Sunflower 💛🌻

مرحبا 👀 الأغلب بيعتقد انو كلمة blue معناها أزرق 🔵 وهو فعلاً معناها هيك بصراحة 🌚 بس... هاد مش المعنى الوحيد 😁 لهيك فيك من blue تعبر عن أمور ما كانت تخطر على بالك... خليني قلك هيي 👀 • لو انت شفت البوست يلي كتبته أنا مبارح بعنوان " في آلام " و تفتحوا جروحاتك وحسيت بالحزن لما قرأته فبدل ما تقول I'm sad فيك تقول I'm blue 👀 عشان معناها: أنا حزين 🥲 • ولو ابن اختك الصغير اجا وحط القلم بعينك وانت ضربته وسألتك اختك ليش ضربته فبتقلها : He poked me in the eye with a pen out of the blue ويلي معناها: هو نغزني في عيني بالقلم من دون مقدمات أو فجاة • أما لما بدك تقول انو الشي الفلاني نادراً ما يحصل فبتقول: Once in a blue moon ويلي معناها: نادراً جداً • أما عبارة You can discuss with him until you're blue in the face, but he won't change his mind معناها: يمكنك أن تتناقش معه حتى تنقطع أنفاسك ولكنه لن يغير رأيه وهيك صار فيني قلكن انو مش كل blue يعني أزرق 👀🔵 وبس والله 👀🦋

وفي عبارة قرأتها اليوم بتقول : إذا لاحقتَ الفراشات فسوفَ تطيرُ الفراشاتُ بعيداً ولكن إن صنعتَ حديقةً جميلة فسوف تأتيكَ الفراشاتُ تباعاً وحتّى لو لم تأتِ ستظلُّ لديك حديقةٌ جميلة 👀🦋

صباح الخير 👀🤍 لا تنسوا الصلاة على النبي وقراءة سورة الكهف 🦋

في آلام ما بتحس فيها غير أنت والشي الوحيد يلي بيصير هو انك تحس فيها بس! ما بتعرف شو سببها ما بتعرف الحق على مين ما بتعرف كيف تتجنبها... تبعدها عنك... تقلها اتركيني! في آلام ما بيقدر الحدا يعبر عنها بالكلام ولا بالدموع ولا حتى بالصراخ ولا بأنه يتأوه في آلام بيكتمها الواحد لسبب... ما بيقدر يخلي الناس تشوفها لهالسبب ما بيقدر يخلي حدا يسمع صوتها لهالسبب ما بيقدر يعرّف الناس عليها لهالسبب في آلام بتجرح كيان الإنسان بتنهش روحه بتاكل عقله بتفتق شرايينه وبتحط جوا قلبه سم الدنيا فيها آلام من هاد النّوع مهما حاولنا ننكر ونبيّن مثاليين مهما ضحكنا رح يضل في آلام

نصيحة للطلاب يلي خلصوا باك و مقبلين على الجامعة .. بعدوا عن اي اختصاص فيه "مريول أبيض"✨🥼

صباح الخير 👀🤍 بعرف انو القصص بتنحكى قبل النوم... بس معلش خلوني قلكن قصة صباحيّة حلوة 😁 كان يا مكان في قديم الزمان كان في جندي ( خلونا نسميه أحمد ) وكان راكب على حصانه ورايح على الثكنة [ ويلي هيي مكان مخصص لإقامة الجنود ] ولمّا كان أحمد على الطّريق وقّفه فجأة شخص وكان هالشخص باين عليه أنه مستغرب كتييييير وقله : انت مالك سامع هداك الشخص يلي وراك شو عم يقلك؟ فالتفت الجندي أحمد لوراه ولقا شخص راكب على حصان برضو وكان عم يلحق بأحمد ويسبّه ويشتمه فسأل أحمد الشخص يلي وقّفه انو مين هاد؟ قله انو هاد هو مُراد وهو شخص بيكره العساكر جداً بس هي أول مرة بيلحق جندي لحتى يسبّه فقله أحمد تمام، بس ما فهمت ليش حضرتك وقفتني؟ فقله الشخص: لأن مراد عم يسبّك 🙂 فقلّه أحمد: ما فهمت وين المشكَل؟ قله الشّخص: ما سمعته لما قاللك يا حمار؟ فقله أحمد: لو سمحت فيك توصف شكلي؟ فاستغرب الشخص وبلش يوصف شكل أحمد فقله أحمد: تماماً، هي الصفات هيي صفات إنسان مش حمار، يعني لمّا هو قلي يا حمار كلامه ما عملني حمار 🙃🤍 فقله الشخص: بس هو كمان سبّك أكتر من هيك فقله أحمد: طيّب، هل مسبات مراد بتمنعني من الوصول للثكنة؟ فقله الشخص: أكيد لأ فقله أحمد: لكن خليه يقول يلي بدو ما دام ما رح يمنعني اني وصل للمكان يلي بدي ياه 🌚🤍 في حكمة بالقصة لازم تستنبطوها طبعاً ✨

