ڵـ ٱحـمـدّ

أتعرفين ما هو الوطن يا صفية؟ الوطن هو ألا يحدث ذلك كله - غسان كنفاني، عائد إلى حيفا من رواية اسمها "عائد إلى حيفا" للكاتب الفلسطيني غسان كنفاني يصور لحضة موجعه تختصر معاناة الفلسطينين بعد النكبه سنة 1948 أثناء النكبة الاحتلال هجم على مدينة حيفا وسعيد وزوجته صفية اضطرّوا يهاجرون المدينه بسرعة حتى ينجوا بحياتهم وهم طالعين من البيت ما گدروا ياخذون ابنهم الرضيع (خالد) وياهم لأن الرصاص والقنابل جانت تمطر على الشوارع والجنود يسدّون الطرق ظلّ الطفل وحده بالبيت وما يعرفون شصار بيه بعد عشرين سنة يفتح الاحتلال الحدود مؤقتًا فيرجعون سعيد وصفية إلى حيفا حتى يشوفون بيتهم القديم ويتأكدون إذا ابنهم بعده حي يلگون إنو الطفل تربى ويا عائلة يهودية إسرائيلية تبنّته وربّته كابنهم وسمّوه "دوف" وصار شاب يخدم كجندي في الجيش الإسرائيلي الأب (سعيد) والأم (صفية) يشوفون ابنهم لكن ما يعترف بيهم ولا يحس إنه منهم صار يحمل هوية وانتماء آخر وربّما يعتبرهم "أعداء" بهذيج اللحظة سعيد ينكسر ويحس إنه خسر ابنه مرتين مرة لمن تركه مجبرًا ومرة لمن رجع يلكَاه شخص ثاني يحمل السلاح ضده فأثناء هاي الرحلة يشعر سعيد بألم فضيع ندم غضب وانهزام وهنا يلتفت لزوجته ويگول هاي الجملة ومن هاللحظة كَال غسان كنفاني عبارته الشهيرة بشخصية سعيد وهي: أتعرفين ما هو الوطن يا صفية؟ قالت لا اعرف ياسعيد هل تعرفهُ انت قال سعيد: الوطن هو ألا يحدث ذلك كله . هذا الحوار رغم قصره بس كثيف بالمعاني يختصر كل الخراب الي عاشه هاي الجملة مو بس تختصر وجع فلسطين تختصر كل الخراب اللي عاشته الشعوب اللي تأذت من الاحتلال يعني الوطن مو بس مكان تمشي عليه أو تلمسه بيدك الوطن هو المكان اللي ما تسمع بيه صوت دمعة طفل مفقود المكان اللي ما تخاف بي تفقد أحبابك ولا ينهبون هويتك اللي ما يخليك تترك بيتك وتظل تهرب من ظلم وجراح بطرق مختلفه غسان كنفاني ما گال الوطن هو فلسطين ما گال بيتنا القديم ولا مفاتيح نحتفظ بيها غسان ما چان يفسّر معنى الوطن هو جان ينزف معنئ الوطن چان ينوح عليه للاسف لأن عاش فُقده شافه ينسرق وشاف ناسه يموتون وي أهاليهم وتنمسح هويتهم يعني إذا صار كل هذا الخراب؟ فما عاد هذا وطن صار "مكان فارغ" ما يشبهنا بشي هو گال: الوطن هو ألا يحدث ذلك كله الوطن الحقيقي مو بس تبقئ بي الوطن الحقيقي هو الي يبقئ بيك تُـقىٰ خضير . َ

