ايهاب عيال الظالمي || قصائد منبرية

يا أم البنين وعشگ الحسين .. يجمار المحنة وروح عباس يا فرحة علي وحزن اليكرهون .. يا آية عشگ نزلت على الناس حزنچ طيف واريده حزنچ أعظم قصيدة چنچ وي السباية .. لا ما چنچ بعيدة ـــــــــــــــــــــــــــــــــــــــــــــــــــــــــــــــ اختارچ علي وهذا اعظم إنجاز .. ورافگتي الحزن بأول التكوين يا أم الضوه البخدود عباس .. معقولة الضوه ينخلق من طين مثلچ خير شيضمه مثلچ ياهيه حرمة لو بس إسمچ أذكره .. شمعة إتمر على ظلمة ـــــــــــــــــــــــــــــــــــــــــــــــــــــــــــــــ يالضحيتي بسمچ لأم الحسين .. بس الله يريد افعالچ تعيش خلفتي اليطگ موش الحواجيز .. الطگه الـ بالعظم مو طگة الريش چفچ باب اليلوحه چفچ ينگط ملوحه واليختارچ وسيلة .. بيچ يطيبن جروحه ـــــــــــــــــــــــــــــــــــــــــــــــــــــــــــــــ وصيتي أبو فاضل وأنتَ تدرين .. من إبنچ فلا يطلع التقصير ومشه وگلتيله يوسف موش الحسين .. ومو عباس ينسى اخوانه بالبير إبنچ غيرة وحمية إبنچ إبن البدوية هوه الخوه بوريده .. ما يحتاج لوصية ـــــــــــــــــــــــــــــــــــــــــــــــــــــــــــــــ يالماكو بحنانچ يا نبع طيب .. يالردتي الإحسان ورادچ الصيت خافن ينكر أصله الخشب مو گاع .. فصلتي المهد من التوابيت أصلچ واضح جذوره أصلچ فيّ لليزوره وأتمنيتچ گريبة .. لترس بابچ نذوره ـــــــــــــــــــــــــــــــــــــــــــــــــــــــــــــــ يالعندچ زلم مضرب للأمثال .. ونذرتيهم فده يحمون الحسين ولأن شغلة الحاجب يحمي العيون .. صارو حاجب وما يعله عالعين ولدچ ذوله النشامة ولدچ زود وشهامة وتموتين إنتي حرگة .. لو ردو بالسلامة

في ضجيجِ الموتِ جِئتُ .. حاملاً صمتَ الحياة باحثاً حَيثُ الحسينُ .. ماتَ أنواعَ الممات أسألُ الماءَ لماذا .. أرتدَ عَن دينِ الفُرات ؟ يُدفَنُ التَأريخُ حَيّاً .. في رواياتِ الطُغاة فَوجدتُ الحُبَ فيّا .. يسري قنديلاً بهيا لو هَززتَ جذعَ روحي .. يسقطُ الحبُ جنيا كلشي إلا غيابك .. انا راضي بعذابك أنا لو ما احبك .. ما اظل إعلى بابك كلشي بيه يريدك .. قمة أحلامي إيدك يمتى اشوفك حبيبي .. وابقى أشم بترابك ـــــــــــــــــــــــــــــــــــــــــــــــــــــــــــــــ يتركُ الأفراحَ طوعاً .. مَن لقى حزناً حَنون أنتَ لو قُلتَ لقلبي .. كُن "كما كُنتَ" يكون يا شقيقَ اللائي صبراً ..من رأى لاءاً تخون! إنَّ رفعَ الكفِ ضرعاً .. من علاماتِ السكون قلتُ للإحياءِ مَهلا .. قد وجدتُ الهجرَ قتلا كنتُ أحسبِنُي جَسوراً .. ها أنا أبكي كثكلى تعافيت ونسيتك .. ولمت روحي وبچيتك بعد ما اريد اضيعك .. أنا گوه لگيتك أنا بس ردت أشوفك .. والله ما بيه اعوفك وحدي والدنيا صعبه .. إشما تضيگ إعتنيتك ـــــــــــــــــــــــــــــــــــــــــــــــــــــــــــــــ في خَبايا كُلِ ذِكرى .. في متاهاتِ الأنين تمسَحُ أنتَ بكَفِّكَ .. حُزنَ كُلِ الراحلين البكاءُ ليسَ حَلاً .. أبكي مِن فَرطِ الحَنين مُتعبُ القلبِ أتَيتُ .. إِرحَمْ القَلبَ الحَزين ضاعَ عمريّ يالّهفي .. لم أقُل للتِيهِ يكفي لا يطيبُ العيشَ دونكَ .. يا حسينٌ خُذ بكفّي أشما ضعت من حنينك .. أجزه وتردني عينك انت ساكن عيوني .. ما اگول انتَ وينك أنتَ واهس حياتي .. حاضري وذكرياتي يا معين اليجيلك .. وما تدور اليعينك

