إجراءات النقل الموازي

مساء الخير شباب طبعا ألف مبروك للمقبولين الحمد لله خلصت وعدت ع خير عيشوا الفرحة وارضوا بالقبول الطلع الكم حتى إذا مامقتنعين بي هالشي صار سنتين تنتظروا وتذكروا اختيار رب العالمين دائماً بي صالح النه والماطلع قبولهم انتظروا وشوفوا قرار الوزارة وإن شاء الله فرحتكم تصير أكبر آخر شي بما انو إنتهت مسيرتنا وياكم فعذرونا من التقصير وابرولنا الذمة إذا صدر شي من عدنا نتمنالكم الخير والتوفيق ونشوفكم بأحسن الأماكن ونلتقي ع خير إن شاء الله❤️

وبالنسبة للتأخير فأي صح هذا كله ع الأغلب لمصلحة الطلاب علمود يحاولون يرهمون أكثر عدد بالجامعات العام حتى الطلاب الجان عندهم خطأ بالانسيابية وماطلعلهم قبول نشرت الوزارة وكالوا تعالوا واختاروا وحدة من الجامعات البيها مقاعد شاغره بين قوسين ماكو طالب نرفض العام اذا جان مستوفي الشروط هالسنة إن شاء الله نفس الشي واذا لا سامح الله وصدك ماحصلت قبول ع كلامهم فطبيعي انت ترجع لجامعتك ودولتك بس هسا من يجيك واحد يكلك انت مامقبول وتبقى بين نارين لا تكدر تصدك بي وترجع ولا تكدر تنتظر هنا وتبقى بس تفكر راح تدمر نفسك خليها وره الله وابتعد عن الأخبار السلبية ومن تطلع القبولات فبأي وضع جنت راح تلكه حل لنفسك وإن شاء الله يجي يوم وتصير هالأيام كلها سوالف وتحسون بإنجاز كلش جبير لان عبرتوها وصبرتوا

صباح الخير شباب راح اسولف وياكم عن تجربة بالنسبة الي مريت بنفس القلق والتوتر التمرون بي هسا وأعرف تأثير كل موعد وكل كلمة يحجيها أو ينقلها طالب ولمن تبقى تتأمل بموعد وشلون تخيب وراها الصراحة موضوع القبولات المفروض تعرفون بي موضوع ما اله وقت معين وهالشي طبيعي بالعراق كلكم مريتوا بنتائج وزاري وقبولات وشفتوا شلون يأجلون بيهن وع ساعة يطلعن بوقت مو محدد فخليكم شوية متطمنين ولتزودوها ع نفسكم بالأخير راح يطلعن وإن شاء الله هذا التأخير بي فائدة الكم وبالنسبة لموضوع القبول والرفض فهذا الشي محد يدري بي ماكو أي سنة تسربت معلومات راح نقبل هيج عدد وهيج معدل العام جان عددنا مقارنا بالقبلنا هم مبالغ بي وكالوا ها عددكم هواي واحتمال متنقبلون كلكم وهواي راح ينرفضون وغيرها وغيرها هذا الكلام جنه نسمعه من الطلاب طبعا بس الوزارة وست منال من جنه نسألهم جانوا يكولون نحاول منرفض واحد وان شاء الله خير للكل فالوزارة هي جاي تنطي أمل للطالب ليش ترجعون تخيبون املكم بسبب كلام متناقل من واحد لواحد تره تتدمرون والله واذا ع المعدلات والقبولات فاتحدى واحد يعرف بيهن غير الوزارة حتى الخبرة والمراقب قبولات مال 5 سنين راحت ماراح يعرف شنو يصير هالسنة واني شفتها قارنت بالسنة القبلي من ناحية معدلات ومقاصة وغيرها وغيرها من طلعت قبولاتنا شفت الوضعية مختلفة شفت جامعات جانت تقبل معدل قليل قابله بسنتنا معدلات أعلى واكو جامعات بالعكس نزلت معدلاتها واستوعبت طلاب أكثر المقاصة نفس الشي كل سنة قرار يختلف فماكو أي شي ثابت بكل السنوات وحدة من عدهن العام الطلاب طششوا سالفة أكو جامعات ميقبلن وافدين وأولهن جامعة بغداد بعدين كل جامعات العراق قبلن وأكثر جامعة قبلت وافدين هي جامعة بغداد الكالوا متقبل أبد فكلام الطلاب لا راح يقدم ولا راح يأخر اخذوا كلامكم من الوزارة