مرحبا 👀 تنويه: بجوز يكون في جزأين للبوست لأن الكلام طويل، بس مفيد إن شاء الله 🫠 هلأ أول شي بدك تحدده قبل ما تقرأ كتب انو ليش أنا بدي اقرأ؟ لأعطيكن مثال... أنا جاوبت حالي على هاد السّؤال بالجواب التّالي: ١. أنا عم أقرأ مشان تزيد معرفتي بكافّة المجالات ٢. أنا عم اقرأ ككاتبة مش كقارئة بس ومن هون بلشت فعلاً اعرف لاقي الكتب يلي بتناسبني وصرت شوف الفائدة المرجوّة بهالكتب من الجواب رقم 1 عرفت اني لازم اقرأ كتب بجميع المجالات ومش بمجال واحد بس... لهيك بفضل الله قرأت كتب دينيّة... كتب بمجال تنمية الذات... بمجال السياسة... الفن... الأدب... علم النفس... العلوم الكونيّة... الخيال العلمي... الفلسفة... المجال البوليسي... التاريخ... الطب... علم الفلك... وحتى بعض دواوين الشعر 🙃  ومن الجواب رقم 2 عرفت اني لازم اقرأ كتب... روايات... مسرحيات... وأنواع مختلفة من الأدب... أتعرف على أنماط الكتابة وأساليبها... وأقرأ الشي يلي يصدمني... اقرأ للكتاب الكبار يلي فعلاً هنن أدباء... واقرأ شي متنوع لحتى خلي أنماط كتابة مختلفة من ثقافات مختلفة كلها مجموعة بقلمي 👀 لهيك قرأت من الأدب الروسي والفرنسي والانكليزي والألماني وأكيد العربي كمان وبعد ما حكينا عن الهدف من القراءة ضروري تعرف وين تلاقي كتب أصلاً 🌚 ففي عندكن تطبيق كان كتير مفيد بالنسبة إلي يلي هو تطبيق: أبجد بيعطيكن اقتراحات للكتب وبيعطيكن تقييم كل كتاب ( نجمتين أو ٣ أو ...) وبيعطيكن ملخص للكتاب أو لمحة عنه لحتى تقرروا إذا بيناسبكن هالكتاب ولا لأ وأحلى شي انو بيكون في قوائم يعني مثلاً في فئة الخيال العلمي بتلاقوا فيها كتب الخيال العلمي وفي فئة مثلاً للكتب الفلسفية وهكذا فالتطبيق رائع عن تجربة 😁  وكمان... في مكتبة ع غوغل اسمها مكتبة نور... حرفياً فيها كتيييييييييير كتب ففيكن تحملوا الكتب منها وفي مكتبة تانية ع غوغل اسمها فلة بوك او فولة بوك ( هيك شي 🥲 ) كمان فيها كتير كتب عشان تحملوا منها فأنا كنت اعتمد ببحثي ع هدول المكتبتين وبرضو... كنت مثلاً اكتب ع محرك البحث ع غوغل : اعطني اسماء أشهر عشر كتب تتحدث عن تاريخ دمشق ( مثلاً ) وبعدها صير ابحث ع ملخص لكل كتاب لحتى لاقي واحد منهن يعجبني ومن هالخطوة بعد ما حفظت أسماء كتاب كتير صرت ابحث مثلاً عن كل أعمال شكسبير أو كل أعمال ألبير كامو أو كل أعمال العقاد وصرت اقرأ منها حالياً بحس هالبوست كافي 👀 ح ابعتلكن بعد قليل صورة لتطبيق أبجد ودورلكن ع روابط المكاتب الإلكترونية وارفقلكن ياها وتفاعلوا عشان حسكن استفدتوا كتير وعشان كمللكن بالجزء التاني 😁 وبس والله 👀💙

