زْرمبش بلوچی | 🎙ZBC

تمپ ءُ ھاران ءَ پوج ءُ ایم آئی ءِ سر ءَ اُرش کنگ بوتگ آدینگ، 14 اگست 2026، زرمبش بلوچی تمپ ءِ ھند گومازی ءَ سلاہ بندیں مردماں پاکستانی پوج ءِ بنجل ءِ سر ءَ اُرش کنگ بوتگ اھوالکار ءِ رد ءَ سلاہ بندیں مرچی شپ ءِ ادار ھشت ءُ نیم ءَ شھید سرمچار کپٹن جھانگیر ءِ گس ءَ برجاھیں چوکی ءِ سر ءَ گوں راکٹ ءُ آدگہ ٹوھیں سلاھاں اُرش کرتگ۔ اُرش ءِ آسر ءَ پوج ءِ جانی تاوان ءِ ھال اِنت۔ ھمے وڑ ءَ ھاران ءَ سلاہ بندیں مردماں ایپ سی ءِ ھیڈکوارٹر ءُ ایم آئی کارگس ءِ سر ءَ اُرش کرتگ۔ اھوالکار ءِ رد ءَ سلاہ بندیں مردماں مرچی شپ ءِ ھپت ءَ ایپ سی ءِ ھیڈکواٹر ءُ شپ ءِ ھشت ءِ نزیک ءَ سلاہ بندیں مردماں ایم آئی ءِ کارگس ءِ سر ءَ اُرش کرتگ۔ اُرش ءِ آسر ءَ کارمندانی جانی تاوان ءِ ھال اِنت۔ اے کاروائیانی زمہ واری انگت ھچ گل ءَ نہ زرتگ۔

دوریں کشکے رواں شائر: دیدگ کمار توار: مھروان گومازی https://youtu.be/cgZCudXdKiQ

زرمبش ٹی وی ءِ ھال\ آدینگ، 14 اگست 2026 https://youtu.be/yNsoiRZKkgA?is=BM5VaLJFYM8AVC42

تمپ ءَ زور بیگواھیں ورنایے آجو بوتگ آدینگ، 14 اگست 2026 زرمبش بلوچی https://zrumbesh.com/22769/ کیچ ءِ ھند تمپ ءَ چہ پاکستانی پوج ءِ چیریں آزار جاھاں زور بیگواھیں کمبر بلوچ آجو بوتگ۔ زرمبش جھگیر ءِ رد ءَ کمبر بلوچ ء ماسٹر ابدلکادر پنچ ءُ شش مئی 2026 ءِ شپ ءَ پاکستانی پوج ءَ چہ تمپ ءِ میتگ دازن ءَ گس ءَ آوار جتگ ءُ بیگواہ کرتگ۔ سے ماہ ءَ گیش ءِ زوریں بیگواھی ءَ پد زی آجو بوتگ ءُ وتی گس ءَ سر بوتگ۔ بنشون: ھوالکار اکس: اھوالکار #ZrumbeshTV #BreakingNews #MiddleEast #BalochistanCrisis #Baloch #Balochistan #ZBC #BalochMedia #Zrumbesh

پنجاپ ءَ گیس پائپ لائن ءِ تباہ کنگ ءِ زمہ واری بی آر جی ءَ من اِتگ آدینگ، 14 اگست 2026 زرمبش بلوچی https://zrumbesh.com/22767/ بلوچ ریپبلکن گارڈز ءِ جارکش دوستین بلوچ ءَ وتی درشان ءَ گوشتگ کہ سرمچاراں دوشی پنجاپ ءِ ھند روجھان ءَ میر ھزار ءَ چہ سوئی ءَ پنجاپ ءَ روکیں 36 انچ ءِ گیس پائپ لائن گوں تراکناکیں شورھاں تباہ کرتگ۔ دوستین بلوچ ءَ درشان ءِ گڈی ءَ اُرش ءِ زمہ واری من اِتگ ءُ گوشتگ کہ مئے اے وڑیں کاروائی داں بلوچستان ءِ آجوئی ءَ برجاہ بنت۔ بنشون: درشان اکس: زرمبش #ZrumbeshTV #BreakingNews #MiddleEast #BalochistanCrisis #Baloch #Balochistan #ZBC #BalochMedia #Zrumbesh

