Materials Da7ee7a

ياعيال ادعولى فى موضوع محتاجاه يتم 🤍

📌 موعد التظلم والمكان بيظهرلك بالشكل دا على موقع التظلمات، تابع الموقع علشان المعاد ميضعش عليك

يا شباب أغلب الناس اتبعتلها مواعيد التظلم، افتحوا الموقع شوفوا الموعد والمكان اللي هتروحوا فيه

بما إنه خلاص دماغي فضيت بقى من القلق بتاع النتيجة ف دفعة 27 بقى اتفضلوا قولولي إيه المعلومات اللي محتاجين تعرفوها ولو فيه أي مساعدة أقدر أقدمها ليكوا ❤️

وزارة التربية والتعليم تعلن بدء أعمال تظلمات طلاب الثانوية العامة على نتائج الدور الأول لامتحانات شهادة اتمام الثانوية العامة 2025 / 2026 الأربعاء 29 يوليو 2026 تعلن وزارة التربية والتعليم والتعليم الفنى بدء التظلمات لطلاب الثانوية العامة المتضررين من نتائجهم بامتحان الدور الأول لشهادة إتمام الدراسة الثانوية العامة للعام الدراسى 2025 / 2026؛ اعتباراً من غدا الخميس الموافق 30 يوليو 2026 لمدة أسبوعين حتى يوم الخميس الموافق 13 أغسطس 2026. وأوضحت الوزارة أن آليات وضوابط واجراءات تظلم الطلاب من نتائجهم على النحو التالى: أولاً: خطوات التقديم للتظلمات: - سداد مبلغ 300 جنيه (ثلاثمائة جنيه) عن كل مادة يرغب الطالب فى تقديم التظلم بشأنها من خلال منافذ التحصيل المعتمدة لدى وزارة التربية والتعليم والتعليم الفنى (البريد المصرى ـ فورى ـ أى فينانس) لحساب صندوق دعم وتمويل المشروعات التعليمية. - التقدم بالطلبات وتحديد المواد ومواعيد الاطلاع إلكترونياً من خلال الرابط التالي الذي يبدأ من غدا الخميس 30 يوليو 2026: - ⁠ ‌‏ https://tazalom.emis.gov.eg ثانياً: الإجراءات المتبعة أثناء التظلمات: - حضور الطالب بمفرده لمقر التظلمات أو مع ولى أمره وممنوع اصطحاب مدرس المادة. - الالتزام بالحضور فى الموعد المحدد للاطلاع ومن يتخلف ليس من حقه التقدم بطلب مرة أخرى. - تقديم صورة ضوئية واضحة من بطاقة الرقم القومى للطالب وولى الأمر . - يتم الاطلاع على صورة إجابة (ورقة البابل شيت ـ ورقة المقالى) بالإضافة إلى نموذج الاجابة. - يقوم الطالب بمراجعة الإجابات وتجميع الدرجات طبقاً لتوزيع الدرجات على نموذج الإجابة ويدون الطالب ملاحظاته بالمكان المخصص لذلك. ثالثا : الإجراءات المتبعة بعد مراجعة الإجابات من اللجان الفنية المختصة: - فى حالة تعديل درجات الطالب يتم إخطار الطالب بنتيجة التظلم واسترداد الرسوم. - تعتمد مذكرات الزيادة من خلال رئيس عام الامتحان أو نائب رئيس عام الامتحان. - تتولى وزارة التربية والتعليم والتعليم الفني اتخاذ اجراءات إخطار وزارة التعليم العالى (مكتب تنسيق القبول بالجامعات) بنتيجة الطالب بعد التعديل. #وزارة_التربية_والتعليم_والتعليم_الفني

مساء الخير ياجماعة اى حد عنده شك أن له حتى لو درجة واحدة وهتفرق معاه يعمل تظلم (دفعتى رجعوا درجات من التظلم بس مش كتير ) ارفعوا قضية للاسف فى ناس راحت اتلاقيت المقالى مش متصحح غير اللعب فى البابل شيت (بمعنى أن كان فى ناس مش عاملة اكس فى اسئلة راحت اتلاقت فى علامات ) عامة القضية تقدر تثبت ده أنا كليتى حول منها حوالى ٢٠٠ واحد قضية غير اللى جم جديد من كليات تانية عشان درجة واتنين وتلاتة حقيقي الدرجة بتفرق من محافظة لمحافظة ومن كلية لكلية تانية(بس ده مش معناه كل الناس رجع لها درجات )