لسان حال الإمام علي السجاد ( عليه السلام ) : يا مهجتي .. هل أتى وقتُ الفِراق ؟ يا مهجتي .. الموتُ بُعدٌ لا يُطاق يا سيدَ الأملِ الذي عاشَ وماتَ بلا أمل في عينِ قلبي أينما حلَّ الفراقُ و أرتحل يبقى سمارُ الحِنطَةِ في خدكَ الدامي يطوف تبقى جميلاً ضاحكاً رغماً على أنفِ السيوف يا كُلَّ اضواءِ الشوارع .. ها أنا وحدي أضيع كيف تغزوكَ الصحاري .. يـ إبن أوراقِ الربيع أرى وجهً مضى خلفَ السَراب أرى الضوءَ دفيناً في التُراب يا أبي .. لا عيشَ بعدك يا أبي هذا الچنت خايف منه عيون نحبهن و ينسنا يخنگني الحچي الما گلته يخنگني چنت ارتاح لو شفت المتعبني گضى كل شي و بقى حزني الله يعين گلبه المات محبوبه يبين كسر گلبه اشما ضخن ثوبه شيوصّل راسك لمتني ؟ گلبي يگلي ذاكياه .. و عيني تگلي ماهوه يالما بيك مُر يحسين .. يگهوه مرورتك حلوه أنه ابنك علي السجاد .. العفت كل الضعن عندي اشما شافت عيوني اوجوه .. گبر ، بالليل أظل وحدي أنا التهضم عيوني .. و تكسر گلبي بمچانه گالو زينب بلا زلمة .. چا وانا ؟ انازع لو افكر مني اطلعنك الاحلى من الوسادة حضن متنك يـ طشة واهلية الخيل طشنك يـ أشوه مني ميّت ما شفت ذبحك ما شفت الحرم تركض ولا شفت الزلم تضحك وحگ اتغررك بالدم .. احس حتى الرمح شامت يموت أحسله والزهره .. التنطگ أخته گدامه ويظل ساكت

إلى صاحب العصر الزمان ( عج ) : دورت بين السوالف .. بلكت الله و اسمي متبدي اعله صوتك .. حتى لو زلت عشگ چان حلمي .. اغفى فوگ اثار جدمك شعثّرك بالما ينز لو ذكرو اسمك ! هسه يا گاع التلم من جدمك متاع و عوافي لا رسالة بچف نهر و تگلي كافي يموت سكته الما لگاله ابنادم يحبه اتلم دمعتي بحلمي شفتك الجنة شامة بخد ضحكتك شگد الك دگيت صدري .. الوادم تسميني باب شگد الك غنت جروحي .. صارن عيوني ثواب شگد عطش بعيوني و اصبر ما دنت روحي اعله حِب مالت الله الما يحبك ما يحب لا تردني ! انت تدري بگلبي گوه امكفي جرحي انت تدري بديرة الحنضل عرفت حسين برحي انت تدري .. و ياهو غيرك يدري چم نجمة اشتهت حضن الگمر انت تدري .. الليل يسگي الشيب بيّه وخضَّر براسي السهر يا ضحكتك .. واهس الما عنده واهس يا دمعتك .. صلَّت اعلى الشيب و اتوضه بقميصك عشگ عابس يا مشيتك .. تمطر بكل ديره خير و باهلت كل لون يابس الوادم تحب الحزن چي رافگ اسمك واحنه غشمة .. بأول "شلونك" نطيب يابو صالح و القصايد شگگتهن چذبه چذبه يكبر اسمي و اصغر بعين الاحبه لا اندلك و اعتنيك انعم الله جروحي التذكرني بيك

في مخيّلتي يعود الضحاك بن عبد الله المشرقي بعد أذِنَ لهُ الحسين أن يهرب من الطف نادماً : اجيت وماي وجهي بچفي ما واحد يگول "إبيش" من شفتك بدون أخوان عفتك وحدك ضد جيش ولو معاتبني أشوالي لو مسمعني چلمة ليش الما يرضه يموت وياك يبقى بس يموت إهواي إذكر ريجك العطشان إذا جابولي طاسة ماي چان الجيش ترس العين و عفتك وحدك يحسين ـــــــــــــــــــــــــــــــــــــــــــــــــــــــــــــــ اجيت وذنبي يسبگني بعد ما ضاعت أحلامي أطفي أخيامك بچفي لون حاسبهن أخيامي درت عيوني والتاريخ چز إعلى اسمي گدامي جزه وكت الندم يحسين بس عيوني ما ترضه تره اليسحب نفس ينداس إذا كل العمر ركضة شگدي وعفتك بغفلة وسد إمچاني عبد الله ـــــــــــــــــــــــــــــــــــــــــــــــــــــــــــــــ حنينَ أنت وتسامحني ولو ما ينغفر ذنبي الصار من إيدي لا والله مو من إيدي من گلبي مشيت وثگلت إجدامي احس الدرب مو دربي مو كل غلط يتصحح وچانت هيبتي بموتي اذكر من درت وجهي أثاري إجدامي تابوتي أنا المدري شيگلك رضيت أهلك وعفت أهلك ـــــــــــــــــــــــــــــــــــــــــــــــــــــــــــــــ أنه السويته ما أنساه أچذب لو گلت ناسي أنام وبالي ما مرتاح مدري شصار بحساسي حسبالي إنگطع راسي أفز أتلمس براسي ما عندي عذر مولاي بس اليعتذر زلمة مو للموت ما امد ايدي گبلك حتى للنعمة الوكت يحسين ما ينرد چانت فرصتي أتخلد ـــــــــــــــــــــــــــــــــــــــــــــــــــــــــــــــ حتى اسمي ابتعد بالريح وأكره روحي من أضحك البشر مو بس نَسَب مرات ترفع راسك برمحك ومثلك ماكو ما تطرد رمل من يلبد بجرحك لو يگضي العمر تفكير لحظة إتحدد إبنادم ويروح الصيت وي الخيل من يحكم قرار الدم خذلتك وانتهت كلها وروحي اللوم كاتلها

