Hamza Ahmed - Esoteric 🔻

ادعوا لزميلنا أحمد صلاح بالشفاء العاجل وربنا يرده لينا سالم.. حالة حرجة جدا skull base fracture والدنيا معقدة على الآخر..

انا مش عاوز اصعبها على الناس والله.. بس انا بشوف إنك حتى لو موفر الماديات ومش دارس ومثقف نفسك بازاي تتعامل مع الأطفال فمتخلفش أو لو مش عارف أساسيات التربية السوية ومعندكش المبادئ دي فمتخلفش. لو مش مثقف نفسك وعارف ازاي تتعامل مع الزوجة ونفسية الست وحقوقها وفشلت في إنشاء علاقة سوية مع بنات أسرتك فمتدخلش علاقة بالأساس لحد ما تتعلم. لأن نتائج الأمور دي هي خروج جيل مليان بلطجية وجهل وقرف أو علاقات أسرية متدمرة ودائرة من القذارة .. وتاني انت بتعمل ده مش لضمان أسرة كويسة ولكن للأخذ بالأسباب لتكوينها وانك تعمل اللي عليك والرباية دي رزق ربنا.

الإنجاب في الدنيا دي لازم يكون لأسباب سامية وراقية، إحنا مش حيوانات في غابة.. لازم يكون لأجل إعمار الأرض واستخلافها وتوريث شرائع الله فيها، وعلشان ده يحصل لازم أكون موفر بيئة متكاملة للطفل القادم ده.. مخلفش عيل واطلع عينه وبعدين لما يكبر يدعي عليا ولا يطلع صايع وقليل أدب وأبقى شلت ذنبه.. البيئة الوسخة مش هتطلع انسان كويس عامة.. ما بالك لو خلفته لأجل إنك تشغله أصلا ويصرف عليك!!! انت بني آدم وحش قوي!! ربنا قال المال والبنون زينة الحياة الدنيا.. بدأ بالمال، وانت لو مخلف عيل في بيئة سيئة هتنال من طفولته وبراءته إيه كزينة للحياة الدنيا؟ مش عيب إنك تكون فقير، خلاص انت وقعت في البيئة دي، ليه تجيب انسان تاني يتكدر فيها؟

ربنا يرحم بسملة ويغفر لها ويرزقها الجنة في صحبة سيدنا ابراهيم عليه السلام.. نيجي بقى للنطع أبوها.. من الإجرام الكامل إنك تخلف عيل وانت غير قادر على توفير الحقوق الأساسية ليه.. من غذاء ودواء ومسكن وتعليم كويس وتربية سوية ليه.. أي إنسان يخلف عيل يقولك علشان يسند معايا ولا يخدمني لما أكبر والعبط ده فهو بني آدم طماع أناني واستحقاقي.. ويبني لما انت عاجز ومكسح ليه مخلف أصلا؟ وكمان تلاتة؟!!! الفكرة انكم فاكرين إن ده الوحيد.. ده المعروف بس بسبب موت بنته.. إنما انا شوفت زي كده بنات بتسوق تروسيكلات في عز البرد والاب قاعد وراها.. مفيش حاجة إسمها العيل بينزل برزقه والعبث ده.. آه رزقنا كلنا على الله بس مبقاش فقير وعاجز، وأروح أخلف تلاتة.. ايه يبني القرف ده؟ انا مشمئز والله من ساعة ما شوفت الخبر وعمال يتردد ببالي سيناريوهات كتير شوفتها لبنات وأولاد من وهم ست سبع سنين وهم أهاليهم مشغلينهم ومطلعين عينهم.

- لأ طبعا انا صح. = مين قالك كده؟ - عقلي. = وليه تثق في عقلك؟ - عقلي قالي إنه جدير بالثقة. كيف يمكن تأسيس الموضوعية المعرفية انطلاقا من البنية القبلية للذات المتعالية دون الوقوع في الإبستمولوجي؟ بالبلدي يعني دونما الوقوع في ال circulating reasoning؟ * ايه اللي بقوله ده حاسسني تعبان في دماغي، شكلها كده خدنا الإجازة واتسبنا لدماغنا.

