فَكِّرْ

رغم انهُ مسج بسيط، مجرد قناة صغيرة مالها معنى بالنسبة الي ممكن، خلت شخص ما بهذا الكون لمجرد شافها، فرح وميعرف شلون يعبر عن فرحته. شنو هذا التقدير الإلهي ❤️ شكرًا والله

- الرساله ؛ اعرف قناتك من 2023 تقريباً وغيرت حسابي وضيعت القناة واليوم بالصدفة عن طريق تحويل من قناتك لكيتها وأخيراً 🙏🏻 ماتتخيل فرحتي والله

فَكِّرْ pinned «من الأشياء اللي أحاول أذكر نفسي بيها دائمًا، إن وجودي بحياة أي شخص مو استثناء، وكلش طبيعي مثل ما دخلت حياة ناس، أطلع منها بيوم من الأيام، وهاي مو نهاية العالم هالفكرة تخليني أتعامل مع العلاقات بهدوء وإتزان أكثر، لأن مقتنع هالحياة مستحيل توكف على مكان او فكرة…»

8/8 ❤️.

أحيانًا لا يرى الناس خطأ أفعالهم، لأنهم محاطون بأشخاص جعلوا تلك الأفعال عادية، عندما تكون البيئة مشوهة، تصبح الأخطاء سلوكا مقبولاً، والتجاوزات تبرر، والانحرافات تعاد تسميتها، ولهذا لا يكفي أن تكون نقيًا، يجب أن تحيط نفسك بمن يذكرك بالصواب، لا بمن يطمئنك إلى الخطأ .

الحمدلله، لا لسبب قد حصل، إنما لأسباب لم تحصَل، الحمدلله على الثبات في المبدأ في العقيدة وفي الأخلاق، الحمدلله لأننا لم نظلم أحدًا، ولم نرمي الوعود الخائبة، الحمدلله على نعمة الكلمة والموقف، وعلى نعمة الوضوح الذي نمتلكهُ، الحمدلله لأننا لم نحزن احدًا مُتقصدينَ أو مُجبرين، ولأننا كُنّا على طريق الصدقِ ولا زلنا عليهِ، الحمدلله لأن الذي عرفنا أعطانا حقَّ قدرَنا، الحمدلله على صفة الحنانِ، على اللينِ، وعلى الإبتسامةِ الصادقة. اللهمَ أكتبنا من عبادِكَ المُخلصين. وكلكم عيوني ❤️

‏"بعضُ من يمرّون بحياتك يرفعون معاييرك في العلاقات من حيث لا تشعر؛ إذ تُبصر معهم صفاءَ الصّحبة، وحُسنَ العِشرة، وطيبَ المؤانسة؛ حتى يزهد قلبُك فيما دونها، ويأبى أن يرضى بغيرها.. وتلك-والله-نعمةٌ لا تنفد."

إتعلم تتقبل فكرة إن مو كل إنسان تحبه، راح يعرف شلون يحافظ عليك. مو كل علاقة نهايتها مثل ما رسمتها براسك، ولا كل أمل بنيته راح يتحقق، ومو كل شخص يستحق الفرص اللي تنطيها. أكو ناس تتعب سنين حتى تصلّحهم، وتوعيهم على غلطهم، وبالنهاية تكتشف إن المشكلة مو بطريقة كلامك ولا بصبرك… المشكلة إنهم أصلًا ما يشوفون نفسهم محتاجين يتغيرون، الإنسان اللي مقتنع إن كل أذيته “عادية”، وكل غلطاته إلها ألف تبرير، ما راح يتغير حتى لو جبتله الدنيا كلها دليل وتقبل هم إن مو كل حب ينرد بحب، ومو كل اهتمام ينقري اهتمام، مرات تقدم كلشي لأنك ماتريد تخسرهم، فيفسروها ضعف منك، تضطر تسكت حتى لا تجرحهم، فيفسروها برود، تتنازل حتى تستمر العلاقة، فيحسبوها خوف منك ويبدون يتمادون أكثر. دير بالك تراهن على شخص خذلك مرة وتگول “أكيد هالمرة افتهمني" أغلب الناس إذا ما خسروك، ما يعرفون قيمتك. واللي تعود يشوفك ترجع بكل مرة، يتعود يكسر خاطرك بكل مرة. وتذكر، مو كل الناس تشوف الدنيا نفس ما انت شايفها بمبادئك واهتمامتك، أكو ناس ما يهمها شنو سويت، ولا شكد ضحيت، ولا شكد سهرت حتى تطمّن عليهم، كل اللي يهمهم هو شعورهم ونفسهم، أما شعورك فيجي دائمًا بالمرتبة الأخيرة. فلا تتعب نفسك بمحاولة إنقاذ شخص ما يريد ينقذ نفسه، ولا تضيّع عمرك حتى تثبت قيمتك لشخص قرر من البداية ما يشوفها، وقتك هو أهم شي تمتلكه، لا تستنزفه بمحاولات فاشلة اخرى ولهذا أكررها كل سنة، ويمكن راح أبقى أكررها طول عمري “بيع الما يقدّر، واشتري نفسك". وكلكم عيوني.

