رَيَّـــآنـة|نصرٌ من الله وفتح قريب❤️.

شباب اذا في اي طلبة تمريض في القناة اتواصلوا معاي خاص. @Teela_0000

فلتر الناس البتتعامل معاها.. لأن ما كل شخص بيستحق وقتك... ولا طاقتك.. ولا حديثك. - تبتيل عبد المنعم 🌿🩵.

يا بنتُ عُمرُكِ ليس حبراً والسلامْ! هو قصةٌ عن كيف يُمكنُ للنساءِ حياكةَ المعنى على ثوبِ الغمامْ! هو ومضةٌ ضاءتْ برغمِ قتامةِ الرؤيا وسارتْ بالحقيقةِ مشعلاً حتى تقشَّع حولنا هذا القَتَامْ! هو يا فتاةُ جسارةٌ كبرى ووثبٌ فارعٌ صوبَ المقاماتِ الجِسامْ أوَتذكرينَ المِشيَ حافيتَينِ في جمرِ الغوايةِ وحدنا والليل واللاءاتُ سيَّجتِ الدروبَ فلا وراءَ ولا أمامْ! أوَتذكرينَ تعثُّرَ الخطواتِ في الطُرقِ التي قد أنكرَتنا واستحالتْ يا فتاةُ إلى ظلامْ؟ أوَتذكرينَ تربُّصَ الدنيا بنا وضياعَ خطوتِنا ارتباكَ عبورِنا بين الهواجسِ والرؤى الحيرى إلى هذا الركامْ؟ لكنَّنا سرنا لبيتِ الشمسِ نُوقِظُها ونكتبُ في جبينِ الفجرِ أولَّ خطِّنا ونطيرُ في هذا الفضاءِ كأنَّنا الأقواسَ واليدَ والسهامْ! يا بنتُ لسنا وحدنا إنَّ المعيةَ فكرةٌ فتحاملي حتى على جرحٍ بقلبِكِ لا يكلُّ ولا يملُّ ولا يُنيمُ ولا ينامْ! #روضة_الحاج #السمراء_روضه_الحاج

التعذيب بالقُرآن! أساليب التعذيب في العالم كتيرة شديد ويمكن كثير مننا بعتقد إنه السجون السودانية الأسوء بس تعال أقرأ البوست دا عشان تغير وجهة نظرك (البوست دا ما تقليل من شأن أي شخص إتعذب في مُعتقل وأبدََا ما إستحلال للحاجة دي). طبعََا أنا زولة بحب القراءة سواء كُتب أو روايات ففي مرة لاقتني بوستز كثيرة عن رواية (بيت خالتي) وهي رواية بتحكي عن المُعتقلات السورية وصراحة الموضوع كان منطقي شوية من حيث التعذيب والقهر وكدا (يعني حاجات مُتبعة في العالم ككل حتى وإن كانت مَخفية) بس وأنا بقرأ في كُل سطر كان قلبي بتعصر من الألم عليهم وكل مرة وهم بحكوا عن أسلوب تعذيب بحس بإن الناس ديلك ما عندهم إنسانية لحدي ما وصلت للحأقوله أسي. من أسوء أساليب التعذيب في المُتعقلات السورية هي التعذيب بالقُرآن والحكاية دي ببدأوها بتسلسل مُعين فمن يتم القبض عليك بتم مُصادرة مُمتلكاتك ومن ضمنها التلفون وببدأو يفتشوا طبعََا كل حاجة ومن ضمنها المكتبة الصوتية عندك فلمن بيلقوا قرآن بحسوا بنشوة والله صحي أو إذا ما لقوا حاجة بسألوك بتحب أي سورة وأي مُقريء وإنت طبعََا بتقول ديل مُسلمين حيخلوني أسمعها بس هيهات سمعك ما حيكون طبيعي. بتحكي الراوية إنها بشغلوا ليهم القُرآن أثناء الإغتصاب وأثناء تعذيب الشخص بأسوء الصور والحكاية دي على فكرة ما عند البنات بس ولكن في مُعتقلات الرجال برضوا. _طيب ليه هم بعملوا كدا!؟ عشان يشكوك في ربنا وقدرته فإنت بتكون بتسمع في سورة كلها عن قُدرة ربنا ورحته بعباده وإنت بتُغتصب فبتفكر إنه ربنا ليه ما أنقذني وهم ما بخلوك كدا وبس بل أي حاجة ممكن تخطر على بالهم عشان تشكك بربنا بتتقال ليك.وللأسف نجحوا مع كمية من المُعتقلين وخلوهم يخرجوا من المِّلة بل إنه في كمية منهم طلعوا من المُعتقلات مُلحدين وفيهم الفقد إيمانه بقدرة ربنا💔. ومن المُفارقات العجيبة إنه الناس ديل مُسلمين وبمارسوا الطريقة دي على مُسلمين زيهم.بل القصص دي عن مُعتقلين طلعوا في مواكب ومُظاهرات (قصص مُوثقة وممكن ترجعوا للكِتاب أو يوتيوب وتحضروا). النِظام السوري من أسوء الأنظمة في العالم في التعذيب، بل يُقال إنهم طوروا أنظمة تعذيب لدول أُخرى يعني تفوقوا على النازية ونفسهم. قدر ما الإنسان يحس إنه الإنسان وصل لمستوى عالي من اللا إنسانية فلمن يقرأ بحس إنه لا لسة السلوك دا بيتطور وإنك في الحقيقة ما شُفت حاجة. كلامي دا ما ينسيكم إنه ربنا في وموجود وكل حاجة بمر بيها الإنسان ما هي إلا إمتحان، وزي ما في ظلام في نور وزي ما في شر في خير. عفانا الله وإياكم وربنا يرد المفقودين لأهلهم ويرحم كل شهيد إستشهد في سبيل بلده وحريته، اللهم أضرب الظالمين بالظالمين وأخرجنا منهم سالمين. #عشان_نتعلم #آيه_حسن

