dusharge1 | همت شهبازی
Статистика@dusharge1 کانالین باغلانتیسینی وئرمک شرطی ایله یازیلاری پایلاشماق اولار ایلک پایلاشیم: https://t.me/dusharge1/20
- Последний пост
- 14 авг.
- Последнее чтение
- 15 авг.
- Постов за неделю
- 4
- Всего постов
- 27
- Тип
- открытый
- Язык
- ku
- В каталоге с
- 13 авг.
- 1/24сутки в ленте
- 79
- 1/48двое суток
- 90
- 1/72трое суток
- 97
Оценка по просмотрам недавних постов: пост набирает почти всё за первые сутки.
Посты
📌 تنقید ده بدیعی اثردیر ممد عاریف #صنعتکارقوجالمیر اثرینده یازیر: "تنقید یارادیجیلیقدیر." بو فیکیر تنقیدچینین رولونو ایکی باغلامدا گؤستریر: بیرینجیسی، تنقیدچینین اؤزو ده یارادیجی سوبیئکت (سوژه) کیمی فعالیت گؤستریر. ایکینجیسی، تنقیدچی اثرین اؤزونو داها دریندن باشا دوشمک و اونون ائستئتیک امکانلارینی اورتایا چیخارماق اوچون اؤز یازی و ایفاده واسطهلرینی استفاده ائدیر. بئله حالدا تنقیدچینین ایشی، باشقا بدیعی ژانرلارین ائستئتیکاسینا بنزر شکیلده ایشلهنیر. یعنی بیر رومان، شعر و یا حکایه کیمی تنقید ده دیل، اوسلوب، ریتم و تأثیر گوجو باخیمیندان دَیرلندیریلیر. ائستئتیکاسی اولان بیر تنقید اوخوجویا موجود اثرین یئنی قاتلارینی، آلت متنلرینی و پوئتیک امکانلارینی گؤسترمکله هم ده بدیعی یارادیجیلیغین بیر بؤلومونه چئوریلیر. بو پئرسپئکتیودن باخاندا، تنقیدچینین ایشی هم ادبی، هم ده مئتا-ادبی (فراادبی) خاراکتئر داشییر. یعنی او، هم اثری یوزور، هم ده اؤز یاناشماسی ایله یئنی بیر ادبی محصول و بیر نوع بدیعی یارادیجیلیق اورتایا قویور. بئلهلیکله، تنقیدچی و یازیچی آراسینداکی سرحد اینجهلیر؛ هر ایکیسی ده اوخوجویا ائستئتیک تجروبه وئریر. #همتشهبازی *** https://t.me/dusharge1
📚 آذربایجان شعرینده مدرنیزم (۲ جیلدده) ✍️ #همتشهبازی اختر یاییم ائوی، تبریز ۱۳۹۹. 🦜🦜 @dusharge1 👇👇
📚 آذربایجان شعرینده مدرنیزم (۲ جیلدده) ✍️ #همتشهبازی اختر یاییم ائوی، تبریز ۱۳۹۹. 🦜🦜 @dusharge1 👇👇
سسسیز قالان نثریمیز: سوچ کیمدهدیر؟ ✍🏻 دوراق @kitabtanitimi بو سورونو سوروشمازدان اؤنجه، سوروشدوغوموز سوالین اؤزو اوزرینده بیر آن دایاناق. ایران تورکلری ادبی اثر یاراتماقدا باشاریلی اولماییبلار دئدیکده، بیز کیمی متهم سالیریق؟ دوشونجهنین اؤزونو مو، یوخسا او دوشونجهیه ائو تیکمهیه هئچ واخت ایجازه وئریلمهین بیر تاریخی می؟ سقراط آتئنا بازاریندا سن دوغرودانمی بیلیرسن؟ دئیه سوروشاندا، اونون آماجی جاواب آلماق دئییلدی، سوالین اؤزونو یئنیدن دوغورماق ایدی. من ده بورادا همین یولدان چیخیرام: قبول ائتمزدن اؤنجه سورغولاماق. بیزیم شعریمیز واردیر، هم ده نه شعر! اؤرنهیین شهریارین حیدربابایا سلام اثری بیر میللتین دوداقلاریندا اؤز-اؤزونه یاشادی؛ مطبعهسیز، رسمی ایجازهسیز، حتی بعضن کاغیذسیز؛ آغیزدان آغیزا، اورکدن اورهیه. نییه؟ چونکی شعر ائو ایستهمیر؛ او یاددا قالماق اوچون یازیلیر، حافیظهنین اؤزونو مطبعه کیمی ایشلده بیلیر. آنجاق رومان بئله دئییل. رومان تک بیر فردین ایمضاسی ساییلمیر، او بیر معمارلیقدیر. اوخوجو کوتلهسی ایستهییر، نشریاتخانا ایستهییر، تنقیدچی ایستهییر و هامیسیندان اؤنجه و اؤنملی، زامان ایستهییر: بیر نسیلین باشلادیغینی او بیری نسیلین داوام ائتدیره بیلمهسی اوچون کسیلمهمیش بیر زامان. بیزه بو زامان هئچ واخت وئریلمهدی. ۱۹۲۵-دن سونرا مکتبلریمیز باغلاندی، مطبوعاتیمیز سوسدو و هر نسیل صیفردان آمما اؤز دیلینده یوخ، باشقاسینین دیلینده باشلاماغا مجبور ائدیلدی. میرزه جلیلین طالعی بونو لاپ آیدین گؤستریر. او، موللا نصرالدینی ۱۹۲۱-ده تبریزه داشیدی؛ بیزیم توپراغیمیزا، بیزیم ائوه. آنجاق بیر ایل کئچمهدن، همین ائوده اونا یئر تاپیلمادی؛ ژورنال یئنیدن تیفلیسه، سونرا باکییا قاچمالی اولدو. باکیدا ایسه هر نه قدر سووئت ظولمو آغیر اولسا دا تورک دیلینده مکتب وار ایدی، نشریاتخانا وار ایدی، یازیچیلار ایتتیفاقی وار ایدی. اورادا رومان بؤیویه بیلدی: میرزه ایبراهیموف، سونرا آنار، ائلچین، کامال عبدالله، اسماعیل شیخلی و ... یاشادیقلاری دمیر قفسده اولسا دا، لاپ آزی اؤز دیللرینده بیر قفس ایدی. بیزده ایسه هئچ قفس یوخویدو. سورگونلوک وار ایدی، اؤز ائویندن سورگونلوک. بو، ذهنین ده بؤلونمهسی دئمکدیر. اؤز آنا دیلینده مکتبه گئتمهین بیر یازار، اوزون بیر رومانین معمارلیغینی باشقا بیر دیلده اؤیرهنیر. تورک دیلی اونا تکجه آنا لایلاسینین، سئوگینین، یاسین دیلی اولاراق قالیر؛ آنجاق او دیل هئچ واخت بو معمارلیغی قورماق اوچون ایشلهدیلمیر. بابیل قوللهسینده تانری دیللری قاریشدیراندا، ائللری بیر-بیریندن آییردی؛ بورادا ایسه دیللری قاریشدیران حاکیملر ایدی و مقصد آییرماق دئییل، سیلمک ایدی. بس بیزیم آیدینلاریمیز نه ائتدی؟ گرامشی اورگانیک آیدین دئینده، اؤز خالقینین ایچیندن چیخان، اونون اؤز مؤسسهلرینده کؤک سالان بیر طبقهدن دانیشیردی. بیزیم آیدینلاریمیز ایسه دؤنه-دؤنه تهرانین بؤیوک حرکاتلارینا قاریشدیلار؛ مشروطهچیلیگه، تودهیه، ایصلاحاتا، اؤز مطبوعاتینی، اؤز تنقید عنعنهسینی قورماق فورصتی تاپمادان. بیر-ایکی پنجره آچیلدی ۴۶-۴۵ ایللرینده فرقه مطبوعاتی، سونرا ۱۹۷۹-دان وارلیق سونرالار دیلمانج و داها سونرالار آز زامان آکتیو اولابیلن درگیلر، آنجاق هر دفعه یا باغلاندیلار یا