شتاوي و غناوي 🇱🇾

شكيع النجمه ويش ايدير احذا ضي قمرنا الكبير..🤎

لَـنظَـاار يـَ عَـزيز أحـلِفـَن بَـعد غَـلاك مَ يـِديـرن غَـلا 🤎

يالعزيز اجعني قبلك وين الموت الله يكتبلك🤎

مدللني دلال خياب ع دنيتي اللّٰه لا تغيبه🤎

نقول ما نقول عليه هلب عزيز لوصاف كلها🤎

سماحة الغلا لرياف ... و املاقه يداوي كلشي ...🤎

القيتـه رفيق طول العمـر وغنانـي عليهـا كلـها 🤎

إمفيّت ياعزيز غلاك عندي جميّع ماتبيّد تنعزق🤎

💔❤️‍🩹

مازلت شاغل بالي حتى وانت غيري يا عزيز مغالي ... مازلت عندي وافي ... حتى انكان ناكر اليوم اسلافي ... يا بو مجدل عالكتوف مسافي ... ويا بو عيون اسباب ضيقة بالي ... ويا بو شفايف والنياب ارهافي ... من يوم ما نظرتك رحت من معدالي ... ونا قبل وافيلك ودرتك وافي ... الله يسامحك مو هضا شي تخيالي ... انقاني موثق يا قديم اكتافي ... ونا لاني جهد لاني فزع من والي ...

مرا نقول تخدم في نيه ... ومرا نقول يا حظي الزين ... ومرا نقول من المولى عطيه ... ومرا نقول يا رضا الوالدين ... اصدافك جيت مره في عشيه ... شلتي عين شلت معاك عين ... جريتيه بالخطوا البطيه ... عقلي نين راح معاك نين ... فيك اوصاف من ريم الحطيه ... غير حذاك ننظر فيه شين ...

فيك وعليك ومن غلاك ومنك ... حاسن تفاكير العرب وافكاري .. انتي الحس حسك وسماحه فنّك ... انتي مملكه ولّي حذاك جواري ... اصغار واكبرنك كي لّي من سنك .. فارقه علي حيل البنات اجباري ... بالله ما تلوميهن الّي احسدنك ... ضريبة جمالك ما ابها تحتاري ... يالباهره فوق العلا انظرنك ... بعيده عليهن ما شراك الشاري ...

نحلفلك انكان تريد تحلفيني ... بخالق الكون لي بدع في رسمتك ... ما غلا منك شي فيت جنيني ... يلي ما عرفت نحل عقدت صمتك ... وفي كبدي وفي قلبي وفي شراييني ... منين ما تشوفي في تلقي بصمتك ...

يا دكتوره سبحان خالقك يا بنت فأحسن صوره.. انتي علي جيلك خذيتي نوره .. بسماحه بعد هكي انريت حرام .. العين واسعه والخد يبقس نوره ... وغثيث وين فكاته يطيح عرام ... هي من الله فكل شي شطوره ... من غير الحلي ولبس والهندام ... ودندش دناديشه وبخ عطوره ... ميره عليها خدموا خدام ... سبحان من مزين طلته وحضوره ... وسبحان من معدلها مقام مقام .

اعتزت فيك عازة عمر  يا قـرعة العيـن الغايبه❤️‍🩹

سماحة الغلا لرياف ... و املاقه يداوي كلشي ...

ويقول: واسّاع ايجِينا، وان ڪان غاب مُو غايب ابشي علينا، عزيز ڪان هو رايف اسّاع ايجينا، اسّاع يفڪر، ويمڪن يرايف والغلا يذڪر، مُـش مشڪلة نرجو امغير ايبڪر، عاذرينا مازال يصلح بينا،

ويقول: فينا بعيد الهونه ، إغيابه إيقرِّض كيف سم أعيونه، سامرين مِنَّه غير ياما دونه ، إسمور في الظلام و في النهار شراقه، و اليوم كل حد منّا إبقي في جونه، و صاف الغلا طاحن أطياح أوراقه،

مش كل حد يقدر على مصبانا المولى خلقنا للوفاء عنوان ولانا على ناكر الجميل حزانه فية نحسبوه زكاه للرحمن اكبار ع الكلام النقل والفتاته اثقال روز ديما كبار الشان واللي دار فينا طيبة يلقانا يحصد إلا صابه او هو مطمان …!🤞🏻

في بيت عربي فصيح يقول:   دواني الطبيب بِكُل طبٍ        فما نفع الدواء ولا شفاني رد حياة عبدالكافي البرعصي امغير هو شقا الطبيب        بلا عزيز مو نافع دواء 💔