َ

‏عديم الحس مدعى الوجد لا تبدي لي الاعذار ‏ تنسيك الليالي بس ؟ انا اللي ماتنسيني ‏لا زلت اذكر تفاصيلك وراجعها على أستمرار ‏ اسولفها على نفسي و تضحكني وتبكيني ‏انا في كل يوم أمر ذكرى و احتضن تذكار ‏اشوف ان أبسط الأشياء من حضرتك تكفيني ‏هداياك الزهيده عندي انها غاليات أسعار ‏نفـخ فيها غــلاك أرواح أغليها وتغليني ‏صورنا في رفوف البال ما غابت عن الانظار ‏ بزمنها ذهني الشارد معلق قلبي و عيني ‏أهيم بعشرتك و أيامها حتى غدت لي دار ‏ماكن لي عمر من بعدك ولا لي دار تأويني ‏يروح الوقت كله في ذهول و حالة إستنكار ‏ ياأني صرت شخص آخر ياأني ما اعرف ويني ‏ماغير أروح وأرجع في غموض وفي عنا واسفار ‏ لا حصلت من تاخــذني أجوبته و تعطيني ‏بديت أمل بزياده عن العاده بتسع أعشار ‏و بلاي اللّٰه و اعلم ماهــو بتكرار روتيني ‏أظن اني فقدتك مثل نفسي واسوء الأفكار ‏أبد لـو غيرت ملامحى مـا غيرت ديني ‏على خبرك لكن ماني على خبر الزمن لادار ‏نفذ صـبري تغير لوني اختلت موازيني ‏فراغي داخليا يوم زاد أضفى علي آثار ‏متى يعني يا مبري حالي أشوفك تباريني ‏يساومني سكوتك بين وجهي والوصل واغار ‏على وجهي واقول الياء بغاني بس يدعيني ‏اخاف اجيك من باب الثقه وارجع وانا منهار ‏تــخيــل كل هالحيره تلاشى لو تناديني ‏دهــر شابت رسايلنا وإنـا باقي الأبن البار ‏ يا تاخذها معك و تروح يا ترجع تحاكيني ‏غيابك طال لا مستحيل انه يكون اقدار ‏ أعرفك لو تغيب أحيان تاخذ يوم و تجيني ‏يوم أبطت بك الغيبه ويوم انقطعت الأخبار ‏ويوم إيست بالمره عرفت انك مخليني ‏غريبه ؟ ليه ماودعتني لو الوداع إمرار ‏ غريبه ؟ ليه رحت بصمت ما ودك تعزيني ‏غريبه ؟ جيت تتأسف ورحت اتكمل المشوار ‏احسب أنك من اللهفه على الغيبه تواسيني ‏علامك يارقيق الطبع متغير وش اللي صار ‏عسى ما شر تبعدني من أول ليه تدنيني ‏تبلدت باحاسيسك نكرت ان الزمن دوار ‏ماخفت ان الزمن بكره يلينك و يقسيني ‏ماكل أيامك اتوافق هواك و تقبل التكرار ‏ تمر أيام و اذكرها بتحزنك و تسليني ‏هذاك الحين يمكن ما تلاقي للخطا عذار ‏اعلمك الصحيح اليوم تلقاني و ترضيني ‏دخيلك لا تشفي في غرامك كنك تطلب ثار ‏انا أحبك و أحنك و أنت مهما كان تعنيني ‏عشان العيش والملح وعشان ان الليال إقصار ‏وعشان اللي مضى واللي بقى مابيك تشقيني ‏يضيع الحب بالإهمال والتجريح والإنكار ‏ويضعف بالضماير مثل ضعف الوازع الديني ‏مادام ان المواصل تم بالإخلاص و الإيثار ‏على درب ما يشبهني لا يطري لك تجافيني ‏إذا بترحل شف دروب الفراق الراقيه و أختار ‏لجل ترحل ما تترك جرح واحد بينك و بيني ‏عليك اللّٰه وأمان اللّٰه تودعني وداع حار ‏ قبل لا تشرع بقتلي وش المانع تحاضيني؟ ‏تبسم لي قبل لا نتفرق ان كان لي مقدار ‏واخذني في يدي ل أخر حضن وأخر رمق فيني ‏ترى مابيني وبينك سوى خامه و كم ازرار ‏تغانمها لا تاكلك الحسايف ما تلاقيني ‏اعرف انك معزم بالجفا من كثرة الأعذار ‏ تبي أنسـى و لكـن الليالي ما تنسيني ‏يسمح دربك اللّه لا تحاتي من وراي اسرار ‏ وعد ما أبوحها حتى لنفسي لا توصيني