سِحر الترتيب

أنا عارفه ان فكرة ملئ الديسبنسر مملة و متعبة جدا ، في فكرة بنفذها في شغلي في التشطيبات من عشر سنين وهي اننا نأسس وصله مياه من الفلتر مباشرة على الدسبنسر ( المبرد ) و نأسس له صرف كمان في المكان اللي بنكون مخططين مسبقاً اننا هنحطه فيه في الشقة و في حالة انه متعملش حسابه في التاسيس فلو في امكانيه اننا نقرئه من الحوض او من الفلتر ممكن تخلوا و السباك يوصل لكم الفلتر عليه مباشرة و بكده هترتاحوا من التعب و الشيل

تركات طبية اتعلمتها يمكن تفيدكم 🌸🌸 1/ كلنا بنخاف جدا لما نيجي نحط القطرة في عيوننا بس لو حطيناها من طرف العين من برة ناحية ايدينا مش هنخاف ولا هنغمض عيوننا 👀 2/ لو أسنانك صغيرة زيي 😅 و بتعاني مع فرشة الأسنان و بتخلي اللثة عندك تنزف استخدمي فرشاة أسنان الأطفال بتكون صغيرة و لطيفة على الأسنان 🦷 3/ الشد العضلي اللي بيجي لنا احيانا في رجلنا ( العضلة اللي في رجلنا من وراء تحت الركبة ) عشان تخليها تختفي بسرعه حركي ظهرك في اي اتجاه غير اللي انتي فيه وقت الشد هيختفي الشد العضلي فوراً 💪🏻 مساءكم عافية وهنا 🥰

خطوات التنظيف العميق للغرف بالترتيب 🔆❇️✅🪣🧽 : رجاءاً اتبعي الخطوات بنفس الترتيب ⚠️ *مثلا غرفة النوم* اولا: شيلي الملايه و أكياس المخدات عشان تغسليها و خرجي المخدات و البطانيات برة الغرفه ثانياً : شيلي السجاد نفضيه و طلعيه يتهوى في البلكونة ( لو شديد الاتساخ ابعتيه للدراي كلين يتغسل ) ثالثاً : شيلي الستاير اغسليها رابعاً : شيلي كل الاغراض من على التسريحة و الكمدينو و شماعه الملابس و اي مكان في الغرفة و لمعيها و خرجيها برة الغرفه . 💍🧢👛👓 خامساً: بعد ما الغرفة بقت فاضية تماما من اي حاجة صغيرة نبدأ تنفيض التراب نبدأ بالشباك و الباب و بعدها السقف و الحوائط ( بالزعافة ) ممكن نغسل الحوائط لو في وقت و صحة 😂 و اخيرا النجفة بعدها نمسح التراب من الأثاث ( الدولاب ، التسريحة ، الكمدينو ، ظهر السرير …) سادساً: نكنس الارض أنا بفضل بالمكنسة الكهربائية 🌸🌸 سابعاً: خلصنا كل التراب كده نبدأ تلميع ، نلمع الشباك و الباب و النجفة و الخشب و الرخام و الزجاج 👏🏻👏🏻 ثامناً : نمسح الارض وانا مش بقتنع غير بالمسح بالمساحه😇 تاسعاً: بعد جفاف الارض نركب الستاير و نفرش الملاية على السرير و نفرش المفارش و نرجع أغراضنا على التسريحة و الكمدينو ( الضرورية فقط و الباقي يترمي او نبعده ) و نفرش السجاد 😻✅💜👏🏻 🔆الخطوات تتعمل بالترتيب عشان تحافظي على تعبك و تخلصي بسرعه و بنظافة و دقة عاليه 🔆هذه الخطوات تنطبق على اي غرفة في البيت الاول نفضي المكان خالص من كل الاغراض و بعدها نبدأ خطوات التنظيف بنفس الطريقة حبي و تقديري لكِ على قرأتك المنشور للاخر 😻♥️

