Scorpion ℡ ̇ ⇣💜

كل واحد شايل شيلته و مستحمل نفسه بالعافيه ف يا نهون علي بعض يا ملناش دعوه ببعض.

لن يعرف الإنسان مرارة أفعاله ، وسوء تصرفاته ، وقبح أفعاله ، حتى لو جاء علماء الدين وعلماء النفس ينصحوه.. إلى أن يأتي يوم يسلط اللّٰه عليه إنسان ليذيقه ما كان يذيق الناس.

لا تكن سبب في قهر أحد فيظل طوال عمره كلما أتت سيرتك يردد: حسبي الله ونعم الوكيل!

مين قال إن عشان أَخُد حقي لازم أعمل فيك نفس اللي إنتَ عملته فيّا! ما أنا مُمكن أَخُُد حقي منّك من غير ما أقلل من قيمتي ولا حتى أعمل تصرُّفات ثُعبانية تصغّرني في نظر نفسي، مثلًا مُمكن أقول: (حسبي الله ونعم الوكيل) وأستعوض ربنا وأستناه يجيب لي حقي منّّك، إيه رأيك بقى؟ شوفت الموضوع سهل إزاي، بس ياريت إنتَ وقتها تقدر تتحمل عواقب دُعاء المظلوم (وَمَا كَانَ رَبُّكَ نَسِيًّا).

قررت أسيب الناس اللي في حياتي على راحتها، هتسأل عليّا هَرُد عليك، مش هتسأل مش هلومك، هتقرّب منّي هتنوّر، هتبعد إنتَ حُر، هتحب تقعُد معايا يا أهلًا وسهلًا، هتتهرّب يبقى بشوقك؛ والحقيقة أنا شايف إن دا واحد من أعظم قراراتي اللي خدتها مؤخرًا، وبكدا هوفّر على نفسي مجهود العِتاب والجِدال وتعب الأعصاب والفرهدة الفارغة اللي عُمرها ما جابت همها.

ليه الأمهات دلوقتي كتير الشكوى؟! 🤔 كلمة بنسمعها كتير… "ما إحنا زمان ياما ربينا اطفال وكل سنة بيبي، ولا اتكلمنا ولا اشتكينا!" لكن الحقيقة إن الزمن اتغير: زمان كانت الحياة أبسط، والمسؤوليات أقل، والضغوط أقل. دلوقتي الأم وسط دوامة من التحديات: سرعة الحياة، ضغوط الشغل، توقعات المجتمع، وكمية المعلومات اللي بتخليها محتارة أكتر من مطمئنة. حتى أشكال الدعم العائلي اختلفت… زمان كانت العيلة حوالين الأم خطوة بخطوة، دلوقتي أغلب الأمهات لوحدهم في رحلة التربية. الشكوى مش ضعف.. ده صرخة استنجاد وسط كم مهول من التغيرات الجسدية والنفسية بعد الحمل والولادة. الأم محتاجة احتواء مش مقارنة، محتاجة دعم مش نقد.

فى حاجه إسمها ماشاء الله 👌 أما تشوف طفل حلو ، بياكل ، نايم ، بيمشى ، قاعد ، لابس كويس قولوا ماشاء الله اللهم ارزق ابني مثله💔 إنتم متعرفوش الأم بتعمل إية عشان الطفل يطلع بالشكل اللى بتشوفوه .

الواحد كان بيستغرب الناس اللي مبتحكيش عن حياتها أي حاجة خالص غير في أضيق الحدود، بس اكتشفت إن هما اللي صح والله، وإن الحياة الهادية اللي كل حاجه فيها بتتم بهدوء من غير شوشرة ولا دوشة قبل إتمامها هي الحاجات اللي غالبًا بتكمل للآخر، لأنك مهما كنت عارف اللي قدامك وحافظُه، فَانت عمرك ما هتشوف قلبه جواه ناحية فرحتك ايه، ياما ناس باركت لنا على النعمة ومن جواها كانت مستكتراها علينا. 🖤

كُل حاجة حوالينا بقت واضحة جدًا الحقيقة، عارفين مين بيحبنا ومين لأ، مين بيتمنى لينا الخير ومين مش طايق يشوفنا بخير، الحقد بقى يبان، الكدب بقى يبان، كُل حاجة بقت باينة وواضحة ولو كُنا بنعدّي ونكبر دماغنا فدا بنعمله بمزاجنا، لكن إحنا لا عُبط ولا سُذّج.. إحنا فاهمينكو كويّس أوي.

اي حد مفكرني مش بنزل چيم انا بلعب كل يوم تمرينة ضغط نفسي ..

