Be positive .

⁣عاملين اي؟

انا أقسم بالله مَ لاقي حاجة أقولها بس، متعجب من كرم ربنا ليا، وازاي كانت مقفله من كل ناحية وفـ لحظة كل حاجة إتحلت، ونولت اللي كنت عايزه وأكتر، مش عارف دا حصل امتي وازاي، بس عارف ان ربنا رتبها بكرمه، وإن اللـِ كنت شايفه مستحيل كان عند ربنا أهون من كل حاجة، سبحان الله فعلاً ساعات ربنا بيأخر الحاجة مش علشان يمنعها عنك، لكن علشان يجيبها لك فـ الوقت والطريقه المناسبه اللـِ تخليك تعرف قد اي هو كريم جداً جداً .

ابعتو اسماء البودكاستات اللـ متابعينها حاليا 😄 @lllll5llll_bot

شباب فـ حد من الاتشانل هنا باعتللي محتاج مساعدة ماليه فـ لو حد حابب يساعد يبعتللي وهبعتله التفاصيل

اكتشفت إن مشكلتي في العلاقات عامةً إني نفسي عزيزة عليا، وشخص بيحب يحس بقيمته معرفش احشر نفسي ف مكان ، ولا اطلب من حد حاجة ،عشان كدا مش ببقي مرتاح بشكل كافي في التعامل غير مع الناس اللي بتحسسني علطول أنهم عايزين وجودى زى ما انا عايز وجودهم واكتر مبحبش احس إني تقيل بأي شكل  ،ولا بحب احس اني عقبه ف حياة حد الدنيا ابسط من كدا  .

من احسن القرارات اللـِ أخدتها فـ حياتي هو إني اخترت اني اسكت، انا مش محتاج أثبت حاجة لحد ولا عايز أحاول أقنع اي حد إني إنسان كويس، مش هفضل ابرر واتكلم كتير، مش هصلح حاجه أنا ما بوظتهاش، ومش هفضل أحارب علشان حد يعرف قيمتي، طاقتي بقت أغلي من  اي نقاش فيه فرهده، وأغلي من اني اضيعها علي ناس مصممه تعمل نفسها مش فاهمه، صدقني راحتي النفسيه اهم من كل دا، علشان كدا شاريها  .

شيل الإنجذاب والشكل من الحسبَه ، وهتكتشف إن ناس كتير معندهاش حاجَه حقيقيّه تقدمها ، لا إحتواء ولا فِكر ولا روح ، الإعجاب مُمكن يقربك من حـد ، لكن اللّي يخليك تكمّل معاه فعلاً هو أخلاقهُ وطريقة تفكيرهُ ، وشخصيتهُ .

مفيش حاجة اسمها "بطّل تبقى كويس مع الناس علشان يعملوا لك اعتبار" لأن ده مش نُضج، دي عشوائية ممكن تخليك تاخد الكل بذنب شخص واحد وتظلم ناس ملهاش أي ذنب، فيه حاجة اسمها "خير الأمور الوسط" يعني كل حاجة بمقدار، على قد ما الشخص قدامك يستحق، وعلى قد اللي شوفته منه، مفيش عقل يقولك دوس على فلان لمجرد إن غيره أذاك وإنت أصلًا ما شوفتش منه حاجة وحشة، وفي نفس الوقت مينفعش تشيل حد فوق راسك وهو دايس عليك، قمة النضج والعدل إنك تعرف تحط كل شخص في مكانه من غير ما تظلمه ومن غير ما تظلم نفسك، متبالغش في الحُب، ومتزودهاش في العتاب، ومتديش أكتر من اللي بيتاخد منك، خليك كويس بس واعي، سامح بس متسمحش لحد يستغلك، وحب بس متنساش نفسك، الاعتدال مش برود والطيبة مش ضعف، النضج إنك تعرف إمتى تدي وإمتى تبعد وإمتى تقول كفاية .

💗.