الحمدلله لأن اهلنه ربونه تربية صحيحة وما طلعنه نتمركص بالتيك توك او ننشر التفاهات بباقي البرامج حتى نستجدي اللايك والتعليق علمود نطش، الحمدلله لأن كل اليعرفنه يعرف أخلاقنه وتفكيرنه، ولأن كل الما يعرفنه راح يحبنه ويرتاح ويانه من أول يوم، الحمدلله لأن ما أكلنه مال يتيم، ولا ظلمنه حق أحد، ولا أستغلينه أحد لمصالح شخصية ودونية، ولا جاهرنه بالمعصية ولا أفتخرنه بالخطأ، ألحمدلله لأن ربونا على الطيبة والتسامح والإبتسامة ويه الكل، ولأن علمونه أن الدنيا زائلة وكل مافيها فانٍ، وأنها دار تعب ومشقّة لا راحة واطمئنان، وهلمعرفة خلتنه نصبر ونحمد الله دائمًا على التعب قبل الراحة. الحمدلله على القناعة الي إكتسبناها من أهلنه، على الكرم وعلى مساعدة الناس، على كل كلمة حلوه طلعت من عدنه وراحت لشخص محتاجها، على كل نيّة حقيقية وصادقة إتجاه أشخاص نحبهم ونقدرهم، ألحمدلله لأن طلعت گلوبنه نظيفة، ولأن النفاق والكذب أبعد مايكون عنّا. الحمدلله دائمًا وابدًا. أحمد وسام .

اكو موضوع خطير يمس مجتمعنا وشرفنا اذا اخذناه بمصلحة شخصية ورغبة دنيئة هواي من البنات مدللة ببيتها واهلها مقدريها وما حارميها من شي. على غفلة حياتهم تتغير الأب والأم واحد منهم او ثنينهم يروحون لدار حقهم وتبقى البنيه وحدها، تلكه عدها أخت متزوجة بمشتمل صغير ، او أخ صغير مايعرف وين ينطي وجهه، او ماعدها أخ اصلاً راح تضطر تطلع تدور شغل حتى تعيش واذا ما راح تلكه ويستغلها كل شخص تريد منه شغل ومتشوف الها سند حقيقي راح تضطر كل شي تسوي حتى تعيش، الفقر يفشّل والمستقر بشغله عايش كوه عالراتب وخصوصًا اذا مأجر. فأنتَ كونك حبيبها او زميلها بالدراسة او صديق على الأنترنيت، راح تصير بين خيارين، لو تنقذها من مخالب مصاصي الدماء والانتهازيين الرغبتهم تتلخص بجملة "اخذ وانطيك" لو تعوفها بحال سبيلها ولتشارك بخراب شرف قست عليه الحياة. اكو هواي شباب شرفاء عدهم غيره ويخاف على بنات العالم مثل خواته واكو الينتظر اقل وكعه وظرف سيء تمر بي البنيه حتى يستغلها. الرغبة الغريزية والأنتهاز لحظات وتنتهي بس العمل الصالح تتجازه عنه مو اليوم باجر فكّر بيها صديقي أحمد وسام .