صباح الخير شباب مو تنسون التقديم ضروري ضروري مو واحد ينسه للظهر مامقدم ويبقى حاير بعدين وبالنسبة لضغط الملفات استخدموا برنامج ilove pdf وحاولوا إذا ترهم صورتين تخلوهن بصفحة وحدة فبعد أحسن خاصة الجواز حتى حجم الملف يقل وميتعبكم بالضغط

بقت شغلة أخيرة علمود الأمر الإداري مال فتح الملف لازم المعلومات واضحة بي وخاصة الإسم فإذا أكو مشكلة الأسم مو واضح أو شي من تروحون للوزارة سحبوا ملف ثاني

واليسألون ع الملفات المضغوطة أغلبهن تقل دقتهن لدرجة مرات ميبين شي فهم ماكو مشكلة وحسب كلام الوزارة العام كالوا رفقوا الملف واضح لو مو واضح أهم شي أقل من 500 وهم يحيرون بهالشي بعد وكلنا رفقنا الملفات ومامبين إسم أو درجة منهن وهم طبيعي مشن بدون أي مشكلة

إذا اكو واحد مامتطمن وعباله يصير رفض أو شي فماكو هيج حجي بالنسبة للطلاب قبلكم إذا جان عدهم خلل فكتبولهم خلل بفلان شغلة بدون ميكولون رفض بالنسبة لليقدمون متأخر والي هم أغلبكم فميلحكون يدققون الكتروني أصلا ويصير التدقيق مباشر بالمقابلة واني العام هيج صار وياي نسدت البوابة ومعاملتي بعدها بانتظار التدقيق حتى مو قيد التدقيق ورحت للوزارة وطبيعي دققوا المستمسكات الجايبها الهم لأن ذني المهمات ومافتحوا السايت أبد

مساء الخير بالنسبة للطلاب البقه كشفهم ماكامل من ناحية الختومات (عدل،خارجية، سفارة) أو حتى إذا جان الكشف بعده مامترجم مادري إذا اكو طلاب بعدهم متأخرين لهالمرحلة أو لا بس ع العموم هالشي كلش طبيعي وماراح يضر بالنقل اذا نسدت البوابة باجر عادي تكدرون تقدمون وترفقون المستمسكات الموجودة عدكم والكشف يبقى لبعدين تسلموا وقت المقابلة بالوزارة وأي واحد يحب يتأكد فهالشي مذكور ضمن الضوابط النشرتها الوزارة (إذا اكو نقص بالمستمسكات الكم فرصة تسلموا يديوياً لحد تاريخ 22/9) أهم شي اليوم كون كل الطلاب مقدمة ورافقين المستمسكات الموجودة عدكم الكشف اذا كمل باجر قبل متنسد البواية فخير على خير رفقوا ويكمل كلشي إذا ماكمل فهالشي إن شاء الله ما اله أي تأثير عليكم

بالنسبة للجامعات التريد تقدم عليها أكيد كل طالب بيكم لازم اول ماقدم ع إيران بباله بالقليل جامعة أو 2 يقدم عليهن خاصة دفعتكم جان عدهم فرصة ومعرفة أكثر لان احنه قبلكم من قدمنا نقل جانت اول دفعة تقدم ع كل جامعات العراق وجربنا كل القرارات والاختلافيات😂 بس هسا…

أتمنى المعلومات كلها صارت واضحة والعنده استفسار يسأل ويدلل وإن شاء الله التوفيق للكل❤️

طبعا وره هاي النافذة جان اكو خيار اتمام التقديم يمكن لازم تختاروها وعاشوا عيشه سعيدة تبقون تنتظرون المقابلة والقبول