راجی آجوئی ءِ راہ ءَ شھید بوتگیں گرانکدریں سیاسی رھشون رزا جھانگیر ءُ امداد بجیر ءَ ستک شانی ندر کن ایں۔ بی ایس او آزاد آدینگ، 14 اگست 2026 زرمبش بلوچی https://zrumbesh.com/22765/ بلوچ اسٹوڈنٹس آرگنائزیشن آزاد ءِ جارکش شولان بلوچ ءَ وتی درشان ءَ گوشتگ کہ بلوچستان ءِ راجی گوستانک چہ اے وڑیں گرانکدریں پسگانی دیمونیاں سریچ اِنت کہ آیاں پہ راجی آجوئی ءَ جھد ءِ میان ءَ وتی جان ندر کرتگ اَنت، وتی زندگی ءِدرسیں واھشت پہ راجی آجوئی ءَ ببا داتگ ءُ داں گڈی دم ءَ جھد کنوکیں ھمے گرانکدریں پسگانی بروسر اِنت کہ مرچی چہ ایشی ءَ مئے سر نہ ایوک ءَ پہ پھرے چست اِنت بلکیں آجوئی جھد دیم پہ وتی منزل ءَ جنزگ ءَ اِنت۔ آئی ءَ گوشتگ کہ ھمے گرانکدریں پسگانی تہ ءَ بی ایس او آزاد ءِ بنجاھی کارگشاد شھید رزا جھانگیر ءُ بی این ایم ءِ دمگی رھشون شھید امدام بجیر بلوچ راجی زرمبشت ءِ ھما گرانکدریں سروک اَنت کہ آیاں پہ راجی آجوئی ءَ وتءَ شھید کرتگ ءُ پہ مدامی بلوچ راجی گوستانک ءَ ابدمان اَنت۔ شولان بلوچ ءَگوشتگ کہ 14 اگست بلوچ راجی گوستانک ءِ ھما سیاھیں روچ ءِ ھساب ءَ یاد کنگ بیت ، وھدے کہ شھید رزا جھانگیر مکران ءَ گل ءِ ترءُ گردے ءَ بیت، 14 اگست 2013 ءَ زورگریں ریاست شھید امام بجیر ءِ گس ءَ زوراکی بندات کنت ءُ ھمے سیاسی رھشوناں شھید کنت۔ یکبرے پد ءَ زورگر چہ وتی زوراکیاں ھمے سیاھیں روچ ءَ بلوچ راجی گوستانک ءَ نوک کنت۔ آئی ءَ گوشتگ کہ راجی آجوئی راہ ءَ شھید بوتگیں گرانکدریں سیاسی رھشون رزا جھانگیر ءُ امداد بجیر ءَ ستک شانی ندر کن ایں کہ آیاں سیاسی پڑا گوں تمردی ءَ زورگر ءِ دیم پہ دیمی کرتگ ءُ وت ءَ راج ءِ تہ ءَ داشتگ ءُ آجوئیءِ ڈیوا بالینتگ ءُ داں گڈی ءَ دم ءَ بلوچ راجی آجوئی جھد مھکم داشتگ ءُ شھید بوتگ اَنت۔ شولان بلوچ ءَ گوشتگ کہ زورگر ءَ بی ایس او آزاد ءِ بنجاھی کارگشاد شھید کرتگ ءُ مئے نزور کنگ ءِ کوشست کرتگ، بلے بی ایس او آزاد ءَ ھوار بلوچ راجی زرمبشت گیشتر مھکم بوتگ ءُ آجوئی جھد ءَ دیم پہ آجوئی ءِ منزل ءَ برگ ءَ اِنت۔ بنشون: درشان اکس: مونوگرام #ZrumbeshTV #BreakingNews #MiddleEast #BalochistanCrisis #Baloch #Balochistan #ZBC #BalochMedia #Zrumbesh

مشکے ءَ پوج ءِ سر ءَ سرمچارانی ارش آدینگ، 14 اگست 2026، زرمبش بلوچی آواران ءِ ھند مشکے ءَ بلوچ سرمچاراں پاکستانی پوج ءِ سر ءَ ارش کرتگ۔ زرمبش جھگیر ءِ رد ءَ سرمچاراں مرچی سھب ءَ مشکے ءِ میتگ داھرہ ءَ پوج ءِ چوکی ءِ سر ءَ گوں مزنیں سلاھاں ارش کرتگ کہ ارش ءِ آسر ءَ پوج ءِ جانی تاوان ءِ گمان اِنت۔ ارش ءِ زمہ واری انگت ھچ گل ءَ نہ زرتگ۔

