نقطة نور

Channel photo updated

أول أيام رجب 🌙 رجب دخل ومش داخل كده وخلاص، ده داخل يقولك: فوق الرحلة قربت. رجب مش شهر شغل كتير، ولا شهر تحديات صعبة، رجب شهر تهيئة القلب 💛. كأن ربنا بيديك فرصة هادية تقول فيها: أنا لسه هنا، ولسه ينفع أرجع. رجب واحد من الأشهر الحُرم، يعني الذنب فيه تقيل، والطاعة فيه تقيل ميزانها، والقلب فيه أقرب إنه يفوق. الفكرة مش إنك تبقى ملاك فجأة، الفكرة إنك تبدأ. تبطل ذنب واحد، تزود ذكر بسيط، تصالح نفسك، وتفتح صفحة نضيفة قبل رمضان. رجب بيقولك: مش مطلوب منك تجري مطلوب منك توجّه 🧭. لو ناوي تبدأ بداية جديدة، اكتب في الكومنت أول حاجة هتظبطها في رجب… وخليها خطوة صادقة. #نقطة_نور

قبل ما تمسك القلم وتكتب أهداف السنة الجديدة، اقعد شوية مع السنة اللي فاتت. مش علشان تجلد نفسك، ولا علشان تفتح جروح وتقعد تزعل، لكن علشان من غير مراجعة، التخطيط بيكون أعمى. السنة اللي خلصت مش مجرد 12 شهر عدوا، دي ذكريات، دروس، ذنوب، توبة، دعوات اتأخرت، لحظات قرب من ربنا، ولحظات بُعد كنت محتاج فيها ترجع وما رجعتش. مفيش سنة بتعدي من غير ما تسيب أثر جوا القلب. والذكي مش اللي يجري على اللي جاي، الذكي اللي يفهم اللي فات. ليه لازم تراجع السنة اللي خلصت؟ • علشان تعرف إيه اللي قواك؟ • وإيه اللي كسرك وماتعالجش؟ • علاقتك بربنا كانت عاملة إزاي؟ قريبة؟ متقطعة؟ موسمية؟ ولا ماشية على البركة؟ • علشان تشوف: إيه الذنب اللي اتكرر؟ وإيه الطاعة اللي اختفت؟ وإيه الدعوة اللي ربنا استجابها وإنت ماخدتش بالك؟ المراجعة مش وقفة حزن، دي وقفة وعي. ومن غير ما أسيبك تايه فدي طريقة عملية تراجع بيها السنة خطوة خطوة: 📌اكتب بدون فلترة افتح نوت أو كشكول، واكتب: – أكتر 5 حاجات أثرت فيا السنة دي – أكتر حاجة وجعتني – أكتر حاجة غيرتني – أكتر حاجة قربتني من ربنا – أكتر حاجة بعدتني عنه مفيش إجابة صح وغلط، فيه صدق وبس. 📌راجع علاقتك بربنا بصدق اسأل نفسك: – صلاتي كانت عاملة إزاي؟ – الدعاء كان حاضر ولا بس وقت الزنقة؟ – القرآن فين مكاني منه السنة دي؟ – لما كنت بتوجع كنت بروح لمين؟ مش علشان تلوم نفسك، بس علشان تعرف تبدأ صح. 📌 اعترف بالدروس مش بس بالأحداث مش مهم إيه اللي حصل، المهم إنت فهمت إيه؟ واعرف إن كل وجع كان رسالة، وكل تأخير كان حكمة. وبعد المراجعة ابدأ التخطيط. وأنت معاك وعي، مش بس طموح. وعندك نية تقرّب، مش بس تحقق. السنة الجديدة مش محتاجة نسخة مثالية منك، محتاجة قلب صادق، وعلاقة أهدى مع ربنا، وخطوات صغيرة بس حقيقية. لو حابب، اكتب في كومنت: أكتر درس أخدته من السنة اللي فاتت وافتكر اللي بيراجع بقلبه، بيبدأ صح 🤍 #نقطة_نور ☀️