چي حزنك رمح ما ينكسر گلبه عرفت الله لأن بوصلتي بالتُربَة بوكت شِفت البشر كل واحد وربّه ما جاملت ناي وزعّلِت گصبة حبّك مصدر التوحيد والألفة .. يالحبك قرار وما يجي بصدفة قُلْ هَل يَستَوي العباس والخايف إجه يتعثر السيف وخنصرك واگِف مو بس بيك بالميمون ما حالف غيرك گلبي لا شايف ولا عايف ذنوبي هواي خاف تگول ما اعرفه يالحبك قرار وما يجي بصدفة يا مذبوح مثلك يبچي عالذباح يخطي السيف مرات الحچاية إسلاح بقيت تحاچي گلبك لمن گلبك طاح ما دامك حِنين تعيش ما مرتاح كل عمره الحنين يعيش باللهفة .. يالحبك قرار وما يجي بصدفة انه الما عندي غيرك وانت كل ربعي كلما اريد ادعي اغرگ بدمعي اذكر صبعك اشما اعاين لصبعي هوَّ العنده مثلك يستحي يدعي شيريد من الله والمن ينرفع چفه .. يالحبك قرار وما يجي بصدفة مو بس عَبرة منك آخذ العِبرة اليحب حسين ما يتحجم بفكره يزمخ عالظُلم و يقدِّس الثورة علمود الگاع ما يكسر گلب شجرة الدنيا بچفه وانت اخيالك بچفه .. يالحبك قرار وما يجي بصدفة اليحبك ما يضيّع جوهر أفكاره تربات المجالس ما يغث جاره ومثل صدرك يحس الرمح خطاره وبنفس التعامل گطن وحجارة وجروحه نهر لا تجزي لا تشفه يالحبك قرار وما يجي بصدفة

يالدمعته إتطيّح نگابه تدري بمبيت اختك خرابة ! . .

مجبليني يا زود المحاچي ومفجور راسي من البواچي . .

أخي .. لِمَ الجفى كفى .. هجراً كفى هُنا .. قد ذقتُ أنواعَ العذاب سولفتك ضوه ورديت .. خاف يسومك الأعمى شميتك وشفت الگاع .. هذا حسين لو دمه ! شتسوي المرة من تشوف .. إعلى اخوها إزلام ملتمه بس طلب منك من تلاگيني شگد بچت عيني بوسني بعيني الله يرحمك گالن ونزيت .. ما گلت ميت گلت ناسيني أخي .. لِمَ الجفى بدّلت الحزن بالحيل .. وگعدت إبّاب المتانه اشما مرّت يخوية عليك .. مرة محترگة ، هاي أنا اوخر گلبك من الخيل .. واحطّن گلبي بمچانه باين الضيم وگلت ما باين إعتب عليمن والوكت خاين غمض عيونك أختك وركضت .. غمض عيونك بعد شتعاين ! أخي .. لِمَ الجفى يحسين العطش وياك .. يسوه الماي والجربة شفتك ميت بعيني .. خبر فرگاك شيچذبه اليحب يموت من يشوف .. الناس تدوس اليحبه گطعت انفاسي من إنگطع نحرك عميه الخيول الداست بصدرك غيّر مچانك بلكي يبن أمي .. يسويها حظي الحافر يعبرك أخي .. لِمَ الجفى بيدك كلشي يا كلشي .. بس أصبع نقص بيدك ظلّت بس عباتي وياي .. حتى من أبقى ما افيدك اريدك ترجع لبيتك .. وانت الوادم تريدك گالولي مات وگلت لا چِذبه گدما نزف گلبك صرت خشبه ياهوه مثلك گلي يبن أمي .. مذبوح وعيونه اعلى اليحبه أخي .. لِمَ الجفى خفت من شفت اليضحكون .. وبسيوف الغرب عطرك أعاين مو ذبح هذا .. مدري شصاير بنحرك سويلي مجال حسين .. طلع السيف من صدرك يالنمت بين الگاع والحافر دارت وصاير تكسر الخاطر خليت إيدي بإيدك وشفتك .. بس تسع اصابع ليلة العاشر

