سلمى، يكفي ؟

‏قارنت بين الخميس وليلة الجمعة ‏لا فرق لا فرق بين اليوم والبارح ‏الحزن نفس الحزن ، والدمعه الدمعه ‏والجرح لا زال .. والجارح هو الجارح

بدون الليش والحسرات وعتابك فمان الله بدون الآه والتأنيب تعدّاك الملام وشرهة أحبابك حقرتك فالردى وشلون فعل الطيب خبيثٍ لو تحب رجول من جابك بتبقى يالمنافق في محل الريب تعيّبك الشيم حتى الردى عابك وجودك في ميادين الرجوله عيب

لو يدفّي الصوف جلدي والضلوع تطوّى ‏ما تدفّي برد جوفي جمرةٍ وقّاده ‏البرود اللي أحسه غير برد الاجواء ‏والشعور اللي بصدري غير حزن العاده ‏انتمي للعزله لحالي وأعاف الاضواء ‏واجفل من الناس وتمر الليالي ساده ‏وتنقضي ليله بليّا انجاز وبلا جدوى ‏وتبتدي ليله بنفس شعورها وزياده

طراة أحلامنا لا من وصلناها عِزاز نفوس ‏ولا للفوز نكهه كان نقّص من مِبادينا ‏يساعدنا عليها اللي لغيره ماخضعنا الروس ‏على درب النقى وقُلوبنا أنظف من مخابينا

‏مع إني خابر ان الشمس عقب غيابها بتبين ‏أحس أنها ليا غابت من عيوني تودّعني ‏وأشك أنها ليا غابت تروح وتطرد المقفين ‏وأنا إللي شيمتي عن طردة المقفين تمنعني ‏ذرفت الدمعه إللي عالقه حروة ثلاث سنين ‏لو أن الدمعه اللي تنذرف ماهي ترجّعني ‏أبي ذيك الدروب إللي تودّيني ولا أدري وين ‏أنا محتاج دربٍ كل ماجيته يضيّعني ‏أحبّك كثر ماذعذع هوَاك وسال دمع العين ‏وكثر ماقلت أنت تحبّني .. وتقول لي يعني

‏سلامي سلام اللي سمح والأمل مفقود ‏على اللي ما صان الود من كثرة أعذاره ‏رفعت العتب وأقفيت عن غايبٍ موجود ‏يوم ان الغلا شفته بدا يرخي ستاره ‏سعيت لرضا عينه ولا شاف لي مجهود ‏وأنا أجفى العرب لأجله وأناديه وأختاره ‏يا ليل الفراق اللي عليه الحروف شهود ‏قرار الجفا عقب الغلا وشهي أخطاره

‏يعرف اسمي ويعرف وقفاتي ويبخصني ‏ويدري إني فوق هقواته وفوق آماله ‏ويدري إنه ما يزودني ولا ينقصني ‏لو تغني حنجرة الإبداع من مواله

الرجل لا صار لا مبدأ ولا ذمه لو زينوا سيرته مالله مزينها

البارحه ليلها ماهوب ضيفً خفيف ‏لين اقبل النور وادّا واجبه وانصرف ‏ ‏رسمت وجه المليحه في خيال الكفيف ‏وابحرت به فالوصوف الين شاف وعرف ‏فيها طهور النزيه اللي مقامه شريف ‏ودك تطهّر بدمع عيونها لا ذرف ‏ ‏من شاف وجه القمر فـ الارض حطه وليف ‏حتى لو انه على حد الصراط انحرف ‏مضارب رموشها اللي حدها حد سيف ‏مكانها الصدر واللي غيرها فـ الطرف ‏ ‏في مثل هذي العيون اللي هدبها كثيف ‏تسّلم الروح ويموت الشجاع بشرف ‏ ‏راحت بقلبي مثل ما راح حكم الشريف ‏مراح غرسً جرفه السيل يوم انجرف ‏وان مال ذاك القوام المنصهر يالطيف ‏غصنً لا هب النسيم يميل منه طرف ‏ ‏اطيح طيحة قوي ماهيب طيحة ضعيف ‏طيحة شجاعٍ هزمه الحب لين اعترف

تفرّش البال يا لون الحياة العتيق هنا زبرجد لياليك وهنا لولها يا ما عطيت القدم لمتوهات الطريق ويا ما عطتني الليال الغبر مرسولها ياما هقيت إني الناجي وصرت الغريق والناس لولا التجارب غابت عقولها وأنا مع العز لي سيرة وحبلٍ وثيق وثيابي اللي علي طولي وأنا طولها ما قلت تكفى لأحد حتى وأنا مستضيق من خوف لا يحسب إني دايم أقولها منابت النفس والورث العريق العريق يزود من صبرها ويكثر حمولها يا حظ من حط ذكر الله لجوفه رفيق زهداً بالأبواب فاتحها ومقفولها الأرض لله والإنسان حرٍ طليق والله يحاسب عباد الله بفعولها يا رب لا تختبر نفسي بما لا تطيق ورضاك يا رب غايتها ومدلولها الحمد لك والثناء اللي في جلالك يليق يالله عفوك ومغفرتك وما حولها

