uusaldan.ru

Өлүөнэ уонна Алдан өрүстэрэ бу күннэргэ хамсыаҕа.   Халаан уутун хамсааһынын көрсө муус устар 17-19 күннэригэр Дьокуускайдааҕы ыксаллаах быһыыны-майгыны сүрүннүүр тэрилтэ Уус Алданнааҕы звенотун тэрийиитинэн хамаанднай-штабной үөрэх ыытыллыбыта. Үөрэх түмүгүнэн улуус дьаһалтата, суһал сулууспалар уонна олохтоохтор сүнньүнэн бэлэмнэрин бэлиэтээбиттэрэ. Улууспутугар ууга барыан сөптөөх Суотту, Өспөх, Чэриктэй, Түүлээх нэһилиэктэригэр олохтоохтору халаан уутуттан сэрэтэр уонна көмүскүүр үлэлэр былаан быһыытынан ыытыллан, ыксаллаах быһыы-майгы тахсар түгэнигэр бэлэмнэр. Уу ылыан сөптөөх сирдэригэр 516 олорор дьиэҕэ уопсайа 2690 киһи, ол иһигэр 260 оҕо, 13 социальнай эбийиэк, 4 хочуолунай уонна 10 уот станцията хабыллаллар. Ыксаллаах быһыы-майгы үөскүүр түгэнигэр 360 киһини хабар 11 быстах кэмҥэ олорор пууннар үлэлиэхтэрэ. Ол курдук Суотту нэһилиэгэр Оҕуруоттаахха "Эрэл" спорт саалатыгар 50 киһиэхэ миэстэ, Хоноҕорго Уус Алданнааҕы техникумҥа 30 киһиэхэ, Бороҕон нэһилиэгин Арыы Тиит бөһүөлэгэр оскуола-саад дьиэтигэр 15 киһиэхэ, бөһүөлэккэ ыксаллаах быһыы-майгы тахсар түгэнигэр Тумул орто оскуолатыгар 30 киһиэхэ, Өспөх нэһилиэгин Дыгдаалга "Сайдам" КСК 35 киһиэхэ, ыксаллаах быһыыга-майгыга Лөгөй лицей-интернатыгар 60 киһиэхэ, Чэриктэй нэһилиэгин оскуолатыгар 50 киһиэхэ, Дүпсүн оскуолатыгар 40 киһиэхэ, оттон Кылаайы сэлиэнньэтигэр Түүлээх орто оскуолатын баазатыгар 20, уһуйаан дьиэтигэр 20, учаастактааҕы балыыһа дьиэтигэр 10 киһиэхэ миэстэлэр бэлэмнэнэн тураллар. Уу кэлэр түгэнигэр сүөһүнү-сылгыны уу ылбат үрдүк сиргэ тааһарарга анаан сүөһүнү хаайар күрүөлэр өрөмүөннэнэн бэлэмнэр. Халаан кэмигэр бу сүөһүлэри-сылгылары көрөргө 11 анал пууҥҥа 100 киһи, 50 техника, 33 мотуор үлэлиэхтэрэ. Уу таһымын хонтуруоллуурга 43 гидропост туруоруллубута. Ыксаллаах быһыыны-майыгыны сэрэтэр КСЭОН тэрил нэһилиэктэр ахсын үлэлииргэ бэлэмнэр. Ыксаллаах быһыыны-майгыны туоратыыга олохтоох бюджеттан уопсайа биир мөлүйүөн солкуобай үп көрүллэн, содул тахсыбатын туһугар туттуллар. Халаан уутуттан эмсэҕэлиэн сөптөөх бөһүөлэктэр иһэр уунан, бородууктанан, эминэн-томунан хааччылыннылар. Онон улуус дьаһалтата сааскы халаан уутугар бары хайысханан үлэни ыытан, бэлэмнээх олоробут. Улуус дьаһалтатын пресс-сулууспата.

Электрическай ититэр тэрилгэ сэрэхтээхтик сыһыаннаһын. Дьиэни сылытар туһуттан араас обогревателлэри туттуу баһаар төрдө буолбатын туһугар хас биирдии ититэр тэрил сертификаттаах буолара ирдэниллэр. Билигин атыыга конвектордар, маслянай радиатордар, керамическай панеллар, инфракраснай обогревателлэр, тепловентилятордар бааллар. Балартан саамай кутталлаахтара инфракраснай обогреватель уонна тепловентилятор. Инфракраснай обогреватель предмети ититэр онон умайар эттик чугас турара кутталлаах, тепловентилятор – түргэнник итиини биэрэр, кини үксубүн аһаҕас спираллаах буолар, чугас умайар эттик баар буоллаҕына итиитэ суоһаан эмиэ умайыыны таһаарыан сөп, онон умайар эттиктэн 1 м. - 1.5м тэйиччи туруоран холбуур ирдэнэр. Ханнык баҕарар ититэр тэрили таҥаһынан саба быраҕар, үрдүгэр таҥаһы куурдар кутталлаах. Биир розеткаҕа биир эрэ ититэр тэрил холбоноро ирдэниллэр, элбэх тэрили холбоон нагрузка буолан розетка ууллан, умайыы тахсыан сөп. Розетка кыамтата ититэр тэрилгэ сөп түбэһиэхтээх. (16А). Маслянай радиатор тас өттүгэр хомуллуулаах буоллаҕына туттубаккытыгар сүбэлиибит, арыыта быыһылаан эстиэн, хайа барыан сөп. Дьиэҕэ ититэр тэриллэри холбоон баран көрүүтэ суох хаалларымаҥ, баар эрэ кэмҥитигэр холбуургутугар сүбэлиибит. Баһаар буолбатын туһугар сэрэхтээх буолары умнумаҥ. Улуустааҕы баһаарынай сулууспа.

Бүгүн улуус дьаһалтата, улуустааҕы социальнай көмүскэллээх буолуу кэлим киинэ, Г.Г. Никифоров аатынан улуустааҕы киин балыыһа, пенсионнай уонна социальнай фонда улуустааҕы бэтэрээннэр Сэбиэттэрин кытта бииргэ үлэлэһиигэ сөбүлэҥ түһэристилэр. Ол курдук бэтэрээннэр олохторун-дьаһахтарын тупсарыыга, араас өрүттээх көмөлөрү оҥорууга, сынньалаҥнарын тэрийиигэ, уопсастыбаннай олоххо көхтөөх буолууларын ситиһиигэ, доруобуйаларын көрүүгэ-истиигэ, эдэр көлүөнэ ыччаты патриотическай тыыҥҥа иитиигэ уо.д.а. атын хайысхаларга бииргэ үлэлииргэ илии баттастылар. Бу биэс өрүттээх сөбүлэҥ биир ситимнээхтик үлэлээн, улуус дьаһалтатын уонна улуустааҕы бэтэрээн Сэбиэтин үлэтэ киэҥ эйгэни хабаан ыытылларыгар төһүү күүс буолуоҕа. Улуус дьаһалтатын пресс-сулууспата.