تکجه نفس آلماغا یئتدیلر، کؤک سالماغا یوخ. دونیا ادبیاتینا بیر گؤز آتساق هر یوکسهلن ادبیات، اونو گؤرن بیر مرکزه احتیاجی اولوب، لاتین آمریکا رومانی اوچون پاریس، تورک رومانی اوچون ایستانبول، قوزئی آذربایجان نثری اوچون باکی. بیزیم ایسه بئله بیر مرکزیمیز اولمادی: تبریز دیلسیز ایدی، تهران دوشمن، باکی یاریم عصر باغلی سرحد، ایستانبول ایسه دیلجه و سیاستجه اوزاق. ایکیقات چئورهده قالدیق. نه مرکزین گؤزونه گؤروندوک، نه ده دونیانین. آنجاق بو، سون طالع یازیسی دئییل. بو، ایتمیش بیر ایستعدادین ماتمنامهسینی یازماق دا دئییل؛ ایتمیش بیر ایسکلهنین دیاقنوزونو قویماقدیر. بوگون اینترنت واسیطهسیله یاییلان هر بیر استاتوس حددینده پایلاشیلان یازی سوسوزلوقدان جان وئرمکده اولان گؤدهیه حیات بخش ائدن سو دامجیسی قدر اؤنملیدیر. بیزیم ایشیمیز یازارلاریمیزی ایندیکی وار اولان قیسیرلیقدا متهم سالماق دئییل؛ ایشیمیز اونلارین سؤزونون کؤک سالا بیلهجهیی بیر تورپاق حاضیرلاماقدیر. -------------- https://t.me/kitabtanitimi
🗣️ دیکتاتورا، ملت-دولت ایسمیخان رحیموف 2.جی دونیا ساواشی زامانی قوزئی آذربایجان اؤیرنجیلریندن اولاراق «ایلدیریم» آدلی آنتیسووئت بیر گروه تشکیل ائدیر. اونون مقصدی آذربایجانین یاخاسینی، استالین دیکتاتوراسیندان و سووئتلر بیرلییندن قوپارماق ایدی. بونون اوچون شاعیر « #صمدوورغون»ون عنوانینا بو مضمونو داشییان بیر مکتوب یازیر. مکتوب نئجه اولورسا ک.گ.ب مأمورلارینین الینه دوشور. اونلارا عادی گلمهین مکتوبون یازیسی، اونون یازانینی تاپماق اوچون بیر ایل بویو، باکی بیلیمیوردوندا اولان بوتون اؤیرنجیلرین امتحان ورقهلرینین الیازماسینی بو مکتوبلا توتوشدوراراق نهایت اونون مؤلفینی تاپیرلار. ایسمیخان 25 ایل آزادلیقدان محروم اولور. دیکتاتورانی قوروماق اوچون اونون مأمورلاری هئچ زامان اَرینمهدیکلرینی، جاندان-باشدان کئچمهلرینی گؤسترمیشلر. اونلاردا بو اراده هر بیر کیچیک بیر شئیی نظردن قاچیرماماق اوچون صرف اولونور. بونا گؤره بونلار، ملت جانفداییلری یوخ، حاکمیت جانفداییلریدیر. بو نوع حاکمیتین قارشی طرفی ملت-دولت حاکمیتیدیر. یعنی ملت، فردلردن تشکیل تاپاراق دولت تمثالیندا سیاسی حاکمیته چئوریلیر. دولتین کؤکو ملتدهدیر. ملت اولماسا، دولت ده قورولماز. بیر دولت، ملتینه اساسلاناراق موجودیتینی گؤستره بیلیر. همت شهبازی 🌿📚 https://t.me/dusharge1
https://ishiq.net/?p=38093