بلوچ پہ وتی راجی آجوئی ءِ گرگ ءَ درسیں پڑاں دیمونی دیگءَ برجاہ دار ایت۔ بی این ایم آواران ھنکین ءِ دیوان آدینگ، 14 اگست 2026 زرمبش بلوچی https://zrumbesh.com/22763/ بلوچ نیشنل موومنٹ (بی این ایم) آواران ھنکین ءِ نیمگ ءَ یازدہ اگست آجوئی ءِ روچ ءِ درگت ءَ مراگشے برجم دارگ بوتگ۔ اے مراگش ءَ تلار ناز، میرک بلوچ، زبیر بلوچ ءُ مسود بلوچ ءَ تران کرتگ۔ تران کنوکاں یازدہ اگست پہ بلوچ راج ءَ یک گوستانکی روچے لیک اِتگ ءُ گوشتگ کہ اے روچ بلوچ راج ءَ وتی پل اِتگیں آجوئی ءُ نا ھکی ءِ بگیری ءَ یکشلیں جھد ءِ درس ءَ دنت۔ آیاں ھمے کول کرتگ کہ اے روزگپتی ءِ ھلاسی، راجی پجار ءِ پھریزگ ءُ آجوئیں ریاستے ءِ جوڑ بوگ ءَ بلوچ راجی زرمبشت درسیں دیمونیاں ھوار برجاہ بیت۔ آیاں گوشتگ کہ سیزدہ نومبر 1839 ءَ برتانیہ ءَ کلات ءِ سر ءَ اُرش کرتگ بلوچستان ءِ دراجکشیں گلامی ءِ بن ھشت ایر کرتگ اَت۔ بلے ھان بلوچ میر مھراب ھان ءُ آئی سنگتاں زورگپتی ءِ بگیری ءَ جنگ کرتگ ءُشھید بوتگ اَنت ءُ راجی وتواجھی ءِ ڈیوا بالینتگ۔ چہ کرناں برجاھیں یکشلیں گھگیری ءُ بے ھسابیں دیمونیانی آسر ءَ انگریزپشت ءَ کنزگ ءَ لاچار بوتگ ءُ گڈی ءَ یازدہ اگست 1947 ءَ بلوچستان ءَ آجوئی گپتگ۔ ھان بلوچ ءُ درسیں شھیدانی دیمونی داں مرچی ھم پہ بلوچ راج ءَ پھر ءُ جھد ءِ سرچمگ اِنت۔ آیاں بژن درشان کرتگ ءُ گوشتگ کہ یازدہ اگست 1947 ءَ گپتگیں آجوئی ءِ لھتیں ماہ ءَ پد 27 مارچ 1948 ءَ پاکستان ءَ پہ دروگ بلوچستان زور دستیگ کرتگ۔ گوستگیں بازیں کرن اِنت کہ برجاھیں زوریں بیگواھی، درکانودی کوش، ءُ پوجی کاروائی ءِ وڑیں زوراکیاں ابید بلوچ راج ءَ اے گلامی کدی نہ من اِتگ۔ بلوچ راج ءُ آئی سروک مرچی ھم پہ وتی وتن ءِ آجوئی ءِ گرگ ءَ راجی ھستمان ءِ پھریزگ ءَ پشت ماں پشت ءَ دیمونی دیگ ءَ مھکم اَنت۔ تران کنوکاں گوستگیں نزوریانی سر ءَ چمشانک داتگ ءُ گوشتگ کہ انوگیں وھد ءِ رد ءَ راج گیش مھکم کنگی اِنت۔ تھنا آجوئی ءِ لوٹ نا بلکیں آیوکیں آجو بلوچستان ءِ دارگ ءَ وانگ، رکینگ، جھانی دیمروئی ءِ واست ءَ مارا وت تیار کنگی اِنت۔ دژمن ءِ اے پروپیگینڈا ءَ رد کن ایں کہ بلوچستان آجوئی ءَ پد دیمروئی کرت نہ کنت۔ آیاں گوشتگ کہ بلوچستان ءِ سرزمین چہ مڈی ءَ پُر اِنت، زر، آدگہ ابرمی مادن ھست اَنت۔ چہ ایشی ءَ یک آجو ءُ دیمروئی کنوکیں ریاستے ءِ جوڑ کنگ الّم سوبمندی اِنت۔ بنشون: درشان اکس: مونوگرام #ZrumbeshTV #BreakingNews #MiddleEast #BalochistanCrisis #Baloch #Balochistan #ZBC #BalochMedia #Zrumbesh

