追蹤黨媒

星島大棋盤報道李慧琼變身反駁隊，話有傳媒報道議員零發言容易誤導，獲多名議員讚主席英明。 講完發言唔係越多越巴閉，文鋒一轉，就講有議員發言多頻頻惹禍，其中提到有選委界新丁的議政風格令人皺眉頭，話呢個議員成日拍片點評時政，號稱有百萬粉絲，發言時就講自己「有幾把炮」。 小編搵咗好耐都搵唔到邊個新丁有百萬粉絲咁把炮，不如集結網民力量大家留言估下？

梁美芬出post話繁忙時間坐地鐵唔使塞車，小編唔明點解佢好似發現新大陸咁。 而且「港鐵」個名改咗近20年，但梁美芬仲叫緊舊名「地鐵」。 但小編更唔明係，點解要用三張selfie去講呢種市民日常，難道佢真係冇坐過港鐵？

星島報道明日李家超與立法會議員舉行首「對談交流會」，其實雙方至今有「前廳交流會」、特首答問會叫做「互動交流答問會」，而家又多個「對談交流會」。 星島發揮「政府憲報」角色，幫政府傳話指三個交流會意義不同，但小編睇咗呢段文三次，都唔明即係有乜分別，只明白今次會在從容放鬆的氛圍下，「有助議員更好表達想法，包括心路歷程、感想等，直接向特首反映」。 未完善嘅立法會，議員能言善辯，反而完善議員幾十歲人想表達心路歷程同感想，點解會搞到咁複雜。

大公報繼續報道全體完善立法會議員上京研修，夏寶龍在座談會勉勵議員。但最精彩的是屠海鳴的大半版超長八股文，講今次完善議員北京研修的歷史意義。 小編得閒得滯睇晒成篇文，最震撼嘅係佢嘅金句：「一次研修，是一次潛移默化的思想洗禮。」我哋終於學識點樣將「洗腦」變成褒義詞啦！

星島報道立法會議員去北京研修，全程嚴過管小學生，除咗全程閉環管理，即係唔可以擅自出門外，仲唔可以擅自講嘢。 星島話李慧琼自己向傳媒發放資訊，要求議員切勿個別受訪，或在社交平台打卡，會嚴格追究任何洩密行為。 唔可以個別講嘢，但要被分配講乜嘢。星島話每日行程完結，會安排若干名議員「分流」發表學習心得或感受，但又要避免同一時間出帖，意見高度重覆。 有資深議員話要求統一口徑係正常。

香港01報道夏茶元朗順豐大廈店無故被淋紅油。店主報警落口供後，「從相關部門得到的『專業建議』竟是盡快結業」。夏茶表示既然相關部門無法保護，宣佈7月26日結業。 夏茶個po係琴日嘅，但01決定留到今日721先出呢篇元朗新聞，係咪想提醒大家長官咁多年嚟都好叻叻，執咗咪唔駛保護囉。

小編得閒得滯去書展，發現唔止主場館冇咗二樓書店攤位，仲冇咗好多小型出版社的攤位。 不過其他攤位冇晒，唔等於大公文匯報攤位多咗人，小編走去大公文匯攤位，目測人數係零。 不過文匯出post自稱攤位「人氣旺」，明明相中只得幾丁友，唔知文匯報等咗幾耐先影到呢幅難得有人睇緊書嘅相呢？

大公報寫到業主大會好緊要，但段段都係警告唔好搞事，話若有人會上肆意鬧事、做出激烈言行，就係赤裸裸「以災亂港」。文章仲叫合安同執法部門應嚴陣以待，對任何擾亂會議、危害安全的行為，果斷採取拘捕行動，依法查處。 咁大公報同恐嚇災民有乜分別呢？

香港01報道工聯會勞工界立法會議員李廣宇被一位前議員助理告上勞工處，因而自揭議助人工竟然有五萬蚊。呢位議助上屆幫黎棟國做議員助理，小編冇印象黎棟國有乜貢獻，所以難以幻想黎棟國嘅議助有乜能力。 呢位議助而家控訴李廣宇將佢五萬蚊人工壓至38,000，但提供年終四個月工作表現獎金。圍返條數，年薪都係大概60萬。 不過李廣宇諗縮數，25年12月31日簽兩年合約，過咗半年就即時解僱，慳返年終嘅獎金。呢位議員助理控訴李廣宇「階段性利用」，即辦事處全面投入運作後隨即終止僱傭關係。 應該冇乜市民講得出李廣宇個名，佢對上一次上新聞，係21年中大校友評議會改選，當時被評為「黃藍之爭」，藍絲代表李廣宇低票落敗常務委員議席，佢張競選海報老土過長輩圖。 除此之外，應該冇人知李廣宇乜水，小編覺得你要多謝呢個議員助理推你上報囉。

星島報道全體立法會議員（可憐黃錦輝冇份）下周日飛去北京，由周一至周五研習。以前有得住五星酒店，而家入住三星級國家行政學院，而且實施閉環管理，日日困獸鬥。 連續五日，每朝在學院上堂，包括「了解中國共產黨奮鬥歷史」、「考察新質生產力產業」，下午外出參觀，晚上要返學院做內部研修。 有議員表示想出發前閱讀國家政治經濟歷史，但因為行程保密，目前欠缺資料，小編驚歎佢哋幾十歲人，連要搵乜嘢資料睇都唔識。 重點係，星島話汲取上次日本考察教訓，今次唔准坐商務客位，只能坐經濟客位，機票開支為港幣3700。 小編記得2022年習主席訪港都係搭高鐵，林鄭仲同老公去西九站月台接車，立法會議員點解唔去搭高鐵體驗國家偉大基建而去搭波音同空中巴士？小編唔甘心囉。