صباح الخير 👀🤍 شايفين العبارة يلي بزاوية الصورة من فوق؟ 🌚 تماماً! Rise and shine! يلي فينا نعتبرها بديل ل Good morning بس مش لحد كبير 👀 عشان rise and shine هي عبارة حماسية وقليلة الرسمية تستخدم مع الأشخاص المقربين والأصدقاء والناس يلي من جيلنا بشكل عام معناها الحرفي: اصعد وأشرق بس اكيد نحنا ما بنترجم بحرفية 🙃 لهيك رح قول انو معناها هو: استيقظ بنشاط وحيوية هالعبارة بنستخدمها لما بدنا نأيقظ شخص بس بدنا نعطيه جرعة حماس مع الاستيقاظ لحتى يفز من الفرشة فوراً ويبلش يومه بنشاط فبنقله Rise and shine 👀🦋 مثلاً: Rise and shine, sleepyhead... We have a long day ahead of us معناها: استيقظ بحيوية أيها النائم! هناك يومٌ طويلٌ أمامنا برضو هالعبارة تستخدم لإيقاظ الشخص وبث الحيوية فيه مع تنبيهه انو في مهام كتير بهاد اليوم لازم يأنجزها بدون كسل ولأنو اغلبكن هون بالقناة طلاب متلي وعندكن مهام كتير فبدي قلكن Rise and shine وبلشوا تأنجزوا يلي عليكن 👀💜

بعرف انو وقت المونديال خلص بس الأشخاص يلي عندهن متلازمة " عمّك " لسا ما خلصوا 🙂 وعنجد الموضوع مش حلو فياريت تبطلوه يعني مش منطق كون قاعدة بأمان الله وفجأة حدا يعطيني معلومة مهمة جداً بتقول: ميسي عمِّك ✨

اختي الأنثى يلي انتِ متلي مافي داعي انك تردي ع شب جاي يتسلى معك أو بمصطلحكن الخارق " يعترفلك بحبه " ✨ عشان لو كان بيحب بيقلك عطيني رقم ابوكِ ولو ما كان جاهز لخطوة الخطبة بيكتم حبه بقلبه وما بيورطك ولا بيبعتلك اشياء سخيفة اختي الأنثى يلي انتِ متلي صدقيني انو ممكن بحياتك تضطري تحاكي شاب لحتى تاخدي معلومة معينة أو لعمل ما اضطراري ووقتها لازم تحكي بحدود وبأكبر درجة رسمية ممكن توصليلها بس لو ما كان الموضوع هو شي اضطراري فصدقيني مانك مجبورة تردي رح تحسيها تقيلة أول شي... بس لما تعملي الموضوع مرتين و ٣ رح تلاحظي انو ما رح تموتي اذا ما رديتي عليه ✨ ما رح تمرضي اذا ما حاكيتيه ✨ وهو بالمقابل ما رح يموت عشانك ما رديتي عليه ✨ الحياة ماشية... كرامتك حلوة... مشاعرك مش لعبة لحتى تعطيها لمين ما كان... وعواطفك مش رخيصة لحتى توزعيها لكل حدا... حطي حدود لحالك... لا تنطري حدا يحطلك حدود ويراقبك... خلي انتي يكون عندك حدود لانو اقوى حدود ممكن تقيد الإنسان هيي الحدود يلي هو بيحطها عشان لو كسرها رح تتغير نظرته لنفسه مانك مضطرة ترديله فولو ع الانستا بحجة " مشان ما يزعل " مانك مضطرة تاخدي وتعطي بحجة " مو زابطة ما رد " قيمتك كتير كبيرة... ما تقللي منها بهيك أمور تنويه: بقلك اختي الأنثى يلي انتِ متلي، عشان بخاف عليكِ متل ما بخاف ع حالي، والموضوع يلي بكره يصير معي بكره انو يصير معك برضو وبس والله 🦋👀

صباح الخير 🦋 حكمة اليوم : لا تنطر الشمس لحتى تشرق أشرق أنت بدالها ليش شو ناقصك؟ 👀

سأظلُّ طولَ العمرِ بابكَ أقرعُ يا خيرَ من ذا يستجيبُ ويسمعُ ما لي سوى ذلّي إليكَ وسيلة والقلبُ يبكي والمدامعُ تدمعُ إذا منعتَ فأنتَ ربي خالقي حاشا يداي لغير جودكَ ترفعُ 🦋