زھیر نبشتہ کار: جابر گلام زرمبش نبشتانک https://zrumbesh.com/article/editor-choice/6552/ زھیر واری ھم بدُوائی یے، بلے کَے اِنت کہ مردم ءَ اے بدُوائی ءَ دنت؟ پد ءَ آئی ءَ درچک ءِ ساھگ ءِ کروجگ ءِ جھد کت تہ بے سوب بوت۔ پاد اتک ءُ درچک ءِ کبلھی نیمگ ءَ شُت ءُ اُوشتات داں دیر ءَ درچک ءِ ساھگ ءِ سُروکیں تاکانی نکشاں ندارگ کنگ ءَ اَت ءُ پد ءَ ھمے جاہ ءَ چہ بُن ءَ نِشت ھمے ندارگ ءِ چارگ ئے بِنا کُت۔ کمے ھیالانی وانگ ءَ رند وتی دست ءِ لکیرے ھم ھمے داب ءَ چار اِت اِنت، راست ءُ چپ ھردو۔ پد ءَ رودراتکی نیمگ ءَ چہ ساھگ ءَ سَے گز دور اُوشتات ھمے ندارگ ءِ چار اِت۔ پد ءَ آئی ءَ دل ءَ جیڑ اِت کہ اے تھنا ساھگے نہ اِنت ءُ ابرم اے نکش ءِ تہ ءَ من ءَ چے پیش دارگ ءَ اِنت؟ اگاں نبشتانکے گڑا من چی ءَ ونتے کت نہ کنگ ءَ آں، آئی ءَ وتی دل ءَ وت گْوشت کہ لازم نہ اِنت ھمک نبشتانک ءَ من ونت بہ کن آں، اگاں من چوشیں وانندھے بوتین آں من اے چیز پہ اَرزانی ءَ گیشّینت کہ زھیر بدَوائی یے یا سوگاتے۔۔۔۔۔۔ آئی ءَ درچک ءِ تاکانی ساھگ پاد ءِ سر ءَ انچو لپاشان کُت اَنت کہ کسانوکیں چُکے وتی دپتر ءَ نبشتگیں پنسل ءِ نبشتھاں بہ کروجیت، بلے آ بے سوب بوت۔ زمین ءِ رنگ بدل بوت، بلے تاک انگت ھما وڑ ءَ گوات ءِ تب ءَ نچگ ءَ اِت اَنت ءُ ھما یکیں ندارگ ءَ پیش داران اِت اَنت۔ آئی ءَ دم برت نشت ءُ ھیالے کت کہ زھیر پہ دوستاں کئیت ءُ دوست چون مردم ءَ بدُوائی دئے اَنت؟ اگاں دوست بدُوائی بہ دئے اَنت ھم، بلے من وت پرچ لوٹ آں کہ ترا گیر بیاراں ءُ وھدے کہ تو گیر کائے زھیر ھم گیشتر بنت۔ آئی ءَ کمو بچکند اِت ءُ اناگت ءَ چہ دپ ءَ در اتک "اچھا" گپ اِش انت بزاں کہ: ”زھیر درچکی ساھگے ءُ گیر زمین اِنت، بے وسیں من ھما گوات کہ ما کُل مانگی اِتگ اِیں اے ندارگ ھما بدُوائی اِنت۔“ اگاں اے بدُوائی ءَ درآمد بہ دئے اَنت آ چون زانت کناں کہ مارا کَے دوست بیت ءُ ما کَے ءَ را گیر کار اِیں۔ آئی ءَ بے سمائی ءَ زمین ءِ سر ءَ نبشتہ کتگ اَت ”ازیت“ (دلسیاھی) تہ آئی ءَ سما کت روچ شگْوستگ ءُ درچک ءِ ندارگ بدل بوتگ کہ نوں گیشّان اَت کہ نبشتانکے ات ءُ آئی ءَ وانان کت تہ نبشتہ اَت: ”تھکُشیں ھُوپ“، پد ءَ آئی ءَ ھیال کت زھیر ھم انچُوشیں ھوپے کہ مردم پہ وت ءَ گچین کنت ئے ءُ وت ءَ چہ تہ ءَ کش کنت۔ اگاں نہ دلسیاھی دگرانی داد بوت نہ کنت ءُ اے مردم ءِ وتی پگر ءُ ھیالاں کہ مردم ءَ دلسیاہ کن اَنت۔۔۔۔۔۔۔۔

کلات ءَ زیا لانگو ءِ کاروان ءِ سر ءَ ارش ءَ سے پھازدار ٹپی آدینگ، 14 اگست 2026 زرمبش بلوچی https://zrumbesh.com/22760/ کلات ءَ پجار نہ بوتگیں سلاہ بندیں مردماں بلوچستان ءِ تھی کارانی وزیر زیا لانگو ءِ کاروان ءِ سر ءَ ارش کرتگ۔ بنشون ءِ رد ءَ زیا لانگو ءِ کاروان ءَ سر ءَ کنڈ امرانی ءَ ھما وھد ءَ ارش کنگ بوتگ کہ کاروان چہ کلات ءَ دیم پہ شال ءَ روگ ءَ بوتگ۔ ارش ءِ آسر ءَ سے پھازدار ٹپی بوتگ۔ ٹپی بوتگیں کارمند پہ الاج ءَ نادراھجاہ ءَ برگ بوتگ اَنت۔ ارش ءَ پد بازیں کچے ءَ پاکستانی پوج ءِ کارمند ھمے جاہ ءَ مچ بوتگ اَنت ءُ پٹ ءُ پول اِش کرتگ۔ بنشون: رسانکدر اکس: رسانکدر #ZrumbeshTV #BreakingNews #MiddleEast #BalochistanCrisis #Baloch #Balochistan #ZBC #BalochMedia #Zrumbesh

تُربَت ءَ پوج ءِ گاڑی ءِ سر ءَ بمب اُرشے بوتگ آدینگ، 14 اگست 2026، زرمبش بلوچی تُربَت ءِ شھر ءَ پجار نہ بوتگیں مردماں پوج ءِ گاڑی ءِ سر ءَ بمب اُرش کرتگ۔ اھوالکار ءِ رد ءَ پجار نہ بوتگیں مردماں پوج ءِ گاڑی گوں تراکناکیں شورھاں پریں ماٹرسائیکلے ءَ نشانگ کرتگ۔ اُرش ءِ آسر ءَ پوج ءِ جانی تاوان ءِ ھال اِنت۔ اُرش ءِ زمہ واری انگت ھچ گل ءَ نہ زرتگ۔