明報報道曾鈺成出傳記《崢嶸歲月》，佢最初交畀出版譚耀宗傳記的中華書局出版，點知「中華書局」唔肯出，話因為曾鈺成提及六四。 曾鈺成話：「如果無六四，可能就無民建聯，我不能不講這一筆」，最後搵咗「天地圖書」出版。 連曾鈺成出自傳都被審查到退稿，感謝三中商示範由治及興邊可能仲有出版自由呀。

文匯報全版報道記者放蛇去獨立書店，話佢哋賣獨書，被點名書店包括： 一拳書館賣顏純鈎《香港我的愛與痛》，話書中揚言「一國兩制已經破產」，抹黑特首「以結果為目標」的施政理念。 獵人書店門口留言簿發現眾多帶有「港獨」意味的字句，但冇寫即係乜嘢字句。 樂文書店旺角總店有多本抹黑國家的書籍，包括李怡《世說短語300篇》捏造內地人「搶走」香港資源和機會，挑撥兩地矛盾。 榆林書店賣楊健興著作，書中宣稱政府打擊「軟對抗」係「矯枉過正」，又抹黑香港「寒蟬效應無處不在」。 連保安局局長都冇話香港有禁書，香港三聯同商務書店網上平台「一本文化閱讀購物平台」都賣緊李怡嘅書。文匯報咁樣批鬥書店，唔係製造寒蟬效應，係乜呢？

港台最近打鑼打鼓宣傳港台電視32台有新節目，話請咗班女主播報道新聞 ，又話同大公文匯製作時事資訊節目。 今日條宣傳片介紹資深主播王巧加盟港台，大大隻字寫港台「陪你見證每個歷史時刻」，但港台眼中嘅歷史時刻好有趣。 1997年歷史時刻當然係「香港回歸」、2001年揀「911恐襲」都合理， 但2003年歷史時刻唔係50萬遊行或董建華下台，而係「神舟工程升空」， 2011年「日本311大地震」都有，竟然冇2019年反送中示威， 2025年歷史時刻竟然係「粵港澳全運會」，宏福苑大火提都冇提。 港台新聞真係好有公信力囉。

雖然小編畀江旻憓（或者佢阿媽）block咗，但總有辦法睇到佢出post。 佢新post話自己去旁聽領隊課程，然後寫咗一大段嘢讚美領隊，話「領隊是領導人、發言人、公關大使、心理學家、奇蹟創造者和照顧者。」 雖然呢番說話太浮誇又太造作，但小編都想讚歎江旻憓終於有啲諗法，而唔係照稿讀。 點知佢響留言貼咗領隊班教材，原來內容又係抄嘅。

黨媒難得咁老實，小編冇補充。

中銀香港最近好活躍，早前同金管局、警務處推出防騙宣傳車，仲畀錢請一眾黨媒做廣告特輯，又資助TVB製作《防騙必修班》節目。 佢仲整咗個吉祥物叫「蜜桃保保」，口號係「蜜桃蜜桃，提防騙徒」，即係提子啲friends。 小編建議中銀順勢推出詐騙受害人保險，保費開幾百萬都可以，就算港漂生被人呃成千萬，都有中銀保險賠償，呢門生意大有可為。

星島旗下東周刊封面係「警國安處查獵人書店」，內容翻炒星島早前照抄警方通告的報道，封面副題寫「揭前區議員店東 收大額海外資金」，但文中唯一相關的內容只有兩處： 前言：「黃文萱另涉洗黑錢，收取海外反華組織多筆數以十萬計的款項。」 內文：「黃文萱另涉違反洗黑錢罪，收取多筆數以十萬計來自海外反華組織的可疑款項。」 然後再沒有然後，關於洗黑錢嘅內容咁就寫完。 文中不斷標籤黃文萱係「前公民黨」、「前區議員」，好似以呢個身分被國安拘捕就好爆，咁小編都爆料啦：黃文萱曾經係星島日報記者，網上仲搵到佢在星島訪問田飛龍的報道。 前星島記者被國安拉，仲爆呀！

東方報道警方6月21日通報大埔有老婦自縊身亡，通報寫明涉案地址為「大埔汀角路船灣詹屋275號一獨立屋」，但事隔12日，警方將地址更改為「大埔汀角路船灣詹屋一獨立屋」。 東方寫「受警方更正通報一事影響，傳媒需將原先報道的地址同時作出更正，更背上報道失實的污名，甚至有住宅無故被標示為「凶宅」，影響深遠。」 小編讀到的潛台詞係「你自己衰好唔好L連累我啦」，東方警訊真係好好睇。

星島大棋盤報道黃錦輝醉駕、hit and run及知情不報，比陳家珮逆線行車嚴重得多，文中引述有議員話「唔係擔心佢政治前途，係驚佢坐監」。 唔好以為呢個匿名議員係擔心黃錦輝捱唔慣監獄，因為佢下句係「對立法會形象好大影響」，小編get到的潛台詞係「你死你嘅事，唔好陀衰家」。 有建制中人指內地紀檢機關對醉駕案件毫不手軟，被「雙開」是基本動作，相信黃錦輝保得住今屆議席，後年換屆時亦難以連任。 港聞版列出黃錦輝除了是中大工程學院副院長外，亦是林大輝中學校董、順德聯誼總會李兆基中學法團校董會獨立校董等等。 中大學生關靖豐一被捕就被中大踢出校，呢幾間學校冇理由唔將黃錦輝踢出校喎，係咪先？

香港01直播回歸29周年升旗禮，標題係「董建華六年缺席」。 一個人失蹤六年好可疑，而且係重要人物，其實使唔使報警呢？