﮼مروه الزوي .

اصعب إدراك.. لما تڪتشف إنك ڪنت تدور فـ مساحه ليك في حياه شخص، حياته واسعه ع الڪل ومضغوطه عليك انت بس، واصبح وجودك وغيابك ليهم نفس الوزن.

سُـڪينـه الـزّوي: ذبحني الليل

​الدنيا هذي عمرها ما صفت لحد، ولا ڪملت لواحد.. ربي مقسمها بحڪمه حاجه ڪتبها ليك، وحاجة ثانيه منعها عليك وخلاها حسره ف خاطرك. وهني عاد مربط الفرس، يا إما تعرف قيمه النعمه اللي ف يدك وتحمد ربي علاها، وتعيش راضي ومرتاح البال ومتهني؛ ويا إما تقعد قالب ڪفك ومتحسر ع الحاجه اللي فاتتك وما ڪانتش من نصيبك، ووقتها الدنيا حتمشي وتفوت، وأنت ما عشتش منها ولا دقيقه؛ سو نصيحه الدنيا حتمشي بيك ولا بلاك، فـ عيشها صح وخليك راضي.

النيه الصافيه هي اللي مخليه المرڪب ماشي رغم قوه الأمواج وعڪس الريح.. نضحڪوا مع الڪل ونسايروا ف الناس والقلب ربي يعلم باللي مڪفيه، لڪن مش شايلين حقد ع حد، ولا نتموا الشر حتى للي ضرنا؛ لان احني نؤمنوا إن الدنيا دوّاره وڪل حد بياخد ع قيس نيته. عيونا مليانه بالرضا، ونفوسنا عزيزه ما ترضى بالهون، وماشيين بمبدأ 'اللي يجي من ربي ڪله خير'.. عشنا وشفنا، وعرفنا إن النيه الطيبه والصافيه ف الوقت هذا عمله نادره وما تضيّع صاحبها ولو بعد حين، فـ ربي يعطينا ع قد قلوبنا، ويڪفينا شر من يبتسم في وجوهنا وهو في غيابنا ما يسلم حد من لسانه.

اللي يبيك حـ يخلق من الحيط باب باش يوصلك، وحـ يدور ألف عذر وعذر باش بس يسمع صوتك أو يطمن عليك.. حـ يلاحظ غيابك قبل حضورك، وحـ يعرف ضيقتك من وراء الشاشه ومن غير ما تحڪي. ​لڪن اللي ما يبيش، حـ تشوف منه العجب في 'صناعه الحجج'؛ مرة مشغول، ومرة الظروف صعبه، ومرة الوقت ماسمحش.. حتلقى روحك ديما انت اللي تبادر، وانت اللي تحرق في أعصابك، وهو مرتاح في عالمه. وفّر مجهودك ومڪانتك للي يحس بقيمتك فعلاً، للي يشريك باللي عنده ويبني معاك مش عليك. العمر أقصر من إنك تضيعه في تفسير تصرفات حد اختار يهمشك، والقلب اللي يصونك هو اللي يستاهل تسڪن فيه.. أما الباقي؟ ربي يوجههم للخير، والباب اللي يسڪره الغياب، ما يفتحهش الندم.

تعرفو شن هو احلى شعور في الدنيا؟ إنك تحس روحك غالي وما تهونش، تحس إنك في أمان حتى لو غلطت، وإنك مفهوم حتى لو خانك التعبير، وإنك ما تتبدلش بحد غيرك حتى ولو ڪان مزاجك سيء. تحس إنه مش حـ يمشو ويسيبوك حتى لو جت في خاطرك لحظه مش طايق فيها حتى روحك.. ​ما فيش حاجة اسمح من إنك تعرف إن خاطرك ديما مجبور، وإن دمعتك حتلقى من يمسحها مهما ڪانت الظروف، وإن يدك مش حـ تنرخي مهما ڪان الوضع متعب ومعقد.

سُـڪينـه الـزّوي: آه يامن

​من أڪثر الجمل اللي نؤمن بيها وبجدّ تريح ف خاطري هي ​"وعلى نياتڪم تُرزقون.." ​أني مصدتقها بڪل قلبي؛ لأنك لما تڪون أبيض ونظيف من داخل ونيتك طيبه وسمحه، ربي يفتحها في وجهك ويرزقك بنور من عنده، ةوتلقى المحبة في وجوه الناس من غير حتى ما تطلبهاوحاجتك تجيك لعندك قبل حتى ما تنطق بيها؛ عشان انت تتمنى الخير للناس ڪلها وما تحسدش ف حد؛ لأن سعادة غيرك مش حتآخذ من سعادتك، وفلوسهم مش حتنقص من رزقك، وصحتهم مش حتجي على عافيتك. ف خلك ديما هداك الإنسان اللي قلبه صافي ونيته بيضاء.. اللهم إنا نسألك سلامة القلب.

‏الشيء لما يكون نادر و وثقيل و محد واصل فيه هنا صح تقدر تقول عليه مَ يتعوضش ، غير هكي كُل شي متاح و عادي يتعوض ، ويمشي الرخيص ويجي مكانه الرخيص لعند مَ اطيح فِ الغالي .

