قصائد الموشح ( موشح )

سالفتنه مبينه من عنوانها الخدم يحسين انت رافع شانها السالفه ومابيها يحسين الخدم عالم الاصلاب جانت بالعدم تالي صارت روسها فوك القمم من صرت يا ابن علي سلطانها يا امير وخادمك باسمك امير شفته هالقانون بس عندك يصير العندة والمعندة يمك مو فقير يالعطاك يفيض من ميزانها حضرتك فوك الارض بالواقعه لاكن اعله من السماء السابعه يالرحمتك رحمه الله الواسعه حضرتك ما تنطبك بيبانها حضرتك اربع شبابيك الذهب الكبل لا نلزمهن يروح التعب واعله بابك سيدي نشوف العجب مراد تنطي حته من حيطانها شفنه كل معلول طب لكربلاء من تربتك سيدي ينول الشفاء التحت قبتك كل دعا يلوح السماء كربلائك للبشر اركانها حته احنه نعيش دنيانه بفخر حملت والكربلة نويت السفر سهام ورماح وبعد كطع النحر تحملت كل كربلة واحزانها يا حسين تحملت من كربله بركبة وليدك مثلث حرمله من بعدها راسك برمحة اعتله والجسد متخضب بميدانها صعد راسك عالرمح وكت اليسر والكطع نحرك حدة بضعن الخدر عاليتامه يدور بسياطه الشمر ومشت للشام بأمر عدوانها خادم الامام الحسين بشار العبادي

موشح شرف الدنيا والآخرة خدم الله امبارك بأعمارها اجت تخدم كربله وزوارها ــــــــــــــــــــــــــــ الله خالقهه لجل هذا الغرض عدهه حب حسين يسري بالنبض الخدامه واجب اعليها انفرض بعالم الذر عاهدت اطهارها ــــــــــــــــــــــــــــ شرف هاي الخدمه مابعده شرف ناس عدها حسين بس هوه الهدف تنتظر يوم اربعينه بكل شغف ازغار واكبار التشد اوزارها ــــــــــــــــــــــــــــ موكب بصف موكب بكل الطرق بين هذا وذاك ماعدهم فرق المهم خدمتهم اخلاص وصدق ترجى من حسين يمحي اوزارها ــــــــــــــــــــــــــــ كلها تصرخ هله بالزاير هله ادخلوها بسلامٍ كربله تفضل اشرب ماي واروي العايله واذكر حسين وخيامه ونارها ــــــــــــــــــــــــــــ اليصرف الدينار الله ايضاعفه والطعام ايصير للمرضه شفه هذا ميزان العقل مو عاطفه وشيعة المذبوح هاي افكارها ــــــــــــــــــــــــــــ من زمان العاشر الهذا الزمان نخدم حسين الشهيد بكل مكان ندري حب حسين بالمحشر ضمان وللقيامه الخدمه تبقه آثارها ــــــــــــــــــــــــــــ حسين هو الخير والينطي المدد شما تجي الزوار وايزيد العدد الشاب والشايب وطفل البالمهد من جنان حسين جَنْي اثمارها ــــــــــــــــــــــــــــ هالشعاير ذو رساله ناصعه يعني بس حسين صافي منبعه العاف دربه منهو باچر ینفعه عود ختنفعه السقيفه وعارها ــــــــــــــــــــــــــــ فراس المحمداوي https://telegram.me/aabas78 قصائد لكل ايام محرم اشترك بالقناة

أنـشد الخدام عـن هذا الـفعل منهو يقبل حرمته فوگ الهزل وتنضرب بسوط من احقر نذل بـالـطبع تـنطي الرگب لعيالها ــــــــــــــــــــــ1ـــــــــــــــــــــ حيرتي خل تنذكر طول الزمن مـن على منـبر أنـصار الـحسن يذكروني تيسرت من هالوطن والـحرم مسبـيـه وي اطفالها ــــــــــــــــــــــ2ـــــــــــــــــــــ ياخدم جابوني والله ميسره وي گـوم يزيد حيل أمر مـره ومابقت وياي حرمه مخدره مذبحه فوگ الوطيه ارجالها ـــــــــــــــــــــ3ــــــــــــــــــــــ يا أبو اليتحمل ابذبح الرضيع راسه فوگ الرمح ينظرله گطيع والتعب ياحسره بمثلث يضيع وجثته فـوگ الـرمال أوصالها ــــــــــــــــــــــ4ـــــــــــــــــــــ شحچي عن الشام والبيه اشفت شفـت ابـوأليمه راسـه بـالطشت بـخـيزران يـزيد حيـل اتـكـدرت مـن شفت فـوگ الـثـغر انـزالـها ـــــــــــــــــــــ5ــــــــــــــــــــــ سجاد كاظم الكلابي

