Medical Laboratory

من اهم المعلومات المختبرية اللي لازم تعرفها مرات شخص عنده اعراض ارتفاع الكورتزول، تسويله الصبح يطلع طبيعي وتكله ما بيك شي هاي كارثة! او تكله تعال العصر سويه ويطلع طبيعي وهم نكله ما بيك شي هاي هم كارثة. الصحيح والطبيعي الكورتزول الصبح يكون عالي ( واكيد ضمن الحد الطبيعي) وقبل المغرب الساعة ب 4 ب 5 يكون نازل واقل من الصبح اذا الصبح والعصر بقى نفس المستوى يعني فقد التغاير هاي هية عنده كورتزول مرتفع وعنده خلل ولازم يتعالج. فركز وياي الكورتزول لازم يكون بيه تغاير يومي بالصباح عالي بالمساء نازل غير هيج يعني اكو خلل حتى لو ضمن النورمل رنج الاثنين. وسلامتكم. وها تجنبوا الچاي والكهوة قبل التحليل ب 4 ساعات ...... @abdiq96

#شوية_مناعة #وزارة_الدفاع_المناعية ... شلون جسمنا يقضي على الفيروسات والسرطان؟ اليوم نسولف عن "قوات الصاعقة" بجسمنا هاي عبارة خلايا اسمها CD8 T-cells (أو الـ CTLs - Cytotoxic T Lymphocytes) هاي الخلايا هي خط الدفاع الهجومي المرعب اللي رب العالمين خلاه بجسمنا حتى يحمينا من السرطان والفيروسات. وكومة منكم يدوخ بالتفاصيل تعالو نحجيها بابسط صورة شغله شلون يصير؟ اولا: الاستخبارات (الخلايا المتغصنة - DCs - Dendritic Cells): هاي الخلايا تتفرفر بالجسم، من تشوف فيروس أو خلية سرطانية، تاخذ "البصمة" مالتها وتروح تركض بيها للعقد اللمفاوية (Lymph Nodes)، بالعقد هناك اكو خلايا بعدهه جديدة ومدللة وما شايفة حرب (نسميها الخلايا الساذجة - Naive CD8 T cells) ف الاستخبارات تشوفهه البصمة (Antigen - المستضد) وتكولهه: سيدة لكيت عدو وهذا هو شكله! ارجو اتخاذ ما يلزم وفق الضوابط🌚". ثانيا: اوامر القيادة هنا تدخل خلايا القيادة (CD4 T cells / TH1) وتفرز بروتينات وسيتوكينات (Cytokines) (مثل IL-2 - Interleukin-2 و IFN-γ - Interferon gamma)، هاي المواد مثل البنزين اللي يشعل الحماس! بلحظات الخلايا تتحول إلى خلايا قاتلة محترفة (Mature CTLs)، وتبدي تنقسم وتتكاثر بسرعة خيالية لدرجة عددها يزيد 100,000 مرة خلال أيام وينتشرون بالدم. ثالثا المواجهة والحصار من تلزم الخلية المصابة (Target Cell)، ترتبط بيهه حيل وبإحكام مثل قفلة السحاب مال الهدوم (بواسطة الـ TCR - T-cell receptor والـ MHC class I - Major Histocompatibility Complex class I مع جزيئات الالتصاق Adhesion Molecules) فماكو أي مجال للإفلات والهروب من منطقة الارتباط اللي نسميها المشبك المناعي (Immune Synapse). رابعا طرق الإعدام الخلايا القاتلة ما تذبح ولا تطلق نار! شتسوي لعد؟ تكعد "تقنع" الخلية المصابة بإنها تنتحر وتدمر نفسها (عملية اسمها Apoptosis - الموت الخلوي المبرمج) وتستخدم طريقتين: - الحبيبات السامة (Granules): تفرز بروتين اسمه بيرفورين (Perforin) يثقب غشاء الخلية المصابة وتدخل وراه إنزيمات الجرانزيمات (Granzymes) تفلش الخلية من الداخل. - دگمة الانتحار (Fas/FasL): بروتين بالخلية المناعية اسمه (FasL - Fas Ligand) يطخ بمستقبل بالخلية المصابة اسمه (Fas receptor)، أول ما ينكبس، الخلية تبدي تدمر الحمض النووي (DNA) مالتها وتتفلش. خامسا: التنظيف (البلدية) ورا ما تنكمش الخلية المصابة وتتحول الأشلاء مالتها إلى قطع صغيرة تسمى الأجسام الانتحارية (Apoptotic Bodies)، تجي خلايا البلدية (الخلايا البلعمية الكبيرة - Macrophages) والـ DCs تبلع (Phagocytosed) هاي البقايا وتنظف المكان ويرجع الجسم أمان. وهيجي احنا عايشين مرتاحين ونروح ونجي بامان الله ف يعني سبحان الله نظام عجيب ..... @abdiq96