تم سنة رابعة

التفرقة بين الأبناء - في المعاملة، والكلام، والهدايا، والاهتمام، أو حتى «الكرسي اللي جنبك في العربية» - بناءً على تفضيلاتك الشخصية: مستوى تعليم، شبهك، جنس، شخصية بتحبها أكتر، أو حتى مجرد إنك «مرتاح له» أكثر من غيره.. من أغبى الأخطاء اللي ممكن يرتكبها الأب أو الأم. لأنك مش بس بتفضل ابن على ابن؛ لأ انت بتزرع بينهم مقارنة مستمرة، وغيرة، وإحساس بعدم الأمان، ومع الوقت ممكن تتحول لمنافسة ثم نفور ثم حقد ومشاكل عمرها ما كانت هتوجد لو كان الميزان واحدًا.. فانت ابنك حبيبك ده خلقتله عدو قاعد جنبه. ومش معنى إنك بتحب ابن أكتر إنك لازم تعامله أفضل.. المشاعر شيء، والعدل شيء آخر؛ لأن النتيجة إنك تلاقي فرد واحد في البيت مرتاح لقعدتك، وعشرة بيحاولوا يتفادوا وجودك. ونفس الفكرة بتتكرر على مستوى المجتمع.. التفرقة الطبقية ووضع الناس بدرجات كانوا دوما من أعمدة انتشار الجرائم والفساد في المجتمعات، لكونه بني آدم حاسس بالدونية حتى لو مش مدرك لده..

اللهم اغننا بحلالك عن حرامك، وبفضلك عمن سواك. وصل اللهم على سيدنا محمد وعلى آله وصحبه أجمعين.

لا أملك لنفسي أمام الله شيء إلا أني أحب الله ورسوله، وإن يعاملني بعملي هلكت.. ولا ينزل بالمرء نازلةُ إلا وذكر نبينا شفاءٌ وطِيب. قال البوصيري: نبيٌ كامل الأوصاف تمت محاسنه فقيل له الحبيب. يُفرج ذكره الكربات عنا إذا نزلت بساحتنا الكروب. وأذكره وليل الخطب داجٍ علي فتنجلي عني الخطوب. وصفت شمائلًا منه حسانًا، فما أدرى أمدح أم نسيبُ؟!

زي اليومين دول في صيف ٢٠١٨ كنت لسه ٢ إعدادي وحصلت على المركز الأول بمحافظة المنيا على مستوى ٢٠ جزء، وقتها قدموني إمام لمسجد كبير عندنا بالمنيا، لعله يسع الآلاف.. وقتها تقدمت بثبات " شعور عظمة تقريبا " وصليت بسورة النحل كمان.. ودي حاجة واو معملهاش دلوقتي أبدا.. على الناحية التانية صليت من شوية العشاء كإمام بمسجد عند نادي الكهرباء وحسيت برهبة في قلبي كده.. ومجموع الناس قد لا يتخطى ال 200. الموضوع محزن فعلا، معرفش هل زمان كانت براءة الأطفال وبلاهتهم، فمكنتش عامل حساب مسؤولية الإمام ودلوقتي خوفنا منها ولا دي ذنوب الكبر أثقلتنا وطغت على قلوبنا.. أيا كان انا مبحبش أتقدم كإمام أبدا وبرفض ده وبشوف دي مسؤولية لا اتحملها ولكن إمام المسجد اليوم هو اللي ضغط عليا.. وفكرني بالذي مضى.

كان نفسي أفهم ال ecg ومبصمجوش.. انا بعد ما حاولت أفهمه:

لأول مرة أحس زلزال بحياتي.. الموضوع مخيف شوية ولكن ربنا ستير.. الحمد لله. لعلها عظة.. قال الله: وما نرسل بالآيات إلا تخويفا.

من مذكراتي. علشان ابرر للي قالوا عني أوفر ثينكر 😅

للأسف المجال الطبي بمصر بقى وحش جدا لأبعد الحدود، كلية زي كلية الطب واللي المفروض بيشار إليها كرقم 1، خريجيها بقوا بيعانوا بشدة حتى المتفوقين منهم، وتقدروا تشوفوا ده من خلال حركة النيابات الأخيرة، فرص السفر قلت بشكل ملحوظ، بل انعدمت بالأساس.. دول الخليج بقالهم فترة كبيرة مش بيوفروا فيز بل وفيه دكاترة ليهم مرتبات بالشهور، بريطانيا كانت مقفولة بس ساكتين، دلوقتي قالوها بالخط العريض.. هنشغل ولادنا.. أمريكا وبغض النظر إن التراك ده يكلفك مليون جنيه إلا إنه guess what? مش متاح لجامعتنا أصلا.. كليات زي الأسنان واعداد خريجيها بعشرات الآلاف ومش لاقيين شغل أساسا، وأقصى طموحاتهم بقت assistance jobs.. وطبعا مفيش تكليف ليهم أو للعلاج الطبيعي.. مش هتكلم عن صيدلة.. دول فيهم اللي مكفيهم عامة.. قبل ما تفكر تدخل أي كلية من الكليات دي لازم تفكر كويس لما بعد التخرج لأنك هتحرق فلوس كتير وعمرك وممكن ده كله على الفاضي.. لأ يعمنا شوفلك مجال بكلية أربع سنوات واجتهد واعمل فلوس وعيش حياتك بعيد عن العبث ده.. طبعا مش هقولك إن ولا كلية فيهم تستاهل تدخلها خاص وتدفع فلوس كما الأبله. بالتوفيق.