📚 فرویدونسئوگیمکتوبلاری چئویرن: #آرازگوندوز کؤچورن و آچیقلایانلار: #علیرضااقدمیباهر، #فریداقدمیباهر حکیم نظامی یاییمائوی، تبریز ۱۴۰۱. جناب علیرضا اقدمینین ایشلهدییی کیتابلارین سلیقه-ساهمانینی بیهنیرم. اؤزل واسواسلیقلا ایشلهییر. بوندان علاوه تورکجهمیزی ده یاخشیجا یازیر. مثلا من «زیگموند فرویدون سئوگی مکتوبلاری» کیتابینا یازدیغی اؤنسؤزون ساغلام و علمی دیلینه باییلدیم. کیتابین باشقا معجزهلریندن بیری ده ترجمهسیدیر. آراز گوندوزون اثردن اولان ترجمهسی دهشت درجهده گؤزلدیر. آدام ترجمهنی اوخویاندا تورکجهمیزین معجزهلر یاراتماسینا اینانیر. اثرین نهدئدیینی اونوتدورور ترجمه. چونکی اوخوجو یالنیز و یالنیز دیلده اؤتورولن گؤزللییه باییلیر. تورکجهمیزین شیرینلیینی، گوجلولویونو ترجمهده یانسیدان و حیس ائتدیرن چئویرمن جنابلارینا عشق اولسون! ☘️ https://t.me/dusharge1
🪑 فلسفهنین مکانلاری قدیم فلسفه تاریخینده «مکان» و «حرکت» سادهجه فیزیکی آنلاییشلار دئییل؛ اونلار دوشونجه طرزینین سیمبولونا چئوریلمیشدیر. افلاطون آتئن (آفینا) یاخینلیغیندا یئرلشن اؤز باغیندا، یعنی آکادئمییادا درس دئییردی. آکادئمیا هم فیزیکی باغ، هم ده ایدئیالارین یئتیشدییی مکان و سیستئملشدیریلدییی نظری مرکز ایدی. باغ طبیعت ایله مدنیتین کسیشدییی یئردیر. دئمهلی، فلسفه ده طبیعتین خائوسوندان معنوی-منطیقی نظام یاراتماق جهدیدیر. ایستویکلر(رواقیون)، زئنونچولار «صفالی ایستویا»نین ائیوانیندا شاگیردلرینه درس دئییردی. «ائیوان» یاریآچیق مکاندیر: نه تام قاپالیدیر، نه ده تام آچیق. بو، ایستویک دوشونجهنین اؤزونو ده سیمبولیزه ائدیر: انسان داخیلی ثابتلیینی قورویاراق خاریجی عالمله مناسبتده اولور. ایستویک اوچون اساس مسئله خاریجی حادثهلر دئییل، اونلارا اولان مناسبتدیر. ائپیکور ایسه، آتئن شهرینده اؤز مکتبینی «باغ» آدلاندیرمیشدی. «گئنیش باغچادا» شاگیردلرینه درس دئدییی اوچون داوامچیلارینا «باغ فیلوسوفلاری» دئییلیردی. ائپیکورچو باغ قاپالی بیر دوستلوق مکانی ایدی. بورادا فلسفه ساکیتلیک و قورخودان آزادلیق اوچون واسطه ایدی. ایستویکلرین اجتماعی ائیوانینا قارشی، ائپیکورون باغی داها شخصی خاراکتئر داشییردی. ارسطو دایم حرکتده ایکن، تئز-تئز گزهرک فلسفی درسلرینی وئریردی. بو سببدن اونون مکتبی «مشّایی =پئریپاتئتیکلر» (گزَنلر) آدلاندیریلیر. حرکت بورادا مئتودولوژی خاراکتئر داشییر: دوشونجه ثابت دئییل، سورجدیر. سقراط ایسه عمومیتله ثابت مکتب قورمادی؛ هر زامان حرکتده ایدی. او، آفینا کوچهلرینده، بازارلاردا، میدانلاردا دانیشیردی. اونون فلسفهسی یئریمک و دانیشماق اوزرینده قورولموشدو. افلاطون «ضیافت» اثرینده آتئن شهرینین تمیز کوچهلرینین «دانیشیق» اوچون الوئریشلی اولدوغونو یازیر (ص. ۴۸). کوچه، اجتماعی حیاتین آخدیغی مکاندیر. فلسفه بورادا گوندهلیک حیاتین ایچینده