‏لما تعطِي، أعطِ بصِدق، عطاء يڪون من جوا قلبك، منغير زيف أو تردد وما تتبعش عطاءَك بالمَنّ والأذى، بحيث انك تفسد جميل عطاءَك بتذڪير الناس به ولا الإساءة ليهم بعده. وردبالك تنتظر الجزاء والشڪر من البشر انتظرها من رَبّ العالمين وخلي نيتك هي ارضاء الخالق، لان الخير اللي بذلته واعطيته ح يرجعلك من حيث لا تحتسب؛ مرات ع هيئة دَفع مڪروه، ولا جَلب شيء محبوب، ولا تيسير أمر عسير، أو توفيق يُلازِم خطواتك، أو حتى بركة تغمر حياتك. أنك تزرع الخير وتنساه، وتثق بأن الڪون والقدر ح يتڪلفو بإرجاع الثمرة ليك في أنسب وقت وأجمل صورة هك تڪون انسان ف قمه الوعي حيث ان العطاء جزءاً من فطرته، مش صفقة ينتظر منها ربح فوري.

ابعتولي اهني نهدرز عليكم شوي 🙂 @mrrewaabot

شعور الاڪتفاء بشخص واحد هو من اصدق وارقى، وانذر المشاعر الانسانيه لما تڪتشف ان وجود الشخص هذا بس يڪفيك عن ڪل العالم تحس معاه بالحب والطمأنينه، واتزان الفڪر وما تدورش ع بديل وما يغريڪش تعدد الناس والوجوه حولك لان ببساطه لقيت ف هذا الشخص وطن وراحه واڪتفاء ما يشبه اي شي

‏ف اللّحظة اللي تدرك فاها أنك إنسان مميز وتستحق الأفضل مش ح تنهزم أمام خسارة أي حاجه في الحياة، ح تفهم أن ڪل من ابتعد عنك ڪان ما يستحقڪش وأن الله مخبيلك اللي يستحقك، اللي يشبه طيبة قلبك وحلاوة روحك، الناس في حياتك دروس تتعلم منهم أن الثقة ما تنعطاش لاي شخص وأن فيه من اللي يترك الذهب باش يمسك بالتراب.

العلاقات بشڪل عام ح تستمر لما تڪون الأفعال الحلوة قبل الڪلام، لما نختار ناس تشبهنا في فڪرها ناس تفهمنا وتخاف علينا ووجودنا يفرق معاهم، ناس تسأل وتطمن من غير مصالح، تلتمسلنا العذر ومانحتاج نبررلهم ڪل شي، ناس قلوبهم قبل عيونهم مليانه فينا.

"عُمري ما ڪنت شخص إنتقامي، ولا عندي حيل تّعبانية تخليني نقعد نفڪر ڪيف ممڪن نجرح حد ولا نحرق قلب حد، ولا ڪيف أندّمهم عشان ظلموني أو جرحوا مشاعري؛ أنا إنتقامي بسيط جدًا وهو إني نتبع نهج "إعتزل ما يؤذيك" اللي هو أنا نموت الشخص داخلي، ما نحنلاش ولا نفڪر فيه ولا حتى يشرفني إنه يمرّ على ذاڪرتي، الناس اللي بتڪذب وتجرح وتبيع وتنافق ما نزعلش علاها ولا حتى تستاهل إنا نضيّع دقيقة من وقتنا ونفڪر ننتقم منهم، هم أڪبر إبتلاء لنفسهم.. فالله يعينهم على نفسهم ويبعدهم عن طريقنا."

ولاَ تَحسبَنَ الله غَافِلاً عمَّا يعمَلُ الظَالمُون انَّما يُؤَخِرهُم لِيومٍ تشَخَّصُ فِيهِ الابْصَار.

https://t.me/BBeBB?livestream

ڪل حد فينا عنده نصيب في شي وماعنده نصيب في شي ثاني، انتو ما تعرفوش غيرڪم شن شاف ف حياته وربي ڪيف عوضه، ماتعرفوش ربي شن رفع منه مقابل النعمه اللي اعطاها ليه، را مافيش حد مش ضايق الحرمان وما فيش حد ما مر بمشاڪل يعني ڪل حد فينا عنده قسمه من الباهي والشين، والدنيا مش مستاهله حسد ولا حقد افرحوا للناس وسيبوا الحسد والڪلام الزايد.

وهَب لي أُُنسًا منكَ يُذهِبُ وَحشتي ويَبسُطُ قلبًا ذا انقباضٍ ويشرَحُ. -

"ما كتبه الله خير، وإن أوجع" حين يضيق بك الأمر، وتضطرب نفسك من بلاء نزل أو حلم تأخر، تذكّري: الله لا يكتب شيئًا عبثًا، ولا يُقدّر أمرًا إلا لحكمة، فهو الأعلم، والأرحم، والأقرب. الرضا ليس غياب الألم، بل ثقة عميقة بأن ما اختاره الله خير، وإن لم تُدركه العقول، وإن تألمت له القلوب. فارضَ، وقل بقلبك: "اللهم اجعل قلبي يرضى، حتى وإن لم أفهم."