علي المهدوي ³¹³

🟣 القرآن والطفل ؟ المخالفين يگولون : القرآن الكريم گال : {وَ يَعْلَمُ ما فِي الْأَرْحامِ}، يعني الله تعالى يعرف شنو ببطن المرأة من ذكر أَو أُنثى.. لكن السونار شارك الله بهذا العلم، وصار يعرف جنس الجنين !!! فربكم صار اله شريك بالعلم ؟ الجواب : السونار يعرف جنس الجنين بعد ما تكتمل أَعضاءه التناسليّة.. بينما الله تعالى يعرف جنسه من بعده نطفة !! السونار ميعلم هذا الطفل كريم لو بخيل، شجاع لو جبان، مؤمن لو كافر، بينما الله تعالى يعلم بكل صفاته. _ الإِسلام والعلم

لحظة إِدراك : بعض الأَحيان أَسأل نفسي : عود ليش نشوف اليهود والمسيح والملحدين الي عايشين بأُوروبا وسويسرا، ما عدهم مشاكل مثلنا احنه المُسلمين !! لا عدهم حسد ولا كذب ولا غش ولا غيبة !!! وكلهم هادئين، وبيئتهم تخبّل، واحنه عكسهم !! والسبب يا أُخوان : لأَن بداخل كل إِنسان لؤلؤة بيضة اسمها (التوحيد)، فإِذا باعها وأَشرك بالله !! الشيطان راح يخلّيه يعيش حياة هانئة ورغيدة.. أَمّا إِذا تمسّك بيها، فالشيطان راح يسوّد حياته !! لذلك نشوف بلاد الكفر (الغرب)، عايشين أَفضل حياة، لأَن باعوا توحيدهم للشيطان، واحنه شابعين ضيم، لأَن متمسكين بي. _ علي حسن هاشم

🟢 أَنواع المنافقين ؟ سورة الأَحزاب المباركة بيّنة النا أَنواع المنافقين الي موجودين بكل زمن، تعالوا نتعرّف عليهم معًا، النوع الأَوّل : الي يگولون (عمّي أَمريكا وأَتباعها محّد يگدر الهم) !! يعني يعظمون بقدرات العدو، ذوله نفسهم چانوا مع الرسول (ص) بمعركة الخندق، ومن شافوا العدو هواي گالوا : {ما وَعَدَنَا اللَّهُ وَرَسُولُهُ إِلاَّ غُرُوراً}، فكل الي يخاف من كثرة العدو منافق، النوع الثاني : الي يگولون (العراق وينه ووين الحرب نريد نعيش)، ذوله نفسهم چانوا مع النبي (ص) بمعركة الخندق، ومن شافوا أَعدادهم قليلة.. گالوا للجنود : {يا أَهْلَ يَثْرِبَ لا مُقامَ لَكُمْ}، يعني أَنتم وينكم ووين الحرب، فكل الي يحبّط معنويات الجند منافق !! هذا الكلام سولفوه لكل شخص بي هالصفات، وگلّوله لا تحزن على الإِمام الحسين (ع) !! لأَن بالأَخير هذا مصيرك : {إِنَّ الْمُنافِقِينَ فِي الدَّرْكِ الْأَسْفَلِ مِنَ النَّارِ}. _ ٣ محرم ١٤٤٨ هـ

لحظة إِدراك : أَكو حالة تصير بالدماغ، اسمها : (التكيّف العصبي)، يعني دماغنا يصير يتجاهل الثوابت الي ما تتغيّر !!! ويخلّينا ما نحس بوجودها.. مثلاً : الرجل من يلبس ساعة، بعد (5) دقايق يصير ما يشعر بوجودها على ايده.. والسبب : لأَن الدماغ تجاهلها.. ونفس الشيء من الشخص يخلّي عطر فوّاح.. أَوّل دقيقتين يشمّه بوضوح، بس بعد فترة يصير ما يشمّه !!! والسبب : لأَن الدماغ تجاهله أَيضًا، يعني الإِنسان يصبح أَعمى شعوريّاً تجاه الأَشياء الثابتة الي ما تتغيّر !! فبما انو الله تعالى ثابت وما يطرأ عليه التغيير.. والدماغ منّا يتجاهل الثوابت اللا متغيّرة، فلهذا السبب ما نحس بوجوده !!! وأَظن لهذا السبب الفلاسفة گالوا : (الله اختفى لشدّة ظهوره). _ علي حسن هاشم

