«من جهةٍ أُخرى 🤎!»

سنن يوم الجمعة 🤩 قراءة سورة الكهف. الإكثار من الصلاة على النبي 🤍. الدعاء في ساعة الإجابة. دعاء اليوم : 💜 اللهم في هذا اليوم المبارك ، اغفر لنا ذنوبنا ، وأصلح قلوبنا ، و ثبّت أقدامنا على طاعتك ، ولا تجعل الدنيا أكبر همّنا ، و اجعل الجنة هي دارنا و قرارنا. آمين

" لم أبتعد لأنني قسوتُ فجأة ، بل لأنني تعبتُ من تجميع المبررات لشيءٍ كان واضحًا منذ البداية .. كبرتُ لدرجةٍ جعلتني أرى الأفعال كحقائق مجردة ، لا تشوبها الأمنيات 💚 ! ." ​في آخر المشوار ، بعد ما العواصف تهدأ و الوعود الساي تتلاشى في الهواء .. في حقيقة قاسية جدًّا وهي : انو مافي زول بظلمك من دون قصد بصورة متكررة كل زول عارف نفسه كويس هو بعمل فشنو .. ف التصرفات ما بتطلع عفوية لمّا تتكرر بنفس النمط ، و الخُذلان لمّا يبقى عادة .. دا بكون قرار ضمني انو خاطرك و قدرك عند الشخص دا ما عندهم القيمة اللي كنت بتتخيلها . فرغ كل المخزون بإيدهُ و ثمة أشخاص بفتكروا اننا بنغيّر معاملتنا فجأة .. فجأة انو قلوبنا بتقسى بين يوم و ليلة .. ما مدركين ابدًا إنو لكل زول "مخزون حنيّة و غلاوة ! " بيت كبير من العشم بنبنيهُ بصبرنا و تغاضينا عن الهفوات الصغيرة .. كتير بنغمض عيونا من الأخطاء و بنعمل رايحين .. بنفتش للمبررات كتير جدًّا ، تحس نفسك عوير عديل و انت بتقول : لا بكرة حيكون احسن و سوي و ح يفهمني في نفس الوقت الخذلان يتكرر اكتر واكتر وببرود حاد ، الزول القدامك بكون بيده بفرّغ في الرصيد دا نقطة نقطة .. بيهدم في البيت اللي بنيته داك كل خيبة جديدة بتمسح حتة من صورته السمحة الكانت مرسومة في قلبك .. كل تصرف رخيص بنزل مقامه عندك درجتين لورا .. لين ما يوم تصحى الصباح تلقى انك ما طايق الإنسان دا كُلُّ كُلُّ .. خلاص الرصيد الفضل ليهُ جوا صدرك بقى صفرًا كبيرًا و موجعًا 👌 عارف لمّا تطلع فوق برج فيه ٢٥ دور .. وتجي واقع من هناك ؟ يلا دا ما صعب.. الأصعب هو "السقوط من العين." صعب شديد تعاين لزول كنت بتشوفه كبير كبر الكوكب دا كله بحجمه الهائل دا ، و فجأة بأفعاله ونوياه تشوفه صغر لدرجة الاستغراب عرفت انو نحنا بنزعل شديد و بننكسر من الاشخاص الخذلونا .. والله لا عشان هم من دهب ولا عشان هم احسن ناس .. عشان نحنا كنا بنحاول نصلّح في اشياء ما بتخصنا .. ضيعنا وقتنا في خلق ما بتستاهل في مقولة ذكرتني بالكلام دا .. "كنت بصلّح في المراية و جرحتني في النهاية ." بنحاول نكون اللون الوردي لناس ما بستاهلوا إلا اللون الرمادي أو الأسود .. و وقت حقيقتهم تظهر لينا !. هنا نحنا الناس الكنا اللون الوردي ليهم ؟ ح نسيح زعل . ح تعدّي عليك لحظة ح تسكت .. و كل أفكارك بتقول ليهو : "انت هسي بقيت شخص عادي جدًّا ، و ما بتستاهل حتى اننا نتناقش في الوجعني شنو ." اعرف انو النفوس بتتعرى بالأفعال الأيام بتعلّمك انو الوشوش الجميلة دي و الرصيد اللفظي ما بيعنوا أي حاجة لو ما كان عندهم أفعال صادقة الناس هي البتحدد تقعد وين في حياتنا ، هي البتختار بتصرفاتها و مواقفها اليومية إذا كانت ح تفضل تاج فوق الراس ولا ح تتحوّل لمجرد اسماء عابرة في قائمة الغرباء .. و دايمًا النهايات ما بتجي بالخصام .. او بصوت عالي ؛ النهايات بتخش بهدوء لما تقفل الباب براحة .. و ترجع خطوتين لورا .. وتعاين للزول دا هو بنزل من نظرك حبة حبة لين ما يتلاشى طيفه تمامًا #على_هامش_اللطف 🤎! الشفاء و الراحة النفسية ح تذوقهم لمّا توقف عن تجميل أفعال الناس ، لمّا تتقبل الحقيقة زي ما هي : الزول العايز يفضل في حياتك بصدق ؟ ح يحافظ على خاطرك ، و زعلك ما حيهون عليه ، و الزول البستسهل كسر خاطرك ، الأفضل تسيبه يتصغر بأفعاله بعيد عن مدارك ، و توفر حنيتك و دفئك دا للناس البتعرف قيمة العشرة ، السند ، الودّ الصادق 🤎📌." #محمد_حاتم.