ولمّا تواسي حدا رح تلاقيه قلك : شكراً وبطبيعة الحال _ باللغة الانكليزية _ لما حدا يقلنا شكراً فوراً بيخطر ع بالنا نقله you're welcome 👀 بس صارت كتير مستهلكة... لهيك خليني قلكن كم عبارة معناهن بشكل عام " على الرحب والسعة " 😁 1. Anytime معناها : في أي وقت ( يعني أنك حتضل جاهز للمساعدة دائماً ) 2. My pleasure أو the pleasure is all mine معناهن: بكل سرور أو لي الشرف 3. Don't mention it معناها : لا داعي لذكر ذلك/ على الرحب والسعة 4. I know you'd do the same for me المعنى المقصود: لا شكر على واجب، أعلم أنك لو كنت مكاني لفعلت نفس الشيء من أجلي 5. No worries معناها : لا عليك أو ولا يهمك 👀 وبس والله 👀🦋

وقت تواسي شخص مكسور ومجروح فما تعمل هيك لأنك متعاطف معه ولا تفكّر انك مفضّل عليه وانو لازم يكون ممنونك بل اعتبر انك عم تحكي مع حالك المستقبلي يلي رح يكون مكان هالشخص مستقبلاً _ رح تكون مكسور بنفس الطريقة ومجروح بنفس عمق جرحه والحزن عم يلعب بخاطرك والهم عم ياكل من روحك كل دقيقة وقتها ما رح تكون بحاجة حدا يتعاطف معك... رح تكون بحاجة حدا مهتم... مقدّر للموقف...وعم يطبطب عليك... مش لأنه متعاطف معك... بس لأنه بيعرف كميّة الضّعف البشري وانو ممكن يمر بهيك حالة بالمستقبل وهو برضو رح يحتاج شخص تاني 🦋💙

بمتل هاد الوقت ولمدّة سنتين كنت ضل فايقة ادرس كان ببالي مجموع خارق والكل كان شايف انو رح أوصله كنت قول +230 ما كنت أحسب كم ساعة عم ادرس باليوم كنت بس ادرس ومستمتعة جداً مستمتعة بهالفرصة يلي ربنا عطاني ياها بيوم ما كانت رفيقتي عم تسألني ع أوقات دراستي واتصلت عليي بمتل هالوقت قالتلي اتصلت وما عتلت هم انك ممكن تنزعجي لأني بعرف انك بهيك وقت بتكوني عم تدرسي قالتلي انها اتصلت عليي لحتى تخبرني أنها حسبتلي كم ساعة عم ادرس باليوم 13 ساعة يومياً ما نقص عدد الساعات هاد إلا 3 أيام وقت وفاة والدي باليوم الرابع رجعت لنفس الإنجاز كان استاذ الفيزيا وقت ينسى الكتاب يعتمد عليي لأنقله النظري... بيعرفني مكررة الكتاب كتير... عايدة المنهاج كتير... ودارسة الفيزيا بكل حب ووقت وصلنا لوحدة الرواية... كان أستاذ العربي يقلي لالخص قصة كل رواية لرفقاتي... بيعرفني قرأت كتير كتب وروايات أما استاذ الإنكليزي كان يفضّل انو أنا أقرأ النصوص ويقلي أنه هو بيفتخر أنه عنده طالب بلكنة أمريكية ممتازة كانوا كل رفقاتي فرحانين فيني... بعمره ما حدا غار مني أو تمنالي عدم التوفيق... عشان كلهن كانوا بيعرفوا المجهود الجبار يلي عم قدمه... كانوا من باب المزح يقولولي: ع قد ما بشوفك ماسكة الكتاب بحس ح تجمعي ٢٤١ 😶‍🌫 كان أخي الكبير كل يوم بمتل هالوقت يعطيني بسكوتة يقلي هي هدية تعبك... هي قليلة... بس اذا بدي جيب شي ع قد تعبك حتى الدنيا كلها رح تكون قليلة بهالحالة كان يقلي حتى لو ما بتجمعي متل ما بدك رح افرح عشانك بتدرسي بطريقة رهيبة عنجد ما فيني انسى هالتفاصيل... هالذكريات... وما فيني ما احمد ربنا أنه عطاني القوة لحتى كمل هالسنة بهالشغف... ما فيني ما احمد ربنا عشان عطاني القوة لحتى حط كل هالمجهود بدراستي... ما فيني ما اشكر ربنا عشان احاطني بناس لطفاء وجهولي كل الدّعم واللطف دائماً...ما فيني ما أحمد ربنا عشان أصلاً عطاني الفرصة اني ادرس هالسّنة وواثقة انو حيعطيني لسا فرصة أحسن لحتى أتميّز بالفرع يلي هو بيخترلي ياه 🤍🦋 كل ما بتذكر علامتي بالرياضيات بحس بالغباء... وبأنو أنا ما كنت الحدا يلي لازم كونه... بس لما بتذكر تفاصيل هالسنة بأدرك انو انا الحدا يلي بعون ربنا كافح سنتين رغم كل الظروف... انا الحدا يلي حصّل هيك علامة لحكمة موجودة عند ربنا... انا الحدا الراضي بقضاء وحكمة ربنا... انا الحدا يلي ناطر العوض من هالرب الكريم 🤍