إِنهيار نفسي 🎧💔

🟠 الإِمام علي ما ينطي المراد ؟ أَمير المؤمنين (ع) يگول : سلوني قبل أَن تفقدوني، يعني إِذا فقدناه بعد ما نگدر نسأله !! سؤال : شلون الناس جاي تسأله وتطلب حوائجها منّه واحنه صار فاقدينه أَكثر من ١٤٠٠ سنة ؟ الجواب : كلمة (سؤال) بيها معنيين، الأَوّل : (الاستفهام).. مثلاً : واحد يگول للإِمام علي (ع) 1 + 1 = شگد ؟ الإِمام مراح يجاوبه، لأَن الإِمام عايش بالآخرة، وصاحب السؤال بالدنيا !! والثاني : (الطلب).. مثل واحد يگول للإِمام : يا علي وفّقني بدراستي، فحديث (سلوني قبل أَن تفقدوني)، يصير معناه: من نفقد الإِمام (ع) بعد ما نگدر نسأله أَسئلة (استفهاميّة)، !! بينما الأَسئلة (الطلبيّة)، نگدر نسألها منّه حتّى بعد فقده. _ علي حسن هاشم

🔵 الأُكسجين والخلود ؟ مرّات أَسأل روحي هذا السؤال : عود ليش الإِنسان ما يگدر يخلد بالدنيا، يعني شنو السبب العقلي الي يمنعه من ذلك ؟! الجواب : السبب هوَ الأُكسجين الي نتنفّسه !! والدليل هوَ : من نخلّي تفّاحة بالهواء، راح نلاحظها كل يوم يتغيّر شكلها وبالأَخير تتعفّن !! بينما إِذا نخلّي التفّاحة بأَكياس تفريغ الهواء، ما راح تتلف، والسبب لأَن منعنا عنها الأُكسجين !! وتدرون ملامحنا تتغيّر بسبب الهواء الي نتنفّسه !! (الهواء = الشيخوخة)، فالإِنسان يهرم ويتعب وبالأَخير يموت، مو لأَن العمر يمشي !! لا وإِنّما لأَن يتنفّس، بالضبط مثل التفّاحة الي تتعرّض للأُكسجين وتتلف !! واني أَعتقد انو الدار الآخرة ما بيها هواء !! لأَنّها مُصمّمة للخلود، ولهذا السبب من نموت ينقطع النفس عنّا. _ القاتل الصامت

🔴 الفرح والحزن بدون سبب ؟ هواي أَسئل نفسي هذا السؤال : يا تُرى ليش مرّات الإِنسان يفرح بدون ما تصيبه نعمة !! ويحزن بدون ما تصيبه نقمة ؟ الجواب : الإِمام الباقر (ع) يگول : (إِنّهُ ليس من أَحدٍ إلّا ومعهُ مَلك وشيطان، فإِذا كان فرحه، كان ذلك من دنو المَلك منه، وإِذا كان حزنه، كان ذلك من دنو الشيطان منه)، يعني الشخص من يفرح.. فرحهَ هذا بسبب قرب المَلك منّه !! وأَمّا إِذا حزن، فحزنه بسبب قرب الشيطان منّه !! الحمد لله على نعمة أَهل البيت عليهم السلام. _ علل الشرائع