الشمس طلعت لو فتحت عيونك انا الحچايه الما جزيت اسنونك خصم الحجي ما عرف اعيش بدونك امدمّه الضوه ورجعت ظلام الوادم ! شهالنومه بحضان الخناجر نايم طشو متونك طشة الحنطه بگاع .. يالمنثلم لا گاعد و لا گايم تتشاهد اختك من يمر كتالك بجثتك يجر جثتك گضت ظَل بس عطر مخطوف لونك ما اگول شلونك خصم الحجي ما عرف اعيش بدونك من رخصة الـ خويه ارد اصيحك بسمك ترست شليل الگاع غيمة دمك من كثر ما جسمك مطشر بالگاع وين ما اطيح انا اطيحن يمك جا بيش احلفك يالنمت من چتفو اختك ما گمت وداعت رقيه اتبهذلت يا نعمة الله بحافر يطشرونك خصم الحجي ما عرف اعيش بدونك انت الجنت فيّ هسه گلبك يچوي يالغافي واختك ما درت شتسوي ردت ارفع ايدي وزمخ بچفوفي السوط من كل كتر مچتوفه خيمة بدوي جيتك يعز من الظنّه جيّة غريبه مدوهنه امشي شبر واگعد سنه وانا الگبل من خيمتي لمتونك خصم الحجي ما عرف اعيش بدونك يالمنطي كل شي الناس بيش تطلبك ؟ يبرودة الحِب والرماح اتشربك مامش وجه عندك وبيك أحتاريت .. تبقى على وجهك مچفي كلما اگلبك جيتك اجدامي اتغالبن من شفت أديك اتحركن غلبتني الخيول و جزن يا رجفة إيدي لمن يسحگونك خصم الحجي ما عرف اعيش بدونك اهنا يالگبل فيّ رمشك يسبّگلي ما گتلي ابقي بالچذب ما گتلي مو كلك انتَ وانا اجيتك كلي مكسور ضلعك مدري جاي يصلي اهنا يالأخذ كلشي وجزه يغفه واصياحي يفززه ما متت عگبك معجزه لمّة الزاد من الثرى يلمونك خصم الحجي ما عرف اعيش بدونك

مولاتي زينب تخاطب سيد الشهداء الحسين : يالطشرتنا بخبر موتك يالصحت حد ما راح صوتك ومحد فزعلك من اخوتك إگعد نواعي اختك تفوتك لهالساعة أذكر ذاك الغروب چم دوب أتاني الموت چم دوب هوّه الگلب شتحطله ويتوب ثاري المحنه إتعب الگلوب ثاري الفراگ إهجام البيوت بس گوم شوف شلوني وموت يالمالك إخوه الرمح زاتوت مگطوع راسك والهوه يفوت يالبالع السيف إعلى ريجه يالنايم بحفرة غميجة شوف الگلب صاير حريجة وجدمك جزه وضيع طريجه هذا الحزن موش إعلى گدي يا رب دخيلك هذا حدي يبدي الغروب وشوگي يبدي يگلولي ضيم وگلت عندي إسمع اعتابي الجايبك جيب البچي إعلى الميتين مو عيب وداعت الباري اليعلم الغيب ليلية دمعي يبلل الشيب

ما شِئتُ أن أبقى وحيداً كالغريب .. صبراً لربِّ التائهين وما يشاء أبكي وما نفعُ البكاءِ لضائعٍ ! لكنَّ عيني أمسكتْ كفَّ البكاء غريب وماتو اهلي وربعي واحلامي ثلث مرات عثرت اختي گدامي عبرت على النهر والخيل تشرب ماي .. رخيص الماي واغلى إنسان ظَل ضامي شوگ وما اعرف شلون اسمع صوت اليموتون خوفٌ يحيطُ الضاعنونَ إلى الأمان .. ما عادَ يرجو مُنقِذاً حُزنُ الغريق ربّاهُ إنّي متعبٌ ، أينَ السبيل ؟ لا أدري فيما ينتهي هذا الطريق تعبت من الگلت والگال وأنفاسي وبقت تفتر أوجوه الماتوا براسي يا شباچ ! أنه المخنوگ من الناس .. خلصوا ناسي وأنا لهسه ما ناسي حالة والدي حاله و شابع نوم چتاله شاءَ القديرُ وخيرُ ما شاءَ يكون لكنَّ عمّاتي يخافنَّ العيون قد أتعبَ العباسَ صوتُ صُراخِهن كادَ يجرُ السيفَ في طرفِ السِنون راد يگوم أبو فاضل و رجعوله عاين خدرك بلا خيم گالوله شال عيونه المغطيها دم وأتراب وجابوا جثة التاريخ مشيولة ولكن حكمة الباري يزيد يچتّف أسراري

