سَنَا الطِب

السلام عليكم ورحمة الله وبركاته اولاً رحم الله وغفر لزميلنا غسان ويتغمده برحمته ويحتسبله اجره وجهاده في سبيل العلم ونفع الامة و يكون شفيعاً له لا تنسوه من صالح دعواتكم ثانياً الي صار اليوم موجع جداً جداً فكرة انك تنوض الصبح كل الي تفكر فيه كيف بتجاوب وقداش معلومة نسيتها وقداش معلومة فاتت عليك لكن ما تروحش للحوش تاني و ويتوفاك الله فكرة مخيفة هلبا .......... زميلنا بدي يومه زي اغلبنا ممكن مش راقد ويلم في المنهج يفكر ان واخيرا بيفتكى من كميونيتي 2 ومعاش مازال الا اوسبي وبيبدا في العطلة وشن بيدير في العطلة لكن صارت حاجة ماكانتش في حسبان حد زميلنا غسان بيبات في قبره .......... راهو ما تشوفوهاش بعيدة كان ممكن يكون اي حد فينا بدل دكتور غسان و اهل دكتور غسان ....... وفاة زميلنا اليوم انما هي تذكير لينا اي نعم القرايا مهمة واتقانها لكن لا تنسيكم اخرتكم و حياتك وانفسكم ...... نسأل الله يرد حق دكتور غسان من من ظلمه وظلمنا وظلم اهله معاه السلام عليكم ورحمة الله

السلام عليكم ورحمة الله وبركاته كيف حالكم ان شاء الله بخير 🤍🩵 حابة نشارك معاكم تجربة عشتها بعد 7 سيمسترات في الكلية وممكن من اهم الدروس الي تعلمتها , والدرس هذا سواء كنت انترو او كنت اخر سيمستر محتاج تتعلم الدرس هذا. للأسف تعودنا يعلمونا ان الدراسة مؤلمة , وان لو تبي توصل للمكان الي تبيه لازم تضحي وتعاني وتقاوم الألم ونفسك وتغرق روحك في اكوام الشيتات بش تحس بالانجاز............ هادي اكبر كذبة واكبر وهم تعيشه في حياتك . حني نقعدو في الكلية من عمرنا 19 لعند 27 , يعني سنوات شبابنا وتهورنا وصحتنا تمشي كلها في الكلية, عودونا نعيشو زي الهامستر في العجلة متعه يبدا السيم كل الي نفكرو فيه نقرو للنصفي كأنه deadline حياتنا وبعدها كل تفكيرنا امتحان العملي امتحان العملي كملنا عملي نبدو في الفاينل تبدا حياتك كلها الفاينل ولما تكمل الفاينل تخش في غيبوبة علي اقل تقدير يومين مفاجاة الخطة نزلت القراية تبدا بداية الاسبوع و نرجعو لنفس الحلقة 12.......... عجلة الهامستر قبل ما نبدو نعيشو دور الضحية وحني مضحيين بحياتنا وحني وحني دقيقة دقيقة , حني الي عكسنا الادوار وعطينا للامتحانات اكثر من قيمتها الحقيقية, فترة الامتحانات جزء من حياتك ماتبنيش حياتك كلها حواليهم , ببساطة مفروض تتعامل معاهم زي التحضر لأي جزء تاني من حياتك زي العيد مثلا , في عيد الفطر كلنا نجهزو قبل فترة ونجهزو حلويات ونشرو حوايج العيد "هل نقعدو متوترين السنة كلها لان العيد قرب؟" وبرضو عيد الأضحى نجهزو في الادوات نجمعو فلوس الاضحية قبلها بفترة نجهزو احتياجات العيد ... عملية التجهيز هادي جزء من حياتنا ما بنيناش حياتنا عليها ونفس الشي الامتحانات جزء من حياتك ما تخليش موعد الامتحان كأنه تاريخ اليوم الي بتموت فيه..................... تاني حاجة وهم الدراسة لازم تكون مؤلمة, ولازم تضحي بوقتك ونومك و المناسبات الاجتماعية بش تحس بانجازك , ووهم لازم تقرا كل يوم ولازم قاري المنهج الف مرة .......... والله دوة فاضية وهذا جوهر study smart not hard تعرفو اصلا عندكم علم الطبيب الي كانت عنده حياة وكان يدير في حاجات جنب الطب طبيب افضل واقرب للمريض من الطبيب الي كمل 7 سنوات الكلية بين الشيتات لدرجة نسي كيف يتعامل مع البشر... لو مهتمين نتكلمو اكثر كيف نحولو الدراسة للعبة ممتعة let me know ........................ بالتوفيق جميعا #حافظوا_على_سكينة_قلوبكم

