🎀 𝐵𝒶𝒸 𝟤🌸𝟤6 🎀

السلام عليكم ✨️ غدا إن شاء الله تقدروا تديرو تحويل إما داخلي يعني فنفس الجامعة و الولاية او خارجي يعني فولاية آخرى ولا جامعة أخرى يمدولكم قائمة تخصصات و تخيروا لي حبيتوه و بإذن الله كامل يقبلوكم اذا لحقتوا للمعدل 💗💗🫶🏼 بصح خمموا اذا صح حابين تبدلو ولا لا بسك هذي الفرصة الأخيرة راح يباونولكم بزاف تخصصات منها طب أسنان ،صيدلة، إعلام آلي ،طب ،لغات تخصصات مزدوجة...و حتى المدرسة العليا للأساتذة التخصصات لي ممكن مراحش تظهرلكم هي المدارس العليا الاخرى بصح إذا كان معدلكم قريب لمعدات القبول لهذه السنة تقدروا تروحوا للمدرسة قبل الدخول الجامعي و تجربوا تبدلوا ممكن يقبولكم بيسك بزاف طلبة يروحو للخارج و لا يبدلو تخصصهم سما يخلو بلايصهم 🙌🏼

جماعة كاين بزاف منكم راح يقراو تخصص تقني لذلك حبيت نسقسيكم اذا تعرفو واش هو الحاسوب pc المليح لطالب راح يقرا سنة أولى إعلام ألي ( يشدلو على الاقل السنوات الأولى و يكون بمبلغ 6-9 ملاين و يساعدو فقرايتو ) ولا إذا تعرفو باج فالانستا يبيعو بكاليتي مليحة بعثولي اللينك شكرا مسبقا 🫶🏼💗

و آخر حاجة و أهم حاجة بالنسبة ليا هي ما تحشموش على حاجة ما لازمش تحشم فيها ✨️ مثلا تسقسي الأستاذ كي ما تفهمش حاجة ،تسقسي فالادارة اذا عندك مشكل ،تسقسي طلاب عندهم خبرة كثر منك ...عادي مكان حتى إحراج دير في بالك راك تتعلم و من الطبيعي يكون عندك أسئلة 💗💗🫶🏼 حتى خارج الجامعة مثلا فالبلدية...مهما كان "سقسي" لأنك راح تضيع بزاف فرص لو كان تبقى تحشم نهدر على الخجل وليس الحياء

3-فالجامعة الأصدقاء لي تديرهم فاللول هوما لي راح يأثروا عليكم فكامل العام الدراسي يعني اذا تبعت ناس لي تحب تقرا ،ناس لي عندها أهداف ،لي تحب تطور نفسها، في نفس الوقت يضحكو ،يقسرو.. المهم ✨️الناس الإيجابية✨️ لا إداريا راح تولي كيفهم و تجيب نقاط مليحة بصح إذا تبعت لي ما يقراوش و نهار كامل يشكو و يندبو و من اول حصة يقولك انا نعاود ما فيهاش... صدقوني هاذ الناس السلبية يأثروا عليكم بطريقة ما تقدروش تتصوروها منبعد فالأخير تلقاه مطلع عامو و نت ما طلعتش و قتلك بالسلبية برك🥲 لذلك اذا تلقاو إنسان حياتو كامل يشكي اهرب بعيد 😂

2-في الايام الأولى (الشهر الاول خاصة) ممكن يجيكم شوية صعيب •من ناحية التخصص لانه الدروس تكون نوعا ما طويلة مقارنة بالليسي، لغة جديدة ،قلة مصادر الدراسة... •و أيضا من ناحية نمط الحياة خاصة إذا درتو الإقامة و تتلاقاو بناس جديدة...و هذي حاجة عادية جدا جدا و كامل مرينا منها 💕 الأهم هو عدم الاستسلام مشي اي حاجة تصرالك تقول انا ما نقدرش انا ما نطلعش العام... -حاولوا تقراو من اللول ما تاجلوش الدروس خاصة فبعض التخصصات لي فيها ضغط مثلا طب ،طب أسنان ،صيدلة، مدراس عليا ، تخصصات ing -أيضا تسقسو الطلاب لي يقراو فالسنوات المتقدمة يعاونوكم بزاااف على طرق الدراسة ..و أيضا تديرو أصدقاء (يا لو كان واحد ولا زوج يكفو) باش تسقسوهم على الدروس ولا اذا عندكم مشكل...بالمختصر باش ما تكونوش خارج مجال التغطية 😂 يعني الفترة الأولى برك لي تجيكم شوية صعيبة بصح منبعد تولو توالفوا و تحبوا التخصص تاعكم و يعجبكم الحال 💗💗