موشح رثاء السيدة رقية ﴿ ع ﴾ يا مصاب يهون يا دمعة التصب على اللي ودعت بديار الغرب العين لو سكتت يضل ينعى الگلب و يضل دهر الفاجعة ينعاها يضل دهر الفاجعة ينعى الطهر و يحفر بضلع الزمن الها گبر هاي دمعة نصر من ذاك النصر راية ضلت ترف فوگ سماها راية ضلت ترف و بمر السنين هاي بنت حسين ثورتها الحنين بيوم من ناده النحر هل من معين نعم صاحت فوگ نحره نداها نعم نادت من حجة راس الشهيد راد ثورة يتم تستحقر يزيد لبت الدعوة على ذاك الوريد يوم من چف الأجل وافاها ما دروا للزهرة بالشام الوريث هاي بنت حسين حسرتها تغيث هدمت عرش الخبيث ابن الخبيث ورسمت الثورة بدمع عيناها رسمت الثورة اعلى قبتها علم بيها نصر النحر ورماد الخيم مثل راس حسين ما يعرف ألم آية للحق جل من سواها آية للحق صارت بديرة الشام قائدة ضعن النصر يوم الايتام للعده سجيل منبع للسلام طفلة و الباري الذي علاها ويم رقية هناك طوف بكل يقين تشوف ذاك الگبر قبلة ياسمين باب للحاجة ونعم بنت الحسين فاز كلمن بالشدد ينخاها _جواد الخطيب

موشح ...... الامام الحسن عليه السلام ( منعوه الحسن ) . خير لاتترجه من أهل الفتن ويندفن يم جده منعوه الحسن " هذا ريحانه الهادي ومهجته يريد يم النبي جده دفنته التدعي ام المومنين المنعته هاك شوف شلون دورات الزمن **** تصيح هذا البيت محد يوصله الماحبنه ابد مايدخله بيت جده ملك صار القاتله وتالي بيبانه بوجه اتقفلن *** من الدفن ماكفه نعشه يمنعوه بالسهام أعله النعش كاموا رموه لحد ما سبعين نبله صوبوه وبيها كلب الدين صابونه ونطعن **** اكبال عين حسين صابوه بالسهم الله يعين الحسين بها لالم صبر لكن بالصبر گلبه انجسم يعاين النعش العضيد بهالمحن ** جاوصية النبي بأهله أصبحت وين وبين مسموم أصبحوا تالي وطعين غربه صاروا والأمر بيد اللعين صار مروان الطريد ابن الوطن ** خير من هالدنيه ابد لاترجه خير كون مروان الطريد أصبح امير كل عصر هالمشهد نشوفه يصير جم وضيع الانطته قيمه وثمن سيد اياد الغالبي

عَنْ لِسَانِ حَال العقيلة تُنَادِي الْإِمَامِ الْحَسَنِ الْمُجْتَبَى عَلَيْهِ السَّلَامُ . ( موشح) تنَادِي زَيْنَب حيف ياخويه الْحَسَن شَمْعِه شَمْعِه شموع دَارِ أَهْلِي طفن ★★★★★ عَلَى الدَّارِ النَّايبَة ظَلَّت تَحُوم ترِيد لمتنه . وشملنه . مايدوم صدگ يَبْن أُمِّي ولاتگدر تگوم وَالْمَنَايَا  تحوم  يَم دَارِك لفن ★★★★★ رَيْت بيه اتصير خويه عِلَّتُك بچبدتي يندار سمُّهَا چبدتك لاتركها السگم ذيچ الخلتك بالألم واعضاك  نار اتوجرن ★★★★★ عذباك  السّمّ أُرِيد أَنْدَب واصيح صدگ يَبْن أُمِّي الْخَبَر هَذَا صَحِيحٌ طَوْد فَخْرِي وهيبتي خويه تَطِيح وَصِلَة وَصِلَة إحشاك تَالِي أتگطعن ★★★★★ أَسْبَلْت أديك وماتجاوبني بَعْد خويه سَاكِتٌ وَالنَّفْس مِنْك خمَد صدگ فَاضَت رُوحَك وَجِسْمُك بَرْد وشفت أَخَوَي حسَيْن حضرلك چفن ★★★★★ چفناك حسَيْن . وادموعه تَسِيل أنگضت عشرتنه ودنه يَوْم الرَّحِيل ياهو مِنْكُم مامشه عَنِّي چتيل شظاملي عگبك مَصَايب هلزمن ★★★★★ شنهي ذَنْبِك يَوْم جَعْدَة سمتك وبالسهام الگوم تَرْمِي اجنازتك يَم حَبِيبَك ليش مَنَعُوا دَفَنْتُك وَالْعَدُوّ يَم جَدُّك الْغَالِي اِنْدَفَن الشَّاعِر حَسَنٌ لعيبي الحريشاوي