سحگت الظلمة بعيوني و اجيتك هَم وأحتاريت وجهك لو ضوه ملثم اشما عن وجهك امسح دم يظل بس دَم موش أرماد ليش بجيسه تتثلم رضيت انشاف و اطلع ركض و أتشتم بس چتالك اگبال النسه أتبسم يضحكون و يبچوني مبري الذمة شافوني مبري الذمة بس يحسين طگوني .. وعلي ما ردت اعوفك لچن شفت الويل عنك خوية شالني العلاوي شيل أچتفاتي للعباس احبك حيل يتربات الشمس واختك ترافگ ليل عرفتك منطحن شميت ريحة هيل و وصل من ثوبك مچلبه اعلى جدم الخيل هاي حسين تاليتي غرب ، واتمشوا ابيتي متت شيطلع الدخان من ريتي تعبت من الهضم ومناشغ السكتة يا شيخ التنام اعلى التراب أخته صعد شيب اعلى راسي الحچي الما گلته يگلولي البگه براسچ واگول انتَ حسبالي حلم ما اصدگ الشفته وگفت اتلمس بگلبي گلت ميتة اجيتك من رخص كلشي خيمه مچتفه وتمشي وعمه عيوني الرماد الواصل لرمشي ثلث تيام دمك ما يريد يجف دخيل الله الحسين على الرمل ينزف كلما اتخيلك مذبوح أفز ارجف ركض الخوف موش اركاض متلهف على وجهه يوگع الماخوذ متچتف لا تحلف بعد معذور لا تحلف وحگ گلبك الما هوه العمر بالضيم ما يسوه الموگد مو بگد اجدامي يتچوه .. يكل ناسي وخذو بالخيل كل ناسي بميّة يا علي ما تنجر أنفاسي هاي انا الوحيده وبالنسه تواسي موش الشيب هذا حسين البراسي انا التعبت انا ام عون إذا ناسي أحسك منذبح شيچذب احساسي ترضى أتوسل الغربة لحد يوصل لگلبه يالسحگوك واحنه نبوس بالتربة

بعد إستشهاد القاسم إبن الحسن ( عليه السلام ) مولاتي رملة تكلّم نفسها : امن تبدت الحِنة رضـو للخيل اصير امتاع الما ضايع من امه گبل جوه الحوافر ضاع يبقى العزيز اليندفن وردة اعلى خد الگاع ها يروحي .. ينسى تعبي الچنت أصيحه .. يبـن گلبـي انه رملة و ضاع دربي ، ها يروحي ليش اعاتب .. و احچي بيمن و انا گلبـي .. مدري عد من ! گومي اطلعي ارد اموتن ، ها يروحي گتلچ يروحي اعلى التعب ركضة شلب للماي عفت ابني نايم ع الرمل سوي الثواب افياي الحلفولي يبقولي مشو هسه الغرب وياي بيش ابشرچ .. كلها راحت امن المدافَع .. روحي شاغت احچي و ابچي اعلى النعافت ، ها يروحي مطشر ابني .. بيش المه ؟ گلي "احبچ" .. هيَ چلمة ابني يرجعلچ امدمَّه ، ها يروحي زفة شمع للظلمة وديت الضحك و الـحيل و القاسم اشما يبتسم تخزرني عين الخيل بالليل الوج و اطلع من الخيمة و اجزه الليل العمره ظلمه .. حزنه شوفه و عينه تبقى .. اعلى اليعوفه و جرحچ المـحد يروفه ، ها يروحي الما نـسيته .. و لا نسانـي مشه عني .. و ما خذاني الشمعه عافيت الصواني ، ها يروحي يجيبولي طاريه و افـز عشت الـعمر وياه ما ادري ليش الما يجي ابقى انتظر ملگاه ما ترهم الضحكة الي بس ترهم الـ "ويلاه" انا گتلچ .. كافي منهم فـارگـوني .. و فارگـتـهم شـمعه يم شمعه عفـتهم ، ها يروحي هذا گلبي .. و هذا حزني ما عرفته .. و هـوه ابني و اليحب عيني لچمني ، ها يروحي شلت الضوه اعلى متوني ادور عن گمر مبيوگ و الدنيا دارت بينا من شفت الورد مسحوگ الفرگة و الغربة و ركضتي و طبتي اعلى السوگ گتله كافي .. و گال اگعدي يمه غيـرچ .. ياهـو عندي ! و گتله وي الفرگة نبدي ، ها يروحي من الحوافر .. ابني ذابـل وجهه غيمة .. اعلى السنابل و انخطف لون الرسايل ، ها يروحي