خدعوك فقالوا Business is Business اوعي تصدق ان الشغل مفيهوش عواطف ولا مشاعر ، أو إنك لازم تبقي جاحد عشان تبقي بروفيشينال ، الشغل كله أخلاق و علاقات انسانية ، في حب لمديرك و فيه جدعنة مع زمايلك و في رحمة مع اللي بيغلط و فيه تقدير للكيان اللي بتشتغل فيه و فيه راحه نفسية في التعامل و في رأفه بالاقل منك .

اقتنعت مؤخراً أن لما حد يشاورلك على عيوبك، شاور له انت كمان على عيوبه علشان فيه ناس بتفتكر نفسها ملايكة ومثالية بسبب صمتك وترفعك عن رد الإساءة بل أحيانا أشوفها وسيلة مهمة وواجبة لحفظ العلاقات والحدود ، أوضح إني مستحملك زي ما انت مستحملني ان اكيد فيه حاحات فيك مش عاجباني ، زي ما انت شايف ان فيه حاجات فيا مش عاجباك فانت مش محملني جميل وفضل يعني بوجودك .. لكن في الوقت المناسب وبالطريقة المناسبة ..

أنت مش مطالب تبرر لحد نيّتك.. أنت مطالب تبعد عن اللي دايماً مش واثق في نواياك

هو ازاي محدش قال أن اصعب حاجه بتواجهها في الدنيا انك تقاوم انك متتحولش لشرير ؟؟

هييجي عليك وقت وهتتحوّل حرفيًا؛ لا هتعاتب ولا هتجادل، لا هتفتقد حد، ولا هتدوّر على حد، اللي هيكلمك هترد عليه، واللي هيبعد عنّك مش هتسأل عن سبب بُعده، هتسمع كلام مش عاجبك لكن مش هترد ودا لا ضعف منّك ولا معناه إن الكلام ما بقاش يأثر فيك.. بس هتحس إنّك أكبر من إنّك ترد على شوية كلام سخيف من شخص أسخف، وإن راحتك وسلامك النفسي أهم بكتير من إنّك تجادل حد مالوش قيمة.

‏قدر الله وما شاء فعل .. حطها قدامك دايماً وريح بالك بيها ، انت متعرفش نتيجة اختياراتك كانت عاملة إزاي ، لكن الأكيد إنك تحت رعاية ربنا ، هيختارلك الأحسن ، وهيعوضك بالأحسن ، وهيراضيك بالأحسن فطمن قلبك 🤍

" الخصوصية مش خبث " كل إنسان ليه حرية الاحتفاظ باللي يخصه لنفسه، ومن حقه يختار الناس اللي يحب يشاركهم أخباره وأفكاره وأحلامه، أو يحتفظ بيها لنفسه وهاذي أبسط حقوقه.. لكن مُصطلح الخصوصية مُنعدم في مُجتمعنا كلهم بيتدخلوا في أسلوب حياتك وقناعتك، ولبسك، وطريقة صرفك لفلوسك، وطريقة تفكيرك، ومعتقداتك، وحتى تربيتك لأولادك وعلاقتك بربّك وحتى في نيتّك.. لازم نتعامل بـ مقولة (من تدخّل فيما لا يعنيّه سمع ما لا يُرضيّه).. من حقك رسم حدودك وتحديد المقبول والمرفوض بالنسبة ليك والإحتفاظ بالمساحة الخاصة لنفسك.. • من الذكاء إدراك فن المسافات إحترام المساحات والحفاظ على الحدود • و زي ما قال د. مصطفى محمود ( الخصوصية قوة ، فالناس لا يستطيعون تدمير ما لا يعرفون ) اعرف حقوقك، و احمي حدودك، وماتقبلش بالتجاوز.♥️

الشيطان دايماً بيختار أضعف لحظات البشر عشان يضرب ضربته .. و أكبر ضربه يضربها بتكون ما بين الإخوات .. الصحاب .. الراجل و زوجته .. أي علاقة فيها قُرب .. فلما تلاقي الدنيا بتبوظ منك مع حد بتحبه وده مش طبعه .. خد (Step back... خطوة للخلف) مايجراش حاجة .. إذا عزّ أخوك فُهُن !!!

عرفت ازاي انسحب بلتدريج و اقلل تعاملي مع اي حد قليل الذوق او طرقته مش كويسة معايا مابقتش بقول انا مضايقه من كذا بقيت بقلل التعامل بس ،عشان احنا مش هنغير الناس.

ربنا يكفينا شر اللي كارهين لينا الخير، واللي باصين في حياتنا ومستكترين علينا اى فرحة ، ويكفينا شر الناس اللي بتدبح بلسانها وبتقتل بنظراتها، ويبعدنا عن كُل ظالم وقاسي وكاسر خواطر، اللهُمّ حصنّا برحمتك وابعدنا عنهُم يا أرحم الراحمين.