﴿يُدَبِّرُ الْأَمْرَ﴾ تخيل لما يكون في حاجة مهمة نفسك فيها بتفضل تفكر فيها قد إيه وترتب لها من هنا ومن هنا وتحاول تحسب كل خطوة قبل ما تاخدها وكأنك عايز تضمن إن كل حاجة تحصل زي ما أنت مخطط لها وبعدين فجأة تلاقي إن كل اللي رتبته اتغير والطريق اللي كنت فاكره هو الصح اتقفل والحاجة اللي كنت متعلق بيها محصلتش فتفضل تسأل نفسك ليه أنا عملت إيه غلط بس يمكن هنا بالذات تكون الرسالة اللي محتاج تفهمها ﴿يُدَبِّرُ الْأَمْرَ﴾ إحنا بنشوف اللحظة وربنا شايف العمر كله إحنا بنشوف موقف واحد وربنا عالم بكل اللي قبله واللي بعده إحنا ساعات بنتمسك بحاجة عشان شايفينها خير لينا وربنا يمنعها عننا لأنه عالم إن الخير الحقيقي في مكان تاني ممكن تفتكر إن تأخير حاجة وجعك وهي في الحقيقة كانت حماية ليك وممكن تزعل على باب اتقفل في وشك وبعد وقت تكتشف إن ربنا قفله عشان يفتحلك باب أنسب ليك بكتير وعشان كده متستعجلش فهم اللي بيحصل ومتحكمش على تدبير ربنا من أول مشهد اسعى وخد بالأسباب وادعي ربنا وبعدها سيبها عليه لأن اللي بيدبر أمرك مش أنت اطمن حتى لو الدنيا ملخبطة في عينك هي مش ملخبطة عند ربنا وحتى لو مش فاهم ليه الحاجة اتأخرت أو ليه الطريق اتغير أو ليه دعوة لسه مستجابتش افتكر دايمًا إن ربنا لا يضيع سعيك ولا ينسى دعاءك وإن تدبيره ليك أرحم من تدبيرك لنفسك يمكن النهارده مش فاهم الحكمة بس بكرة تبص ورا وتقول الحمد لله إن ربنا اختارلي غير اللي أنا كنت عايزه ﴿وَاللَّهُ يَعْلَمُ وَأَنْتُمْ لَا تَعْلَمُونَ﴾

"وَعَصَيْتُم مِّن بَعْدِ مَا أَرَاكُم مَّا تُحِبُّونَ ۚ" اقسم بالله الآيه دي بتزعلني جدا من نفسي لما بسمعها، بستحقر نفسي ساعتها، تخيل اداني اللي بحبه، واستجاب لدعواتي، وفرحني وسترني، وغيره كتير من النعم العظيمه، ورغم كل دا عصيته!!! بس دا ميمنعش اني اتوب طبعاً  "إِلَّا مَنْ تَابَ وَآمَنَ وَعَمِلَ عَمَلًا صَالِحًا فَأُولَٰئِكَ يُبَدِّلُ اللَّهُ سَيِّئَاتِهِمْ حَسَنَاتٍ ۗ وَكَانَ اللَّهُ غَفُورًا رَحِيمًا"  بس برضو دا ميمنعش ان اللي الدين محرمه يبقي حرام،يبقي مخلقش مببرات، لا اعترف بغلطي، اللي الدين محرمه وانا مش قادر ابطله هدعي، هدعي ربنا يهديني بس، مش هدور علي مليون تفسير عشان اثبت ان مبرراتي صح، لا انا غلط وغلط والف غلط، ولازم ارجع واتوب حتي لو المره الالف حتي لو المليون والله  ، عشان كدا لما نبطل ذنب وبعدها نقع ف ذنب لازم نصحي بسرعه قبل فوات الاوان، مهو لازم نفوق ياصحبي، الدنيا مش مضمونه وفـ لحظه ممكن منكونش موجودين؟  .