دوغولور. دئمهلی، فلسفه حیاتین اؤزوندن آیریلمیش نظری مشغولیت دئییل. او، حرکتله علاقهداردیر، دایم آختاریشدادیر، حقیقت آختاریشیندا. دورغون حالدا قالماق، آختاریشدا اولماق مومکون دئییل. دایانماق، دوگمایا چئوریلمکدیر؛ فلسفه ایسه سوال وئرمک. سقراطین «بیلیرم کی، هئچ نه بیلمیرم» موقعی ده بو حرکتین باشلانغیجیدیر. فلسفهنین ان اوزاق آختاردیغی یئر اؤزونون ایچ دونیاسیدیر. ایستویکلرین داخیلی ساکیتلییی، ائپیکورچولارین قورخوسوزلوغو، افلاطونون ایدئیالار عالمی، ارسطونون فورما-مقصد نظریهسی، هامیسی انسانین معنوی و ادراکی قورولوشونا یؤنلمیشدیر. بو نمونهلر گؤستریر کی، قدیم فلسفه: مکانلا باغلیدیر (باغ، ائیوان، کوچه)؛ حرکتله باغلیدیر (گزمک، دیالوق، سورج)؛ آختاریشلا باغلیدیر (حقیقته دوغرو داواملی یؤنهلیش). فلسفه دورغون سیستئم دئییل، جانلی دیالوقدور. او، هم اجتماعی مکاندا (ایستوا)، هم دوستلوق باغیندا (ائپیکور)، هم آکادئمیک محیطده (آکادئمیا)، هم ده کوچهده (سقراط) باش وئریر. ✍️همت شهبازی #فلسفه 🚶🚶🚶 https://t.me/dusharge1
علامه دهخدانین تورکجه شعری صوراسرافیل قزئتینده #شعر ☘️ https://t.me/dusharge1
🦜 دیوان شعریمیز طبیبا! عشق دردین دفع ائدهنمزسن مزاجیمدان منی بو درد بالله اؤلدورهر ال چک علاجیمدان علاج دردیمه جانان لبیندن احتیاجیم وار علاجیم حاصل ائیله، ای معالج، احتیاجیمدان کؤنول گوزگوسونه خاکستر فقریم جلا وئردی، غنا ژنگین قناعت صیقلی سیلدی زجاجیمدان گدایام، گرچی قدریم یوخ، ولاکین عشق فیضیندن، شرافیت تاپار تاج کیان، پشمینه تاجیمدان تنور صبحدن پئنجهکش خورشیده میل ائتمز، یئسه بیر نان بریان کی، منیم بو پاره ساجیمدان مقرر روزینی روزی وئرن واردیر، وئرهر «ذکری» دنیلر منّتی چکمم اگر اؤلسم ده آجیمدان ✍️ #ذکریاردبیلی (هیجری ۱۳.جو عصر) #پئنجهکئش: بو گون ده ایشلهنیر. پئنجهییش، ال چؤرهیی دئییریک. 🔹🔹 https://t.me/dusharge1
без подписи
без подписи
без подписи
без подписи
без подписи
без подписи
اومسوق رمانینین نقد جلسهسی ✍️: احمد رستم اوغلو کافه شمع سوزان آپاریجی: حسن ثمودی دانیشیر: شریف مردی @a_z_soz ۱۴۰۵/۴/۲۹
📚 یازی اوسلوبلارینین چوخچئشیدلیلییی یازاری سئچیم ائتمهیه مجبور ائدن مدرن بیر حادثهدیر. او، بو سئچیم واسطهسی ایله فورمانی بیر داورانیش طرزینه چئویریر و یازینین اخلاقی قایدالارینی فورمالاشدیریر. مدرن یازی اوسلوبو ایسه ادبی فعالیتین اطرافیندا گلیشن حقیقی و مستقل بیر اورقانیزمدیر؛ او، ادبی متنی یازارین ایلکین نیتیندن کنار، اونا یاد اولان یئنی بیر دیرله یوکلهییر. #رولانبارت #یازینینصیفیردرجهسی دیل: تورکجه 📖📖 https://t.me/dusharge1 .