أسوأ انواع العبودية هي تلك التي لا يدرك فيها الإنسان أنهُ عبد - يوهان غوته

أسوأ انواع العبودية هي تلك التي لا يدرك فيها الإنسان أنهُ عبد - يوهان غوته

ب2016 بالليل قبل 7 سنين چنت ويه صديقي بالكرادة داخل، تعشينه من كباب زرزور ودا نمشي بين البسطيات مال هدوم، جان اباله يشتري قميص رصاصي طوخ لأن حبيبته دازتله صورة ممثل هي تحبه، لابس مثل القميص هذا. اني ودامشي وياه وندور، سمعت صوت بجي مال طفل، البچي جان بحركة قلب عالية، بالبداية ماركزت وياه لكن بعدين ركزت وكمت ابحث عن مصدر الصوت من بين البسطيات والشارع المتروس ناس تروح وتجي ومحد مهتم للصوت. بحثت دقيقة لحدما شفت طفل ميتجاوز 5 سنين هدومة مشككة اغلبها ونايم على بطنة على الكاع واديه على عيونه ويبجي سألت ابو البسطية البصفه گتله ليش يبجي، گلي هذا اسمه علي ابوه جان عنده كشك مال چاي هنا، وجان متعلق هوه بأبوه ويحبه حيل، بيوم من الأيام مات ابوه بحادث، وامه تزوجت وتركته وصار مصيرة الشارع، يجمع فلوس من الناس التمشي، واصدقاء ابوه اهل المحلاتت ينطون فلوس من يشوفونه، وبنهاية اليوم يجون اطفال اكبر من عنده ياخذون فلوسه الي جمعها ويكتلوه ويروحون، كل يومية نفس الحال الكلام الگلياه هذا الشخص مو بس أثر بيه، بل ذكرني بنفسي من جنت بعمره، عشت المسؤولية واني بهذا العمر صرت مسؤول عن امي واخوية. رحت على الطفل وكتله كوم، رفض يكوم بالبداية، كتله كوم بصوت أعلى، گلي عوفني عمو كتله ابوك ديباوع عليك .. وقف بجي ورفع راسه من الكاع، گلي ها؟ كتله ديباوع عليك هسه التفت يمنه ويسره ما شاف احد كلي ليش تجذب عليه كتله ديباوع عليك من فوك، ديباوع على أبنه اليحبه والما يريده يبچي ويصير ضعيف، كتلة تريد ابوك يفتخر بيك؟ گلي اي كتله ممنوع تبجي مرة اخرى، وممنوع تخلي أحد ياخذ حقك، ذولة اليجون ياخذون فلوسك المرة الجاية شيل عودة واضربهم على راسهم وكسرهم، اذا ما صارت قوي هسه راح تعيش عمرك كله ضعيف ابوك هنا (أشرت على گلبه) وهنا ( أشرت على السمه) ابوك بكل مكان موجود داير مدايرك، صحيح مايكدر يساعدك لكن بهل اثناء كلي اني رجال ما احتاج للمساعدة كتله عفيه اني اريدك هيج تكول، اريدك تعرف حجم المسؤولية العليك، وتعرف الصح من الخطأ من هذا العمر، ماريدك تعيش ظالم، بس ابد لتعيش مظلوم كتله وين تنام كلي يم جيرانه اصدقاء بابا، انطيته مبلغ كبير من الفلوس وكتله يلا روح للبيت باسني من خدي وكلي شكرًا عمو وراح. قبل يومين جنت ضايج حيل، من اضوج اطلع وحدي دا اتمشى بالكرادة بنفس ذاك الشارع، شفت اطفال هم مبينين مشردين عمرهم 10 سنين ديركضون ، واحد ضرب جتفي بالغلط كتله ليش مستعجل، كلي لازم ننطي فلوس اليوم لأخونه الجبير حتى يصرفهن علينه كتله شسمه اخوكم الجبير كال علي .. ابتسمت هواي .. هواي كلش أحمد وسام .

الإنسان المؤمن من يسوي فاحشة راح يستغفّر، ومعنى الإستغفار طَلَب من الله أن يغفر لَهُ الفاحشة السواها، والمعروف أن الفاحشة تعتبر من أكبر الكبائر، يعني مو ذنب صغير ، لا شي جبير كلش فيطلبون من الله يغفرلهم الخطيئة السووها، ما طالبين ولا رايدين اي شي بالدنيا فقط المغفرة، طبعًا بشرط أنهم ياخذون عهد على نفسهم وعهد مع الله إنهم ما يكررون الفاحشة السووها كما في قولهِ تعالى ( وألذينَ إذا فعَلوا فاحِشَةً أو ظلموا أنفسَهم ذكروا الله فأستغفروا لذنوبِهم ومَن يغفرُ الذنوبَ إلا الله ولَن يصِّروا على ما فعلوا وهُم يعلمون ) الله سبحانه شنو رده على طلبهم هذا ؟ قالَ تعالى ( أولئك جزاؤهم مغفرةٌ مِن رَبِّهم ) يعني لكم ما طلبتم ، مو سويتوا فواحش وقررتوا تتوبون وتطلبون المغفرة ؟ راح اقبل طلبكم وأجازيكم بالمغفرة التردوها. وبس ؟ هذا هو ؟ طبعًا لا وره ما غفرلهم شنو يرجع يگللهم الله سبحانهُ وتعالى ؟ (( وجناتٌ تَجري من تحتها الأنهار خالدين فيها، ونِعمَ أجرُ العاملين )) ما إكتفى بالمغفرة فقط، بل غفرلهم ورزقهم جنات تجري من تحتها الأنهار. وهذا أجر المستغفر وأجر اليطلب من الله التوبة بعدما سوى الفاحشة. هسه عرفت شنو يعني قولَهُ تعالى ( ورحمَتي وسعَت كُلَّ شيءٍ) !!!! لا والله فلا تعرف ،، لأن ماكو عقل بشري يكدر يستوعب حجم رحمة الله علينا. أحمد وسام .