استفتاء بسيط تاني تقدرو تجاوبوه في التعليقات ا ............ من الانترو لعند اناتومي 4 شن اكبر مشكلة تواجه فيك في قراية الاناتومي ؟؟؟؟

السلام عليكم ورحمة الله وبركاته 🤍 كيف حالكم جميعا 🤍🤍🤍🤍 الدفعات الي تقرا في اناتومي لوسمحتم عندي سؤال ياريت تتواصلو معاي @f08d7f7y

Fun fact طب الأسرة تخصص ممتع جدا لكن underrated نتمنى جدا يكون وجود للتخصص في ليبيا

هل لديك معرفة عن فيروس HPV وسرطان عنق الرحم؟ شارك بدقيقتين من وقتك في بحث طبي مهم موجه لجميع طلبة الطب البشري (كل السنوات). 📌 رقم جامع البيانات: 6 للمشاركة، عبّي الاستبيان من هنا: https://docs.google.com/forms/d/e/1FAIpQLSdd6MUC6jhpYuihwXKKgvHHwDwCBwbaK8IrhpNH9-XwHiVJVw/viewform?usp=header مشاركتك مهمة لدعم البحث وزيادة التوعية وشكراً جزيلاً على وقتك🤍

تشوف بنيه ، زيها زي اي وحده فينا خشت الكليه ، وهي جاهله تمام الجهل بما يمكن انه يصير في المستقبل ، ولكن سبحان اللي سخرنا جميعنا لندعوا لها في هذه الايام المباركة . عموما هبة مثال لانسانه كافحت اصعب الابتلاءات ، وهو بلاء لو سمعته في الغريب تنهار يبال تشوفه في نفسك . اليوم حنا في مكان هي تمنت تكون فيه وتستمر لحد ما تكمل فيه ، لكن على الفرق من هبه ، حنا مش قادرين نكافحوا كسلنا بينما هي كافحت السرطان والله المستعان . لازم تدرك انك في نعمة عظيمة سواء صحتك وهي الاعظم وثانيا انك تقرأ في تخصص ، المئات بل الالاف يتمنوا يكونو مكانك ، فتذكر دائما انك في نعمة، واحمد الله عليها . الحمد لله الذي عافانا مما ابتلاه وفضلنا على كثير من خلقه تفضيلاً كثيراً رحم الله الطبيبة هبة المرادي وغفر لها واسكنها الفردوس اعلى الجنة ، ابدلها الله دار خيرا من دارها واهلها خير من اهلها ، جعل الله قبرها روض من رياض الجنه ، رزق الله ذويها الصبر 💔.

قصة زميلتنا هبة المرادي https://www.facebook.com/share/v/1DnCqAtcpJ/ دعواتكم لهبة بالرحمة والمغفرة 💙