الصورة كملت اخمطوها يمكم ما اريد تفشلوني يطلبون منكم تخفيف وما تعرفون

معلومة مختبرية بالمختبرات ماكو شي اسمه نسبة تخفيف 1:1 التخفيف يبدي من 1:2 صعودا راح تستغرب وتكلي شلون غير اذا نخلي 10 من العينة ومثلها 10 من D.W غير هذا 1:1 ؟ راح اكلك لا، هذا 1:2 ! زين خليك وياي من تخفف وتطلع النتيجة بعد التخفيف، انت لازم تضربها بمعامل التخفيف. مثلا نسبة التخفيف 1:2 والنتيجة بعد التخفيف طلعت 8 ال 8 تضربها ب 2 يعني النتيجة 16. زين اذا انت تكول نسبة التخفيف 1:1 وطلعت النتيجة 8 ، هاي ال 8 بشنو تضربها بيا معامل تخفيف؟ ب 1 !! اذا تكول ب 1 معناها النتيجة تبقى نفسها ما تغير شي فصارت كأنو اصلا ما مخفف لان اي رقم ينضرب ب 1 يبقى نفسه. فالخلاصة التخفيف يبلش من 1:2 اذا نفس الكمية للعينة وللمادة المخففة و 1:3 اذا المادة المخففة ضعف العينة وهكذا ...... @abdiq96

الإجهاض المتكرر مو دائمًا سببه المرأة مثل ما متعارف! بالفترات السابقة البحوث توصلت إنو للرجل دور مهم ايضا بالاجهاض. كثير من الرجال يطلعلهم تحليل نطف روتيني طبيعي بكلشي ك عدد، حركة، شكل بس من نفحص الـ DNA داخل الحيوان المنوي نلكاه متأذّي ومتكسّر وهالشي يزيد احتمال الإجهاض خصوصًا ببدايات الحمل. بعض الدراسات سووها على رجال نسوانهم يصير عدهم إجهاض متكرر لكَت إنو نسبة تكسّر الـ DNA بالنطف عدهم أعلى من غيرهم، وأيضا لگوا إنو كَل ما يكبر عمر الرجل وكل ما تزيد الگعدة لفترة أطول -مثل الشغل المكتبي- ممكن تتأثر جودة النطف أكثر. فالفكرة إنو الإجهاض المتكرر مسؤولية ثنائية مو فحص للمرأة وبس لازم الرجل يسوي فحوصات أعمق على النطف ايضا وما يكتفي بالتحليل الروتيني. فحص النطف مال تفتت ال DNA اسمه: Sperm DNA fragmentation test وهذا رابط دراسة منشورة ب 2025 تحجي عالموضوع هذا اللي يريد تفاصيل أكثر https://pmc.ncbi.nlm.nih.gov/articles/PMC12169987/ ...... @abdiq96

كثير من النساء يعانن من "متلازمة تكيس المبايض" (PCOS) والموضوع مو بس خربطة هرمونات ودورة شهرية متلخبطة، السالفة أعمق فسويت هذا المخطط اللي يوضح شنو اللي يصبر وشلون دواء "الميتفورمين" (المعروف تجارياً بـ "السيدوفاج" أو "الگلوكوفاج") يشتغل ويه هالحالة: المخطط مقسوم جزئين: - الجزء الأحمر (المشكلة) : تبدأ بـ "مقاومة الأنسولين": الجسم ما يستجيب للانسولين (الهرمون اللي ينظم السكر). بالتالي البنكرياس عباله الأنسولين قليل فيگوم يفرز كميات عالية (فرط الأنسولين تعويضي). هذا الأنسولين العالي يحفز المبايض على "افراز هرمونات ذكورية" (زيادة أندروجين المبيض). وهنا مربط الفرس(اذا بعد اكو فرس)! الهرمونات الذكورية تمنع البويضات تنمو وتكبر (ضعف نمو البصيلات) فما تصير إباضة كاملة بالتالي الدورة تتخربط وأيضا تسبب الشعر الزايد وحب الشباب ودهون البطن وغيرها. الجزء الثاني باللون الأخضر (العلاج بالميتفورمين): هنا يتدخل الميتفورمين ويشتغل مثل المنقذ": يخلي عضلات الجسم ترجع تسمع كلام الأنسولين (تحسين حساسية الأنسولين) ويخلي الكبد يقلل إفراز السكر. فالبنكرياس بالتالي يگدر يرتاح، ويقلل إفراز الأنسولين بشكل كبير. وهنا المفاجأة! من يقل الأنسولين بالدم، المبايض راح ترتاح وتهدأ تبطل تفرز هرمونات ذكورية زايدة. وأيضا ترجع تشتغل طبيعي وتكبر البويضات وتصير إباضة منتظمة (استعادة التبويض). ولهذا السبب اللي يخلي اللي يستخدمن Metformin وية نظام اكل صحي ورياضة يلاححظن انتظام الدورة وتحسن القدرة الإنجابية. ...... @abdiq96