نصيحة لما تشتروا ايرفرير متستخدموهاش غير لما تشتروا اطباق الايرفرير ( ورق الزبدة ) او السيليكون عشان الايرفرير بتتبهدل و الدهون بتلزق فيها و الدعك فيها بيجرحها و هتبقى حالتها حالة نصيحة مجرب صباحكم سكر 🩵

نصيحة لما تشتروا ايرفرير متستخدموهاش غير لما تشتروا اطباق الايرفرير ( ورق الزبدة ) او السيليكون عشان الايرفرير بتتبهدل و الدهون بتلزق فيها و الدعك فيها بيجرحها و هتبقى حالتها حالة نصيحة مجرب صباحكم سكر 🩵

مفتقدة اوي احساسي و أنا طفلة لما كنا في السعودية كان عندنا حوش كبير بنطلع السجاد نغسله في الحوش و نفضل نلعب و نكتب اسمائنا بالصابون 😂 على السجاد و ندعكه و نفضل نتزحلق 😂🥰 كانت ايام حلوة اوي و الفرحة بتاعتها متتنسيش ابدا خسارة والله بيوتنا دلوقتي بقت عامله زي علب الكبريت مفيش فيها روح وراحت معاها كل الأنشطة اللي كنا بنعملها زمان واحنا اطفال مين مفتقدها زيي ؟؟ 😻💕

الرز اللازق في الحلة من تحت ده وجبه دسمة و مشبعه للعصافير و الحمام 🐤🐦 الكام رغيف اللي بايتين من امبارح و مش هتاكلوهم و هترموهم دول وجبة يومين للطيور 🐦🐤 بدل ما ترمي نعمة ربنا جهرها في طبق فويل او طاجن قديم و حطيها للعصافير و الحمام هياكلوا و تاخدي اجرين : 🔰اجر احترام النعمة و عدم رميها 🔰و اجر إطعام الطيور 💕 انقعي حلة الرز لحد ما الرز يطرى خالص و حطيه للطيور و العيش انقعيه في مياه 3 دقايق و بعدين صفي المياه و سيبه يطرى خالص و افركيه بايديك لحد ما يتفتفت خالص و حطيه للطيور 😻هتفرحي بصوت الطيور وهي بتغرد عند شباكك و ربنا هيزود الرزق و الخير في بيتك صدقيني عن تجربة 🦋♥️💕

طريقة سهله جدا لتنظيف النحاس في البيت ✅🌸

انجح فكرة أنا معتمداها في حياتي و حاسه انها متوافقه مع نفسيتي و مريحاني هي فكرة تقسيم الشغل .. اقسم الشغل اللي عليا عشان ميبقاش صعب ، واحس انه جزء بسيط هعمله بسرعه و يخلص .. لما بقسم الشغل برتاح و بعمله فعلياً .. و بخلصه ..♥️🤩 بس لما بحاول اعمله بدون تقسيم بتعب و ممكن افضل ايام كتيرة مكسله اعمله .. كان ممكن اكون قسمت الشغل على الايام دي و خلصته .. 🌼☺️ في ناس كتير بيعارضوا الفكرة دي .. و بيقولوا ان الشغل مرة واحدة على بعضه افضل .. طبعاً كله صح المهم الطريقة اللي تناسبك ، الطريقة اللي تخلي بيتك دائما نظيف ..😊💐

بوست مؤقت ⏱️ نفسي اوي اكبر قناتي 🥹 حد عنده افكار اكبر قناتي ازاي بأشخاص حقيقين مهتمين بفكرة القناة ؟ للتواصل @Bayrq_RED

لو عندك تكييف كارير هقولك على نصيحة هتخليكي توفري كهرباء كتير "دايما خلي المود بتاع التكييف على دراي" و هتلاحظي ان التكييف هيبرد المكان جداااا ف هترفعي درجة الحرارة لحد 28 و ممكن تطفيه كمان و بالتالي هتوفري كهرباء ⚡️ دي نصيحة قالها لنا عامل صيانه شركة كارير و فعلا نفعتنا جداً حبيت اشاركها معاكم تحياتي 💕🌸