موشح للامام الحسن عليه السلام عالحسن مولاي تهمل عيني هالعهد للموت بينه وبيني آنه خادم للحسن طول العمر ابقه خادم وبخدمته افتخر ونحب عله مصابه ولّطم عالصدر ودري حب المجتبه الينجيني اذكر مصابه وحس گلبي انفجع مثل ما چبده انمرد چبدي انصدع بگلبي حزن المجتبه صوره نطبع مصابه كلما اذكره يـبـچّـيـنــي والله ما انسه الحسن وصوابه صوّب المختار يوم امصابه عالحسن عيني بدمع سچابه عالحسن ابچي بقهر خلّيني آه ياچبد الحسن هالفاجعه ابن ابو سفيان سمّه وگطّعه مات مسموم واخوته تودّعه ما نسيت الحسن طول سنيني للبقيع ابعث سلامي بدمعتي عالحسن مثل الجمر ياحسرتي ما نسيت الثار ثاره برگبتي وي امامي المنتظر يلگيني اطلب بثار الحسن وي الامام نوصل لگبر الحسن نبني المقام نزور گبر الحسن ونأدّي السلام وعن مزار الحسن من يثنيني والله ما عوف الحسن هذا العهد حبه بيّه يسري بعضاء الجسد ما افارگ حبه عاشگ للأبد ماي حبّه بالحشر يرويني سيد زيد الفحام __

[[💔موشح للسيدة رقيه -ع-💔]] ☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆ وردة حسين بخرابة شامها وراس واليها بطشت گدامها ☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆ ذبلت ونامت عليه من التعب سكنت الآم الغريبه من العتب بالذهب راسك يا اغلى من الذهب وسكتت و صارت أخير ايامها ☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆ الچان یسگیها بحنانه و العطف والمدللها و يكلمها بلطف شلون غصن الروح فجأة ينقطف وذبلت خلافه الثلاثه اعوامها ☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆ يموت   لمن   ينهجر  تدري الورد وحال بينه   و بين راعیه   البعد بمنجل    الاقدار   أحسن ينحصد ولا تدوسه الجاهله بأحكامها ☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆ يالشلعت الشوك عن لا انجرح خاف احچي وتنذر جروحك ملح ردت يم نحرك اضل بس ما يصح روحي بس انته التعرف آلآمها ☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆ أنته ابوي وانته أمي و كل هلي بعدك بهالدنيا ما ضل شي ألي اقسم اعليك بأبو اليمه علي حسين خلص روحي من اوهامها ☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆ يبو الحنيه بعد ما ضل صبر الكسرة البگلبي بعد ما تنجبر أحلم ویومیه افز گلبي جمر وروحي بحضانك جميع احلامها ☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆ بويه اخذني وياك مااكدر أضل انته روحي ومهجتي ونته والأهل حسین جاوبني اذا صوتي وصل ترست آذاني الشماته سهامها ☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆ اليتيمه هاي بنت المرتضى هاي بنت الي عطش لمن گضى هاي الضلوع الكفلها مرضرضه و الذبحنه أخوانها وأعمامها ☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆ وتدري بيه اعله الدلال معلمه شوف من حبالهم سال الدمه عمّتي ضربوها سبو فاطمه العصابه التدعي أسلامها ☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆ الطبو الاسلام كرهاً بالأمس الچان واحدهم یشوفك ينخلس گامو یودونه من حبس لحبس حتی ترضي بهالفعال أصنامها ☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆ خادم الحسين(ع) 🔸جهاد البصيراوي🔸