سوراب ءَ بمبگواریانی آسر ءَ بیستءُ ھپت مردمانی بیرانی چکچینی یے، مھلوک پرس دارگ ءِ جاہ ءَ گھگیری بہ کنت۔ڈاکٹر ماہ رنگ بلوچ آدینگ، 14 اگست 2026 زرمبش بلوچی https://zrumbesh.com/22757/ انسانی ھکانی نامداریں کارکن ءُ بلوچ یکجھتی کمیٹی ءِ بندیگیں سروک ڈاکٹر ماہ رنگ بلوچ ءَ وتی شنگ کرتگیں درشانے ءَ گوشتگ کہ پاکستان گوستگیں ھپت دھک اِنت کہ بلوچ مھلوک ءِ سر ءَ واکداری کنگ ءَ اِنت۔ ریاست ءَ بلوچ مھلوک یکشل ءَ وتی زوراکیانی چیر ءَ داشتگ ءُ بلوچستان ءَ وتی واکداری ءِ برجاہ دارگ ءِ کوشست کرتگ، بلے واکداری ءِ اے آزاردھی نوں بے سوب بوتگ ءُ اے بے سوبی ءِ نھاد ءَ یکبرے پد ءَ چہ بلوچ آبادیاں گرگ ءَ اِنت۔ آئی ءَ گوشتگ کہ بلوچ چکچینی تھنا بلوچستان ءِ یک تھی جیڑھے نہ اِنت بلکیں یک میان استمانی انسانی تباھی یے۔ دانکہ بلوچ چکچینی ءُ آئی بنکی سوب چارگ مہ بنت ایمنی ءِ ھمک گپ تھنا لبز بنت ءُ چہ راستی ءَ گستا بیت۔ گوستگیں لھتیں ماہ بیت کہ پہ پھازداری ءِ نام ءَ بلوچستان ءِ جتائیں ھنداں بندآرگ، لشکرکشی، زوریں بیگواھی ءُ کشت ءُ کوش بوگ ءَ اِنت۔ ڈاکٹر ماہ رنگ بلوچ ءَ گوشتگ کہ اے ویلانی مزنیں بھرے ریاستی رسانکدر ءِ گپانی تہ ءَ جاگہ دیگ نہ بیت، بلے بلوچ مھلوک ھمک روچ اے جاوراں گوں وتی چماں گندگ ءَ اِنت ءُ وتی زندگی ءَ اوپار کنگ ءَ اِنت۔ ما اے وڑیں ریاست ءِ ھمک پالیسی ءَ رد کن ایں کہ اود ءَ بلوچ زھگ، زالبول ءُ لس شھریانی پہ جان ءَ ترس بہ بیت ءُ آیانی کوش ءَ تھنا پوجی کاروائی بہ گوش ایت ءُ مان آرگ مہ بیت۔ آئی ءَ گوشتگ کہ سوراب ءَ گوستگیں شپ ءَ پاکستانی جنگی بالگردانی بمبگواریانی آسر ءَ 27 مردم مرتگ ءُ ٹپی بوتگ، آیانی تہ ءَ زھگ ھم ھوار اَنت۔ اگاں یک ریاستے لس شھریانی گس ءُ آبادیانی سر ءَ بمبگواریانی آسر ءَ زھگاں ھوار دزرنانی کچ ءَ شھریانی کوش ءَ انچائیں کاروائی یے سرپد بہ بیت، گڑا اے یک پوجی لشکرکشی یے نہ اِنت بلکیں چکچیی یے۔ ڈاکٹر ماہ رنگ بلوچ ءَ گوشتگ کہ سوراب ءَ بلوچ مھلوک ءِ نیمگ ءَ اے رستری ءُ زوراکی ءِ ارش ءِ بگیری ءَ دگ ءِ بند کنگ ءُ زھرشانی کنگ ھمے گپ ءِ منانک اِنت کہ مردم پہ وتی جان ءُ مال ءِ پھریزگ ءُ کشت ءُ کوش ءِ بگیری ءَ بے توار نہ بنت۔ من گوں بلوچستان ءِ مھلوک ءَ لوٹ کن آں کہ آ سوراب ویل ءِ بگیری ءَ چہ وتی گساں در بہ کپ اَنت ءُ چہ پرس دارگ ءِ جاہ ءَ گھگیری بہ کن اَنت۔ گھگیری مئے باندات اِنت۔ بنشون: درشان اکس: رسانکدر #ZrumbeshTV #BreakingNews #MiddleEast #BalochistanCrisis #Baloch #Balochistan #ZBC #BalochMedia #Zrumbesh