سنن يوم الجمعة 🤩 قراءة سورة الكهف. الإكثار من الصلاة على النبي ﷺ. الدعاء في ساعة الإجابة. دعاء اليوم : 💜 اللهم في يوم الجمعة ، لا تدع لنا ذنبًا إلا غفرته ، ولا همًّا إلا فرّجته ، ولا حاجةً هي لك رضًا ولنا فيها صلاح إلا قضيتها برحمتك يا أرحم الراحمين ❤️

صباح الخير لُطفًا 🤩🤩 عارف؟ بعد كل خازوق تاخده في علاقة كنت خاتي فيها روحك بكامل طبيعتك ، ح تتغير حاجة جوّاك و للأبد .. و مهما كان التغيير دا مُنْهِك ، فهوَ لازم كان يحصل. ح تبطّل تبقى ذاك البني آدم العبيط اللي بصدق اول كلمة حلوة .. و بترمي بطوله في أول سكة أمان مزيفة . بيختلق جوّاك نوع من الاستغناء ؛ و ابدًا ما قسوة ولا كره للناس .. دي حالة ناضجة بتنوّر بصيرتك ، بتخلّيك تعاين للناس بعين مجردة .. و تسند قلبك بعد طول ميل. كل الخيبات على قسوتها ما كانت إلا دواء مُر لطيش المشاعر و تسرّع العاطفة ، صدمة حامية بتفتح عينك من عمى العاطفة .. و بتزيدك حكمة في معرفة المعادن . ​عشان كدا ، الخُذلان، الوجع، إلخ... إلخ... ديل ما كانوا خسارة .. هم ثمن الوعي. بخلّوك اتقل استغناؤك أتم.. و بيرسموا مسافة أمان عريضة بينك وبين كل شخص بحاول يقرب منك بعاطفة عابرة ❤️ #بعض_من_اللطف ​"إننا لا ننضجُ بالسنواتِ يا صديقي ، بل بجهنمَ صغيرةٍ نمرُّ بها داخل أرواحنا .. نسيرُ فيها بعيونٍ معصوبة ، و نخرجُ منها ببصيرةٍ تسعُ الكائنَ كلَّه 🤩." 🏷 مُحمّد حاتِم

الڤيديُو دا يخلي الواحد يخجل من ربنا والله! لفت نظري إننا إزاي بنعصي ربنا كمان وننام بعدها عادي بدُون توبة! يا اللّٰه، اعفُ عن تقصيرنَا.'( -