لو متعرفش فالسنة بقـت 12 أسبوع، عارف يعني إيه!🤩 خليني أسألك سؤال بسيط👀 ليه السنة بتحسها بتجري كده؟؟ ليه بتحس أنك بتصحى فجأة تلاقي نفسك في أخر السنة وكله حواليك بيجري في مارثون في تجهيز أهداف السنة الجديدة !!😭 الفكرة مش في الوقت⏳ لكن دماغنا بتشوف إن السنة طويلة وكده كده لسه في أيام كتيرة فتبدأ دماغك تسوّف وواحدة واحدة نكسل ونفضل نقول لسه بدري.🤦🏻 تعالى بس نجرب نبص للسنة مش على إنها ١٢ شهر كاملين لكن نتخيل أننا معانا ٤ سنين كل سنة فيهم ٣ شهور بس! إيه رأيك؟ ٣ شهور تقدر تستحمل فيهم التعب والتركيز والإلتزام صدقني العقل بيحب المسافات القصيرة فركز على أن السنة ١٢ أسبوع بس وأبدأ أسأل نفسك إيه الحاجة الواحدة اللي لو ركزت فيها لمدة ٣ شهور حياتك هتتحرك؟! مش عاوزين مليون هدف لكن حاجة واحدة بس حقيقية تركز فيها لـ٣شهور بس عارف ايه أكتر حاجة حلوة في الموضوع؟!😍 إنك لو فشلت مش هتلاقي أن السنة الجديدة دخلت ده أنت لسه هتدخل على سنة صغيرة جديدة فيها ١٢ أسبوع كمان تشتغل على هدفك يعني كل 12 أسبوع فرصة بداية وفرصة تصحيح للأخطاء مش لازم تغير حياتك كلها 🌚 غير ال 90 يوم اللي جايين بس وتوكل على الله وأستنانا في نقطة نور البوست الجاي نقولك على فكرة جديدة💡 قولي بقى في الكومنتات لو آخر ١٢ أسبوع بس في حياتك تحب تعمل ايه فيهم؟! #نقطة_نور

في آخر ١٥ يوم في السنة، ساعات بنحس إن الوقت بيجري وإحنا واقفين مكاننا ⏳ وده طبيعي، لأن كل سنة مننا فيها حاجات حصلت: إنجازات، تحديات، لحظات فرح ولحظات تعب. المهم دلوقتي مش نفكر في اللي فات، المهم نفكر إزاي نعمل من آخر أيام السنة دي حاجة مميزة لنفسنا 🌟 أول حاجة، خد وقتك تفكر في السنة كلها 🌱 مش بس تعد الأيام أو الإنجازات، لكن بص كمان على اللحظات اللي حسيت فيها بالرضا، واللي اتعلمت فيها حاجة جديدة، حتى لو كانت صغيرة. اللحظات دي هي اللي بتخلي السنة دي لها طعم ومكانة في قلبك ❤️ بعد كده، ركز على نفسك دلوقتي 💭 وافتكر إن آخر ١٥ يوم فرصة ممتازة تتخلص من أي حاجة مضايقاك، سواء عادة سيئة، فكرة سلبية، أو حاجة مأجلها. حاول تعطي لنفسك فرصة تبدأ حاجة جديدة، حتى لو خطوة صغيرة. ممكن تعيد ترتيب أولوياتك، تخطط للأهداف اللي نفسك تحققها السنة الجاية، أو ببساطة تدي نفسك لحظات هدوء وراحة ☁️ وكمان متنساش الناس اللي حواليك 😊 اعتبرها فرصة تشكر الناس اللي كانوا معاك، تبعت كلمة حلوة، أو حتى تصنع لحظة صغيرة تفرح حد. الحركة دي مش بس بتسعدهم، بتديك إحساس بالسلام الداخلي في الآخر، حاول تعيش الأيام دي بوعي ⚡ خلي كل يوم ليه معنى، مهما كان بسيط، خلي ضحكتك أكتر، حركتك أبطأ شوية لو محتاج تهدي، واحتفل بكل إنجاز حتى لو صغير 🎉 لأن اللي بيصنع الفرق مش طول السنة، لكن إزاي بنختتمها ونستعد للسنة الجديدة بطاقة مختلفة 🌟 خد نفس عميق وابدأ دلوقتي 💪 آخر ١٥ يوم مش قليلة، بالعكس، فرصة ذهبية تنهي السنة وأنت راضي، ممتن، ومتحمس للجاي. الأهم، متجلدش نفسك على حاجة عدت، استغل فرصة البداية الجديدة وابدأ تشتغل على أهدافك بطريقة صح وعلشان يوصلك بوست بأفكار كتيرة تستغل بيها آخر أيام السنة، متنساش تكتب تعليق واثبت حضورك واستنانا💡 #نقطة_نور☀️

فيه لحظات صغيرة، بس جواها سلام كبير أوي. فيه ناس بتدور على الطمأنينة في السفر، أو في التغيير الكبير، أو في إن حياتهم تمشي زي ما هم متخيلين بالظبط بس الحقيقة؟ السكينة ساعات بتستخبى في الحاجات البسيطة اللي بنعديها من غير ما نحس. في ضحكة طالعة من القلب بعد يوم طويل، في صوت الأذان وهو بيطمنك إن لسه فيه فرصة تبدأ من جديد، في شمس الصبح وهي داخلة من الشباك على مهل، في دعوة قلتها وأنت مش قادر تكمل بس حسيت إن ربنا سامعك. السكينة مش في البُعد ولا في الامتلاك، هي في اللحظة اللي تختار توقف فيها وسط الزحمة، وتتنفس بعمق، وتقول لنفسك: أنا دلوقتي بخير، وربنا معايا. كل مرة تلاحظ فيها نعمة بسيطة، كل مرة تختار تهدى بدل ما تتوتر، اعرف إنك بتقرب من السكينة شوية كمان 💛 قولي بقى، إيه أكتر لحظة بسيطة حسيت فيها براحة كده من غير سبب؟ #نقطة_نور ☀️