في حاجة في الدنيا اسمها ريحة النظافة 🌸🌸 ريحة اللبس النظيف 💕 و ريحة البيت وهو لسه متنظف و ممسوح بمعطر الارضيات 💕 وريحة التلاجة و هي لسه مغسولة و متنظف كل اللي فيها 💕 وريحة الحمام وهو لسه مدعوك دعكة حلوة بالمنظفات و الديتول💕 ريحة المطبخ و هو لسه متنفض تنفيضة حلوة 💕 اللي مش بيشم ريحة النظافة في بيته و لبسه و جسمه فايته كتير اوي

بشوف ناس كتير بيسيبوا الاكل مكشوف ، نصيحة لازم تغطوا الاكل و المشروبات ، حتى لو هتسيبوه مدة قصيرة لان ممكن في اي لحظة يقع فيها اي حاجة و متناموش أبدا و الاكل مكشوف او حتى كوبايه المياه مكشوفه لازم تقلبوها بفكركم و بفكر نفسي بالحديث الشريف ان رسول الله صلى الله عليه وسلم قال: "غطوا الإناء، وأوكوا السقاء، وأغلقوا الباب، وأطفئوا السراج. فإن الشيطان لا يحل سقاءً، ولا يفتح باباً، ولا يكشف إناءً. فإن لم يجد أحدكم إلا أن يعرض على إنائه عوداً، ويذكر اسم الله فليفعل. فإن الفويسقة تضرم على أهل البيت بيتهم"🌸🌸

اولاً : حابه اشكركم على مشاعركم الطيبة و شكرا لكل اللي عزوني على الخاص تقبل الله دعواتكم ♥️♥️ ثانياً : حابه اتكلم معاكم في موضوع مهم من زمان نفسي اتكلم فيه بلاش تشتروا اي جهاز من شركة يونيون اير Unionaire لان منتجاتها سيئة جدا كخامة و خدمة بعد البيع سيئة و الضمان بتاعهم مش حقيقي و الفنيين معندهم ضمير و الادارة بتماطل في الشكاوي اللي بنقدمها الكلام ده عن تجربة شخصية عشتها مع اخت لينا من اهل غزة عايشة هنا في مصر مكنتش عارفه تتعامل معاهم و فوضتني اني اتعامل بدالها و في الاخر لما هددتهم اني اشتكيهم في جهاز حمايه المستهلك غيروا لها الجهاز بس دفعتلهم جزء من تمنه ياريت تنصحوا كل اللي حواليكم بلاش يونيون اير

السلام عليكم ورحمة الله و بركاته اول مرة اكتب على قناتي من زمان اوي مش عارفة هو صح ولا غلط اني افضفض بس حابه افضفض معاكم لانكم جزء بحبه في حياتي و بدعي لكم دايما أنا اتعرضت لظروف صعوبة اوي السنه اللي فاتت دي زوجي وونسي في الحياة توفى 💔 ربنا يرحمه و يحسن اليه و يجمعني به في الفردوس الأعلى كانت صدمة كبيرة اوي عليا لانه توفى فجاءة و يوم العيد و الحياه بعده مبقتش زي ما كانت رغم مرور سنة كامله و اكتر الحياه بقت عبارة عن حروب مستمرة و محاكم و قواضي و وحدة لا يعلم بها إلا الله انا بحاول اتمسك بالحياه و اكون مؤمنة بحق و اكمل حياتي ، لازم كنت اخد وقتي و احزن و اعيش الحزن لانه شخص يستاهل احزن عليه العمر كله أنا دلوقتي بحاول ارجع اكمل شغلي كمهندسة و اكمل في كل الأنشطة اللي كنت بعملها في حياتي من قبل الوفاة بس اكيد محتاجة دعم خصوصا اني وحيدة تماماً لا زوج ولا أبناء و كل اللي حواليا مشغولين في حياتهم الخاصة ربنا يكون في عونهم جميعاً مقصروش معايا بس دي سنه الحياة انا بكتب عشان تدعموني معنوياً و تشجعوني اني اكمل في كل حاجة بدأتها في حياتي و محتاجة دعواتكم جداً بتمنى اكون مطولتش عليكم شكرا لوجودكم لحد دلوقتي في قناتي رغم تقصيري في النشر بحبكم جداً 💕

