Накурто – Закарпаття и світ

Президент Украйины Володимир Зеленськый уволив из посады головы Мукачувської районної державної адміністрації Сергія Гайдая, за тото ся пише у президентськум указі. Май давно у НАБУ и САП заявили за выкрытя масштабної корупційної схемы у закупованю дронув и засобув радіоелектронної борьбы (РЕБ), до котрої може быти причасный Гайдай, пише Суспільне. Накурто – новины по закарпатськы | Накурто у Facebook

ПриватБанк уйграв у многоміліарднум судовум процесі против його бывшых власникув Ігоря Коломойського тай Геннадія Боголюбова, пишут на сайті банка. Высокый суд Лондона у судовому рішенні узнав, ож Коломойськый и Боголюбов незаконно привласнили почти 2 млрд америцькых доларув через „дуже сложну схему перекредитованя, котра діяла у інтересах Фізичных особ-удповідачув“, то єсть Коломойського и Боголюбова. Повна сума зобоязаня бывшых власникув ПриватБанка щи буде вызначена на далшых судовых засіданьох, айбо подля проґнозув банка из процентами буде перевысшовати 2 млрд доларув США. Накурто – новины по закарпатськы | Накурто у Facebook

Завтра 30. юлія у центральнуй части Ужгорода уд 8:00 по 11:00 місного часу (9:00–12:00 Кийова) призопрут водопостачаня позад ремонтных робут, інформує 21 Ужгород. По тому, як воду назад дадут, треба буде ї пропустити; спожывати воду сыров ся не рекомендує. Накурто – новины по закарпатськы | Накурто у Facebook

Закарпатя тай 🇺🇦 Украйина: • Централна выборча комісія уголосила, ож місні убиранкы, котрі мали пруйти у послідню неділю октовбра 2025. року, не удбудут ся позад воєнного стану, пишут на сайті ЦВК. • Президент Украйины Володимир Зеленськый пудписав законы №13276 за мусайну воєнну пудготовку штудентув медичных и фармацевтичных спеціалностий, придатных на воєнну службу подля стану здоровля тай професійно-психолоґічного удбору (вступат у дію из 1. януара 2026); №13229 за позволеня контрактної службы особам, котрі мавут 60 рокув и дустали письмовый соглас уд командіра воєнної части. • Закарпатська обласна рада пробовала незаконно передати у приватну власность алерґолоґічну болницю, котра діє на базі Солотвинського солерудника, за што написала Закарпатська обласна прокуратура. Бігом судового розбору обласна рада добровольно скасовала рішеня. Накурто – новины по закарпатськы | Накурто у Facebook

Завтра 27. юлія в Ужгороді на діточуй желізници уд 11:00 до 18:00 місного часу (12:00–19:00 Кийова) буде курсовати електродрезина; будут ся збирати гроші на потребы 68. батальйона Закарпатської територіалної обороны, котра на днешньый день стойит у Сумськуй области, пише єден из орґанізаторув Олексій Любецькый. У тот такой день у 18:30 місного (19:30 Кийова) и такой на туй діточуй желізници зачне ся музично-світловоє шов Progressive Station из DJ-сетом, выступами жывої музикы и футуристичным концертом из саморобными інструментами и буквалнов електриков, пишут орґанізаторы. Білеты мож купити за удкликованьом. Накурто – новины по закарпатськы | Накурто у Facebook

Из 1. авґуста Укрзалізниця запустит тестову верифікацію через „Дія.Підпис“ про купованя тай вертаня білетув на подакотрі поїзды; на такі поїзды білеты не мож буде купити у касі, пише офіційна сторунка УЗ у Facebook. Бесіда за рейсы: • №105/106 Одеса–Кийов • №91/92 Львув–Кийов • №29/30 Кийов–Ужгород • №12 Львув–Одеса • №27/28 Кийов–Чоп Нові правила не кывавут ся білетув про воєнных, котрі и дале мож буде куповати через Армію+ тай спеціалну службу Укрзалізниці. Пак буде ся тестовати ай авторизація через BankID. Накурто – новины по закарпатськы | Накурто у Facebook

Президент Украйины Володимир Зеленськый внюс у Верьховну раду законопроєкт за НАБУ тай САП, котрый держит за компроміс. Його текст обговорили из правоохоронцями тай представителями НАБУ и САП. Протесты дале идут. Накурто – новины по закарпатськы | Накурто у Facebook

Єден из майзнамых у світі професійных реслерув WWE Галк Гоґен умер на 71. рокови жывота, інформує The New York Post, удкликувучи ся на TMZ. Рано у четверь до флорідської хыжі реслінґової леґенды узвали медикув позад изпертя серця. Накурто – новины по закарпатськы | Накурто у Facebook

Накурто – Закарпаття и світ pinned a photo

Удбыв ся девятый етап обміна полонеными, за котрый было договорено у Стамбулови. Домув ся вернули тяжко бетежні тай тяжко ранені воякы, пише президент Украйины Володимир Зеленськый у свойому Telegram-каналови. Каже, ож за вшыткі етапы послідньых стамбулськых договореностий ся дало вернути булш ги 1000 украйинськых воєнных. Многі из услобоженых за девятый етап обміна пробыли у полоні булше трьох рокув. Накурто – новины по закарпатськы | Накурто у Facebook