مند ءَ سرمچارانی دگ بندی پنچ شمبے، 13 اگست 2026، زرمبش بلوچی کیچ ءِ ھمد مند، کوہ ڈگار ءَ سرمچاراں دگ بستگ، گواک ءَ پوج ءِ سر ءَ اُرش کرتگ۔ اھوالکار ءِ رد ءَ سرمچاراں دگ بستگ ءُ گاڑی پٹ ءُ پول کرتگ اَنت۔ ھمے میان ءَ سرمچاراں گواک ءَ پوج ءِ چوکی ءِ سر ءَ اُرش کرتگ۔ اُرش ءِ آسر ءَ پوج ءِ جانی تاوان ءِ ھال اِنت۔ اے کاروائی ءِ زمہ واری انگت ھچ گل ءَ نہ زرتگ۔

ناسر آباد ءَ پوج ءَ مردمے آوار جتگ پنچ شمبے، 13 اگست 2026، زرمبش بلوچی https://zrumbesh.com/22751/ کیچ ءِ ھند ناسر آباد ءَ پاکستانی پوج ءَ مردمے آوار جتگ ءُ بیگواہ کرتگ۔ اھوالکار ءِ رد ءَ زوربیگواھیں مردم ءِ نام سھیل ناسر اِنت کہ پاکستانی پوج ءَ شپ ءِ سے ءَ چہ ھوشک آباد ءَ آوار جتگ ءُ بیگواہ کرتگ۔ کھول ءَ گوں سرکار ءَ لوٹ کرتگ کہ سھیل ناسر زوت آجو کنگ بہ بیت۔ بنشون: رسانکدر اکس: رسانکدر #ZrumbeshTV #BreakingNews #MiddleEast #BalochistanCrisis #Baloch #Balochistan #ZBC #BalochMedia #Zrumbesh

سوراب ءَ پاکستانی پوج ءِ کشت ءُ کوش ءَ بلوچ ءُ پاکستان ءِ نوک آبادکاری سیادی گیشتر پاشک کرتگ۔ رھیم بلوچ ایڈوکیٹ پنچ شمبے، 13 اگست 2026، زرمبش بلوچی https://zrumbesh.com/22754/ بلوچ آجوئی لوٹوکیں رھشون رھیم بلوچ ایڈوکیٹ ءَ وتی درشان ءَ گوشتگ کہ زی پاکستانی پوج ءَ سوراب ءِ ھند گدر ءَ گوندان میتگ ءَ گوں جیٹاں بمبگواری کرتگ۔ اے بمبگواری ءَ پاکستانی پوجءَ کودکیں زھگ ءُ زالبولاں ھوار دو درزن ءَ گیش بلوچ کشتگءُ پاکستان ءِ شاتکامی بندات کرتگ۔ آئی ءَ گوشتگ کہ اےتچکیں ریاستی ناشرکاری ءُ انسانیت ءِ بگیری ءَ وتی پہ میارباری ءِ چیر دیگ ءَ پوج ءِ جارکش ءَ چو مدامی وڑ ءَ یک دروگیں کسھے آرتگ ءُ رسانکدر ءَ تالان کرتگ۔ آدگہ ریاستانی پدیانکانی وڑ ءَ بلوچ چکینی ءَ شریداریں رسانکدر ءَڈی آئی جی ایس پی آر ءِ وتگڑیں دروگیں کسہ تالان کنگ بندات کرتگ۔چونیں ھم رسانکدری جھگیرے ھمے بمبگواری ءَ آماچیں میتگ ءَ نہ شتگءُ نہ آئی شھیدانی کھولانی ھیال جست گپتگ اَنت، نہ گوں ھندی جاہ منند، نہ سیاسی ٹولی، ھندی جھگیر ءُ انسانی ھکانی گلانی ھیالانی بابت ءَ سرپد بوگ ءِ کوشست کرتگ، بزاں کہ گدر چہ شالءَ سد ءُ نیم کلو میٹر دوری ءَ پیک دگ ءِ سر ءَ اِنت۔ بلوچ رھشون ءَ گوشتگ کہ ڈی جی آئی ایس پی آر ءُ آئی گلامیں رسانکدر شمشکار اَنت کہ نوں چاگردی رسانکدر ءَ ویل ءُ ھالانی شنگ کنگ ءَ روایتی رسانکدر ءِ بستار ھلاس کرتگ۔ نوں زورگرءُ آئی پدیانک چنچو بہ لوٹ اَنت بلے بلوچستان ءَ وتی نوک آبادکاری واکداری، لٹءُپل، بلوچ چکچینی پالیسی ءُ کاروائیاں چیر دات نہ کن اَنت۔زورگریں پاکستان ریاست گڑا نوں نہ بلوچ آجوئی زرمبشت ، بلوچانی جوزگ ءُ دیمونیا ں چیردیگ ءِ بستار ءَ دارایت ءُ نہ وتی جنگی میارباری ءُ انسانیت ءِ بگیری ءَ ناشریاں چیر دات کنت۔ رھیم بلوچ ایڈوکیٹ ءَ گوشتگ کہ سوراب ءَ اے کشت ءُ کوش ءَ بلوچ ءُ پاکستان ءِ نوک آبادکاری سیادی گیشتر پاشک کرتگ۔بلوچ زانت کہ آجوئی ءَ ابید آئی کر ءَ پہ راجی باندات ءُ زندگی ءِ شرپ ءَ دگہ ھچ راہ پشت نہ کپتگ۔ بلوچ راج سوراب ءَ کشت ءُ کوش کنوکیں میارباریں ریاست پاکستانءُ آئی ھندی راجدروھاں یک روچے الم ایشی انساپ ءِ جست ءَ کنت۔ بنشون: درشان اکس: رسانکدر #ZrumbeshTV #BreakingNews #MiddleEast #BalochistanCrisis #Baloch #Balochistan #ZBC #BalochMedia #Zrumbesh

