ذواق شعر بـ كلمات خياليه

طرزت القميص بـ أحلى الدموع لأن ما جيتي ما عجبتني الألوان بلا واهس رجعت و گلبي مكسور شگله الي يگلي شبيك تعبان !! چبير و شيب راسي مغطي الزلوف مو جاهل و أجي لـ حضن أمي زعلان #حامد_الشمري

يريد يگول كلمن وحده أحسنله استفزني و راد تطلع مني بس لو أموت طلعت منه همزين و اجت عدله سألني بـ كل سهولة اعله أصعب الأشياء و جاوبته بـ صعوبة و گتله لا سهلة الوداع يغير المعنى و طبقة الصوت و يچتف اللسان و يسجن الجملة يـ أبو موقف تحرك أكثر من الريح مدري شلون ظلت واگفة الشتلة لو واگفلي لحظة شلون اليصلون أقدملك ثبات أكثر من القِبلة الأمل مثل القلق ، مدري القلق مثله الأمل واحد يصفط بدلة بالكنتور القلق واحد مواعد يكوي بـ البدلة گوه تحاول تكبر الفراغ وياي شلون الگوه يكبر عينه بـ الكحلة #محمد_الشمري

اجينه لـ شوفتك ميتين تراب من الدرب و شويه من دمعي آنه و گلبي اجيتك طين #ميثاق_الهلالي

بعد مائة عام من عزلة عشتها استيقظ بذاكرتي صوتك .. #يوسف_الدراجي

من الچفوف الما تعرفك گمت ألململك دعاء #عباس_الغالبي

ليش أسود لابسه و شكلچ حزين هوَ صح يلوگلچ بس بي ونين انتِ وردة ، و الورد ما بي سواد انتِ سالوفة جميلة و شهرزاد طحنه يـ حبيبة بـ هواكم و الگلب هده الحنين !! ليش أسود لابسه و شكلچ حزين #ماجد_گزار

يعجبني موت الشمع يفرش لروحة اللّحد ويعجبني موت الندى من ينزل من السما يختار حضن الورد .. #عماد_المطاريحي

لتخليني وحدي منين أعرف الناس لا أگدر أعاشر لا خلگ عندي أحب شلون غيرك من أود شلون و آنه وياك كلش خلصت ودي #جبار_رشيد

لا تحسب فضل من طيفك يمر گام هو المات أبوه تعوضه شبگة عم ؟؟ يا مدمن هجر چا يمته تدمن شوگ شرايينك تضخ تنساني وي الدم و كل هذا و بعدني أندلك و ماجيك عيب أجبرلي واحد بيه ما مهتم أتحمل فراگ و لا ملامة ناس العايش بـ القصر بـ الخبزة ما يحلم طاووسك مدنگ راسه چي مكصوص ريشه و ما ألومه ابـ بيش يتشيم بيه من الله عادة أكره هوا الملاچ لان تعشگ العامل حفرة المنجم ظلت هاي يمك ترجع تظل غاد ؟؟ شوف انتَ اليفيدك مو تجي و تندم #حسين_الحبتري

ترخص عيونك و أكملهن غلاتي و أشتريك أحلام ما يرغبهه ليلي و أكسر بـ گلبي و حلاتي مدري ليش أنتظرك اشما تهب دنيا شفت كل موت الله بيك و ما شفت بعدك حياتي #ايما_صباح

ربي حزن الدنيا بيت و حزني شِعري ربي حزن الناس شيبة و حزني شَعري ربي حزن الناس خطوة و حزني دربي ليش حزن الدنيا غربة و حزني شعبي ؟؟ ليش حزن الدنيا نبضة و حزني گلبي ؟؟ ربي حزن الدنيا هذا و حزني مدري !! تدري حسبالي الحزن چلمة بـ جريدة يموت من تغفى المقاهي يا إلٰهي مدري حزن عيوني يلمع مدري حزن الدنيا فاهي !! و انتَ تدري تدري حسبالي الحزن ليلة و قصيدة و يمشي عنك تدري حسبالي الحزن مثل التريده يجي يوم يروح منك مثل اي شباچ خلگك ما يسده تسده ريح والله والله حسبالي الحزن دمعة و تطيح مثل اي چادر يطيح ثاري حزني الماله ثالث ينولد و يظل ضريح ثاري حزني گلادة حلوة ياهو حبني يحلي جيده و ينصلب عـ الرگبة يومية المسيح ثاري حزني حروف اسمي حروف اسمي شما يصيحوني أصيح يمه هذا اگليبي شاهد گلبي شال الناس كلهه و ما شلت مرة اعله واحد يمه حزن الدنيا دافي يدفي بيهم حزني بارد !! يمه حزن الناس طيف يموت باچر حزني گاعد !! يمه حزن الناس ما يترك علامة و حزني شامة !! ليش حزن الدنيا باب يكلته سرگي و حزني جامة !! شلون بيه ، شلون بيه و حزني جام و گلبي جام و عيني جام و طبع أصابعهم عليه !! يمة حزن الناس لمسة و حزني اديه !! يمه حزن الناس كفرة و حزني أمانة يمة حزن الناس ناس و حزني آنة !! و خانة خانة دورت روحي اعله كيف و مامش آنه #ابراهيم_الرائدي