مش متخيلين أنا مبسوطة وفرحانة إزاي لأني طول السنة كنت في حيرة كبيرة إني مش حابة الكليات الطبية بس في دماغي إني لو جبت مجموعها هضطر أدخلها عشان أهلي دلوقتي أنا حاسة إن ربنا عملي اللي أنا عيزاه ووفر عليا حيرة كتير أوي من نوع "أدخل اللي أنا عيزاه ولا أستخسر مجموعي" رغم كل فرحتي دي وفرحة أهلي اللي بحمد ربنا إني قدرت أفرحهم الحمد لله بس الدرجات فيها حاجة غلط دا مش اللي أنا حلاه وبجد في حيرة مش عارفة أعمل تظلم ولا لأ ومعرفش هل التظلم دا له لازمة ولا لأ أصلا فحقيقي لو حد عنده أي معلومة يفيدني وبجد مش عايزة حد يواسيني عشان أنا مبسوطة والبيت مبسوط ومليان زغاريد-الحمد لله- 🤍🤍🤍🤍🤍

🤍"

الحمد لله حمدا كثيرا طيبا مباركا فيه 🤍🤍🤍 جبت 88% الحمد لله

ربنا معاكم ويراضيكم🤍 ابقوا طمنونى

‎⁨نتيجة ثانوية عامة نظام حديث⁩.xlsx

لطلاب الثانوية العامة اللي هتجيب مجموع كلية طب في اليومين اللي جاين دول الف مبروك علي النجاح مقدما نصيحه لوجه الله أرجوكم فكروا بدل المرة ألف قبل اختيار كلية الطب في مصر، معظمنا دخل الكلية علشان أهلك يبقوا فرحانين بيك وبالبالطو الأبيض والدكتور راح والدكتور جه، هو ده قمة النجاح في عيون اهلك لان دي ثقافتهم من غير مانكون فاهمين تداعيات القرار انت لازم تدخل الكلية مش بس عن اقتناع وكمان عندك خطة علي المدي البعيد للنجاح سواء في مصر أو هتسافر لان النجاح في مصر صعب، والطلوع من مصر بقي كمان أصعب في الزمن ده طبعًا إنت لسه صغير ١٦–١٧ سنة بس أعتقد إن أنتم عندكم وعي اكبر من الأجيال السابقة دلوقتي، بحكم إن فيه سوشيال ميديا وبقيتوا شايفين وضع الدكاترة إيه في مصر عامل ازاي كلية الطب بتديك جزء صغير من؜ المعلومات اساسية اللي انت محتاجة علشان تبقي دكتور كويس، الباقي كله معتمد علي التدريب بعد التخرج، من غير التدريب ده انت حرفيا ولا حاجة وكل اللي التعب عملته في حياتك من ثانوية عامة وامتحانات وسهر في كلية الطب لحد ماتاخد البكالوريوس كل ده هيضيع في الاخر شوف الاول انت هتدرب فين وازاي ومع مين سواء في مصر او بره مصر، يمكن التفكير ده صعب في مستواك دلوقتي بس الاذكيا منكم اللي بيفكروا بالطريقة دي هما اللي هينجحوا كمان ١٠-١٥ سنة لان النجاح هيبقي اصعب واصعب في المستقبل وكده كده هتدفع تمن غالي اوي سواء كملت في مصر او سافرت فلازم تفكر وتعد مع نفسك انهي تمن عايز تدفعه واي خطة هتحطها للنجاح لازم تترجم لنجاح مادي كمان لان الفلوس مهمة مش لازم الخطة تبقي مفصله لان صعب تبقي تفصل كل حاجة علي مدي سنين طويله قدام بس علي الاقل حط الخطوط العريضة لان لسه بدري علي الكلام ده وكل ماتكبر في الكلية بتبدا تعدل وتطور الخطة بس ال big picture هي هي العبط بتاع الدكتور راح والدكتور جه وانك حققت امنيتك اهلك وشافوك حلوف كبير ببالطوا الابيض وفي الاخر تتخرج وبتضرب في الطوارئ وبتاخد ملاليم اخر الشهر وفاجأة لقيت نفسك كبرت من غير خطة في حياتك مش هينولك في الاخر غير الاكتئاب من مهنة صعبة ومهلكة جسديا ونفسيا زي الطب #الطب Dr Mahmoud Khairy

