إسلَام العقِيلِي

منيش غافل ولا غبي ونعرف كل كبيرة وصغيرة من يلي يصير من ورايا ولكن نتجاهل بكامل الارادة ونراقب بصمت بيش نشوف النهاية كيف بتكون فبلا استغفال وتعالوا صريحين لان عارف البير وغطاه .

لما تنحِّي عواطفَك وتخليهم علي جنِب وتعطِي روحَك فرصه ومسَاحه خاصّه بِيهَا وتشُوف لبعض الحاجَات بحيَادِية ومن زوايَا مختلفه وتشُوفهم بعقلك مش بقلبَك حتعرف كيف انّك كنت غبي وحتشوف بوضوح كميه الحقاره والمصلحه يلي فالبشر وحتخصّ منهم يلي حبيتهم بالذَات .

إشترَاك أسَاسِي @shrqawii 🌙

حتقعد غبي لو نقصت من قيمة شيء واكبر غباء لو عطيته اكثر من حجمه وتلقى روحك متشنج في حياتك بسبب انك تعطي في اعتبار لكل شي وأي شيء، قدّس نفسك وذاتك واحترمها وعطيها فوق ما تستحق وفوق من حجمها لانها الوحيده يلي مش حتشوف روحها عليك في يوم من الايام عكس الناس الاخره يلي لما يشوفوك قايمها بيهم حيشوفوا روحهم عليك .

الشخص البارد في تصرفاته ومشاعره هذا شخصيه كان مار بصدمات واجده ف حياته ومن اقرب الناس ليه ومن شخصه المفضل ومن كل حد كان قريب عليه ويشوف فيه حاجه مهمه في حياته كان شخص وفيّ ونيته صافيه وقلبه طيب، كان يشوف فالعالم بصورة بيضاء لكن خلوها سوده بتصرفاتهم وافعالهم معاه، ومن قوة الصدمات هذينا ماتت المشاعر فيه ولكن في نفس الوقت متحطش في بالك انه انسان مؤذي لا بالعكس مرات لو تشوفه من جانب ثاني حتشوف انه انقى انسان رغم الشيء يلي صارله ومزال وحيقعد زي مهوا .

١٠:٤٤ | لا تُنَافِسنِي فِي برُودِي .

Channel photo updated

ماعادش فِ شي يضايق ولا شي يفرح ، كله كملناه قبل الوقت ، هذا اللي مخلي الشعور اليوم فراغ فِ فراغ .

أفكاري مُتحف وقائمة الزوار فارغة ، مش عارف أنا اللي غلط ولا الناس اللي غلط ، ولا ممكن الزوز صح ، ويقعد الثابت اللي نعرفه إن اللي فِ عقلي وعقولهم مستحيل يتلاقن ، مش نازل عليا وحي لكن الغلط فِ عينك صح في عيني ، أخدم عٕ ثقافة إنك "تفوت غيرك" مش لازم حتى اتقبله ، لأن عقلك فاضي وفِ عقلي فضاء ، من أعظم الإنجازات المعنوية اللي حققتها ، إني ما نشاركش حد بأفكاري ، المهمة واللي مش مهمة ، وأي شيء يدور فِ عقلي ، حتشوف المبنى لكن عمرك ما حتشوف المخطط .

الظروف الصعبة مُش موحدة ، ممكن الظرف التافه عندك يكون مش تافه عند غيرك ، والسبب إن أولوياتنا تختلف وتركيبتنا فِ أساسها من الحاجات اللي تأثر فينا واللي لا ، حاول تستوعب إن مش كلهم أنت ، فا ما تحطش روحك فِ مكانهم ، وما تشوفلهمش بنظرة تقودها مبادءك ومعتقداتك ، ولو ما قدرتش ما تشوفلهمش مرة وحدة .

ديما تلقاني ما نتغاضش عَ الموقف اللي نقدر نساعد فيه ونساعد ، مُش لأني ما نعرفش نتغاضى ، لكن في ضمير حي ف داخلي وتربيت وكبرت عليه الي هو ، حتى وأنا بكامل قوتي ، وهو نفسه اللي تقول عليه مات لما تبي تبين قوتك .

مفهش شي لو لمت عَ روحك في موقف يصيرلك ويخليك توصل بيك لمرحله الندم ، لوم روحك لانك انت بتصرفاتك هذي خليت الي صارلك صار ، اعتبرهن كفوف حارات من الدنيا وصحصح بيهن ، بيش مره ثانيه معادش اتكرر نفس الشي ، وتعلم تمشي خطواتك بشكل صحيح ، ابني واسس روحك وشخصيتك بكل شي انتَ تحبه ، وحتوشف كيف ع تعيش الحياه صح وح تلاحظ انه من خلال الخطوات هذينا وبدون سبب واضح حطيت روحك ع الرف مفش شي قادر ينزلك ولا يحبطك .