كلنا بنحتار نخلي الاكل قد ايه في حلة الضغط ؟ انا هنا جمعت مدة طبخ اكتر الاكلات #عن_تجربة بتمنى تفيدكم 😻😻 اللحمة الضاني 25 دقيقة في حلة الضغط بعد الصفارة 🍖 اللحمة العجالي 30 دقيقة في حلة الضغط بعد الصفارة 🥩 البطاطس 5 دقائق في حلة الضغط بعد الصفارة 🥔 الكوسة 5 دقايق في حلة الضغط بعد الصفارة🥒 اللوبيا 20 دقيقة مع صلصتها و بصلتها و لحمتها في حلة الضغط بعد الصفارة🥘 الدجاج 15 دقيقة في حلة الضغط بعد الصفارة🍗 المكرونة 7 دقايق في حلة الضغط بعد الصفارة🍜 الترمس 10 دقايق في حلة الضغط بعد الصفارة و لازم يكون منقوع من بالليل🥙 البطاطا الحلوة 10 دقايق على البخار (بقليل من الماء) في حلة الضغط بعد الصفارة 🍠 الرز البسمتي 5 دقائق على نار متوسطة و 10 دقائق على نار هادئة في حلة الضغط بعد الصفارة 🍚 لحمة الرأس الضاني تطهى لمدة ساعة في حلة الضغط بعد الصفارة القلقاس 15 دقيقه في حلة الضغط بعد الصفارة البليلة ( القمح ) 15 دقيقة في حلة الضغط بعد الصفارة العدس في حلة الضغط 10 دقايق مع الخضار ( بصلة، جزرة ، طماطمة، بطاطسية ، خمس فصوص ثوم) ، بعد الصفارة الحمص ( حمص الشام) 17 دقيقة في حلة الضغط بعد الصفارة ( بدون نقع ) لعمل الكشري نحط العدس الأسود 10 دقايق في حلة الضغط بعد الصفارة و بعدين نشيله و نحمر الشعرية و نحط الرز عليها و المكرونة و نضيف العدس و المياة و نحطهم على نار هادية 10 دقائق بعد الصفارة ( الصفارة بتاخد 10 دقايق عقبال ما تبدأ ) 😻 كل التوقيتات دي عن تجربة شخصية ✅✅ خدت شهور عقبال ما جمعتها 😇😻 هثبت البوست عشان كل فترة هعدل عليه و يبقى مرجع لينا كلنا 😇♥️✅ #عن_تجربة@sihrEltrteb

صباح الخير 💛 التنظيف في حد ذاته سهل جدا بس بيتوقف على طبيعه المكان اللي بتنظفيه لو بتنظفي مكان فيه حاجات قليلة هيبقى سهل عن لو بتنظفي مكان مليان كراكيب و حاجات كتيرة ملهاش فايدة ولا استخدام ، صح ولا ايه ؟ 🦋 لو بتستخدمي الحاجة و ترجعيها مكانها هيبقى التنظيف اسهل من لو بتنظفي مكان مفيهوش حاجة في مكانها ، صح ولا ايه ؟ 🦋 لو بتنظفي اول بأول هيبقى التنظيف اسهل من انك تكوني بتنظفي على فترات متباعدة ، صح ولا لا ؟🦋 لو حد بيشاركك في التنظيف هيبقى سهل ، بس لو انتي لوحدك بتتحملي المسئولية كاملة هيبقى صعب صدقيني 🦋 سهلوا حياتكم على نفسكم 💛