موشح للاربعين والمشاية جيت وي زواركم مشايه زينب تنادي وبديهه الرايه للبطل عباس جابت رايته والدرب كله تحن الشوفته اوياها خل نمشي يشيعه الحضرته وبالدموع انوافي الوفايه جيت وي زواركم مشايه خل نوافيهه بلطمنه والدمع موكب السجاد للحومه رجع زينب تنادي يضيغم ياسبع حيل مابيهه وتون شچايه جيت وي زواركم مشايه حيل مابيهه واجت من اليسر واحنه وياها ندگ اعله الصدر گوم صاحت لاتنام وتعتذر ياكفيلي اوياك عندي احچايه جيت وي زواركم مشايه اسمع اعتابي يخوي وكافلي وين وعدك مو گلتلي ادللي ليش ماتگعد تنزل محملي ضيمي ماينعد شعد اهوايه جيت وي زواركم مشايه ضيمي ماينعد شعد منه وشگول ليش ماتگعد تردني للنزول عيني مضروبه مثل عين البتول خويه وادري اعليك تصعب هايه جيت وي زواركم مشايه خويه اعرفك زين ماتحمل عتب لاچن شبيدي جمر گلبي يشب ترضه چتالك يگابلني ويسب گوه عفتك يم المسنايه جيت وي زواكم مشايه گوه عفتك من خذوني اميسره ماسده الضيم العليه وماجره جيت اشوفنك يسبع الگنطره مااريد العلگمي ولامايه جيت وي زواركم مشايه كون مات العلگمي والمشرعه طاحت اچفوفك الحلوه امگطعه جيت مهضومه واجر بالفاجعه گبور شفنه مو خيم بالثايه جيت وي زواركم مشايه

[[💔موشح للسيدة رقيه -ع-💔]] ☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆ وردة      حسين       بخرابة   شامها وراس      واليها   بطشت     گدامها ☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆ ذبلت      ونامت   عليه   من  التعب سكنت    الآم     الغريبه  من  العتب بالذهب راسك   يا اغلى  من الذهب وسكتت    و صارت    أخير   ايامها ☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆ الچان     یسگیها   بحنانه  و العطف والمدللها       و        يكلمها    بلطف شلون غصن الروح   فجأة   ينقطف وذبلت   خلافه     الثلاثه   اعوامها ☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆ يموت    لمن   ينهجر     تدري  الورد وحال  بينه   ‌  و بين   راعیه   البعد بمنجل     الاقدار    أحسن  ينحصد ولا    تدوسه    الجاهله    بأحكامها ☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆ يالشلعت   الشوك    عن    لا   انجرح خاف  احچي   وتنذر  جروحك  ملح ردت يم  نحرك  اضل  بس  ما يصح لأن  روحي      انته   التعرف  الامها ☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆ أنته ابوي   وانته أمي  و  كل   هلي بعدك    بهالدنيا   ما   ضل شي  ألي اقسم   اعليك    بأبو    اليمه   علي حسين  خلص  روحي  من اوهامها ☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆ يبو     الحنيه    بعد   ما ضل صبر الكسرة   البگلبي   بعد    ما  تنجبر أحلم    ویومیه    افز  گلبي   جمر وروحي  بحضانك   جميع احلامها ☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆ بويه اخذني وياك     مااكدر  أضل انته روحي ومهجتي ونته  والأهل حسین  جاوبني   اذا صوتي وصل ترست   آذاني     الشماته  سهامها ☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆ اليتيمه    هاي   بنت    المرتضى هاي بنت  الي عطش  لمن گضى هاي الضلوع  الكفلها   مرضرضه و    الذبحنه   أخوانها  وأعمامها ☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆ وتدري  بيه  اعلى   الدلال  معلمه شوف   من    حبالهم  سال الدمه عمّتي  ضربوها   سبو     فاطمه العصابه         التدعي    أسلامها ☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆ الطبو     الاسلام    كرهاً  بالأمس الچان واحدهم  یشوفك  ينخلس گامو  یودونه  من  حبس  لحبس حتی  ترضي  بهالفعال    أصنامها ☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆ الشاعر جهاد البصيراوي ليلة ٥/صفر /١٤٤٨ هجري الاثنين 20\7 \2026 ليلة استشهاد السيده رقيه عليها السلام #موشح #قصائد1448