📍حفلات توديع العزوبية 📍الحنّة 📍حفلة الخطوبة 📍والعرس عم يصير فيها تجاوزات من نوع آخر! ولأ... أنا مش حدا بيحب يقتل الفرح 👀 بالعكس أنا اكتر حدا بيحب يفرح بس ضمن المشروع 🙃  لهيك رح يدايقني جداً أجواء حفلات العزوبية يلي فيها تشبّه كبير بأجواء الكفّار بالحفلات... والتشبّه جداً كبير وملحوظ وبيبدأ من ألوان الشراب يلي بتميل للشفافيّة( يلي بتشبه مشروب معين إلى حدٍ ما) وطريقة صبها بالكاسات وحتى ضرب الكاسات ببعضها وكتير الموضوع مؤلم انو البنات يلي عاملين هي الحفلة محجبات وملتزمات بالحجاب بس وقت يعملوا جو معين بالحفلة بيصوروه وبيروحوا يحطوه ستوري! الأغرب من هيك انو كلنا كمسلمين بنعرف شو الأجزاء يلي لازم ما تبين من الانثى وشو الأجزاء يلي لازم ما تبين من الذكر بس أنتِ كبنت محجبة تحطي ستوري ساعد ايدك مبين فيها بوضوح؟ عفواً؟ ترا الساعد عورة وحتى الكف عورة وقت يكون فيه زينة! يعني مثلاً البنت يلي بتنخطب بتكون مركبة اضافر أو حاطة مناكير بالإضافة لخاتم الخطوبة بإصبع ايدها وأكيد الموضوع لا يخلو من كم اسوارة وبتصورلك هالميكس كله وبتحطه ستوري! ترا كف ايدك مش حلال بهالحالة عشان فيه كل انواع الزينة الموجودة بالكوكب 😶‍🌫 أما تجاوزات الحنّة عكّرت أجواء الكوكب بصراحة 👀 لأنو كتير غلط تصوريلي الحنّة يلي ع ايدك وتحطيها ستوري والحنة يلي ع ساعدك والحنة يلي ع أجرك!! ووقت تكوني لابسة فستان اله أكمام طويلة بس هالاكمام شيفون فأكيد غلط تصوري ايدك وساعدك بهالحالة 🌚 عشان ما بيهمني انو كم طويل ع قد ما بكون مهتمة لأنو الكم شيفون ويلي تحته مبيّن 👀 وتريند " رسالة العمر " يلي بتكتبي فيها جميع أنواع الغزل لزوجك وبتصوريها وتنشريها حابّة اسألك... انو جد ليش بتنشروا هيك شي؟؟؟ ترا الغزل هو كلام خاص يقال بين شخصين يلي هنن الزّوجين فأنا كشخص تالت ليش لازم شوف هاد الكلام؟ جد عيب بصراحة جد عيب وقت صرنا نطالع أمورنا الخاصة بس مشان التريند وحب الظهور... عيب وقت نتجاوز وننشر اجزاء من جسمنا كستوري ع الانستا وتطبيقات تانية وما نهتم بقديش في كمية شباب ممكن تشوفها غلط نحط هيك صور كبروفايل ليشوفها الرايح والجاي غلط ننشرها ع العلن ويشوفوها شباب الوطن العربي غلط غلط غلط وجد يا ريت نتراجع عنو لأن صار الموضوع كبير وبس والله 👀🦋