غرب و شرق آراسیندا ایدئولوژی دوزاق (جلال آلاحمد و علی شریعتینین پارادوکسو) ۲۰.جی عصر ایران دوشونجه تاریخینده غرب پروبلئمی سادهجه مدنی مسئله دئییل، اونتولوژی(وارلیغا یؤنوملو) و ایدئولوژی بحران کیمی میدانا چیخیر. بو بحرانین ان چوخ سسلهنن ایکی آدی جلال آلاحمد…
غرب و شرق آراسیندا ایدئولوژی دوزاق (جلال آلاحمد و علی شریعتینین پارادوکسو) ۲۰.جی عصر ایران دوشونجه تاریخینده غرب پروبلئمی سادهجه مدنی مسئله دئییل، اونتولوژی(وارلیغا یؤنوملو) و ایدئولوژی بحران کیمی میدانا چیخیر. بو بحرانین ان چوخ سسلهنن ایکی آدی جلال آلاحمد و دکتر علی شریعتیدیر. اونلار ظاهرا فرقلی موقعلردن چیخیش ائتسهلر ده، ماهیت اعتباریله عینی تهلوکهلی نقطهده کسیشیرلر: غربی تنقید ائدرکن آلتئرناتیو بیر انکشاف مودئلی تقدیم ائده بیلمهمک. غربدن گلن هر بیر ایدئیایا قارشی سرت یاناشما خصوصیله جلال آلاحمد طرفیندن قاباردیلیر. اونون بو موقعی زامانلا کوتله آراسیندا دا تأثیرینی گؤستریر. آلاحمدین «غربزدگی» آنلاییشی ایلک باخیشدا یئرینده و حاقلی گؤرونور. او، غربی: ایمپئریالیست، استثمارچی، مدنی هئگئمون کیمی تقدیم ائدیر. بو باخیمدان، سوسیالیست بوجاغیندان باخاراق، غربین مدنی و اجتماعی نایلیتلرینی «ایمپئریالیزم» آدی آلتیندا تنقید ائدن آلاحمد، چوخ واخت نیتینده اوغورلو گؤرونور. کوتله پسیخولوگییاسی اوچون جلبائدیجی اولور. آنجاق پروبلئم بورادا باشلاییر: آلاحمد غربی تنقید ائدیر، اما شرقین نهیی انکشاف ائتدیردیینی گؤسترمیر. اونون تنقیدی، یول گؤسترمیر، پئرسپئکتیو آچمیر، یالنیز داغیدیر. بو ایسه تنقیدی دوشونجه یوخ، ییخیجی ریتوریکا (خطابه، بلاغت)یارادیر. تنقید واسطه اولماق عوضینه مقصده چئوریلیر. اونون مقصدی یول گؤسترمک دئییل، تنقید واسطهسی ایله اؤزونو تبلیغ ائتمک ایدی. آلاحمد اوچون اساس مسئله ایدئیا دئییل، اؤز آدینین ایدئیا ایله یاناشی چکیلمهسیدیر. او، کوتله دوشونجهسینین انکشافینی دئییل، شخصی اؤنجوللویونو اؤنه چکمیشدیر. اونون مقصدی هر شئیده اؤنجول اولماق، یالنیز اؤزونو اؤن پلانا چیخارماق ایدی. دوشونجهسینده صمیمیت یوخ ایدی. عینی حالدا مسؤلیت ده حیس ائتمهییردی. انسانلارین طالعی اونون وئجینه ده دئییلدی. هر یوللا اولورسا اولسون یالنیز هر بیر شئیین اؤنونده آدینین گلمهسینه دوشونوردو. آلاحمدین آیدینلادیجی صمیمیتسیزلییی ان آچیق شکیلده صمد بهرنگی حادثهسینده اوزه چیخیر. صمد بهرنگینین اؤلومو ایله