واخيرا المواد موادي كانت : كميونيتي ، فارما 3 ، باثو 3 ، سكلز 3 ، وبارا ...... الكميونيتي: اول نصيحة سكر وذااااانك وما تسمع لحد يعيط الي يعيط من الكميونيتي فقط لانه يحاول يحفظ كل كلمة فيها الكميونيتي ماتمشيش هكي ........ الكميونيتي تربية وطنية فرع الطب فهمها مش صعب نهااااائي مفاهيمها بسيطة غر طويلة مملة ماتنقراش قرايا عادية هذا علاش الحضور مفيد لان الدكاترة نفسهم مش حافظين كل شي كاتبينه فيسألو في الي يقولوا فيه في المحاضرة........ بالنسبة للبروبوزال جيت عند اصعب دكتورة ✨ دكتورة سناء ✨ لكن للأمانة حقانية مش ظالمة لكن تخليك تخدم البروبوزال بقلب ورب مع ذلك اقل درجة عطتها 7 تقريبا من 10 قروبات البروبوزال حسب الدكتور وشن يفضل في دكاترة عطوهم المواضيع وقسمولهم وحتى اجتماعات ما دارولهمش وفيه الي زي قروبي د. سناء تخليك تقرا اوراق بحثية و وتحاسبك حتى عالاملاء في البريسينتيشن وتجيبك اجتماعات ..... فالبروبوزال نصيب . الفاينل برضو والله العظيم ما مُعقد والله ما مُعقد غر افهم بس وركز عالحاجات الي يحبوها العملي سبوتس الصور الي في الشيتات يجيبهولك يسألوك فيهم اسئلة بسيطة الباثو : المادة صعبة وطويلة لكن دكتوراتها لطيفاااااااات جدا و شرحهم ممتاز جدا ما اطريتش حتى نسمع يوتيوب وراهم الباثو في الايام العادية افهم المفاهيم والعلاقات والحفظ خليه لأيام الامتحان امتحان العملي زي المعتاد زي ما درتو في باثو 2 الفاينل طويييييييل ومش ساهل لكن تمشي مش صعبة . سكلز 3 🤣 : هادي قصتها قصة ، هي المادة فعلا جراحة ، واول مرة حتتعلم فيها كيف تتعامل مع الشدة والقسوة في الكلية حتكون مع قسم السكلز في سكلز 3 دكاترة سكلز 3 شديدين ودقيقين (الا البعض طبعا ) لكن حطو في بالكم حاجة it's not personal هما في الأول شديدين ويبهدلو عالمواعيد لكن بعدين لما تتعودو علي بعض يبدو لطيفين جدا جدا والمادة كمنهج اخف بهلبا من سكلز 2 ومربوطة هلبا بالفارما والباثو لكن كويزاتها يبو قرايا شوفان الفيديو بس مش كافي اطلاقا . اخر حاجة عقدة حياتي الفارما بالنسبة للفارما مش حنكثر كلام لان مانقدرش نعطيكم نصيحة فيهم لان انا دماغي مايبيش يستقبل الفارما فمانقدرش نقوللكم الا ان فارما 3 ميكرو دايرو روحها فارما فيها كمية حفظ مش طبيعية .......... واخيرا وليس اخرا بالتوفيييييق ورمضانكم مبارك 🤍

السلام عليكم ورحمة الله وبركاته Notebooklm الأداة الخطيرة هادي حاجة ابدااااااااااع حرفيا تخليت علي كل الأدوات الدراسية معاها حتى الشيتات ✨✨ تخيلو صفيت البري ممتاز بدون نشوف ولا شيت الا شيتات العملي حرفيا بحكم الصور ........ الي تبيه فيه الي يبي يعرف تفاصيل استعماله يشوف قناة ملاك متكلمة عليه هلبا https://t.me/malakemhmmed الاختلاف الوحيد بين طريقتي وطريقة ملاك ان انا نستعمل في الشات اساسا اكثر من المايند ماب .... ببساطة : تحط كل المصادر الي خاطرك تقرا منها كلهم اي شيت ينزل في قروبات الدفعة اي تجميعة اي مرجع كلللل شي بعدين تحطه عالlearning guide وتختار المصادر الي تبي تقراها او الموضوع الي تبي تقراه وادير فيه مايند ماب بناءاً علي ترتيب المايند ماب اقرا كل جزئية وبعدين دير كويز في نهاية كل توبيك ويكون زي التجميعة الي في المصادر متعك وممكن حتى تقوله شن النقاط المهمة الي لازم تقراها وشن تفوت (لأيام الزنقة مفيدة 🤣) بالنسبة للدرسة هادي كانت طريقة دراستي