من تفتح باب الثلاجة، وتاكل شيف رگي من الماعون وترجع تسد الباب، غالبًا ما راح تنسد .. راح تشوف اكو مشكلة عقلك الباطني راح يكلك بسبب مكان فلان شغلة بالثلاجة، فغيرها علمود ترجع تنطبگ الباب مرة اخرى، أنت المسكين مرة تغير مكان السراحية، مرة تدفع الجدر ليجوه اكثر، مرة تشيل العلاكة مال طماطه وتخليها بغير خانة، بس بكل محاولاتك الباب ما راح تنسد، لأن المشكلة بعمرها ما جانت بذني المسكينات المشكلة جانت بمكان ماعون الرگي الأخذت منه، عدله وراح تنسد الباب بكل بساطة لأن قبل ما تحرّك الماعون، الدنيا جانت تمام داخل الثلاجة. اتعلّم دائمًا من تاخذ شغلة وتروح، شخّص الأخطاء وراك، مو علمود سواد وجه ماعون الرگي، بس علمود سلامتك النفسية ووقتك اليستنزف وانت تحاول تسد الباب وتخلص عاد. وكلكم عيوني.

من تتخيّر بين طريقين لا تستعجل وتختار واحد بغض النظر عن السبب مرات الطريقين ثنينهم مو إلك، وكل خطوة بيهم راح تبعدك عن نفسك أكثر. تعلّم تدور على طريق ثالث ، طريق محد رسمه إلك ولا أحد فرضه عليك. طريق تصنعه بإيدك، حتى لو جان أطول وأصعَب وأحلى من البقية الإنسان ما يصير مُختَلِف من اختياراته، يصير مُختَلِف من شجاعته وهو يصنع طريق ثالث ما جان موجود من الأساس وكلكم عيوني.

جنت منطي أكس على برنامج السناب بالسنوات الأخيرة بس صارلي اسبوع استخدمه وتقريبًا استلطفته لذلك ضيفوني اذا تردون https://snapchat.com/t/IxoVpU9A

اذا ما تزوجّت لحد الآن استمتع بالحرية واللامسؤولية، واذا تزوجت إستمتع بالوَنَس والمشاركة، واذا ما چان عندك أطفال استمتع بالهدوء والخفّة، واذا عندك أطفال استمتع بالتربية والسعادة، واذا بعدك طالب استمتع بالحياة الجامعية والأصدقاء، واذا تخرجت إستمتع بالشغل. دائمًا أي وضع بالدنيا بي وجهين، اذا ركزت على الظلمة راح تبقى طول حياتك مهموم وحزين وتفكر للخطوة ألف حساب. واذا ركزت على نعمة الله وتشكره عليها دائمًا بكل وضع تمر بي، گلبك راح ينترس سعادة وراحة بال. وتذكر دائمًا الحياة فيما تشعر بها. وبس والله.