أبو طالب عم النبي ﷺ مات على الكفر فقط لخوفه من كلام الناس وانهم ينتقدوه ويعايروه بأنه ترك دين أبوه وجده.. بالمصري كده خاف للناس ياكلوا وشه.. ودخل النار، بل ومُنع النبي ﷺ من مجرد الاستغفار له. هو شخصيا وثق ده في أبيات شعر: ولقد علمت بأن دين محمدٍ، من خير أديان البرية دينًا. لولا الملامة أو حذار مسبةٍ، لوجدتني سمحاً بذاك مبينًا. خوفك من كلام الناس قد يؤدي بك للتهلكة، اعمل الصح دوما وارمي الكلام ده وراك.. طبعا لو الكلام ده طالع من ناس كويسة أهل خبرة مصحوب بدليل، فمفيش اختلاف على إنه يؤخذ بعين الإعتبار، ولكن بنتكلم عن اللي بيتكلموا لمجرد هواهم لذلك أو العاهات والتقاليد والأمور دي.

انا بقدر اي بني آدم بيقدر يقرأ ال ecg بدقة.. انت متعلم قوي يسطا، انت عندك خبرة مش عندي، وانا بحترمك.. وده ملوش علاقة ببروف. أحمد صلاح لما الممرضة دخلت علينا بecg حالة، قام كرها في ١٥ ث زي بكرة الخيط وقالها مشيها، وبصلي بابتسامة ساخرة كده -يعني ترا ده المعتاد- فلقاني مذهول، وقالي: صعبة عليك دي.

زيادة درجات الثانوية العامة أمر مشبوه نسبيا، مش بنتهم صاحب مجموع عالي بالغش ولكن لما تكون لجنة بالكامل، ده شيء مش عادي خالص في أحسن الظروف حتى.. ده اسمه شك مشروع. إحنا في زمن الذكاء الاصطناعي.. موديلات زي ChatGPT وClaude وغيرهم بقت تقدر تحل امتحانات كاملة في ثواني حرفيا، بتقدر تعتمد على آلاف الكتب والمراجع، بل وفيديوهات يوتيوب، وتستنتج الإجابة حتى لو السؤال جديد، خصوصًا لو MCQ والنتائج المحتملة متحددة.. إحنا هنا بنتكلم عن بني آدم غبي يدوب بيعرف يستخدم الأدوات.. ما بالك لو طالب شاطر فعلا، ينقصه كام سؤال فقط للوصول للدرجة النهائية، أعتقد الأمر مش هيكون صعب أبدا.. ثم لو مدرس متخصص بقى، أعتقد نسبة الخطأ قد تقترب من الصفر. شوفنا السماعات الصغيرة اللي بتدفن في الأذنين، وخلفها مدرسين معدومي الضمير بيملوا الطلبة الفشلة الأجوبة وبيجيبوا درجات عالية.. ما بالك دلوقتي في وجود ال AI؟ فهل الوزارة مدربة لجان المراقبة على التفتيش الدقيق اللي يمنع تسريب ادوات اقل حجما من عقلة الإصبع؟ هل فيه تفتيش إلكتروني محترم؟ ولا لسه بيدوروا على البراشيم في بوكسرات الشباب؟ وهل اللجان عندها ضمير أصلا وتتقي الله في عملها؟ أنا شخصيًا في ثانوية 2022 شفت بعيني واحد كان بيطلع الموبايل جوه اللجنة. والصدفة الغير عجيبة إن المواد اللي عرف يفتح فيها الموبايل جاب فيها درجات عالية تفوق ال ٥٥ ، والمواد اللي اتقفش فيها معدي رأفة.. بالمناسبة المدرسين رغم إنهم قفشوه بالتليفون حرفيا، إلا إنهم معملوش محضر غش وحرمان سنتين كما هو نص القانون.. ولكن عالم رمم يقولك عديه وخلاص ويدوب يخاف شوية.. وفي الآخر جاب مجموع يقارب ال ٨٠٪ دخله كلية تمريض.. معرفش هل لو خد فرصته في المادتين كان هينافس أوائل الجمهورية ولا إيه؟

يا بخت اللي مجموعه حلال.. تصبحوا على خير.

يا بخت اللي مجموعه حلال.. تصبحوا على خير.

توضيح عمق البحر لأسماك الحوض.. منشور كتبته في مناقشة فلسفة محدودي التجربة.. والفكر.. رابط البوست