السلام عليكم ورحمة الله وبركاته ان شاء الله تكونوا نزلتو موادكم علي خير واخترتو قروباتكم الي مناسبتكم ان شاء الله يكون تكون بداية خير وبركة عليكم ورمضان مبارك 🤍 خلي نهدرزوا عالبري شوية بالنسبة ليا تجربة البري ماكانتش مجرد السيم الأخير وخلاص كانت تحقيق الوعد لنفسي ان نرجع بعد الانتكاسة الي علقت فيها ثلاثة سيمسترات من الوعد كل بداية سيمستر : انا السيم هذا حنقيم معدلي , لان انا مانزلتش بالتدريج زي هلبا انا نزلت 10% مرة وحدة ................................. لو تعاني من انتكاسة مشابهة هادي رسالة ليك مازال عندك فرصة لأن بفضل الله وحمده ال10% الي نزلتهم في سيمستر ركبتهم في سيمستر واحد بفضل الله عليا ..... توا أول حاجة بتخطرلكم انا شن درت ؟ شن هو الي يخليك فعلا تحقق مقولة بداية كل سيم (بإذن الله حنعوض السيم هذا ) ببساطة استعملت الاستراتجيات التالية: 1) النية والإخلاص ان السيم هذا لتأدية الأمانة واحتساب نية ان كل دراستي وراحتي في سبيل الله من باب عبادة العمل 2) التعامل مع السيم كمارثون مش سباق 100 متر 3) نعطي للراحة حقها زي ما بنعطي للقرايا حقها لان عدوك اللدود حيكون (ال Burn out ) 4) حضور النظري في الكلية 5) Notebooklm 6) الفصل التام بين الدراسية والحياة (كانت القرايا كاملة في الكلية وفي الحوش مانقراش اطلاقا ) 7)انسى وهم القرايا أول بأول و الجداول (في البري ما درتش اي جدول اطلاقا السيم هذا ) 8)دير حاجة تحبها وتستمتع بيها خارج إطار الطب اطلاقا بش تشحنك وما تكرهش القرايا . 9) أفهم عقلك كويس وشن الطريقة الي يفهم ويستوعب بيها دماغك أول تعليق بيجي لو ما وضحتش: المشي للكلية تضيع وقت, الدكاترة مايشرحوش كويس أول حاجة الي يقول تضييع وقت : في الكلية عندك 5 مواد كل مادة عالاقل بتاخد 5 ساعات حضور فيه مواد تاخد اكثر يعني في الاسبوع الواحد تعرضت للمنهج 25 ساعة عالاقل لمدة 12 الأسبوع وفيه مواد تتداخل تتكلم علي نفس الموضوع من وجهات نظر مختلفة فمعقولة بعد الساعات هادي كلها من التعرض فقط بتكون المحصلة 0؟ 1%؟ 2% ؟ مستحيل أنت طالب طب انت السوس في عيلتك واحتمال كنت طول عمرك من الأوائل ايام المدرسة لو عطيت الموضوع فرصة اقسم بالله حيفرق و صدقوني العلم يحصل من صدور العلماء . التانية الدكاترة مايشرحوش : انت معاش طفل صغير تراجي لين الشخص الأكبر يفهمك المعلومة ويربطهالك ويحفظهالك انت توا اخر سيمستر في ثالثة طب , وفي السيم الجاي في رابعة مافيش دكتور في المستشفى بيوقف بيشرحلك بيفهمك كل تفصيلة لازم تفتح عيونك وعقلك وتحاول تتعلم وتربط النقاط مش Spoon feeding تمام توا خلي نتكلموا علي السستم الي اتبعته وفرق معاي جدا سستم بسيط بدون تعقيد : قبل المحاضرة بساعة او في السيارة شوف المحاضرات اليوم علي شن تتكلم , انا الوالد كان يجيب فيا 8 والمحاضرة تبدا ال9 , نستخدم في الوقت هذا نعرف المحاضرة علي شن تتكلم بس رؤوس عناوين او الحل الأكثر كسلا والمفضل عندي حط شيت المحاضرة في Notebooklm وقوله نبي تحضير المحاضرة في 5 دقايق اقراه وخش للمحاضرة برتوكول الاستفادة من محاضرة الكلية: سكر تلفونك او ديره صامت قعمز القدام ماتحطش السلايدات قدامك في الايباد او التلفون اسمع وركز مع الدكتور لان السلايدات تقدر تشوفهم في اي وقت , وما تقولش تو نسمع التسجيل فكرة انك بتولي تسمع التسجيل تخليك تكسل تركز في المحاضرة , ولو مصر تاخد ملاحظات مذكرة وبيرو واكتب وأهممممممم سر عندي في الحضور لان نعترف 6 ساعات من المحاضرات اكيد حتكون مملة مستحيلة ماتسهاش ( الله غالب هادي الضريبة للتفوق ) عن نفسي لما نسرح ونسهى نقول لروحي سلسبيل شن الجملة الي قاعد يقول فيها الدكتور ؟ شن الفكرة الي يبي يوصلها توا ؟ لما تسأل السؤال هذا انت عاودت وجهت تركيزك للمحاضرة في الاول صعبة لحد مش متعود عالحضور لكن بعد حوالي اسبوع تولي عادة وادير فيها بدون تحس اخر شي في نهاية يومك اكتب ملخص من دماغك مش من الملاحظات الي كتبتها في المحاضرة او التسجيل عن نفسي كنت نكتب في حصاد اليوم وانزل فيه وللامانة كان فايدة ليا قبل غيري فالنصيحة كل حد يكتب حصاده الخاص وليكم حرية الاختيار تنزلو او لا وتروح الحوش حياتك تماما ادير الي تبيه تهدرز مع عيلتك تطلع تغير جو اي شي كأنك مش طالب طب ما تخافش بتقعد الوساس تجيك انا مش حافظ شي من الي قاله الدكتور مش حنقدر نلم من المنهج هادي كلها وساس ماليهاش معنى انت درت الي عليك وعطيت للقرايا عالاقل 5 ساعات من يومك كافي جدا جدا البوست الجاي ان شاء الله نتكلمو علي Notebooklm ومواد البري بإذن الله السلام عليكم ورحمة الله رمضان مبارك