لا أعرف كيف أشكرك… كيف يشكرُ الإنسان رجلًا رافقه أكثر مما رافقه كثيرٌ من الناس؟ كنتُ في العاشرة عندما عرفتُ اسمك، واليوم أقفُ وأنا أشاهد آخر كأس عالمٍ لك، وكأنني أودّع ذلك الطفل الذي كُنتَهُ مسبقًا. شكرًا لأنك جعلت كرة القدم أكثر من تسعين دقيقة. شكرًا لكل مرةٍ كنتَ تؤجل فيها انطفاء يومٍ كامل بهدفٍ، ولكل مرةٍ كنتَ تجعلني أصدق أن المباراة لا تنتهي ما دمتَ واقفًا في الملعب. شكرًا لأنني كبرتُ وأنا أختلف مع أصدقائي بسببك، وأدافع عنك كأنني أدافع عن أحد أفراد عائلتي. شكرًا لأن اسمك كان حاضرًا في أجمل سنوات عمري، في المدرسة، وفي المقاهي، وفي الشوارع، وفي كل ليلةٍ كنا ننتظر فيها صافرة البداية. اليوم… لا يؤلمني خروج البرتغال بقدر ما يؤلمني أنني لن أنتظر كأس عالمٍ آخر وأنت فيه، لم أكن مستعدًا لهذه اللحظة أبدًا. سامحنا… لأننا اعتدنا وجودك، حتى ظننا أنك لن ترحل أبدًا، لم نكن نعلم أن أصعب المباريات، هي تلك التي لا يكون بعدها موعدٌ جديد شكرًا لكل دقيقةٍ منحتني فيها فرحًا، ولكل ثانيةٍ جعلتني أنسى الدنيا وأنا أراك تركض خلف الكرة، وكأنك تركض خلف أحلامنا جميعًا، يقولون إن كرة القدم لا تتوقف على أحد…ربما لكنها لن تعود كما كانت بالنسبة لي، لأن جزءًا كبيرًا من حبي لهذه اللعبة كان يحمل اسمك. وداعًا يا كريستيانو… لم أبكِ لأن حلمك انتهى… بكيتُ لأن طفولتي انتهت مع صافرة هذه المباراة.: خرج كريستيانو من كأس العالم… وخرج مَعهُ آخر طفلٍ كان يسكنني. Cr7 ❤️ أحمد قاسم.

اني ماضجت على فيديو طلب الزواج فوك البرج بأمريكا الي صار ترند، بل ضجت من كمية الناس الي تختزل الحب كله بلقطة مدتها دقيقة، ويتصورن هذا هو الحب الحقيقي شفت هواي بنات مشاركات الفيديو وبعضهن كاتبات "اريد واحد يسويلي هيج" وكأن الحب يُقاس بإرتفاع البرج، مو بإرتفاع الأخلاق والمسؤولية والتضحية! الحب الحقيقي مو رجل يخاطر بحياته حتى يثبت مشاعره، بينما الطرف الثاني يتصوّر إن المطلوب منه بس يستلم التضحيه، اذا تريد شريك يغامر بكرامته، بوكته، براحته، بأهله، وحتى بحياته، اسألي نفسج بالبداية، شنو راح اقدمله بالمقابل ؟ اذا جان الجواب لا شيء، فأنتِ ما تستحقين شي الحب مو استعراض، ولا منافسة على منو يسوي لقطة ترند اكثر، الحب إلتزام واحترام وصبر وستر، حفظ للعشرة، مو نكران ولا غلط وسب، الحب من توكف بوجه الظروف من الطرفين! المشكلة مو بالفيديو، المشكلة بالعقول الي تربي نفسها على وهم أن قيمة الحب تنقاس بحجم المغامرة، بينما هي بالحقيقة تتجاهل أبسط واجبات الشراكة اليومية الرجل الحقيقي والمرأة الوفية المخلصة، ما يدورون على مشهد يصفگله الناس، يدورون على علاقة صحيّة يعيشون بيها العمر كله، همه يدرون التضحية اذا ما جانت متبادلة، راح يتحول الحب الى استنزاف فقط، ومن شراكة الى طرف ينطي وطرف ينتظر، وهذا مو حب، هذا سوء فهم لمعنى الحب. كل التقدير لليعرفون شلون يحبون، وشلون يديرون علاقاتهم العاطفية وكلكم عيوني.