По варошах Украйины проходят протесты против законопроєкта №12414, котрый читаво ограничує повноваженя Націоналного антикорупційного біра Украйины (НАБУ) и Спеціалізованої антикорупційної прокуратуры (САП), фактично ліквідує їх назалежность и пудпорядковує ґенералному прокураторови — и за котрый уже проголосовала Верьховна рада и уже пудписав президент Володимир Зеленськый. Протест буде проходити и в Ужгороді на Поштовуй площи ныні 23. юлія и кажджый день, докідь закон не скасувут, розказала Суспільному громадська активіштка и орґанізаторка акції Тетяна Матвійчук: „Муй чоловік четвертый рук на войні не за такі законопроєкты воює, не за таку державну політику. Уже сьме были у сюй точці у 2014. році, и повторьовати йсе уже котрый раз — не демократично. Ушытко бируєме, кой єсьме нерувнодушні, кой выходиме, говориме, не сидиме дома и репостиме новины, а дієме.“ Образчик: Julia Kochetova/Facebook Накурто – новины по закарпатськы | Накурто у Facebook

Звізда гевіметала Оззі Озборн умер на 76. рокови жывота — через дакулко тыжнюв по тому, як из свойим рокашом Black Sabbath дав прощалный концерт, пише Sky News. Файта уповіла, ож Оззі умер „окруженый любовльов“. „Вы собі не представляєте, што чуствуву — дякуву вам уд усього серця,“ уповів Озборн глоті, выступавучи з трона на сцені Вілла Парка вєдно из Metallica и Guns'n'Roses на свому послідньому концерті. Образчик: Ross Halfin/Sky News Накурто – новины по закарпатськы | Накурто у Facebook

Споєні Штаты Америкы выйдут из ЮНЕСКО, пишут Reuters из удкликаньом на двох европськых дипломатув и The New York Post, удкликувучи ся на представителя Білого дома. Тото продовженя політикы президента США Доналда Трампа против межинародных орґанізацій: у свою перву каденцію 2017–2021 Трамп ініційовав выход державы из Світової орґанізації охороны здоровля (WHO), Рады з людськых прав Орґанізації споєных націй, ґлобалного договора за кліматичні зміны тай ядерної токмы з Іраном, рішеня за што пак Джо Байден бігом свойого президентства скасововав. Доналд Трамп на днешньый день уже уголосив за выход США из Світової орґанізації охороны здоровля, спертя фінансованя Аґентства Орґанізації споєных націй про помуч палестинськым утіканцям и роботу на Близкому востоці (UNRWA). Накурто – новины по закарпатськы | Накурто у Facebook

Што ся діє из Націоналным антикорупційным біром Украйины (НАБУ) и Спеціалізованов антикорупційнов прокуратуров (САП): • Верьховна рада Украйина пуддержала вцілови законопроєкт №12414, окремі правкы котрого ліквідувут независлость антикорупційных орґанув НАБУ и САП и фактично пудпорядкувут їх ґенералному прокуратору, пише Суспільне. Ґенпрокуратор дустане доступ ид ушыткым ділам НАБУ, буде мати право давати мусайні письмові наказы детективам НАБУ, закрывати розслідованя на требованя защиты, самостуйно пудписовати пудозры высокым посадовцям. • 21. юлія ся узнало, ож СБУ и Офіс ґенералного прокуратора справили маймало 70 обникань докывувучых ся 15 робутникув НАБУ, без ухвал суда, — Суспільне. • Представителі G7 провели стрічу из керовництвом НАБУ и условили неспокуй позад ситуації: „Вшыткі маєме ворошный обоязок пуддержовати прозорость, незалежні інституції и належноє урядованя.“ — G7AmbReformUA у соціалнуй сітці X. Так само несупокуйнов позад дій Украйины у бук НАБУ и САП є Еврокомісія, за што вповів єї спікер Ґійом Мерсьє: „Сі заклады сут ключовыма про реформы в Украйині тай мусят діяти независло, вбы ефективно ся бороти з корупційов и сокотити довіру общества.“ • НАБУ уголосило пудозру началникови сектора Департамента защиты націоналної державности СБУ у требованю взяткы у розмірі 300,000 доларув, — офіційный сайт НАБУ; подля їх даных, высокопоставленый робутник СБУ вєдно з двома спувдіячами требовав взятку уд пудозрьованого у ділі за орґанізацію незаконної переправы за гатар воєннозобоязаных, за тоты гроші гибы обіцяв ся знищити часть матеріалув діла тай розкрыти уже установлені факты. • Суд узяв робутника НАБУ Віктора Гусарова пуд варту без права внесеня заставы до 20. септембра вадь до кунця досудового розслідованя, — Суспільне. Його пудозрювут у державнуй зраді и несанкціонованых діях из секретнов інформаційов, задержали го бігом провірок у НАБУ. Накурто – новины по закарпатськы | Накурто у Facebook