بنت خالي عمرها ٥ سنوات فكانت عم تسمع نقاش بين امي وأمها و أنا على موضوع معيّن ولمّا نحنا " الكبار " قلنا انو ما في حل قالتلنا: لا تخافوا عشان الله عندو حل لكل شي 🫠💜 ما خطرلي أبداً إني ممكن أتلقى عبارة بهيك بلاغة ودرس بهيك جمال من طفلة بخمس سنوات 🦋

هل خطر ببالك انو شو هو المرادف المعاصر لمصطلح " المشي مع القطيع"؟ هو التريند! 👀 _ تعوا بالأول لقلكن من ايمت وانا عم فكر اكتب هاد البوست من حوالي 15 يوم اجتمعت مع كذا حدا بعرفهن... وقتها قرروا أنهن يشتروا نوع كولا محدد فقلتلهن انا انو ليش ممكن نجيب هاد النوع بينما هو بصراحة مالو طيّب؟ فكان الرد يلي تلقيته : انو هو فعلاً مش طيّب بس نحنا رح نجيبه عشان تريند!  من هديك اللحظة ولحد هاللحظة عم أدرك قديش ممكن سلوك المشي مع القطيع عم يأثر ع قراراتنا وعم يعملنا عبارة عن " إمّعة " حتى معد قدرنا نختار مشروب نحنا بنحبه! من وقتها لحد هلأ وأنا عم حاول لاقي مصطلح بليغ لاوصف فيه هاد الشي ولقيت انو المشي مع القطيع هو : إعارة قدميك لشخصٍ آخر ليمشي بهما في سبيلٍ يراهُ هو مناسباً لك! فليش ممكن الواحد يمشي مع القطيع؟ هلأ بصراحة في أسباب عدّة أوّلها هو: 1. الخوف من الإقصاء الاجتماعي 🙃 عشان سألت كتير ناس ليش بتعملوا هيك وقالولي انو كل الناس بتعمل هيك وفعلاً هاد هو الخوف من الإقصاء الاجتماعي وهو انو الشخص يعمل متل الكل عشان بيخاف انو الكل ينبذوه لما يعمل شي مختلف عنهن 2. توفير المجهود العقلي عشان يعني لما تلاقي حدا يفكر ويقرر بدالك بيكون اريحلك ما هيك؟ 😶‍🌫 3. تجنب مسؤولية الخطأ: عشان لما يكون التريند خطأ فالناس الماشيين مع القطيع رح يوفروا ع أنفسهن الإحساس بالذنب ويقولوا : الكل كان عم يعمل هيك _ بس هل فكرنا انو قديش سلبي انو نروح ونمشي مع القطيع؟ طبعاً هو كتير سلبي عشان بيحرمك من كيانك المستقل ومن تفكيرك المستقل وشخصيتك المستقلة وبيخليك الحدا يلي هو دائماً عبارة عن تابع وهو كتير سلبي عشان بيصير كتير سهل انو الناس يتلاعبوا فيك... لأنهن بيقدروا يخلوك ترتكب الخطأ بدون ما تفكر فلهيك يا ريت نأدرك قيمة العقل يلي عطانا ياه ربنا لحتى نفكر فيه مش لحتى نترك التفكير لغيرنا ونعرف انو كتير غلط انو نمشي مع القطيع او نقلد تقليد أعمى أو نكون عبارة عن إمعة او انو نلحق التريند 👀 يا ريت ندرب حالنا على : ليش؟ ليش رح اعمل هيك؟ ليش عم يعملوا هيك؟ ليش ممكن اشتري هاد المنتج؟ ليش ممكن اشرب هاد المشروب؟ ليش ممكن اطلع من قناة فلان؟ ليش ممكن اعمل هي الفعالية؟ فإذا كان جواب كل الاسئلة السابقة هو : لأنو تريند .. أو لأنو الكل عم يعمل هيك فعنجد يا ريت نراجع حالنا 🙃 ونفكر عشان التفكير نعمة وغلط نحرم حالنا منها بإرادتنا 🤍 وبس والله 👀🦋

في بنوتة صغيرة جداً شافتني بالشارع فسألتني شو عم تعملي قلتلها عم قدم اعتراض فهدتني هي الوردة عشان عم قدم اعتراض ✨🦋👀