بما انه اليوم الاغلبية تكونو سجلتو و تعتبرون دوك طلاب جامعين ،راح نمدلكم نصائح مهمة لي ممكن تمنيت لو كان عرفتها قبل ما ندخل للجامعة🫶🏼💗💗: 1-كي تدخلو تقراو اول حاجة تلاحظوها هي غياب المراقبين اللي دايما مهبلينكم فالليسي😂 والأساتذة لي يقروك ما يهمهمش اذا دخلت تقرا عندو و لا حليت التمارين .. و حتى الوالدين ما يبقاوش يتبعوكم كيما فالليسي و يسقسو على النقاط... هذي تبانلكم حاجة إيجابية بصح هي سلبية أكثر ✨️ لأنك تلقى روحك نت لي تقرر اذا حاب تقرا أو لا...لذلك لازم تبقى تحفز روحك بروحك و تحاول تلقى طريقة مناسبة للدراسة و تجيب نقاط مليحة و أهم حاجة ما تنساش هدفك من الجامعة🫶🏼

https://youtu.be/f7cM9ZLTF7A?si=EyDMIL4TgNZTPBjM

بداية التسجيلات في مسابقة شبه طبي مساعد تمريض للراسبين من 7 أوت حتى 28 أوت💗

-شريك الغرفة : •إذا عندك شخص تعرفوه راح يقرا فنفس الجامعة ولا المدرسة حاولو تتافقو و تديرو إقامة مع بعض (يعني فاليوم الأول كي يفتحوا الإقامات و يبداو يوزعوا الغرف و التسجيلات روحوا لإقامة بدلوا و ديرو غرفة كيفكيف) •إذا ما تعرفوش الشخص لي راح تديرو معاه الإقامة حاولوا من اليوم الأول تتفاهموا على تقسيم الغرفة و تنظموا أموركم مثلا وقتاش تنوضوا و وقتاش ترقدوا و أيضا الأكل إذا تطيبوا و تاكلوا كيفكيف ولا كل واحد وحدو و الأشياء الشخصية كيما فرشاة الأسنان. المناشف ...ما تشاركوهمش ممكن يكون مريض ولا و ينتقل المرض لا قدر الله المهم و الأهم أنه يكون الاحترام و التفاهم بيناتكم هذا هو الأساس💗 و حاجة مهمة ما تنساوهاش بلي صديق الغرفة مش واحد من عائلتك ولا.. ما تروحش تحكيلوا حياتك و مشاكلك العائلية ولا اي حاجة تخصك ✨️

-الإقامة 🙌🏼 لي يسكنوا بعاد على الجامعة أو فولاية آخرى فأكيد راح تديرو الإقامة لأنكم ما تقدروش تروحو و تجوا كل يوم ولا كل أسبوع خاصة كي يبداو الدروس و يقربو الامتحانات .. المهم علابلكم بلي الإقامات الجامعية ليست أفضل مكان للعيش و مش كيما داركم 😂 بصح مقبولة عادي تقدروا تنظمو الغرفة تاعكم و ترتبوها باش تقدروا توالفوها💕 راح تلقاو فالغرفة سريرين و طاولتين مع زوج بلاكارات برك (ليك مع شريك الغرفة تاعك ماعدا فالقطب عندهم غرف فردية) لذلك كي تجوا تسجلوا و يمدولكم المفتاح جيبو معاكم حوايجكم و أي حاجة تخصكم🫶🏼 المهم تقدروا تشوفو فالفايسبوك صور للإقامة تاعكم باش تكون عندكم فكرة أوضح