حاول ديمه ماعمرك تأيس ، مفش يجي بساهل هذي ضروري تخليها فِ بالك ، ديمه اشقى واتعب عَ الحاجه الي خاطرك فيها وحتوصل صدقني ولا تخلي حد يجمل عليك ، لانه والله المذله مُش ساهله فِ وقتنا هذا يقعدو يقولولك نحنا الي عطيناك ولا نحنا الي وصلناك فلي انتَ فيه ، لذالك خليك منفرد بروحك ومش حيوكلك الحلو غير ذراعك ، وقتها بس حتحس بحلاوته ، وحَ تسميه انجاز .

شخصنة المواضيع حتخليك تمشي وتوقف ، تشوف لكل كلمة عزقها شخص فاضي ولا قالها شخص طبيعي بحسن نية إنها عليك ، لكل موقف إنك أنت المقصود ، تبدا مقعمز فِ الغرب وتصير حاجة فِ الشرق اتشكل وتخش بعضك وكأن مافيش غيرك فِ الدنيا ، مع إن مرات يكون الكلام والموقف والتصرف عادي وما يضايقش لكل لأنك تشخصن فِ المواضيع حتعيش مضايق ، وحاول انك ماتعطش شي اكبر من حجمه الحقيقي ، وعيش حر وواثق من نفسك .

كنت نضحك وقت الضحك ، وحتى وقت يكون مُش في وقته ، كنت شايف الدنيا رخيصة ، قاعد نشوف فيها رخيصة لكن الرخيصة هذي ما رحمتنيش في فاتورة الضحك ، والدفع كان عَ هيئة حاجات واجد مثلاً جوي وروتيني ، ومازال متسمر ندفع .

القبول من أهم الصفات في الشخصية ، مهما كان الشخص محترف في إنه يركب ويلون في شخصيته وأسلوبه ويصطنع ، فا هو ما يقدرش يصطنع الشي اللي يخليه عنده قبول بين الناس ، ما يقدرش يصطنع الشيء اللي قادر يوصل لعندك ويخليك تحس براحة في التعامل مع شخص أول مرة تقابله في حياتك .

اللي عرفك بشخصية ومظهر وشكل وجو وأسلوب معين ، مش حيتعود عليك لو تغيرن وممكن حتى ماعادش يتقبلك ، على عكس اللي عرفك من جوا ، مهما تغيرت حيقعد عارف روحه مع منو يتعامل هذا ديمه رد بالك عليه وحطه بين عيونك .

المعارف حاجة واللي بينك وبينهم معاملات زايدة اللي مع الوقت بتستدرجك إنك تتعرف على الشخص هذا وتقرب منه وتصاحبه ، هذي حاجة ثانية لو تكررت اكثر من مرة وفاتت حدها ، فا هنا أنت مُش اجتماعي ولا قبولك موسع دائرة علاقاتك ، أنت هنا قاعد تضايق فِ حياتك عليك ، وتقسم فِ روحك عَ عشرين شخص اللي في نهاية لو طلعت منهم بواحد حقيقي ، يكون خير وبركة .

أنت مرات ما تقدرش اتحكم في روحك في موضوع إن ما تخليش حد يأثر عليك ولا اتأثر بحكم الناس ، لكن في حاجة تقدر تساعدك وحاجة ماتبيش منك جهد ولا شي ، هي إنك تعرف إن أنت مُش اسوء شخص ، لكن أنت مش احسن واحد ، أنت ثنيم خليك مقتنع إن أنت عمرك ما كنت شخص واحد عند الناس ، لأنك أنت ما تتعاملش مع شخص واحد ، زي ما في شخص حيشوفك ولا حاجة في الجيهة الثانية في شخص حيشوفك كل حاجة ، وفي شخص ثالث حيشوفك عادي ، وسواء اهتميت برأيهم ولا ما اهتميتش أنت مش حتقدر ومش مجبور تغيره ، واخيرًا مش غلط إن يأثر فيك رأي شخص في حالة فتحلك عيونك عَ حاجة أنت مش شايفها في روحك ، وساعدك إن اتغير للأحسن ، ومش غلط إن يأثر فيك الرأي لكن غلط إن تشوف لأي رأي على إنه صح أول ما يتوجهلك وتصدقه ، ومش غلط إن تسمع وتاخد برأي حد لكن الغلط إنك تسمع وتاخد رأي أي حد وفهمك كفايه .

ديمه خلي التوقعات اللي تحطها فِ نفسك قادرة تكسرك وتبنيك وادير فيك شنو تبي اكثر من التوقعات اللي تحطها فِ الناس ، لما تخذل روحك حتحس بتفاهة خذلان اي حد ليك ، لما تجرب شعور إنك ما تعطيش نفسك حقها ، مُش حتنصدم وقت حد ما يعطيكش حقك ، لما ترضاها فِ نفسك تبدا ما تستغربش لما اي حد ثاني يرضاها فيك .