الحياة ما سباق للمثالية.. وما مطلوب منك تكون قوي طول الوقت. - تبتيل عبد المنعم 🌿🩵.

السلام عليكم ورحمة الله وبركاته كيف حالكم عساكم طيبين وبخير؟ قبل فترة كنت بذاكر مُنعكس التغوط أو Defecation reflex(اللي بشرح كيف بتتم العملية دي) فسُبحان الله سُبحان الله بقى لي الموضوع ساهل، اللي هو يا آية خطوات بسيطة بحصل كدا وبعده كدا وكل خطوة ليها أسبابها بس في نُص المُذاكرة جاء في بالي إنه الحاجة البسيطة اللي إنتِ شايفاها ساهلة دي هي مُعضِّلة حقيقية لناس كتيرة شديد سُبحان الله. فأقرب مِثال المُصابين بالإمساك اللي هو مُشكلة في التغوط ونسبة المرض دا في العالم (إنتبه لكلمة العالم دي) 15_16٪ ودي نسبة ضخمة تبارك الله. فشوف بس الحاجة البسيطة دي بعانوا منها رُبع سُكان العالم سُبحان الله. فكل حاجة بسيطة بالنسبة ليك هي مُشكلة بالنسبة لشخص ثاني فكرر الحمد لله كل مرة. الحمد لله في السراء والضراء والحمد لله حمدََا بلا مدد وبلا عدد. #عشان_نتعلم #آيه_حسن

‏«فلا أنا في سُكُوتي مُسْتريحٌ ولا لي جُرأَةُ البَوحِ السّدِيدِ!».

أوقات... أجمل إنتصار! إنك تمشي. - تبتيل عبد المنعم 🌿🩵.

جامعة الخُرطوم _كلية زراعة _مشتل الكُلية✨

مافي إنسان مجبور يعيش ألمه لوحده.. وطلب المساعدة ما ضعف. - تبتيل عبد المنعم 🌿🩵.

جامعة الخُرطوم، كُلية الزراعة 13/7/2026 💙

منذ أن رحلتِ... تغيّر شيء في نظرتي للأيام. مرورها... أصبح روتينًا رتيبًا. لا شيء، فقط يومٌ تلو الآخر يمضي. بهتان... يخبرنا أن الحياة ليست بتلك الألوان التي كنا نظنها. لا الفرح دائم... ولا الحزن مجرد زائر. إنها مجرد رتوش... في لوحة الحياة. توازن... بين هذا وذاك. ما عادت للتواريخ تلك الميزة. عيد ميلادي، ويوم وفاتك، ويوم التخرج... وحتى اللهفة المنتظرة. تقبلت الواقع... وتقبلت الحياة. وأصبحت أنتظر أقدارها... بخيرها وشرها. فلا دوام للدنيا. والآخرة... هي الهدف. ومن فاز بها... فقد فاز بكل شيء. ما العمر... إلا ساعة رملية. وعند آخر حبة منها... ينتهي الامتحان. فلا وقت للانشغال بما يفنى. هناك عمل، وآخرة، ودعوات. وحسن الخاتمة... هو رجاؤنا. رحمكِ الله يا أمي. - تبتيل عبد المنعم 🌿🩵.