حاليًا الاقارب مستعدين يبيعون كلشي حتى يشترون الرمز السري والرقم الامتحاني مال طالب السادس

مشتاق لأيام قبل، لجو قبل، لناس قبل، لتفاصيل قبل، من چنه أطفال ماعدنا مسؤوليات وإلتزامات، لساعني أتذكر أول يوم داومت بي بالأول ابتدائي، جنت من النوع النحس (أول سبوع) ولازم الوالدة طول الدوام كاعدة بالإدارة تنتظرني، وكلما يدك الجرص بالفرصه اروح اتأكد من وجودها، بس بعدين لا صرت وكح وترأست عصابة وكل يومية نهجم على شعبة (ب) الي جانت بقيادة الخصم حسوني النايم، وليش لقبه النايم لأن جان ينام بالصف وبس بوقت الفرصه يكعد يتعارك ويرجع ينام، هاي دورة حياته بالمدرسة، مشتاق من چنت اركض لأبو الحانوت اول ميدگ الجرص وياهو الأسرع يلزم الشباچ، جنت اشتري كل يومية لنبأ چبس وشربت لان جانت حالتهم فقيره، مانعرف بوقتها شنو يعني بنيه وولد وشنو سنه وشيعة وشنو مسلم ومسيحي، چنه گلب على گلب وايد على ايد، اتذكر من فاز العراق بكأس اسيا ب٢٠٠٧ وشلون الناس طلعت بالشوارع تركص، هذا الحضن جيرانه الجان متعارك وياه البارحة وهذا السجد بنص الشارع، وبالصيف لساعني اتذكر جديتي الله يرحمها تصعدني للسطح وتنام يم جدو، جانت تربط رجلي برجلها بشال خاف من انام اتحرَك واروح ليغاد، والأحلى من تصيحني ام علي "حمودي جيبلي ببسي وكيك من ابو يونس لان اجونا خطار" هنا تحس نفسك سبايدرمان المنقذ واروح ركض للمحل اجيبهن واجي، وأحلى انتظار جان من انتظر علاوي يجيبلي اقراص مال پلي ١ ومال حاسبة من السوگ، ويجي محمد ستار بالليل اسحله بالطوبه، ومن جانت تمطر وتصير كراگيع ومنكدر نروح نشتري من ابو غزوان لان شويه بعيد، فنضطر .. نضطر نشتري من محل ام علاء رغم بضاعتها الرديئة ههههه وجان عدنا يوم عيد من يگللنا جدو تحضروا باجر نروح لبغداد، ابقى كاعد للصبح وحاط الحذاء والملابس بصفي ع جرباية، بالضبط نفس ماسوي من يجي العيد، جان بيتنا قِبلة الأقارب، كلهم يجون الصبح، فچنت مليونير مال ارباعه بوقتها، لو من چنه نلعب دعابل بالفرع واليخسر يبوگهن ويركض، لو برمضان من نلعب ختيلان بالليل ونجمع فلوس ونشتري بقلاوه وبالسحور نلعب محيبس ونزاغل بي، لو من چنه نلعب طوبه ونخلي العوارض مال الگول نعالات، والسمين ابو خدود الورديه يصد گولجي، اني جنت رئيس الفريق كالعادة، ماتذكر بيوم جنت شخص عادي، ألا رئيس فلان شي، كم انتَ عظيم يا ابن وسام. مشتاق من جانت ست سناء تكتبلي احسنت يا وردة الصف، جان خطي كلش حلو ومره كتبتلي بوركت يا خطاط المدرسة، لو من اخذ ١٠٠ بالعلوم وارجع ركض على امي وبس افتح الباب اصيّح ولچ فاطمة اخذت مييييييييييه بالعلوووووووم مع انهُ جنت ممتاز وكله درجات كاملة بس العلوم اكرهه فالمية جانت حدث قومي يجب الإحتفال بهِ ... لو من أشتريت أول بايسكل بحياتي، جنت اخاف عليه لدرجة اول يومين اني اشيله وامشي ما اصعد عليه 😂 لو من تمطر قوي واكعد بسيارتنا، جانت برازيلي أصيلة، ذاك من ذاك العنده برازيلي واجيب المسجل واحط كاسيتات مال كاظم الساهر وبالتحديد انا وليلى ومن يخلص المطر اطلع استنشق الهوى وناخذ ماسحات ونصعد للسطح نذب المَي من المزريب. مشتاق من ياخذني جدي للگهوه ويگول لابو الكهوه طك لحمودي بطل ببسي، ويقصد بكلمة طك يعني افتحله ببسي, بس شلون ببسي جان، ذاك ابو الگزاز تحسه ابن اوادم. مشتاق لحنيّة قبل، لجيران قبل، لمواقف قبل، لأصدقاء قبل الي غيرتهم الحياة والي بعدهم ممتغيرين، مشتاق لكلشي قديم. شكد اتمنى تنعاد ولو لحظة من اللحظات الذكرتهن .. وشكد اتمنى كل الذكرتهم بخير وصحة وعافية، أحبهم . أحمد وسام .

