٦

أعرفني اليوم لكن أجهل إحساسي نفس التفاصيل الأولى بس أنا غايب يا كثرة أصوات خلق اللّٰه في رأسي تدوي مثل ذكريات الطيش مع تايب تقول ناسي، ولا أدري ويش أنا ناسي تقول هايب، ولا أدري ويش أنا هايب غامض مثل نشأة القسوه مع قاسي ضايع مثل هقوة كانت على خايب

ما أخاف من شي بهالدنيا إلا شي وااااحد وخوفي منه عظيم 😢

ما أخاف من شي بهالدنيا إلا شي وااااحد وخوفي منه عظيم 😢

سألت نفسي من أنا؟ واحترت مدري من أنا فيني تناقض واضح وفيني غموض بلا حدود أحيان احس اني هناك.. وأحيان احس اني هنا واحيان احس اني الغريب اللي لداره لن يعود من حولي اصوات الاوادم والقصايد والغناء وفي داخلي منفى وعزلة عابد وصمت اللحود اعيش عمري في كبد واعلم بأني للفناء رغم الالم اطمع لطول العمر واتمنى الخلود احث غيري للصبر على المتاعب والعناء واستسلم لدمعة طفل وانا على باب الصمود ولا ابحث عن اشعار المديح وعن عبارات الثناء وافرح بكلمة دافنة تُذوّب أنفاس البرود فيني استقامة حافيه تمشي طريق المنحنى وفيني الجموح اللي يوصلني الى حد الجمود بس الاكيد اني الحزين اللي يدور للهناء ويخاف لا شاف الهناء يموت من عين الحسود

‏الي خلق في مشاعرنا من البعد خوف ‏خلق لنا نعمة النسيان في غيرها ‏تموت الأحلام دايم في يدين الظروف ‏وتعيش الآمال وتواصل مشاويرها ‏في ليلةً تاهت الخطوه وطال الوقوف ‏هي نفسها الليله الي شرها خيرها ‏جيت ومعي قلبً يحب ويحن ويروف ‏ورحت ومعي قلبً أقسى من معاذيرها

ياكعبة الحب لو طفتك طواف الوداع ‏وش ذنب بيض امنياتي تفقد آمينها ‏وانفسي اللي مع نفسي تعيش بـ صراع ‏ماعدت أميز أعداها من محبينها ‏في رحلة البين مالي للمسافة متاع ‏كل المسافات كانت .. "بيني وبينها" ‏فارقتها طرق .. مافارقتها بـ اقتناع ‏طرقا قساها يشيل من الترف لينها ‏صبيت روحي بوادً ماسعى فيه ساع ‏واودعتها .. بين حناها وكفّينها ‏كفايه اوهام ياقلبي وفض النزاع ‏تدشين الأحلام ماهو مثل تابينها ‏ماكان يوم الموادع كان يوم الضياع ‏ياقسو الأيام لا سنت سكاكينها ‏ودعتها بـ دمع عاشق وابتسامة شجاع ‏وابتسمت جفونها واغرورقت عينها ‏صدت ولما نوت تمسح دموع الوداع ‏خافت من رموشها لا تجرح يدينها ‏- سعود بن مهدي

و أنا دخيلك من الخيبات يا مستجيب ‏و من انصراف القلوب و من تقلابها ‏لو تشرق الشمس عاده مقتفيها مغيب ‏و يضفي عليها سواد الليل جلبابها ‏الناس فيها بلا و الوقت ما له صحيب ‏و النية الطيبة ما تنصف أصحابها

يمر العمر كله ما أعرف وش قيمته لولاك أحبك يا رفيق الدروب الموحشه والمستنيره

مرحبا يامنوة اللي يوم خذك ونالك ‏عاف كل وجيه خلق الله وجاه جفالي ‏ㅤ ‏يوم لفيت السواد اللي زهاه بـ شالك ‏قمت اعدل غترتي واعدل ميل عقالي ‏ㅤ ‏انت مالك اربعين اشباه غير اظلالك ‏يا فديت اللي تعمد ضيعّتي وضلالي ‏ㅤ ‏سو ماتبغي وماودك ومايحلا لك ‏في عيوني لك ديار وفـ الحشا مدهالي

الخيل والِّليل والبيداء تعرفني والخاصره وحلبان وكل معمُوره _عناد الشيباني

أتركيني ضايق البال مكسور الجناح ‏أتثاقل قومتي وأتحالا للمطيح

ثلاث شهور وانا افضل العزله عن الجلاس ‏ما غير امشي على طاريك و اسولف على ظلي ‏اقوم هناك كن الليل يبغاني بكلمه راس ‏بنفس الموعد اللي قلت لدمعتي هلي ‏احبك و اعشقك و اموت فيك لـ اخر الانفاس ‏الا يابري حالي من غلاك و ياوجود اللي ‏يجامل فالتعامل مع شعور الكائن الحساس ‏و هو من زحمه الاشواق وش ياخذ وش يخلي ‏عساني فدوتك لا تاخذك مني يدين الياس ‏وانا ادنى عارض يروح ببعضك ، يروح بي كلي ‏تعود بالسلامه يلعب بخصلاتك النسناس ‏و اشوف عيونك تقيم الصلاه و رمشك يصلي

ألاقيك في مطلع قصيدة ونسْمة نود ‏وفي البدر لا ضُوى وفي الورد لا ندَّى

ما مرتني الذكرى القديمه مرور اكرام ‏احس بوجعها ينتشر داخل اعماقي ‏تعشا الحزن طرّاف كبدي وشبع وقام ‏وانا خايف يعود ويفطر على الباقي ‏حقوق الضيافه ما تعدا ثلاث ايام ‏وانا لي " ثلاث اعوام " والحزن فاحداقي

مرّت خطاويك على رملة البيد ‏سيل وصدف في رحلة البيد وادي ‏ما تنلحق مثل العمل والمواعيد ‏مثل الدروب اللي على بالي غادي ‏عاثت كفوفك في بياضي تجاعيد ‏حتى تساوي مع بياضي سوادي ‏الثقب ما بيني وما بينك يزيد ‏معك العمر لا منصف ولا حيادي ‏المحزن إن مثلك مثل رابع العيد ‏لا فرّح الديرة ولا مرّ عادي

تنفس الصبح والنور أبتدا بالظهور ‏وأنا على جلسة البارح ما غيّرتها ‏أفكاري تدور والدنيا تلف و تدور ‏ولا فيه ذكرى قديمه ما تذكرتها ‏أعيش في حالة أستنكار ذات وشعور ‏وصلت نقطه غريبه ما تصوّرتها ‏أحس روحي لحقها قل جهد و فتور ‏من كثر ما أحترت فأحلامي وحيّرتها

ما راح من دنيا ألفنا بألف طقاق العمر سلفه والأوادم طراقي بن زويبن

‏من ذاوق العشق لابده يعاود بحين ‏والحب ولعه ونار الحب ماتنطفي ‏واليوم بعطيك ذكرى تنفع المؤمنين ‏فكر وقرر وخذ موقفك من موقفي ‏ماني بجافيك لين اعالم الميتين ‏وحتى لو اني بغيت اجفاك ماتنجفي ‏أنا لو افقدك كني فاقد الاكسجين ‏عهدٍ علي ماتجيك القسوه من طرفي ‏- سفر الدغيلبي

قم شرّع الباب للهقوات وأزهلني/تبي تزين العلوم ويضحك حجاجك*