هو الوحيد الفگد بـ الدنيا هـ الواحد يحچيه لأي واحد بس الوحيد الفگد بـ الدنيا هـ الواحد يرتاح لأي واحد ؟؟ #ابراهيم_الرائدي

و بـ راحتك لفني اعله إذنك لف زلف و اكتلني يم شفتك حرف لو طبگ الخطوة بـ ورق و بـ دربك ارسلهه بـ ظرف هيچ الله و أتسرسح جدم بـ ولايتك و بـ راحتك #ابراهيم_الرائدي

المُختلف #جليل_صبيح

و ارگصتلك رگصة آخر يوم من عمر الفراشة و أدري باچر يبقى نورك و آنه أموت من لگيتك شوگي مرجحني حبيبي و خيمة صارلنا السكوت #جليل_صبيح

جسر الجمهورية صديقي بس خاصمته أربع سنوات مرات أجي يمه و ما أشوفه و مرات بـ نص بيتي يبات صدفة من السعدون أتمشه و شفته گبالي جسر الجمهورية شلونك ؟؟ أهلاً گلي و اجه ويايه و وصى صديقه السنك اليمه گله يعبر السيارات ضم عتابه بـ روحه و گلي معزوم انتَ و لازم نگعد بـ الغابات گتله احچيلي همومك كلهن فرغ من صدرك و انكتهن بَسَك گال اسمع مني بـ يوم أغبر تيهت اسمي و صوتي و لوني و وجهي و رسمي چانت فوگي اشچم سيارة و لن صوت يصيح يا ساتر و صافرة انذار تدگ غارة كلشي أظلم تدري بـ ساعتهه طفيت بـ خد دجلة جگارة اقترب الصوت و صار أقرب و ملجأ خَبَر ملجأ ، غارة !! و واگف آني و محد گلي جسر الجمهورية شبيك ؟؟ تركض كل الناس و انتَ بـ نص دجلة امدد رجليك و أدري عليه !! لحد هسه بـ راسي يگلي عليك و مبنى التخطيط اهتز كله و نصب الحرية اهتز گبله و شاعرنا التمثال السكير أبي نؤاس بـ ذاك البرد تغطه بـ دجلة مبنى التخطيط اهتز كله و دگات تصيح اخفض راسك اخفض راسك اخفض راسك و انتَ احچيلي شيصير بـ لحظتهه احساسك لو محبوبة گلبك دجلة مبتسمتلك بـ آخر لحظات من أنفاسك لو رجليك الواگف بيهن مبتورات و وگعن يمك لا ربعك يمك لا ناسك شيصير بـ لحظتهه احساسك لو ايدك مرعوبة و تصرخ تتلمس تبحث عن راسك و لن صوتي أمي تصيح غفلة طيف اسم الله ، حلم اسم الله ليش وليدي تعذب حالك ؟؟ گتلك من تنام تغطه و أرجع هسه لـ نفس النقطة ها صدگتوا ؟؟ جسر الجمهورية صديقي #جليل_صبيح #الرحمة_و_الخلود

آنه من أزعل أضم زعلي و أموت و من أموت يموت بيه عتابي #عقيل_العرد

تيهت الحقيقة و صار عندي أوهام شعرك على متونك لو مشمر الشال ؟؟ و شلم شعرك لـ وحدي وهل خذاني الليل ظل باچر و أجيب من الصبح عمال #رعد_الأزرقي

اهو استفحل علينه الموت من كل صوب و ما مَلَت چفوفه بـ روسنه يزبر ينصح بـ البذر ماي التشربه الگاع يگله الموت بره و بالك تخضر #رعد_الأزرقي #الرحمة_و_الخلود

و أموتن موتة الصُبير سنطة يموت من سگمه #مظفر_النواب