‏📚محاضرة بعنوان: «فضائل رمضان» 🎙لفضيلة الشيخ: أ.د.عبدالرزاق البدر-حفظه الله- ▪️الثلاثاء ٢٩/ ٨/ ١٤٤٧هـ ‏▪️في المسجد النبوي 🎧 صوتي: https://t.me/drosalmadina/11635 ا═•═📚═•═ا 🔹دروسُ المدينة النبويَّة🔹 linkjar.co/drosalmadina

السلام عليكم ورحمة الله وبركاته دفعتنا 54 المجتهدين 🤍🤍 أطلت الغياب عليك ان شاء الله كنتو بخير وماشيين كويس في سكلز 2 😊 بالتوفيق في ختامية الفاينل بما أن بفضل الله وحمده كملت البري علي خير شن رايكم نهدرزلكم عليه شوية ؟🤍

السلام عليكم ورحمة الله وبركاته لله ما أعطى ولله ما أخذ ان العين لتدمع والقلب ليحزن وان لفراقك لمحزنون . انتقلت الى رحمة الله جدة زميلتنا ملاك ابوزبيدة نسأل الله لها الصبر على فراقها. نسأل الله لها الثبات عند السؤال والرحمة والمغفرة لاتنسوها من دعواتكم الطيبة

🍄‍🟫 Mycology_pdf