أخيرًا جمعت كتاباتي وسلاسلي في مكان واحد... Teela Podcast مساحة أشارك فيها خواطري، آرائي، وسلاسلي التي كتبتها بكل جوارحي. إذا أحببت القراءة والتأمل والكلمات التي تلامس القلب، فأهلًا بك. رابط المدونة: https://teelapodcast.blogspot.com⁠ 🩵🌿.

"الحروف مرات بتكون أحن من ناس... تواسيك في لحظة صمت، وتتكلم نيابة عنك لما صوتك ما يقدر ." - تبتيل عبد المنعم 🌿🩵.

أَضحى التَنائي بَديلاً مِن تَدانينا وَنابَ عَن طيبِ لُقيانا تَجافينا. - ابن زيدون.

لذّة الوصول… أحلى طعم. مهما وصفت وحاولت أشبّه، ما حد بعرف شعور الإنجاز غير لما يجربه. نتيجة التعب، السهر، الدعوات… خوف ورجاء، أحلام وأمنيات ما اتكلمت عنها غير لخالقك. تفرش سجادتك، وتصلي ركعاتك… وعند السجدة الأخيرة... تبتهل بالدعاء، تبوح بالأسرار، وترجو الاستجابة. الفرحة المطلقة، الصافية… اللحظة اللي توقف فيها، وأنت بتشوف كل دعواتك اتحققت. بتقول: "يا الله… ما أنت كريم يا رب، رحيم، عطوف، منعم، وجابر للخاطر." اجتهد، واطمح… وما تقول مستحيل. ما في شيء مستحيل، طالما إنت مع الله. قادر يحقق ليك، ويسهّل ليك، ويجبر بخاطرك. ترا والله… ما في أحلى من لذّة الوصول. قوموا الآن، واجتهدوا، وثابروا… لأن طعمها... طعم مختلف. #تبتيل_عبدالمنعم

كيف تكون في صف نفسك ؟ في أوقات… كل حاجة بتكون ضدك. الناس، الظروف، حتى حظك… لكن السؤال: إنت مع نفسك؟ في لحظات… بتقسى على نفسك أكتر من أي زول. تلومها، وتضغطها، وتطلب منها أكتر من طاقتها. وكأنه... الدنيا ما كفاية عليها. لكن الحقيقة؟ إنت أكتر زول مفروض يكون في صفك. مش بمعنى إنك تبرر كل حاجة… لكن إنك تفهم نفسك قبل ما تحاكمها. توقف معاها لما تقع… مش تزيد عليها. تديها فرصة تغلط… وتتعلم. بدون ما تحسسها إنها فاشلة. لأنه مهما حصل… إنت حتعيش مع نفسك كل عمرك. فيا إما تكون أقرب داعم ليها… أو أقسى عدو. والاختيار... بيدك. فخلّي نفسك تحس: إنها مش لوحدها. وإنه في زول... واقف معاها للآخر. ويمكن… الزول ده لازم يكون إنت. #تبتيل_عبدالمنعم #رحلة_مع_نفسك

في علاقات كتير… ما بتتعب عشان الناس سيئين. بتتعب… عشان الأدوار ملخبطة. Task Separation أو “فصل المهام”… ببساطة يعني: كل زول في حياتك عنده دور. المشكلة بتبدأ… لما تدي زول دور ما دوره. تتوقع من شخص يكون كل شيء ليك. ولما ما يقدر… تزعل!. مع إنه الحقيقة؟ إنت الختيته في مكان ما مكانه. فصل المهام في العلاقات يعني: تعرف كل زول مكانه وين. ما تضغطه يكون حاجة ما فيه. وما تربط راحتك بشخص واحد. خليني أوضح بمثال بسيط… الأب… دوره يوجّه، مش يتحكّم. يوفر ليك الطريق، لكن ما يمشيه عنك. لما الأب يتحول لشخص بيفرض كل قرار… الإبن ما بيتعلم. بيتعود ينفّذ بس. وبالتالي!… يكبر وهو تايه، ما عارف يختار، ولا يتحمّل نتيجة قراراته. عشان كدا… التوجيه مهم، لكن السيطرة بتكسر. لو قسنا ده على باقي العلاقات… حنلقى إنه المشكلة ما في الناس. المشكلة… في الأدوار البندّيها ليهم. لما كل زول يكون في مكانه… العلاقات بترتاح. #تبتيل_عبدالمنعم #Tasks_separation