لا تجرح النايَ لكي .. لا ينزف اللحنُ دماً الكلُ في الحبِ انظلم .. لن تلقى فينا ظالماً لا ، لم يكن حزناً فقط بل كانَ موتاً دائماً يا خِنجرَ الشمسِ كفى .. طعناً بجثمانِ الزمن لميته و سألت الظال مِنه گتله شبهذلك ؟ گال المحنة و گتله اشبعد يالشابع جروح لِم دمك و خل نمشي و نروح فـوگ الصـور يوميه مذبوح چا مو هين .. للخيمة غريب يفوت بس مبين .. مو اول مـرة تموت ! هضيمة تشوف واحد ياخذ هدومك .. لهسه عيوني للباب و تشوفك جاي ما لحگنا من الدنيا نشبع ماي ندري احنه اذيناكم .. بس ردنه نبقى وياكم ، مو ترحون چا بيش جازيتونه .. ردناكم و عفتونه ، ابلايه عيون قلبٌ هوى وجهاً رحل .. و احتارَ ما بين الصور القلبُ في كفِ الهوى .. كالطير في كفِ المطر حين ارتوى شوقاً مضى .. يبكي و بالشوقِ انكسر للآن لا يـدري متى .. تكسوه اوراقُ الشجر لو ادري اكض گلبي و اگله دنيا ابلا حسين تصير ذِلة راح الخدر عگبك يالحسين منين الدرب للمشرعة منين ؟ راح امشي چا محد نِشد "وين" ترضون امشي .. و لا واحد يتانيني باگـو كلشي .. انباگ الطيف من عيني يبو السجاد ما رحمو ضعن گلبك .. برجل الخيل اجه اعلى الخيمة چم اگماط و احنه متون مستحية و اجونه اسياط انحبكم و عاتبنه .. و شفناها صارت مِنّه ، ما تحچون چا بيش جازيتونه .. ردناكم و عفتونه ، ابلايه عيون الموتُ لن ينسى بشر .. و الخوف مفتاحُ الأمل كم من حبيبٍ ينتظر .. حُلماً صغيراً قد رحل هل فينا بعض خطيئةٍ ! او هل اصابكم الملل ؟ ذاكَ الحديث قد انتهى .. و الرعبُ يسري في الجُمَل عازت فزعتك يا خويه عازه ارجـع حـتى لو تـرجع جنازه كافي انتظر مشتاگه العيون املاگه ردت مثل اليحبون كثر الضرب ذبيت المـتون ارجع لينه .. خذتنا الغربة مو كافي طگ سكينه .. و تدري السوط متعافي يحسيـن اليحبـك تـعبّو گلبه .. بيش تفيدني عيوني و خذو وجهك شوف وجوهم ما واحد يشبهك ما گلنا منكم كافي .. نشبع لچم و نوافي ، و تلچمون چا بيش جازيتونه .. ردناكم و عفتونه ، ابلايه عيون

الإمام الحسين يخاطب الإمام العباس ( عليهم السلام ) : أخوي .. بس گوم وياي أخوي .. ما لازم ماي شمسويه الرماح بوجهك اغتاضيت .. شيلمك والطعن ما خلّه شي ينجاس الضحك واصل لسابع خيمه گوم وياي .. چبيره عليه چلمت ميت العباس أنه أدنيت و اتحرك طرف رجليك .. و شبگتك گوه تتمضحك عليه الناس اشيلك بيدي و يظل منك على الگاع .. إذا تبقى على هاي النومه راح أنداس إذا ما تمسح دموعي الحوافر تسحگ ضلوعي يبعد ارسوم اخوك شتحمل ارسومك .. الحافر و السهم و الطين و الدخان بلايه چفوف لو بس گلبك امشي وياي .. يتعيّر تره التفزع وراه نسوان من اشلع رمح تشهگ گلت بي روح .. تعبت وياي بس منين اجيب إخوان حتى الما يعرفك گال غلبه يموت .. يشرب ماي گدامك المو عطشان يعباس الزلم صوبين و كلها تصيح اذبحو حسين الرمح ماخذ مچاني وگاعد بگلبك .. و نحرك بالسيوف الباتره امثلم بحلوگ الحوافر سالفه العباس .. ما ينشاف جسمك بس بقى ينشم الملامح ذيچ داستها الزلم والخيل .. دارت و إبن أبوك تعرفه من الدم شاغت روحي من گالولي "فنه يگوم" .. دعيت شگد گلت بلكي الله جاي أحلم گالولي و صرت دخان خطيه ما بقوله إخوان وحگ عيونك الصارت مضيف اتراب .. يدفنوني أريد بهيمت عيونك شلونك گتلك و هزيت نحرك زين .. أول تالي تتعب من الشلونك الما يعرف يلوح اتعلم بصدرك .. الرمح والمو رمح مشچوخ بمتونك گد ما گاضي جسمك بالطعن والخيل .. صاير ترهم بدرعك يشيعونك متت عباس چا وانا ؟ أنا الخلصو اخوانه يخوي الناس ما ترحم اليبقى وحيد .. حتى الماله شغله يهف عليّه احجار أنا اشوايت الله الستر موش بخير .. التمو ع الخيم لمّت اليطلب ثار طلعت زينب ولمّو ضحك و عيون .. ركض و مچلبه بطراف العبايه النار صرت شويه وانت التشگ ثوب العين .. چفك جبته رهمه و گوم شوف شصار أخيك أنا و يحلفك اثاري هذا مو چفك