موشح ٠٠٠ زيد الشهيد عليه السلام هذا زيد بمرقده وعنوانه تخلّد وماتت قهر عدوانه ٠٠٠٠٠ هذا زيد ارباة زين العابدين قاد ثوره وما خضع للظالمين وبشعارة يا لثارات الحسين حارب اهل الباطل بإيمانه ٠٠٠٠٠٠ ما غمض عالذلّه عين ولا هجع فضّل الموت عله عمره وما ركع ضحّه عمره لكن بدمّه ارتفع استشهد وبارينه عظّم شانه ٠٠٠٠٠٠٠ اعلن الثوره ونهض زيد الشهيد ضد هُشام الطاغية ومنهج يزيد أنتصر عالظالم بدم الوريد ومرقده هذا اليشع برهانه ٠٠٠٠٠٠٠٠ هذا مرقد زيد مصلوب الجذع بكل زمن يزهي بمناراته ويشع وين طاغي عصره وين بيا وضع انزال ونزال الحكم واعوانه ٠٠٠٠٠٠٠٠ زيد ابن زين العباد المؤتمن باب للحاجات صار بكل زمن قبّة تزهي بالسمه وحضره وصحن كل وكت زواره بي ولهانه ٠٠٠٠٠٠٠٠٠ مجرّب ومعروف زيد ابفزعته ما يرد محتاج گاصد حضرته تشهد بهاي المعاجز شيعته مفضّل علينه بكرم احسانه ٠٠٠٠٠٠٠٠٠٠ الله انطه لزيد جاه ومنزله اباب صحنه تنحل اعظم مشكله واليطيح بشده خل يكصد اله مفتّحَه طول الوكت بيبانه سيد زيد الفحام ٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

موشح رقيه (ع) يلي تسأل عن رقيه شلونها هسه حمره من البواچي عيونها اشكد صعوبه اعليها لحظات التمر هسه تمشي حافيه بدرب اليسر ازغيره ماتحملها ضربات الشمر ترفه جانت هسه زرگه امتونها صعبه كلش صعبه لحظات السبي وينظر اعليها رقيه الاجنبي منين ما تلتفت محروگه العبي الدمعه متفارگ سواد جفونها والاشد واصعب عليها بالسفر تنظر اعله العايله كلها بخطر اتمنت العباس وياها الگمر چان هسه امدلـله بضعونها چان حادي ضعونها راعي العلم عالنهر عافـته وبعينه سهم مادره العباس حرگوها الخيم و برقيه مـادره يضربونها هذا حال التبقه ماعدها ولي تبقه كل اهـمومها ماتـنجلي اشكثر نادت لينه احضر ياعلي للفواطم گامو يشتمونها اختم ابدمع الصبر والامنيات اشگد رقيه الها بالطف ذكريات اتنادي بعد حسين ماتسوه الحياة ولآن ماتت عالنحر خي عونها لا تنسون والدي ووالدتي وأبني عباس من الرحمه والغفران خادمكم رياض الرسل الجابري

قصيدة موشح في السجاد ع...........................الله يلــعن آلُ مَيَـــة هالزَمــن المـا رضو يبنولكم كَبـه وصحن **************************** والله يالسجــــاد بُغضــــاً هَدِمــــوك ذولــه يـا مولاي ميتــــين من أبــوك حتـــى وانت بالكَـــبر هـم حــاربوك على الدين الهِــدم كَبـــرك؟يؤتَمـن؟ **************************** لعنـة الله على البَغـض آل الرســول لعنـة الله على الظِلم بِنتـه البتــــول يلعـــن الله الصعدت بذيــچ الخيــول البيها صدر حسين بالحومة أنطحن **************************** ذولـــة أنـــذَل ما خِلـــق رب السِمه حيــدر شكَـــد حاربــــوهُ وفاطــــمة أطفالــها الـــي بالمهد هم مُجــرمـة حقـد ذيــــچ اجدادهم بيــــها اندفــن **************************** عَلِمـــوهم عالجــريمــــة وعالحـــقد حاقـــــد على العتــــرة ابنهم ينــولد وعلي چا ذبحونه أمس لومـه الحشد وچـــان كـــل نسوانـه هم انسِــــبَن **************************** روس مــو مالت عكَـل مالت سحكَ أمــس شكَينـه الزلمــهم چـــم حـلكَ حشــد أهــل البيت يوجــع من يطكَ چــان هِدمو شكـــو مرقد بالـــوطن **************************** سيــدي طَبــق الأصـــل من حرملـة لــو يــرد هســـه الحُسـين تقـــــاتله والدليــــل تريــــد تهــــدم كربلـــــة وِلــد ذيـــچ السَمِمت چبـــد الحــسن **************************** الحكَـــوك الينســكت عنــهـا تضــيع بيـــا ذنـب لليـــوم مهدوم البقــــيع يالدعـــائك ما يرجــعه الله السمــيع يعجل الله إلنـه بظهور ابـن الحسـن **************************** يمتـه مهديكم يكَــص هـاي الركَــاب بسيــفـه جُمعــة ينالـــون العِقـــــاب ذولــة مو مالــت لطُف مالــت عذاب الظُلـــم كِلــه مِـــن حكُمهم والفِــــتن؟ **************************** سيـــدي يمـــته نجــــي لزيـــــارتـك ومثــــل أبو اليمــــه ترفرف رايــتك كــون من بعيـــد تسطــــع كَبـــــــتك والمواكـــب سيـــدي يمـــك يِجــــــن **************************** حيدر حسين الكَرعاوي https://t.me/HaideraHlkareawi313m