🟡 ليش الله خلق الأَحلام ؟ بيوم من الأَيّام الله تعالى بعث رسول لقوم بدائيّين حتّى يهديهم لعبادته، فالقوم گالوا للرسول : أَموال عدنا وأُمورنا تمام، ربّك إِذا عبدناه شنو راح ينطينا ؟ الرسول گاللهم : إِذا طعتوه يدخلّكم للجنّة، وإِذا لا، يدخلّكم للنار !! القوم گالوا : وشوَكت ينطينياهن ؟ الرسول گاللهم : مِن تموتون، القوم گالوله : ناصب علينا أَنتَ !! مِن نموت نصير عظام ورُفات.. فماكو حياة بعد الموت، وكافي استخفاف بعقولنا ! فخلق الله تعالى لهم الأَحلام، وحلموا بأُمور عجيبة، واجوا للرسول وگالوله : شنو ذنّي الي شفناهن ؟ الرسول گاللهم : ذنّي الأَحلام، وهنَّ دليل من الله تعالى على وجود الحياة بعد الموت. _ الإِمام الصادق عليه السلام

لحظة إِدراك : تدرون مُعظم الناس الي نصادفهم بحياتنا هُمَّ غير حقيقيّين، يعني يشبهون بوتات الأَلعاب الإِلكترونيّة، وفائدهم هيَ حتّى تبيّن الحياة واقعيّة و مو كئيبة !! أَبرز صفة تميّزهم هي : يكونون مسلوبين الإِرادة، أَي شخص يكذّب عليهم يصدگونه !! والإِمام علي (ع)، ذكرهم بهذا الحديث : (همج رعاع، ينعقون مع كل ناعق، ويميلون مع كل ريح).. كل همهم هوَ الوضع الاجتماعي (أَكل شرب نوم تكاثر)، وميفكرون بعالم المُثل (عالم الكمال)، ولمّن تسألوهم سؤال عميق، يتقزّزون ويغيرون الموضوع بسرعة !! ذوله نفسهم الي حاربهم الإِمام علي (ع).. حتّى معاوية دز رسالة للإِمام علي (ع) مفادها: (جئتك بقوم لا يفرّقون بين الناقة والجمل)، هاي حقيقة البوتات (الكومبارس). _ حقائق مظلمة

🟣 ليش الأَثرياء محبوبين ؟ مرّات أَگول : ليش الناس يحبّون الشخص الثري مع انو هُمَّ كلشي ما مستفادين منّه !! من ينزل بالشارع كلهم يلتمون عليه وياخذون ويّاه صور !! ومن ينزّل بوست بحسابه تجيه ملايين التفاعلات !! هوَ يعتقد الناس يلتمون عليه ويصورون ويّاه، لأَنّهم يحبّونه !! اعتقاده خطأ، وسبب التفاف الناس حوله هوَ هذا : مرّة شخص سأل الإِمام الصادق (ع) وگلّه : (ما بالُنا نحب الأَثرياء ؟ الإِمام گلّه : لأَنَّ معشوقكم عندهم). يقصد بمعشوقكم أَي (الفلوس).. فالناس ما تحب الثري لذاته، وإِنّما تحب أَمواله !! وكذلك ما يحبّون المشهور لذاته، وإِنّما يحبّون شُهرته. _ علي حسن هاشم

🟢 حقيقة كرة القدم ؟ سابقًا الناس چانوا من يشوفون حاكم الدولة يسرق أَو يظلم، يسوّون ثورة عليه ويسقطونه، إِلى أَن هذا الحاكم سوّالهم سيرك، فالتهوا بي عنّه، وصار يسرق ويظلم براحته، والشعب خامل وملتهي بالسيرك !!! حُكّام اليوم يستخدمون كرة القدم لإِلهاء الناس عن فسادهم وتقصيرهم !! فسوّوا الطوبة أَشهر رياضة بالعالم مع تفاهتها، حتّى الناس تنشغل بيها وتغض الطرف عنهم، يصرفون للاعب ملايين الدولارات !!! وهوَ ما يسوى قشّة، بينما المُعلّم الي كاد أَن يكون رسولاً ما لاگيله وظيفة أَصلاً !!! الإِسرائيليين صوّتوا على إِعدام (٩٠٠٠) مسلم بريء، والمسلمين يفكرون أَي فريق راح يتأهل لكأس العالم !! وبالأَخير نجحوا الحُكّام بتجهيل الشعب وإِطفاء روح الثورة بي. _ علي حسن هاشم