الامام الحسين يخاطب الإمام الحسن ( عليهم السلام ) : أخي .. ما هـٰكذا الوداع أخي .. مَشَيتُ في الضياع الحگ طبو الخيمة .. و سحگو فوگ كل ذكرى مو نسوان صارن نار .. جمرة تسحل بجمرة يالبصغرك چنت غيمه .. اوجوه من العطش صفره جرو اختي گدامي .. و أنا الما أجر حسره الحگ يالحسن يا عازتك يمي الحوافر صلفه گطعت سالفة دمي أخي .. الموتُ لا يُباع يبعد الناس و المو ناس .. انكسر مثل الغصن ضلعي لو غربه اگول تهون .. كسرو خاطري بربعي وگف گلبي و بقيت اركض .. گمت أنا و وگع دمعي رادو مني بس محبس .. انطيت المحبس و صبعي توصل للهدم ما حاسب احسابي الله والرمل سترو على اثيابي أخي .. حزنُ الحُسينِ شاع تعلمت الكرم منك .. ما خليت شي مضموم عفتني وانا المحسب .. بس وجه الله وانتَ تدوم وكت والله اليوزع حيل .. يحط چفوفه يلا يگوم وكت والساتر الدنيا .. ما ظلت عليه هدوم وحگك من هوان الدنيا أنا انگاد الدنيا بلايه چلمة خويه ما تنراد أخي .. في خَيمتي جِياع يالمتعود اعليه .. و انا عليك تعويدي يالطولك يچمل الفيّ .. الشمس چوّت تجاعيدي خفت لا تلمح الخنصر .. احط تراب فوگ ايدي شني تنساني وانا ادري .. ما تنسى مواليدي كل شي بروحي ما يشتاگ ما ردته عزيز و فشله فاتحتي تظل سكته أخي .. الشوقُ للنُخاع انا الشايل الدنيا .. جنازه و ما لگيت اچتاف من گد السحگ بالخيل .. من عندي رقيه تخاف توصل يمي و تكضني .. زلمه و بس تراب انشاف الحنين الما يعرف افراگ .. جوه الخيل ما ينعاف تعبت بموتي ما طلعت الروح بساع كل وصله بكتر مني ترست الگاع أخي .. قلبي مضى شِراع

خلي يموت .. حسين من الذبح تعبان ، خلي يموت وحگ آخر نفس بحسين احب حسين .. بس كافي سحگ بحسين خلي يموت خلي يموت .. كل شي بروحي يوجعني ، ترس متروسة ريتي ارماد حتى النفس گوه يفوت گضيت من التعب والضيم ، امشي و اسمع يسألون زينب هاي لو تابوت اليموت بلا تعب مبخوت راح حسين والفرگة هجام بيوت شمسويتله حتى يروح ؟ مشه امرايه و رجع مذبوح ماكو أخوان .. خير من الله عندي جروح ، بس ما حصلت من نعمة النسيان ماكو أخوان .. عافوني و تهت وحدي ، ردت منهم وداع "اسم الله" كل شي الچان أول مرة اطلع وحدي شَندَل والدرب دخان زلم ما تستحي و تتشمت بنسوان چنت انتچي على العباس هسه انتچي على الحيطان طلعت اركض و صاحو ناس ركضت "شارب العباس" ما شفتوه .. سألت شگد على العباس ما شفتوه أخو بگد الضوه و متعوب ، آخر مرة شفته يسمي و يذبحوه ما شفتوه .. فتحت عيوني بالغربة و كل من حاير بگلبه و كل ما انكث هدومي تطيح اوجوه ما شفتوه .. أخوي يصيحلي و يدنّه و يسحگوه مكروه السحگ مكروه مالي غيره اي واحد و ذبحتوه بگلب بارد تعبت هواي .. اركض والجمر ما يرحم الحفاي الراح يهون ما عندي گلب للجاي مبين من بعيد الجاي متشتم زينب ما تطب السوگ هوه السوگ كلشي يلم خفت ننباع ادعي ما يصح شراي تعبت هواي .. تعبت من العطش بس ما اريد الماي و شمرو ماي حار علينا و حجار و شتايم توجع الميت و الما عنده اخو يسكت اسمي عرفته الحلوگ الله اليستر من السوگ كلشي يهون .. گلت لخاطر العافوني أتعب بلكي يرتاحون ابچي بلكت يضحكون اموتن بلكت يعدلون كلشي يهون .. ازرگ من زراگ الماي عندي متون أنه بعازة الـ خويه مشيت و ما رضو يحچون رضو گدامنا يموتون سمعت اشكال حتى السكتة عدها اسنون هيچ أهل المحنة بساع يتغيرون ماتو و احنا ظلينا نتعير بأسامينا

