រដ្ឋបាលខេត្តបាត់ដំបង

សកម្មភាពនៃការរៀបចំសាងសង់វាលព្រះមេរុដែលនឹងត្រូវបូជាព្រះសព ព្រះឥន្ទមុនី អ៊ុក មុត ព្រះរាជាគណៈថ្នាក់ចត្វា ព្រះសង្ឃកិច្ចកោសល្យព្រះមេគណខេត្ត ព្រះឧបជ្ឈាយ៍ខេត្ត និងជាព្រះនាយកពុទ្ធិកវិទ្យាល័យ អ៊ឹង ធួង ខេត្តបាត់ដំបង នៅឯទីលានវាលបែកចាន ។ ព្រះសព ព្រះឥន្ទមុនី អ៊ុក មុត ព្រះរាជាគណៈថ្នាក់ចត្វា ព្រះសង្ឃកិច្ចកោសល្យព្រះមេគណខេត្ត ព្រះឧបជ្ឈាយ៍ខេត្ត និងជាព្រះនាយកពុទ្ធិកវិទ្យាល័យ អ៊ឹង ធួង ខេត្តបាត់ដំបង បានទទួលអនិច្ចកម្ម កាលពីថ្ងៃសៅរ៍ ៥រោច ខែអាសាឍ ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី១៩ ខែកក្កដា ឆ្នាំ២០២៥ វេលាម៉ោង ១៩៖០០នាទី ក្នុងព្រះជន្មាយុ ៨៨ព្រះវស្សា ដោយព្រះជរាពាធ នៅឯវត្តពោធិ៍វាល សង្កាត់រតនៈ ក្រុងបាត់ដំបង ខេត្តបាត់ដំបង ។ ព្រះសព ព្រះឥន្ទមុនី អ៊ុក មុត ព្រះរាជាគណៈថ្នាក់ចត្វា ព្រះសង្ឃកិច្ចកោសល្យព្រះមេគណខេត្ត ព្រះឧបជ្ឈាយ៍ខេត្ត និងជាព្រះនាយកពុទ្ធិកវិទ្យាល័យ អ៊ឹង ធួង ខេត្តបាត់ដំបង នឹងត្រូវធ្វើការដង្ហែព្រះសពចេញពីវត្តពោធិ៍វាល និងធ្វើការបូជាព្រះសពនៅថ្ងៃសៅរ៍ ទី២១ ខែកុម្ភៈ ឆ្នាំ២០២៦ ។ សូមបញ្ជាក់ផងដែរថា ព្រះមេរុ ឬ ហៅថាភ្នំយោងគឺជាសំណង់ ដែលមានការរចនាផ្សេងៗ ហើយមានកំពូលស្រួចទៅលើ ប្រើសម្រាប់បូជាសព។ សំណង់នេះជានិមិត្តរូបភ្នំសុមេរុ ដែលជាឋានទេពពោលគឺឋានសួគ៌ ដូចនេះហើយបានជាហៅថាជាមេរុ។ ក្នុងព្រហ្មញ្ញសាសនា និងព្រះពុទ្ធសាសនា ពោលគឺក្នុងអរិយធធ៌ឥណ្ឌាបុរាណ បើសង្ខេបឱ្យខ្លីថា ចក្រវាល ឬលោកធាតុឬមួយទៀតហៅថាលោកយើងនេះមានលំហអាកាសធំធេង ព្រះអាទិត្យ ព្រះចន្ទនិងផ្លាយជាច្រើនអនេកអនន្ត ហើយនៅចំកណ្តាលលោកធាតុនោះមានភ្នំសុមេរុ(មេរុ)ដែលស្នួលធំខ្ពស់ទៅលើយ៉ាងក្រៃលែង ឯបាតក៏ចាក់ចុះទៅក្រោមស្មើកម្ពស់ខាងលើផងដែរ។ រីឯនៅជើងភ្នំសុមេរុវិញ តែងតែមានពពួកសត្វមានអំណាចតេជះផ្សេងៗតាំងនៅដូចជា នាគ គ្រុឌ គុជសីហ៍ ដំរី រាជសីហ៍។ ព្រះមេរុមាស គឺជាអគារមួយខ្ពស់ស្រឡះប្រកបដោយក្បាច់រចនាដ៏វិចិត្រដោយ សាងសង់ជាប្រាសាទត្រឡែងកែងមានកំពូលបុស្បុក មានមុខបែរទៅទិសទាំង៤ ដោយមុខនីមួយៗមានទទឹងប្រវែង៥ ម៉ែត្រ ។ ទំហំព្រមទាំងក្បាច់រចនានៃព្រះមេរុនេះត្រូវធ្វើលៃលកតាមកំពស់ សរសេរគ្រឹះទាំង៤។ សសរគ្រឹះទាំង៤នេះត្រូវយកដើមគគីរ ឬដើមឈើទាល ប្រវែង១៨.៨០ ម៉ែត្រ តាមទំនៀមទំលាប់ជាព្រះរាជរាជបវរណី សម្រាប់ថ្វាយព្រះភ្លើងព្រះបរមសព ព្រះមហាក្សត្រជាអម្ចាស់ផែនដី។

មៀនប៉ៃលិននៅស្រុករតនមណ្ឌលកំពុងផ្ដល់ទិន្នផលខ្ពស់ មានតម្លៃល្អប្រសើរ និងជាប្រភេទកសិផលអាទិភាពដែលត្រូវបានអនុញ្ញាតឱ្យនាំចេញទៅកាន់ប្រទេសចិន បាត់ដំបង៖មៀនប៉ៃលិន ត្រូវបានចាត់ទុកជាដំណាំយុទ្ធសាស្រ្តមួយនៅក្នុងខេត្តបាត់ដំបង និងជាប្រភេទកសិផលអាទិភាពដែលត្រូវបានអនុញ្ញាតឱ្យនាំចេញទៅកាន់ប្រទេសចិន។បច្ចុប្បន្នដំណាំមួយប្រភេទនេះកំពុងផ្ដល់ទិន្នផលខ្ពស់ហើយតម្លៃទៀតសោតពិតជាល្អប្រសើរមែនទែនក្នុងឆ្នាំ២០២៦នេះ។

អាជ្ញាធរក្រុងបាត់ដំបង បានប្រើវិធានការច្បាប់ចុះរុះរើសំណង់រំលោភលើដីចិញ្ចើមផ្លូវសាធារណៈក្នុងក្រុង ដើម្បីបើកផ្លូវឱ្យធំទូលាយ សម្រាប់ការធ្វើដំណើរ និងទាក់ទាញភ្ញៀវទេសចរ បាត់ដំបង ៖ អាជ្ញាធរក្រុងបាត់ដំបង បានប្រើវិធានការច្បាប់ចុះរុះរើសំណង់ ដែលរំលោភលើដីចិញ្ចើមផ្លូវសាធារណៈរបស់រដ្ឋ នៅអមសងខាងផ្លូវក្នុងក្រុង ដើម្បីបើកផ្លូវឱ្យបានធំទូលាយ សម្រាប់ការធ្វើដំណើររបស់ប្រជាពលរដ្ឋ មានសុខសុវត្ថិភាពល្អ ក៏ដូចជាការទាក់ទាញភ្ញៀវទេសចរជាតិ អន្តរជាតិឱ្យមកទស្សនាកម្សាន្តនៅខេត្តបាត់ដំបង ប្រកបដោយការជឿជាក់ និងភាពសប្បាយរីករាយ ។