتان تێک دا). جا ئەو تائیفەیە لە موجاهیدان "ئاخیرەتیان بردەوە و دونیایان دۆڕاند." ۲-ماباقی ئوممەتی ئیسلامیش بە حاکم و شەعبەکانەوە -إلا قليلا- سەلامەت بووین، "دنیامان بردەوە بەڵام لەڕووی ئاخیرەت و پیاوەتیەوە کەوتین". گەر ئوممەتانی زەوی مونافەسە بکەن (زەلیلترین جیلی خۆیان) بهێنن، ئوممەتی ئیسلام ئەم جیلەی ئێمە دەبات و بێ مونافس یەکەم دەبین! زۆر جار لەدڵەوە هەست ئەکەم باسی ئەم بابەتە لەگەڵ ئەبوجەهل زۆر ئاسانترە -لەڕووی مروئەت و پیاوەتی- تاکو ئەم جیلەی ئێستا بەگشتی؛ هیچ نەبێ ئەبو جەهل و ئافرەتێکی ڕووتی ئەوروپی شتانێک لە مڕووئەت و هەستی نەجدەیان تێدایە و لێک تێ ئەگەیشتن لەسەر بنەمای مڕووئەت و پیاوەتی… بەڵام زۆرینەی خاوەن سوڵتە و پێگە گەورەکانی ئەم جیلەی ئوممەت هیچ مەجالێک نابینمەوە لێک تێ بگەین. خۆڵاسە: دونیامان بردەوە و ئاخیرەتیان بردەوە، پیرۆزی هەموولایەک بێت. م. ڕەوەند

ڕەببی مووی لێ بێ زمانی، پەنجەکانی هەڵوەرێ هەرکەسێ گوڵشەن بە دەردی کوڵخەنی دۆزەخ بەرێ! ئەمڕۆ ئەم دوو وێنە جەرگبڕەیان بۆ ناردین لەغەززەوە لەکاتی دابەشکردنی ئاو. هەردوو منداڵەکە لەتاو قورسیی دەبەی ئاوەکەی دەستیان، خستوویانە سەر شانیان و پێیان هەڵناگیرێ! خوای گەورە هەموو ئەو فیرعەونانە بە عەرزدا بباتە ژوور کە ئێوەیان بەم مەینەتییە گەیاندووە...

هەرچەندە لەدنیادا ئاوا بە چاوی سەر کاریگەریی بەخشینی ماڵ و سامانمان دەبینینەوە، بەڵام پێغەمبەری خواﷺ دەفەرموێت: ((ما نَقَصَ مالٌ مِنْ صَدَقَةٍ)) واتا ماڵی دنیامان هەرگیز بە بەخشین کەم ناکات، هەرچەندیش ببەخشین خوای گەورە بۆمان قەرەبوو دەکاتەوە. ئەی لە قیامەت چۆن سوود لە چاکەکانمان دەبینین؟! بۆ ئەمەیشیان سەروەرمانﷺ وەڵاممان دەداتەوە: ((كُلُّ امرِئٍ في ظِلِّ صَدَقَتِهِ حَّتى يُقْضى بَيْنَ النّاسِ)) هەموو مرۆڤێک لەژێر سێبەری چاکەکانیدا دەبێت، تاوەکو چارەنووسی دیاری دەکرێت کە بەرەو بەهەشت یان جەهەننەم دەڕوات. دڵنیا بن؛ هەرگیز چاکە بێ دەرئەنجام نابێت. #سەرداری_بەخشین_ﷺ #هەڵمەتی_ئاو_بۆ_غەززە #ئەیووبی_بۆ_غەززە

وەک چۆن بەرهەمی بەخشینەکانتان لە دنیادا بەبەرچاوی خۆتانەوە دەبیننەوە، یاڕەبی لە بەهەشتی پڕ لە ناز و پڕ لە نیعمەتیشدا بەرهەمەکەی بخۆنەوە. لە تەرازوی چاکەکانتان ببێتە شاخێک لە قورسیدا و، لە قیامەتدا ڕێنوێنتان بێت بەرەو بەهەشت. #ئەیووبی_بۆ_غەززە