موشح نجفي للإمام السجاد ع يحتظر وعيونه شبحت للدرب بلكي يندك بابه وحسين اليطب ....................... من كثر ما شوك عنده للسبط روحه مثل الطير وابابه تحط حبر جن دمعه وعله خدوده يخط يرجع حسين اشتياقه اشكد صعب ....................... علي زين العابدين اشما يمر وكت بي ومصاب يتحمل جمر كضه لحسين ابواجي هالعمر ويذكر اشما طفله بالطف تنضرب ....................... اخر انفاسه وشبح عينه بحزن ايريد ابوه والناس لمصابه تون مثل حَن ام الفصيل اعليه تحِن وهو ماناسي اشجره بذيج الحرب ....................... يعرك اجبينه وتنشفه عيلته لجن هاللحضه يجدد هضمته بقه وحده حسين بالطف غربته وانذبح من الكَفه ابين الغُرب ....................... اينكَطوله الماي ويهل الدمع روحه ذابت بالحزن مثل الشمع حسين ضامي وانجتل باصعب وضع ولاكو جادر عزه الروحه ينُصُب ....................... ابو الباقر يحتظر وابسِم كَضه اينازع ابأنفاسه وزغير الفضه جا حفيد الذاكه جده المرتضه ادخل الكَلب العده الوان الرعب ....................... تالي بالسم فتتو جبد الولي رادو ايموتون ذرية علي وتسعه صارو صيتهم بي يعتلي رغماً اعله اعدائهم وِلده وغصُب ....................... روح زين اعبادهه فاضت ضوه وابنه باقر علم دين الله التوه الفكَد ابوه روحه تعنت نينوه توارث الطف والجفن من دم يصب الشاعر ياسر العارضي

موشح نجفي للسيده رقيه ع طفله ماتتحملل احزان اليتِم وتنتظر جية ابوهه ابكل عزِم ........................ امدَلِلَه وابحضن الحسين اكبرت تشم عطر بثيابه منه اتعطرت بالسبي ومجتوفه وسفه اتيسرت من بعد عز الابو وذيج الزلم ........................ امحركَات اجدامه من الجمر ومن الاشواك ابرجلهه الدم يخر طفله وازغيره اشبعد تحمل صبر والصبر جن جمره ابد ما ينلزم ........................ تبجي والعمتهه تسأل بالجره عمه كَالت وين ابوي اتنطره مايجيني كَولي شنهو ال أخّره وهيه تدري استشهد وعدهه العلِم ........................ هاي من أهل العقيده وتفتهم نامت من البجي وشافت بالحلم هيه جن باحضان ابوهه وتبتسم تعاتبه وتكَله خل عطرك أشِم ........................ فّزت ولن بس حرم متلوعه بس ونين الفاجدات التسمعه تنظر السجاد يهمل مدمعه حسين اريدنه تكَله ياشهم ........................ سمع قائد جيش اميه بالجره أُمر جيشه ابراي حقده اظهره اخذو راس حسين ودوو تنظره والرقيه اتعنَو ابقلة فِهِم ........................ كل عقلهم طفله ماتدري اشحصل ومن تشوفه منهه ينزاح الزعل تالي فوك الراس وافاهه الاجل والعمر منهه غصن جن منعِدِم ........................ السلبو منهه التراجي بالحرب ماتت ابحقد العده وهضم الغرب وابد ما حملت مصايب هالدرب ابناكَه عرجه مركبيهه أهل الاثِم ........................ اتعذبت والموت منهه من دنه انتظرته وجن غاب اكثر من سنه جا تأذت موتهه من اعتنه شبكت الراس وهوت مثل النجم ........................ ابد مارادت حياة اويه العده وعينهه المضروبه واعليهه اشسده على راس حسين ماتت ساجده وجن صلاه هالموت عدهه بهالاسِم الشاعر ياسر العارضي