​"السماءُ غارقةٌ في صفائها الخالد ، و النجوم تسهر في عتمةِ الليل كما هي ، و الطقسُ باذخٌ بالجمال في دورة فصولهِ الأربعة ؛ كلُّ ما في الطبيعةِ يدعو إلى الدهشة ، لكنني في غمرةِ تأملاتي ، أرى ان الحياةَ قد انتهتْ منذ زمن .. كلما عبرنا عتبةَ عامٍ جديد ، ألْفَيْتُ البشرَ يمعنون في الخيبة ، يتفانون في الأذى ، و ينحدرون نحو مداراتِ الأنانيةِ و الحُمق .. ​يراودني في كثيرٍ من الأحيان شعورٌ غريبٌ و موحش ؛ كأنني ذلك الكائن الغرير الرقيق المغلوب على أمره ، غريبًا وسطَ حشدٍ من مختلي الوعي ، محاطٌ بذواتٍ خاويةٍ لا تدركُ كُنهَ اللطف ، ولا تفقهُ من الصدقِ حرفًا .. كائناتٌ احترفت العبثَ بالمشاعر ، و إتقانَ لعبةِ قلبِ الطاولات و الوقائع بمجردِ أن ينتفضَ المرءُ عاتبًا أو حزينًا ؛ ليتأكدَ لي يومًا بعد يوم ، أنهم ليسوا سوى مرضى عاجزين عن سبرِ أغوارِ النقاء ." 🏷 مُحمّد حاتِم

مُذكّراتي من الضفة الأخرى: انا واحد من الناس البتعرف تعذر كتير .. يعني انت شخص بتعني لي حاجة ! و بتهمني ممكن اعذرك كتير لمّا انت تستغرب ممكن اتجاوز مرة ، و مرّتين .. و عشرات المرات .. عشان العشرة اللي بيناتنا ، ما ينفع من اول غلطة منك انا احظرك !. و اخليك وراي ح امشّي ليك اغلاط كتيرة جدًّا .. ممكن ازعل منك.. ممكن اشاكلك لأن بتكون جبت آخري .. و رغم ذلك برضو مكانتك في غرف قلبي ياها ذاتها .. ح افضل شايل ليك نفس الود ، لأن بالنسبة لي الإنسان ما بيتقاس بلحظة غضب ، أو زلة لسان ، أو مثلًا بموقف واحد خانته فيه نفسه . بفضل اشوف الناس من تاريخهم معاي ، ما من أسوأ نسخة ظهرت منهم في لحظة انفعال ، بقول بيني و بين نفسي: نحن بشر .. بنتعب ، بنغلط ، و مرات الوجع بتكلم قبل العقل .. لأن عشان الزعل دايمًا بجي على قدر المحبة 🤎! ف في الوقت داك ممكن تطلع مننا كلمات ما بتشبهنا .. الليّن المسكين العوير الهيّن الشايفنه ضعيف دا .. هو اصدق و اطيّب شخص في الأرض الملعونة دي لكن حتجي لحظة ! الحسابات دي حتكون ليها خط نهاية ؛ و ح يجي الوقت الأفصلك فيه تمامًا ، و حتى ما أعاين ليك .. ح أمسح وجودك من حياتي و كأنك عابر ما جمعني بيه طريق في يوم ، و ح يكون من المستحيل أرجع ليك بنفس الملامح العتيقة العرفتها فيني .. و ماف شيء بزعّل ، لأن دا الحصاد الطبيعي لإيدك ؛ ما ممكن أكون ببني ، و انت بتهدم .. بأخطاء غبية ما محسوبة اخطاء على وجه الكرة الأرضية .. حيجي وقت لو انا كنت العلاج بالنسبة ليك حأكون اتلاشيت ✨ .!

دعُاء لا يـرد : 📖 اللهم اني اشكو اليكَ ضعفُ قوتي ، وقلة حيلتي ، فأنت رَب المستَضعفين ، لا تَكلني الى احد من العَالمين ، و اكفني ما اهَمني بِحَق محمد و ال محمد🤍

«اطمئن… لا يضيعُ عندَ اللهِ جهدٌ». أطنانٌ من التعبِ تمحوها فكرةٌ واحدة: أنَّ سعيَك محفوظٌ عندَ الله، وأنَّ ما تبذلُه لا يضيع، ولو تأخَّر أثرُه في عينيك. ﴿وَأَنَّ سَعْيَهُ سَوْفَ يُرَى﴾، فاللهُ يرى جهدَك، ويعلمُ صدقَك، ويُجازيك عليه في الوقتِ الذي يراه خيرًا لك؛ فامضِ ولا تلتفت.🩷

