الشاعر محمد صلاح

الجنت حلمة وطموحة وامنياتة ويتخيلني من اربع جهاتة وره ما طب حياتي اتغير هواي وهسة يريدني اطلع من حياتة من شاف اهتمامي بلش يخاف و مالومه لان ما شايف وشاف راد يجرب البي قبلي سووّ راد يعوف مو كل مرة ينعاف اتقرب مني چانت عنده غاية بس ما يدري اعرفه من البداية راح يشوف بفراكي شنو يصير رايح اني بس الايام جاية

بعدني عيوني بأحلامك اقنعها وهديتك ادري بالكنتور بس اتمنى اضيعها وين انسة ؟ اذا كل منطقة بـ بغداد الك ذكرى بشوارعها كل الناس بغيابك اواعدها واذا مريت اوادعها

بشنو يهمك شلوني وليش تسأل ؟ اذا مو زين كتلك راح تذبل ؟ ما دامك عفتني عوفني و روح اخاف احجي حجي يخليك تزعل شنو اليتغير بحالة سؤالك بقيني اعلى حالي وشوف حالك خليها على الله وهي تنحل اني بخير ما يحتاج تسأل

متوقع چنت بالعيد ترجع تصالحني وعمر كامل نعيدة تاليها برسالة تدز كلمتين مثل الغربة ايامك سعيدة

منتهية العلاقة وجنت جاي انسى مو وكته فراغك جايبك هسة المن راجع؟ اتغير شعوري وياك مو نفسة لتستغرب اسلوبي وياك صاير حاد حتى الام اذا تنعاف هم تقسى

لا بعد متشوف وجهي احنه ما نرهم سوية اني استاهل الاحسن وانتَ تستاهل الاذية و لا تگلي المن عفتني اعرف بـ نيتك تكسره وگلبي مو زايد عليه

نفسه المسح دمعاتي شو بچاني اتغيرت اطباعه وانصدم خلاني غير التغير من يجي بالتدريج ؟ شو هوَ راسأ صار واحد ثاني ؟

هاي السنة وانتهت وكل شخص مني زعل غادرها للذاكرة وصغرت هواية صدك بس نظفت الدائرة مغرور گالو عليّ نرجسي وميطمن بس نسوا شغلة ترا هو اني صح نرجسي بس نرجسي يجنن

يمكن صدفة نتلاگة بمدينة يظل واحدنة بس عـ الثاني عينة مشاعرنا نفسها ما نقص شي ترا احنة ابتعدنا ، مو نسينة

ادري بغيري صار وياك وهسة ايامه اولهن يسألك كم سؤال يريد اني اعرف اجابتهن شنو تحب وشنو تكره و الاشياء الصدك كلبك يفرحنّة هالشغلات اني اعرفها اكثر منك ومنة …

هذا القبل محسوب چان من اهلي اتفاركنا هسه وللاسف اخبارة ما توصلي اليومه بدوني يمر صعب باشخاص قد تعرفهم يطلعلي ؟