عدى نص شهر رمضان المبارك 🌸 بتمنى تكوني قدرتي توازني بين الطاعه و متطلبات الحياة في بيتك .. 💖 أنا عارفه الطريق مش سهل محتاج منك مجاهدة و معافرة كتير .. 🪻🪻 خليكِ عارفه إن الكمال لله وحده ♥️ و إن المرء مطلوب منه بس السعي و النتيجة بيد الله سبحانه وتعالى و إن المرء يؤجر على نيته يعني لو نويتي تصلي قيام الليل و مقدرتيش فانتي كده خدتي الاجر كامل 🌺 بنفس المبدأ ده المفروض نتعامل مع بقية حياتنا في بيوتنا و مع أبنائنا و أزواجنا ، لأنه من باب اولى ان نيتنا اننا نعمل حاجة دي تكفينا منحسش بالذنب لو مقدرناش نعملها 💖 فلا يكلف الله نفساً إلا وسعها أعانكم الله جميعاً على طاعته ☀️☀️ 🌻ملحوظة: أنا بتعمد منزلش اي محتوى على القناة طول شهر رمضان الكريم عشان ننشغل بالطاعه و العبادة فقط 🌹🌹 احبكم في الله ♥️🌻

بكرة ان شاء الله هيبدأ شهر رمضان المبارك 🌸🌸 كل عام وانتم بخير جميعاً 🌸🌸 إليك بعض النصائح : المشاركة حلوة و هتخفف عنك 🌜 من وجهه نظري المشاركة هي اعظم خطوة في تخفيف العبء عن الأم ، مفيهاش حاجة لو خليتي زوجك يقطع البطاطس او يلف السمبوسة او ينظف الطاولة او يصب العصائر ، و كذلك الاطفال احسن من قعدتهم ع الموبايل ، اعطي لكل واحد دور ولو بسيط جدا يعمله (مش لازم السمبوسة تطلع ملفوفة عدل كده كده هتتأكل ) 😂 كده هتخففي عنك و في نفس الوقت هيحسوا بطعم شهر رمضان و هيفضل محفور احساس المشاركة جواهم 💛💛 اعملي الاولويات فقط حالياً 🌜اولويات اي بيت بتكون الاكل اولاً بعدين المواعين و اخيرا الغسيل ، ف الوقت الصعب اعملي الثلاثة دول بس و سيبي الباقي لوقت تاني ، و خلي التنظيف يكون مشاركة بين الجميع 🌸♥️ راقبي وقتك 🌜راقبي وقتك بيضيع ازاي ، راقبي استخدامك للموبايل و وقت نومك و حاولي تضبطي وقت نومك بحيث تقدري تمارسي و تؤدي كل اللي عليكِ بدون ما تقصري في حق حد ( انا شايفه ان انسب وقت للنوم بعد صلاة التراويح كام ساعه لحد وقت السحور و بعد صلاة الفجر و الضحى لحد صلاة الظهر 🕛 ) ♥️♥️ تحياتي للجميع 🌸🌸 وكل عام وانتم بخير. 🌙

وصلتوا لفين في تنظيف الدواخل يا حلوين 👏🏻😍 ( الدواخل هي الادراج و الرفوف و الدرف سواء في دواليب المطبخ او دولايب الغرف و اي وحدات في المنزل) اتفقنا هنظفهم قبل رمضان 🌙 و ننظف البيت تنظيف عميق آخر الأسبوع ده ⏰ و ندخل رمضان و بيوتنا نظيفة من جوة و من برة 🌸🌸 الوقت ينفذ استعجلوا 😬 عاوزين نركز على العبادة و الطاعه و الذكر 💚🌙 أنا قربت اخلص باذن الله 😇 اللي خلصت تدوس ♥️ اللي قربت تخلص تدوس 👍🏻 و اللي لسه مبدأتش هزعل منها 🥲