متاني عاشور .. وأحسب من العام .. شگد گضيت ايام .. ما عفت دربي متاني عاشور .. والدمع بالعين .. و من اگول حسين .. ينعصر گلبي يحسين انتَ العرِف و الدنيا والغربه و الما يحب من صدگ ما ينكسر گلبه اعظم وطن حضرتك و اعظم دوه التربه كتالك انتَ العذب مو انا اليشربه يالعطشان .. و نساونه طبت ديوان و سمعن حچي ما ينگال بس نسوان .. بالعبي تشتم دخان بس عبي ظَلّن و اخيال ما ابطل دوم .. دمعتي و حزني .. حاشه تطردني .. لو همت يمك ما ابطل دوم .. اسمك براسي .. لآخر انفاسي .. انا أصيح اسمك ما عندي غيرك دفو من تبرد متوني يلوموني چي ما عشت خلهم يلوموني لو اموت من البچي لو يعمن عيوني و استغفر من الضحك لو يوصل اسنوني كل عمرك .. يعزب الحوافر صدرك و تتلگه حزنك بدموع ياهو يجرك .. عن الخيول يوخرك راحت وي الخيل ضلوع مو مثل الناس .. اضحك و أرتاح .. و انسى كل الراح .. من حزن عمرك مو مثل الناس .. عايش بحزني .. الدنيا توجعني .. و البد بكترك يالمالي غيرك ربع اتغرب بدونك بعيوني أحلف چذب يحلفوني بعيونك يا كون أضم ضحكتك عن اليحبونك يذبحون كل البشر بس لا يذبحونك مو مذبوح .. ما اصدگ حسين يروح انت أعلى من كل ذباح بيك جروح .. مو بس جسد لا بالروح جوه السحگ ما ترتاح لو ردت انساك .. روحي تكرهني .. و ظِلي يكرهني .. و التفت وحدي لو ردت انساك .. چا اروح لوين .. ماكو مثل حسين .. غيرك شعندي بگلبك ردت مو سهم انا التخليني بنص الفرح لو يمر اسمك يبچيني أتخيلك بالحلم مرة تلاگيني ما اريد بس شوفتك كون الله ينطيني الناس تلوم .. كافي سحگ بسك گوم صدرك گضه من الخيل ما مفهوم .. انت البچي الردته يدوم متعوب و توزع حيل

أم البنين ( ع ) : يحسين العتب شيفيد الگريب لگلبي صار بعيد گضت ذيچ الوعود ردتك بس تعود ____ تانيني يا حزني .. طيفك متعبني مني شبدر گد السهر صرت انحسب شمعة چا محد يگلك .. گلبي يأشرلك بگلبي حزن كسرة غصن دمعة تجر دمعة ريتك اتعود .. ادعي ربي بدمع عيني .. ريتك اتعود كون موجود .. يمه محد يبجيني .. كون موجود كون تشوفك عيوني و اضحك ع اليبچوني يقرآن الخلود .. ردتك بس تعود ____ يا آخر احلامي .. اشما امشي گدامي و اتوسلت حد ما شغت يا چلمة التعطلك ! وين الگه من عندك .. ديرة ضوه بخدك و هجرك بده عركة نده يا ورده توصلك وگفة الباب .. تهضم عيون اليتاني .. وگفة الباب مامش احباب .. وبمكانك ماكو ثاني .. مامش احباب ضحكتك تعرض بدربي صحت حد ما وگف گلبي يأول كل وجود .. ردتك بس تعود ____ يوليدي يا حبيبي .. ليش الهجر نصيبي مدري شحصل چان النخل شامخ مثل طولك بالفرگة بيتي ظلمه .. و مشتهيه چلمة يُمه گلبي يحن صار الجفن ناگع يگلولك مثلك منين .. چانت عيونك معاضد .. مثلك منين مات الحسين .. واحد يشاور بواحد .. مات الحسين متعوبة وعلي يحسين مو زين الگطع مو زين من تالي البرود .. ردتك بس تعود ____ امك تتاني عيونك .. يمتعب اليحبونك تالي شصفه لونك طفه و اتبدت الگمرة صار الحلم تردلي .. تبچيني كلما صلي ضاع العمر عوف الهجر يالما عفت ذكرى ابچي بالليل .. اختنگ وحدي و أعاتب .. و ابچي بالليل خلص الحيل .. گلبي صاير چنه شايب .. خلص الحيل الرسايل ناگعه بدمي و احس شيبي جزه لحلمي يالبنفسك تجود .. ردتك بس تعود ____ هو البعد مصيبة .. ياهو النسه حبيبه اول عشگ و آخر عشگ و بس انت تلچمني چا ما خذتني خيمة .. طيحت نده اعلى هيمه طحت و گمت و اتعذبت غيرك منو يحبني ولدي وياك .. ماتو و ما يرد موتك .. ولدي وياك وين انساك .. أنا افك ريجي اعلى صوتك .. وين انساك شگلك يا حزن عمري چبيرة و منكسر ظهري نمتو بلا لحود .. ردتك بس تعود