إن رحت للي يحيي الأرض من جوع ‏ملامحي ذبلا وروحي ضمآنه ‏ما بيني وبينه إلى احتجت موضوع ‏موعد، وبوَّاب، وكتاب، وحصانه ‏قد لي كذا ليله وراسي على كوع ‏راسٍ يباسه مسرفٍ في ليانه ‏مشغول ذهنيًّا ومحتاج لأسبوع ‏بين الحرم والفندق اللي وزانه

أنا العصر يوم إنّ الهبايب علي تهب ‏وبالصدر شي ما عهدته من الضيقة تذكرت والذكرى عذاب الغريب الصب وسم الكبود وعاشقٍ ناشف ريقه ‏تذكرت من بعده مواجع وقربه طب ‏وتذكرت حلم جاد وقتي بتحقيقه نهار ألتقي بك كن ما الله خلق لي قلب يتله هدبك وينصرم من معاليقه وأنا يالرقيق الترف ما جيت لك من جب ولاني نبيٍ له مع الله مواثيقه ‏تفلّت عليك النفس لو في وصالك ذنب ‏تفلات طيرٍ قاضباته مسابيقه صحينا من الحلم الحقيقي وكنه كذب وتشتت غلا وش يجمعه عقب تفريقه ؟ تمر الحياة الفانيه ما لوصله درب وأنا عايشٍ ما بين كذبه وتصديقه لو إني عرفت أنسى مثل ما عرفت أحب ما حملني القلب الشقي حمل ما أطيقه

شعور الاكتفاء ما دام أعيشه ما علي خلاف ما أفكر في المقفي ليه مرواحه ومرجاعه

‏عن ضجيج المجتمع ومصادم الهرج وزحامه ‏مكتفي في رايي الشخصي وعرفي واقتناعي ‏قافل ابواب العتاب وعاقل ركاب الملامه ‏مستريح ومعفي التفكير من بعض المساعي ‏ما رجيت الا السلام ولا طلبت الا السلامه ‏من زمانٍ ما يحن ومن ظروفٍ ما تراعي ‏جعلني ما امر في حسرة ولا اشعر بانهزامه ‏ولا اتردّا مع رفيق ولا اخذل الاسم الرباعي ‏نادر تحصّل من اليا سولف يثمّن كلامه ‏اكثر العالم يقول العز في فيّة ذراعي ‏من حفظ بين الرجال اسمه وقدره واحترامه ‏ما يقول ان مر بعض الهرج ما للصمت داعي ‏ايه انا اللي يترك الزلّة لجل يرفع مقامه ‏كل ما حاولت اجادل ضايع احس بضياعي ‏لا تمادا فالغلا ولا تفرّط فالكرامه ‏قسوة الخذلان توجع كل ما صرت اندفاعي ‏من يطاوع كل شور يضيع ففجوج الندامه ‏ضيعة رعيّة بدو راحت وهي من دون راعي ‏كل مجدٍ يجعل الرجّال بين الناس هامه ‏ما صنعته لين قمت ادعس على روس الافاعي

‏على اللّٰه لو يروح اليوم كله بين حزن وياس ‏وأنا ما أحب كسرة نفسي وما أداني خضوعي ‏وانا اتعبني السهر وارهقني التفكير والهوجاس ‏مضت حول الثلاث أيام دمعي مغرقٍ كوعي ‏بلاني ربي بقلبٍ صخر وبخاطر حساس ‏ما بين امسح غلا الغالين وبين امسح دموعي ‏تقول اللّٰه خلقني من برود ومن شوي احساس ‏ وانا والله لا هب النسيم يزيد من لوعي ‏لو ان مانيب أحن الناس لكني أحن الناس ‏وأخاف اللّٰه لا ابدل خاطرٍ راضي بموجوعي ‏أداري فالخواطر لو ما عندي لها احساس ‏يا كيف اللي لي اغلى من هلي وأغلى من ربوعي

‏اليوم كل الوجيه الحاضره للفناء ‏يا كل صبحٍ يقود النور للناظرين ‏تجيبني من هناك .. وتحتضني هنا ‏يا مجمل العمر لو العمر هالساعتين ‏جينا .. كأن الشعور اللي وصل قبلنا ‏ضم المكان وملاه من الشغف والحنين ‏واللي نحت عودك المعقود لين أنحنى ‏ما قبلك من أولين ولا بعدك آخرين

منهو يشيل الحظوظ المايله مني كل ما تمنيت وقفة طوّل الممشى

عليه الشحم، لكن تراني بعد مليت وكلمة على خشمي وش الفايده منها ؟ صبرت وتحريتك ورحت ورجعت وجيت وعودت تلعني المشاريه وألعنها علي شرهتي ولا انت وش عاد لا صديت وجيه الرجال تساق للي يثمنها

كل بعدٍ عنك مر وكل قربٍ منك حالي انت ابو كل الشعور من القلق لـ الطمئنينه والله انه ما يمر اليوم لين تمر بالي آه من وجهٍ يشع النور مع طلّة جبينه وين أبهرب منك وأنت العابر اللي صار غالي؟ مرّني معجب وخلاني من أكبر معجبينه اجرح اجرح يا وسيع المحجرين ولا تبالي انت عينك يا حبيبي لاجلها تكرم مدينه خابر ان قدك رهيف وخابر ان وجهك خيالي وخابر انك ماخذ من الريم لفتاته وعينه ما لقيت لوجهك اشباهٍ على مر الليالي حطه الله نسخةٍ وحده ولا حط أربعينه