آلاء طه.. التربية الإسلامية. السادس

لاتنسون: السبت امتحانكم الوزاري للدور الثاني. بالتوفيق 🤍

سؤال الاحكام ١٠ النص القرآني ٢٠ صارت ٣٠ بعد تحتاج بس ٢٠ وتنجح الحديث خل نكول ١٠ من ١٥ هاي صارت ٤٠ بعد تحتاج ١٠ ال ١٠ لازم تطلع من بقية الاسئلة بس على شرط: ماتعوف شي فارغ أبددددددددددد المعاني والشرح خل نكول ٥ هاي صارت ٤٥ والعقيدة والسير والآداب لازم ناخذ ٥ لأن هو تعبير مو درخ وكله مكرر بالسنوات السابقة. بهالحالة راح تنجح بسهولة. دعواتي لكم تلاميذنا الأبطال بالحفظ والتوفيق والنجاح.

. السؤال الخامس والسادس والسابع العقيدة والسيرة والآداب مواضيع العقيدة والعبادات: ١_ التقويم الهجري ٢_ الإيمان بالرسل والكتب السماوية ٣_ الإسراء والمعراج ٤_ فريضة الحج ٥_ من أسماء الله الحسنى مواضيع السيرة: ١_ معركة الخندق ٢_ صلح الحديبية ٣_ معركة خيبر ٤_ فتح مكة ٥_ نبي الله يونس (عليه السلام) ٦_ النبي عيسى بن مريم (عليه السلام) ٧_ السيدة خديجة (عليها السلام) ٨_ حذيفة بن اليمان (رضي الله عنه) مواضيع الآداب: ١_ حرمة المسجد والأماكن المقدسة ٢_ آفات اللسان ٣_ العفو والتسامح ٤_ الحياء والحشمة والحجاب ٥_ آداب التعامل مع الناس. وبالنسبة لنقاط مواضيع الآداب بالسؤال الأخير اذا تجي نقاط فيطلبون منها ٥ نقاط فقط مو أكثر. مثل: حرمة المسجد وآداب التعامل مع الناس فيكفي أن تحفظ ٥ نقاط فقط والأفضل تحفظ وحدة احتياط علمود اذا تنسى نقطة فعندك وحدة احتياط. هذي المواضيع كلها تقرأ فقط مناقشاتها والحل. أسئلة المناقشة والأسئلة الوزارية تكفيك وزيادة. ولاتنسى: لاتترك شي فارغ اكتب أي شي.. اللي فهمته من المواضيع اكتبه لاتبخل بالكتابة.

. السؤال الرابع: الحديث النبوي الشريف لو يريد منك بس الحديث لو طلب آخر مع الحديث عندك ٥ أحاديث: ١_ حسن الجوار ٢_ اتقان العمل ٣_تحريم السرقة ٤_تحريم الغيبة ٥_ الحث على الزراعة بما انه انت تريد نجاح فقط فتحفظ الحديث فقط واذا تريد درجة عالية فتقرأ مناقشة الأحاديث والوزاريات السابقة وكلها بالقناة.

السؤال الثالث: التفسير والمعاني المعاني: تجيك إما ٦ أو ٧ معاني وتحل ٥ تخطط جدول الكلمة : معناها بما انه انت تريد تنجح فقط فتكدر تحفظ بس معاني الايات الحفظ واذا ماتكدر تحفظهن فمو مشكلة لان هذا الفرع عليه بس ٥ درجات اذا ماتكدر تحفظهن فلاتضيع بيهن وقت. وبالنسبة للشرح اما ييجيك سؤال من المناقشة وتجاوبه او تجيك اية وتشرحها لاتترك الشرح فارغ دير بالك تتركه فارغ لان عليه ١٥ درجة اكتب بالبداية: يبين الله سبحانه وتعالى بهذه الآية الكريمة ...... وبعدين اكتب اي شي تفهمه من الاية عندك معاني استعملهن بالشرح وعندك الفكرة اللي أخذتها من قرأت الشرح بالكتاب وعندك تعبيرك، يعني انت احجي من عندك شنو اللي تفهمه اكتبه بالفصحى بس اهم شي لاتعوف الشرح فارغ اكتب أي شي فهمته علمود تاخذ درجات.

. السؤال الثاني: عندك خمس نصوص قرآنية ييجيك فرعين وتختار واحد يعني تكدر تحفظ ٤ نصوص قرآنية وتضبط الحفظ والإملاء يعني اذا نص قرآني صعب عليك تكدر تتركه وتحفظ الأربعة نصوص الأخرى وبالامتحان اذا ييجي تتركه وتحل الثاني الحافظه. من سورة لقمان من سورة النجم من سورة الرحمن من سورة الإنسان سورة الشمس تكدر تحفظ ٤ من هذي النصوص هذا السؤال عليه ٢٠ درجة

. صباح الخير شلونكم ياأبطال. بالنسبة للتلاميذ المكملين بالاسلامية الهدف: النجاح في الدور الثاني السؤال الأول : أحكام لام (أل التعريف) تحفظ آداب التلاوة الخمس نقاط في بداية الكتاب وتعريف الادغام الشمسي والاظهار القمري مع الامثلة لكل حكم وتعرف تستخرج حكم او نوع لام أل التعريف. طبعا لازم ننتبه شيريد من عدنا يريد حكم اللام لو نوع اللام؟ ويريد السبب لو لا؟ اذا يريد السبب نخطط جدول من ٣ حقول بالحقل الأول نكتب الكلمات (الأسماء) بالحقل الثاني نكتب الحكم اذا رايد الحكم ونكتب النوع اذا رايد النوع وبالحقل الثالث نكتب السبب اذا يريد السبب واذا مايريد السبب نخطط حقلين فقط الكلمات والحكم بدون سبب (حسب المطلوب بالسؤال) ينطيكم آية قرآنية أو أكثر من آية وتستخرج حكم أو نوع لام ال التعريف واني شارحتلكم بالقناة شلون نستخرج الحكم او النوع. ونبهتكم اذا تجيكم اية بيهه ٤ كلمات بيهه ال التعريف فانت خلي كلمة خامسه بيهه ال اصلية بس بشرط: خليها اخر وحدة، يعني بالأول استخرج الكلمات اللي بيهه ال التعريف واخر شي خلي كلمة بيهه ال اصلية لان بعض الاجوبة النموذجية يحلون خطأ ويضيفون كلمة بيهه ال اصلية. فعلمود لاتروح علينا درجتين نكتبها ولو هي مايصير تنكتب بس أمرنا لله. هذا بالنسبة للسؤال الأول عليه ١٠ درجات.

السلام عليكم. شكرا للأبطال اللي متابعين وديحفظون، ومتواصلين ويايه يسألون عن لفظ كل كلمة علمود يضبطوها. وشكرا من القلب لأهلهم الحريصين.

. السلام عليكم.. دنحفظ الأشياء الحفظية حاليا.. الأسئلة والأجوبة والشرح بعدين لأن فهم مو درخ، يعني هسه نحفظ الأشياء اللي تاخذ وقت بالدوام اذا نحفظها، فنحفظها هسه وحتى اذا نسيناها من نراجعها نتذكرها. واني داانطيكم مجال هوايه أيام علمود يومية تقروها وتحفظوها زين.