بالنسبة للمستمسكات المطلوبة بالمقابلة ذني نفسهن الرفقتوهن بس مطلوب كم نسخة من كل مستمسك والأفضل كلشي تسوون منه 4 أو 5 نسخ لان مرات يتحججون وحتى متضطر بالوزارة تطلع وتنزل تستنسخ من جديد ها أخوان ذكرتوني كل واحد يستنسخ من يم اهله احسن لأن المكتب اليم الوزارة مقطاطة بشكل مو طبيعي تحسه نسخة إيرانية يشوف الطالب فلوس بس أتذكر اني استنسخت كلشي صار ب8 الاف الطلاب الاستنسخوا يم الوزارة ب40 واذا يشوفه كردي يطلب 50 فيعني ديربالكم منه وحاولوا تجهزون كلشي قبل متروحون وإن شاء الله ميعتبر قطع أرزاق لأن هو استغلالي بالنسبة لكشف الدرجات حاولوا تخلون نسخة او2 إضافية يمكم خاف تحتاجوها بعدين لان اكو جامعات وقت التقديم طلبوا نسخة هم

كل المعلومات بالاستمارة سولفنا عنها ماعدا المجموع فتكبتوا بدون اي إضافة يعني لا إضافة دور اول ولا فرنسي نسخ لصق مثل مامكتوب بالوثيقة

هاي كل المستمسكات المطلوبة واعتقد واضحة بالنسبة للاستمارة فهسا انزلها الكم للماموجوده عنده واشوف استمارتي اذا موجودة هم انزلها حتى تعرفون شلون تملوها كشف الدرجات حسب ماسمعت هالسنة مطلوب عربي هم وكلنا عرفنا متأخر بهالشي ومالحكتوا تترجمون اذا واحد لحك وترجم عربي خل يرفقه ويه الكشف المترجم والفارسي بملف واحد واذا مالحكتوا فمو مشكلة رفقوا الكشف المترجم والفارسي بس وطبيعي ماكو مشكلة اذا اكو نقص يطلبوا بالمقابلة أصلا اكو طلاب العام جان عدهم نقوصات وخلل بالكشف اذا مو واضح او نقص بي وعادي مشوها الهم واخذوا منهم بالمقابلة بالنسبة للجواز حاولوا تستنسخون كلشي يخص إيران اول صورة منتهين منها مطلوبة يبقى عدنا الإقامة،الخروجيات،ختومات الدخول والخروج،الباركود باخر صفحة كلهن سوولهن سكنر ورفقوهن سوه طبعا بالسايت الملفات لازم حجمها اقل من 500 كيلوبايت مو تتوهم وعبالك كاتبين ميگابايت لان هواي عبالهم هيج ويجي يريد يرفقه ويشوف ميصير يبقى حاير وخايف عباله اكو مشكلة اذا جان الملف الأصلي 500 او اقل رفقه مثل ماهو ميحتاج ضغط بس اذا أكثر من 500 لا ضغطه وحاول تنزله لهالحجم

كملت من التقديم ع الجامعات تختار حفظ وراح تنفتح نافذة جديدة ترفق بيها المستمسكات

مثل ماكلتلكم التقسيم هيج لازم يصير متدرج من الرغبة لحد اخر شي مثل ميكولون إن بعض الشر أهون فتخليلك جامعة او 2 تضمن قبولك بيهن احسن من ماكو حتى اذا رجعت أولى

أما بالنسبة لطلاب 22 فهم اعلى نسبة بين الطلاب وأكثر دفعة راح يصير بينهم تنافس أتمنى تختارون الجامعات بدقة حتى تضمنون القبول كشي أولي خاصة اذا جان معدلكم 95 او 94 لازم تخلي فد 3 خيارات او 4 من الجامعات التقبل معدل قليل وعدد هواي ركزوا اهم شي ع العدد هواي لان اكو جامعات بالقبول المركزي تقبل اقل معدل بس بالنقل تقبل عالي لان مقاعدها قليلة وعليها لود