بوست تلخيصي سريع للأحداث الأخيرة: - أسوء شيء صار بتأريخ العراق كلّه هو قتل العائلة الحاكمة يوم 13/تموز/1958 ، واستيلاء عبد اللا كريم قاسم على السلطة في بغداد، وهذا الحدث ندفع ثَمنهُ حتى اليوم. - الفتنة نائمة، لعن الله كل رادود محسوب على القضية الحُسينية وهو يُحاول إيقاظ الفتنة من جديد، وحشرهم مع أعداء محمد وآل محمد، فالدين الإسلامي الشيعي بريء من هيج وجوه زفره وناس ولد شوارع وصخين ميعرفون يحجون كلمتين ويسموها قصيدة حسينية وكم ملطلط ينشرها ويسويها ترند. - ست 🌧️ : امريكا مو بالها عبايتج عيني، امريكا ما تكدر تمحي دين او طائفة بأي بلد، فأستقري واتركي غطاء الدين وبحجة العباية تسوين من نفسج ترند علمود ترشحيلج للإنتخابات ، وها شويه خففي مكياج حتى نصدّك بإيمانج وكلاواتج ع اقل. - ملف الكهرباء بالعراق ما راح ينحل موضوعها ابد، وحنبقى كل سنة بالصيف نلعن الحكومة، بكل بساطة إحنه ماعدنا دولة، ماعدنا ناس حقيقية تحكمنا ونثق بيها ونؤمن بقدراتها، مجرد همج رُعاع ولد زنى جايبيهم من دول الخارج وحاطيهم بالحكومة، اجنداتهم ومصالحهم لكل الدول ماعدا العراق، فلا تتأملون عبثًا. وبالمناسبة ( كلش نستحق وحيل بينه) أحمد وسام .