🟠 دين العجائز ؟ اكو رجل جاب لزوجته سمچة چبيرة، فهيَّ گطعت راسها وذيلها يلّه طبختها، واستمرّت زوجته على هذا المنوال، إِلى أَن سألها زوجها عن السبب ؟ فگالتله : أَبويه من يجيبلنا سمچ، الوالدة چانت تگطع راسها وذيلها يلّه تطبخها، زوجها خابر بيبيتها، وسألها عن السبب ؟ گالتله : الطاوة مالتي چانت صغيّرة، لذلك چنت أَگطع راسها وذيلها حتّى تكفّي السمچة بيها !! وبنتها و حفيدتها متّخذات من فعلها العبثي قاعدة ويمشن عليها بلا فهم !! الخُلاصة : أُمّهاتنا أَغلبهن هيچ، يگولن إِذا انگلب مي بالگاع، فهوَ بشارة خير !! والبومة مشؤومة ! وحكّة الايد رزق ! وحمّل أَجمال من هاي التُرّهات التي لا أَصل لها. _ علي حسن هاشم

لحظة إِدراك : العرب عدهم مقولة مشهورة، تگول : (خُذ الحكمة من أَفواه المجانين)، صراحةً اني أَبد ما مقتنع بهاي المقولة، لأَن فاقد الشيء لا يعطيه، والمجنون فاقد للعقل الي هوَ مصدر الحكمة، فمستحيل أَن يصدر منّه شيء حكيم، واكو مَثَل ثاني هم مشهور، يگول : (أَسئل في دينك حتّى يُقال عنك مجنون)، فإِذا نخلّي المقولة هيَ والمَثَل بالخلّاط، راح يطلع النا الناتج : ما ناخذ الحكمة من المجانين الي فقدوا عقولهم !! لا وإِنّما ناخذها من الأَشخاص الي سألوا عن دينهم هواي، لدرجة انو الناس صاروا يسمّوهم بالمجانين. _ علي حسن هاشم

🔵 فتنة الدجال (الهولوغرام) ؟ الهولوغرام هي تقنيّة شُعاعيّة مُتطوّرة، تگدر تعرض بالجو أَي مُجسّم على وجه الأَرض، وبصورة وصوت واقعيّين إِلى حد الجنون !! مثلاً : هاي التقنيّة تگدر تصوّرلنا السماء وهي تنشق، وتنزل منها مخلوقات فضائيّة، بمشهد ثلاثي الأَبعاد (واقعي)، فتخيلّوا انو الدجّال وأَتباعه يستخدمون هاي التقنيّة، ويصوّرولنا ملك ينزل من السماء، في ليلة 23 رمضان، وينادي (إِنَّ الحق مع إِسرائيل)، أَو يصوّرولنا السيّد المسيح (ع) ينزل من السماء، ويأمرنا بإِتّباع جبهة الباطل !! ناهيكم عن خدعة إِحياء الموتى، ونزول المطر، ذنّي الخوارق راح يجرفن ملايين الناس البُسطاء !! لذلك ايلون ماسك گال: (ال AI أَخطر من السلاح النووي)، وهذا بمثابة نقطة ببحر من شعوذتهم. _ علي حسن هاشم

وداعًا يا مُرشدنا.. شگد چنت أتمنّى لقاءك حتّى ولو بمقدار طرفة عين، لكن أخذتك الأسنّة.. السيّد علي الخامنئي شهيدًا على طريق القُدس. 2026/3/1 💔