طمنوني الأزهر عملتوا إيه ❤️

يا دفعة ٢٧ أرجوكوا بلاش حماس البدايات دا، فيه عبارة بحبها بتقول "Starting too soon only speeds up the monotony"(البداية بدري بتسرّع الملل) والله بجد متدخلوش بدماغكوا وابدأوا الموضوع وحدة وحدة وأول شهرين جربوا فيهم كذا طريقة مذاكرة وجربوا كذا مدرس عشان تقدروا تعرفوا إيه أنسب اختيار الكتب، هات الكتب اللي المدرس بتاعك هيشتغل منها بلاش تجويد خالص فيديوز التأسيس عبارة عن marketing strategy ودا مش عيب خالص بالمناسبة بس لو أنت مستواك متوسط وفوق فحرفيا الفيديو دا مش هيضيفلك حاجة ومتشوفهوش، لو مستواك ضعيف شوفه هيفيدك مش معنى إن المدرس مشهور يبقى هو أحسن مدرس والعكس صحيح، كمل مع اللي هتفهم منه كويس وتعرف تحل معاه ملكش دعوة بفلان وعلان عشان دماغك ممكن تكون غير دماغهم.. لووو معندكش self controle انزل سنترررر بلاش أونلاين مهما كان عشان متجيش في شهر 3 تلاقي نفسك متعرفش حاجة عن المنهج ودا حصل لناس كتير وشفتهم بعيني لو وقتك بيضيع على الsocial media ابدأ من دلوقتي وحدة وحدة امسح أبلكيشن كل فترة بحيث يجي شهر 10 أو 11 تلاقي نفسك معندكش غير واتس وتلي ودا أحسن بكتير أوي ما تيجي تمسحهم مرة وحدة فنص السنة كل الكلام دا ممكن نتكلم فيه بتفصيل أكتر في المستقبل إن شاء الله بس حبيت أختصر ، ولو حد عنده استفسار يبقى يبعت على اللينك دا https://t.me/NXZXBOT?start=p35qplmdZm وادعولي كتير يا حبايبي ❤️❤️

الرحلة خلصت؟

أخباركم يا عيال، عاملين إيه؟ ❤️ الكلام ده للدفعة الجديدة. أنا سمعت إن في ناس بدأت تاخد كورسات تأسيس، فحبيت أقولكم حاجة كده من باب النصيحة. بجد، إزاي هتاخد تأسيس لمنهج لسه منزلش ولسه مش معروف هيبقى عامل إزاي؟ متستهلكوش طاقتكم في حاجة وارد أصلًا متبقاش موجودة أو تتغير. خدوا أجازتكم واستمتعوا بيها، ولما المنهج ينزل والدنيا تستقر ابقوا ابدأوا. صدقوني، كل حاجة بتتشرح من أول وجديد وبالتفصيل، ومش هينوبكم من الاستعجال ده غير إنكم تستهلكوا طاقتكم في المكان الغلط. الوحيد اللي ممكن تراجعوا فيه دلوقتي هو الأساسيات في المواد اللي فعلًا مبنية على بعض، زي الإنجليزي أو العربي أو الرياضة. إنما باقي المواد، استنوا منهج الوزارة الأول. ودي مجرد نصيحة وربنا يوفقكم جميعًا🤍

Materials Da7ee7a pinned «اخباركم يا شباب ثانوية عامة 🫂✨ اتمنى تكون الدنيا معاكم تمام حتى لو مش تمام حقيقي لسه فى وقت طول ما الامتحان مش دلوقتى حالا🦦 اهو الوقت بيعدى هوا كدا وهانت خلاص وهتاخدوا افراج قريب🫡 شدوا الهمة ياشباب🤍 الوقت ده على قد ما بتذاكروا متنسوش الصلاة وربنا لأنه كله…»

لو حد محتاج اى حاجة من اى ناحية يا عيال متترددوش أنكم تبعتوا لى ♥️ ومعلش لو رديت متأخر عشان أنا برضو ليلة امتحان زيكم ابقوا ادعوا لى معاكم✨

اخباركم يا شباب ثانوية عامة 🫂✨ اتمنى تكون الدنيا معاكم تمام حتى لو مش تمام حقيقي لسه فى وقت طول ما الامتحان مش دلوقتى حالا🦦 اهو الوقت بيعدى هوا كدا وهانت خلاص وهتاخدوا افراج قريب🫡 شدوا الهمة ياشباب🤍 الوقت ده على قد ما بتذاكروا متنسوش الصلاة وربنا لأنه كله فى الاخر من توفيق ربنا مش اكتر وعمرها ما هتكون ولا كانت بحساباتنا (ده عشان لو حد شايف أنه مقصر أو فى حاجات نقصاه )♥️ ربنا معاكم ويسندكم يوفقكم بكرة وتطلعوا كلكم مجبورين الخاطر 🫂✨

اخبار اول لجنة اى ياجماعة اتمنى تكونوا كسرتوا رهبة الامتحانات بيها ♥️ ربنا يكمل معاكم ويسندكم فى اللى جاى🫂✨