Dedebit Media

https://youtu.be/hnz2m6ERM7E

https://youtube.com/live/V6lP31woi0c

https://youtu.be/U_4eYAS368U

https://youtu.be/axMbZHZWgxQ

https://youtu.be/Vg3fmy1fxNk

https://youtu.be/Te4j0GihS0k

ኣብ ቅትለት ዘውዱ ሃፍቱ ንዝተዋህበ ውሳነ ይግበአኒ ከምዝሓተተ ቤት ፅሕፈት ዓቃቢ ሕጊ ከተማ መቐለ ኣፍሊጡ። @@@@@@ ኣብ ቅትለት ዘውዱ ሃፍቱ ኣመልኪቱ ዝተዋህበ ውሳነ ኣግባብ የብሉን ብምባል ናብ ላዕለዋይ ቤት ፍርዲ ይግበአኒ ከምዝሓተተ ቤት ፅሕፈት ዓቃቢ ሕጊ ከተማ መቐለ ኣፍሊጡ። ዘውዱ ሃፍቱ ቅድሚ ሰለስተ ዓመት ነሓሰ 13/ 2015 ዓ.ም ኣብ ክፍለ ከተማ ዓዲ ሓቂ ኣብ ማእኸል ፅርግያ ከምዝተቐተለት ክሲ ማእኸላይ ቤት ፍርዲ ከተማ መቐለ የርድእ። ማእኸላይ ቤት ፍርዲ ከተማ መቐለ እቲ ዝተፈፀመ ቅትለት ብሰብ፣ብቪድዮን በድምፅን መረዳእታት ብምግባር ድማ ገበን ዝፈፀሙ ያሬድ ገብረስላሰን ኣንገሶም ሃይለማርያምን ዕድመ ልክዕ ማእሰርቲ ተፈሪድዎም እዩ። ተኸሰስቲ ናብ መጋባእያ ሰበር ንዘቕረብዎ ጥርዓን (ይግባኣኒ) መሰረት ጌሩ ነዚ ጉዳይ ብናይ ሰበር ስልጣኑ ዝረኣየ መጋባእያ ሰበር ላዕለዋይ ቤት ፍርዲ ክልል ትግራይ ግን ክፃረ ዝግብኦ ነጥቢ ስለዝረኽበሉ ናብ ማእኸላይ ቤት ፍርዲ ከተማ መቐለ ከምዝመለሶ ገሊፁ እዩ። ማአኸላይ ቤት ፍርዲ ከተማ መቐለ ብዝተመለሰሉ ነጥቢ መሰረት ነቲ ዋኒን ዳግም ብምርኣይ ሓምለ 29/2018 ዓ.ም ንተኸሰስቲ ብናፃ ክሰናበቱ ወሲኑ እዩ። ቤት ፅሕፈት ዓቃቢ ሕጊ ከተማ መቐለ ሎሚ ንጋዜጠኛታት ኣብ ዝሃቦ መግለፂ ድማ ንውሳኔ ማአኸላይ ቤት ፍርዲ ከተማ መቐለ ከምዘይቕበሎ ኣፍሊጡ። ሓላፊ ቤት ፅሕፈት ዓቃቢ ሕጊ ከተማ መቐለ ኣይተ ታደሰ ባይርኡ ዝተዋህበ ውሳነ ኣግባብነት ከምዘይብሉን ናብ ላዕለዋይ ቤት ፍርዲ ክልል ትግራይ ይግበአኒ ከምዝሓተቱን ገሊፆም። እቲ ጉዳይ ካብ ላዕለዋይ ቤት ፍርዲ ክሳብ ሰበር ብምውሳድ ናይ መወዳእታ ውሳኔ ክረክብ ከምዝሰርሑ ድማ ኣፍሊጦም። እቶም ተኸሰስቲ ሕዚ ብኣካል ኣብ ከተማ መቐለ ይሃልዉ ኣይሃልዉ ምንም ዓይነት ሓበሬታ ከምዘይብሎም እውን ተዛሪቦም። ነቲ ጉዳይ ይከታተሉ ካብ ዝነበሩ ዓቀብቲ ሕጊ ከተማ መቐለ ብወገኖም ማአኸላይ ቤት ፍርዲ ከተማ መቐለ ዕድመ ልክዕ ንምፍራድ ካብ ዝተጠቐመሉ መረዳእታ ወፃኢ ነፃ ንምባል ዝተወሰኸ መርትዖ ከምዘየለ ኣረጋጊፆም። ዕድመ ልክዕ ንምፍራድ ዝተጠቐመሎም መረዳእታት ኩሎም ከምዘለዉ ብምግላፅ ክሳብ ሕዚ ዝጠፍአ መረዳእታ የለን ኢሎም።

