Первомайский территориальный отдел Батыревского МО

Мини футболра - пӗрремӗшсем! Спорта юратакан Сител каччисем хальхи вӑхӑтра та хӑйсен вӑй-хӑватне ҫухатмаҫҫӗ. Ҫӗнӗ ӳсӗм хыҫҫӑн ӳсӗм тӑваҫҫӗ. Акӑ паянхи кун Хурама-Тӑвар ялӗнчен ырӑ хыпарпа таврӑнчӗҫ. Унта Район депутачӗ пулса нумай ҫул тӑрӑшнӑ Сергей Манзуркин ячӗпе мини футбол турнирӗ иртнӗ. Ҫак ӑмӑртура Сител спортсменӗсем чи пултаруллисен йышне кӗрсе пӗрремӗш вырӑн ҫӗнсе илнӗ. Хӗрӳ тупӑшура хӑватлӑн кӗрешсе яшсем ӑста выляма пултарнине тепӗр хутчен ҫирӗплетсе панӑ. Ял чысне ҫӳле ҫӗклекен спортсменсене чунтан саламлатпӑр. Ӑнӑҫу яланах вӗсен аллинче пултӑр!

Ялти сӑваплӑ вырӑна тирпей-илем кӳчӗҫ...     Ҫулсерен упранса пыракан йӑлана малалла тӑсса Сителте паян черетлӗ субботника пуҫтарӑнчӗҫ. Ял старости Юрий Степанов йӗркелесе, ертсе пынипе масар ҫинче, ҫавӑн пекех ун тулашӗнчи лапама тасатса тирпейлерӗҫ.    Тӑрӑшса ӗҫлекенсем иртнӗ ҫулхи ҫӳп-ҫапа пуҫтарчӗҫ, хӑрӑк туратсенчен тасатрӗҫ. Хӑй тӗллӗн ӳсекен хунавсене касса тирпейлерӗҫ.     Паянхи сӑваплӑ ӗҫе те нумайӑн ырласа масар ҫине кашни килтенех тухрӗҫ. Инҫетре пурӑнакансем те айккинче тӑрса юлмарӗҫ. Масар тирпейлеме инҫетри ял-хуларан килсе субботника хутшӑнма кӑмӑл турӗҫ.    Пӗр ҫемьери пек вӑй хунишӗн, ялшӑн чунтан  тӑрӑшнишӗн Юрий Степанов староста пурне те тав турӗ.  Пӗрле килӗштерсе ӗҫленирен хакли нимӗн те ҫук. Ун чухне ҫеҫ тивӗҫлӗ кӑтартусем пулаҫҫӗ терӗ вӑл.