من الأشياء اللي أحاول أذكر نفسي بيها دائمًا، إن وجودي بحياة أي شخص مو استثناء، وكلش طبيعي مثل ما دخلت حياة ناس، أطلع منها بيوم من الأيام، وهاي مو نهاية العالم هالفكرة تخليني أتعامل مع العلاقات بهدوء وإتزان أكثر، لأن مقتنع هالحياة مستحيل توكف على مكان او فكرة او مشروع او حتى على أحد، وكل شخص يمر بحياتنا إله وكت ودور مُحدد، وبعدها تمشي الأيام بطريقها بإنسيابية تامة لذلك لتعلّق قيمتك على فكرة “اني ما اتعوّض” لأن هاي مو طبيعة الحياة، بل الديصير ببساطة ان الناس تروح حتى ناس اخرى تجي، والفراغ اللي يتركه أحد مع الوكت يتغيّر وينملي بشكل أو بآخر. فإذا بيوم من الأيام تغير مكانك بحياة شخص، لا تعتبرها هزيمة ولا تقلل من نفسك او تجلد بالذات، هاي دورة الحياة، العلاقات تتبدل، والظروف تتغير، والقدر دائمًا عنده كلمة ما نكدر نسبقها. المهم تعيشها ببساطة، لتحمل گلبك أكثر من طاقته، اتقبّل التغيير، غامر، اتونّس، واتذكر كلامي كل نهاية هي بالحقيقة بداية ، وكل رحيل يترك مجال لوصول شيء جديد ويمكن أجمل. وكلكم عيوني.

سقطَ الحُسينُ مُمزقًا كَي تفهموا أن السكوتَ على الطُغاةِ مُحرَّمُ. عظم الله أجور الموالين، المُعتدلين، الصادقين قولًا وفعلًا من العالم الإسلامي بذكرى إستشهاد ريحانة رسول الله، وروحهُ التي بينَ جَنبيهِ، إمام المُسلمين وشفيع التائهين الحُسين بن علي عليهِ السَلام وأهلَ بيتهِ الأطهار ولا حولَ ولا قوة إلا بالله العليّ العظيم.

قبل أن تختار شريك حياتك، لا تكتفِ بالنظر إلى شخصيته حين يكون معك، بل انظر إلى شخصيته حين يكون بين أهله. راقب طريقة حلّهم للخلافات، كيف يعتذرون، كيف يغضبون، وكيف يظهرون الحب أو يخفونه، انتبه إلى الأشياء الصغيرة التي تبدو عادية، لأن ما يُمارَس يوميًا داخل الأسرة…

قبل أن تختار شريك حياتك، لا تكتفِ بالنظر إلى شخصيته حين يكون معك، بل انظر إلى شخصيته حين يكون بين أهله. راقب طريقة حلّهم للخلافات، كيف يعتذرون، كيف يغضبون، وكيف يظهرون الحب أو يخفونه، انتبه إلى الأشياء الصغيرة التي تبدو عادية، لأن ما يُمارَس يوميًا داخل الأسرة يتحول مع الوقت إلى جزء من تكوين الإنسان. في علم النفس، لا يتعلم الإنسان الكلام فقط من عائلته، بل يتعلم منها معنى الاحترام، وحدود الغضب، وطريقة التعبير عن المشاعر، وحتى شكل العلاقات التي يراها طبيعية. لذلك، حين تتزوج، فأنت لا تدخل علاقة مع شخص بدأ حياته يوم التقيته، بل مع إنسان يحمل سنوات طويلة من التجارب والعادات والقناعات التي تشكلت داخل بيته. ليس لأن الناس نسخة عن عائلاتهم، بل لأن العائلة هي أول مدرسة يتعلم فيها الإنسان كيف يحب، وكيف يختلف، وكيف يعيش مع الآخرين. ولهذا، فإن نجاح الزواج لا يعتمد على انسجام شخصين فقط، بل على مدى وعيهما بما حملاه من بيوتهما، وقدرتهما على الاحتفاظ بما هو جميل، وتجاوز ما يستحق أن يتغير. فبعض المشكلات تبدأ من شخصين، لكن جذورها أقدم بكثير مما يظنّان. وبس والله.

طلاب السادس دعوة من گلبي إلكم، إن شاء الله ما ينكسر خاطركم، ولا تضيع كل دمعة قهر ولا ساعة سهر عشتوها بهالسنة. الله يسهّل عليكم امتحان باجر، ويطمن گلوبكم لحظة بلحظة خلال الإمتحان، ويرزقكم الإجابة اللي تفرحكم والدرجة اللي تستاهلوها. إن شاء الله باجر تطلعون من الامتحان وصدوركم مطمئنه، وبعد أيام تعيشون فرحة النجاح اللي حلمتوا بيها هواي. الله يوفقكم جميعًا، ويجعلها بداية خير وفرح كبير إلكم ولأهاليكم. وكلكم عيوني