"إِنَّ اللَّهَ وَمَلَائِكَتَهُ يُصَلُّونَ عَلَى النَّبِيِّ ۚ يَا أَيُّهَا الَّذِينَ آمَنُوا صَلُّوا عَلَيْهِ وَسَلِّمُوا تَسْلِيمًا "

ساعات وإحنا بنقلب على السوشيال ميديا أو بنشوف حياة الناس بننسى إن كل واحد بيورينا أحسن حاجة عنده ومحدش بيحكي عن اللي بيعدي بيه من تعب أو ضيق فنفضل نقارن نفسنا بيهم ونحس إن إحنا متأخرين أو ناقصنا حاجات كتير، بس الحقيقة إن ربنا قسم لكل واحد رزقه ووقته وابتلاءه ونصيبه ومفيش حد واخد كل حاجة ولا حد حياته كاملة زي ما إحنا متخيلين، عشان كده ربنا قال ﴿وَلَا تَمُدَّنَّ عَيْنَيْكَ﴾ آية صغيرة لكنها لو فهمناها هتريح قلوبنا من هم كبير، متبصش للي ربنا اداه لغيرك لأنك متعرفش هو بيدفع تمن النعمة دي إيه، ويمكن اللي إنت شايفه نعمة يكون بالنسبة له ابتلاء، ويمكن إنت عندك نعم هو نفسه يتمناها كل يوم، بدل ما تبص للي ناقصك بص للي معاك واحمد ربنا على صحتك وعلى أهلك وعلى الستر وعلى كل نعمة إنت متعود عليها لدرجة إنك نسيت إنها نعمة، اسعى واجتهد وخد بالأسباب لكن من غير ما تخلي المقارنة تاكل قلبك، افتكر دايمًا إن رزقك مش هيروح لغيرك وإن اللي ربنا كاتبهولك هيجيلك في الوقت اللي هو شايفه الخير ليك، ﴿وَرِزْقُ رَبِّكَ خَيْرٌ وَأَبْقَى﴾

فكرة التظاهر إنك بخير وكويس وسعيد أصعب ألف مره من إنك تحكي وتبيِّن ألمك وحُزنك ومشاكلك، الموضوع كله مُتعلق بفكرة إننا كده ولا كده مش هنستفيد حاجة من أي حد سواء حكينا أو درينا عن اللى فينا، وعلى قد ما الكُتمان مُتعب ومُرهق جدًا على قلوبنا لكنّه أرحم بكتير من إنك تحكي ومتتسمعش بعين الإعتبار وتحس إنك مش فارق، أو إن اللى قدامك يستغل فضفضتك ليه فيما بعد، فكرة إنك تشيل جواك لوحدك رغم ألمها لكنها أخفّ من إنك تُخذل أو تدي ثقة ومحبة لناس هما أقل منها، وبعيدًا عن كل  ده ربنا حاسس باللى فيك والتدابير كلها عنده مش عند الناس .

شوية الجـرابيع اللي بيهزروا ويضحكوا علي الزلزال ومنزلين فيديو عمر وسلمي وميسرة وميعرفوش ان ده جُند من جنود الله وممكن في ثانية اقسم بالله يجعل عاليها سافلها ده انتو جيل مزفت

"وَمَا نُرْسِلُ بِالْآيَاتِ إِلَّا تَخْوِيفًا"

يمكن انا مريت بحاجات صعبه كتير، واتخذلت م ناس مختلفه، وجربت كل حاجة فيها خذلان، بس قليل لما كنت بطلع اصيح واسخط علي اللي ان فيه، كنت دايما لما بتحصل معايا حاجة زي كدا بقول لنفسي "قُل لَّن يُصِيبَنَا إِلَّا مَا كَتَبَ اللَّهُ لَنَا" مهو اكيد اللي حصل دا لسبب معين انا معرفوش، او اللي حصل دا تمهيد لـ خير مستنيني بعدين، دايما بقنع نفسي ان الانسان دا عجول جدا لدرجة انه ممكن يشوف المنع دا حاجة مش كويسه ومش خير بس بعد فترات بتظهر كل حاجة، يمكن احنا مش بنفهم حكمة ربنا وقت الابتلاء، بس مع الوقت بنعرف ان كل حاجة حصلت كانت لسبب، ورب الخير لا يأتي الا بالخير .

