Olot hayoti gazetasi /Rasmiy kanal

Olot tuman tibbiyot birlashmasida tibbiyot islohotlari va raqamlashtirish bo‘yicha viloyat seminari o‘tkazildi Buxoro viloyati sog‘liqni saqlash tizimida amalga oshirilayotgan islohotlarni yanada chuqurlashtirish, tibbiyot muassasalarida raqamli transformatsiya jarayonlarini jadallashtirish hamda ilg‘or tajribalarni ommalashtirish maqsadida Olot tuman tibbiyot birlashmasida viloyat ko‘rgazmali seminari tashkil etildi. Seminarda viloyatdagi barcha 11 ta tuman va shahar tibbiyot birlashmalari rahbarlari, ularning o‘rinbosarlari, bosh hamshiralar, koordinatorlar hamda axborot-kommunikatsiya texnologiyalari mutaxassislari ishtirok etdi. Tadbir davomida tibbiyot tizimidagi islohotlarning amaliy natijalari, zamonaviy boshqaruv usullari hamda raqamlashtirish yo‘nalishida erishilgan yutuqlar namoyish qilindi. Seminar doirasida Olot tuman tibbiyot birlashmasida amalga oshirilgan keng ko‘lamli bunyodkorlik va modernizatsiya ishlari bilan tanishtirildi. Muassasaning moddiy-texnik bazasini mustahkamlash maqsadida 2,2 milliard so‘mlik zamonaviy tibbiy asbob-uskunalar xarid qilinib, foydalanishga topshirildi. Shuningdek, "Ochiq byudjet" loyihasi doirasida muassasa g‘olib bo‘lib, uning fasad qismi zamonaviy talablarga mos ravishda to‘liq rekonstruksiya qilindi. Ishtirokchilar birlashma hududida olib borilgan obodonlashtirish va ko‘kalamzorlashtirish ishlari, bemorlar hamda tibbiyot xodimlari uchun yaratilgan qulay sharoitlar bilan yaqindan tanishdilar. Amalga oshirilgan ishlar sog‘lom va zamonaviy tibbiy muhitni yaratishga xizmat qilayotgani alohida ta'kidlandi. Seminarning asosiy mavzularidan biri raqamlashtirish jarayonlari bo‘ldi. Tadbir ishtirokchilari yangi tashkil etilgan Situatsion markaz faoliyatini ko‘zdan kechirdilar. Unda birlamchi tibbiy-profilaktika muassasalarida axborot tizimlaridan samarali foydalanish, elektron boshqaruvni takomillashtirish, raqamli tibbiyotda uchrayotgan muammolar va ularni bartaraf etish yo‘llari yuzasidan fikr almashildi. Shuningdek, aholiga ko‘rsatilayotgan tibbiy xizmat sifatini oshirish, kasalliklarning oldini olish, erta tashxis qo‘yish tizimini yanada takomillashtirish hamda birlamchi bo‘g‘in faoliyatini kuchaytirish masalalari muhokama qilindi. Tuman va shahar tibbiyot birlashmalari o‘rtasida o‘zaro tajriba almashish, ilg‘or amaliyotlarni keng joriy etish yuzasidan muhim tavsiyalar berildi. Seminar yakunida ishtirokchilar Olot tumanida sog‘liqni saqlash tizimini modernizatsiya qilish, infratuzilmani yaxshilash va tibbiyot sohasini raqamlashtirish borasida erishilgan natijalarni yuqori baholadilar. Kelgusida ushbu tajribani viloyatning boshqa hududlarida ham keng tatbiq etish bo‘yicha ustuvor vazifalar belgilab olindi. Raqamlashtirish va modernizatsiya — aholiga sifatli, shaffof va zamonaviy tibbiy xizmat ko‘rsatishni ta'minlash yo‘lidagi muhim qadamlardan biri bo‘lib, bunday seminarlar sog‘liqni saqlash tizimini yangi bosqichga olib chiqishda muhim ahamiyat kasb etadi. https://t.me/olottumani