رزنامة التسجيلات الجامعية 💗💗+ ما تنساوش تحلو compte ccp

بالنسبة لي راهم يسقسو اذا نقدر نبدل تخصص و وقتاش نبدل.. دوك راح تديرو تسجيلاتكم الجامعية بشكل عادي في التخصص الذي تم توجيهكم اليه منبعد كي يفتح الموقع الخاص بالتحويلات الجامعية تقدرو تديرو تحويل (ابتداءا من 19 أوت) يجب توفر شرطين أولا انك تكون لحقت لمعدل القبول لهذه السنة و ثانيا ان تتوفر مقاعد شاغرة في التخصص مثلا المدارس العليا عندهم عدد مقاعد محدد لذلك مراحش يبانولكم في الموقع و ما تقدروش تبدلو ليهم (بصح يمكن تديرو طلب خطي و تروحو للمدرسة قبل الدخول المدرسي يعني قبل 13 سبتمبر )💗

ما تنساوش تديرو تأكيد الرغبات 💗✨️

ما تنساوش بعد ما درتو قائمة الخيارات إذا مزال عندكم شك و ما عرفتوش اذا درتو الخيار الصحيح صلوا صلاة الاستخارة ممكن تتوضحلكم الأمور💗 و في الاخير علابلي هذي الفترة فيها ضغط كثر من الباك بصح اعرفو بلي التخصص لي راح يظهرلكم بالاخضر هو لي فيه خير ليكم و راح تعرفو الحكمة مستقبلا🫶🏼

أما الجماعة لي المعدل تاعها كان أقل من المتوقع و ما لحقوش للتخصص لي حبوه حاولوا تلقاو بمعدلكم تخصصات قريبة ليه هكا راح تزيد تكتشف التخصص و يكون عندك معلومات أكثر عليه منبعد تقدر تقرر اذا تعاود الباك أو لا ما تبقاوش تخيروا برك و تقولو انا أصلا راح نعاود الباك...لأنه ما تعرفش واش راح يصرا بعد عام و ممكن تتغير نضرتك للتخصص💕 باختصار هاذ الوقت خمم على التخصصات وليس أنك تعاود الباك🌸

ما تديروش تخصص تكرهوه و مستحيل تتخيلو رواحكم فيه بهدف إرضاء المجتمع ... التخصص مش مجرد خيار تديروه دوك خلاص كملت يعني هو جزء من حياتك سما تخيل حياتك كامل تقرا في حاجة ما تحبهاش ؟ أولا مراحش تجيب نقاط مليحة لأنك مراحش يكون عندك رغبة باش تقرا ثانيا مراحش تحوس باش تطور روحك فيه لأنك راك حاب غير تطلع عوامك و نت كاره بالتالي يكون عندك cursus ضعيف و CV فارغ و هذا ينقص من فرص العمل تاعك سواء داخل أو خارج الوطن🤌🏼 على عكس كي تحب تخصص راح تبحث وتحوس باش تطور روحك فيه و تدير تربصات و تخدم فأي حاجة عندها علاقة بيه و تتحمل الصعوبات ...بالتالي يولي عندك خبرة و منه تتفتحلك فرص أكبر🩷🩷 و أيضا ما تتبعوش بزاف العاطفة و إذا علابلكم التخصص لي حبيتوه ما فيهش مستقبل مكلاه تديروه مثلا علم النفس هو تخصص مليح بصح مكاش فرص عمل هنا...يعني شوفو الواقع تاع الجزائر قبل الإختيار

ركزوا مليح فخياراتكم شوفو اذا معدلاتكم قريبة من معدل القبول العام الماضي باه ما تطيحوش فهاذ الخطأ 🫶🏼💗 + ما تديروش تأكيد الخيارات دوك مباشرة كي فتح الموقع مزال عندكم الوقت حتى 29 جويلية على 00:00 لأنكم بعد التأكيد مراحش تقدرو تبدلوهم ✨️ (حتى لفترة التحويلات الجامعية فسبتمبر بصح يمدولكم تخصصات محدودة لي نظامها LMD مراحش تلقاو المدارس العليا ..)