ብዘሰንብድ መልክዑ ኣብ ትግራይ ተራእዩ ዘይፈልጥን ዳርጋ ምስ 77 ዓ/ም ዝመሳሰል ዓይነት ድርቂ ከምዘጋጠመ ቢሮ ሕርሻን ሃፍቲ ተፈጥሮን ትግራይ ኣፍሊጡ። ቢሮ ሕርሻን ሃፍቲ ተፈጥሮን ትግራይ ንእዋናዊ ኩነታት ክራማት ኣመልኪቱ ንጋዜጠኛታት ኣብ ዝሃቦ መግለፂ ሎሚ ዘመን ክራማት ብዘይተለመደ መልክዑ ሓረስታይ ትግራይ ብዘይተለመደ መልክዑ ብሰንኪ ሕፅረት ዝናብ መሬቱ ክግልብጥ ከምዝተገደደ ገሊፁ ኣሎ። ብፍላይ ኣብ 23 ወረዳታት ትግራይ ዝተሓተ መጠን ዝናብ ይዘንብ ከምዘሎን ኣብ 19 ወረዳታት ማእኸላይ መጠን ዝናብ ኣብ 13 ወረዳታት ትግራይ ድማ ዝሓሸ መጠን ዝናብ የተኣናግዳን ይረኽባን ከምዘለዋ ኣፍሊጡ ኣሎ። ብዞባ ደረጃ ድማ ኣብ ዞባ ምብራቕ ትግራይ ዝርከባ ወረዳታት ትግራይ ብሕፅረት ዝናብ ኣዝየን ከምዝተሃሰያ ዝገለፀ እቲ ቢሮ ፥ ዞባ ደቡብ ኣብ 2ይ ደረጃ ማእኸላይ ትግራይ ብ3ይ ደረጃ ዞባ ሰሜን ምዕራብ ድማ ዝሓሸ መጠን ዝናብ ይረኽባ ምህላወን ሓቢሩ። ወረዳታት ኢሮብ፥ጣንቋ ኣበርገለ ፥የጭላ፥ ራያ ዓዘቦ፥ጨርጨር፥ራማ ፥እገላ ካልኦትን ብዋናነት ዝተጠቕዓ ከባብታት ምኳነን እውን ኣብሪሁ። ሓደጋታት ባርኖስ ኣሜሪካን በረድ ዝሓወሶ ዝናብን ውሕጅን ካብ ድርቂ ብተወሳኺ ካልእ ዝተረኣየ ሓደጋ ምኳኑ ገሊፁ ኣሎ። ኣብ ሃብቲ እንስሳት ብተወሳኺ ተመሳሳሊ ሓደጋ የጋጥም ከምዘሎ ዝሓበረ ቢሮ ሕርሻን ሃፍቲ ተፈጥሮን ትግራይ በዚ እውን 24 ወረዳታት ከምዝተጠቕዓ ኣፍሊጡ። ብሓፈሻ ናይ ልዕሊ 78 ሽሕ ሓርስቶት እንስሳት ኣብ ሓደጋ ከምዝወደቓን 182100 ጤለ በጊዕ በቲ ድርቂ ከምዝተሃሰያን 1172 እንስሳት ብሕማም ከምዝተጠቕዑን ካብዚ እዮም 74 እንስሳት ከምዝሞቱን ገሊፁ ። ብምኳኑ ኩሉ ኣካል ቀንዲ መፍትሒ ኣብ ዝኾነ ዓርሰ ምርኮሳ ክድረኽን እቲ ሓላፍነት ንቢሮ ሕርሻን ሃፍቲ ተፈጥሮን ትግራይ ጥራሕ ከይገደፈ ክረባረብን ከምዝግባእ እቲ ቢሮ ኣተሓሳሲቡ ። ብፍላይ ኢንቨስተራት ወልቀ ሰብ ሃፍቲ ገበርቲ ሰናይ ኣካላትን ካልኦትን ኣብዚ ናይ ባዕሎም ግደ ከበርክቱን ሓገዞም ከጠናኽሩን ከምዝግባእ ሓቢሩ። ዝተፈላለዩ ውዳበታትን ሓርሰቶትን ድማ ነንባዕሎም ክተሓጋገዙ ጠልን ማይን ክዕቅቡ፥ንጉድኣት ኣካልን ስድራ ስውኣትን ቀዳምነት ሂቦም ክሰርሑ ተላብዮም ።

https://youtu.be/uZtZn9IKbhA

https://youtu.be/75NoVvHTnbU

https://www.youtube.com/watch?v=adcRHeWFoZs

https://youtu.be/6JHlLFUjRAo

https://youtube.com/live/xWTEpATKyM0

https://youtu.be/xfX8tzWcBxM

https://youtu.be/YdsmLfYivNQ

https://youtu.be/5SseNVU8p0Q

https://youtu.be/7ocrWraJ4VA