تأخير الفرج مش معناه إن ربّنا ناسيك، ولا إن دعاءك ملوش أثر، أوقات كتير بيكون في التأخير رحمة، ولُطف، وخير أكبر من اللِّي كنت مستعجله، في حاجات ربّنا بيأخرها علشان يهيّئ ليها الوقت المناسب، أو يحميك من شيء أنت مش شايفه، أو يرزقك أجر الصبر واليقين، وكلّ ده بيظهر مع الأيام، لما تبصّ ورا وتعرف إن تدبيره كان أحكم من أمنياتك، علشان كدا، متستعجلش قضاء ربّنا، وخليك واثق إن كلّ حاجة ماشية بحكمة، حتى لو أنت دلوقتي مش فاهمها، وكفاية إن ربّنا قال: ﴿وَاللَّهُ غَالِبٌ عَلَىٰ أَمْرِهِ وَلَٰكِنَّ أَكْثَرَ النَّاسِ لا يَعْلَمُونَ﴾.

من الحاجات المُهمة اللى اتعلمتها مؤخرًا هي عدم التبرير بجميع أشكاله، لأنه سيء الظن لا يليق به غير إنك تسيبُه ياكُل نفسُه، لو شخص يهمّه أمرك من الأساس مش هيحكُم عليك بدون معرفة واضحه ولا هيحطك أبدًا فى موقع سُوء الظن، وببساطة المُحب يقدر يلتمس لك بدال العُذر ألف لحين ما يثبت العكس بس ده لو حبيبك فعلًا، فأنت بكل شياكة وأناقة متحاولش تحسِّن صورتك عند حد لأن أنت مش محتاج تكون غير نفسك، وما دُمت مُقتنع بأنك صح ومعملتش غلط، متبررش وتتعب فى نفسك كتير على تفاصيل مش هتتغير لأن أصحابها غالبا معميين بسُوء النيّة .

مش عارف اقلكم اي والله بس هقلكم الكلمتين اللي ع لساني، اولا انت عملت اللي عليك ومقصرتش فـ حاجه، ثانيا اهلك مقصروش معاك فـ حاجه السنه كلها، ثالثا اول كلمه عايزك تقولها الحمدلله، رابعا عايزك تفتكر الآيه دي وعسي ان تكرهوا شيئا وهو خير لكم، خامسا بقا انت ف مصر فاهمني، فمتبصش لمين جاب كذا ولا مين جاب كذا، ربنا كاتب لكل واحد طريق، ورزق غير التاني، كاتب لكل واحد مكان مناسب ليه علي مقاسه، متزعلش حاول متزعللش عشان كله هيعدي والله، كدا كدا بعد فتره دا كله هيبقي ذكريات ومش هيبقي فارقلك حاجه بعد متدرك ان دا كله ارزاق موزعه، رزقك هيجيلك ف المكان اللي ربنا كاتبهولك فيه، معللش برضو نفتكر انها مجرد دنيا يعني فناء ومتاع مؤقت، خليك راضي، خليك ميقن ان دا الخير ليك، عادي في ناس تخرجت من كليات ومش لاقيه شغل، وفي ناس ولا دخلت كليات ولا نيله وربنا موسع عليها وشغاله فل، هي مجرد ارزاق واسباب والله، هترضي ربنا هيراضيك، وحاول تطنش النااس فاهمني؟ كدا كدا مش هيسكتوا، واسف لو أطلت عليكم، بكتبلكم الرساله دي وانا بمر بفتره اصعب مما تتخيل والله بس الحمدلله، فعسي ان تكرهوا شيئا ويجعل الله فيه خير كثيرا.