﮼عِــذر ᥫ᭡ .َ

اوَرث ذكرياتك واشهك اوداع كل مادير بالي وجَهك ادير المَوادع ابروحي يصير تابوت وبالملاگه هَلاهل دمعِتي اتصير كلت ملحك بجرحي وغزر وياي وكلت سنين عمري ومامضن بيك الله انطاك عمري وعشت وياي وي غيري شتضن هم الله ينطيك .

أركض على الطاحت وأجد تالي صفر أيدي ترد .

برودك صاير بگد ضعفي وياك وانا الشايل حرارة دم هواويد أزدواجي وفوضويتك ذبحت الشوگ تكص جفوفي وتنزل العناگيد ورا كل ما گلتلي انطيني گلت هاك لحد ما گام گلبك مدري شيريد.

_

من گلتلك لا ترخي العاگدة رحت فليت البصبعك شادة الذنب ذَنبي شگد جنت مابيه خير من بعد وجه الله وجهك عابده ، ماي وجهي بكصتي تبدة على كيف وجانت بكل گطرة عينك شاهدة .

شجرة مالك رٲي يم ذيج الطيور ترضى ما ترضى على غصنك صاعدة غرفة بيك مخاد ما مصفوطة زين يعني قبلي هواي وادم كاعدة، تگلي دمعك ما نزل جان استحيت البيه ما باجيته حتى الفاگدة جنت اطك اليركض يسلم عليك وانتَ ويـ كتالي اجيت تساعدة .

تعال اشلع الطين البي عرگ ملگاك بيا صحره حنينك مشى قافلته؟ جبروك وطفيت و واهسك وياي كفرت بكلشي بعدك والعشگ صنته على برد العطش وتبده وجهك ماي على كل حال گلبك روحي عاذرته .

عرفتلها ‏وگمت مـن تشـتد افتح باب ‏والاگي التايهات بملگه المعّزب .

وليغرك جذفهم وانتَ روجك روج يغرگون وحياتك ما يعبرونك يلولولك جذب بالك تنام الليل غمض عين وحده ولا يلهونك .

اليتخله بسهولة گلبه مو فاضي توني عرفت روحي تكملة ماضي، نقطة ضعفي زعلك ليش ناوي تروح ! كون من البداية تكول ما راضي تحاسبني على ذَنبك وانا ادور اعذار يا قانون هذا النصبك قاضي .

أدفع بالبَلم ما ادري بيه غرگان و المردي انكسر و الروجة خانگته وبديرة مناجل سنبلة انحطيت حصدُوني و خضار الطيش ما شفته و صدگت الرّمل بيه تكشخ الصحراء ما ادري الأبل كل حول ساحگته و صبرت اعله الجَرح حد ما خذاني الشَيب و تحملت السَّنين و ضگت ما ضگته الحنضل و العسل و الزين و الموزين كلهن جربتهن و انتَ ذاك انتَ .

جرح برجل بدوي انجبر امشي وياك واجيك وروحي ترجف تبقى للهامه الاگيك بكلام يهدي اخو المكتول وتلاگيني بكلام يفطر الجامه .

شگد غشيم الگلب يترجى منك وفى؟

بَس يلا تبقه انتَ الجرح وانتَ ابو الراي الراهي ولو ردت عيني اشلعها الك بَس گول منهن ياهي .

لو ادري اللي يضل ممنوع مرغوب لارخصت روحي ولا انذليت انا بحرت بيك عناد عالروج وعلى خصر الشراع وزار شديت ، الهوى هذا اللي يمرني أتخيلك بي حتى التقي وياك منين ماجيت .. يعني بمعنى آخر مستحي احجي ترا بس أنتَ غيرك ماشتميت .