🔴 الإِسلام ما بي فائدة ؟ فئة من الناس تگول : الإِسلام عديم الفائدة، الصين ما عدها إِسلام وشوفوا وين وصلت بالتقدّم !! وأَنتم عدكم إِسلام، بس مُتخلّفين ؟ الجواب : منو گال انو هدف الإِسلام الأَساس هوَ إِعمار البُلدان، الإِعمار من مَهام الفيزيائيّين لا الإِسلاميّين !! وإِنّما الإِسلام اجه حتّى ينطي للإِنسان شيء أَغلى من المال.. والدليل : اكو شخص اسمه (Andrew Tate)، من أَثرى أَثرياء العالم، يمتلك 3.5 مليار دولار، المهم هذا الشخص الثري بيوم من الأَيام گال : (أَنا امتلك طائرة خاصّة، ويخت، وناطحات سحاب، لكن ما زلت أَشعر بفراغ في داخلي)،! فالإِسلام اجه حتّى يملأ هذا الفراغ الي موجود بداخلنا، بعد عجز مليارات الصين عن ملأه. _ علي حسن هاشم

🟡 ليش الحامل تتوحم (تتنسى) ؟ مرّات أَگول : عود ليش المرأة بفترة الحمل مالتها، تصير تشتهي أَكلات مُعيّنة ؟ الجواب : الطب يگول اكو غشاء عاقل يفصل بين دم الأُم وجنينها، اسمه المَشيمة، ياخذ الأُكسجين من دم الأُم، ويخلّيه في دم الجنين، وياخذ السُكّر من دم الأُم، ويخلّيه بدم الجنين، ويستمر هكذا، فالجنين إِذا احتاج مثلاً إِلى كالسيوم، وطعام الأُم ما بيه كالسيوم، هذا الغشاء العاقل، راح يخلّي الأُم تشتهي طعام بي كالسيوم !! فتصير الأُم تشتهي الأَكلة الي احتاجها جنينها، حتّى لو چانت ما تحبها بالواقع، وهذا من مصاديق قوله تعالى : {سَنُرِيهِمْ آياتِنا فِي الْآفاقِ وَ فِي أَنْفُسِهِمْ}. _ الإِعجاز العلمي

🟣 هل الله عدم ؟ الملحدين يگولون : الله ما اله مكان، والعدم هم ما اله مكان، الله ما اله زمان، والعدم هم ما اله زمان !! الله ليس كمثله شيء، والعدم ليس كمثله شيء، إِذًا الله هو عدم، الجواب : الكلام بي مغالطة، والدليل : لو قلنا انو الملحد يشرب الماء، والحمار هم يشرب الماء، الملحد يتنفّس، والحمار هم يتنفّس، الملحد يأكل، والحمار هم يأكل، إِذًا الملحد هو حمار !! لكن احنا ما لازم نقيس على التشابه، بل على الاختلاف !! مثلاً : الله يخلق، والعدم ما يخلق، إِذًا الله مو عدم !! والملحد عنده عقل، بينما الحمار ما عنده عقل، إِذًا الملحد ليس حمار. _ علي حسن هاشم

🟢 الإِمام الكاظم ما يرد السلام ؟ مرّات من أَقرأ هذا النص، بزيارة الإِمام الكاظم (ع) : (أَشهدُ أَنّكَ تسمعُ كلامي، وتردُ سلامي)، اكول : لعد ليش من نسلّم عليه، ما نسمع رد السلام !! فالإِمام إِذا يسمع السلام، وما يردّه، فهنا هوَّ يؤثم (حاشاه)، أَمّا إِذا ما يسمع السلام، فشلون احنه نگلّه : (أَشهدُ أَنّكَ تسمعُ كلامي)، ؟؟ الجواب : الإِمام الكاظم (ع) يسمع كلامنا ويرد سلامنا، لكن الخلل يكمن بآذانا !! حجبتها الذنوب عن سماع كلامهم الكريم، فالإِمام من يرد السلام، بس الشخص المُخلص والمُستقيم، يسمع الرد مالته، والدليل : (لو أَنَّ شيعتنا استقاموا، لصافحتهم الملائكة)، تخيلوا احنه إِذا نستقيم، حتّى الملائكة نصافحها، فكيفما بسماع كلام الإِمام، الي هوَّ أَعلى من الملائكة. _ إِستشهاد الإِمام