سوراب ویل ءِ بابتءَ بے تواری بوگ پہ دیم ءِ ارشاں راہ پچ کنگ زانگ بیت۔ ھلیل بلوچ پنچ شمبے، 13 اگست 2026، زرمبش بلوچی https://zrumbesh.com/22748/ بلوچ آجوئی لوٹوکیں رھشونءُ بلوچ نیشنل موومنٹ ءِ پیشگیں چیئرمین ھلیل بلوچ ءَ وتی درشان ءَ گوشتگ کہ سوراب ءَ پاکستانی پوج ءِ جیٹانی کودکیں مردم ءُ شھری آبادیانی سر ءَ بمبگواری کنگ یک مزنیں جنگی میارباری ءُ انسانی شرپ ءِ گنتریں لگتمالی زانگ بیت۔ اے ارش ءَ بیست ءَ گیش مردم شھید بوتگ، آیانی تہءَ زھگ ءُ زالبول ھم ھوار اَنت، دگہ باز مردم ٹپی بوتگ۔اے تھنا بیست ءَ گیش مردمانی کوش نہ اِنت، بلکیں سرجمیں بلوچ شھری آبادیانی تچک ءَ کلوہ دیگ اِنت کہ آ وتی گسءُ شھرانی تہ ءَ ھم پھریز نہ اَنت۔ شھری آبادی ءِ بگیری ءَ بالی توان ءِ کارمرز کنگ میان استمانی جنگی کانودی کانود ءُ انسانی شرپ ءِ تچکیں لگتمالی اِنت، ایشی گوں دلجمی ءُ پارسائی ءَ میان استمانی تک ءِ پٹءُ پول درکار اِنت۔ آئیءَ گوشتگ کہ سورا ب ءِ چونیں ھم کوھے ءَ چیرجنگی بنجل نیست،یک شھرے ءُ اود ءَ لس شھری گوں وتی کھولاں زند گوازینگ ءَ اَنت۔ دو دھکانی میا ن ءَ پاکستانی پوج ءَ بلوچستان ءِ جتائیں ھنداں گوں جیٹاں بمبگواری کرتگ، پد ءَ ایشی ءَ پیش بالی ارشاں گیشتر کوھی ھند ءُ دوریں آبادی نشانگ کنگ بوتگ اَنت۔ سوراب ءَ چے کہ بوتگ آ یک ترسناکیں آسرے زانگ بیت۔نوں جیٹ بمبگوارانی دیم تچک ءَ شھری آبادی ءِ نیمگ ءَ اِنت۔ ایش ھمے گپ ءِ جار اِنت کہ پاکستانی پوج وت ءَ ھما جاہ ءَ رسگ سرپد بیت کہ اود ءَ آئی ءَ نہ کانود ءِ ترس، نہ انسانی شرپ ءِ پرواہ ءُنہ چونیں ھم میان استمانی دزمانجنی ءِ گمان۔ بلوچ رھشون ءَ گوشتگ کہ اے ویل ءَ پد پاکستانی پوج ءِ نیمگءَ وتی اےکار ءِ نہ منگ ءُ یک وتگڑیں درشانےءِ پیش کنگ میارباری ءِ سنگینی ءَ کم نہ کنت۔ بیست ءَ گیش شھیدی، ٹپی بوتگیں مردم ءُ سانمندیں کھولانی اے وڑیں راستیانی بابت ءَ جھان ءَ تھنا ارشکار ءِ لیکہ منگ نہ لوٹ ایت، دومی نیمگ الم نزور اِنت بلے یک راجے اِنت، آئی چکچینی بوگ ءَ اِنت۔ سوراب ءَ سانمندیں کھولانی توار ءِ گوش دارگ ءَ ابید راستی ءِ مان نیارگ تھنا پاکستانی پوج ءِ گپ ءُ ھالانی راستیءِ پیم ءَ جھان ءَ سر کنگ بلوچ راج ءِ گون ءَ بوتگیں ناھکیاں یکے گیش کنت۔ ھلیل بلوچ ءَ گو ں میان استمانی تک، اکوام متھدہ ءُ انسانی ھکانی میان استمانی گلاں لوٹ کرتگ کہ سوراب ویل دگہ جتائیں ویلے لیکگ ءُ مان نیارگ مہ بیت۔ اے ارش زوت، گوں دلجمی ءُ میان استمانی لوٹانی رد ءَ پٹ ءُ پول کنگ بہ بیت، پارسائیں چاروک ءُ اھوالکار ھمے سانمندیں جاھاں سر کنگ بہ بنت ءُ زمہ واراں جست ءُ پرس بہ کن اَنت۔ اگاں ریاست پاکستان ءَ شھری آبادیانی سر ءَ جیٹ کارمرز کنگ ءَ پد میان استمانی تک ءَ ھچ وڑ ءَ جست گرگ مہ بیت گڑا اے بے تواری تھنا اے ویل ءَ گار نہ کنت بلکیں پہ دیم ءِ ارش ءَ راھے پچ کنت۔ بنشون: درشان اکس: رسانکدر #ZrumbeshTV #BreakingNews #MiddleEast #BalochistanCrisis #Baloch #Balochistan #ZBC #BalochMedia #Zrumbesh