موشح الامام السجاد ع هاي للسجّاد آخر ساعه اتزاحمت كل الخلگ لوداعه ـــــــــــــــــــــــــــــ ابو الباقر حین حانت ساعته امّدد ويلهب السم بچبدته اتزاحمت عالدار ناسه وشيعته تريد بلكي اتخفف من اوجاعه ـــــــــــــــــــــــــــــ دار ابو الباقر الليله مزدحم بعد ساعه اكتاب عمره ينختم بني هاشم ودّعت سيد العلم والامام المفترض بالطاعه ـــــــــــــــــــــــــــــ چان خیر ونعمه للناس الامام يحچي بالحب والتفاني والسلام ويكرم المعتاز ابن خير الكرام ودوم للمحتاج يترس صاعه ـــــــــــــــــــــــــــــ مثل حيدر يمشي بالليل البهيم بنفسه يبحث عالفقير وعاليتيم رحمه كله ورحمته اتداوي السقيم ونذر عمره الشيعته واتباعه ـــــــــــــــــــــــــــــ بعلمه وبخيره مِلاهه الاوعيه وكتب للعالم صحيفة ادعيه خطب واعلوم ومعارف توعيه وچان للیسأل یعیر اسماعه ـــــــــــــــــــــــــــــ الله يلعن بني مروان الوزغ احيايه ماعدهم عمل بس اللدغ قرّرت تاريخهه بدم ينصبغ وحكمت بألوانهه الخداعه ـــــــــــــــــــــــــــــ فوگ ضیم الشاهده بطف كربله ابو الباقر ياخلگ حيف انوله وبغدرهم چبده بالسم امتله والخبر ناعي المصايب شاعه ـــــــــــــــــــــــــــــ آخر انفاسه شيريد ابن النبي ايريد يقروله عله جروح السبي ايذكرونه بحال ربّات العبي وبالعقيله وبالخدر واضياعه ـــــــــــــــــــــــــــــ ارتجت اركان المدينه عالخبر وللبقيع انشال نعشه بالاثر ويلي وبصف الحسن گبره انحفر حسبي الله عالظلم واشياعه ـــــــــــــــــــــــــــــ الشاعر فراس المحمداوي https://telegram.me/aabas78 قصائد لكل ايام محرم اشترك بالقناة

#شـهادة_السجـاد_ع يا عــلـــي الـســجــاد اللـه يعــيـنــــك الصار بالطــــف انـت شـفتـــه بعيـنك =========================== آه يالمـسـمــوم يا زيــــن الـعــــــبــاد بنـــوح عـمــرك خلّــص بلبس السواد انت ياديـــن اللـــه يـــــا باب الـمـراد ادمـــوع خلـصـت الـعــمـــر وسنينك =========================== مـــن فـعــل ذاك الـولـــيد ابن الزنات اتموت بالسم تجـــرع امـــرار الحياة هز وجودك ضعضع اعروش الطـغـاة يالعمر خلـصـتــه حـــامـي الديـنـــك =========================== ايــسـاعدك الله اعــلـه عـمـلـة كربله كــلـهـا جــدامك تطـيـــح امـچــتلـه شحال ذاك الوحـده ماتــو كل هلــه نومــه صــارو وحـــدك امخـليــنـك =========================== بيوم عاشـــر شاهـــدت كــل الجره گلـبك امصـاب الذبـيــح ايـمـرمــره كل اخــوتك نامــت بــذاك الـثــــره وانت بـحــبال العــده امـچـتفيـنك =========================== انت شفت احسين طايـح عـلتـراب كثره بيه اجروح من دمـه الخضاب ايعينك الله شلون تحـمل هلمصاب الخيل چــدامك تـــدوس احسينك =========================== يا فـــرار العيله ياحــــرگ الخـيــم يا سبي النـــســوان زادك بالألـــــم بين گـــوم انجــاس ماعدهم شيم وانت وحـدك والعــده محوطينك =========================== اثر باقي الجامعـه اسلال الحديـد ابرگبتك مــــولاي وصلـت للوريـد وحدك ومچـتوف ومخـوّف يزيـد حتى وسـط المجـلس امگيدينـك =========================== ✍️عباس مالك آل عفريت نسألكم الدعاء