У Жденіювськуй громаді кладут путь ид контроверзным вітрякам на полонині Рунуй — орґанізація „Save Пікуй“ пише, ож рішеня за ставбу было приятоє из нарушеньом лісового законодавства, без участи громадськости у обниканьови лісосік, за што удкрыто криміналноє діло из ініціативы орґанізації и другых громадян. На дарабах, котрі яли рубати про ставбу, были выявлені локалітеты черленокнижної флоры. Save Пікуй дали ай фотофіксацію уд 20. юлія, де видят масовоє пошкоджіня коры дерев, засыпку ґрунтом кымакув, деґрадацію потучкув, метаня розкорчованых пнюв у хащу, засміченя хащі голузьом, выгубленя дуплястых букув, розкрытя хащі про слобудный доступ джипам, ендурам, баґіям и квадроціклам, котрі будут ищи май губити ліс. Save Пікуй так само наголошувут, ож путь ся кладе за державні гроші, у тот час кой путь обласного уровня Ужок–Нижні Верецькі не парує на громадськый транспорт и оперативні спасательні службы. Накурто – новины по закарпатськы | Накурто у Facebook

У суботу 19. юлія робутник прокуратуры Андрій Молочный у Кийові на пішоходнуй зоні збив жону и пробовав утікнути из міста події, айбо правоохоронці го найшли, — Суспільне. Ґенералный прокуратор Руслан Кравченко уповів, ож бере діло пуд свою личну удповідалность, обы представити інтересы пострадавшої. „Належность ид орґанам прокураторы не індулґенція, ай удповідалность,“ наголосив Кравченко. Пострадавша умерла у болници. Тест указав у Молочного 1.77 проміле алкоголя у крови. Йому дали пудозру за ч. 3 ст. 286-1 ККУ (нарушеня правил дорожного кываня у стані спяніня, што призвело ид смерти челядника), за йсе вповістив Кравченко. 21. юлія суд дав Молочного пуд варту без права на внесеня заставы, написало Суспільне. Накурто – новины по закарпатськы | Накурто у Facebook

Головні новины сього тыжня (14.07.2025 – 20.07.2025) Тестуєме сякый новый про Накурто відеоформат.

Александер Усик нокавтовав Даніеля Дюбуа у пятум раунді, дострочно побідив и став чемпіоном світа у надтяжкуй вазі. Усик дав Дюбуа правый гук у голосницю, чим повалив британця на землю, а пак добив го до нокавта лівым у бороду, пише Guardian. Сесе друга побіда Усика над Дюбуа. Образчик: Reuters Накурто – новины по закарпатськы | Накурто у Facebook

Президент Чеської републікы Петр Павел пудписав закон, котрый криміналізує пропаґанду комунізма, пише уданя Euronews. Уд 1. януара 2026. року пудпорованя комуністичної ідеолоґії буде на уровни з пудпоров націстської, удповідні зміны внесені у Криміналный кодекс; за нарушеня мож буде дустати до 5 рокув увязненя. Увести такый заказ сперед сим закликали подакотрі чеські інституції, наприклад Інститут штудованя тоталітарных режимув, Музей памняти 20. стороча, Платформа европської памняти тай свідомости. Комуністична партія Богемії тай Моравії (KSČM) пуд проводом предсідниці Катеріны Конечної выступила против рішеня, заявивши, ож оно політично мотивованоє. Образчик: Associated Press Накурто – новины по закарпатськы | Накурто у Facebook

Европська комісія и Словакія дуйшли д согласови, ож держава ся буде поетапно удказовати уд російського ґаза про досягненя свої енерґетичної безпекы, уголосила спікерка Еврокомісії Анна-Кайса Ітконен на бріфінґови 18. юлія, — Суспільне. „Робиме над тым, обы была безпека постачаня тай цінова стабілность в ушыткых крайинах-членах. Росія не єден раз доказовала, ож є ненадійным партнером, зато удказ уд єї енерґоносителюв тото крок ид булшуй безпеці,“ уповіла Ітконен. Рада Европської унії межи тым у пятницю офіційно одобрила 18. пакет санкцій против Росії: • новый механізм динамічного ограниченя ціны на нафту, котрый установит ціну на 15% май низку ги просікова торгова ціна на російську сыру нафту; то єсть из дас 60 до дас 47.6 америцькых доларув. • новый заказ (заборона) на транзакції, скапчані из Сіверными потоками 1 и 2, тай 105 новых исписув шіф тіньового флота. • повный заказ на транзакції; ищи булше ся ограничує доступ РФ ид сучасным технолоґіям и технолоґіям двойного призначеня. 17. юлія премєрміністер Словакії Роберт Фіцо у відеови на своюй сторунці у Facebook заявив, ож Словакія булше не планує класти вето на 18. пакет санкцій, бо словацькый уряд дустав уд Еврокомісії письмові ґарантії за ціны на ґаз и його потенційный дефіціт, айбо уповів, ож Словакія ниґда не пуддержит пропозицію сперти імпорт російського ґаза по 1. януара 2028. Ілустративный образчик: Tomas/Unsplash Накурто – новины по закарпатськы | Накурто у Facebook