بلیدہ ءَ پاکستانی پوج ءِ سر ءَ ارش پنچ شمبے، 13 اگست 2026، زرمبش بلوچی کیچ ءِ ھند بلیدہ ءَ سرمچاراں پاکستانی پوج ءِ بنجل ءِ سر ءَ ارش کرتگ۔ زرمبش جھگیر ءِ رد ءَ سرمچاراں مرچی بیگاہ ءَ بلیدہ ءِ میتگ بٹ ءَ پوج ءِ بنجل ءِ سر ءَ بی ایم بارہ ءِ گولا آس داتگ۔ ارش ءِ آسر ءَ پوج ءِ جانی تاوان ءِ گمان اِنت۔ ارش ءِ زمہ واری انگت ھچ گل ءَ نہ زرتگ۔

بلیدہ ءَ سَے زمباد ءِ پلگ ءَ مردمے کشگ بوتگ پنچ شمبے ، 13 اگست 2026، زرمبش بلوچی بلیدہ ءَ سلاہ بندیں مردماں سَے تیل کشیں زمیادانی پلگ ءِ جھد کرتگ ءُ تیرگواری ءَ مردمے بیران بوتگ۔ اھوالکار ءِ رد ءَ زمیاد چہ دشتک ءَ پیداک بوتگ اَنت کہ سلاہ بندیں مردماں پل اِتگ اَنت۔ چہ سلاہ بندیں مردمانی تیرگواری ءَ مردمے بیران بوتگ۔

سند ءَ گیس پائپ لائن ءِ تباہ کنگ ءِ زمہ واری بی آر جی ءَ منّ اتگ پنچ شمبے، 13 اگست 2026، زرمبش بلوچی بلوچ ریپبلکن گارڈز ءِ جارکش دوستین بلوچ ءَ گوشتگ کہ بی آر جی ءِ سرمچاراں دوشی سند ءِ دنگ بکشیا پور ءِ نزیک ءَ مراد واہ ءَ چہ سوئی ءَ کراچی ءَ روکیں 36 انچ ءِ گیس پائپ لائن گوں تراکناکیں شورھاں تباہ کرتگ۔ دوستین بلوچ ءَ ارش ءِ زمہ واری منّ اتگ ءُ گوشتگ کہ مئے اے وڑیں کاروائی داں بلوچستان ءِ آجوئی ءَ برجاہ بنت۔

سوراب ءَ بمبگواری ءِ بگیری ءَ تربت ءَبوتگیں ھرتال ءَ پولیس ءَ دکانانی کبل پروشتگ اَنت پنچ شمبے، 13 اگست 2026، زرمبش بلوچی https://zrumbesh.com/22745/ تربتءَ سورابءَ پاکستانی پوج ءِ جیٹانی بمبگواری ءِ بگیری ءَ بوتگیں تھتگ بند ھرتالءَ پولیس ءَ بازیں دکانانی کبل پروشتگ اَنت ءُ پہ زور پچ کنگ ءِ کوشست کرتگ۔ چہ رسانکدر ءَ شنگ بوتگیں تامربند ءَ گندگ بیت کہ پولیس کارمند چہ تربت اسسٹنٹ کمشنر ءِ ساڑی بوگ ءَ دکانانی کبلاں پروشگ ءَ اَنت۔ اے بابت ءَ اجمن تاجران ءِ گوشگ اِنت کہ چہ گل ءِ نیمگ ءَ ھرتال ءِ جار جنگ نہ بوتگ، بلے پد ءَ ھم دکانداراں سوراب ویل ءِ بگیری ءَ چہ وتی منشا ءَ دکان بند کرتگ اَنت۔ انجمن تاجران ءَ پولیس ءِ نیمگ ءَ دکانانی کبلانی پروشگ ءَ سر ءَ بژن درشان کرتگ۔ بنشون: رسانکدر اکس: رسانکدر #ZrumbeshTV #BreakingNews #MiddleEast #BalochistanCrisis #Baloch #Balochistan #ZBC #BalochMedia #Zrumbesh