المهم اكو شغلة مهمة اكثر شي تخص البنات كلنا نعرف انه فيتامين د يحتاج للشمس فبدون الشمس ☀️ مستواه يظل نازل بالتالي تصير مشاكل كثيرة فالشمس بالاساس التعرض الها صار قليل جدا بسبب وسائل النقل المتوفرة بكل مكان وزمان الحمد لله بس من مرات تجي فرصة دقائق تعرض للشمس البنات مخليات واقي شمس خصوصا بالصيف الواقي علميا يمنع اغلب اشعة الشمس عن البشرة بالتالي انسدت الابواب نهائيا بشكل فيتامين د فالنتيجة عظام هشة عضلات ضعيفة مناعة تعبانة مزاج متعكر و و فلازم يصير انتباه لهالموضوع. وهذا السكرين اقروه مهم ...... @abdiq96

محلل سألني يكول مرت علينا حالة السكر اليومي ب 300 و 400 بس التراكمي ما يصعد شنو السبب؟ السبب المريضة عدها اعتلال بالهيموكلوبين فلازم تسوي HB electrophoresis + تحاليل جينية حتى يشوفون شنو المرض بالضبط منجلي ثلاسيميا جنيني. فأي اعتلال HB disease ممكن نشوف التراكمي طبيعي او نازل والسكر اليومي ب 400 والسبب لان السكر التراكمي أساسا هو ارتباط السكر بالهيموكلوبين فطبيعي الاعتلالات الجينية تأثر عالارتباط حتى لو السكر عالي. ...... @abdiq96

اكمالا لهذا المنشور: https://t.me/fiqhalmokhtaber/3062?single .... الاحتمال الثاني: نجي على Blood agar وانشوف مستعمرات حجمها جبير اكبر من E. Coli ولونها رمادي كريمي وتكون مخاطية mucoid وهاي اهم ميزة مال المخاط. ولون الطبق باقي نفسه يعني ماكو تحلل دموي. وعلى طبق MacConky agar ايضا مخاطية وجبيرة لكن لونها وردي ( تخمر اللاكتوز) فإذن ما دام مخاطية وما مسببة تحلل دموي وما دام نمت على MacConky agar يعني gram negative فيكون التشخيص: UTI caused by Klebsiella pneumoniae اما ليش مخاطية فبسبب عدها Klebsiella كبسولة سميكة (polysaccharide capsule) الكبسولة تنطي الشكل المخاطي اللزج تحميها من المضادات الحيوية والجهاز المناعي! ....... @abdiq96

index.html

كل واحد من عدنا لو مديون لو يدين احد لو طالب لو مطلوب ومرات تروح من محل تاخذ بالدين وراس الشهر يطلع عليك كذا مبلغ وتتفاجأ اني شنو ماخذ؟! فسويت هذا التطبيق خفيف سلس تسجل ديونك اللي مطلوبها واللي تطلبها وتكدر تسويهن PDF كل فترة ومن تسدد سواء كلي اذا كل الفلوس وجزئي اذا قسم منها موجودات الخيارين واللي مسدد ينطرح من المجموع بالليل تسويه وضع ليلي حتى لا يأذي عيونك اللي تطلبهن وحد واللي مطلوبهن وحد مثلا خالد نذير يطلبني 500 الف ووفيته 100 باقي علية 400 ومثلا حذيفة الحلبوسي اطلبه 250 الف ومغلس عليهن وهكذا خوش ميزات بيه شوفوه وقيموه واللي يريد يستخدمه يخزنه بفد مكان واحد وكل مرة يدخل عليه من نفس المكان حتى كلشي محفوظ ويتجدد. ...... @abdiq96