اول عام من نزل ايفون 13 الجديد اشتريته، اني مو من ذولة الاشخاص اليدورون اي شي ترند وجديد، لكن مبايلي السابق جان يعلگ فأضطريت أغيره، وإشتريت وياه سماعات آيربود الجديدة، مثلي مثل اي شخص مشتري حاجة ثمينة بالبداية يبقى يحافظ عليها ويشتريلها گفر يخاف عليها من الخدش ويلزمها بأيده زين خاف توكع وتنكسر، وهذا الشي السويته ويا هلشغلتين الاشتريتهن. يوم من الأيام جنت ويه صديقي دا العب منضدة، حاط الآيربود بأذني وداسمع شغلات حماسية، فمن دا العب صارت حركة سريعة مني خلت وحده من السماعات توكع من اذني، اني بساع رحت شلتها من الكاع وفحصتها، لكيتها تشتغل الحمدلله، ومابيها اي خدش، ولمت نفسي لأن جنت لابسها والعب لعبة تطلّب حركة سريعة، وكلت لو نكسرت هسه شلون راح اسمع بالليل. ورة فترة جنت دا اغسل سيارتنا ومنطرب ويا ام كلثوم، جان توكع وحده من السماعات بالسطل مال مي، كلبي عصرني عليها، طلعتها وكمت اهفي بداخلها حتى ما يطب المي لجوه بلكي تنشف بساع، مادري شجنت اسوي بوقتها، وره شويه اشتغلت لكن بيها وشوشة، بيها صوت مو مثل الصوت السابق، هواي ضجت وكلت خلص عطلت، وبقيت اجلد بالذات لأن هملتها هيج، وتمنيت لو يرجع الوقت جان ابطل رعونية وما استخدمها من اسوي حركة او اشتغل بشي لأن احتمال اخسرها. تركتها وشغلتها ثاني يوم، لكيتها رجعت طبيعية نفس صوت قبل! فرحت وكلت خلص هاي ماتريد تتركني، يمكن الله كاتبلها تصير سماعتي الوحيدة. رحت بحثت ولكيت انها ضد المي وتتحمل السقوط على الأرض وضد الخدش كذلك ذني المعلومتين ماجنت ادري بيهن، لذلك جنت خايف عليها بس من دريت بيهن، استهرت كلش وكمت عادي اسبح واشغلها، وعادي توكع مني من العب منضدة ومن اشيلها ما اباوع عليها واشوف شصار ماصار، مباشرةً اخليها بإذني وترجع تشتغل غصبًا عليها، راح واهسي بيها لأن عرفت هيه ماتكدر بدوني، ولأن عرفت هيه صعب تعطّل بيوم. الآيربود هو نفسه هذا الإنسان اليحبك من كل گلبه، هو نفسه المتحمل هفواتك واخطاءك ورعونيتك، هو نفسه الجان منبهر بيك بالبداية، الجان حاس بإمانك المُزيف، وراسم وياك مستقبل وردي، بس انت شسويت؟ من دريت بي مايكدر بدونك، كمت عادي تتجاهلة وعادي ما تهتمله، لان تدري شما جفصت ببطنه بكلمتين تقشمره ويرجع وياك، وانت مسوي بيها سر الحياة وسر الكون، وعبالك هو غبي وفقير وطيّب الگلب ويتقشمر بحجايتين، هو متربي وأصيل ومايدور غاية ومصلحة وياك، هو مو بوجهين مثلك، هو صادق ويه نفسه وويه ربه لا تحس ابدًا انتَ إنتصرت عليه بيوم من الايام لأنكَ مشوه وهو نقيّ لأنك راح تعطل بيوم من الأيام وراح يبقى مشتغل هوّ مثل الايربود. أحمد وسام .

الأم..