باغلی اؤزونو بو حادثهیه باغلاماغا چالیشماسی اونون پوپولیست مقصدلرینی آچیق شکیلده گؤستریر. اویدورما بیر فیکیرله هم اؤزونو تبلیغ ائتدی، هم حقیقتی یاییندیردی، هم ده نئچه انسانین قازاماتا دوشمهسینه سبب اولدو. بهرنگینین اؤلومو اطرافیندا فورمالاشدیریلان اویدورما، حقیقتی اؤرت-باسدیر ائدیر، دویغوساللیغی سلاحا چئویریر، انسان طالعینی ایدئولوژی آلَته ائندیریر. بو پروسئسده آلاحمد، حادثهنی اؤز ایدئولوژی کاپیتاللاشدیرما آلَتینه چئویریر، بورادا آرتیق صحبت ایدئیادان یوخ، اخلاقی مسؤلیتسیزلیکدن گئدیر. انسان حیاتی اونون اوچون مقصد دئییل، واسطهدیر. او، بونو نییه ائدیردی؟ آذربایجان آیدینلاری آراسیندا صمد بهرنگی گروهونون گوجلو نفوذ قازاندیغینی مشاهده ائتدیکده، آلاحمد بو گروها یاخینلاشماغا چالیشمیش، اونلارین آراسیندا تورک دیلینی مدافعه ائتمه دوشونجهسینی غالب گؤرور. نتیجهده او دا تورک دیلینی مدافعه ائتمهیه باشلاییر. نییه؟ چونکی آذربایجان آیدینلاری آراسیندا دا اؤزونو سئودیرمک و آدینین اورادا گئتمهسینی ایستهییردی. او، تورک دیلینین حقوقونو قوروماقدا صمیمی دئییلدی. اونون «تورک دیلی» قایغیسی یوخ ایدی. بو سادهجه آذربایجان محیطینده آدینی چکدیرمک نیتی داشییردی. آلاحمدین آذربایجان محیطینه یؤنلمهسی، تورک دیلینه گویا «مدافعهچی» موقع توتماسی دا عینی خطین داوامیدیر. بو ماراق، درین دئییل، داواملی دئییل، مسؤلیتلی دئییل. اگر بیر دوشونور حقیقتا دیل مسئلهسینه حسّاسدیرسا، او دیلی، ساوادلانما واسطهسی کیمی، کیملیک داشییجیسی کیمی، مدنی گلیشمه آلَتی کیمی مدافعه ائدر. صمد بهرنگینین الیفبا کیتابینین چاپ اولماسی موضوعسوندا دا آلاحمدین غیرصمیمی داورانیشلاری مشاهده اولونور. بهرنگی، کیتابی چاپ ائتمک اوچون دکتر محمدعلی فرزانهیه وئریر. دکتر فرزانهنین (خاطیرهلر کیتابی) دئدیینه گؤره، بو کیتاب آذربایجانلی اوشاقلارین ساوادلانماسینا دئییل، اونلارین فارسلاشماسینا خدمت ائدیردی. صمد بهرنگی، مسؤلیتلی ضیالیلاردان ایدی. درحال دوکتور فرزانهنین دئدیکلرینی آنلاییر. بو سببدن آل احمدین بو کیتابی چاپ ائتمهسینه جاندان باشدان کئچمهسینی گؤرن صمد بهرنگی اونون نیتینده غیرصمیمی اولدوغونو بیلیر و بیر دفعهلیک همین کیتابی محو ائتمیشدی. صمد بهرنگینین بو تهلوکهنی آنلایاراق کیتابی محو ائتمهسی اونون مسؤلیتلی ضیالی موقعینی، آلاحمدین ایسه غیرصمیمیلیینی آچیق گؤستریر. @dusharge1 آردی وار... 👇👇