حب… ولا تعلّق؟ مرات بنقول "أنا بحب"… لكن الحقيقة؟ ما كل شعور بنحس بيه بيكون حب. أحيانًا… بيكون تعلّق. أول ما يجيك شعور الخوف المستمر… الخوف من إنك تفقد الطرف التاني، أو يزعل، أو يتغير، أو يغيب… اعرف إنك داخل في دائرة التعلّق. تفكير زايد… قلق مستمر… وسعادتك كلها مربوطة بشخص واحد. ده ما حب… ده احتياج. لأن الحب الحقيقي… فيه راحة، فيه سكينة، فيه أمان وثقة. إنت عندك حياتك… وهو عنده حياته… بس بتختاروا تشاركوا بعض. مافي زول واقف على التاني… ولا حياتكم بتوقف بدون بعض. هنا بس… تكون بتحب بجد. لكن التعلّق يا رفيق… خطير. ممكن يخليك تستحمل أذى، تتنازل عن نفسك، وتضيعك… وأنت شايف ده حب. التعلّق ما بيخليك تزهر… بيخليك تختنق. عشان كدا… ما تربط روحك بأحد، ولا تخلي وجودك قائم على شخص. حب… شارك… لكن خليك ثابت في نفسك. لأنو… أقسى حاجة ممكن تحصل ليك… إنك تضيع نفسك وأنت فاكر إنك بتحب. #تبتيل_عبدالمنعم #علاقات_بصحة

ليه بنتمسك بالناس اللي غلط؟ الخوف من الوحدة أكبر الأسباب اللي بتخلينا نتمسك بالناس حتى لو كانوا مؤذيين بالنسبة لينا وحتى لو كانوا ما مناسبين لينا.. خوفك من إنك تكون لوحدك بيخليك تتمسك بالعلاقة حتى لو كنت عارف إنها غلط وحتى لو كانت بتؤذيك. أحيانًا بالإضافة لذلك، يكون عندك أمل إن ممكن يحصل تغيير، ممكن الشخص ده يتغير للأفضل. بتتمسك بوهم الأمل وتراهن بكل أملك عليه، وغالبًا بتتناسى الواقع الحالي الواضح جدًا. وأحيانًا كمان العلاقة اللي انت فيها بتزودك بإحساس انت محتاجه، يعني باختصار العلاقة قائمة على الاحتياج. فبالتالي انت بتربط حياتك كلها ومشاعرك وسعادتك بشخص، ولو غاب هذا الشخص، فحتتأثر حياتك كلها. عشان كده يا رفيق، لا تفكر في الطرف الثاني على أساس إنه مصدر لسد نقصك، بل اعتبره شريك في نقصك تكملوا بعض. أما إذا علا الطرف الثاني فوقك، حيدمرك. وبرضو كتير بنتمسك بالذكريات أكتر من الشخص نفسه. بتحن لكل الذكريات الحلوة واللي كانت صادقة في يوم من الأيام، وده بيخليك تتجاهل كل الأذى اللي حاصل وتتحامل على نفسك. كلها أسباب يا رفيق بتشرح ليك ليه حتى لو انت عارف إنك مؤذي من الطرف الثاني، بس ما عارف ليه مستمر معاه. وغالبًا بتكون خايف تنهي العلاقة وتعيش المجهول والفراغ. لكن وعيك بالمشكلة هو أول خطوة عشان تتحرر وتشعر بالسلام النفسي. لذلك، أوعى على حالك، وحلل علاقتك، واعرف موقفك ومقامها عندك، واتخذ إجراءك بسرعة. لأن حتى لو القلب مال، لا يزال المنطق هو القرار السليم. #تبتيل_عبدالمنعم #علاقات_بصحة