تربطني علاقة بعائلة عدهم ولد اثنين اخوان، واحد اسمة يوسف الجبير والصغير اسمه حسن، يوسف يحب وحدة عندة علاقة بيها قديمة راد يتزوجها، اجوي اهل یوسف شافوا البنية ماقبلوا بيها، كالوا هاي شخصيتها قوية وانت گلبك طيب واحتمال تفرض سيطرتها عليك، والشغلة الثانية هي تشتغل ماراح تحتاجك فد يوم وتقدر تعبك عليها، وهيج وحدة اذا ضربتها كبل تهددك وتطلب الطلاق، باوع عليهم يوسف وضحكء، كلهم شكو بيها اذا شخصيتها قوية هذا الشي ايجابي ينعكس على تربيتها للاطفال وتعلمهم الحياة بواقعية بصغرهم حتى من يكبرون ماینصدمون بشي، وعالشغل خل تشتغل ماطول تعرف حقوقها وواجباتها بالبيت ماراح امنعها ابد، ثالث شي الغلط وارد بأي علاقة تصير مادام احنه متفاهمين بيناتنا شراح يدخل الضرب والاسلوب الهمجي بالموضوع ؟ المهم يوسف أصر يتزوج البنية رغم عناد اهله بس بقى على كلمتة واتزوجها وراها بفترة اخوه الصغير حسن اتزوج وحدة كلش فقيرة، سلوكها جان مناسب لاهله قبل لاتناسبه هو، وره فترة ظلوا يعيرون يوسف على زواجة، يكلولة شوف اخوك الصغير اخذ وحده مثلنا ونفس ثوبنا لاتحجي ولاتطلع كاعدة بالبيت وساكتة مهتمه بس بزوجها الشغلة كبرت صار يوسف مايحجي ويه حسن والعكس من وره هالموضوع. شاء القدر خلص عقد يوسف بالشغل وانسدت الشركة، بقه شهرين كاعد بدون عمل، اضطر يبيع سيارتة حتى يصرف عالبيت، تالي الواقع اتغلب على الظروف العايشها صاحبنه، كعد ويه مرتة كلها اسمعي بنت الحلال، الحياة الوعدتج عليها مااكدر انفذها، اذا تريدين تتطلكين ماعندي مانع وكل المصاريف وحقوقج تاخذيهن اول ماارجع اشتغل ولكن رفضت زوجتة وحجت عليه وبقت تكثف ساعات عملها وبدون مايدري باعت سيارتها وحطتله رصيد ضخم بالبنك، وقدمتله على تعيين وانقبل بظرف سنة رجعت حياة يوسف وزوجتة مثل قبل، اخذلها سيارة احلى من مالتها القديمة، وحط بحسابها ضعف المبلغ الساعدته قبل بي وره ايام معدودة خابروا اهل یوسف کلوله تعال احجي ويه زوجة حسن تريد تتطلك بلكت تقتنع ، راح يوسف حجه وياها كلها ليش تريدين تعوفي ؟ كلتله راتبه ميكفي! الحاصل مو دائما وجهة نظر اهلك تطلع صحيحة ولازم تقتنع بيها، ومو كل الشغلات التربينا عليها تطلع صح، بهالزمن لازم انت تختار وتقيم الشخصية، شوفها تناسبك، شوف نفسك انت مناسبلها ! هل انسان تحبه وتريده فعلًا وهو يبادلك نفس الشعور؟ لتخلي أي شخص يفرض رأيه عليك حتى لو جان عزيز، ولتقيم مصلحة غيرك لان عقلك متخذ قرار ولازم تنفذه، شكد عالم بالواقع تتوقعهم ميحبوك بس بالشدات اول الناس يوكفولك! أحمد وسام .

نُعزّي من قالَ "حُسينٌ مني وأنا من حُسين، أحبَ الله من أحبَ حُسيناه" نُعزّي نَبينا وشفيعنا في الدُنيا والآخرة محمد صلّ الله عليهِ وآلهِ وسَلَّم بفاجعة إستشهاد حفيدهِ، رويّ في الكثير من الروايات السُنية منها والشيعية أن النبي صلّ الله عليهِ وآلهِ وسلَّم كانَ إذا سَمع بُكاء الحسين وهو طفل، يتفطَّرُ قلبَهُ من الألمِ والحُزنِ، فكيفَ حال رسول الله اليوم ؟ بأيِّ شعورٍ قَد شَعَرَ وهو يَرى ريحانتهِ وسيّد شباب أهل الجنة يتقطَع على يدِ الكُفرِ والشرك؟ بأبي أنتَ وأمي يا رسول الله لقد عظمت الرزية، وجلَّت المصيبةُ بكَ علينا وعلى جميعِ أهل الاسلام، وجلَّت وعظُمَت مصيبتك في السماوات على جميع أهل السماواتِ، ونُعزي بضعةِ رسول الله ونَفسَهُ التي بينَّ جَنبيهِ، المعصومة فاطمةَ الزهراءِ عليها أفضل الصلاةِ والسَلام، ما حالَها وهيّ تسَمعُ إبنها يُنادي من الأرضِ - هَل من ناصرٍ ينصُرني - ؟ واللهُ إنَهُ لم يَكن دعاء إستغاثة، بل هوَ دعاءُ رَحمةٍ للمشركين، أراد الإمام الحُسين في آخر لحظاتِ حياتهِ أن يَشفع للعدوِ فنادى ذلك النداء الأخير، لعلَّهم يَهتدونَ ويدركونَ فاجعتهم، لكنَهم فضَّلوا الذُلَ والعارَ أبدَ الآبدين. نُعزّي أهل البيتِ أجمعين عليهم الصلاةِ والسَلام، والمراجع والموالين الحقيقين، نُعزّي دينَ رسولِ الله القائم الى الآن بفضلِ هذا اليوم المُبارَك. ونُعزّي أنفُسُنا بهذا المُصاب الأليم، ونعهدُ اللهَ ورسولَهُ وأمير المؤمنين بأنّنا ماضونَ على نَهجِ الإمام الحُسينِ بنَ عليّ عليهِ السلام " ثورَةً وفِكرَة وإيمان" ألا لعنةِ اللهِ على الظالمين ولا حولَ ولا قوةَ إلا بالله العليّ العظيم. أحمَد وسام .