ابكل محله رايتج مرفوعه ومن دمه الشيعي تهل ادموعه ========================= رأيه الچ منصوبه عدنه ابكل گلب موقعه ومختومه من دم المحب عليج وعلينه يردون الحرب وثمن كل هاي الحرب مدفوعه ومن دمه الشيعي تهل ادموعه ========================= لا تهمين وعلي الكل يعتنيچ نسحگ اعله اشواربه اليدنه ليچ من تضيج الدنيا بينه ننتخيچ كلمتج فوگ العرش مسموعه ومن دمه الشيعي تهل ادموعه ======================== الشام من ام عون ماندري شيريد مچتفه ومسبيه وداهه ال يزيد وهسه خله عليه تتماده العبيد ذوله ولد الغيرة المنزوعه ومن دمه الشيعي تهل ادموعه ====================== بحضرتج هالسنه ممنوع العزاء لأن انتي أعلام ثورة كربلاء خلي أهل الكفر تسمع هالنداء قبر زينب تبقى تضوي اشموعه ومن دمه الشيعي تهل ادموعه ========================= صعبه عدنه وما تهون مصيبتچ وهالسنه بلا رأيه ظلت گبتج يالغريبه اتنادي ظلت شيعتج أو روسهم وگلوبهم موجوعه ومن دمه الشيعي تهل ادموعه ========================== الدنيا باچر تزهي ويدور الزمن ويه أبو صالح نجي نطوف الصحن ونجلي عنج زينب الهم والمحن وكلمن الضدج نكسر اضلوعه ومن دمه الشيعي تهل ادموعه ======================== https://t.me/ahssan313

موشح ( والله دنيا ) الى السيده زينب عليها السلام والله دنيــا اليــوم زينـب حـايره بعــد اهلها شلون تمشـي ميسـره **** والله دنيــا زينــب العــز والحياء بهيبه وي اخوتــه وصلت كربلاء وسفه غسلهم نزف فيض الدماء وبالبــواتــر والسحــگ متــوذره   **** والله  دنيـــا  البجــلالــه  مكلّلــه مشت مچتوفــه سبــي ويالعايله بعد مصــرع كــل اهلــها بكــربله عالهــزل اخــت الگــمـر متحيّـره   **** والله دنيا المـا نظـر ظلها العـدو هســه مسبيه بعــد عيــن الاخـو امها ياهــي وياهو يا نـاس الابو بت علي الكـرار وامها الطاهــره   **** والله دنيـا انـذال بالحــره تطوف بعد عين الكافـل وذيچ الچفــوف ألأّجتْ محميه بَرمَـاح وبالسيوف هسه مسبيه اعلـى هــزّل دايـّـره   ****   والله دنيــا بسوگ توگف بت نبي عـالهـزيلـه والـستــر بـس العِـبـي بعــد عيــن الكافــل يصـد اجنبـي ضعون زينب والكفيل اعلى الثره   ****   والله دنــيا الستــر كلـه والعفــاف ألها بالديوان شامـت وسفه شـاف رتبه زينــب تنحمل فوگ الچـتـاف شــرف والله بمتن اخوها صايــره   ****   والله دنيا بت علي وبت الرسـول شــامت بديـوان مـن جدها ينول هاي بت الزهره مــو بت الحجول** الشِـرف زينــب للخليقـه تصـدره   **** والله دنيـا الحـره بالخِربِه تبــات أعليها ملتمـه المحــن والنايبــات شلون ستــر الكــون كله مسلبات وكبل محد شاف من عدهن مـره   **** الشاعر موسى البديري **بت الحجول.. التي تتفاخر بالحجل وتثير الريبه في قصور ال اميه

حال زينب  (موشح ) هاي زينب شرد اوصف حالها أميسره وراس الشهيد  أگبالها ★★★★★ أگبالها راس الشهيد على الرمح علرمح ما نزل ليل ولا صبح شلون منظر ذاك حال المايصح روس  منها ماتعب  شَيَّالها ★★★★★ گبالها راس الشهيد ام الخدر شتعتب على الدهر يا دهر الغدر اشحاله فوگ الرمح يا نور البدر من بعد حرگ الخيم ورحالها ★★★★★ وشبعد يجرالها وبيها يمر خلاف اهلها بعد ما يسوه العمر الامر اصبح بيد كل ما له امر وناس فَرَّارَة احروب  أبطالها ★★★★★ صعبه لك هلنوم يا راعي الفرض واللئيم يصير راهي على الارض خويه صاحت من عليهم يعترض وين فرسان الحرب ورجالها ★★★★★ شلون دنيا اتحزمت لهل الوفه وبالحقد والجور  وانواع الجفه شلون يوم العاشر اعليها لفه البلكفاله اتكفلت بعيالها ★★★★★ لحد منيتها تهل أدموعها ونار يوم الطف توج  بضلوعها حسين والعباس ضل موضوعها فراگهم ما چان يوم إبالها الشاعر حسن لعيبي الحريشاوي