قال تعالى: ​﴿قُلْ يَا عِبَادِيَ الَّذِينَ أَسْرَفُوا عَلَىٰ أَنفُسِهِمْ لَا تَقْنَطُوا مِن رَّحْمَةِ اللَّهِ﴾ أعظم انواع الإسراف ليس تبديد المارِ و الوقت ، بل هو ذلك النزيف السرّي الذي تُحدثه في روحك حين تنصبُ لها محكمةً لا تهدأ .. انْ تسرفَ في جلد ذاتِك على ذنبٍ مضى ، او خيارٍ خذلك ، ف تتحول من انسانٍ يخطئُ و يصيب إلى قاضٍ جائزٍ و جلّادٍ لا يرحم 👌 الخلاص الجوهري يبدأ حين تضعُ الحرب الداخلية اوزارها ، و تدرك ان الله يغفر لك ما لا تغفره انت لنفسك 🌟.. انصاف الليالي في الغالب ما بتمر بسلام .. كل واحد فينا عنده حربه الخاصة الجوّاه اول ما تقفل عليك باب غرفتك ، بتبدأ دقات المحكمة السرّية الشغالة جوا جمجمتك دي بإنتظام مُرعب . المحكمة دي غريبة جدًّا ؛ القاضي فيها هو انت ، و المتهم الواقف في قفص الاتهام هو انت .. و الجلّاد الشايل السوط و مستني الاشارة .. برضه انت! بتبدأ تفتح ملفات القضايا القديمة الماتت و شبعت موت ؛ تلوم نفسك على زول وثقت فيه زمان و طلع ما بسوى ، تجلد ذاتك على كلمة غيبة قلتها في موقف و كان المفروض تسكت ! تلوم نفسك على فرصة ضيعتها بغباء ، أو حتى على ملامح ضعفك و انكسارك القدام ناس ما كانوا بستاهلوا يشوفوا دموعك .. بتقعد تحاكم روحك بكامل القسوة ، و تجلد في عصبك لين ما الفجر يقرّب يطل ، و انت لسه بتنزف من غير ما زول يحس بيك . الحاجة دي مُهلكة للغاية .. بس لو قلت بسم الله على روحي .. خلّيني اجرب اتصالح مع كل الندوب الجارحة دي و كل الأشياء دي و أصاحب نفسي . كيف تتصالح مع كل العلامات دي! لمّا تبدأ تكتشف انك بقيت قاسي و ظالم مع نفسك اكتر من كل الاشرار المروا بحياتك . تعالوا نعلن هُدنة مع الجلّاد الجوانا دا .. تعالوا نجرب نسامح نفسنا 🌟 الفايدة شنو تكون بتطبطب على كسر الغريب ، و بتلتمس العذر لقلة ذوق القريب ، و بتقول "حصل خير" لكل الناس .. و انت واقف لنفسك بالمرصاد في كل غمضة عين ؟! القيمة شنو في إنك تدّي صكوك الغفران و المُسامحة للعالم كله ، و تجي عند مملكتك الصغيرة و تعيّشها في سجن مؤبد من التأنيب و الندم ؟ النسخة الكنت عليها زمان و غلطت ، ما كان عندها وعيك ولا نضجك ال هسي الهسي دا .. النسخة ديك عملت الغلط لأنها كانت خايفة ، أو كانت قليلة حيلة ، كانت مفتكرة بسذاجة انو دا الصاح .. ما ينفع تحاسب نسخة قديمة بمشرط جراح شلته بعد سنين من الوجع و التجارب. الخراب كله ما في الغلط الاخدناه زمان ، في اننا لسه واقفين في نفس المحطّة ، بنعاقب في جثة زول فات و انتهى ، و بنحرم نفسنا الحالية من الهداوة و الامان عشان ذنب سطر قديم اتمسح من كتب السماء و لسه مكتوب في دفاترنا التعبانة .. تعالوا نقفل قاعات المحاكم دي .. تعالوا نمسك يد نفسنا القديمة ، الضعيفة ، الخايفة ، و نقول ليها بكل حنيّة : "معليش .. من قلبي لقلبك انا مسامحك .. انتي سويتي افضل ما عندك في وقتها ، و هسي لازم نرتاح🩷." ​«لقدْ عاقبنا أنفسنا بما يكفي .. و حانَ الوقتُ لنخلع ثوبَ الجلّادِ و نرتدي النبلَ مع ذواتنا .. إنَّ النفس التي تُجبر كسر الجميع ، تستحقُّ أخيرًا أنْ تجدَ الأمانَ في مأواها الأول .. في قلبِ صاحبها 📌.» #هدنة_مع_الذات 🏷 مُحمّد حاتِم