لم يأتِ الشعر الفصيح بكافة شعراءه وأصنافه وحُقَبه الزمنية ببيت شعري يقول: ليل الموادع أريده كون ما يطلع صباحه هيه بس هالليلة عندي باجر يجينه بجراحه ..

أغدًا يستَشهدُ الحُسين ؟ في الحقيقة الموت هو إنتهاء الحياة، ولا أعتقد بأن هذهِ الصفة - إنتهاء الحياة - يتصفُ بها الإمام الحُسين بن علي عليهِ السلام، أكادُ أجزم بأن تلكَ الصرخة التي نادى بها الإمام - فيا سيوفُ خذيني - سيبقى صداها يرنُ أبدَ الدهرِ، وهذا الصَدى يتمثلُ بالموالين الحقيقين، يتمثلُ بأجيالٍ وأجيال من الأطفال الذَين تشّبَعَ الحُسين بداخلهِم منذُ الصغر، فالحسين الآن عادة مجتمعية قائمة على الإيمان والشجاعة، على رفض الظلم، على الكَرمِ والعطاء الوفير، على المسامحة والعفوّ، على الإلتزامِ بدينِ نبي الله محمد صلّ الله عليهِ وآلهِ وسلَّم، أن صدى صرخة الحسين باقٍ لأنهُ أمرٌ إلهيٌ بحت، ولأن الذي يحدَثُ كل سنَّةٍ ليسَت من تدابير البشر، فما الموتُ الذي لامسَ الحُسين ؟ أهوَ إنتهاءُ فِكرةٍ ؟ لَم ولَن تنتهي فكرة الحسين وثورَتهِ، أهوَ إنتهاءُ عَهدٍ ؟ كل الأزمان وكل الأمكان تصرخُ بإسمهِ، أهوَ إنتهاءُ جَسَدٍ ؟ كُلّ الملايين تأتي زاحفةً على قبرهِ الشريف. أنَ الموتَ الذي لاحَ الإمام، أبقاهُ حيًا الى الأبدِ. احمَد وسام .

ظاهرة إنتشار المواكب الحسينية للأطفال في الأحياء السكنية ، هيّ من أروع وأجمل ظواهر شهر محرم الحَرام، فهؤلاء الأطفال الصغار لا يُقدمون الطعام والشراب الى الحسين فقط، بل يُروضون أنفسهم منذُ الصغر على فكرة الكَرمِ والعَطاء للمقابل، فما أزهد المُعطي في سبيل الله وما أخلَصَهُ إيمانًا! عَجِبتُ من قدسية ورسالة الإمام الحسين عليهِ السلام، حتى في الخدمة لأجلهِ، هُنالِكَ دروس وحِكَم للأطفال. السَلامُ على سفينة النجاة.

اكبر خطأ تسوي بحياتك من تستحي وتتردد ومتعرف تحجي عن نفسك وتخلي غيرك هو يقيمك وانت تتصور راح ينصفك وينطيك حقك. الناس تحكم عليك من خلال عقدها النفسية ومشاكلها ومزاجها اليومي ، من خلال غيرتها وحقدها وثقافتها المحدودة الحد ماتشوف نفسك واكف بمنطقة رمادية ماعندك قدرة تكول انت اكبر من هالشي وبنفس الوكت مامقتنع بالمكان الحطوك بي ، فتبدي بمرحلة من الصراع وجلد الذات بتحطيم كل شي وترجع لنقطة الصفر من جديد. الإمام عَلي "عليه السَلام" يكول لاتدع جهل الناس يغلب علمَك بنفسَك. جمعة مباركة أحمد وسام .