Ask Me About Nursing

مساء الخير يخواتي.. بالنسبة للموقع بتاع تسجيل الرغبات الخاص بخريجي كليات التمريض دفعة 2024.. الموقع فيه عطل والوزارة شغالة عليه وهيتحل ف أقرب وقت ممكن... الوزارة كمان هتمدلكم التسجيل ان شاء الله بدل الأيام اللى الموقع اتعطل فيها.. الموضوع مش محتاج هشتاج ولا الدوشة دي كلها والله.. استغل الفترة دي واعرف الفرق بين الجهات وقارن بينهم وشوف الأحسن بالنسبالك..

ف شغلنا، ف المستشفى، فيه ليالي بتعدي عادية... وفيه ليالي بتفضل محفورة جواك مهما عدى عليها وقت. ف شفت من الشفتات كان واحد من الليالي دي... دخلت الشفت وأنا عندي نفس القناعة اللي عشت بيها من أول يوم اشتغلت ف مجال التمريض: المريض لازم ياخد حقه كامل.... دي الحاجة الوحيدة اللي عمري ما فاوضت عليها، سواء كنت مسؤول الشفت أو مجرد فرد وسط زمايلي....كنت دايمًا شايف إن نجاح الشفت مش إننا نخلصه وخلاص، نجاحه إن كل مريض يطلع واخد حقه من الرعاية، وإننا نعدي اليوم بأقل خسائر ممكنة... ومع مرور الساعات، دخلت حالة حرجة... كان واضح من أول لحظة إن المعركة مش سهلة، وإن كل دقيقة هتفرق....أصوات الأجهزة كانت أعلى من أي كلام، وكل عين في المكان كانت متعلقة بالشاشة، وكل واحد فينا كان بيحاول يعمل اللي عليه، ويمكن أكتر... وسط الزحمة والضغط، حصل خطأ غير مقصود أثناء التعامل مع أحد الأدوية المهمة. وبعدها بدقائق، الحالة تدهورت بشكل مفاجئ.. في اللحظة دي....كل اللي اتعلمناه اشتغل لوحده، مفيش حد فكر في نفسه، ومفيش حد وقف يتفرج...الكل اتحرك، وكل واحد كان بيعمل دوره، لحد ما ربنا كتب للحالة إنها ترجع.. لكن أنا... أنا مرجعتش. الخوف على المريض اتحول لغضب، والغضب اتحول لكلام قاسي جداً.. زعقت، واتعصبت، وجرحت ناس كانوا واقفين بيحاولوا يساعدوا، واتخذت قرارات وأنا منفعل. وقتها كنت مقتنع إني بحافظ على حق المريض... لكن بعد ما هديت، اكتشفت إني ظلمت ناس ملهاش ذنب.. وشهادة لله... الزميل اللي كان موجود مقصرش، ولا كان مستهتر، ولا كان بيتعامل بإهمال...كان بيحاول، ويمكن لو الزمن رجع، كنت هتصرف معاه بطريقة مختلفة تمامًا.. لأول مرة حسيت إن المسؤولية مش بس إنك تعرف تتصرف وقت الأزمة...المسؤولية الحقيقية إنك تعرف تتحكم في نفسك وقت الأزمة.. إحنا بنتعامل مع أرواح، لكن كمان بنتعامل مع بشر واقفين جنبنا...البشر دول بيغلطوا، وأنا واحد منهم.. يمكن أصعب حاجة اكتشفتها امبارح، إن الإنسان وهو بيدافع عن الحق، ممكن يظلم غيره من غير ما يقصد... وأصعب من الغلط نفسه...إنك تراجع نفسك وتعترف بيه.. علشان كده، لو أي حد كان موجود معايا واتأذى من كلمة أو أسلوب أو قرار، فدي رسالة اعتذار من قلبي قبل ما تكون منشور....حقكم عليا كلكم.. وأعوذ بالله من نفسٍ يغلبها غضبها، ومن قلبٍ يقسو وهو يظن أنه يفعل الصواب... اللهم أصلح قلوبنا، واجعل خوفنا على مرضانا سببًا في الرحمة، لا سببًا في القسوة على بعضنا البعض. 💙 اووسا مه النجار

رسمياً بيان صادر عن وزارة الصحة:_ مدة السماح لأستلام التكليف بقت شهرين فقط من تاريخ صدور تاريخ قرار التكليف.. واللي هيتخلف ممكن الموضوع يوصل ان تكليفه يتلغي بشكل رسمي.. #التكليف #وزارة_الصحة

مساء الخير الزلزال اللي حصل من كام يوم كان مجرد تذكير بسيط إن الدنيا مش مضمونة، وإنها فانية، وإن كل حاجة ممكن تتّغير ف أقل لحظة.. يمكن دي رسالة لينا كلنا عشان نسامح، ونعتذر للي غلطنا ف حقهم، ونبدأ نصلح اللي بينا وبين الناس، لأن مفيش حد عارف عمره قد إيه؟! متشيلش ف قلبك من حد، ومتأجلش كلمة (أنا مسامحك أو حقك عليا) ، الدنيا أقصر من الخصام، وأغلى حاجة فيها راحة القلب... ربنا يحفظنا جميعًا، ويجعل أيامنا كلها أمان وسكينة، ويرزقنا حسن الخاتمة❤

رسمياً فتح باب تسجيل رغبات للتكليف لكليات التمريض خريجيي 2024 (امتياز 2025) http://mhealthmobasn.cu.edu.eg/

لسه مفتحش اول ما يفتح هقولك

وعليكم السلام ورحمة الله وبركاتة لا للأسف

وعليكم السلام ورحمة الله وبركاتة الف مبروك مقدماً ان شاء الله هيتقبل بنسبة كبيره.

ب30 لحد دلوقتي مفيش تكملة كلية حكومي بعده ولسه محدش كملي تخصصي بعده..

كلّ واحد ف المستشفى هتلاقيه شايفك بصورة غير التاني: فيه اللى يشوف فيك الخير، وفي اللي يشوف العكس، فيه اللى يرتاح لك من أول مره، وفيه اللى مهما حاولت معاه، عمره ما هيقتنع بيك وانك إنسان كويس.. وده شيء طبيعي، لأن كلّ إنسان بيشوف الناس بعين تجربته، وطريقة تفكيره، وانطباعاته، مش بعين الحقيقة الكاملة.. متشغلش نفسك إنك ترضي كلّ الناس، ولا تحاول تغيّر صورتك في عيون كلّ واحد، اللى يهم فعلًا إن تبقي نيّتك صافية، وتعاملك محترم، وضميرك مرتاح. في الآخر، أنت مش مسئول عن الصورة اللى كلّ شخص رسمها عنك، لكن مسئول عن أخلاقك، وصدقك، وحقيقتك.. ولو رضيت عن نفسك بعد ما ترضي ربّنا، هتعيش مرتاح، مهما اختلفت نظرة الناس ليك.❤