عارف! في حقيقة واحدة لو رسخت جوّاك ، ح تختصر عليك كثير من الخيبات : "حُب الناس مواسم." 🤎 الحوار ما في ان الفصول بتتبدّل .. المشكلة اننا بنعامل بعض الناس كأنهم صيفٌ دائم ، و بنفرش ليهم قلبنا بكل لُطف و لهفة و حنية .. على اساس انو الجو ما ح يتغيّر و فجأة .. الهواء ببرد ، و الورق الأخضر الكان مظلل روحك ، ببدأ يقع ورقة ورقة .. و انت لسه واقف في نفس المكان بملامحك العتيقة البريئة : ليه حصل كدا ؟ بتفتّش على الونس العتيق ، و على السؤال البجي بدون مناسبة ، و على اللهفة البتسبق الكلام .. لكن الموسم خلص و الناس مرّات ما بتتغيّر .. هي بس بترجع لطقسها الحقيقي ، بعد ما ينتهي الموسم اللي كان جامعها بيك 🤎! في ناس بتحبك طالما انت قادر تضحك ، و تحتوي ، و تجبر الخاطر .. لكن اول ما يمُر عليك شتاءك ، و تحتاج كتف بدل ما تكون الكتف ، بتكتشف ان الزحمة كانت أخف مما كنت متخيّل و ساعتها ما بيفضلوا معاك الا الناس البتعرف قيمة وجودك في كل المواسم ، ما في موسم واحد 🤎! لذا .. أكبر خدمة ممكن تقدمها لنفسك ، إنك ما ترهن أمانك الداخلي بِمواسِم الناس .! معدنك .. ما بيتغيّر بتغيّر الفصول. و آخر القول: " لو انتهى موسمهم .. خليك الشجرة البتعرف تورّق من جديد ، حتى لو مشى آخر عابر كان مستظل بضلها 🤎." #تأملاتي_الأقرب_إليّ Mo. Hatim 💜

#أذكار_الصباح 🌤

📮|🛋️.. مِن الإنجــــــــازات اليومية العظيمة أن تُعان علىٰ قول: "لاَ إِلَهَ إِلَّا اللَّهُ، وَحْدَهُ لاَ شَرِيكَ لَهُ، لَهُ المُلْكُ وَلَهُ الحَمْدُ، وَهُوَ عَلَى كُلِّ شَيْءٍ قَدِيرٌ". مائة مرة. - فإنها ماحية السيئات، والثواب المضاعف ، والحِرز  العظيم، و لا يأتي أحدٌ بأفضل مما جئت به، إلا أحد عمل أكثرَ من ذلك!.

صباحاتكم نور 🤍🌷.

أنت لست مجبورًا على تغيير الإنسان أو الإلحاح عليه والضغط عليه من أجل أن يتغير، المطلوب منك أن تنصحه وتحاول معه قدر استطاعتك. الإنسان يعرف الصح من الخطأ والحلال من الحرام، وكثير من الناس مستعدون أن يتنازلوا عن كل شيء من أجل رغباتهم ومنفعتهم الشخصية، وبعضهم يصل به الحد أن يتهمك بعقلك وتفكيرك وأنت توضح له ما يفعله من أمور يتنازل فيها عن دينه وكرامته ومبادئه. لا تحرق نفسك من أجل أحد، والمستفيد لا يناقش. وامض في طريقك.🤷🏻‍♂️

صباح الخير جداً مرات بنفتكر إنو الناس الناجحة وصلت بسهولة، لكن الحقيقة إنو كل زول وراهو أيام تعب، وأيام إحباط، وأيام كان ممكن يستسلم فيها واختار يكمل. الحياة ما بتطلب منك تكون خارق، ولا تكون الأسرع، هي بس بتطلب منك ما توقف. لو كل يوم عملت حاجة بسيطة تقربك من هدفك، مع الزمن حتلقى نفسك وصلت لمكان ما كنت متوقعو. ما تستقل أي خطوة، لأنو الإنجازات الكبيرة في الأصل عبارة عن خطوات صغيرة اتكررت بإصرار. توكل على الله، واعمل السبب، وخلي النتيجة على رب العالمين🤍🌷.

صباح الخير “إذا أردتَ حياةً سهلة، فعليك أن تبقى ضمن القطيع.”

‏سُبحان الله . الحُمدالله . الله اكبر . استغفرالله . لا اله الا الله . لا حول ولا قوة الا بالله . اللهم صلى وسلم على نبينا محمد .