غريزتك هي السبب في دمارك بتبدأ تلاحظ إنك غرقان في عادات سيئة، وبعدت عن ربنا، وقاعد من غير هدف. لكن مع الوقت، بيبدأ جواك إحساس إنك محتاج تتغير. تقوم وتقرر إنك المرة دي مش هتسيب نفسك. تقاوم، وتخطط، وتبدأ أول يوم بحماس كبير. بس تاني يوم، تقع. ويبدأ الحماس يهدى. وترجع تاني تحاول، وتدور في دايرة بين إنك عايز تتغير، وبين إنك واقف مكانك، مش عارف تبدأ منين. مرة تقاوم، ومرة تستسلم، ومرة تظن إنك خلاص اتغيرت. لكن الحقيقة إنك لسه في نفس النقطة، من جوه واقف مش بتتحرك. خليني أقولك حاجة يا صديقي المشكلة مش إنك مش عايز تتغير، ولا إنك ضعيف. المشكلة في عقلك نفسه. العقل البشري فيه غريزة بقاء عظيمة. زمان، كانت بتحمينا من الوحوش والطبيعة والخطر. لكن لما الدنيا بقت آمنة، العقل بدأ يوجّه الغريزة دي ناحية حياتنا نفسها. فأول ما تحاول تتغير، أو تبني نسخة جديدة منك، العقل بيفعل آلياته الدفاعية علشان يحميك من المجهول. ويحاول بكل الطرق يخليك ثابت في نسختك اللي متعود عليها. يعني تخيل إن اللي بيحاربك هو عقلك نفسه. فهل تقدر تتغير رغم إن اللي ضدك جواك؟ دلوقتي عرفت فين المشكلة، وده أول طريق الحل. بس من وجهة نظرك تفتكر فعلاً نقدر نتغير؟ #نقطة_نور

لسه مستني حد يقومك؟ أحياناً بتصحى ومفيش حاجة تشجعك، ولا كلمة حلوة من حد، ولا إنجاز كبير تستند عليه. بس رغم كده، بتكمل. لأنك فهمت إن التحفيز الحقيقي مش دايماً بييجي من بره، أحياناً بيكون قرار صغير جواك إنك متوقّفش. مش لازم تبقى متحمس عشان تتحرك، أحياناً الحركة هي اللي بتخلق الحماس. لما تقوم تعمل خطوة بسيطة، حتى لو صغيرة جداً، بتشعل جواك شعلة كانت نايمة. ذكر نفسك كل يوم إنك مش محتاج حد يقومك، أنت المسئول اللي بيبدأ يومك. كل مرة تختار فيها تكمل رغم التعب، أنت بتثبت لنفسك إنك أكبر من الظروف. خد بالك، أكتر الناس اللي بيوصلوا مش لأنهم كانوا دايماً متحمسين، لكن لأنهم ماستنوش التحفيز ييجي، خلقوه بنفسهم. قولنا في التعليقات إيه الحاجة الصغيرة اللي بتعملها كل يوم، وبتخليك تكمل حتى لما الحماس بيختفي؟ #نقطة_نور

سيف قاطع من العود انكسر سيفه فأعطاه النبي -صلى الله عليه وسلم- عودًا فتحول في يده سيفاً😯 - شهد بدراً وأحد والخندق وابلي بلاء حسناً، واستعمله النبي -صلى الله عليه وسلم- على سارية الغمر. - قاتل يوم بدر بسيفه حتى انقطع في يده، فأتى رسول الله -صلى الله عليه وسلم- فأعطاه جدلاً من حطب، ولما أخذه من رسول الله -صلى الله عليه وسلم- هزه فعاد سيفاً في يده طويل القامة شديد المتن أبيض الحديدة🗡. - من مشاهير الصحابة  أسلم قبل الهجرة، وهو من بني غنم قوم من بني أسد سكنوا مكة كحلفاء لقريش. - بشره رسول الله -صلى الله عليه وسلم- بدخول الجنة من غير حساب ولا عذاب، فعندما قال رسول الله -صلى الله عليه وسلم- أن أهل الجنة : "هم الذين لا يسترقون ولا يكتوون، وعلى ربهم يتوكلون"   فقام عكاشة فقال: (أنا منهم يا رسول الله؟) قال: أنت منهم، وقام رجل آخر من المهاجرين فقال: أنا منهم يا رسول الله؟ قال: «سبقك بها عكاشة».☘ هو الصحابي الجليل عكاشة بن محصن 🌱 الذي سبق السبعون نفراً الجالسين ليفوز بالجنة، وبسرعة البرق سأل الرسول آنا منهم يا رسول الله، ففاز بالجنة بدون حساب ولا عذاب، أما الآخر فقال له النبي سبقك بها عكاشة. فكن عكاشة لا يسبقك للجنة أحد ❤️ #على_خطاهم #نقطة_نور